1-2. Kai maksud kata-kata Jesus si lit bas Johanes 4:35, 36?

JESUS sangana bas perdalanen, ilewatina juma-juma si dem alu sinuan-sinuan si mbaru denga turah. (Joh. 4:3-6) Kira-kira empat bulan nari maka nggo banci iperani sinuan-sinuan e. Emaka banci saja mamang ate murid-murid Jesus sanga ikatakenna, “Nenlah juma-juma nggo megersing janah nggo banci iperani.” (Baca Johanes 4:35, 36.) Kai maksud Jesus?

² Kepeken si sangana icakapken Jesus labo kerna mperani sinuan-sinuan, tapi kerna mperani ntah pe mpepulung kalak guna jadi muridna. Cuba ukuri kai si terjadi sope ikataken Jesus kerna si e. Mbaru denga erberita ia man sekalak diberu arah Samaria, aminna pe kalak Jahudi biasana la nggit erurusen ras kalak Samaria. Kepeken nggit diberu ndai megiken Jesus! Iceritakenna ka man kalak Samaria si debanna kerna kai si ikataken Jesus. Janah sanga ngerana Jesus kerna juma si “nggo megersing janah nggo banci iperani,” kalak Samaria e sangana bas perdalanen guna njumpai Jesus gelah banci erlajar terbuen arah ia. (Joh. 4:9, 39-42) Nina sekalak pakar Pustaka, “Mis kalak e reh ndahi Jesus janah begikenna ia. Enda buktina kalak e bali bagi sinuan-sinuan si nggo banci iperani.”

3. Adi bagi Jesus tanggapenndu nandangi kalak si deban, kai pengaruhna man bandu?

³ Uga nge tanggapenndu nandangi kalak si ijumpaindu bas erberita? Bali nge kapndu kalak e bagi sinuan-sinuan si nggo banci iperani? Adi bali, banci bagenda pengaruhna man bandu: Si pertama, sadar me kam maka dahin erberita e seh kel pentingna janah kentisik nari ngenca waktuna. Masa rani e labo lit rasa lalap, emaka sigunakenlah waktu si lit denga. Si peduaken, meriah kari ukurndu sanga lit kalak ngalo-ngalo berita  si meriah. Nina Pustaka, ‘Kalak ermeriah ukur tupung paksa peranin.’ (Jes. 9:3) Janah si peteluken, ianggapndu me tiap kalak calon murid Kristus, alu bage banci isesuaikenndu carandu erberita gelah nggit kalak megikenca.

4. Kai si banci sipelajari arah Rasul Paulus bas artikel enda?

⁴ Banci saja iakap piga-piga pengikut Jesus, kalak Samaria la banci jadi murid Jesus, tapi la bage iakap Jesus. Iakapna kalak e calon murid-muridna. Kita pe arus ka bage. Siakap min kalak bas daerahta calon murid Kristus. Rasul Paulus contoh si mehulina kel man banta. Kai si banci sipelajari arah ia? Bas artikel enda sibahas kari (1) uga cara Paulus gelah itehna kai si iteki kalak, (2) uga Paulus erusaha ngangkai kai si erban kalak tertarik, janah (3) uga tanggapen Paulus nandangi kalak si ijumpaina sanga erberita, eme ianggapna kalak e calon murid Jesus.

5. Engkai maka banci iangkai Paulus cara rukur kalak si lit bas ingan pulung kalak Jahudi?

⁵ Rusur Paulus erberita bas ingan pulung kalak Jahudi. Misalna, bas ingan pulung kalak Jahudi i Tesalonika, “telu wari sabat erturut-turut, isampatina [kalak Jahudi] ngangkai Kitap si Badia.” (Perb. 17:1, 2) Paulus e kalak Jahudi, emaka mbelin kemungkinenna la ia mbiar erberita bas ingan pulung kalak Jahudi e. (Perb. 26:4, 5) Janah perban iangkai Paulus cara rukur kalak Jahudi, menukah iakapna erberita man kalak e.​—Pil. 3:4, 5.

6. Kai nge bedana kalak bas pajak i Aten ras kalak bas ingan pulung kalak Jahudi?

⁶ Kenca isiksa Paulus janah ipelawes ia arah Tesalonika bage pe arah Berea, seh me ia i Aten. I je, erberita ka ia bas ingan pulung kalak Jahudi. ‘Isampatina kalak Jahudi bage pe kalak si deban si nembah Dibata guna ngangkai Kitap si Badia.’ (Perb. 17:17) Tapi, sanga erberita Paulus bas pajak, labo kalak Jahudi si ijumpaina. I je ngerana-ngerana ia ras kalak pentar bage pe ras kalak arah erbage bangsa. Kai si icakapken Paulus iakap kalak e sada “pengajaren si mbaru.” Nina kalak e man Paulus, “Ipetandakenndu man kami kai si lenga pernah ibegi kami.”​—Perb. 17:18-20.

7. Menurut Perbahanen Rasul-Rasul 17:22, 23, kai buktina isesuaiken Paulus carana erberita?

⁷ Baca Perbahanen Rasul-Rasul 17:22, 23. Sanga erberita Paulus man kalak arah bangsa si deban i Aten, cara si igunakenna erberita la seri ras cara si igunakenna man kalak Jahudi. Banci saja iukuri Paulus, ‘Kai nge si iteki kalak Aten?’ Iperdiatekenna kai si lit  i sekelilingna bage pe upacara agama si ilakoken kalak e. Kenca si e, iusahaken Paulus ndarami kai saja si seri arah kiniteken kalak e ras ajaren Kitap si Badia. Nina sekalak pakar Pustaka kerna Paulus, “Selaku kalak Kristen si latar belakangna kalak Jahudi, itehna maka labo isembah kalak Junani Dibata ‘si benar,’ eme Dibata si isembah kalak Jahudi ras kalak Kristen. Tapi iusahakenna mbuktiken maka Dibata si iberitakenna e situhuna labo la itandai kalak Aten.” Jelas me, nggit Paulus erban penyesuaien bas carana erberita. Ikatakenna man kalak Aten maka beritana e rehna arah “Dibata si La Itandai,” si sedekah enda isembah kalak e. Aminna pe la iteh kalak arah bangsa si deban isi Kitap si Badia, labo mis iakap Paulus kalak e la banci jadi kalak Kristen. Tapi, ianggap Paulus kalak e bali bagi sinuan-sinuan si nggo banci iperani, emaka isesuaikenna carana erberita man kalak e.

8. (a) Uga nge carana gelah itehndu kai agama kalak si ijumpaindu sanga erberita? (b) Adi lit si ngataken maka nggo lit agamana, uga nge nindu njawapsa?

⁸ Bagi Paulus, usahakenlah mperdiateken kai saja si banci nampati kam ngangkai kai si iteki kalak bas daerahndu. Misalna, banci iperdiatekenndu barang-barang ntah pe hiasen kai si lit bas rumahna ntah pe bas kendaranna. Selain si e, banci ka siteh kai agamana arah gelarna, peruisna, penampilenna, ntah pe kai si ibelaskenna. Ntah, banci saja mis ikatakenna maka nggo lit agamana. Sekalak perintis istimewa si gelarna Flutura biasana bagenda nina njawapsa, “Reh kami ku jenda labo ate kami maksa kam gelah ikutindu kiniteken kami, tapi isungkun kami ate kami pendapatndu kerna sada topik si menarik.”

9. Sanga erberita man kalak si tutus atena nembah Dibata, topik kai nge si banci ibahasndu?

⁹ Topik kai nge si banci ibahasndu ras kalak si tutus atena nembah Dibata? Usahakenlah ndarami topik si lit persamanna ras kam. Banci saja sada ngenca Dibata si isembahna, tek ia maka Jesus e Juru Selamat, ntah pe banci saja ia tek maka lanai ndekah imasapken me kejahaten. Kenca si e, gunakenlah e gelah banci ipesehndu berita arah Pustaka. Alu bage, banci saja nggit kalak e megiken kam.

10. Kai nge si arusna siusahaken? Janah ngkai?

¹⁰ Ingetlah, banci saja lit kalak si la tek nandangi kerina si iajarken agamana. Emaka aminna pe nggo itehndu kai agamana, usahakenlah ndarami kai situhuna si itekina. Nina sekalak perintis istimewa i Australia si gelarna David, “Gundari nterem kalak si igabungkenna ajaren agama ras pemeteh doni enda.” Nina sekalak turang seninata i Albania si gelarna Donalta, “Piga-piga kalak si  ijumpai kami ngataken maka lit nge agamana, tapi la ia tek lit Dibata.” Nina sekalak utusen injil i Argentina, “Piga-piga kalak tek man Dibata Si Telu Sada, tapi situhuna la kalak e tek maka Bapak, Anak, ras kesah si badia e sada.” Nina ka, “Adi nggom siteh kerna si e, reh nukahna siakap ndarami topik si lit persamanna ras ia.” Emaka, usahakenlah ndarami kai si tuhu-tuhu iteki kalak. Alu bage, banci iusihndu Paulus, si ‘ngelakoken kai pe guna erbage-bage jelma.’​—1 Kor. 9:19-23.

11. Menurut Perbahanen Rasul-Rasul 14:14-17, penyesuaien kai si iban Paulus sanga erberita man kalak i Listera?

¹¹ Baca Perbahanen Rasul-Rasul 14:14-17. Idarami Paulus kai si erban kalak tertarik, kenca si e isesuaikenna carana erberita. Misalna, sanga erberita Paulus i Listera, kalak si ijumpaina la iangkaina kel isi Kitap si Badia. Janah lit ka si la lit pemetehna kerna isi Kitap si Badia. Emaka, icakapken Paulus kerna kai si nggo iteh kalak e, misalna kerna musim rani ntah pe kerna kegeluhen si ermeriah ukur. Igunakenna kata-kata ras contoh si banci mis iangkai kalak.

12. Uga carana gelah itehndu kai si menarik iakap kalak janah gelah banci isesuaikenndu carandu erberita?

¹² Usahakenlah ngangkai kai si menarik iakap kalak bas daerahndu, kenca si e sesuaikenlah carandu erberita. Ja nari banci itehndu kai si menarik iakap kalak sanga jumpa kam ras ia ntah pe sanga kam erdalan muat ku rumahna? Sekali nari, perdiatekenlah kai si lit i sekelilingndu. Banci saja sangana ia ngurus sinuan-sinuanna, mbaca buku, mpekena kendaranna, ntah pe si debanna. Adi cocok, banci imulaindu ngerana alu ncakapken kai si sangana ilakokenna. (Joh. 4:7) Janah arah baju si ipakena pe banci itehndu ja nari asalna, kai pendahinna, ntah pe ise tim olahraga si ijagokenna. Nina sekalak turang seninata si gelarna Gustavo, “Ercakap-cakap aku ras sekalak anak perana si umurna 19 tahun. Ipakena baju kaos si gambarna penyanyi si terkenal. Kusungkun ia kerna penyanyi e, kenca  si e ikatakenna ngkai maka jadi atena penyanyi e. Dungna, nggit ia erlajar Pustaka janah gundari ia nggo jadi sekalak turang seninata.”

13. Uga carana gelah nggit kalak erlajar Pustaka sanga itawarkenndu ia erlajar?

¹³ Sanga itawarkenndu erlajar Pustaka man kalak, jelasken man bana ngkai maka erguna kel pelajaren e bana. Alu bage, banci saja dungna ia nggit erlajar Pustaka. (Joh. 4:13-15) Misalna, lit sekalak turang seninata si gelarna Poppy. Ia iundang sekalak diberu si berminat ku rumahna. Sanga idah Poppy ijazah i dinding rumah diberu e, itehna me maka diberu e sekalak dosen bas bidang pendidiken. Ijelasken Poppy maka Saksi-Saksi Jahwe pe ngajari kalak arah program pelajaren Pustaka ras perpulungen. Dungna nggit diberu e erlajar Pustaka, paginna reh ia ku perpulungen, janah la ndekah kenca si e reh ka ia ku kebaktin wilayah. Setahun kenca si e, iperidiken ia. Cuba ukuri, ‘Kai nge si menarik akap kalak sanga kudahi ia mulihi? Banci nge kutawarken erlajar Pustaka alu cara si menarik iakapna?’

14. Uga carana gelah banci isesuaikenndu tiap pelajaren Pustaka ras keadan kalak si erlajar ras kam?

¹⁴ Kenca nggit kalak erlajar Pustaka, banlah persiapen ope kam erlajar ras ia. Cuba ukuri latar belakangna ras kai si menarik iakapna. Sanga kam persiapen, tentuken ayat si apai kari si ibacandu, video kai si iputarkenndu, ras perumpaman kai si iceritakenndu guna njelasken ajaren Pustaka. Ukurilah, ‘Kai nge si menarikna iakapna ras si banci kena ku pusuhna?’ (Kua. 16:23) I Albania, lit sekalak perintis si gelarna Flora. Sekalak diberu erlajar Pustaka ras ia. Pernah bagenda nina diberu e alu tegas, “La aku tek ajaren kekeken.” La ipaksa Flora diberu e gelah mis tek man ajaren e. Nina Flora, “Kuakap arus lebe itandaina Dibata Jahwe, perban Ia si njanjiken kekeken.” Mulai je nari, tiap erlajar Flora ras diberu e, lalap itekankenna kerna kekelengen, kepentaren, ras kuasa Jahwe. Dungna, tek me diberu e ajaren kekeken. Gundari, ia nggo jadi sekalak Saksi Jahwe si semangat.

15. Menurut Perbahanen Rasul-Rasul 17:16-18, kai saja si lit i Aten si erban Paulus terganggu? Tapi, ngkai maka terus ia erberita man kalak e?

¹⁵ Baca Perbahanen Rasul-Rasul 17:16-18. Aminna pe bas kota Aten nterem kel kalak nembah berhala, ngelakoken perbahanen seks si salah, ras tek man pemeteh doni, la mis iakap Paulus kalak e la banci jadi murid Kristus. Janah aminna pe ihina kalak e Paulus, terus ia erberita man kalak e. Paulus saja pe mbarenda “tukang hina, tukang niksa, janah sombong.” Tapi, dungna ia jadi kalak Kristen. (1 Tim. 1:13) Tek kel Jesus maka Paulus e banci berubah. Emaka Paulus pe bage ka man kalak Aten. Janah lit piga-piga kalak i je si dungna jadi pengikut Kristus.​—Perb. 9:13-15; 17:34.

16-17. Kai buktina kalak arah erbage latar belakang banci jadi murid Kristus? Ban contohna.

¹⁶ Bas abad pertama, la seri kerina latar belakang kalak si jadi murid Kristus. Sanga itulis Paulus surat man kalak Kristen si tading bas kota Korinti i Junani, ikatakenna maka piga-piga anggota bas runggun e mbarenda kalak jahat ntah pe pernah ngelakoken perbahanen seks si salah. Kenca si e nina, “Mbarenda, lit kalak si bage i tengah-tengah kena. Tapi gundari kena nggo ibersihken.” (1 Kor. 6:9-11) Adi nggeluh kam paksa si e, tek ka nge kam maka kalak e banci berubah janah jadi murid Kristus?

¹⁷ Gundari, nterem kalak nggit robah gelah banci jadi murid Kristus. Misalna, perdiateken pengalamen sekalak perintis istimewa i Australia si gelarna Yukina. Bas sada wari, i kantor jual beli properti, idah Yukina sekalak  diberu si ertato. Nina Yukina, “Tangtangna sangsi nge aku, tapi dungna kucakapi ia. Kepeken meriah kel akapna ncakapken isi Pustaka, janah piga-piga tatona pe ibuat arah ayat-ayat Masmur!” Dungna diberu e pe mulai erlajar Pustaka janah reh ku perpulungen. * Pengalamen e erban Yukina sadar maka ise pe banci berubah kenca ibegina berita Pustaka la soal uga pe ia jelmana.

18. Engkai maka la banci sihakimi kalak si deban?

¹⁸ Payo nge ikataken Jesus juma nggo banci iperani perban iarapkenna nterem kalak si ngikutken ia? Lang. Iteh Jesus arah nubuat maka teremen nge kalak la erkiniteken man bana. (Joh. 12:37, 38) Janah Jesus pe banci itehna isi pusuh manusia. (Mat. 9:4) Aminna pe bage, tetap iutamaken Jesus nampati kalak si nggit erkiniteken man bana, janah semangat kel ia erberita man kerina jelma. La banci siteh isi pusuh kalak, emaka pasti la ateta nghakimi kalak bas daerahta erberita. Tapi, sianggap kerina kalak calon pengikut Kristus. Nina Marc, sekalak utusen injil i Burkina Faso, “Rusur kel kuakap maka kalak si banci maju, kepeken ia nge dungna si ngadi erlajar. Tapi kalak si kuakap la banci maju, kepeken ia nge dungna si maju. Arah e erlajar aku, perlu kita penampat kesah si badia Jahwe gelah banci kita jumpa ras kalak si tuhu-tuhu merhat meteh kebenaren.”

19. Uga arusna tanggapenta nandangi kalak bas daerahta erberita?

¹⁹ Tangtangna, banci saja sitik ngenca iakapndu kalak bas daerahndu erberita si bali bagi sinuan-sinuan si nggo banci iperani. Tapi ingetlah kai si ikataken Jesus man murid-muridna. Juma nggo megersing janah nggo banci iperani. Kalak banci berubah janah dungna jadi murid Kristus. Bagi ‘erta-erta’ iakap Jahwe kalak e. (Hag. 2:7) Adi bagi Jahwe ras Jesus carata rukur nandangi kalak si deban, pasti siusahaken meteh uga latar belakangna ras kai si menarik iakapna. Sianggap kalak e calon turang seninata, labo kalak asing.