1-2. Weh Jeezas mi meen wen ih seh dehnya werdz da Jan 4:35, 36?

WEN Jeezas mi-di chravl chroo di feel dehn, moa dan laikli di krap dehn mi jos staat tu groa. (Jan 4:3-6) Onli foa moa monts an ih wuda mi bee taim fi haavis di krap. Soh ih mosi mi song schraynj wen Jeezas seh: “Luk rong ahn si how di feel dehn raip raip ahn redi fi reep.” (Reed Jan 4:35, 36.) Weh hihn mi meen?

² Moa dan laikli, Jeezas mi-di taak bowt wahn simbolik haavis a peepl. Kansida weh mi jos hapm. Eevn doa Jooish peepl mi naamali avoid peepl fahn Samayrya, Jeezas mi stil preech tu wahn uman fahn deh—ahn shee mi lisn tu ahn! Shee mi tel di Samaritan peepl bowt Jeezas, ahn wail hihn mi-di taak bowt di feel how dehn mi “raip raip ahn redi fi reep,” wahn krowd a Samaritan peepl mi deh pahn dehn way fi laan moa fan ahn. (Jan 4:9, 39-42) Wahn ekspert mi rait bowt dis akonk: “Di fak dat di peepl mi hori fi kohn meet Jeezas ahn lisn tu ahn . . . mi shoa dat dehn da-mi laik grayn weh mi redi fi haavis.”

3. If wi vyoo peepl laik how Jeezas mi vyoo dehn, how dis wahn help wi fi du beta wen wi di preech?

³ Wat da yu atichood tuwaadz peepl hoo yu preech di gud nyooz tu? Yoo luk pahn dehn laik grayn weh raip ahn redi fi reep? If dis da di kays, chree tingz wahn hapm. Fers, yu wahn tek di preechin werk moa seeryos. Di taim lef fi di haavis shaat, soh no taim deh fi ways. Sekant, yu wahn bee hapi wen yu si peepl di rispan tu di mesij a di gud nyooz. Di Baibl seh: “Peepl rijais joorin di haavis taim.” (Isa. 9:3) Ahn terd, yu  wahn si dehn az peepl weh ku bee wan a Krais disaipl. Ahn bikaaz a dat yu wahn chaynj yu prezentayshan fi soot weh dehn inchrestid eena.

4. Weh wi wahn laan fahn di apasl Paal eena dis aatikl?

⁴ Jeezas neva ton ih bak pahn di peepl a Samayrya, laik weh ih disaipl dehn mi du. Insteda a dat, hihn mi si dehn az peepl weh ku bee wan a fi hihn disaipl. Wi need fi vyoo di peepl eena wi teritori di sayhn way tu, laik peepl weh ku bee Krais disaipl. Di apasl Paal mi set wahn veri gud egzampl fi wi fala. Weh wee ku laan fahn hihn? Eena dis aatikl, wi wahn diskos how Paal (1) mi laan weh di peepl weh hihn preech tu bileev eena, (2) mi akchwali noa weh dehn mi inchrestid eena, ahn (3) mi si dehn az peepl weh ku bee Jeezas disaipl.

5. Wai Paal kuda mi andastan di peepl weh mi-di lisn tu ahn eena di sinagag?

⁵ Paal mi preech eena di sinagag dehn wahn lat. Fi egzampl, eena di sinagag da Tesalonaika, “fi chree schrayt Sabat ih gaahn deh fi reezn wid [di Jooz].” (Aks 17:1, 2) Moa dan laikli, Paal mi feel komfatabl eena di sinagag. Hihn mi kohn fahn wahn Jooish bakgrong. (Aks 26:4, 5) Soh Paal kuda mi andastan how di Jooz mi feel ahn hihn mi aybl fi ga korij wen hihn mi-di preech tu dehn.—Fil. 3:4, 5.

6. How di peepl weh mi deh eena di maakit plays da Atenz mi difrent fahn dehn wan weh Paal mi preech tu eena di sinagag?

⁶ Afta Paal mi haftu ron weh fahn Tesalonaika ahn Bereeya wehpaat peepl mi persikyoot ahn, ih gaahn da Atenz. Agen, “Paal gaahn da di meetn plays wehpaa ih ku reezn wid di Jooz dehn ahn dehn wan weh da noh Joo weh wership Gaad.” (Aks 17:17) Bot wen Paal mi-di preech eena di maakit plays, da mi tu wahn difrent set a peepl. Di peepl weh mi dehdeh da neva Joo ahn som a dehn da-mi peepl weh teech hyooman aidyaaz. Dehn mi vyoo Paal teechin az wahn “nyoo teechin.” Dehn mi tel ahn: “Dehn ting weh yu di tel wi song schraynj tu wee.”—Aks 17:18-20.

7. Akaadn tu Aks 17:22, 23, how Paal mi ajos ih prezentayshan?

⁷ Reed Aks 17:22, 23. Paal neva did taak tu peepl da Atenz di way how hihn mi taak tu di Jooz eena di sinagag. Moa dan laikli, Paal mi tink bowt weh di peepl da Atenz bileev. Hihn mi luk rong ahn noatis how di peepl mi praktis dehn rilijan. Wen Paal mi preech tu di peepl da Atenz, hihn mi staat aaf di taak bowt tingz weh dehn mi gree  pan. Wahn persn weh rait bowt di Baibl seh, “Laik how hihn da-mi wahn Jooish Kristyan, hihn riyalaiz dat som a di rilijos Greek peepl dehn noh wership di ‘chroo’ Gaad weh di Jooz ahn Kristyan wership. Bot Paal mi chrai proov tu di peepl da Atenz dat di Gaad hoo hihn mi-di tel dehn bowt da akchwali noh no schraynja tu dehn.” Soh Paal mi wilin fi chaynj di way how hihn taak tu dehn. Hihn tel di peepl da Atenz dat di mesij weh hihn mi-di bring kohn fahn di “Gaad weh nobadi noa,” weh dehn mi-di chrai wership. Eevn doa di peepl dehn weh da neva Joo, neva noa di Skripcha dehn, Paal neva giv op pahn dehn. Insteda dat, hihn mi si dehn laik grayn weh raip ahn redi fi haavis, ahn hihn mi chaynj di way how hihn mi prizent di gud nyooz tu dehn.

8. (a) Weh ku help yu fi mek yu andastan weh di peepl eena yu teritori bileev? (b) If sombadi seh dat den ga dehn oan rilijan, how yu wuda ansa dehn?

⁸ Jos laik Paal, yu fi luk fi tingz weh ku help yu fi andastan weh di peepl eena yu teritori inchrestid eena. Laik fi egzampl, how di persn fiks op ih hows er veekl? Maybi yu ku tel weh rilijan sombadi bilangz tu bai dehn naym, di kaina kloaz weh dehn wayr, di way how dehn fiks op dehnself, er eevn di way how dehn taak. Maybi ih kom owt schrayt faawood ahn tel yu dat ih ga ih oan rilijan. Wen dat mi hapm tu wahn sista weh naym Flutura weh da wahn speshal painyaa, shee mi ansa di persn ahn seh, “Ah noh deh ya fi foas mi bileef pahn yu, bot fi taak tu yu bowt dis tapik . . . ”

9. Wat da wahn tapik weh yu ku taak tu wahn rilijos persn bowt?

⁹ Wat da wahn tapik weh yu ku taak tu wahn rilijos persn bowt? Chrai fain tingz weh too a unu ku gree pan. Maybi di persn wership onli wan Gaad, er ih rekonaiz dat Jeezas da wi sayvya, er maybi ih bileev dat wi di liv eena wikid taimz weh wahn soon en. Yu ku yooz di tingz weh di too a unu ku gree pan fi shayr di Baibl mesij wid ahn eena wahn inchrestin way.

10. Weh wi shuda chrai du, ahn wai?

¹⁰ Yu haftu memba dat peepl noh mait bileev evriting weh dehn rilijan teech dehn. Soh eevn afta yu fain owt weh rilijan wahn persn bilang tu, yu haftu fain owt weh dehn bileev fi dehnself. Wahn speshal painyaa fahn Australia weh naym Dayvid seh, “Wahn lata peepl miks op hyooman aidyaaz wid weh rilijan teech.” Donalta fahn Albania seh, “Som peepl weh wi meet seh dat dehn bilang tu wahn rilijan bot laytaraan dehn seh dat dehn noh reeli bileev eena Gaad.” Ahn wahn mishineri fahn Argentina seh dat hihn noatis dat som peepl  seh dat dehn bileev eena di Chriniti bot dehn noh akchwali bileev dat di Faada, di son, ahn di hoali spirit da wan Gaad. Hihn seh, “Wen Ah memba dat di persn weh Ah di taak tu mait noh bileev evriting weh ih rilijan teech, ih mek it moch eeziya fi taak bowt sohnting weh too a wi wahn gree pan.” Soh chrai fain owt weh peepl reeli bileev. Den, jos laik Paal, yu wahn ku du evriting yu kud fi help aal kaina peepl.—1 Kor. 9:19-23.

11. Akaadn tu Aks 14:14-17, how Paal mi taak tu di peepl dehn da Lischra?

¹¹ Reed Aks 14:14-17. Paal mi noatis di tingz weh di peepl weh hihn mi-di taak tu mi inchrestid eena. Fi egzampl, di peepl weh hihn mi taak tu da Lischra neva reeli noa di Skripchaz, soh hihn yooz tingz weh dehn mi noa fi chrai kanvins dehn. Hihn mi taak bowt di haavis weh projoos lata froot ahn di abiliti fi injai laif. Hihn mi yooz iloschrayshan weh di peepl weh mi-di lisn tu ahn kuda mi andastan.

12. Wen yu fain owt weh wahn persn inchrestid eena, how yu ku ajos yu prezentayshan?

¹² Yooz gud jojment fi fain owt weh di peepl eena yu teritori inchrestid eena an ajos yu prezentayshan fi soot dehn. Az yu di geh kloasa tu sombadi hows, how yu ku fain owt weh dehn inchrestid eena? Agen, yu haftu pay atenshan tu di ayrya weh deh rong yu. Maybi di persn di kleen ih gyaadn, di reed wahn buk, di fiks wahn chrok, er di du sohnting els. If pasabl, yu tink yu ku staat aaf di kanvasayshan di taak bowt weh di persn di du? (Jan 4:7) Eevn di persn kloaz ku tel yu sohnting bowt ahn. Maybi yu ku fain owt wehpaat di persn kohn fram, wehpaat di persn werk, er maybi wat da di persn fayvrit spoats teem. Wahn brada weh naym Gustavo seh, “Ah mi staat wahn kanvasayshan wid wahn 19 yaa oal yong man weh mi gat aan wahn tee shert wid wahn picha a wahn singa. Ah aks ahn bowt ih tee shert ahn hihn mi tel mi wai ih mi laik di singa. Wi mi staat wahn Baibl stodi afta da kanvasayshan ahn now ih da wan a wi bradaz.”

13. How yu ku aafa wahn Baibl stodi eena wahn inchrestin way?

 ¹³ Wen yu aafa fi stodi di Baibl wid sombadi, chrai mek it inchrestin; shoa dehn how di stodi wahn help dehn. (Jan 4:13-15) Laik fi egzampl, wahn sista weh naym Poppy gaahn bak tu wahn laydi weh mi shoa inchres. Wen Poppy mi si dat di laydi mi ga wahn sertifikayt pahn di waal, ih mi get fi fain owt dat di laydi da-mi wahn profesa weh mi stodi ejukayshan. Soh shee mi tel di laydi dat wee teech peepl tu, bot wi stodi di Baibl wid dehn ahn wi aalso ga wi meetin dehn. Di laydi mi aksep wahn Baibl stodi, ih gaahn da meetin di neks day, an ih gaahn da wahn asembli lee bit afta dat. Wan yaa layta, ih mi geh baptaiz. Yu ku aks yuself: ‘Weh mai ritern vizit dehn inchrestid eena? Ai ku aafa dehn wahn Baibl stodi eena wahn way weh mek dehn inchrestid?’

14. How yu ku chaynj di way yu kandok wahn Baibl stodi fi soot eech styoodent?

¹⁴ Wen yu staat wahn Baibl stodi, bifoa yu goh stodi wid dehn yu need fi pripyaa gud fi eech stodi. Kip in main tingz laik, weh dehn kom fram, weh kaina ejukayshan dehn ga, weh da sohn ekspeeryens weh dehn ga er weh dehn inchrestid eena. Wail yu di pripyaa, yu fi pik wich skripchaz yu wahn reed, weh veedyo yu wahn shoa, ahn weh egzampl yu wahn yooz fi eksplayn di Baibl chroot. Yu need fi aks yuself, ‘Weh Ah ku du fi mek di Baibl mesij toch mi styoodent haat?’ (Prov. 16:23) Wahn sista fahn Albania weh naym Flora mi-di stodi wid wahn uman weh seh, “Ah kyaahn aksep weh unu teech bowt di rezorekshan.” Flora neva chrai foas di uman fi aksep dis teechin rait way. Shee seh, “Ah riyalaiz dat bifoa shee kuda mi bileev eena di rezorekshan shee mi need fi noa di Gaad weh pramis di rezorekshan.” Soh fahn da taim, pahn evri stodi di sista rimain di uman a Jehoava lov, wizdom, ahn powa. Afta dat, di styoodent mi staat tu bileev eena di rezorekshan ahn now shee da wan a Jehoava Witnisiz.

15. Akaadn tu weh Aks 17:16-18 seh, weh bihayvya di peepl da aynshent Greece mi ga weh mi-di wori Paal, ahn wai hihn mi stil preech tu dehn?

¹⁵ Reed Aks 17:16-18. Eevn doa Atenz da-mi wahn siti weh mi ful op a aidol wership, sekshwal imoraliti, ahn paygan tinkin, Paal neva mek dat diskorij ahn. Hihn neva stap preech tu dehn eevn doa dehn mi insolt ahn op. Paal yoostu ‘insolt Gaad, an ih doz oanli kruwil ahn mek Gaad peepl dehn sofa,’ stil hihn mi kohn fi bee wahn Kristyan. (1 Tim. 1:13) Jos laik how Jeezas mi bileev dat Paal kuda mi bee wahn disaipl, Paal mi bileev dat di peepl fahn Atenz kuda mi bee Jeezas disaipl tu. Ahn som a dehn mi did kohn fi bee Krais disaipl.—Aks 9:13-15; 17:34.

16-17. Weh shoa wi dat aal kaina peepl ku bee Krais disaipl? Yooz di egzampl eena di paragraaf.

¹⁶ Joorin di taim a di apasl dehn, lata peepl fahn aal difrent bakgrong mi kohn fi bee Jeezas disaiplz. Wen Paal mi rait tu di Kristyanz weh mi-di liv da Greece eena di siti a Korint, hihn mi seh dat som a dehn yoostu bee kriminal er dehn doz liv wahn imoaral laifstail bifoa dehn mi kohn fi bee Krais disaipl. Hihn mi seh: “Som a unu yoostu bee jos laik dehn peepl deh. Bot unu sin dehn don wash weh.” (1 Kor. 6:9-11) Yoo wuda mi tink dat dehn peepl kuda mi kohn fi bee Krais disaiplz?

¹⁷ Nowadayz, wahn lata peepl wilin fi chaynj dehn laif soh dat dehn ku bee Krais disaipl. Fi egzampl, da Australia, wahn speshal painyaa weh naym Yukina mi laan dat aal kaina peepl ku aksep di Baibl mesij. Wan taim shee mi deh da wahn plays a bizniz an ih si wahn yong laydi weh mi ga wahn lata  tatoo an ih mi gat ahn sohn begi kloaz. Di sista seh: “Fers Ah mi frayd fi staat taak tu ahn, bot den Ah mi tek korij ahn taak tu ahn. An den Ah mi get fi fain owt dat shee mi inchrestid eena di Baibl ahn som a ih tatoo da-mi akchwali sohn vers fahn di buk a Psalms!” Di yong laydi mi staat stodi an ih mi staat tu goh da di meetin dehn tu. *

18. Wai wi noh fi joj peepl bifoa wi get fi noa dehn?

¹⁸ Yu tink Jeezas mi tink dat di feel mi raip ahn redi fi reep jos bikaaz hihn mi ekspek dat moas peepl mi wahn fala ahn? No. Di Skripchaz mi prafesai dat da onli wahn lee bit a peepl wahn put fayt eena ahn. (Jan 12:37, 38) Ahn Jeezas kuda mi reed peepl haat. (Mach. 9:4) Bot hihn mi foakos pahn di lee bit a peepl weh mi bileev eena ahn, an ih mi mek shoar hihn mi preech tu evribadi. Soh wee shuda du di saym. Wi kyaahn reed peepl haat, soh wi noh fi joj wi teritori er di peepl eena di teritori! Insteda dat, vyoo peepl az fyoocha disaiplz . Marc, hoo da wahn mishineri da Burkina Faso, seh: “Di peepl weh Ah tink wuda mek proagres ahn kohn fi bee wi bradaz ahn sistaz yoozhwali stap stodi. Bot di wan dehn weh Ah noh ekspek fi eevn reech faar yoozhwali mek proagres. Soh Ah laan dat ih beta fi mek Jehoava spirit leed wi.”

19. Weh atichood yu shuda ga tuwaadz di peepl eena yu teritori?

¹⁹ Yu wuda tink dat ih luk laik nobadi eena yu teritori da laik grayn weh raip ahn redi fi haavis. Bot memba weh Jeezas seh tu ih disaipl dehn. Di feel raip raip ahn redi fi reep. Peepl ku chaynj ahn dehn ku bee Krais disaiplz. Jehoava vyoo peepl eena wi teritori az peepl weh ku bee Krais disaiplz an az “preshos tingz.” (Hag. 2:7) If wi tink bowt peepl di way how Jehoava ahn Jeezas tink bowt dehn, wi wahn laan bowt dehn bakgrong ahn weh dehn inchrestid eena. Wi wahn vyoo dehn az peepl hoo ku bee wi bradaz ahn sistaz.