1, 2. Ka labusenrunbei Hesusu lariñagun lidan Huan 4:35, 36?

LIDAN laweiyasuhan Hesusu Galiléoun, sügüti burí lubadugiñe saragu ichari hilumati lauti burí sebada le egelewehabei (Huan 4:3-6). Anihagua meha kéiburi gádürü hati lun alubahani. Ábati lariñagun Hesusu aban katei houn lani disipulugu le ámubei laganbún houn: “Ariha huméi nadü, lidaanihali lalubahóun” (aliiha huméi Huan 4:35, 36). Ka meha uagu layanuha?

² Genegeti layanuhaña lan meha Hesusu luagu hóundarawagun gürigia lun lánime disipulugu, mama luagu lalubahóun sebada. Ráramagua wamá asaminara luagu le sun líñabei lasuseredun. Lau sun meha mínsiñe hamá samariana houn huríu, apurichihati Hesusu tun aban würi samariana to íchuguboun arigei lun le lariñagubei. Darí lun dan le lariñagunbei Hesusu “ariha huméi nadü, lidaanihali lalubahóun”, ñǘbuintiña saragu samariana ha buga únbaña tayanuha würi luagu Hesusu lúntima hasubudirun saragu katei luagu (Huan 4:9, 39-42). Ariñagati aban sásaamu luagu abahüdaguni tídangiñeti Bíbülia le: “Arufuda lumuti aranseñu hamá gürigia ha lun hasubudirun luagu Hesusu [...] lun harihíniwa kamá hamuga lila nadü le aranseelibei lun lalubahóun”.

3. Ka uagu buídutimabei lubéi ligaburi wapurichihan ánhawa arihaña gürigia kei meha larihiniña Hesusu?

³ Anti wagía? Ida liña san warihiniña gürigia ha únbaña wanügei uganu buiti? Ariha wamutiña san kamá lila nadü le aranseelibei lun lalubahóun? Anhein ítara liña lubéi, lasusereduba ǘrüwa katei. Furumiñe, warihibei apurichihani kei aban dasi súdiniti le lunbei wetenirun lun lau lóufudagun. Kei murusunrügüñein lubéi lidura lidaani alubahani, mama mosu weferidirun dan. Libiaman, gúndaabadiwa lau wadügüni dasi lau ubebeni. Ariñagatu Bíbülia: “Gúndaatiña sun gürigia [...] lidan lidaani alubahani” (Isa. 9:3). Lǘrüwan, warihubaña kada gürigia kei lánigu Kristu disipulu ámuñegü, ligíati wapurichihaba houn lidan aban igaburi le achawaha lumuti haritagun.

4. Kaba wafurendeira lúmagiñe apostolu Pábulu lidan arütíkulu le?

 ⁴ Marihin lumutiña meha Hesusu Samariana kei gürigia ha féridiwaaña, kei meha hasaminarun ha afalarubalin. Lubaragiñe lira, ariha lumutiña kei lánigu disipulu ámuñegü. Ítara liña giñe lunti lan warihiniña gürigia ha lídanbaña fulasu le ñein lubéi wapurichiha. Ruti apostolu Pábulu aban lubuidun hénpulu woun libügürü katei le. Lidan arütíkulu le, wafurendeiruba ǘrüwa katei lúmagiñe Pábulu. 1) Subuditi meha murusunraü katei luáguti hafiñen ha aganbubalin lun. 2) Gunfuranda lumuti meha kátima lan hínsiñebei houn gürigia. 3) Ariha lumutiña meha gürigia kei lani Hesusu disipulugu ámuñegü.

5. Ka meha uagu gayara lubéi gunfuranda lániña Pábulu ha aganbubalin tidan haligilisin huríu?

⁵ Gabügürüguati meha lapurichihan Pábulu tidan haligilisin huríu. Kei hénpulu, tidan ligilisi to Tesalónikaboun ñǘdünti ayanuha hama huríu ǘrüwa dimaasu, sagü luéyuri emeraaguni lun ladügün lun hasaminarun (Adü. 17:1, 2). Kei meha agüriarúa lubéi kei huríu, chóuruti buidu lan meha lasandiragun lungua ñein (Adü. 26:4, 5). Gunfuranda lumutiña meha huríugu ani ligía meha gayara lubéi lapurichihan houn sin ni murusun anufudei (Fili. 3:4, 5).

6. Ka ida mítaran hamá ha aganbubalin Pábulu tidan haligilisin huríu hamoun ha tídanbaña mágidu Atenasi?

⁶ Dan le hafosurunbalin láganiñu Pábulu lun láfuridun Tesalónikagiñe ani dan lárigiñe Beréagiñe, aba lidin Atenasi. Ñein arufudahati “tidan haligilisin huríu luma hama ha mámabaña huríu ha áhuduragubaña lun Bungiu”, adüga ligía lun hasaminarun (Adü. 17:17). Luéigiñe le aban oubaü, dan le lapurichihanbei tidan burí mágidu, dariti amu hawuyeri gürigia. Hadan, añahein meha arufudahatiña katei hámagiñeti wügüriña, añahein meha giñe amu gürigia ha mama huríu ha arihibalin luganute Pábulu kei aban ‘iseri arufudahani’. Ábati hariñagun lun: “Terenchati katei le burí bariñagubei woun” (Adü. 17:18-20).

7. Según Adügaü 17:22, 23, ida liña lasansiruni Pábulu ligaburi lapurichiha?

⁷ (Aliiha huméi Adügaü 17:22, 23). Mapurichihanti meha Pábulu houn atenasina ha mámabaña huríu lidan ligiaméme igaburi le aubei lapurichiha houn huríu tidan haligilisin. Ariha lumuti meha katei le geyegubei hau, gabaroun lumuti giñe ka burí lan hafiñenbei gürigia. Lárigiñe, áluahati lasubudiruni le ídanbei genegegua lan hafiñen gürigia hagía luma inarüni le tídanbei Bíbülia. Afuranguagüdati aban ayanuhati tuagu Bíbülia libügürü Pábulu: “Kei aban kristiánu huríuna, ruti fe luagu máhuduragun hamá gürieguna ha mama kristiánugu lun  ‘Bungiu inarüniti’, le Habungiute huríu hama kristiánugu, ani áfaaguati larufuduni mama lan aban Bungiu le ibidiñeti houn atenasina Bungiu le uágubei lapurichiha”. Ligíati, aranseñu liña meha Pábulu lun lasansiruni ligaburi lapurichiha. Ariñagati houn atenasina uganu lan le lapurichihabei, lúmagiñeti lan “Bungiu le ibidiñewabei”, le unbei háluahan háhuduragun. Lau sun meha ibidiñe lan tuáguti Lererun Bungiu houn ha mámabaña huríu, marihin lumutiña Pábulu kei gürigia féridiwaaña. Lubaragiñe lira, ariha lumutiña meha kei lin nadü le aranseeli lun lalubahóun ani aba lasansiruni ligaburi lapurichihani uganu buiti houn.

8. a) Ka gayaraabei líderaguniwa lun wasubudiruni ka lan hafiñenbei gürigia ha lídanbaña fulasu le ñein lubéi wapurichiha? b) Kaba hamuga wóunaba anhein ariñaga somu gürigia woun gani lan relihión?

⁸ Ítara kei Pábulu, teni wamá lun le geyegubei wau. Aranseñu wamá lun wetenirun lun le uágubei hafiñera gürigia ha lídanbaña fulasu le ñein lubéi wapurichiha. Anihein san somu uéndeni hábiñe o tidan hagune le lánina hani relihión? Arufuda lumuti san hiri, ligaburi hadaüragun luma ligaburi haranseragun houngua o íbini ligaburi hayanuhan ka lan hániboun relihión? Másiñati ariñaga hamá woun gani hamá relihión. Dan le lasuseredun le tun aban prekursora, aba tariñagun: “Mama nabisidahañadün lun hánharun lun nafiñen. Busenrügütina lun nayanuhan huma luagu...”.

9. Ka uma genegegua lan wafiñen luma hafiñen ha ganigibaña ligilisi?

⁹ Kaba uagu wayanuha hama gürigia ha ganigibaña ligilisi? Áluaha wamá somu katei le úmabei genegegua lan wafiñen luma hafiñen. Másiñati hudugua hamá lun ábanrügü Bungiu, subudi hamuti Hesusu lan Wasalbaragülebei o afiñe hamá lagumuchuba lan wuribani yarafa madise. Yusu waméi afiñeni le úarabei luma hafiñen lun wíchuguni uganu le tídanbei Bíbülia lidan aban igaburi le buiti.

10. Ka lunbei wáfaagun lun wadügün, ani ka uagu?

¹⁰ Gabaroun huméi háfuga lan mafiñe hamá gürigia lun sun le tarufudahan hani relihión houn. Ligíati, dan le subudi wamaali ka lan relihión ídanboun habasiihan gürigia, áfaagua wamá lun wasubudiruni ka lan hafiñenbei. Ariñagati aban prekursoru espechaliti Australiana, gíriti Dawidi: “Uguñe weyu, saragu gürigia migisi hamuti le tarufudahabei hani relihión luma hasaminan wügüriña”. Abahüdahatu aban íbiri Alübániana gíritu Donalta: “Anihein dan ayanuhatiwa hama gürigia ha ariñagubaña gani hamá relihión, lárigiñe aba hariñagun mafiñen hamá luagu Bungiu”. Ariñagati giñe aban íbiri misioneru le eseriwidubei Arühéntina, añahein lan ariñagutiña afiñe hamá luagu trinidad ani le linarün katei, mafiñentiña luagu ǘrüwañanu lan bungiu lidan aban. Ani sigiti ariñaga: “Lau wasubudiruni le, ménrengunti lun warihini genegegua  lan wafiñen luma hafiñen gürigia ha”. Ligíati, áfaagua wamá lun wasubudiruni kátima lan hafiñenbei gürigia. Ítarati, gayaraabei wariñaguni dimurei libe le lariñagubei Pábulu: “Rúguatina nungua kei hagía” (1 Ko. 9:19-23).

11. Según Adügaü 14:14-17, ida liña lapurichihan Pábulu lun lachülürün tidoun hanigi gürigia ha awinwandubaña Lístüra?

¹¹ (Aliiha huméi Adügaü 14:14-17). Téniti meha Pábulu lun le hínsiñebei houn gürigia haganbun ani aranse lumuti le lunbei lariñaguni. Kéiburi, houn gürigia ha únbaña lapurichihan Lístüra murusunrügüñein hasubudirun tuagu Bíbülia o ni kata. Ligíati layanuhabei Pábulu lidan aban igaburi le ménrengunti lun gunfurandawa lan, kei burí alubahani, lúmati ugundani le lanügübei ibagari. Yúsuti dimurei luma hénpulu le ménrengunti gunfurandawa lan.

12. Ka lubéi wadügüni lun wasubudiruni ka lan hínsiñebei houn gürigia luma lun wasansiruni ligaburi wapurichihan?

¹² Áfaagua wamá lun wasubudiruni le hínsiñebei houn gürigia ha lídanbaña fulasu le ñein lubéi wapurichiha ani sansi waméi ligaburi wapurichihan. Ida luba wasubudiruni ka lan hínsiñebei houn gürigia dan le wayarafadun houn o tun haban? Teni wamá lun le geyegubei hau. Másiñati harumadahaña lan lau hafulurin, haliihaña lan somu líburu, haransehañoun lan hakarün o hadügüña lan furumiñeguarügü katei. Ánhawa arihei buidu lan katei le, gayaraabei wagumeseruni yanu lau wayanuhan luagu le hadügübei (Huan 4:7). Íbini hadaüragun gürigia gayaraati tadügün lun wasubudirun hawagu, ka lan hageirabei, ka lan hawadigimaridubei o ka lan úmagiñeñanu lidan somu huraraü. Ariñagati aban íbiri gíriti Gustavo: “Aba nagumeserun ayanuha luma aban nibureinti diisi-nefu irumu lau ani anuhoun liyawa aban eremuhati subudiwati tuagu lisimisin. Aba nálügüdüni luagu le tuágubei lisimisin, aba lariñagun nun hínsiñeti lan eremuhati ligía lun. Adügati yanu ligía lun nagumeserun aturiaha luma ani guentó, ábanhali hádangiñe wíbirigu nibureinti ligía”.

13. Ida luba wíchugun aturiahani tídangiñe Bíbülia lidan aban igaburi le achawahabaliña gürigia?

¹³ Danme le wagumeseruni aturiahani tídangiñe  Bíbülia luma aban gürigia adüga waméi lau aban lubuidun igaburi. Afuranguagüda waméi lun ida luba lan lahuudun lun (Huan 4:13-15). Kei hénpulu, anuhoun aban würi to arufuduboun busentu lan tasigirun aturiaha aba tebelagüdünün würi tuguya aban íbiri to gíriboun Hester túbiñoun. Dan le tarihinbei íbiri luagu touba muna aban diploma to arufudubalin máistara lan würi tuguya, aba tariñagun tun luagu arufudahatiwa lan giñe houn gürigia tídangiñe Bíbülia luma lidan wadamuridagun. Ánhatu würi tuguya lun taturiahanu Bíbülia, larugan ñǘdüntün adamuridagua ani murusun dan lárigiñe ñǘdüntün lidan adamurini sirkuitu. Lídanrügü aban irumu, aba tabadiseirun. Álügüdagua wamá woungua: “Ka hínsiñebei houn gürigia ha nabisidahabaña? Gayaraati san nafuranguagüdüni houn lidan aban lubuidun igaburi le achawahabaliña ida liña lan wíchugun aturiahani tídangiñe Bíbülia?”.

14. Ida luba wadüga lun wasansiruni ligaburi wíchugun aturiahani lun kada aturiahati?

¹⁴ Anhein gumeseediwa lubéi íchiga aban aturiahani tídangiñeti Bíbülia, aranseha wamá buidu sagü wéibuga lan íchiga aturiahani, gabaroun waméi le gádanbalin aturiahati luma le hínsiñebei lun. Samina wamá luagu bérusu le lunbei laliihóun, bidéu le lunbei warufuduni luma hénpulu le lunbei wíchuguni lun wafuranguagüdüni inarüni le tídanbei Bíbülia. Álügüdagua wamá woungua ka lan hínsiñebei lun aturiahati luma le lunbei lachülürün tidoun lanigi (Ari. 16:23). Ariñagatu aban würi alübániana to aturiahaboun tuma aban íbiri gíritu Flora: “Siñati nánharun lun arufudahani luáguti águyuguni”. Masigitu Flora ayanuha luagu katei le. Ariñagatu: “Aba níchugun fe mosu lan tasubudiruni hiñaru to Bungiu furumiñe le füramasebei águyuguni”. Lúmagiñe dan ligía, lidan kada aturiahani, aba tayanuhan Flora luagu línsiñe, lichú lau luma lubafu Heowá. Lau lásügürün dan, aba tánharun würi tuguya lau sun tugundan lun arufudahani luáguti águyuguni. Ani guentó, teseriwiduña lun Heowá lau ubebeni.

15. Según Adügaü 17:16-18, ka hechu atenasina mínsiñebei lun Pábulu ani ka uagu marihin lubaliña kamá féridiwaaña?

¹⁵ (Aliiha huméi Adügaü 17:16-18). Inarüni hudugua hamá gürigia ha awinwandubaña Atenasi houn búngiugu mama inarünitiña, magíagutiña meha ani afiñetiña meha lun arufudahani málati. Gama lumoun, marihin lumutiña Pábulu kamá féridiwaaña, mígirun ligía lun ladügün hanabuni lun lábürühan larüna. Ligía guánarügü adügagubei lungua kristiánume íbini adimureha lan meha ‘wuriba luagu Bungiu, anabaléi ani éibaahalei’ (1 Tim. 1:13). Ítara kei larihini Hesusu Pábulu kei aban disipulu ámuñegü, ítara liña larihiniña Pábulu gürigia ha Atenasibaña. Ani mabulieidagunti (Adü. 9:13-15; 17:34).

16, 17. Ka arufudubalin luagu gayara lan lani hamá Kristu disipulugu ámuñegueinarügü hawuyeri gürigia?

¹⁶ Lidan furumiñeti sígulu, chülütiña ámuñegueinarügü hawuyeri gürigia lun lani hamá Hesusu disipulugu. Dan le labürühabei Pábulu houn kristiánugu ha awinwandubaña lidan uburugu le hani güriegu le Korintubei, ariñagati añahein lan meha hádangiñe wuribatiña meha ani magíagutiña. Lárigiñe aba lariñagun: “Anhein guentó, chibawaali hifigoun” (1 Ko. 6:9-11). Wasaminaruba hamuga san gayara lan hasansirun gürigia hagía luma lun hadügagun houngua lánime Hesusu disipulu?

¹⁷ Uguñe weyu, saragu haña gürigia aranseñu haña lun hadügün asansiruni le mégeiwabei lun lani hamá Hesusu disipulugu. Kei hénpulu, ariha tumuti aban prekursora espechalitu Australiana gíritu Yukina tungua gayara lan hánharun furumiñeguarügü gürigia lun uganu le tídanbei Bíbülia. Aban weyu, tídanñoun aban áfisi aba tarihin aban nibureintu buin lau dibuhu luagu tura ani tau daüguaü madünamatu. Ariñagatu Yukina: “Samina numuti buidu lubá nayanuhan tuma. Gama lumoun, dan le nayanuhan tuma aba níchugun fe weiri lan línsiñe tun taganbun luagu le tídanbei  Bíbülia ani fiu lídangiñe dibuhu le tuágubei lídangiñeti Sálumu”. Aban tagumeserun nibureintu tuguya aturiahoun Bíbülia luma abasiha lidoun adamuridaguni. *

18. Ka uagu mabuidun lubéi lun wayanuhan wuriba hawagu gürigia?

¹⁸ Lariñaguña san Hesusu luagu aranseeli lan ichari lun lalubahóun ladüga agurabaha lan hafalarubei lan hiibe-agei gürigia? Uá, mama ligía lagurabubei. Ariñagatu Lererun Bungiu míbebaña lan íchugutiña hafiñen luagu (Huan 12:37, 38). Ani gabafuti meha Hesusu lun larihini le tídanbei hanigi gürigia (Mat. 9:4). Íbini ítara apurichihati houn súngubei lau ubebeni, gama lumoun ténitimati houn ha íchugubalin hafiñen luagu. Lidan wakesin, kei le siñá lubéi wasubudiruni le tídanbei hanigi gürigia, áfaagua wamá lun mayanuhan wamá wuriba luagu aban gürigia ni hawagu gürigia ha lídanbaña fulasu le ñein lubéi wapurichiha. Le lunbei wadügüni lun warihiniña gürigia kei disipulugu ámuñegü. Ariñagati aban misioneru le eseriwidubei Burukína Fasu le gíribei Marc: “Gürigia ha uágubaña nafiñera hagíaba lan awansera, súnwandan hagía lan ígirei haturiahan. Ha uágubaña mafiñe nan hagíaba lan awansera hagía awanserubaña. Furendeihadina buídutima lan lun wígirun lun lani lan Heowá sífiri sandu abugurawa”.

19. Ida luba warihiniña gürigia ha lídanbaña fulasu le ñein lubéi wapurichiha?

¹⁹ Láurügü warihini, genegeti murusun lan gürigia ha únbaña wapurichiha ítara hamá kei nadü le aranseelibei lun lalubahóun. Aritagua waméi le lariñagubei Hesusu houn lani disipulugu. Buíduhali nadü lun lalubahóun. Gayaraati hasansirun gürigia luma lun lani hamá Kristu disipulugu. Ítara haña lun Heowá kei ‘írisini’ le gebegiti (Ahe. 2:7). Ánhawa arihaña gürigia kei larihiniña Heowá luma Hesusu, wáfaaguba lun gunfuranda wamani le gádanbaliña luma le hínsiñebei houn. Marihin wabaña kamá le ibidiñetiña woun, warihubaña kamá wíbirigu ámuñegü.