1-2. Porque si Jesus posible ya habla con el maga palabra na Juan 4:35, 36?

TA CAMINA si Jesus na simentera, posible de muda y verde cebada. (Juan 4:3-6) Necesita cuatro meses antes puede cosecha con este siembra. Pero tiene cosa ya habla si Jesus que maka-estraña: “Mira alrededor de ustedes y observa el maga simentera: El cosecha maduro ya y preparao ya para corta.” (Le con el Juan 4:35, 36.) Cosa le quierre decir?

² Si Jesus ta refiri con el figurativo cosecha de maga gente. Considera si cosa el nuevo lang ya sucede. Maskin pa gendeh ta ledia el maga Judio con el maga Samaritano, si Jesus ya predica con el un Samaritana y ya oi el mujer! Gane, mientras tan cuento si Jesus acerca con el simentera que “maduro ya y preparao ya para corta,” un grupo de maga Samaritano, quien ya oi acerca con Jesus estaba con el mujer, el pa-andada con ele para aprende mas. (Juan 4:9, 39-42) Un comentario de Biblia el ya habla acerca con este: “El reaccion del maga gente . . . ta dale mira que igual sila na siembra que cerca ya cosecha.”

3. Si ta mira tu con el maga gente igual na mirada de Jesus, na cosa manera queda tu mas buen predicador?

³ Quetal el maga gente con quien tu ta predica? Ta mira ba tu kanila como siembra que cerca ya cosecha? Si ansina, tres cosas el sucede. Una, hay predica tu con apuro. Limitao lang el tiempo de cosecha poreso gendeh debe hace usik tiempo. Ika-dos, hay queda tu alegre si mira tu que ta oi el maga gente con el buen noticia. El Biblia ta habla: ‘El maga gente alegre na tiempo de cosecha.’ (Isa. 9:3) Y ika-tres, hay mira tu con el  cada persona que tiene potencial queda dicipulo y manda este move contigo para man adjust con el de tuyu presentacion na manera que queda le interesao.

4. Cosa kita aprende acerca con apostol Pablo na este articulo?

⁴ Gendeh igual na maga dicipulo de Jesus, nuay le pensa que gendeh posible queda de suyu dicipulo el maga Samaritano. En vez, ya mira le kanila como maga potencial dicipulo. Necesita tambien kita mira con el maga gente na diaton teritorio como maga potencial dicipulo del Cristo. Buen ejemplo si apostol Pablo que debe kita imita. Cosa kita puede aprende con ele? Na este articulo, hay discuti kita si cosa le ya hace para (1) aprende acerca na maga creencia de aquellos con quien le ya predica, (2) sabe si na cosa sila interesao y (3) mira kanila como maga potencial dicipulo de Jesus.

5. Porque ya puede entende si Pablo con el maga gente na sinagoga?

⁵ Pirmi ta predica si Pablo na sinagoga del maga Judio. Por ejemplo, na sinagoga na Tesalonica, “tres Sabado [“Sabbath,” NWT] ya discuti ele con el maga Judio por medio del maga Escritura.” (Act. 17:1, 2) Posible, comfortable si Pablo na sinagoga cay ya engranda le como un Judio. (Act. 26:4, 5) Ta entende si Pablo con el maga Judio poreso ya puede le kanila predica con confianza.—Fil. 3:4, 5.

6. Na cosa manera diferente el maga gente na tianggue de Atenas si compara con aquellos na sinagoga con quien ya predica si Pablo?

⁶ Despues sale si Pablo na Tesalonica y Berea por causa na persecucion, ya anda le na Atenas. “Na Sinagoga ta discuti le con el maga Judio y maga gente devoto” como cosa le anad hace. (Act. 17:17) Pero cuando ya predica le na tianggue, otro ya el quien ta oi con ele. Incluido con ese el maga gente educao na filosofia y otro Gentil quien ta pensa que “nuevo insiñanza” el cosa ta habla si Pablo. Ya habla sila con ele: “Maca-estraña man se para canamon.”—Act. 17:18-20.

7. Asegun na Maga Actividad 17:22, 23, paquemodo ya cambia si Pablo con el de suyu presentacion?

⁷ Le con el Maga Actividad 17:22, 23. Nuay presenta si Pablo con el de suyu mensaje na maga Gentil na Atenas igual si paquemodo le ya presenta con ese na maga Judio na sinagoga. Posible, ya pregunta si Pablo con el de suyu mismo cuerpo, ‘Cosa ta creé este maga gente aqui na Atenas?’ Ya observa le enbuenamente con el de suyu alrededor y ya nota con el maga religioso tradicion del maga gente.  Despues, ya pensa si Pablo si cosa el maga cosas que ta creé sila que uyun tambien na Escritura. “Como un Judio Cristiano, ya realiza le que el maga Griego pagano gendeh ta adora con el ‘verdadero’ Dios del maga Judio y Cristiano,” ya habla el un comentarista de Biblia, “pero ya pricura le dale mira que familiar el maga de Atenas con el Dios que ta predica le.” Poreso, ya cambia si Pablo con el de suyu presentacion. Ya habla le con el maga de Atenas que el de suyu mensaje estaba con el “Dios Desconocido” con quien sila ta pricura adora. Maskin pa gendeh familiar el maga Gentil na Escritura, nuay pensa si Pablo que imposible sila queda Cristiano. Sino, ya mira le kanila como maga siembra que cerca ya cosecha y yan adjust le con el de suyu presentacion.

8. (a) Paquemodo tu sabe si cosa ta creé el maga gente na de ustedes teritorio? (b) Si tiene quien habla contigo que tiene ya le religion, cosa tu habla?

⁸ Igual con Pablo, observa. Mira con el maga señal que ta dale mira si cosa ta creé el maga gente na de ustedes teritorio. Cosa el decoracion na casa o vehiculo del householder? El de suyu nombre ba, camisa, mudada o maskin de suyu vocabulario ta indica si cosa el de suyu religion? Posible, habla le mismo contigo que tiene ya le religion. Si ta sucede se, el un special pioneer hermana que si Flutura ta contesta, “Nuay yo vene aqui para manda contigo creé si cosa yo ta creé. Sino, taqui yo para man cuento contigo acerca na . . . “

9. Cosa posible el maga cosas que puede tu man uyun na un religioso persona?

⁹ Cosa maga topico tu puede discuti con el un religioso persona? Pricura busca maga cosas que man uyun ustedes dos. Posible, ta adora le con el un Dios lang, ta creé que si Jesus el Salvador del maga gente o baka ta creé le que ta vivi ya kita na tiempo que lleno de maldad que cerca ya termina. Base na maga cosas que ta creé ustedes dos, presenta con el mensaje del Biblia na manera que queda interesao ese persona.

10. Cosa kita debe pricura hace y porque?

¹⁰ Acorda que posible gendeh ta creé el maga gente con el todo cosa ta enseña el diila religion. Poreso, maskin pa sabe ya tu si cosa el religion del un persona, pricura sabe si cosa le deverasan ta creé. “Manada ahora el ta mezcla filosofia na diila maga creencia,” ya habla si David, un special pioneer na Australia. Si Donalta, un hermana na Albania, ya habla: “Cuanto de aquellos ya conoce kame ya habla que tiene ya sila religion. Pero na uliji, ya admiti sila que gendeh gayot sila ta creé na Dios.” Y un misionario hermano na Argentina ya observa que el cuanto maga gente ta  habla que ta creé sila na Trinidad, pero gendeh sila ta creé que un Dios lang el Tata, el Anak y el sagrao espiritu. Ya habla le: “Si sabe kita se, mas facil para kanaton que busca maga cosas que ta creé kita pati ese persona.” Poreso, pricura sabe si cosa gayot ta creé el maga gente. Y igual con Pablo, “para con todo el maga gente ya queda [tu] todo maga cosa-cosa.”—1 Cor. 9:19-23.

11. Base na Maga Actividad 14:14-17, cosa ya hace si Pablo para mas queda interesao el maga gente na Listra con el de suyu mensaje?

¹¹ Le con el Maga Actividad 14:14-17. Ya mira si Pablo si na cosa interesao el maga gente y despues, yan adjust le con el de suyu presentacion. Por ejemplo, el maga gente que yan cuento le na Listra un poco lang el saber na Escritura mientras el otro nuay gayot cosa sabe. Poreso, ya converza kanila si Pablo na manera que puede sila entende. Yan cuento le acerca na grande cosecha y na abilidad que queda alegre. Ya usa le maga palabra y ejemplo que puede entende el maga gente quien oi con ele.

12. Paquemodo tu sabe si na cosa interesao el un persona y man adjust con el de tuyu presentacion?

¹² Pensa enbuenamente si na cosa interesao el maga gente na de ustedes teritorio y man adjust con el de tuyu presentacion. Paquemodo tu sabe si na onde interesao el un persona mientras ta atraca tu con ele o ta anda na de suyu casa? Otravez, observa enbuenamente. Posible, ta siembra le, ta le libro, ta compone vehiculo o tiene otro cosa ta hace. Baka puede tu principia man cuento con ele si man comento tu acerca na cosa le ta hace. (Juan 4:7) Maskin el ropa del un persona puede dale informacion acerca con ele—posible de suyu nacionalidad, trabajo o favorito team na sports. “Ya puede yo man cuento con el un 19 año hombre que ta visti T-shirt que tiene cara del un sikat singer,” ya habla si Gustavo. “Ya pregunta yo acerca con aquel y ya habla conmigo el hombre si porque le ya gusta con el singer. El diamon istoria ya resulta na Bible study y ahora hermano ya le diaton.”

13. Paquemodo tu puede man offer Bible study na manera que queda interesao el un persona?

 ¹³ Si man offer tu Bible study con el un persona, hace se na manera que queda le interesao. Dale mira con ele si paquemodo con ele puede ayuda el de ustedes estudiada. (Juan 4:13-15) Por ejemplo, el un hermana que si Poppy ya puede entra na casa del un mujer quien ya dale mira interes. Cuando ya mira si Poppy con el certificate na dindin que ta dale mira que un professor el mujer quien ya gradua na curso education, ya hace claro si Poppy que ta enseña tambien kita na maga gente por medio na Bible study y maga miting. Ya conforma el mujer que man Bible study, ya atende miting pagka-alamañana y ya atende na asemblea de circuito. Despues de un año, ya bautiza le. Pregunta na de tuyu mismo cuerpo: ‘Na onde interesao el de mio maga return visit? Puede ba yo kanila habla acerca na estudiada de Biblia na manera que queda sila interesao?’

14. Paquemodo tu man adjust con el de tuyu manera de estudiada na cada persona?

¹⁴ Despues tu principia un Bible study, prepara para na cada estudiada. Pensa con el background y interes del cada persona que tan Bible study tu. Mientras ta prepara tu, decidi si cosa texto tu le, cosa video tu dale mira y cosa ilustracion tu usa para enseña con ele maga verdad na Biblia. Pregunta na de tuyu mismo cuerpo, ‘Na cosa queda interesao este persona y cosa yo enseña para alcanza na de suyu corazon?’ (Prov. 16:23) Na Albania, el un mujer, con quien tan Bible study el pioneer que si Flora, ya habla, “Gendeh conmigo aceptable el enseñanza acerca na resureccion.” Nuay forza si Flora que acepta el mujer con ese enseñanza. Ele ya habla, “Ya pensa yo que debe conoce una le con el Dios quien ya promete acerca na resureccion.” Principia de aquel, ya hace claro si Flora con el amor, sabeduria y poder de Jehova na diila cada estudiada. Na uliji, este mujer ya acepta y ya creé con el enseñanza de resureccion. Un activo siervo de Jehova ya le ahora.

15. Asegun na Maga Actividad 17:16-18, cosa el custumbre del maga de Atenas que ya causa lingasa con Pablo pero porque le ya continua siempre predica kanila?

¹⁵ Le con el Maga Actividad 17:16-18. Maskin pa el ciudad de Atenas lleno de idolatria, sexual imoralidad y pagano filosofia y ya insulta con Pablo el maga de alla, nuay le kanila descanza predica. Si Pablo mismo ya queda Cristiano maskin pa ele “ta ultraja y ta persigui y ta insulta” de antes. (1 Tim. 1:13) Igual si paquemodo ya mira si Jesus que tiene potencial si Pablo, ya mira tambien si Pablo que tiene potencial el maga de Atenas. Y justo gayot el de suyu decision.—Act. 9:13-15; 17:34.

16-17. Cosa ta dale mira que puede queda dicipulo del Cristo el maga gente de otro-otro background? Dale ejemplo.

¹⁶ Del primer siglo, ya queda dicipulo de Jesus el maga gente que otro-otro el background. Cuando ya escribi si Pablo con el maga Cristiano quien ta queda na ciudad de Corinto na Grecia, ya habla le que el cuanto miembro de ese congregacion ya queda maga criminal y tiene imoral clase de vida de antes. Y despues ya omenta le: “Pero ahora ya queda ustedes limpio.” (1 Cor. 6:9-11) Mira gaha tu con aquel maga gente que tiene potencial cambia y queda maga dicipulo?

¹⁷ Ahora, manada el conforme hace maga cambio que necesita para queda dicipulo de Jesus. Por ejemplo, na Australia, un special pioneer hermana que si Yukina ya aprende que el todo clase de gente puede acepta con el mensaje del Biblia. Un dia, na un lugar de negocio, ya mira le con el un joven mujer que  bien ma-tattoo y ta visti camisa que bien grande con ele. “Yan alang-alang yo unrato,” ya habla si Yukina, “pero yan cuento siempre yo con ele. Ya sabe yo que bien interesao le na Biblia y gane el cuanto del de suyu maga tattoo amo maga versiculo de Salmo.” El mujer ya principia man Bible study y atende maga miting. *

18. Porque gendeh kita debe juzga con el maga gente?

¹⁸ Ya mira ba si Jesus que maduro ya y cerca ya cosecha con el simentera cay ta expecta le que mayoria del maga gente el sigui con ele? Gendeh. Ya habla daan el Escritura que poco lang el demonstra fe con ele. (Juan 12:37, 38) Y ta puede le si Jesus con el corazon del maga gente. (Mat. 9:4) Maskin pa ansina, yan focus le con aquellos poco gente quien ya creé y ya predica con todo. Entonces, ciendo gendeh kita ta puede le con el corazon del maga gente, mas debe kita evita con el tendencia que juzga con el diaton teritorio o con el un persona! Sino, mira kita con el potencial del maga gente. Si Marc, un misionario na Burkina Faso, el ya habla: “El maga gente que ta pensa yo que progresa amo el ta descanza man Bible study. Pero el maga gente que pensaba yo gendeh progresa amo el quien ta progresa. Poreso, ya aprende yo que mas bueno que sigui con el guia del espiritu de Jehova.”

19. Cosa debe el diaton mirada na maga gente na diaton teritorio?

¹⁹ Na primero, baka pensa tu que poco lang na teritorio el igual na siembra que cerca ya cosecha. Pero acorda con el cosa ya habla si Jesus con el de suyu maga dicipulo. Maduro y cerca ya cosecha con el simentera. El maga gente puede cambia y queda dicipulo del Cristo. Ta creé si Jehova que este maga gente puede queda maga dicipulo y ta mira kanila como “precioso cosas.” (Hag. 2:7) Si mira kita con el maga gente igual si paquemodo kanila ta mira si Jehova y si Jesus, hace kita esfuerzo para aprende con el diila background y na cosa sila interesao. Mira kita kanila, gendeh como maga estranjero, sino como maga gente quien tiene potencial queda diaton maga hermano y hermana.