1-2. Jesu a ti lava kuwomba txani ngu mapswi aya ma ku ka Johani 4:35, 36?

JESU a to tsimbila a txi pinda ngu mu ka tithembwe, ti nga maha i di ta fulaho. (Joh. 4:3-6) Ku txo txhota mune wa mitxima dwe, ti to kukhatwa kuelulwa timbewu. Se Jesu a to womba mapswi ya ti nga mahako ma di xamalisile vathu, a to khene: “Gulani maso mi txi wona: Tithembwe ti nga xwee, ti lavako kuelulwa.” (Lera Johani 4:35, 36.) Atxi lava kuwomba txani?

² Ti woneka nga Jesu a ti womba-womba ngu kuelula ka vathu. Khumbula ti ti ngati ngadi kumaheka. Vajudha va si tolovelani ni Vasamariya, kambe Jesu a txhumayete wamsikati awu a nga tsakela! Phela mbimo yi Jesu a nga ti womba-womba ngu tithembwe, a txi khene ‘ti lava kuelulwa,’ dibutho da Vasamariya adi di nga ti pfite madungula a Jesu di ti hanzila ko ta kwakwe ti to di ta gondiswa. (Joh. 4:9, 39-42) M’gondi mmwani a bhate tiya mayelano ni didungula diya: “Ku va vathu va di hisekete kuta ve ta gondiswa ngu Jesu ti komba to va ti fana ni timbewu ti ti nga ti lava kueluwa.”

3. Ku na maheka txani u txi wona vathu nga ti Jesu a nga ti va wonisa tona?

³ Se ani vathu ava awe u va txhumayelako mahungu a manene ko? Ina u wona kota vathu va va fanako ni siyalo asi si lavako kuelulwa? Ngako u txi wona vathu ngu nzila yoneyo, txo khata u na txhumayela vathu ngu txikuluveta. Mbimo yo elula yi komile, kha ku na mkama wo sakana. Txa wumbidi, u na tsaka u txi wona vathu va txi amukela mahungu a manene, “ku nga tile va tsakisako tona va di kufunyelani.” (Isaya 9:3) Txa wuraru, vathu u na va wona i di va va nga sikotako kuva vagondiswa,  ngu toneto u na txhumayela ngu nzila yi yi va tsakisako.

4. Ka msungo wuwa hi na gonda txani ka txikombiso txa mpostoli Paulo?

⁴ Jesu kha fana ni vagondiswa vakwe, va nga ti pimisa ti to Vasamariya va nge thuki ve va vagondiswa vakwe. Kambe, ene a ti wona to va nga sikota. Nathu hi fanete hi wona vathu va thembwe yathu kota ava va nga vako vagondiswa va Jesu. Mpostoli Paulo a hi vekete txikombiso txa txinene. Hi nga gonda txani kwakwe? Ka msungo wuwa hi na bhula ngu tiya: 1) Ene a ti mahisa kutxani ti to e ziva ati vathu va nga txi kholwa ka tona, 2) ati va ti dhundako, ni ku 3) va nga sikota kuva vagondiswa va Jesu.

5. Ngu kutxani Paulo ti di mu hehukete kutxhumayela disinagogani?

⁵ Mbimo yo tala Paulo a txhumayete Vajudha disinagogani. Ngu txikombiso, ka disinagoga da Tesalonika, “Masabbata mararu, a txi bhulisana navo, ngu Mibhalo.” (Mith. 17:1, 2) Ti woneka nga Paulo ti txi mu hehukela kutxhumayela a di disinagogani. Ene i ti Mujudha. (Mith. 26:4, 5) Aku Paulo a nga ti ti pfisisa kwati tigondo ta txijudha, a txhumayete a di tsani.—Vaf. 3:4, 5.

6. Vathu ava Paulo a nga va txhumeyala mabhazara va hambanisa kutxani ni va a nga va txhumayela disinagogani?

⁶ Msana ka kuva vakaneti va di sinzisile Paulo kuhuma Tesalonika ni Bhereya, ene a yite Atena. Neti a nga hoka a to khata “kukanetisana mwendo kubhulisana disinagogani ni Vajudha ni va va khozelako Txizimu.” (Mith. 17:17) Kambe mbimo yi a nga ti txhumayela mabhazara, hi ga Vajudha a nga va mana. Phela ku ti ni va mwa tifilozofiya ni vamwani i nga ti si nga Vajudha ni vona, ava va nga wona didungula da Paulo i di “gondo . . . ya yiphya.” Vona gete Paulo ku khona: “U womba-womba tinzeveni kwathu timhaka to hambana.”—Mith. 17:18-20.

7. Ngu kuya ngu Mithumo 17:22, 23, Paulo a txitxisile kutxani matxhumayelelo?

⁷ Lera Mithumo 17:22, 23. Paulo kha txhumayela Vamatiko khe Atena ngu nzila yo fana nga ti a nga txhumayelisa tona Vajudha disinagogani. Ti nga maha Paulo a di ti wotisile tiya: ‘Ngu tihi ati vathu va Atena va kholwako ka tona?’ Ene a wonisisile kwati asi si nga ti ho, se e wona to ngu sihi sihena sawe sa wukhongeli. Se e gwita e xolisisa kuyelana aku ku kuho ka wukhongeli wawe ni ti Mibhalo yi wombako tona. Txigondi tximwani txi womba tiya: “Kota ku i nga ti Mkristu wu i  ku Mujudha, ene a ti woni to Magriki yale a mahedheni kha ma khozeli Txizimu txa ‘ditshuri’ txa Majudha ni Makristu, kambe e ne a duketile kukombisa to Txizimu atxi a va txhumayelako ngu ditshuri txi ni mtamo kupinda sa Atena.” Paulo a ti tiemisete kutsimbitisana ni siemo. Ene a gete vathu va Atena to ati a va txhumayelako ti ta ngu ka “Txizimu txi txi si ziwiko” atxi vona va nga ti duketa ku txi khozela. Hambiku Vamatiko va nga ti si woni txilo ka Mibhalo, Paulo kha va wona va si faneleki. Hahanze keto, ene a va woni nga fulaho yi txi lava kuelulwa, se e txhumayela mahangu a manene ngu nzila yimwani.

8. a) U nga mahisa kutxani ti to u ziva ati m’thu a ti kholwako? b) Ngako m’thu a txi khene a ni wukhongeli wakwe, u nga maha txani?

⁸ Kufana ni Paulo, khata ngu wonisisa kwati. Zama kuwona sikombiso asi si nga ku vhunako kuwona ati vathu va kholwako ka tona. Wona nzila yi nyamne wa m’ti a nga tshurisela ngu yona m’ti mwendo mmovha wakwe. Zama kuwona to mwendo ditina dakwe, simaha si a ambalako hambi mawomba-wombelo ma nga womba to kari ngu wukhongeli wakwe. Ngako a txi kugela ngu kukongama to ene mkhongeli, u nga maha txani? U nga maha ti mwanathu Flutura awu i ku nyaphandule wo sawuleka awu a tolovekako kuxamulisa tiya: “Txikongomelo txangu hi nga ku ta ku sinzisa kukholwa ati ni kholwako, kambe ngu ta womba-womba ngu tiya . . . ”

9. Ngu tihi ti vathu ava va ku ni wukhongeli va nga kholwako ka tona ati u nga ti londolako?

⁹ Ngu tihi ati u nga bhulako ni m’thu awu a khongelako? Zama kumana ati motsheno mi kholwako ka tona. Ti nga maha a txi khozela Txizimu tximwetxo, e kholwa ku Jesu Muhanyisi wa vathu, mwendo a nga thuka a txi kholwa ti to hi hanya ka masiku aya ku ku ni wubihi wo tala awu wu no gumiswa i si nga kale. Ngu kuthumisa timhaka ati motshenu mi kholwako ka tona, m’gele timhaka ta Bhiblia ngu nzila ayi yi no mtsakisa.

10. Hi nga duketa kumaha txani? Ngu kutxani?

¹⁰ Ku lava ku tiziva to vathu ti nga maha va si kholwi ka totshe ati va gondiswako titxhetxheni kwawe. Se, hambi u di tumbute to m’thu mbwa wukhongeli muni, zama kuwona to a kholwa ka txani. David, i ku nyaphandule wo sawuleka khe Austrália a khene: “Vo tala va patanisela filozofiya ni wukhongeli wawe.” Donalta wa Albánia a womba tiya: “Vo tala ava hi va manako hi txi txhumayela va womba to va khongela, kambe va gwita ve tumela to ngu ditshuri kha va kholwi ka Txizimu.” Se murumiwa mmwani aku a Argentina a tumbute to vathu ava va wombako to va kholwa ka mhaka ya sizimu siraru ka wukhalo wa wumwewo,  ti nga maha va si kholwi ngu ta ditshuri to Tate, Mwanana ni moya wo sawuleka Njizimu tximwetxo. Ene a khene: “U txi ziva toneto, ta hehuka kumana to kari ati mi nga fanako ka tona.” Ngu toneto, duketa kuziva to ati vathu ngu ditshuri va kholwa ka tona. Se kufana ni Paulo, u nga sikota ku ‘ti maha sotshe ka votshe.’—1 Vak. 9:19-23.

11. Ngu kuya ngu Mithumo 14:14-17, Paulo a mahisile kutxani ti to e txhumayela vathu va Listra ngu nzila yi yi nga va tsakisa?

¹¹ Lera Mithumo 14:14-17. Paulo a wonisisile ati vathu va ti dhundako, se a yelanisa mhaka yakwe ni toneto. Ngu txikombiso, vathu ava a nga bhula navo Listra va txo ziva ta tidotho mwendo nem txilo ngu Mibhalo. Se mbimo yi a nga ti bhula navo a ti thumisa timhaka ati ni vona va nga txi tiziva. Ene a womba-wombile ngu tinguva to pfuna ni wusikoti wo tibusa ngu wutomi. Ene a thumisile mapswi ni sikombiso asi vaengiseli vakwe va ndi no kuluveta ve si pfisisa.

12. U nga ti wonisa kutxani ati m’thu a ti dhundako se u ti yelanisa ni txiwuletiso txako?

¹² Vana ni wutxhari ti to u wona ati vathu va wukhalo wanu va ti dhundako se u yelanisa txiwuletiso txako. Mbimo yi u belako mtini ka m’thu, u nga mahisa kutxani ti to u wona ati a ti dhundako? Khata ngu kuwonisisa kwati. Ti nga maha a txo khatalela jaradhi, a txo lera dibhuku, a txo lungisa mmovha mwendo a txi thuma timwani. Ngako ti txi koteka, khata dibhulo ngu ti a thumako tona. (Joh. 4:7) Phela hambi asi m’thu a nga ambala, si nga womba to kari ngu ngene, ti nga maha si txi kombisa ditiko, mthumo wakwe, mwendo mtxawa wa bhola awu a wu dhundako. Gustavo a khene: “Ni khatile dibhulo ni mfana mmwani wa 19 wa malembe awu a nga ti ambate txikhipa atxi txi nga ti ni mfota wa mtxhayi wa nduma. Ni mu wotisile mayelano ni txikhipa txakwe, se ene a ni gete to ngu kutxani atxi dhunda mtxhayi wule. Dibhulo di tute gondo ya Bhiblia, se konkuwa ene i mwanathu.”

13. U nga mahisa kutxani ti to u khata gondo ni m’thu ngu nzila yo tsakisa?

 ¹³ Ngako u txi khata gondo ya Bhiblia ni m’thu, ti mahe ngu nzila yi yi no m’tsakisa; m’kombe to gondo yi nga m’vhunisa kutxani. (Joh. 4:13-15) Ngu txikombiso, mwanathu wa txisikati awu a dhanwako to i Poppy a amuketwe ngu wamsikati awu a nga kombisa kutsakela. Mbimo yi Poppy a nga bela nyambani a woni didhiploma ka diseta, se e ti wona to wule wa msikati a gondile. Ene a junyatisile to nathu ha gondisa vathu ngu kuthumisa gondo ya Bhiblia ni mitshangano. Wule wamsikati a tumete gondo ya Bhiblia, eya mitshanganoni mangwana ka kona, ngu msana e ya xalela mtshangano wa txigava. Ku di pindile dilembe ene a bhabhatisilwe. Se tiwotise tiya: ‘Ava ni nga vatxhumayela va dhunda txani? Ina ni nga lulamisela gondo ya Bhiblia ngu nzila yo yi tsakelwa ngu sigondo sangu?’

14. U nga lulamiselisa kutxani gondo ya Bhiblia ka txigondo tximwani ni tximwani?

¹⁴ Na u si se tsula u ya tsimbitisa txigondo, lulamisela gondo ya m’thu ni m’thu awu u no ya gonda nayo, u si divali ati a kholwako ni ti a ti dhundako. Mbimo yi u lulamiselako, wona to ngu yihi mibhalo ayi u no lera, mavhidhiyo ya u no komisa, ni sikombiso asi u no si thumisa ti to u txhamusela ditshuri da Bhiblia. Tiwotise tiya: ‘Nji txani atxi txi no tsakisa ngutu ni kugwesa mbilu ya txigondo txangu?’ (Mav. 16:23) Flora awu i ku nyaphandule a ti gonda ni wamsikati mmwani khe Albánia awu a nga m’gela ngu kukongoma a txi khene: “Hi nga ditshuri to ava va nga fa va na wuswa.” Flora kha mu sinzisa. Ene a womba tiya: “Ni alakanyile to ene a fanete e khata ngu kuziva Jehovha awu i ku ene a thembisako kuwusa vafi.” Kukhatela koneho, ka gondo yimwani ni yimwani, Flora a junyatisile lirando la Jehovha, wuzivi wakwe ni mtamo wakwe. Ngu kutsimbila ka mbimo, wule wa msikati a khotwe ka kuwuswa ka vafi. Konkuwa i Fakazi ya Jehovha yo hiseka.

15. Ngu kuya ngu Mithumo 17:16-18, ngu tihi ati Paulo a nga ti wona Atena? Kambe ngu kutxani a sa va godholela?

¹⁵ Lera Mithumo 17:16-18. Mpostoli Paulo kha va godholela vathu va Atena, hambiku didhoropa dawe di nga ti tate ngu wukhozeli wa sithombe, wugelegele, tifilozofiya ta wuhedheni; ene kha thelwa dikhodho ngu kuruketelwa. Ene apune a sikoti ku va Mkristu hambiku i nga ti “mruketeli ni mxanisi ni m’thu wa tshofu.” (1 Tim. 1:13) Jesu a ti woni to Paulo a nga va Mkristu, se nene Paulo a ti woni to vathu va Atena va nga Makristu. Phela ngu ditshuri vaho va nga txitxa.—Mith. 9:13-15; 17:34.

16-17. Nji txani txi kombisako ti to vathu votshe va nga va vagondiswa va Jesu? Womba txikombiso.

¹⁶ Ka mbimo ya Vapostoli, vathu va tixaka to hambana-hambana va vile valondeteli va Jesu. Mbimo yi Paulo a nga bhalela Makristu a didhorapa da Korinto adi di nga ti maneka khe Grécia, a wombile to vamwani va nga ti dibanzani kale kwawe i ti sigevenga ni magelegele. E gwita e womba tiya: “Vamwani kwanu i ti vo nga toneto, aniko se mi kuwutwe.” (1 Vak. 6:9-11) Itiku o vawe, ina u di woni vathu vonewo i di va va nga sikotako kutxitxa ve va vagondiswa?

¹⁷ Nyamsi, vo tala va tiemisete kumaha kutxitxa aku kulavekako ti to ve va vongondiwa va Jesu. Ngu txikombiso, Yukina i ku nyaphandule wa Austrália a woni to vathu votshe va nga tsakela madungula a Bhiblia. Ditshiku dimwani, ka hofiso yo kari ene a a woni dihorana di nga ti ni matatowaje di di ambate simaha sa mihubhwata. Yukina a khene: “Makhatoni  ni thavile kubhula nado, kambe ni gwitile ni bhula nado. Ni tumbute to ene a txi tsakela Bhiblia ha ko hambi mamwani a matatowaje akwe i ti tindimana ta Masalmo!” Dihorana dile di khatile kugonda ni kuya mitshanganoni. *

18. Ngu kutxani hi sa fanela kututumela kuwomba to m’thu a nge vi m’gondiswa wa Jesu?

¹⁸ Ina aku Jesu a nga wona tithembwe ti txi lava kuelulwa a txo pimisa to vathu vo tala va na maha vagondiswa vakwe? Nadha. Mibhalo se yi ti wombile to mba dotho ava va no kholwa kwakwe. (Joh. 12:37, 38) Jesu a txi sikota kuwona ta mbiluni. (Mat. 9:4) Kambe, ene a vekile mapimo akwe ka vona va va vadotho va ndi no kholwa kwakwe, se e txhumayela vathu votshe ngu kuhiseka. Se athu hi nge sikotiko kuwona ta mbiluni, ngu ditshuri hi fanete hi vayilela kualakanya ti to m’thu wo kari mwendo vathu va wukhalo wo kari va nge tumeli ditshuri! Hahanze keto, wona votshe i di va va nga sikotako kuva vagondiswa va Jesu. Marc i ku murumiwa wa Burquina Fasso, a wombisa tiya: “Vathu va ni pimisako to va na kula ngu didhawa moya, kutala kwakwe kha va kuli. Kambe ava ni nga ti pimisa to va na mbi maha txilo, ngu vona kulako. Se ni gondile to ndinene kuleka moya wa Jehovha wu hi kongomisa.”

19. Hi fanete hi va wonisa kutxani vathu va wukhalo wathu?

¹⁹ Ti nga maha u tutumela kupimisa to ka wukhalo wanu kha ku nga ni vathu ava va fanako ni fulaho ayi yi lavako kuelulwa. Kambe khumbula ati Jesu a nga gela vagondiswa vakwe. Tithembwe ti to xwee, i ku ti to, se ti lava kuelulwa. Vathu va nga txitxa ve va vagondiswa va Kristu. Jehovha wa kholwa to vathu va wukhalo wanu va nga va vagondiswa ni ku a va wona i di “tithomba.” (Hag. 2:7) Hi txi va ni mawonelo a Jehovha ni Jesu ngu vathu, hi na gonda mayelano ni ti va ti kholwako ni ti va tidhundako. Se hi na mbi va wona kota nyamthiyoyo, kambe kota vanathu va mbimo yi yi tako.