1-2. Ngano kahang nasulti ni Jesus ang giingon sa Juan 4:35, 36?

SI Jesus nagbaktas sa kaumahan, ug tingali linghod pa ang natanom nga mga sebada. (Juan 4:3-6) Mga upat pa ka bulan ang molabay ayha ni anihon. Pero may gisulti si Jesus nga makapatingala: “Lantawa ang kaumahan. Kini hinog na aron anihon.” (Basaha ang Juan 4:35, 36.) Unsay iyang gipasabot?

² Dayag nga ang gitumong ni Jesus mao ang simbolikong pagpanganig mga tawo. Konsideraha kon unsay bag-o rang nahitabo. Bisan tuod ang mga Hudiyo maglikay sa mga Samarianhon, gisangyawan ni Jesus ang usa ka babayeng Samarianhon​—ug naminaw kini! Gani, samtang naghisgot si Jesus nga ang kaumahan “hinog na aron anihon,” dihay panon sa mga Samarianhon, kinsa nakadungog bahin kang Jesus gikan sa babaye, nga nagpaingon kaniya aron mokat-on ug dugang. (Juan 4:9, 39-42) Ang usa ka komentaryo bahin niini nga asoy nag-ingon: “Ang kahinam sa mga tawo . . . nagpakita nga sama silag mga lugas nga anihonon na.”

3. Kon ang imong panglantaw sa mga tawo sama nianang kang Jesus, unsay epekto niini sa imong pagsangyaw?

³ Unsay imong panglantaw sa mga tawo nga imong ginasangyawan? Para nimo, sama ba silag mga lugas nga anihonon na? Kon mao, tulo ka butang ang mahitabo. Una, mas magkugi kag sangyaw. Ang ting-ani mubo lang, busa dili angayng sayangan ang panahon. Ikaduha, malipay ka dihang makita nimo nga maminaw ang mga tawo sa maayong balita. Ang Bibliya nag-ingon: ‘Ang katawhan nagsadya sa ting-ani.’ (Isa. 9:3) Ug ikatulo, isipon nimo ang matag tawo ingong umaabot nga tinun-an ni Jesus, busa ipahaom nimo ang imong paagi sa pagsangyaw aron makuha ang iyang interes.

4. Unsay atong makat-onan kang apostol Pablo niining artikuloha?

 ⁴ Ang pipila sa mga sumusunod ni Jesus naghunahuna nga ang mga Samarianhon dili gyod mahimong tinun-an, pero lahi si Jesus. Naghunahuna siya nga puwede silang mahimong tinun-an. Kinahanglan nga ingon sab niana ang atong panglantaw sa mga tawo sa atong teritoryo. Si apostol Pablo naghatag kanatog maayong ehemplo. Unsay atong makat-onan kaniya? Niining artikuloha, atong hisgotan (1) kon giunsa niya pagkahibalo sa gituohan sa iyang mga gisangyawan, (2) kon giunsa niya pagkahibalo kon unsay makapainteres kanila, ug (3) kon nganong naghunahuna siya nga puwede silang mahimong tinun-an ni Jesus.

5. Nganong nakasabot si Pablo sa iyang mamiminaw sa sinagoga?

⁵ Si Pablo sagad magsangyaw sa mga sinagoga sa mga Hudiyo. Pananglitan, sa sinagoga sa Tesalonica, “sulod sa tulo ka igpapahulay siya nangatarongan [sa mga Hudiyo] gikan sa Balaang Kasulatan.” (Buh. 17:1, 2) Tingali komportable si Pablo nga mosangyaw sa sinagoga. Gimatuto siya ingong Hudiyo. (Buh. 26:4, 5) Kay nakasabot siya sa mga Hudiyo, komportable siyang mosangyaw kanila.​—Filip. 3:4, 5.

6. Nganong ang mga tawo sa merkado sa Atenas lahi niadtong gisangyawan ni Pablo sa sinagoga?

⁶ Human mopahawa si Pablo sa Tesalonica ug unya sa Berea tungod sa paglutos, nakaabot siya sa Atenas. “Sa sinagoga siya nanudlo ug nangatarongan [na sab] sa mga Hudiyo ug sa ubang mga tawo kinsa nagsimba sa Diyos.” (Buh. 17:17) Pero dihang nagsangyaw siya sa merkado, lahi na ang iyang mamiminaw. Apil kanila ang mga pilosopo ug ubang mga Hentil nga nag-isip sa mensahe ni Pablo ingong “bag-ong pagtulon-an.” Sila miingon kaniya: “Nagpahayag kag mga butang nga bag-o sa among mga igdulungog.”​—Buh. 17:18-20.

7. Sumala sa Buhat 17:22, 23, giunsa pagpahaom ni Pablo ang iyang paagi sa pagsangyaw?

⁷ Basaha ang Buhat 17:22, 23. Ang pagpresentar ni Pablo sa iyang mensahe ngadto sa mga Hentil sa Atenas lahi sa iyang pagpresentar niini sa mga Hudiyo sa sinagoga. Tingali gipangutana ni Pablo ang kaugalingon, ‘Unsay gituohan sa mga tawo sa Atenas?’ Giobserbahan niya pag-ayo ang palibot ug ang relihiyosong mga kostumbre sa mga tawo. Dayon, gisugdan niya paghisgot ang mga kamatuoran sa Kasulatan base sa mga butang nga gidawat sa iyang mamiminaw. Ang usa ka komentarista sa Bibliya nag-ingon: “Ingong  Hudiyong Kristohanon, nahibalo siya nga ang paganong mga Grego wala magsimba sa ‘matuod’ nga Diyos sa mga Hudiyo ug mga Kristohanon, pero naningkamot siya sa pagpakita nga sa pagkatinuod ang Diyos nga iyang gimantala dili bag-o sa mga taga-Atenas.” Busa si Pablo andam sa pagpahaom sa iyang paagi sa pagsangyaw. Iyang giingnan ang mga taga-Atenas nga ang iyang mensahe naggikan sa “Diyos nga Wala Mailhi,” kinsa ilang ginasimba. Bisag ang mga Hentil dili pamilyar sa Kasulatan, si Pablo wala mosurender. Hinuon, giisip niya sila ingong mga lugas nga anihonon na, ug gipahaom niya ang iyang paagi sa pagsangyaw sa maayong balita.

8. (a) Unsaon nimo pagkahibalo kon unsay gituohan sa mga tawo sa inyong teritoryo? (b) Kon sultihan ka sa usa ka tawo nga naa na siyay relihiyon, unsaon nimo pagtubag?

⁸ Sama kang Pablo, maayong maniid ka. Pangitag mga timailhan kon unsay gituohan sa mga tawo sa inyong teritoryo. Unsay dekorasyon sa balay o sakyanan sa tagbalay? Mailhan ba nimo sa iyang ngalan, sininaan, hitsura, o bisan sa iyang sinultihan kon unsay iyang relihiyon? Tingali giprangkahan ka niya nga naa na siyay relihiyon. Dihang sultihan ug ingon niana ang espesyal payunir nga si Flutura, siya motubag, “Mianhi ko dili aron ipamugos ang akong gituohan, kondili aron makig-estorya nimo bahin sa . . . ”

9. Unsang mga topiko ang lagmit gituohan sab sa tawong relihiyoso?

⁹ Unsay mahimo nimong hisgotan sa tawong relihiyoso? Paghunahunag mga topiko nga pareho ninyong gituohan. Tingali nagtuo siya nga usa lang ang Diyos, o kaha si Jesus ang Manluluwas, o kaha nagkinabuhi na ta sa daotan kaayo nga panahon ug hapit nang taposon ang pagkadaotan. Base sa mga butang nga pareho ninyong giuyonan, ipresentar ang mensahe sa Bibliya sa paagi nga makapainteres kaniya.

10. Unsay atong paningkamotang himoon, ug ngano?

¹⁰ Hinumdomi nga ang mga tawo wala tingali magtuo sa tanang gitudlo sa ilang relihiyon. Mao nga bisag nahibalo ka sa relihiyon sa usa ka tawo, kinahanglang mahibaloan nimo kon unsa gyoy iyang gituohan. “Ginasagol karon sa daghang tawo ang pilosopiya ug ang mga pagtulon-an sa ilang relihiyon,” miingon si David, nga usa ka espesyal payunir sa Australia. Si Donalta, nga taga-Albania, miingon, “Ang pipila sa atong masangyawan moingon nga naa na silay relihiyon, pero sa ulahi moingon sila nga wala gyod sila magtuo ug Diyos.” Ug ang usa ka brader nga misyonaryo sa Argentina nakamatikod nga ang pipila ka tawo moingon nga nagtuo sila sa Trinidad,  pero tingali wala gyod sila magtuo nga ang Amahan, Anak, ug ang balaang espiritu usa ra ka Diyos. Siya miingon, “Kon nahibalo ka niana, mas sayon ang pagpangitag topiko nga parehas ninyong giuyonan.” Busa paningkamoti nga mahibaloan kon unsa gyoy gituohan sa mga tawo. Pinaagi niana, masundog nimo si Pablo ug makapahiuyon ka sa “tanang matang sa katawhan.”​—1 Cor. 9:19-23.

11. Base sa Buhat 14:14-17, giunsa pagpresentar ni Pablo ang iyang mensahe aron mainteres ang mga taga-Listra?

¹¹ Basaha ang Buhat 14:14-17. Si Pablo naningkamot nga mahibaloan kon unsay makapainteres sa iyang mamiminaw, ug iyang gipahaom ang iyang presentasyon. Pananglitan, ang mga tawo nga iyang naestorya sa Listra wala kaayoy nahibaloan o wala gyoy nahibaloan sa Kasulatan. Busa si Pablo misulti sa paagi nga ilang masabtan. Naghisgot siya bahin sa mabungahon nga mga ani ug sa kapasidad nga mag-enjoy sa kinabuhi. Migamit siyag mga pulong ug pananglitan nga daling masabtan sa iyang mamiminaw.

12. Unsaon nimo pagkahibalo kon unsay makapainteres sa usa ka tawo, ug unsaon nimo pagpahaom ang imong presentasyon?

¹² Paningkamoti nga masabtan nimo kon unsay makapainteres sa mga tawo sa inyong teritoryo ug ipahaom ang imong presentasyon. Unsaon nimo ni pagkahibalo samtang nagpadulong ka sa usa ka tawo o sa iyang balay? Sa gihapon, maayong maniid ka. Tingali nag-garden siya, nag-ayog sakyanan, o naay laing ginahimo. Kon haom, ibase sa iyang ginahimo ang imong pagpakig-estorya niya. (Juan 4:7) Naa kay mahibaloan bahin sa usa ka tawo bisan sa iyang sinina​—tingali bahin sa iyang nasyonalidad, trabaho, o paboritong sports team. “Nakig-estorya ko sa usa ka 19 anyos nga lalaki nga ang T-shirt naay nawong sa sikat nga singer,” miingon si Gustavo. “Gipangutana nako siya bahin ini, ug iya kong giingnan kon nganong ganahan siya sa singer. Na-Bible study nako siya, ug karon igsoon na nato siya.”

13. Unsaon nimo pagtanyag ang pagtuon sa Bibliya sa paagi nga makapainteres?

 ¹³ Dihang tanyagan nimog pagtuon sa Bibliya ang usa ka tawo, himoa ni sa paagi nga mainteres siya; ipakita kon sa unsang paagi ang pagtuon makatabang kaniya. (Juan 4:13-15) Pananglitan, ang sister nga si Poppy gipasaka sa usa ka babayeng interesado. Dihang nakita ni Poppy sa bungbong ang sertipiko nga ang babaye propesora, iyang gipasiugda nga kita sab nagtudlo sa mga tawo pinaagi sa atong programa sa pagtuon sa Bibliya ug sa atong mga tigom. Ang babaye misugot nga mag-Bible study, mitambong sa tigom pagkasunod adlaw, ug human niana mitambong sa sirkitong asembliya. Paglabayg usa ka tuig, siya nabawtismohan. Pangutan-a ang imong kaugalingon: ‘Unsay makapainteres sa akong mga balikduaw? Unsaon nako pagpresentar ang atong programa sa pagtuon sa Bibliya sa paagi nga mainteres sila?’

14. Unsaon nimo pagpahaom sa matag estudyante ang inyong pagtuon sa Bibliya?

¹⁴ Dihang masugdan na nimo ang pag-Bible study, pangandam kada pagtuon. Hunahunaa ang pamilya, edukasyon, eksperyensiya, ug ang mga butang nga makapainteres sa imong Bible study. Samtang mangandam, hunahunaa ang mga teksto nga basahon, video nga tan-awon, ug ilustrasyon nga imong gamiton sa pagpatin-aw sa mga kamatuoran sa Bibliya. Pangutan-a ang kaugalingon, ‘Unsay ilabinang makapainteres ug makapatandog sa kasingkasing niini nga estudyante?’ (Prov. 16:23) Sa Albania, ang usa ka babaye nga gi-Bible study sa payunir nga si Flora miingon, “Di gyod nako madawat ang pagtulon-an bahin sa pagkabanhaw.” Wala mamugos si Flora. Siya miingon, “Naghunahuna ko nga kinahanglan una niyang mailhan ang Diyos nga nagsaad sa pagkabanhaw.” Sukad niadto, sa matag pagtuon nila, ipasiugda ni Flora ang gugma, kaalam, ug gahom ni Jehova. Sa ngadtongadto ang Bible study mituo na sa pagkabanhaw. Karon, madasigon na siya nga Saksi ni Jehova.

15. Sumala sa Buhat 17:16-18, unsang mga binuhatan sa karaang Gresya ang wala maangayi ni Pablo, pero nganong nagsangyaw gihapon siya sa mga taga-Atenas?

¹⁵ Basaha ang Buhat 17:16-18. Si Pablo wala maghunahuna nga dili na gyod mahimong tinun-an ang mga taga-Atenas, bisan tuod ang ilang siyudad napunog idolatriya, seksuwal nga imoralidad, ug paganong pilosopiya. Wala sab siya moundang ug sangyaw kanila bisag giinsulto nila siya. Si Pablo mismo nahimong Kristohanon, bisag kaniadto siya “tigpasipala, maglulutos, ug bagis.” (1 Tim. 1:13) Sama nga nakita ni Jesus nga puwedeng mahimong tinun-an si Pablo, nakita sab ni Pablo nga puwedeng mahimong tinun-an ang mga taga-Atenas. Ug wala siya masayop.​—Buh. 9:13-15; 17:34.

16-17. Unsay nagpakita nga ang tanang klase sa tawo puwedeng mahimong tinun-an sa Kristo? Paghatag ug pananglitan.

¹⁶ Sa unang siglo, lainlaing matang sa tawo ang nahimong tinun-an ni Jesus. Dihang misulat si Pablo sa mga Kristohanon nga nagpuyo sa Gregong siyudad sa Corinto, siya miingon nga ang pipila ka membro sa kongregasyon maoy kanhing mga kriminal o imoral kaayo. Siya midugang: “Apan kamo nahugasan na.” (1 Cor. 6:9-11) Kon ikaw to, maghunahuna kaha ka nga magbag-o sila ug mahimong tinun-an?

¹⁷ Karon, daghan ang gustong magbag-o aron mahimong tinun-an ni Jesus. Pananglitan, sa Australia, nakat-onan sa espesyal payunir nga si Yukina nga ang tanang klase sa  tawo puwedeng modawat sa mensahe sa Bibliya. Kas-a, sa usa ka opisina sa real estate, nakamatikod siyag babaye nga may mga tattoo ug lawlaw kaayog sinina. “Nagduhaduha ko primero,” miingon si Yukina, “pero nakig-estorya ko niya. Nahibaloan nako nga interesado diay kaayo siya sa Bibliya, kay ang uban niyang tattoo maoy mga teksto sa Salmo!” Ang babaye nagpa-Bible study ug misugod pagtambong sa mga tigom. *

18. Nganong dili nato angayng hukman ang mga tawo?

¹⁸ Naghunahuna ba si Jesus nga ang kaumahan anihonon na kay nagdahom siya nga ang kadaghanan mosunod kaniya? Wala. Gitagna sa Kasulatan nga dili kaayo daghan ang magpakitag pagtuo kaniya. (Juan 12:37, 38) Ug si Jesus dunay gahom sa pagbasa sa kasingkasing. (Mat. 9:4) Bisan pa niana, nagpokus siya sa pipila nga motuo, ug madasigon siyang nagsangyaw sa tanan. Busa kita, kinsa dili makabasag kasingkasing, dili gyod angayng mohukom sa usa ka teritoryo o sa usa ka tawo. Hinunoa, maghunahuna ta nga ang mga tawo puwedeng mahimong tinun-an. Si Marc, nga misyonaryo sa Burkina Faso, miingon: “Ang mga tawo nga gihunahuna nakong mouswag sagad moundang ug tuon. Pero kadtong akong gidahom nga moundang maoy miuswag. Maong nakat-onan nako nga mas maayong magpagiya sa espiritu ni Jehova.”

19. Unsay angay natong panglantaw sa mga tawo sa atong teritoryo?

¹⁹ Sa unang tan-aw, makaingon tingali ta nga gamay ra sa teritoryo ang morag lugas nga anihonon na. Pero hinumdomi ang giingon ni Jesus sa iyang mga tinun-an. Ang kaumahan hinog na aron anihon. Ang mga tawo puwedeng magbag-o ug mahimong tinun-an sa Kristo. Si Jehova naghunahuna nga kining mga tawhana puwedeng mahimong tinun-an ug giisip niya sila ingong “bililhong mga butang.” (Hag. 2:7) Kon gilantaw nato ang mga tawo sama sa paglantaw ni Jehova ug Jesus kanila, maghunahuna ta bahin sa ilang pamilya, edukasyon, eksperyensiya, ug sa mga butang nga makapainteres kanila. Lantawon nato sila, dili ingong mga estranghero, kondili ingong umaabot natong mga igsoon.