1-2. Ni enki eki Yesu yabire ari kumanyisa obu yagambire ebigambo ebiri omuri Yohaana 4:35, 36?

YESU akaba natamburira omu misiri y’engano zicari nto. (Yoh 4:3-6) Ezo ngano zikaba nizibasa kumara amezi ana kugira ngu zere, zisharurwe. Yesu akagamba ekintu eki abantu babire batari kukira kuhurira. Akagira ati: ‘Munage amisho, murebe emisiri ku eyezire, ku ehikire kugeshwa.’ (Shoma omuri Yohaana 4:35, 36.) Akaba ari kumanyisa ki?

² Yesu akaba ari kumanyisa okusharura abantu. Yetegereze ecabire cabaho. N’obu Abayudaaya babire batari kukwatanisa n’Abasamaria, Yesu akaburira Omusamariakazi kandi yamuhurikiza! Obu Yesu yagambire ku emisiri ‘ehikire kugeshwa,’ Abasamaria bingi abamanyire ebiri kukwata ahari Yesu birabire aha musamariakazi, bakija ngu Yesu abegese. (Yoh 4:9, 39-42) Ekitabo kimwe ekiri kugamba ahari Bibuli kikagira kiti: “Ahabw’okugira ngu abantu bakaba bine ekihika c’okuhurikiza Yesu, kikereka ku babire bari nk’emisiri eyezire ehikire kusharurwa.”

3. Ku orarebe abantu nk’oku Yesu yabire ari kubareba, nikija kukugasira kita?

³ Ni bata oku ori kureba abu ori kuburira obutumwa burungi? Mbehi nobareba nk’emisiri eyezire ehikire kusharurwa? Yaba ari ko ori kubareba oshemerire kukora ebi bintu bishatu: Ec’okubanza: Notamu amani omu murimo g’okuburira ori kumanya ngu obwire ni buce. Obwire bw’okusharura ni buce ni yo nshonga hatariho obwire bw’okufisa busha. Eca kabiri: Noyija kwesima wareba abantu bari kwakira kurungi obutumwa burungi obu ori kubagambira. Bibuli negamba ku ‘abashija bari kushemererwa bari kugabana eminyago,’ ninga shi bari kugesha. (Isa 9:3) Eca kashatu: Noyija kureba ku buri muntu ari kubasa kuhinduka omwegi wa Kristo, kandi kiryatuma  wahindura oburyo bw’okutandikisa ebiganiro ori kwihira aha bi bari kukunda.

4. Ni enki eki turayegere aha ntumwa Paulo omuri eki kicweka?

⁴ Yesu akaba atari kureba Abasamaria nk’oku abegi beye babire bari kubareba. Ahobwe akaba nabareba nk’abari kubasa kuba abegi. N’itwe tushemerire kureba abantu ab’omuri teritori zitu nk’abari kubasa kuba abegi ba Kristo. Entumwa Paulo akatusigira ecokureberaho kirungi c’okutoreza. Ni enki eki turi kubasa kumwegeraho? Omuri eki kicweka, twaza kushwijuma oku yabire (1) ari kumanya enyikiriza z’abu yabire ari kuburira, (2) ari kufa munonga aha bi babire bari kukunda, (3) n’oku yabire ari kubareba nk’abari kubasa kuba abegi ba Yesu.

5. Ahabw’enki Paulo yabire ari kumanya abu yabire ari kuburira omuri sinagogi?

⁵ Paulo akaba nakunda kuburira omuri sinagogi z’Abayudaaya. Ecokureberaho: Akaba naganira n’abantu ‘omu Byahandikirwe okumara amazoba ashatu ga Sabato,’ omuri Tesalonika. (Byak 17:1, 2) Paulo akaba naburira omuri sinagogi ayine obumanzi. Akaba ari Omuyudaaya. (Byak 26:4, 5) Paulo akaba namanya ge Abayudaaya kandi eco kikatuma yababurira atari kutina.—Fil 3:4, 5.

6. Ni bata oku abantu b’omu katare k’omuri Aseene babire bari kutana n’Abayudaaya abu Paulo yaburire omuri sinagogi?

⁶ Bwanyima ku bahiganisize Paulo ngu aruge omuri Tesalonika na Beroa, akaza omuri Aseene. Nambwenu, akatandika kuganira n’‘Abayudaaya n’abanyadini omuri sinagogi.’ (Byak 17:17) Konka Paulo ku yatandikire kuburira omu katare, akabugana abantu bari kutana n’Abayudaaya. Omuri abo bantu hakaba harimu abanyabwenge n’abanyamahanga ababire bari kureba obutumwa bwa Paulo nk’‘enyegesa nsya.’ Bakamugambira bati: ‘Oresire ebigambo bisya omu matu gitu.’—Byak 17:18-20.

7. Tukuratize ebiri kugambwa omu Byakozirwe 17:22, 23, ni bata oku Paulo yahindwire oburyo bweye bw’okuburira abantu?

⁷ Shoma omu Byakozirwe 17:22, 23. Oburyo obu Paulo yaburiremu Abanyamahanga bukaba nibutana n’obu yaburiremu Abayudaaya omuri sinagogi. Paulo nabasa kuba yayeburize ati: ‘Ni enki eki aba bantu b’omuri Aseene bari kwikiriza?’ Aketegereza ayetonzire ebyabire bimwetorwire kandi yagezaho kumanya emigenzo y’amadini g’abantu. Nambwenu, Paulo akacondoza ebintu ebi okuramya kwabo kuri kubuganiraho n’Ebyahandikirwe. Omuntu omwe akagamba ahari Bibuli ati: “Paulo  akamanya ku abapagani b’Abagriika babire batari kuramya Ruhanga ow’amazima owu Abakristo b’Abayudaaya ababire bari kuramya, konka nabwe akereka ab’omuri Aseene ku babire bari kumanya Ruhanga owu yabire ari kugamba.” Obwe rero Paulo akahindura omu ku yabire ari kubaburira. Akagambira abantu b’omuri Aseene ku obutumwa obu yabire ari kubaburira bwabire buri kuruga ahari ‘Ruhanga otari kumanywa,’ owu babire bari kugezaho kuramya. N’obu Abagriika babire batamanyirire Ebyahandikirwe, konka Paulo tararekire kubaburira. Omu mwanya gw’eco, akaba nabareba nk’emisiri eyezire ehikire kusharurwa, kituma yahindura oburyo obu yabire ari kubaburiramu obutumwa burungi.

8. (a) Ni bata oku ori kubasa kumanya enyikiriza z’abantu abari omuri teritori yawe? (b) Omuntu yagamba ku ayine edini, nobasa kumugarukamu ota?

⁸ Guma oyetegereze nka Paulo. Reba ebintu ebiri kukukwasa kumanya ebi abantu ab’omuri teritori yawe bari kwikiriza. Ni biha bintu ebiri omu nju? Mbehi izina ryeye, oku ari kujwara n’okweboneza, n’orurimi rweye nibituma wamanya edini eyi arimu? Nabasa n’okukugambira ku ayine edini. Eco ku kiri kuhika aha mupayoniya w’omutano ori kwetwa Flutura, nagarukamu ati: “Tinayija ngu mpindure enyikiriza yawe, konka nayija ngu tuganire ahari eki kintu . . . ”

9. Ni biha bintu ebi ori kubasa kushanga ori kubuganiraho n’omuntu oyine edini?

⁹ Ni biha bintu ebi ori kubasa kuganira n’omuntu oyine edini? Gezaho kumanya ebi muri kubuganiraho. Nabasa kuba ari kwikiriza ku hariho Ruhanga omwe, ari kwikiriza Ekitambo ca Yesu, ninga shi ari kwikiriza ku turi omu biro bibi by’aha mperu. Koresa ebyo bintu ebi muri kubuganiraho rero omuhiseho obutumwa burungi omu buryo oburatume yabikunda.

10. Ni enki eki tushemerire kukora, kandi ahabw’enki?

¹⁰ Yijuka ku abantu bari kubasa kuba batari kwikiriza ebintu bimwe ebi amadini gabo gari kubegesa. Obwe rero wamanya edini ey’omuntu arimu, ogezeho n’okumanya ebi ari kwikiriza. Omupayoniya w’omutano w’omuri Australia ori kwetwa David akagamba ati: “Abantu bingi nibajwanza obwenge bw’abantu n’enyikiriza z’amadini gabo.” Donalta w’omuri Albania, we akagamba ati: “Abamwe abu turi kuburira nibagira ngu bine edini, konka bagamba ku batari kwikiriza Ruhanga.” Kandi mwenetata w’omumishonari w’omuri Argentina, we akashanga abantu bari kwikiriza obushatu,  konka batari kwikiriza ku Tata, Omwana, n’omwika oguri kwera ari Ruhanga omwe. Akagira ati: “Wamanya eco kumanya ebi ori kubuganiraho na bo, nikikorobera.” Obwe rero guma ogezeho kumanya ebi abantu bari kwikiriza. Nka Paulo, ‘noyija kuhinduka byona ahari bona.’—1 Kor 9:19-23.

11. Tukuratize ebiri omu Byakozirwe 14:14-17, ni bata oku Paulo yaburire abantu b’omuri Lusitura?

¹¹ Shoma omu Byakozirwe 14:14-17. Paulo akaba nareba ebi abantu abu ari kuburira bari kukunda, rero kituma yahindura oku ari kubaburira. Ecokureberaho: Abantu abingi abu yaburire omuri Lusitura bakaba batine obumanyi bw’omu Byahandikirwe. Obwe rero Paulo akababurira omu buryo obu babire bari kubasa kucenga. Akagamba aha myaka n’oku babire bari kubasa kushemerererwa amagara. Akakoresa ebigambo n’ebyokureberaho ebi abamuhurikize babire bari kumanya.

12. Ni bata oku ori kubasa kumanya ebi omuntu ari kukunda kandi okahindura omu ku ori kuburira?

¹² Koresa obwenge kugira ngu omanye ebi abantu b’omuri teritori yawe bari kukunda, kandi ohindure oku ori kubaburira. Ni bata oku ori kubasa kumanya ebi omuntu ari kukunda wahika omu ka yeye? Oshemerire kwetegereze. Nabasa kuba ari kuhinga, ari kushoma ekitabo, ari kukanika emotoka, ninga shi ari kukora ogundi murimo. Yaba kiri kubasika, nobasa kutandika ori kuganira na we aha ki washanga ari kukora. (Yoh 4:7) N’ebi omuntu ajwire nibibasa kukumanyisa ihanga ryeye, omurimo gweye, ninga shi emizano eyi ari kukunda. Gustavo akagamba ngu: “Nkatandika ekiganiro n’omwojo oyine emyaka 19, nkwatire aha mushweta ogu yabire ajwire guriho omweshongozi. Nkamubuza ebikwatirine n’ogo mweshongozi rero yangambira ekiri kutuma yamukunda. Eco kiganiro kikatuma natandika kumwegesa Bibuli, kandi hati ni mwenetata.”

13. Ni bata oku ori kubasa kuhika omwegi wa Bibuli aha mutima?

¹³ Waba ori kwegesa omuntu Bibuli, mwegese omu buryo oburamuhike aha mutima kandi omwereke ku ebi ari kwega birije kumukwasa. (Yoh 4:13-15) Ecokureberaho: Munyanyazi ori kwetwa Poppy, akaburira omukazi owayerekire ku nayenda kwega. Poppy ku yarebire ekishushani ekiri kwereka ku ogo mukazi yayegire yunivasiti, akamugambira ku n’itwe turi kwega birabire aha ntebekanisa y’okwega Bibuli n’enterane zitu. Ogo mukazi akikiriza kwega Bibuli, yatandika kuza omu nterane kandi bwanyima yaza omu kiterane. Ku hahwire omwaka, akabatizibwa. Yebuze ngu: ‘Mbehi abantu abu ndi kutayayayira nibakunda ki? Ni bata oku ndi kubasa kubashobororera entebekanisa yitu y’okwega Bibuli nkabahika aha mutima?’

14. Ni bata oku ori kubasa kuhindura oku ori kwegesa abegi ba Bibuli?

¹⁴ Wamara kutunga abegi, ogume obanze watebekanisa otakagire kwegesa buri mwegi, otekateke aha mbera ezi yakuriremu n’ebi ari kukunda. Waba ori kutebekanisa otorane enyiriri ezi orashome, vidiyo ezi oramwereke, n’ebyokureberaho ebi orakorese kugira ngu omushobororere amazima g’omuri Bibuli. Yebuze ngu: ‘Ni enki eki ndi kubasa kukora ngu ogu mwegi muhike aha mutima?’ (Enf 16:23) Omukazi w’omuri Albania, owabire ari kwega n’omupayoniya ori kwetwa Flora akagamba ati: “Tindi kubasa kwikiriza enyegesa y’okuzoka.” Flora taramugemire ngu ayikirize eyo nyegesa. Akatekateka ati: “Ashemerire kubanza yamanya Ruhanga ori kuraganisa ku haribaho okuzoka.” Kuruga obwo ku babire bari kwega, Flora akaba nagamba ahari rukundo ya Yehova, obwenge bweye, n’amani geye. Bwanyima, omwegi weye akatandika kwikiriza okuzoka. Hati ni Omuhamya wa Yehova ori kumuhereza n’amani.

15. Tukuratize ebiri omu Byakozirwe 17:16-18, ni eha mitwarize y’abantu b’omuri Aseene eyashashire Paulo, kandi shi ahabw’enki atararekire kubaburira?

¹⁵ Shoma omu Byakozirwe 17:16-18. Paulo tararekire kuburira abantu b’omuri Aseene n’obu omuri eyo tawuni habire hijwiremu okuramya ebishushani, obushambani, n’enyegesa z’ebishuba, kandi tarabarekire n’obu babire nibamugambira kubi. Paulo akaba Omukristo n’obu na we yabire ari kugamba kubi entumwa, ari kuzijuma, kandi ari ‘ensharizi.’ (1 Tim 1:13) Nk’oku Yesu yarebire ku Paulo yabire ari kubasa kuhinduka entumwa, Paulo na we akareba abantu b’omuri Aseene nk’abari kubasa kuhinduka Abakristo. Kandi tarahindukire.—Byak 9:13-15; 17:34.

16-17. Ni enki ekiri kwereka ku abantu b’emiringo yona bari kubasa kuhinduka abegi ba Kristo? Gamba ecokureberaho.

¹⁶ Omu kinyigana c’okubanza, abantu b’emiringo etari emwe bakaba abegi ba Yesu. Obu Paulo yahandikire Abakristo b’omuri Korinso, etawuni y’omuri Bugriika, akagamba ku ab’omuri eco kibina na bo babire bari kukora ebikorwa by’obushambani. Akongeraho ati: ‘Kandi bamwe omuri imwe mukaba muri nka bo. Konka mukogibwa, mwayezibwa.’ (1 Kor 6:9-11) Mbehi kuri wabire ori yo okaba nobasa kubareba nk’abari kubasa kuhinduka bakaba abegi ba Yesu?

¹⁷ Omuri obu bwire, abantu bingi nibakora empinduka baba abegi ba Yesu. Ecokureberaho: Omupayoniya w’omutano w’omuri Australia ori kwetwa Yukina, akamanya ku abantu b’emiringo yona bari kubasa kuhurikiza obutumwa bw’omuri Bibuli. Izoba rimwe, ku yabire ari ahu bari kukorera emirimo, akareba omukazi owabire ayehandikire aha mubiri kandi ajwire ebijwaro bitine ife na ruguru. Yukina akagira ati: “Nkabanza  namutina, konka bwanyima natandika kugamba na we. Nkashanga ayine ekihika c’okwega Bibuli ahabw’okuba ebi yabire ahandikire aha mubiri ni enyiriri zimwe z’omuri Zaaburi!” Ogo mukazi akatandika kwega kandi yatandika n’okuza omu nterane. *

18. Ahabw’enki tutashemerire kucwera abantu orubanja?

¹⁸ Mbehi Yesu akagamba ngu emisiri ehikire kusharurwa, ari kumanyisa ngu abantu bingi nibija kuba abakurasi beye? Ingaha buzima. Bibuli ekaba yagambire ku abantu bace ari bo babire barije kumwikiriza. (Yoh 12:37, 38) Kandi Yesu akaba ayine obushoborozi bw’okureba omu mutima. (Mat 9:4) Konka nambwenu, akata omutima aha bantu bace ababire bari kwenda kwikiriza kandi yagumizamu ari kuburira buri omwe. Itwe abantu buntu abatari kubasa kureba ebiri omu mutima, tushemerire kukizaho kwerinda kucwera orubanja abantu b’omuri teritori zitu. Omu mwanya gw’eco, tushemerire kubareba nk’abantu abari kubasa kuhinduka bakaba abegi ba Yesu. Omumishonari w’omuri Burkina Faso ori kwetwa Mark, akagamba ati: “Abantu abu ndi kureba ngu ni bo barije kugira entunguka, nibareka kwega. Konka abu ntari kutekateka, ni bo bari kugumizamu kwega kandi bagira entunguka. Eco kikatuma nayega ku ekirungi kiri okureka omwika gwa Yehova gukatwebembera.”

19. Ni bata oku tushemerire kureba abantu b’omuri teritori zitu?

¹⁹ Omu kubanza nobasa kutekateka ngu omuri teritori yanyu tiharimu emisiri eyezire y’okusharurwa. Konka yijuka eki Yesu yagambire abegi beye. Akabagambira ku emisiri eyezire kandi ku ehikire kusharurwa. Abantu nibabasa kuhinduka baba abegi ba Kristo. Yehova nareba abo bantu nk’ab’omuhendo. (Hag 2:7) Twareba abantu nk’oku Yehova na Yesu bari kubareba, nikija kutukwasa kumanya enyikiriza zabo n’ebi bari kukunda. Nitwija kubareba nk’abantu abarije kuba benetata na banyanyazi.