1-2. Nemene la aliene la hna qaja hnei Iesu ngöne Ioane 4:35, 36?

 IESU a trongëne la itre hlapa. (Ioane 4:3-6) Kola cia la itre qitr, ngo tha ijine tro palakö a menu. Loi e troa pane treqene la foa lao treu. Ngo easa sesëkötr la Iesu a qaja, ka hape: “Goeëne la hlapa, ijine tro ha menuën.” (E jë la Ioane 4:35, 36.) Nemene la aliene lai?

² Iesu a qaja la ketre ceitun laka, tha kolo kö a menuë qitr ngo kolo pe a menuë atr. Tro sa pane ce wang la itre ewekë ka traqa. Ame la angetre Iudra tre, ka imethinë me angetre Samaria. Ngo hnei Iesu hna cainöj kowe la föe ne Samaria. Nge hnei eahlo hna drei Iesu! Ame lo Iesu a qaja ka hape, “ijine tro ha menuën,” nyidrëti a qaja la itre atr ka traqa troa kepe ini qaathei nyidrë. Eje hi, hnene la föe ne Samaria hna qeje Iesu koi angatr. (Ioane 4:9, 39-42) Önine la ketre ka qejepengöne la Tusi Hmitrötr, göne la hna qaja hnei Iesu, ka hape: “Ame la kola canga traqa troa drei Iesu hnene la itre atr tre, . . . kola amaman laka, ceitu i angatre hi me itre qitr nyine tro ha menuën.”

3. Maine tro sa goeëne la itre atr tui Iesu, nemene hë la thangan ngöne la easa cainöj?

³ Nemene la aqane tro sa ujë, ngöne la easa cainöje kowe la itre atr ne la teritoar? Easë kö a goeë angatr tune la itre qitr nyine tro ha menuën? Maine eje hi, hane hi la thangan. Ame la hnapan, tro hë sa canga cainöj, ke hna tuluthe hi la ijine menu. Tha tro kö a hmitr me aluzi traem. Ame la hnaaluen, tro sa madrin pine laka, kola kapa la maca ka loi hnene la itre atr. Öni Tusi Hmitrötr: “Angat’ a madine xajawa i cilie tune la madine ne menue.” (Is. 9:3) Ame la hnaakönin, easa cainöj kowe la ketre atr me goeë angeic ceitu me ketre atre drei Iesu. Celë hi matre, nyipiewekë tro sa ithanatane la itre tane mekun hnei angeic hna ajan.

4. Nemene la hne së hna troa ce wang ngöne la tane mekun celë?

 ⁴ Tha ceitune kö la aqane goeëne Iesu la itre atr memine la itretre drei nyidrë. Tha hnei nyidrëti kö hna canga mekun laka, tha tro kö la angetre Samaria a kapa la maca ka loi. Hnei Iesu pe hna goeë angatr, tune la itre ka troa xötrethenge nyidrë. Celë hi matre, tui Iesu, loi e tro sa goeëne la itre atr ne la teritoare së, tune la itre ka troa hane cainöj elany me itre ka troa xötrethenge Keriso. Celë fe hi hna kuca hnei Paulo aposetolo. Nemen la ini hne së hna xom? Ame ngöne la tane mekun celë, tro sa ce wang la hna kuca hnei Paulo, matre troa (1) atre la itre hna mejiune kow hnene la itre atr, me (2) atre la itre hnei angatr hna ajan troa ithanatan, nge (3) ka xatua nyidrë troa goeë angatr tune la itre ka xötrethenge Iesu.

5. Pine nemene matre trotrohnine hi Paulo aposetolo la itre atr ka traqa kowe la sunago?

⁵ Hnei Paulo aposetolo hna majemine cainöj ngöne la itre sunago. Ame ngöne la sunago e Thesalonika, hnei angeic hna “ini [angetre Iudra] la itre hna Cinyihan ngöne la köni Sabath.” (Itre hu. 17:1, 2) Tha jole kö koi Paulo troa cainöj e hnine la sunago ke, hna hetru angeic ngöne la qenenöje i angetre Iudra. (Itre hu. 26:4, 5) Atre hnyawa hi Paulo aposetolo la angetre Iudra, matre tha xou i angeice kö troa cainöj koi angatr.—Fil. 3:4, 5.

6. Pine nemen matre tha ceitu kö la aqane cainöje i Paulo ngöne la sunago me ngöne la hna maketr e Athenai?

⁶ Thupene la hna upi Paulo hnene la itre ka icilekeu qa Thesalonika me Berea, hnei angeic hna traqa e Athenai. Nge e cili, “hnei angeic hna nyiqaane xatuane la angetre Iudra me itre xa atr e hnine la sunago troa trotrohnine la itre hna Cinyihan.” (Itre hu. 17:17) Ngo tha celë kö lai aqane cainöje i Paulo ngöne la hna maketr e Athenai. Pine laka hetrenyi la itre ka inamacan, nge ame itre xan, tha angetre Iudra kö angatr. Ame koi angatr, Paulo a tro fë “ini ka hnyipixe.” Celë hi matre, öni angatr: “Ka ketrepengöne kö la itre ini hnei eö hna ithanatan.”—Itre hu. 17:18-20.

7. Thenge la Itre Huliwa 17:22, 23, nemene la aqane kuca i Paulo matre troa tro fë hnyawa la maca?

⁷ E jë la Itre Huliwa 17:22, 23. Tha ceitune kö la aqane tro fë Paulo la maca koi angetre ethen ne Athenai me koi angetre Iudra e hnine la sunago. Maine jë hnei Paulo hna canga thele troa atre la itre hna mejiune kow hnei angetre Athenai. Hnei angeice hna goeëne hnyawa la itre hnei angatr hna kuca ngöne la hmi angatr. Ame hë e thupen, qëmeken tro Paulo a tro fë la nyipici ne la Tusi Hmitrötr kowe la itre  atr, hnei angeice hna nyiqaane qaja la itre ini hnei angatre hë hna kapa. Önine la ketre ka qejepengöne la Tusi Hmitrötr: “Ketre Keresiano me atre Iudra Paulo. Atre hnyawa hi angeic laka, ame la angetre Geres, tre, tha angatre kö a nyihluene la ‘nyipi’ Akötresie ne la angetre Iudra me itre Keresiano. Ngo hnei angeice pe hna amamane koi angetre Athenai laka, tha ka trenyiwa kö la Akötresi angetre Iudra koi angatr.” Celë hi matre, hnei Paulo hna thele la aqane troa kuca matre troa tro fë hnyawa la maca. Hnei Paulo hna qaja koi angetre Athenai ka hape, angeic a tro fë la maca ne la “Akötresie Hna Thatre,” lo hnei angatr hna thele troa nyihluen. Ngacama thatre kö la angetre ethen la Tusi Hmitrötr, ngo hnei Paulo hna goeë angatr ceitu me itre ka troa xötrethenge Iesu. Hnei Paulo hna goeë angatr tune la itre qitr nyine tro ha menuën. Hnei angeic hna thele la aqane troa ketr la hni angatr.

8. (a) Nemene la itre ewekë ka troa amamane la hmi ne la itre atr? (b) Nemene la aqane troa sa, e ketre atr a qaja mekötine la hmi angeic?

⁸ Loi e tro fe sa tui Paulo, troa atreine goe. Nyipiewekë tro sa atreine goe matre trotrohnine la itre hna mejiune kow hnene la itre atr. Nemene la ka mama ngöne la easa goeëne la ketre hnalapa maine ketre loto? Ijije kö tro sa atre la hmi ne la itre atr, jëne la ëje i angatr, me aqane heetr, me aqane mel me aqane ithanata? Maine jë tro la ketre atr a qaja mekötine la hmi angeic. Hane hi la hna qaja hnei Flutura, ketre pionie hut: “Tha eni kö a traqa matre musinë epun troa hane lapaune kowe la itre hnenge hna mejiune kow, ngo eni hi a ajan troa ithanatan la . . .”

9. Nemene la ka troa thue aja kowe la atr ka hmi, troa ithanata me easë?

⁹ Nemene la itre tane mekun hne së hna troa ce wang memine la ketre atr ka hmi? Loi e tro sa thele la itre mekun hna ajane troa ithanatane hnene lai atr. Maine jë caasi hi la Akötresie hnei angeic hna nyihluen. Maine pena, atre hi angeic laka, Iesu la ka Amelene la nöjei atr, nge easenyi hë tro Akötresieti a apatrene la nöjei ewekë ka ngazo e celë fen. Loi e tro sa eköthe la aqane ithanata së thenge la itre ini ne la Tusi Hmitrötr, nge itre hnei angeice fe hna hane mejiune kow. Tro ha hetre aja ne lai atr ka hmi troa ithanata me easë.

10. Nemene la nyine tro sa kuca, nge pine nemen?

¹⁰ Tha tro kö sa thëthëhmin laka, ame la itre atr, hetre itre xaa ini hnei angatre hna kapa ngöne la hmi. Ngo tha mejiune kö angatre kow. Celë hi matre, maine atre hi së la hmi angeic, loi e tro sa pane thele troa atrepengöne hnyawa la itre ini hnei angeic hna mejiune kow. Öni David ketre pionie hut e Australie: “Nyimutre la itre atr ka ce xome la itre ini atr me ini hmi.” Ketre, öni Donalta qa Albanie: “Ame itre xan, kola  qaja ka hape, hetre hmi angatre hë. Ngo ame e thupen, angatr a qaja ka hape, tha ka mejiune kö angatr koi Akötresie.” Ame pena la ketre mesinare e Argentine, tre, kola qaja ka hape, itre xan a sajuëne la ini hna hape, Trinité. Ngo tha mejiune pe angatr kowe la hna qaja ka hape, casi hi la Kem me Nekön me uati hmitrötr. Öni angeic: “Maine atre hnyawa hi së lai, tro ha hmaloi koi së troa thele la itre mekune hna ajane troa ithanatane hnene la itre atr.” Celë hi kepin matre, nyipiewekë tro sa pane thele troa atre hnyawa la itre ini hna mejiune kow hnene la itre atr. Tro hë sa nyitipu Paulo, ene la troa “xome la nöjei pengön asë, thatraqane la nöjei atr asë.”—1 Kor. 9:19-23.

11. Thenge la Itre Huliwa 14:14-17, nemene la hna kuca hnei Paulo matre troa tro fë hnyawa la maca koi angetre Lusetara?

¹¹ E jë la Itre Huliwa 14:14-17. Hnei Paulo hna pane thele troa atrepengöne la itre mekune hna ajan troa ithanatane hnene la itre atr, me nyiqaane porotrike me angatr. Ame lo Paulo e Lusetara, atre hi angeic laka, thatre hnyawa kö la itre atr la Itre Hna Cinyihan. Celë hi matre, hnei Paulo hna eköthe hnyawa la aqane ithanata i angeic, matre troa ketr la hni angatr. Hnei Paulo hna qaja la aqane mana la xen, me nyine troa kuca matre tro la itre atr a mele madrin. Hnei angeice hna xome la itre hnaewekë me itre ceitun hna atre me hna trotrohnine hnene la itre atr.

12. Nemene la aqane tro sa thele la itre hna ajan hnene la itre atr, matre troa ihmeku la aqane nyiqaane ithanata së?

¹² Nyipiewekë troa thele la itre hna ajan hnene la itre atr, matre troa ihmeku la aqane nyiqaane ithanata së. Ame la easa goeëne la ketre atr maine hnalapa i angeic, ka mama kö la itre ewekë hnei angeic hna ajan? Nyipiewekë tro sa atreine goe. Maine jë, ka tra iengen lai atr, maine e tus, maine pena ka kuci loto, maine itre xaa huliwa ju kö. Maine ijije hi, loi e tro sa huliwane la itre ithuemacanyi cili, matre troa eköthe la aqane nyiqaane ithanata së. (Ioane 4:7) Ketre, ijije hi tro sa atrepengöne la atr, jëne la aqane heetre i angeic. Tro sa atre la nöje i angeic,  maine huliwa i angeic maine sport. Öni Gustavo: “Hnene la ketre thöth ka 19 lao macatre hna heetrëne la ketre inunu. Ame hune lai inunu, ke, hetrenyi la ifoto ne la ketre atr ka nyima nge ka hlemu. Hnenge hna nyiqaane qaja lai atr ka nyima, nge hnei angeic hna qaja la kepin matre ka tru koi angeic la atr cili. Thupene lai, hnei nyio hna ini tus, nge ketre trejine hë angeic enehila.”

13. Nemene la nyine tro sa kuca matre troa ini tus hnene la itre atr?

¹³ Loi e tro sa thue aja kowe la itre atr troa hane ini tus. Nyipiewekë tro sa qaja koi angeic la eloine la troa ini Tusi Hmitrötr. (Ioane 4:13-15) Ame la ketre ijin, hnei Poppy hna cainöj kowe la ketre föe, nge hna alö eahlo e hnine la uma. Jëne la itre pepa hna afedren, hnei Poppy hna öhn laka, ketre porofesör lai föe. Hnei Poppy hna qaja kowe lai föe ka hape, hetre icasikeu me itre ini hna hamën hnene la Itretre Anyipici Iehova, nge hna nyitrepene hnei Tusi Hmitrötr. Hnene lai föe hna nyiqaane ini tus me sine la itre icasikeu me asabele ne sirkoskripsio. Thupene la caa macatre, kola bapataiso eahlo. Haawe, loi e tro sa isa hnying ka hape: ‘Nemene la hna ajan troa ithanatane hnene la itre atr hnenge hna wang hmaca? Nemene la nyine tro ni a qaja matre tro angatr a hetre aja troa ini tus?’

14. Nemene la aqane tro sa hnëkë thenge la hna ajan hnene la hnainin?

¹⁴ Nyipiewekë tro sa hnëkë hnyawa qëmeken troa ini tus. Loi e tro sa mekun la hnainin, tune la itre hnei angeic hna ajan me itre ini hna mejiune kow, me fami angeic maine itre ewekë pena ka traqa ngöne la mele i angeic. Loi e tro fe sa iëne hnyawa la itre xötr, me itre video me iatr nyine amaman, matre troa qejepengöne la itre nyipici qa hnine la Tusi Hmitrötr. Loi e tro sa hnying, ka hape, ‘Nemene la ini ka troa ketr la hni ne la hnainin?’ (Ite edomë 16:23) Ame e Albanie, önine la ketre föe ka ini tus me Flora, ketre pionie: “Thatreine kö ni kapa la itre ini göne la mele hmaca.” Tha hnei Flora kö hna thele troa musinë eahlo. Öni Flora: “Loi e tro angeic a pane inine troa atre la Akötresie ka thingehnaeane laka, hetre mele hmaca.” Celë hi matre, ame la nyidroti a ini tus, hnei Flora palahi hna qaja la ihnimi Iehova me inamacan me mene i Nyidrë. Thupene lai, hna kapa la itre ini göi mele hmaca hnene la hnainin. Ketre atre Anyipici Iehova hë eahlo enehila.

15. Thenge la hna qaja ngöne Itre Huliwa 17:16-18, nemene la itre ewekë ka ngazo hna kuca hnei angetre Athenai, ngo pine nemene matre hnei Paulo palahi hna cainöj koi angatr?

¹⁵ E jë la Itre Huliwa 17:16-18. Athenai la ketre traon ka tiqa hnei idrola. Alanyimu la ka kuca la itre huliwa ka sis me sajuëne la itre ini atr ka tha ihmeku kö memine la Tusi Hmitrötr. Ngo hnei Paulo palahi hna cainöj koi angatr, ngacama kola hnyimasai angeic. Paulo ekö “la ketre ka silitrengathoi Akötresie, me iaxösisi, me pi tru.” (1 Tim. 1:13) Ame pe, hnei Iesu hna mejiun laka, tro Paulo a ketre atre drei nyidrë. Celë fe hi aqane ujë i Paulo koi angetre Athenai. Alanyimu la itre ka hane xötrethenge Keriso.—Itre hu. 9:13-15; 17:34.

16-17. Nemene la ka amamane laka, ijije hi tro nöjei atr a hane xötrethenge Keriso? Qaja jë la ketre ceitun.

¹⁶ Alanyimu la itre atr ka xötrethenge Iesu. Hnei Paulo hna cinyihan koi angetre Korinito ka hape, hetre itre xan thei angatr ka qanangazon ekö la itre Keresiano me kuca la itre huliwa ka sis. Öni Paulo: “Celë hi aqane ujë ne la itre xan e nyipunieti ekö, ngo enehila, ase hë ahmitrötrë nyipunie.” (1 Kor. 6:9-11) Hapeu hne së kö hna mekun ka hape, ijije hi troa saze hnei itre xan matre troa hane xötrethenge Iesu?

¹⁷ Ame enehila, alanyimu la itre ka kuca la hnei angatr hna atrein matre troa hane xötrethenge Iesu. Ame e Australie, hnei Yukina ketre  pionie hna öhn laka, nöjei atr a kapa la hna qaja hnei Tusi Hmitrötr. Ame ngöne la ketre biero, hetrenyi la ketre jajinyi ka hetre tatouage. Öni Yukina, “Hnenge hna pane luelu, ngo e thupen hnenge hna tro troa ithanata koi angeic. Öni angeice koi ni ka hape, nyipiewekë koi angeic la Tusi Hmitrötr, matre hnei angeice hna sija ngöne la ngönetrei angeic la itre xötr ne la tusi Salamo!” Angeice hë enehila a ini tus me sine la itre icasikeu. *

18. Pine nemene matre tha tro kö a canga amekötin la itre atr?

¹⁸ Ame lo Iesu a qaja ka hape, ijine tro ha menu, hapeu nyidrëti kö a mekun laka, tro la nöjei atr a xötrethenge nyidrë? Waea. Ase hë Tusi Hmitrötr perofetan laka, ala xalaithe hi la ka troa lapaune koi nyidrë. (Ioane 12:37, 38) Öhne hi Iesu la itre aliene hni ne la nöjei atr asë. (Mat. 9:4) Ngo nyidrëti hi a wangatrune la itre ka lapaune koi nyidrë me catre cainöj. Eje hi, tha öhne kö së la itre aliene hni ne la itre atr. Celë hi matre, tha tro kö sa canga amekötine la ketre atr maine teritoare së pena! Ngo loi e tro pe sa, goeë angatr tune la itre ka troa xötrethenge Iesu. Öni Marc, ketre mesinare e Burkina Faso: “Ame la itre hnainin hnenge hna öhn laka, kola kökötre ngöne la götrane u, angatre a nue e thupen la ini tusi angatr. Ngo ame lo itre hnenge hna mekun ka hape, tha ka kökötre kö ngöne la götrane u, angatr pena ha saze me kapa la nyipici. Trotrohnine hë ni laka, tro kö ni a nue la uati hmitrötre i Iehova troa xatua ni.”

19. Nemene la aqane tro sa goeëne la itre atr ne la teritoare së?

¹⁹ Maine jë tro sa mekun ka hape, tha tru kö hnei atr ngöne la teritoare së ka ceitu me itre qitr nyine troa menuën. Tha tro kö sa thëthëhmine la hna qaja hnei Iesu koi itretre drei nyidrë, laka, ijine hë troa menu. Ijije hi tro la itre atrene la teritoare së a saze me hane xötrethenge Iesu Keriso. Ame koi Iehova, ceitu i angatr hi me “nöjei ewekë hna ajan.” (Hag. 2:7) Maine tro sa goeëne la itre atr tui Iehova me Iesu, tro hë sa thele troa atre la itre ini hnei angatr hna mejiune kow me itre hnei angatr hna ajan. Ketre, easa goeë angatr ceitu me itre trejin me easë ka xötrethenge Iesu.