1-2. San den sani di Yesesi taki a Yohanisi 4:35, 36 wani taki?

DI Yesesi be e go a Galileya a waka pasa aini omen goon, ma nyanyan á be lepi ete (Yoh. 4:3-6). A baka fo mun fosi nyanyan be o lepi a goon. Neen meke den disipel fu Yesesi á be kaba fusutan saide a be taki: „Wi opo wi ain luku den goon, da wi o si taki a nyanyan lepi fu koti.” (Leisi Yohanisi 4:35, 36.) San Yesesi be wani taki anga a sani ya?

² Yesesi á be e taki fu tuutuu goon, ma na a yeepi di den be mu yeepi sama fu toon en bakaman a be e taki. A baka di Yesesi peleiki gi wan Samaliya uman a taki a sani ya. Winsi fa den Dyu anga den Samaliyasama á be e koti a ten de, toku a uman aliki Yesesi. Di Yesesi taki „a nyanyan lepi fu koti”, wan kulu Samaliyasama di a uman be taigi san Yesesi leli en, be de a pasi e kon a Yesesi. Den be wani Yesesi leli den tu (Yoh. 4:9, 39-42). Wan Beibel sabiman sikiifi taki: ’A fasi fa den sama ya be de kabakaba fu aliki Yesesi e soi taki den be wani toon en bakaman. Den be de enke nyanyan di be lepi a goon.’

3. Fa yu o du i wooko efi yu e si den sama di yu e peleiki gi, enke fa Yesesi be e si den?

³ Fa yu e si den sama di yu e peleiki gi? Yu e si den enke nyanyan di lepi a goon? Dii sani o soi efi yu e si den enke nyanyan di lepi a goon. A fosi sani a taki yu o peleiki fayafaya. Nyanyan di lepi a goon nai tan langa, neen meke wi á mu lasi ten. Du fu tu sani, a taki yu o piisii te sama e aliki a bosikopu di yu e paati. Beibel taki ’sama e piisii te den e  koti nyanyan a goon’ (Yes. 9:3). Du fu dii sani, a taki yu o si ala sama enke wan sama di sa toon wan bakaman fu Yesesi. A sani ya o meke i du ala san i man fu yeepi iniiwan sama di yu e miti.

4. San wi o leli fu apostel Pawlesi aini a artikel ya?

⁴ Son wan fu den bakaman fu Yesesi be e si enke den Samaliyasama á be o toon disipel, ma Yesesi á be e denki so. Useefi mu e si den sama di wi e peleiki gi enke sama di sa toon Yesesi bakaman. U sa waka na apostel Pawlesi baka te u luku a fasi fa a be e du a sani ya. San u sa leli fu Pawlesi? Aini a artikel ya wi o luku dii sani di Pawlesi be e du. (1) A be e meke moiti fu sabi san den sama di a be e peleiki gi be e biibi. (2) A be e luku san be o hali den pakisei. (3) A be e si den enke sama di be sa toon Yesesi bakaman.

5. Saide a á be taanga gi Pawlesi fu peleiki gi den sama aini a snoga a Tesalonika?

⁵ Pawlesi be gwenti peleiki aini den snoga fu den Dyu. Wan leisi, a „dii Sabadei langa a taki anga den [Dyu] fu den sani di sikiifi aini a Wowtu fu Gadu” aini a snoga a Tesalonika (Toli 17:1, 2). A á be taanga gi Pawlesi fu peleiki gi den Dyu, bika enseefi a be wan Dyu (Toli 26:4, 5). A be sabi den gwenti fu den Dyu, neen meke a be sabi fa a be mu peleiki gi den.​—Filip. 3:4, 5.

6. Fa den sama fu a wowoyo a Ateine be de taa fasi enke den sama di Pawlesi be e miti aini a snoga?

⁶ Bakaten Pawlesi be mu lowe komoto a Tesalonika, bika sama be wani du ogii anga en. A be abi fu lowe komoto a Bereya tu. Bakaten a doo na Ateine. Di a doo Ateine „a bigin taki anga den Dyu anga den taa sama di be e dini Gadu” (Toli 17:17). Di Pawlesi go na a wowoyo, a be bigin peleiki gi sama di be e biibi taa sani. Wantu fu den sama ya a be koniman fu Giikikondee anga taa kondee sama di be e si a bosikopu fu Pawlesi enke „nyun sani”. Den taigi en taki: „Yu e leli u sani di wi á sabi.”​—Toli 17:18-20

7. Enke fa Toli fu den apostel 17:22, 23 e soi, da fa Pawlesi peleiki gi den sama fu Ateine?

⁷ Leisi Toli fu den apostel 17:22, 23. A ná aseefi fasi fa Pawlesi be e peleiki gi den Dyu di a be e miti aini a snoga, a be e peleiki gi den taa kondee sama na Ateine. Kande Pawlesi be e akisi enseefi san den sama aini Ateine be e biibi. A be e luku fa den sama be e libi, anga fa den be e dini  den gadu fu den. Son wan fu den sani di den sama ya be e biibi be e kai anga san sikiifi aini a Wowtu fu Gadu. Te Pawlesi be e peleiki gi den, a be e taki fu den sani ya anga den. Wan Beibel sabiman taki: „Fu di Pawlesi a be wan Dyu fosi a be toon wan Kelesten, meke a be sabi taki den Giikisama á be e dini a Gadu di den Dyu anga den Kelesten be e si enke a tuu Gadu. Toku a be e meke moiti fu soi den sama fu Ateine taki den sabi taki a Gadu ya de.” Pawlesi be abi fu kengi a fasi fa a be e peleiki. Den sama fu Ateine be meke wan osu gi ’wan Gadu di den á sabi, neen meke Pawlesi taigi den taki na a Gadu ya be abi a bosikopu di a be e paati. Winsi fa den sama ya á be sabi a Wowtu fu Gadu, tokuso Pawlesi á be e si enke den á be poi toon Kelesten. A be e si den enke nyanyan di lepi a goon, neen meke a be kengi a fasi fa a be e peleiki fu be man yeepi den.

8. (a) Fa i sa kon sabi san den sama di yu e peleiki gi e biibi? (b) San i sa taigi wan sama te a taki ai go a wan keliki kaba?

⁸ Leti enke Pawlesi, u mu poti pakisei a den sani di wi e si. Meke moiti fu si wan sani di e soi san a sama e biibi. San de aini a dyali fi en? San a sikiifi, palaki efuso teken na a wagi efuso a boto fi en? Te i luku a nen fu a sama, a fasi fa a wei, anga a fasi fa ai taki, da san i si enke a sama e biibi? Kande a taigi i taki ai go a wan keliki kaba. Te wan sama taigi wan sisa di e du a spesuutu pioniliwooko a sani ya, ai taigi a sama taki: „Mi a kon fu dwengi i fu biibi san mi e biibi, ma na a toli ya mi be wani taki anga i . . . ”

9. Fu sowtu sani i sa taki anga wan sama di taki ai go a wan keliki kaba?

⁹ Sowtu toli i sa taki anga wan sama di e go a keliki? Taki fu wan leli aini Beibel di ai biibi kaba. Kande ai biibi taki a wan tuu Gadu namo de. Kande ai si Yesesi enke a sama di o fii libisama. Kande ai biibi tu taki wi e libi aini wan taanga ten di o kaba dyonson. Te yu e taki anga a sama, i mu taki fu sani di a sama e biibi kaba di e kai anga san Beibel e taki. A fasi fa yu e taki mu meke a sama wani aliki i.

10. San u mu meke moiti fu du? Saide u mu meke moiti fu du a sani ya?

¹⁰ Holi a pakisei taki son sama nai biibi ala den sani di den keliki fu den e leli den. Neen meke winsi i sabi sowtu keliki wan sama e go, toku i mu meke moiti fu sabi san ai biibi. Donalta, wan sisa fu Albaniya, taki: „Son sama di wi e miti e taigi u taki den e go a wan keliki kaba, ma bakaten  den e taki den nai biibi taki Gadu de.” Wan baala di e du a zendeling wooko aini Algentiniya taki son sama e taki den e biibi taki Gadu a dii sama aini wan, ma toku den nai biibi taki Gadu, a Manpikin anga a santa yeye a wan Gadu. A taki: „Fu di mi sabi a sani ya, meke a moo makiliki gi mi fu taki anga den fu sani di mi anga den e biibi.” Neen meke u mu meke moiti fu sabi san den sama e biibi, da leti enke Pawlesi, yu o man toon „ala sani gi ala sama”.​—1 Kor. 9:19-23.

11. Enke fa Toli 14:14-17 e soi, da fa Pawlesi be peleiki gi den sama fu a foto Listra?

¹¹ Leisi Toli 14:14-17. Te Pawlesi be si san o hali a pakisei fu den sama di a be o peleiki gi, da a be e taki fu a toli de anga den. Wi e si a sani ya te u luku fa a taki anga den sama fu a foto Listra. Den sama fu Listra á be sabi tyaipi sani fu Beibel. Neen meke Pawlesi taki fu sani di den be sabi. A taki fu goon di be e meke nyanyan anga sani di e meke a libi switi gi sama. Den sani di a be taki á be taanga gi den sama fu fusutan.

12. San o yeepi i fu sabi san o hali wan sama pakisei? Fa i sa kengi a fasi fa yu e peleiki?

¹² Meke moiti fu sabi san e hali den sama pakisei na a pisi pe yu e peleiki, da i kengi a fasi fa yu e peleiki. Fa yu o man sabi san e hali wan sama pakisei te yu e waka miti en, efuso te yu e waka go na a osu fi en? U be leli kaba taki i mu poti pakisei a den sani di yu e si. Kande i si taki a sama e paandi, kande ai leisi wan buku, kande ai meke en wagi efuso kande ai du wan taa sani. Kande i sa taki wan sani fu a wooko di ai du (Yoh. 4:7). A koosi di wan sama wei sa yeepi i tu fu sabi sama neen. Te i luku a koosi di a sama wei, son leisi yu e sabi efu a lobi a kondee fi en. Yu e sabi tu sowtu wooko ai du, efuso sowtu sport team a lobi. Wan baala den e kai Gustavo taki: „Wan yonkuman fu 19 yali be wei wan bosooko anga a fowtow  fu wan balinen singiman, neen mi bigin taki anga en fu a sani de. Mi taki wan sani fu a fowtow, neen a yonkuman taigi mi saide a lobi a singiman. Bakaten a toon wan Beibelsutudi. Nownow a yonkuman ya a wan baala fu u.”

13. Fa i sa hali sama pakisei fu den sa bigin sutudeli Beibel?

¹³ Te yu akisi wan sama fu sutudeli Beibel anga i, taki a wan fasi di o hali a sama pakisei. Soi en sowtu wini a o fende fu a sutudi (Yoh. 4:13-15). Wan uman kai wan sisa go aini osu fu di a be wani yee san a sisa be wani leli en. Di a sisa go aini a osu, a si wan dipoloma di e soi taki a folow be leli a universiteit fa fu gi sama leli. Neen meke a sisa taigi a folow taki useefi e gi sama leli te wi e sutudeli Beibel anga den, anga te den kon a den komakandaa fu u. A uman piki taki a wani sutudeli Beibel. A taa dei a kon a komakandaa, baka dati a kon na a kelen-komakandaa. Wan yali baka dati, a dopu. Akisi iseefi den sani ya: ’San o hali a pakisei fu den sama di mi mu go baka? Fa mi sa taki fu meke den angii fu sutudeli Beibel?’

14. Fa i sa seeka fosi i go a wan sutudi?

¹⁴ Te yu e sutudeli Beibel anga wan sama, i mu e seeka fosi i go neen. Meke moiti fu sabi san o hali a pakisei fu ibiiwan fu den sutudi fi i. Te yu e seeka, i sa luku sowtu tekisi yu o leisi, sowtu felon yu o soi en, sowtu ageisitoli yu o gi fu yeepi en fu a fusutan wan leli fu Beibel. Akisi iseefi taki: ’San o hali a pakisei fu a sutudi ya? San mi mu taki fu doo en ati?’ (Odo 16:23) Wan pionili sisa den e kai Flora be e sutudeli Beibel anga wan uman na Albaniya. Wan leisi a uman taigi en taki: „Mi á poi biibi taki sama di dede o weki baka.” Flora taki: „Mi be fusutan taki te a be o kon sabi a Gadu di paamisi taki dede sama o weki baka, a be o biibi a sani ya.” Fanafu a dei de, Flora poti pakisei na a lobi di Yehofa lobi u, a koni di a koni, anga a makiti di a abi. Bakaten, a sutudi fi en be e biibi anga en hii ati taki Gadu o weki den sama di dede baka. Nownow a uman ya e dini Yehofa anga en hii ati.

15. Enke fa Toli 17:16-18 e soi, da sowtu sani di den sama fu Ateine be e du Pawlesi á be lobi? Ma saide a sani ya á tapu en fu peleiki gi den?

¹⁵ Leisi Toli 17:16-18. A omen sama aini Ateine be e dini falisi gadu, den be e libi wan hululibi, den be e biibi omen falisi leli tu. Tokuso den sani ya á tapu Pawlesi fu peleiki gi den. Fosi, Pawlesi ’be e taki ogii fu Gadu, a be e du ogii anga taawan. A á be abi sen’, ma toku a be toon wan bakaman fu Yesesi (1 Tim. 1:13). Leti enke fa Yesesi be e biibi taki Pawlesi poi toon en bakaman, a so Pawlesi seefi be e biibi taki den sama fu Ateine be poi toon Yesesi bakaman. A dati pasa tu.​—Toli 9:13-15; 17:34.

16-17. Gi wan ondoofenitoli di e soi taki na ala sowtu sama sa toon Yesesi bakaman.

¹⁶ Aini a ten fu den apostel, a omen sowtu sama be toon bakaman fu Yesesi. Di Pawlesi sikiifi wan biifi gi den sama fu a foto Korente, a taki son wan fu den be e du ogii anga sama, taawan be e libi wan molusu libi. Baka dati a taki: „Ma Gadu wasi u kon kiin” (1 Kor. 6:9-11). I be o si den sama ya enke sama di be sa toon bakaman fu Yesesi?

¹⁷ Aini a ten ya a omen sama kengi a fasi fa den be e libi neen den toon Yesesi bakaman. Luku a toli fu Yukina, wan pionili  sisa di e tan aini Australiya. A sisa ya kon fusutan taki na ala sowtu sama e wani yee a bun nyunsu. Wan leisi di a be de a wan bodeleifi a si wan uman di be lai tattoo neen sikin. Yukina taki: „Biginbigin mi be e feele fu go taki anga en, ma di mi bigin taki anga en mi si taki a be lobi sani fu Beibel. A be tattoo wantu vers fu a Beibel buku Psalm neen sikin.” A uman ya bigin sutudeli Beibel. A bigin go a den komakandaa tu. *

18. Saide wi á mu kuutu sama?

¹⁸ Di Yesesi be taki a nyanyan lepi fu koti, a soi a be wani soi taki gaanse sama be o toon en bakaman? Nono. Beibel be taki a fesi taki, a wantu sama be o biibi Yesesi (Yoh. 12:37, 38). Yesesi be poi si san de aini sama ati, neen meke a be sabi taki omen sama á be o du san a taki (Mat. 9:4). Winsi fa a be sabi a sani ya, tokuso a be e peleiki gi ala sama. Wi á poi si san de aini sama ati, neen meke wi á mu kuutu den sama di wi e peleiki gi. U mu denki bun fu den. Wan baala di den e kai Marc di e du a zendeling wooko aini Burkina Faso, taki: „Son yuu den sama di mi e denki taki o meke moiti, nai wani sutudeli moo. Ma den sama di mi e denki taki ná o go a fesi, a den e tan meke moiti. A sani ya leli mi taki a moo bun fu meke a yeye fu Yehofa yeepi u fu fende den sama di wani toon Yesesi bakaman.”

19. Fa u mu si den sama di wi e peleiki gi?

¹⁹ Son leisi ai gei enke den sama di wi e peleiki gi ná o toon bakaman fu Yesesi. Ma u mu holi a sani di Yesesi be taigi den disipel fi en a pakisei. A be taki a nyanyan lepi kaba fu koti. A sani ya e soi taki sama poi kengi. Den poi toon Yesesi bakaman. Yehofa e si den sama ya enke „gudu” (Hak. 2:7). Efu wi e si sama enke fa Yehofa anga Yesesi e si den, wi o meke moiti fu sabi san den e biibi, anga san o hali den pakisei. A sani ya o yeepi u fu si den enke sama di sa toon u baala anga sisa.