1-2. Iesu ese Ioane 4:35, 36 ai ia gwauraia herevana ena anina be dahaka?

IESU be reana bali matamata idia tubu umadia amo ia raka hanaia. (Ioa. 4:3-6) Unai bali be hua foa murinai edia gogoa negana do ia ginidae. To, Iesu ese ia gwauraia herevana be ia idau, ia gwau: “Emui kwarana umui abia isi bona witi uma umui itaia, idia kurokuro vadaeni gogoa totona.” (Ioane 4:35, 36 duahia.) Iesu ena hereva ena anina be dahaka?

² Iesu be taunimanima do idia haboua karana ia herevalaia noho, to tubutubu gaudia lasi. Ia vara gauna mani oi laloa. Ena be Iuda taudia ese Samaria taudia idia dadaraia, to Iesu ese Samaria hahinena ta ia haroro henia bona unai hahine ia kamonai! Danu, Iesu be witi “idia kurokuro vadaeni gogoa totona” ia herevalaia neganai, Samaria taudia momo be Iesu ese ia haroro henia hahinena amo iena sivarai idia kamonai dainai ia dekenai idia mai, diba ma haida idia abia totona. (Ioa. 4:9, 39-42) Baibel ia herevalaia buka ta ia gwau: “Taunimanima be mai ura bada ida idia kamonai dainai . . . ia hahedinaraia idia be idia kurokuro witi bamona gogoa totona.”

3. Iesu ese taunimanima ia laloa bamona oi laloa neganai, edena dala ai emu haroro dalana do oi hanamoa?

³ Oi haroro henia taudia be edena bamona oi laloa? Idia be idia kurokuro vadaeni gogoa totona witi bamona oi laloa, a? Bema oibe, gau toi ese unai do ia hamomokania. Ginigunana, haroro gaukara do oi goadalaia. Witi gogoa negana be ia kwadogi dainai, emu nega oi gaukaralaia namonamo. Iharuana, oi itaia taunimanima ese sivarai namona idia kamonai neganai do oi moale. Baibel ia gwau, unai moale be taunimanima ese ‘edia uiti idia utua bona haboua ena moale bamona.’ (Isa. 9:3) Ihatoina, do oi itaia taunimanima ta ta be hahediba taudia ai idia  lao diba, unai dainai idia laloa bada gaudia hegeregerena do oi haroro henidia.

4. Inai atikol ai aposetolo Paulo amo dahaka do ita dibaia?

⁴ Iesu ena hahediba taudia haida idia laloa Samaria taudia be hahediba taudia ai idia lao diba lasi, to Iesu be unai bamona ia laloa lasi. Iesu ia itaia idia be hahediba taudia ai idia lao diba. Ita danu namona be ita diba, iseda teritori ai idia noho taudia be Keriso ena hahediba taudia ai idia lao diba. Aposetolo Paulo ena haheitalai namona ita tohotohoa diba. Ia amo dahaka ita dibaia? Inai atikol ai, do ita itaia Paulo be (1) ia haroro henia taudia idia abia dae gaudia ia diba, (2) idia laloa bada gaudia ia lalopararalaia, bona (3) ia itaia idia be Iesu ena hahediba taudia ai idia lao diba.

5. Dahaka dainai Paulo be sinagoga ai idia noho taudia edia mauri dalana ia lalopararalaia?

⁵ Paulo be nega momo Iuda taudia edia sinagoga dekenai ia haroro. Hegeregere, Tesalonika ena sinagoga ta ai, “Sabati toi lalonai [Iuda taudia] ida Toretore Helagadia ia herevalaia namonamo.” (Kara 17:1, 2) Paulo be mai gari lasi ida sinagoga dekenai taunimanima ia hereva henia. Ia be Iuda ruma besena amo ia tubu daekau. (Kara 26:4, 5) Paulo ese Iuda taudia edia mauri ia lalopararalaia, unai dainai mai gari lasi ida idia ia haroro henia.​—Fili. 3:4, 5.

6. Edena dala ai Paulo ese Atena ena maketi ai ia haroro henia taudia be sinagoga dekenai ia haroro henia taudia amo ia idau?

⁶ Paulo be dagedage dainai Tesalonika amo ia heau bona Berea ia lao, unai murinai Atena dekenai ia ginidae. Danu, ia be “sinagoga ai Iuda taudia bona Dirava idia tomadiho henia taudia ma haida ida ia herevahereva.” (Kara 17:17) To, Paulo be maketi dekenai ia haroro neganai taunimanima idauidau idia kamonai noho. Idia haida be aonega taudia bona Idau Bese taudia ma haida, idia laloa Paulo ia gwauraia gaudia be “hadibaia hereva matamata.” Bona Paulo dekenai idia gwau: “Guna ai kamonai lasi gaudia oi herevalaia noho.”​—Kara 17:18-20.

7. Kara 17:22, 23 ena hereva bamona, Paulo ese ena haroro dalana be edena bamona ia haidaua?

⁷ Kara 17:22, 23 duahia. Paulo ese Atena ai Idau Bese taudia dekenai ia gwauraia herevana be sinagoga ai Iuda taudia dekenai ia gwauraia herevana amo ia idau. Reana Paulo be sibona ia nanadaia, ‘Atena taudia be dahaka gaudia idia abia dae?’ Ia ese idia karaia gaudia bona taunimanima edia tomadiho ena kastom karadia ia itaia namonamo. Bena, Paulo ese idia abia dae gaudia ia gaukaralaia Toretore Helagadia ai idia noho hereva momokani  ia hadibaia totona. Baibel ia herevalaia tauna ta ia gwau: “Paulo be Iuda Keristani tauna dainai ia laloparara Grik tomadiho koikoi taudia be Iuda taudia bona Keristani taudia edia Dirava ‘momokanina’ idia tomadiho henia lasi, to ia ura hahedinaraia Atena taudia be ia harorolaia noho Diravana idia diba.” So Paulo be mai ura ida ena haroro dalana ia haidaua. Bona Atena taudia ia hamaoroa, ia harorolaia sivaraina be ‘Idia Diba Lasi Diravana’ amo, bona idia ura unai Dirava idia tomadiho henia. Ena be Idau Bese taudia be Toretore Helagadia idia diba namonamo lasi, to Paulo be idia dekenai ia hesiku lasi. Paulo ese idia be idia mage vadaeni witi bamona ia laloa, bona ena sivarai namona harorolaia dalana ia haidaua.

8. (a) Edena dala ai emu teritori dekenai idia noho taudia ese idia abia dae gaudia oi dibaia? (b) Bema ta ia gwau ia be mai ena tomadiho, edena bamona do oi haere?

⁸ Paulo bamona, taunimanima edia noho dalana oi lalopararalaia. Emu teritori dekenai idia noho taudia ese idia laloa bada gaudia oi dibaia be namo. Ruma tauna ese ena ruma eiava motuka lalonai dahaka gaudia ia atoa? Iena ladana, dabua bona tauanina ena toana, eiava iena hereva dalana ese iena tomadiho ia hahedinaraia, a? Eiava oi ia hamaoroa vadaeni ia be mai ena tomadiho. Spesel painia ta ladana Flutura dekenai unai ia vara neganai ia gwau, “Lau mai lasi oi lau doria lau abia dae gaudia oi abia dae totona, to lau ura inai topik lau herevalaia . . . ”

9. Tomadiho ia laloa bada tauna be dahaka gau haida ia abia dae?

⁹ Tomadiho ia laloa bada tauna dekenai edena topik oi herevalaia diba? Ia abia dae gaudia haida oi laloa. Reana ia be Dirava tamona sibona ia tomadiho henia, ia abia dae Iesu be taunimanima edia Hahemauri Tauna, eiava reana ia abia dae ita be kahirakahira kara dika do ia ore negana ai ita noho. Unai gaudia be lalona veria dalanai oi gaukaralaia diba, ia dekenai Baibel ena sivarai oi herevalaia totona.

10. Dahaka ita karaia be namo, bona dahaka dainai?

¹⁰ Laloatao, taunimanima be edia tomadiho ese idia hadibaia gaudia ibounai idia abia dae lasi. Momokani, ena be ta ena tomadiho oi dibaia to namona be ia abia dae gaudia oi tahua namonamo. Australia ai, spesel painia ta David ia gwau, “Hari momo be taunimanima edia aonega bona tomadiho ena hadibaia dalana idia hatamonaia.” Albania ai taihu ta ladana Donalta ia gwau, “Ai hedavari henia taudia haida idia gwau idia be mai edia tomadiho, to gabeai idia hahedinaraia Dirava idia abidadama henia lasi.” Bona Argentina ai misinari tadikaka ta ia hahedinaraia, taunimanima haida be Toi Tamona idia abia dae, to idia abia dae lasi Tamana,  Natuna, bona lauma helaga be Dirava tamona. Danu, ia gwau, “Unai lau diba dainai ia auka lasi unai bamona lalohadai idia abia dae taudia lau haroro henia totona.” Unai dainai namona be taunimanima ese idia abia dae gaudia oi laloa. Bena Paulo bamona, ‘taunimanima idauidau ibounai oi durua’ diba.​—⁠1 Kor. 9:19-23.

11. Kara 14:14-17 ena hereva bamona, edena dala ai Paulo ese lalona veria dalanai Lusitera taudia ia haroro henia?

¹¹ Kara 14:14-17 duahia. Paulo be ia haroro henia taudia idia laloa bada gaudia hegeregerena ena haroro dalana ia haidaua. Hegeregere, Lusitera dekenai ia hereva henia hutuma taudia be Toretore Helagadia idia diba namonamo lasi. Unai dainai Paulo be idia lalopararalaia gaudia hegeregerena ia haroro henidia. Ia ese aniani momo idia vara negadia bona mauri namona do idia moalelaia karana ia herevalaia. Paulo be ena hereva idia kamonai taudia ese idia lalopararalaia herevadia bona haheitalai ia gaukaralaia.

12. Edena dala ai ta ese ia laloa bada gaudia oi dibaia, bona emu haroro dalana oi haidaua?

¹² Aonega oi gaukaralaia emu teritori ai idia noho taudia idia laloa bada gaudia oi dibaia totona, bona emu haroro dalana oi haidaua. Edena dala ai ta oi hereva henia eiava ena ruma kahirakahira oi lao neganai ia laloa bada gaudia oi dibaia? Namona be edia noho dalana oi lalopararalaia. Reana ia be uma ia karaia, buka ta ia duahia, motuka ta ia hanamoa, eiava gaukara ma ta ia karaia noho. Bema hegeregere, ia karaia noho gauna oi gaukaralaia ia ida herevahereva oi hamatamaia totona. (Ioa. 4:7) Danu, ta ena dabua ese iena mauri dalana ia hahedinaraia diba​—hegeregere iena tano, ena gaukara, eiava ia ura henia sports team. Gustavo ia gwau: “Mauri lagani 19 tauna ta lau hereva henia neganai, lau itaia ena T-shirt dekenai be ane abia tauna ta ena laulau ia noho. Unai T-shirt totona lau henanadai, bona unai ane abia tauna ia ura henia ena badina ia herevalaia. Unai herevahereva amo Baibel stadi ai hamatamaia, bona hari ia be iseda tadikaka ta ai ia lao.”

13. Edena dala ai lalona veria dalanai Baibel stadi oi herevalaia diba?

 ¹³ Bema ta ida Baibel umui ura stadilaia, namona be lalona veria dalanai unai stadi oi karaia; stadi ese do ia durua dalana oi hahedinaraia. (Ioa. 4:13-15) Hegeregere, taihu ta ladana Poppy, be kamonai hahinena ta ese ia boiria ena ruma ai idia stadi totona. Poppy be haba dekenai unai hahine ese edukeisen ia stadilaia bona profesa gaukara ia karaia ena certificate ia itaia neganai, unai hahine dekenai ia hahedinaraia ita danu be Baibel stadi program bona iseda hebou idauidau amo taunimanima ita durua. Unai hahine be stadi ia abia dae, murina dinana ai kongrigeisen hebouna ia lao, bona gabeai sekit hebouhebou dekenai ia lao. Lagani ta murinai, bapatiso ia abia. Sibona oi nanadaia: ‘Egu lou henia be dahaka gaudia idia laloa bada? Lalona veria dalanai Baibel stadi karaia dalana lau herevalaia diba, a?’

14. Edena dala ai stiuden ta ta edia Baibel stadi totona oi hegaegae namonamo diba?

¹⁴ Baibel stadi ta oi hamatamaia murinai, namona be do oi karaia stadi ta ta totona oi hegaegae, bona emu stiuden ena mauri dalana bona ia laloa bada gaudia oi laloa. Oi hegaegae noho lalonai, Baibel ena hereva momokani oi hahedinaraia totona do oi gaukaralaia Baibel siri, vidio bona haheitalai oi abia hidi namonamo. Sibona oi nanadaia, ‘Edena kahana ese stiuden ena kudouna ia hamarerea diba?’ (Aon. 16:23) Albania ai, painia ta ladana Flora ida Baibel ia stadilaia hahinena ta ia gwau, “Toreisi lou ena hahediba herevana lau abia dae diba lasi.” Flora ese unai hahine ia doria lasi maoromaoro unai hahediba herevana ia abia dae totona. Flora ia gwau, “Lau laloa ia dekenai toreisi lou ia gwauhamatalaia Diravana lau hadibaia guna be namo.” Unai nega amo, Flora be stadi negadia ta ta ai, Iehova ena lalokau, aonega, bona siahu ia gwauraia hedinarai. Gabeai, ena stiuden be mai ura ida toreisi lou herevana ia abia dae. Hari, ia be Iehova ena Witnes hahinena ta.

15. Kara 17:16-18 ena hereva bamona, edena dala ai Paulo be Atena taudia edia kara dainai ia lalohekwarahi, to dahaka dainai ia hesiku lasi?

¹⁵ Kara 17:16-18 duahia. Herevana Atena taudia edia siti be kaivakuku tomadiho henia karana, matabodaga, tomadiho koikoi edia hahediba herevadia amo ia honu, to Paulo be Atena taudia dekenai ia hesiku lasi; eiava edia kara dainai ia lalohisihisi lasi. Paulo be Keristani ta ai ia lao, ena be guna ‘Dirava ena ladana ia hadikaia, iena taunimanima ia dagedage henia, bona hemataurai karana ia hahedinaraia lasi.’ (1 Tim. 1:13) Iesu ia abia dae Paulo be hahediba tauna ai do ia lao, unai hegeregerena Paulo ia abia dae Atena taudia be hahediba taudia ai do idia lao. Bona unai ia vara momokani.​—Kara 9:13-15; 17:34.

16-17. Dahaka ese ia hahedinaraia taunimanima idauidau be Keriso ena hahediba taudia ai idia lao diba? Haheitalai ta gwauraia.

¹⁶ Aposetolo taudia edia negai, taunimanima idauidau be Iesu ena hahediba taudia ai idia lao. Paulo ese Grik ena siti, Korinto dekenai ena revareva ia torea neganai, ia gwau guna kongrigeisen taudia haida be raskol karadia eiava matabodaga mauri dalana idia badinaia. Bona ma ia gwau: “Guna umui haida be unai bamona. To Dirava ese umui ia hagoevaia.” (1 Kor. 6:9-11) Oi laloa unai taudia be edia mauri idia haidaua bona hahediba taudia ai do idia lao, a?

¹⁷ Hari, taunimanima momo be mai ura ida edia mauri idia haidaua bona Iesu ena hahediba taudia ai idia lao. Hegeregere, Australia ai, spesel painia ta ladana Yukina, ia abia dae taunimanima idauidau be Baibel ena sivarai idia kamonai diba. Dina ta, Yukina be bisinesi ofesi ta dekenai ia lao neganai kekeni ta ia itaia,  bona ia be mai ena tattoo momo. Yukina ia gwau: “Matamanai lau daradara ia lau hereva henia totona, to gabeai lau hereva henia matamaia. Lau davaria ia be Baibel ia laloa bada bona ena tattoo haida be Salamo bukana ena siri haida!” Unai hahine be stadi ia abia dae bona hebou ia lao henia matamaia. *

18. Dahaka dainai taunimanima ita hahemaoro henia lasi be namo?

¹⁸ Iesu ia laloa witi be idia kurokuro vadaeni utua totona, badina ia diba taunimanima momo be iena murinai do idia raka, a? Lasi. Baibel ese ia hahedinaraia taunimanima haida sibona be ia do idia abidadama henia. (Ioa. 12:37, 38) Bona Iesu be mai ena siahu taunimanima edia kudouna ai idia noho gaudia ia dibaia totona. (Mat. 9:4) To, ia idia abidadama henia taudia ia laloa bada, bona taunimanima ibounai ia haroro henia goadagoada. Ita be taunimanima edia kudouna ai idia noho gaudia ita diba lasi, unai dainai taunimanima ta eiava iseda teritori ai idia noho taudia ita hahemaoro henia lasi! To, namona be ita abia dae idia be hahediba taudia ai idia lao diba. Burkina Faso ai, misinari ta ladana Marc ia gwau: “Lau laloa do idia goada taudia momo be edia stadi karana idia hadokoa. To, do idia goada lasi taudia be nega momo edia stadi karana idia goadalaia. Unai dainai lau diba, namona be Iehova ena lauma helaga ese ita ia hakaua hereva momokani idia ura henia taudia ita tahua totona.”

19. Iseda teritori dekenai idia noho taudia be edena bamona ita laloa?

¹⁹ Matamanai, reana do oi laloa teritori dekenai idia noho taudia haida sibona be gogoa totona idia kurokuro vadaeni witi bamona. To, namona be Iesu ese ena hahediba taudia dekenai ia gwauraia herevana oi laloatao. Uma ena anina be idia kurokuro vadaeni, anina be gogoa negana ia ginidae. Taunimanima ese edia mauri idia haidaua diba bona Keriso ena hahediba taudia ai idia lao. Iehova ese unai taudia be “kohu namodia” bamona ia laloa. (Hag. 2:7) Iehova bona Iesu ese taunimanima idia laloa bamona ita laloa neganai, edia mauri dalana bona idia laloa bada gaudia do ita dibaia. Idia be idau taudia bamona ita laloa lasi, to iseda tadikaka bona taihu ai do idia lao taudia bamona ita laloa diba.