Manoli ta naddianna

Manoli ta table of contents

MAGIGIAMMU NGA ARTIKULO 15

Kunnasim Imammatan i Totolay ta Teritorianu?

Kunnasim Imammatan i Totolay ta Teritorianu?

“Innan nu ta mapia i koman ira. Tiempo ngana na aggagatag!”​—JUAN 4:35.

KANSION 64 May-kagalakang Nakikibahagi sa Pag-aani

SUMARIO *

1-2. Anni i kayà kagian ni Jesus turi ta kinagina i uvovug ira ta Juan 4:35, 36?

MAPPANGE ta Galilea, lumaka-lakag si Jesus ta koman ira nga posible nga namulan tu sebada nga ari paga naddawa. (Juan 4:3-6) Ma-appa vulan paga nige nga maapit danatun nga mula. Yari tu kakkadda-kaddag turi ta kinagi ni Jesus: “Innan nu ta mapia i koman ira. Tiempo ngana na aggagatag!” (Bibbigan i Juan 4:35, 36.) Anni i kayàna kagian?

2 Posible nga tukuyan tatun ni Jesus i simboliko nga pagapit ta totolay, ari tu ta mulu-mula. Ikonsidera nu anni i kababalin nga nesimmu. Maski nu maruddu nga ari makkavuyu-vuya i Judio anna Samaritano, nilayyagayyan lagapa ni Jesus i tadday nga Samaritana. Anna nagginna yatun nga Samaritana! Kakuruganna, durante nga ipakiyuvovug ni Jesus i koman ira nga ‘tiempona ngana nga magatag,’ aru nga Samaritano nga nalayyagayyan nari na babay nga naka-uvovug ni Jesus i mappange nisa tapenu mas paga nga makagigiammu. (Juan 4:9, 39-42) Kinagi na tadday nga iskolar na Biblia nga ipasingan na insigida nga pinaggangay anna pinagginna na totolay kani Jesus nga gittada i naffuraw nga dawa nga puede ngana nga maapit.

Anni nakuan i kuattam nu matageno tam nga “tiempo ngana na aggagatag” ta teritoria tam? (Innan i parapo 3)

3. Anni i efektona ta ministeriom nu imammatammu i totolay kagitta ni Jesus?

3 Kunnasim gapa imammatan i totolay nga layyagayyammu tu mapia nga dumug? Imammatammu kari ira nga naffuraw nga dawa nga awayyana ngana nga maapit? Nu kunnatun, mapakurug mu yatun ta tallu nga gannug. Ollu, ariammu italattan i pallayyagayya. Limitadu laman i tiempo na pagapit; awan tu masayang nga oras. Mekadua, magayayya ka durante nga masingammu nga magginna i totolay ta mapia nga dumug. Kagian na Biblia: ‘Magayayya i totolay ta tiempo na pagapit.’ (Isa. 9:3) Anna mekatallu, imammatammu nga potensial nga disipulo i kada tolay, yari tu ibagay mu i pallayyagayyam tapenu maginteres ira.

4. Anni i gigiammuattam meyannung kani apostol Pablo taw nga artikulo?

4 Ninono na karuan nga disipulos ni Jesus nga ari vuluvuga nga mabbalin tu disipulos i Samaritano ira, ngem ari tu kunnatun i ninono ni Jesus. Lallagu, minammatanna ira bilang potensial nga mabbalin tu disipulos. Mawag tam gapa nga imammatan nga potensial nga disipulos ni Cristo danuri totolay ta teritoria tam. Nangipasingan si apostol Pablo tu makakkasta nga ehemplo nga pamarigattam. Anni i magigiammu tam nisa? Taw nga artikulo, gigiammuattam nu kunnasina (1) nammuan i kuru-kurugan danuri nilayyagayyanna, (2) nammuan i paginteresadda, anna (3) nasingan i potensialda nga mabbalin tu disipulos ni Jesus.

ANNI I KURUGADDA?

5. Ngatta malippawa ni Pablo danuri maggigginna ta sinagoga?

5 Maruddu nga mallayyagayya si Pablo ta sinagoga na Judio ira. Angngariganna, ta sinagoga na Tesalonica, ‘ta tallu nga matturunug nga Aggaw na Pagibannag, nakiddiskusion yayya ta Judio ira anna nipakanawagna i Masanto nga Tura.’ (King. 17:1-3) Siguradu nga komfortable ngana si Pablo ta sinagoga. Ziminakal yayya nga Judio. (King. 26:4, 5) Malippawa ni Pablo danuri Judio, yari tu masikan i nonona nga layyagayyan ira.​—Fil. 3:4, 5.

6. Kunnasi nga neruma i totolay ta plasa ta Atenas turi ira ta nilayyagayyan ni Pablo ta sinagoga?

6 Turi ta pinapanaw na manara-darum si Pablo ta Tesalonica anna ta Berea, minay yayya ta Atenas. Mittan mangana, “nakiddiskusion yaya ta unag na sinagoga ta Judio ira tuange ta Hentil ira nga minaddaya-rayaw ta Dios.” (King. 17:17) Ngem turi ta mallayyagayya si Pablo ta plasa, tanakuan ngana i maggigginna nisa. Nelagum tatun danuri minattuddu anna karuan nga Hentil nga imammatadda nga “bagu nga tuddu” i mensahe ni Pablo. Kudda nisa: “Pakkapalla mi i karuan nga maginna mi nga kaga-kagiam-mu.”​—King. 17:18-20.

7. Segun ta Kingngua 17:22, 23, kunnasi nibagay ni Pablo i metodo na pallayyagayyana?

7 Bibbigan i Kingngua 17:22, 23. Ari tu parehu i pinangipresenta ni Pablo ta mensahena ta Hentil ira ta Atenas anna ta Judio ira ta sinagoga. Posible nga niyavu ni Pablo ta baggina, ‘Anni tamma i kuru-kurugan danaw nga taga-Atenas?’ Inobserbana tu mapia i pallevuna anna i relihioso ira nga kostumbre na totolay. Kabalinna, nagaleg si Pablo tu pakkara-anugutadda ta klase na paddayoda anna ta kinakurug ta Katurakan. “Bilang tadday nga Judio nga Cristiano, nalippawana nga ari dayawan na pagano nga Griego i ‘kurug’ nga Dios na Judio anna Cristiano ira,” kunna tadday nga komentarista na Biblia, “ngem kayàna nga palawanan nga i Dios nga ilayyagayyana ay ta kakuruganna ay ammammu na taga-Atenas ira.” Sigga-paran gafu si Pablo nga ibagay i metodo na pallayyagayyana. Kinagina ta taga-Atenas nga naggafu i mensahena ta “Dios nga ari nga Ammammu,” nga dayarayawadda. Maski paga ari familiar i Hentil ira ta Katurakan, ari vuluvuga ninono ni Pablo nga ariadda mabbalin tu Cristiano. Lallagu, minammatanna ira nga kagitta na naffuraw nga dawa nga maapit ngana, yari tu nibagayna i pinangipresentana ta mapia nga dumug.

Bilang panuttul ta ehemplo ni apostol Pablo, kanayun nga magobserba, ibagay i presentasiommu, anna innan i potensial na totolay nga mabbalin tu disipulo (Innan i parapo 8, 12, 18) *

8. (a) Kunnasim mammuan i kuru-kurugan na totolay ta teritorianu? (b) Nu egga i makkagi nga egga ngana i relihionna, anni i awayyam nga itabbag?

8 Kagitta ni Pablo, kanayun nga magobserba. Magaleg tu seniales nga mangipasingan ta kurugan na totolay ta teritorianu. Kunnasi nga dinekoran na makabbalay i balena onu i takena? Ipasingan kari na ngagan, passinnun, itchura, onu maski na paguvovugna nu anni i relihionna? Awayyana tu kinagina mismu nikaw nga egga ngana i relihionna. Turi ta kunnatun i nesimmu ta tadday nga espesial payunir nga mangngagan tu Flutura, kunnaw i nitabbagna, “Ariakku minay taw tapenu ifuersa i pangurug ku niko, ngem kayà ku laman nga pabbidatta i meyannung taw nga topiko . . . ”

9. Anni i awayyam alegan nga napparehuannu na relihioso nga tolay?

9 Anni ira nga topiko i awayyam nga ipakiyuvovug ta relihioso nga tolay? Magaleg ka tu gannug ira nga napparehuannu. Baka tattadday laman nga Dios i dayawanna, rekunnisianna nga si Jesus i Mangipaliag ta totolay, onu kuruganna nga mattolay ittam ngana ta tiempo nga aranni ngana nga mangultimu i kinarake. Usan i gannug ira nga napparehuannu tapenu melayyagayyam i mensahe na Biblia nga makapa-interes nisa.

10. Anni nakuan i ammuattam, anna ngatta?

10 Daddamman nga posible nga ari kurugan na totolay i ngamin nga ituttuddu na relihiodda. Maski gafu nammuammu ngana i relihion na tadday, ammuan lagapa nu anni i personal nga kuruganna. “Aru ngana sangawe i mangikivu tu pilosopia ta kuru-kurugadda ta relihion,” kunni David, tadday nga espesial payunir ta Australia. Kinagi gapa ni Donalta nga taga-Albania, “I karuan nga masimmuammi ay kagiadda nga egga i relihiodda ngem aminadda gabbalaman nga ariadda mangurug ta Dios.” Napansin gapa na tadday nga misionero ta Argentina nga kagian na karuan nga mangurug ira ta Trinidad, ngem ariadda mabba kurugan nga i Yama, i Ana, anna i masanto nga espiritu ay tadday nga Dios. “Nu nonopakku nga ari kurugan na kibbidakku i ngamin nga ituddu na relihionna, mas alistu para niakan nga alegan i napparehuammi,” kunna. Yatutta ammuan i personal nga kuru-kurugan na totolay. Nu kunnatun, maparigammu si Pablo nga ‘nabbalin yayya tu kagitta na ngamin nga totolay.’​—1 Cor. 9:19-23.

ANNI I PAGINTERESADDA IRA?

11. Kagitta na nerekord ta Kingngua 14:14-17, kunnasi nga makapa-interes nga nipresenta ni Pablo i mensahena ta totolay ta Listra?

11 Bibbigan i Kingngua 14:14-17. Nalippawa ni Pablo i interes ira na maggigginna nisa, yari tu nibagayna i presentasionna. Angngariganna, danuri kiyuvovuganna ta Listra ay baddi onu awan tu ammuda ta Katurakan. Yari tu nakibbida si Pablo segun ta malippawada. Tinukoyna i meyannung ta tiempo nga aru i maapit anna i posibilidad nga magayayya ta pattolay. Nangiyusa yayya tu uvovug anna angngarigan ira nga alistu nga malippawa na maggigginna nisa.

12. Kunnasim mammuan i interes na tadday nga tolay anna ibagay i presentasiommu?

12 Usan i pakalippawa tapenu ammuan i interes na totolay ta teritorianu anna ibagay i presentasiommu. Kunnasim mammuan i paginteresan na tadday nga tolay durante nga aranniammu yayya onu i balena? Uli mangana, kanayun nga magobserba. Awayyana nga obserbammu i laguertana, bibbiganna nga libru, pakappianna nga takay, onu i karuan nga kuanna. Nu mepangngo, baka awayyam igafu i pakiyuvovug gukaban na pakistoria ta kukukuanna. (Juan 4:7) Awayyana nga ipasingan na sinnun na tolay i nasionalidadna, trabahuna, onu paboritona nga team ta isports. “Kinibbidà i tadday nga 19-anios nga lalaki nga masingan ta sinnunna i letratu na sikat nga singer,” kunni Gustavo. “Niyavu ku nisa i meyannung ta sinnunna, anna kinagina niakan nu ngatta idolona yatun nga singer. Narresulta tu Bible study yatun nga pakibbida, anna tadday ngana yayya nga Saksi.”

13. Kunnasim meyofer i Bible study nga makapa-interes?

13 Nu mangiyofer ka tu Bible study ta tadday nga tolay, kuammu nga makapa-interes yatun; ipasingammu nu kunnasi yatun makoffun nisa. (Juan 4:13-15) Angngariganna, pinatallung ta balay na interesadu nga babay i sister nga mangngagan tu Poppy. Turi ta nasingan ni sister Poppy i diploma ta libag onu zizzing nga mangipasingan nga profesor yatun nga babay anna naggigiammu tu education, nipakanawagna nga manuttuddu ittam gapa tu totolay gukaban na programa na paggigiammu tu Biblia anna ta study tam ira. Inalawa natun nga babay i paggigiammu tu Biblia, nagatende ta study ta tumunug nga aggaw, anna ari nabbayag, nagatende yayya ta asembli sirkito. Kabalin na tanga-ragun, nabawtisowan yayya. Iyavu ta baggim: ‘Anni ira i paginteresan na return visit ku? Mamaginteres kari i pangipakanawag ku ta programa tam ta paggigiammu tu Biblia?’

14. Kunnasim mebagay i Bible study ta kada estudiante?

14 Sonu napegafuanammu ngana i Bible study, mapprepara tu mapia ta kada sesion na paggigiammu. Nonopan i familia, edukasion, nappasa-pasan anna paginteresan na estudiantem. Durante nga mapprepara ka, innammu nu anni i bibbigammu ira nga teksto, video ira nga ipagirom, anna ilustrasion ira nga usammu tapenu mepakanawag i kinakurug ira ta Biblia. Iyavu ta baggim, ‘Anni tamma i mamaginteres anna makadde ta futuna?’ (Prov. 16:23) Ta Albania, kinagi na babay nga Bible study na payunir nga si Flora, “Ariakku maaksepta i tuddu meyannung ta paginnolay.” Ari nifuersa yatun ni Flora. Kunna, “Nalippawa ku nga nigena nga mangurug ta paginnolay, mawagna labbi ammuan i Dios nga nangipromesa ta paginnolay.” Namegafu tatun, ta kada paggigiammuda, kanayun nga ipatalatto ni Flora i aya, sirib, anna pakapangngua ni Jehova. Turi kua, nangurug gabbalaman ta paginnolay i Bible study-na. Matalikarag ngana yayya nga Saksi ni Jehova.

IMAMMATAN IRA NGA POTENSIAL NGA DISIPULOS

15. Segun ta Kingngua 17:16-18, anni ira nga gannug tagga ta Grecia i namalluag ta daga ni Pablo, ngem ngatta nilayyagayyanna lagapa i taga-Atenas ira?

15 Bibbigan i Kingngua 17:16-18. Ari ninono ni Pablo nga ari vuluvuga nga mabbalin tu Cristiano danuri taga-Atenas, maski nu napannu i siudadda tu idolatria, seksual nga imoralidad, anna pagano nga pilosopia; ni tu pinakkafi yayya na panginsultoda. Si Pablo mismu ay nabbalin tu tadday nga Cristiano maski nu ‘naguvovug yayya gari ta kontra ta Cristo, zinara-darumna, anna pinasa-pasiranan i Cristo.’ (1 Tim. 1:13) Nu kunnasi nga nasingan ni Jesus i potensial ni Pablo nga mabbalin tu disipulo, nasingan gapa ni Pablo i potensial na taga-Atenas ira. Egga i basehan natun nga pagiddanamana nira.​—King. 9:13-15; 17:34.

16-17. Anni i mangipasingan nga posible nga mabbalin tu disipulos ni Cristo i ngamin nga klase na tolay? Mangiyawa tu angngarigan.

16 Ta ollu siglo, nadduruma i naggafuan na disipulos ni Jesus. Turi ta nattura si Pablo ta Cristiano ira nga maddian ta Griego nga siudad na Corinto, kinagina nga i karuan nga miembro na kongregasion ay dati nga kriminal anna nepallo i ka-imoralda. Ngem niyammunna: “Ngem nabaggawan kamu ngana ta katagarulian nu.” (1 Cor. 6:9-11) Nasingammu kari i potensial danatun nga totolay nga manguli anna mabbalin tu disipulos?

17 Ta maddaggun, aru i sigga-paran nga magangngua tu kawagan nga panguli tapenu mabbalin tu disipulos ni Jesus. Angngariganna, nammuan na tadday nga espesial payunir ta Australia nga mangngagan tu Yukina nga ngamin nga klase na tolay ay awayyana nga magginna ta mensahe na Biblia. Mittan ta ofisina na real estate, napansinna i tadday nga kabataan nga babay nga aru i tattoona anna agga-ralawa anna darakal i sinnunna. “Nagalangan ngà ta gafu,” kunni Yukina, “ngem kinibbidà lagapa yayya. Nammuakku nga kuruga interesadu yayya ta Biblia anna teksto ira nga naggafu ta Salmo i karuan nga tattoona!” Nappa-Bible study ngana yayya anna magatende ngana ta study ira. *

18. Ngatta ariattam nakuan husgan i totolay?

18 Minammatan kari ni Jesus nga puede ngana nga maapit i akkomanan megafu ta inekspektana nga magaru nga totolay i tumuttul nisa? Ari vuluvuga. Neprofesiya ta Katurakan nga baddi laman i mangurug nisa. (Juan 12:37, 38) Anna egga i kappabbaw nga abilidad ni Jesus nga bibbigan i futu ira. (Mat. 9:4) Ngem, naffokus yayya ta baddi laman nga mangurug nisa, anna matalikaragna nga nilayyagayyan i ngamin. Mas ngana nakuan nittam nga ari makabibbig tu futu ira, ibita tam nakuan i tendensia nga husgan i teritoria onu i indibidual! Lallagu, innattam i potensialda nga mabbalin tu disipulos. Kunnaw i kinagi ni Marc nga misionero ta Burkina Faso: “I totolay ira nga nononopakku nga mapprogreso ay maruddu nga magimmang ta pagistudy. Ngem danuri nonopakku nga ari mapprogreso ay maruddu nga mapprogreso. Yatutta nagigiammù nga mas makasta nu mappegiya ittam ta espiritu ni Jehova.”

19. Kunnasi tam nakuan imammatan i totolay ta teritoria tam?

19 Awayyana nga nonopattam nga gittana baddi laman ta teritoria tam i kagitta na naffuraw nga dawa nga puede ngana nga maapit. Ngem daddamman i kinagi ni Jesus ta disipulosna. Tiempo ngana na aggagatag, kayàna kagian, puede ira ngana nga maapit. Posible nga manguli i totolay anna mabbalin tu disipulos ni Cristo. Imammatan ni Jehova danaw nga potensial nga disipulos bilang “nabala-balor nga gannug.” (Hag. 2:7) Nu imammatattam i totolay nga kunna pagimamma ni Jehova anna ni Jesus, alippawatattam i naggafuadda anna paginteresadda. Imammatattam ira bilang potensial nga wawwaragi, ari tu kagitta na dayu.

KANSION 57 Pallayyagayya ta Ngamin nga Totolay

^ par. 5 Kunnasi afektan na pagimamma tam ta totolay ta teritoria tam i metodo na pallayyagayya anna panuddu tam? Ipakanawag naw nga artikulo nu kunnasi minammatan ni Jesus anni apostol Pablo i maggigginna nira anna nu kunnasi tam ira maparigan gukaban na pangikonsidera ta kurugadda ira, paginteresadda, anna ta potensialda nga mabbalin tu disipulos ni Cristo.

^ par. 17 I serye nga “Pakastan na Biblia i Pattolay” ay mangiyawa tu aru nga angngarigan nu kunnasi nanguli i totolay. Yaw nga serye ay nallawan ta Passifusifutan adde ta 2017. Mepublisa ngana yaw ta jw.org/tl. Umay ta TUNGKOL SA AMIN > MGA KARANASAN.

^ par. 57 DESKRIPSION NA LETRATU: Durante nga mamala-balay i tadday nga magatawa, masingadda i (1) maayus nga balay nga aru i masetana; (2) balay na tadday nga familia nga egga baraddi nga ánada; (3) balay nga naggiwarangkal ta unag anna ta lawan; anna (4) balay na relihioso. Sitaw mu malegan i tolay nga dakal i potensialna nga mabbalin tu disipulo?