Content de lai

Malawm Ni Hpe Lai U

Hkaja Na Sumhpa 15

Hkaw Tsun Lawk Hpe Nang Gara Hku Mu Ai Kun?

Hkaw Tsun Lawk Hpe Nang Gara Hku Mu Ai Kun?

“Yi hkauna ni hta dan na mam, ya e pyi myin htoi nga ai hpe, sharawt mada yu mu.”​—YHN 4:35.

Mahkawn 64 Mam Dan Ai Amu Hta Kabu Gara Let Shang Lawm

Sumhpa Hta Lawm Ai Lam *

1-2. Yawhan 4:35, 36 hta Yesu tsun da ai ga ni gaw hpa lachyum rai kun?

YESU gaw hkauna hku lai mat wa ai shaloi, mam ni gaw ya she nnan tu kaba wa nga ai. (Yhn 4:3-6) Mam dan na matu shata mali daram naw ra ai. Raitim, Yesu gaw “yi hkauna ni hta dan na mam, ya e pyi myin htoi nga ai hpe, sharawt mada yu mu” ngu nna tsun ai ga gaw mau na zawn re. (Yawhan 4:35, 36 hpe hti u.) Hpa hpe tsun mayu ai kun?

2 Masha kahkyin la nna hpawng de ai hpe tsun ai rai na re. Hpa byin wa ai hpe yu yu ga. Yuda masha ni gaw Samari masha ni hte n kanawn tim, Yesu gaw Samari num langai hpe hkaw tsun ai shaloi, shi madat ai. Yesu a lam hpe Samari num kaw nna na la ai masha hpawng gaw Yesu a lam grau chye mayu nna shi hpang de sa wa ai. Shanhte hpe “myin htoi nga ai” mam ngu nna Yesu tsun ai re. (Yhn 4:9, 39-42) Ndai labau hte seng nna Chyum Laika lachyum shapraw ai laika buk langai hta ndai hku tsun da ai: “Yesu hte hkrum na matu hte shi a ga madat na matu alawan sa wa ai masha ni gaw myin htoi nga ai mam ni re ai hpe madun dan ai.”

Anhte a hkauna gaw “myin htoi nga sai” ngu hkamsha yang hpa galaw ging ai kun? (Laika pang 3 hpe yu u)

3. Yesu mu mada ai hku masha ni hpe mu yang gara hku hkaw tsun na kun?

3 Nang kabu gara shiga hkaw tsun nga ai masha ni hpe gara hku mu mada ai kun? Myin htoi nga ai mam ni hku nna mu mada ai kun? Rai yang, ndai lam 3 hku nna sakse madun na re: Langai, ahkyak shatai hkaw tsun na re. Dan la na aten hpe masat da sai majaw, aten majoi shama na n re. Lahkawng, kabu gara shiga hkap la ai ni hte hkrum yang nang kabu na re. Masha ni gaw “nmut ta e kabu gara ai” nga nna Chyum Laika hta tsun da ai. (Esa 9:2) Masum, masha langai hpra hpe sape byin wa na masa nga ai ni hku nna nang mu mada na re. Dai majaw, shanhte myit lawm na lam ni hpe nang tsun dan na re.

4. Ndai sumhpa hta Kasa Pawlu kaw nna hpa sharin la lu na kun?

4 Samari masha ni hpe sape ni yu kaji tim, Yesu n yu kaji ai. Sape byin wa na masa nga ai ni hku nna sha mu mada ai. Anhte mung hkaw tsun lawk hta nga ai masha ni hpe, Hkristu a sape byin wa na masa nga ai ni hku nna mu mada ra ai. Kasa Pawlu gaw anhte a matu kasi ningli madun wa ai. Shi kaw nna anhte hpa sharin la lu na kun? Ndai sumhpa hta Pawlu gaw (1) hkaw tsun ai masha ni a makam masham hpe gara hku chye ai (2) shanhte a myit lawm ai lam hpe gara hku ginhka ai (3) shanhte hpe Yesu a sape byin wa na masa nga ai ni hku nna gara hku mu mada ai lam hpe hkaja lu na re.

Shanhte Hpa Hpe Kamsham Ai Kun?

5. Tara jawng kaw na masha ni a lam hpe Pawlu hpa majaw chye na ai kun?

5 Pawlu gaw Yuda tara jawng ni kaw chyahkring hkring hkaw tsun wa ai. Ga shadawn, Htesaloni mare kaw nna tara jawng hta “Laban nhtoi masum ting, Chyum laika hku hkan nna shanhte [Yuda ni] hte tsun chyai” nga ai. (Kas 17:1, 2) Pawlu gaw Yuda masha hku nna nga kaba wa ai majaw, tara jawng hta hkaw tsun ai shaloi loi na re. (Kas 26:4, 5) Yuda masha ni a lam chye na ai majaw, tinang hkum tinang kam ai myit hte shi hkaw tsun lu ai.​—Hpl 3:4, 5.

6. Tara jawng kaw Pawlu hkaw tsun ai masha ni hte Ahten gat kaw na masha ni gara hku shai ai kun?

6 Zingri zingrat ai masha ni a majaw, Htesaloni hte Beria mare kaw nna Pawlu hprawng wa ai hpang, Ahten mare de du ai. Dai kaw du ai shaloi, “tara jawng hta Yuda masha ni, Karai Kasang hpe nawku kam sham ai maigan masha ni hte . . . tsun bawng ai lam ni galaw nga ai.” (Kas 17:17, JCLB) Gat hta hkaw tsun ai shaloi, shawa masha gaw n bung sai. Madat ai ni hta, myit mang ninghkrin ni hte maigan masha ni lawm ai. Pawlu hkaw tsun ai shiga gaw shanhte a matu “lam ningnan” re. Dai majaw, “mau na zawn nga ai lam nkau mi, nang anhte hpe tsun dan ndai” nga nna tsun ma ai.​—Kas 17:18-20.

7. Kasa 17:22, 23 hku nga yang Pawlu gaw hkaw tsun ladat hpe gara hku galai shai wa ai kun?

7 Kasa 17:22, 23 hpe hti u. Pawlu gaw, Ahten mare na maigan masha ni hpe, tara jawng na Yuda masha ni hpe hkaw tsun ai zawn n hkaw tsun ai. ‘Ahten mare masha ni gaw hpa hpe kamsham ai kun?’ nga nna myit wa na re. Makau grup-yin hta nga ai lam ni hte masha ni a nawku htung hpe sadi yu ai. Dai hpang, shanhte hkap la da ai lam ni hte ga shaga hpang nna, Chyum Laika tengman lam ni hpe tsun dan ai. “Gawngngu sumla naw ai Grik masha ni gaw, Yuda ni hte Hkristan ni a tengman ai Karai Kasang hpe n nawku ai hpe shi chye ai. Raitim, shi tsun dan ai Karai Kasang gaw, Ahten mare masha ni n chye da ai lam n re ai hpe shakut nna tsun dan ai” nga nna Chyum hpaji du langai tsun ai. Pawlu gaw hkaw tsun ai ladat hpe sharawng awng let galai shai wa ai. Shi tsun ai shiga gaw, Ahten mare masha ni nawku nga ai “n chye gaw ai Karai Wa” kaw nna sa ai lam re ai hpe tsun dan ai. Maigan masha ni gaw Chyum Laika a lam n chye tim, Pawlu asum n jaw wa ai. De a malai, dan la na matu myin htoi nga ai mam ni zawn mu mada nna, kabu gara shiga hkaw tsun ai ladat hpe galai shai wa ai.

Kasa Pawlu a kasi ningli hpe hkan sa nna sawn maram chye u, hkaw tsun ladat hpe galai shai u, sape byin na ni hku nna mu mada u (Laika pang 8, 12, 18 hpe yu u) *

8. (a) Na a hkaw tsun lawk na masha ni a makam masham hpe gara hku ginhka na kun? (b) Marai langai gaw shi hta nawku htung nga chyalu re ngu tsun wa yang gara hku bai htang na kun?

8 Pawlu zawn sawn maram chye u. Na a hkaw tsun lawk na masha ni hpa hpe kam ai hpe chye hkra galaw u. Nta madu gaw shi a nta (sh) mawdaw hta hpa ni shakap da ai kun? Shi a amying, bu hpun mawn sumli ai lam, tsun ai ga ni gaw shi a nawku htung hpe chye shangun ai kun? Shi hta nawku htung nga chyalu re ngu dingtawk tsun ai mung rai chye ai. Laksan ningshawng nauna Hpalutra hpe marai langai dai hku tsun ai shaloi, shi ndai hku bai tsun ai: “Nye a makam masham hpe hkap la na matu nang hpe shadut ai n re. Raitim, ndai . . . lam hte seng nna tsun dan mayu ai.”

9. Nawku htung nga ai marai langai hpe hkaw tsun ai shaloi gara bung ai lam ni nga ai kun?

9 Nawku htung nga ai marai langai hte hpa lam hpe nang bawng ban na kun? Bung ai lam hpe tam u. Karai langai hpe sha nawku ai, shinggyim masha ni hpe Hkye La ai Madu hku nna Yesu hpe kam ai, nhkru nhkra ai aten hta asak hkrung nga nna kade n na yang jahtum du sana hpe kam ai lam ni rai chye ai. Shanhte hte bung ai lam hpe madung tawn nna, hkap la lu ai ladat hte tsun dan u.

10. Anhte hpa galaw na matu shakut ging ai kun? Hpa majaw kun?

10 Masha ni gaw nawku htung sharin achyin ya ai lam yawng hpe n kamsham ai mung rai na re. Dai majaw, marai langai a nawku htung hpe ginhka chye tim pyi, shi hpa hpe kamsham ai lam chye hkra galaw u. “Ya prat na masha law law gaw nawku htung makam masham hte myit mang hpaji hpe gayau kau sai” nga nna Awstelia mungdan kaw na laksan ningshawng Debit tsun ai. Elbenia mungdan kaw na nauna Dawnata ndai hku tsun ai: “Anhte hkrum ai masha nkau gaw, nawku htung langai kaw na raitim, Karai Kasang hpe gaja wa n kam sai lam shanhte yin la ai.” Masha nkau gaw Masum Raitim Langai Karai hpe kamsham ma ai. Raitim, Kawa, Kasha, chyoi pra ai wenyi gaw Karai Kasang langai re ai hpe n kamsham ai lam Ajintina mungdan kaw na sasana magam gun hpunau tsun dan ai. “Dai lam hpe chye ai gaw, shanhte hte bung ai lam hpe tam na matu grau loi ai” ngu shi tsun ai. Dai majaw, masha ni gaja wa kam ai lam hpe tam u. Rai yang, Pawlu zawn “masha yawng mayawng hta lam yawng mayawng” byin wa na re.​—1 Ko 9:19-23.

Shanhte Hpa Hpe Myit Lawm Ai Kun?

11. Kasa 14:14-17 hku nga yang Pawlu gaw Lustra mare na masha ni hpe gara lam ni hte hkaw tsun ai kun?

11 Kasa 14:14-17 hpe hti u. Pawlu gaw madat nga ai ni a myit lawm ai lam hpe chye ai majaw, hkaw tsun ladat hpe galai shai ai. Ga shadawn, Lustra mare na shawa masha ni gaw, Chyum Laika hpe loi mi sha chye ai (sh) kachyi mi mung n chye ai ni rai ma ai. Dai majaw, shanhte chye na lu ai ladat hte hkaw tsun ai. Nsi naisi ngai ai lam hte kabu gara ai prat lu shangun ai atsam ningja a lam hpe tsun dan ai. Madat nga ai ni aloi sha chye na lu ai ga si ni hte ga shadawn ni hpe akyu jashawn wa ai.

12. Marai langai a myit lawm ai lam hpe gara hku ginhka lu na kun? Hkaw tsun ai ladat hpe gara hku galai shai na kun?

12 Na a hkaw tsun lawk na masha ni a myit lawm ai lam hpe atsawm ginhka nna, hkaw tsun ai ladat hpe galai shai u. Nang hkaw tsun na masha (sh) shi a nta de sa ai shaloi, hpa hpe myit lawm ai lam gara hku ginhka lu na kun? Kalang bai myit yu u. Shi gaw sun hkai nga ai, laika hti nga ai, jak gram nga ai, kaga lama ma galaw nga ai rai na re. Shi galaw nga ai lam hte seng nna ga shaga hpang mai ai. (Yhn 4:7) Marai langai a bu hpun palawng gaw shi a amyu, bungli, ra sharawng ai ginsup hpung hpe madun dan chye ai. Hpunau Gatsatabo ndai hku tsun ai: “Mying gumhkawng ai yungwi ninghkrin a sumla kap ai palawng hpun da ai asak 19 ning lasha hpe ngai ga shaga hpang ai. Dai yungwi ninghkrin a lam ngai san ai shaloi, hpa majaw ra sharawng ai lam ngai hpe tsun dan ai. Dai hku tsun shaga ai gaw Chyum Laika sharin hpang na matu lam hpaw wa nna, ya nga yang shi gaw hpunau langai byin nga sai.”

13. Chyum Laika hkaja na matu saw shaga ai shaloi myit lawm wa hkra gara hku galaw na kun?

13 Marai langai ngai hpe Chyum Laika hkaja na matu saw shaga ai shaloi, shi myit lawm wa hkra galaw u. Hkaja ai lam gaw shi hpe karum ya lu ai lam madun dan u. (Yhn 4:13-15) Ga shadawn, myit lawm ai lam madun ai num langai gaw nauna Hpawp Hpi hpe nta kata de saw shaga ai. Dai shaloi, hpaji chye ai dakkasu sarama re ai hpe madun dan ai shakum kaw na lekmat hpe mu dat ai. Dai majaw, nauna gaw anhte mung Chyum Laika hkaja ai lamang ni, zuphpawng ni hku nna masha ni hpe hpaji sharin ya nga ai lam hpe ahkyak shatai nna tsun dan ai. Shi gaw Chyum Laika hkaja na matu hkap la nna, hpang shani hta zuphpawng sa lung ai. Kade n na yang ninghtawn zuphpawng lung ai. Laning mi na ai hpang hkalup hkam la ai. Tinang hkum tinang ndai hku san u: ‘Ngai bai kawan ai masha gaw hpa hpe myit lawm ai kun? Nye a Chyum Laika sharin ai lamang hpe shanhte myit lawm ai ladat hte ngai sharin lu na kun?’

14. Chyum ga sharin langai hpra hpe galai shai nna gara hku sharin na kun?

14 Chyum Laika hkaja hpang ai aten kaw nna, Chyum ga sharin a shingdu labau, myit lawm ai lam hpe myit hta bang da nna langai hpra a matu hkyen lajang u. Nang hkyen lajang ai shaloi, gara Chyum daw hti na, gara video madun na, Chyum Laika tengman lam hpe sanglang dan ai shaloi, gara ga shadawn hpe lang na ngu ai hpe dawdan u. Tinang hkum tinang ndai hku san u: ‘Laksan hku nna ndai Chyum ga sharin gaw hpa hpe myit lawm nna gara gaw shi a myit masin hpe shadut ya lu na kun?’ (Gsh 16:23) Elbenia mungdan kaw na nauna Hpalawra hte hkaja nga ai num langai ndai hku tsun ai: “Hkrung rawt ai hte seng ai sharin achyin lam hpe ngai n hkap la lu ai.” Nauna gaw dai lam hpe hkap la na matu n shadut ai. “Hkrung rawt ai hte seng nna ga sadi jaw ai Karai Kasang hpe shawng nnan hku nna shi chye ra ai lam ngai myit ai” ngu nauna tsun ai. Hkaja ai aten shagu hta, Yehowa a tsawra myit, nyan hpaji hte n-gun atsam hpe ahkyak shatai nna nauna tsun dan ai. Hpang de, Chyum ga sharin gaw, hkrung rawt ai lam hpe kam wa ai. Ya nga yang myit rawt ai Yehowa Sakse langai byin nga sai.

Shanhte Hpe Sape Byin Wa Na Masa Nga Ai Ni Hku Nna Mu Mada U

15. Kasa 17:16-18 hku nga yang moi Grik ni hta nga ai gara lam ni gaw Pawlu hpe mayak mahkak byin shangun chye ai kun? Raitim Ahten masha ni hpe shi hpa majaw asum n jaw wa ai kun?

15 Kasa 17:16-18 hpe hti u. Ahten mare hta gawngngu sumla, akyang hten ai lam hte shut shai ai myit mang hpaji ni hte hpring nga ai. Raitim, Pawlu gaw Ahten masha ni hpe asum n jaw wa ai sha n-ga, n-gawn nsawn di ai shaloi mung myit n daw wa ai. Pawlu gaw “shatan nhkan ai, zingri zingrat ai hte sheng mareng re ai wa” raitim, Hkristan langai byin wa ai. (1 Tm 1:13) Pawlu hpe sape byin wa na masa nga ai masha hku nna Yesu mu wa ai zawn, Pawlu mung Ahten masha ni hpe dai zawn mu mada ai. Shi dai hku mu ai gaw kam shut ai lam n re.​—Kas 9:13-15; 17:34.

16-17. Shingdu labau amyu myu nga ai masha ni gaw Hkristu a sape byin wa lu ai lam hpa gaw madun dan ai kun? Ga shadawn tsun dan u.

16 Tsaban langai hta, shingdu labau amyu myu nga ai masha ni gaw Yesu a sape byin wa ai. Grik mungdan Korinhtu mare hta nga ai Hkristan ni hpang de, Pawlu laika ka ai shaloi, nawku hpung masha nkau gaw lai wa sai aten hta tara tawt lai ai lam ni, ladu lai akyang hten ai lam ni galaw wa ai nga nna shi tsun ai. Ndai hku bai tsun ai: “Nanhte nkau mi gaw shing rai chyalu ni rai nga myit dai: rai ti mung, . . . kashin kamun kau ai” hkrum sai. (1 Ko 6:9-11) Dai zawn masha ni hpe galai shai nna sape byin wa na masa nga ai ni hku nna nang mu mada lu na kun?

17 Dai ni aten hta mung masha law law gaw Yesu a sape byin wa na matu sharawng awng let galai shai ma ai. Ga shadawn, Awstelia mungdan na laksan ningshawng nauna Yukina gaw Chyum Laika shiga hpe masha kadai raitim hkap la lu ai lam chye wa ai. Lani mi hta, hpaga galaw ai rung langai hta maksam htu da nna awung awang palawng hpun da ai numsha langai hpe shi sadi hkrup ai. Yukina ndai hku tsun ai: “Shawng nnan hta ngai loi mi htingnut mat ai. Raitim, shi hte ga shaga hpang ai. Shi gaw Chyum Laika hpe grai myit lawm nna, shi htu da ai maksam nkau mi gaw Shakawn Kungdawn Laika kaw nna Chyum daw re ai hpe chye dat ai.” Shi gaw Chyum Laika hkaja hpang nna zuphpawng ni lung hpang wa ai. *

18. Anhte gaw masha ni hpe hpa majaw n jeyang ging ai kun?

18 Hkauna hta mam ni “myin htoi nga ai” ngu nna Yesu mu mada ai gaw masha law malawng shi hpang hkan nang na nga nna myit mada ai majaw kun? N re ai. Masha loi mi sha shi hpe kamsham na nga nna Chyum Laika hta tau hkrau tsun da ai. (Yhn 12:37, 38) Bai nna, Yesu hta myit masin hpe chye lu ai atsam nga ai. (Mat 9:4) Raitim, shi hpe kamsham wa na masha loi mi hpe myit maju jung tim, yawng hpe myit rawt let hkaw tsun wa ai. Anhte gaw myit masin hpe n chye lu ai majaw, hkaw tsun lawk (sh) masha langai hpra hpe tara n jeyang ging ai. De a malai, sape byin wa na masa nga ai ni hku nna mu mada ra ai. Bukina Hpaso mungdan hta sasana magam gun nga ai hpunau Mak ndai hku tsun ai: “Rawt jat na ngu ngai shadu da ai ni gaw hkaja ai lam hpe jahkring kau ma ai. Raitim, nau n rawt jat ai ngu ngai shadu da ai ni gaw grai rawt jat wa ai. Yehowa a wenyi anhte hpe woi awn na matu ahkang jaw ai gaw kaja htum re ai hpe ngai sharin la lu ai.”

19. Anhte a hkaw tsun lawk na masha ni hpe gara hku mu mada ging ai kun?

19 Ntsa lam hku yu na nga yang, hkaw tsun lawk hta myin htoi nga ai mam hte bung ai masha law law n nga ai ngu myit chye ai. Sape ni hpe Yesu hpa tsun wa ai lam dum u. Hkauna hta dan na matu mam ni myin htoi nga sai. Masha ni gaw galai shai lu nna Hkristu a sape byin wa lu ai. Sape byin wa na masa nga ai ni hpe manu dan ai arai ni hku nna Yehowa mu mada ai. (Hag 2:7) Anhte gaw masha ni hpe Yehowa hte Yesu mu mada ai zawn mu ai nga yang, shanhte a shingdu labau hte myit lawm ai lam ni hpe chye hkra galaw na re. Shanhte hpe masha tsasam zawn n re ai sha, hpunau nauna byin wa na ni hku nna mu mada na re.

Mahkawn 57 Masha Amyu Yawng Hpe Hkaw Tsun

^ စာပိုဒ်၊ 5 Hkaw tsun lawk ntsa anhte a mu mada ai lam gaw, hkaw tsun ai hte sharin achyin ya ai lam hta gara hku akyu shabyin ya ai kun? Yesu hte kasa Pawlu gaw madat nga ai ni a makam masham, myit lawm ai lam hte sape byin wa na masa lam ni hpe myit ya ai. Anhte mung shan yan hpe gara hku kasi la mai na lam ndai sumhpa hta hkaja lu na re.

^ စာပိုဒ်၊ 17 Masha ni gaw galai shai lu ai lam hpe “Chyum Laika Gaw Prat Hpe Galai Shai Ya” ngu ai daw matut sumhpa ni gaw grau nna chye shangun ai. Dai sumhpa ni hpe 2017 du hkra Sin Langchyi hta mu lu ai. Ya gaw jw.org hta matut nna mara da ai. ကျွန်တော်တို့အကြောင်း > တွေ့ကြုံမှုများ hta yu u.

^ စာပိုဒ်၊ 57 SUMLA HPE HTAI DAN AI LAM: Yan la langai gaw nta langai hpang langai hkaw tsun sa ai shaloi, shan gaw (1) nampan ni hte shatsawm da ai nta; (2) ma kasha nga ai dinghku langai a nta; (3) shinggan hte nhku hta grai maza nga ai nta; (4) nawku htung nga ai nta ni hpe sadi hkrup ai. Sape byin wa na masa kadai hta grau nga ai kun?