1-2. Chuma muka pamo chalingishile Yesu ahanjike mazu ahali Yowano 4:35, 36?

OMU Yesu apwile nakuya kuNgalileya, awanyine mande amavulu. Pamo mande kana apwile ambale yauvisu. (Yowa. 4:3-6) Halwola kana pamo kwasalile tukweji vawana numba jize jimbuto jihyenga. Oloze Yesu ahanjikile chuma chimwe chize chapwile chaungeji kuvatu, ngwenyi: “Andulenu meso enu mutale mande, kaha namumona ngwenu anatomasana lyehi, anatemo kwaha.” (Tangenu Yowano 4:35, 36.) Uno alumbunwine ika?

² Pamo apwile nakuhanjika vyakwaha vatu. Chakutalilaho, numba tuhu vaYuleya kavalinwishilenga meya navaSamaliyako, oloze Yesu ambulilile pwevo wakaSamaliya, kaha amwivwililile. Halwola luze apwile nakuhanjika Yesu ngwenyi mande “anatomasana lyehi, anatemo kwaha,” lizavu lyavaSamaliya vaze vevwile vyuma avalwezele uze pwevo vapwile nakwiza kuli ikiye mangana avanangule vyavivulu. (Yowa. 4:9, 39-42) Mujimbu umwe wahanjika haMbimbiliya wamba ngwawo: “Muchima wakusaka kulinangula uze vapwile nawo, . . . wasolola nge vapwile ngana mwajimbuto jize jinatemo kwaha.”

3. Uno kumona vatu nganomu avamwenenga Yesu nachimikafwa ngachilihi omu namwambulula mujimbu?

³ Uno enu mwamona ngachilihi vatu vaze mweji kwambulilanga? Kutala mwavamona ngana mwajimbuto jize jinatemo kwaha tahi? Nge mukiko, kaha namulinga vyuma vino vitatu. Chatete, namuzata mulimo wakwambulula nakwanguhwa, mwomwo munatachikiza ngwenu lwola lwakwaha kalinwomu lukume. Chamuchivali, namuwahilila chikuma hakumona jila navakwilamo vatu kumujimbu wamwaza. Mbimbiliya ngwayo: “Vatu veji kuwahililanga halwola lwakwaha.” (Isa. 9:3) Chamuchitatu, namufwelela ngwenu navakiko vanahase kwalumuka  nakupwa tumbaji, ngocho namuhanjikanga vyuma vize vasaka mangana vetavile kuvambulila.

4. Vyuma muka alingile kaposetolo Paulu vize natushimutwila muchihande chino?

⁴ Yesu kamwenenga vaSamaliya ngwenyi kavatelemo kuvambulila, ngana muze pamo vavamwenenga tumbaji twenyiko. Oloze afwelelele ngwenyi navakiko vanahase kwalumuka nakupwa tumbaji. Nayetu nawa twatela kumonanga vatu vamungalila yetu ngwetu vanahase kwalumuka nakupwa tumbaji twaKulishitu. Omu mukiko alingile nakaposetolo Paulu, ngocho twatela kumulondezeza. Muchihande chino, natushimutwila omu (1) atachikijilenga vyuma vafwelelele, (2) vyuma vasakile (3) nomu amwenenga ngwenyi vanahase kwalumuka nakupwa tumbaji twaYesu.

5. Chuma muka chalingishile Paulu atachikize kanawa vatu vaze apwile nakwambulila musunangonga?

⁵ Kakavulu Paulu ambulwililenga mujisunangonga javaYuleya. Chakutalilaho, omu apwile musunangonga yamuTesolonyika, “hajisambata jitatu ashimutwilile kanawa [navaYuleya] haVisoneka.” (Vili. 17:1, 2) Pamo Paulu apwilenga wakukasunuka kwambulwila musunangonga, mwomwo apwile kaYuleya. (Vili. 26:4, 5) Hakuwana nge atachikijile kanawa vaYuleya, ngocho avambulililenga chakuhona woma.—Fwili. 3:4, 5.

6. Uno vatu vakuchilanjilo chamuAtene valihandunwine ngachilihi navaze ambulilile Paulu musunangonga?

⁶ Omu Paulu vamuhangile muTesolonyika namuMbeleya, ayile kuAtene. Kaha “engilile musunangonga nakuputuka kushimutwila kanawa navaYuleya navatu veka vaze valemeselenga Kalunga.” (Vili. 17:17) Numba tuhu nahalwola kana apwile nakwambulwila kuchilanjilo, oloze ambulililenga vatu veka. Ambulililenga vatu valinangula mangana autu navaka-mafuchi eka, vaze vamwenenga vyuma anangwilenga ngwavo, “kunangula chachihya.” Ngocho vamulwezele ngwavo: “Uli nakuhanjika vyuma vimwe vyaungeji kumatwitwi etu.”—Vili. 17:18-20.

7. Kweseka naVilinga 17:22, 23, uno Paulu alumwinenga ngachilihi jijila jakwambulwilamo?

⁷ Tangenu Vilinga 17:22, 23. Paulu kambulwile mujimbu kuli vaka-mafuchi eka muAtene mujila yoyimwe nayize ambulwilile vaYuleya musunangongako. Pamo alihulishile ngwenyi, ‘Uno ava vatu vamuAtene vafwelela vyuma muka?’ Chatete, akekesele kanawa ngalila nakutala visemwa vyamukwitava chavo. Chamuchivali, ambulwilenga muchano wamuVisoneka uze vafwelelele navakiko. Muka-kuhanjika havyaMbimbiliya umwe ambile ngwenyi: “Hakuwana nge Paulu apwile muka-Kulishitu wakaYuleya, ngocho amwene ngwenyi vaHelase kavalemeselenga  Kalunga kavaYuleya navaka-Kulishituko. Shikaho, esekele kukunyula vaka-Atene mangana vamone ngwavo Kalunga mwenyamujimbu uze apwile nakuvambulila, kapwile waungeji kuli vakikoko.” Paulu ambulilile vatu kweseka navyuma vapwile nakulinga. Avalwezele ngwenyi apwile nakuvambulila mujimbu wakufuma kuli “Kalunga Vazeneka Kutachikiza,” uze valemeselenga. Numba tuhu vaka-mafuchi eka kavatachikijile Visonekako, oloze avambulililenga mwomwo afwelelele ngwenyi vanahase kwalumuka nakupwa tumbaji. Avamwenenga ngana mwambuto jize jinatemo kwaha, ngocho alumwinengako jijila jakuvambulilamo.

8. (a) Chuma muka nachimikafwa mutachikize vyuma vafwelela vatu vamungalila yenu? (b) Namukumbulula ngachilihi mutu uze mwamba ngwenyi atwama nakwitava chenyi?

⁸ Londezezenunga Paulu, hakutalatalanga vyuma. Kekesenunga mumone vyuma vize navimikafwa mwijive vyuma vafwelela vatu vamungalila yenu. Chakutalilaho, uno hembo munayi hali nakusoloka ngachilihi? Kutala lijina lyamutu munawane, navwaliso nakulilenga chenyi, chipwe hanjikiso yenyi vinasolola nge apandama kuliuka limwe lyakwitava tahi? Pamo vanahase kumilweza hatoma ngwavo vatwama nakwitava chavo. Chakutalilaho, omu Flutura uze apwa payiniya wakulipwila eji kuwananga vatu vaze veji kwambanga ngwavo vatwama nakwitava chavo, ikiye eji kuvalwezanga ngwenyi: “Kangwejile nakumikanjikiza mwitavile vyuma ngwafwelelako, oloze nguneza ngushimutwile nenu hachihande chakwamba ngwavo . . . ”

9. Vihande vimwe muka munahase kuzachisa hakwambulila mutu uze apwa muka-kwitava?

⁹ Vihande muka munahase kushimutwila namutu uze apwa muka-kwitava? Shinganyekenu havyuma vize etavila ikiye, vize vyalifwana navize mwetavila yenu. Pamo eji kulemesanga Kalunga umwe kaha, nakufwelela ngwenyi Yesu apwa Mulwilo wavatu, chipwe pamo afwelela ngwenyi tuli nakuyoyela mulwola luze vinavulu chikuma vilinga vyavipi, kaha kalinwomu vikume. Ambulilenu mutu mujimbu wamuMbimbiliya mujila yize nayimukunyula hakuhanjika havyuma vize mwetavila muvosena.

10. Chuma muka twatela kufwila kulinga, kaha mwomwo ika?

¹⁰ Mwatela kutachikiza ngwenu vatu kavetavila vyuma vyosena veji kuvanangulanga mukwitava chavoko. Shikaho, numba nge munatachikiza lyehi liuka lyamutu, oloze mwatela kufwila kutachikiza nawa vyuma afwelela. David uze apwa payiniya wakulipwila muAustralia, ambile ngwenyi: “Vatu vavavulu makumbi ano veji kufutulanga vyuma vanangula mukwitava navishingayeka vyautu.” Kaha Donalta wamuAlbania ambile ngwenyi, “Vatu vamwe tweji kuwananga veji kwambanga ngwavo vatwama mukwitava, oloze mukuhita chalwola veji kwitavilanga hatoma ngwavo kavafwelela muli Kalungako.” Kaha ndumbwetu umwe walunga uze  apwa kamishonali muArgentina ahanjikile ngwenyi, vatu vamwe veji kwambanga ngwavo vafwelela mukunangula chatulunga vatatu, oloze pamo vafwelela ngwavo Tata naMwana nashipilitu yajila kavapwa Kalunga umweko. Ambile ngwenyi: “Kutachikiza chuma kana cheji kutukafwanga tushimutwile havyuma vize twetavila tuvosena.” Shikaho, fwilenunga kutachikiza vyuma vafwelela vatu. Kaha nayenu munahase kupwa “vyuma vyosena kuvatu vakulisezaseza vosena,” ngana mwaPaulu.—Koli. 1, 9:19-23.

11. Kweseka namazu ahali Vilinga 14:14-17, uno Paulu ambulilile ngachilihi vatu vamuLusutala nakuvakunyula?

¹¹ Tangenu Vilinga 14:14-17. Paulu amwenenga vyuma vazangilenga chikuma vatu, kaha alumwinengako jijila jakwambulwilamo kweseka navyuma kana. Chakutalilaho, vatu vaze ambulilile munganda yaLusutala kavatachikijile kanawa Visonekako. Ngocho Paulu ahanjikile navo mujila yize yavakafwile vevwishise kanawa. Ahanjikile hakwaha jimbuto namwakulivwishila kuwaha kuyoya. Azachishile nawa vyakutalilaho vize vevwishishile kanawa.

12. Uno munahase kutachikiza ngachilihi vyuma azanga mutu, nakwalumunako jila yakwambulwilamo kweseka navyuma kana?

¹² Mwatela kupwa vakuvanguluka numba mumonenga kanawa vyuma vazanga vatu vamungalila yenu, nakwalumunanga jila yakwambulwilamo kweseka navyuma kana. Uno munahase kutachikiza ngachilihi vyuma azanga mutu namuwana? Mwatela kutalatala nakukekesa vyuma. Pamo munahase kumuwana ali nakulima litepa, chipwe ali nakutanga, chipwe kuwahisa kinga chipwe kuzata kala mulimo. Nge chinahase, kaha munahase kuputuka kushimutwila nenyi havyuma ali nakulinga. (Yowa. 4:7) Nauvwalo wenyi nawa unahase kusolola omwo apwa, nalifuchi lyenyi, chipwe milimo azata chipwe lizavu lyavaka-kuhema azanga. Gustavo ambile ngwenyi, “Ngwashimutwilile namukweze umwe wamyaka yakusemuka 19 uze avwalile chikovelo chapwile namuvwimbimbi wamuka-kwimba umwe uze aya fuma. Ngwamuhulishile vyachikovelo avwalile, kaha angulwezele ovyo azangililile uze muka-kwimba. Kufumaho aputukile kulinangula Mbimbiliya, kaha apwa jino ndumbwetu.”

13. Uno munahase kuputuka ngachilihi chilongesa chaMbimbiliya mujila yize nayikunyula mutu?

 ¹³ Nge munakusaka kulweza mutu vyakulinangula Mbimbiliya, kaha mwatela kuhanjika nakukunyuka, nakumulweza omwo kulinangula Mbimbiliya nachimunganyalisa. (Yowa. 4:13-15) Chakutalilaho, ndumbwetu wapwevo Poppy awanyine pwevo umwe wakuwahilila, kaha uze pwevo amulwezele vengile muzuvo. Kahomu Poppy amwene lipapilo lyauze pwevo lyakushikola yahelu yaulongeshi, amulwezele ngwenyi nayetu nawa tweji kunangulanga vatu kukukunguluka nahachilongesa chaMbimbiliya. Uze pwevo etavilile chilongesa chaMbimbiliya, kaha lichako ayile kukukunguluka. Kufumaho omu hahichile makumbi amandende ayile nakukukunguluka chachihanda. Kaha vamumbapachishile omu mwahichile mwaka umwe. Shikaho, lihulisenu ngwenu: ‘Vyuma muka vazanga vatu ngunakuya nakuhilukilako? Uno ngwatela kuvalumbunwina omwo tweji kulinangula Mbimbiliya mujila yize nayivakunyula tahi?’

14. Vyuma muka mwatela kulinga hakuliwahisa kuya nakunangula mutu himutu?

¹⁴ Kachi nge munaputuka kunangula vatu Mbimbiliya, kaha mwatela kuwahisanga kanawa vyuma namukanangula mutu himutu nakwijiva kanawa visemwa vyavo navyuma vazanga. Omu namuwahisanga mwatela kusakulanga visoneka namukatanga, najivindiyo namukavatalisa, navyakutalilaho namukazachisa hakulumbununa muchano wamuMbimbiliya. Mwatela kulihulisa ngwenu, ‘Vyuma muka navikakunyula chilongesa chami nganji?’ (Vishi. 16:23) Mulifuchi lyaAlbania mwapwile pwevo uze alinangwilenga Mbimbiliya napayiniya walijina lyaFlora. Uze pwevo ahanjikile hatoma ngwenyi keshi kuketavila kunangula chakwamba ngwavo nakukapwa kusangukako. Ndumbwetu Flora kamukanjikijile etavile kunangula kanako. Ambile ngwenyi, “Ngwashinganyekele ngwami ou mutu atela kuvangila kutachikiza kanawa Kalunga uze ashika kusanguka.” Kahomu valinangwilenga, Flora ashindakanyinenga chikuma hazangi yaYehova, namangana enyi nangolo atwama najo. Mukuhita chalwola, uze pwevo afwelelele jino mukusanguka. Kaha oholyapwa apwa Chinjiho chaYehova watwima.

15. Kweseka naVilinga 17:16-18, vyuma muka valingilenga vatu vamuAtene vize vyevwishile Paulu kupihya, kaha mwomwo ika atwalililileho lika kuvanangula?

¹⁵ Tangenu Vilinga 17:16-18. Numba tuhu vatu vamunganda yaAtene valemeselenga makombelo, nakulinga ujila, nakufwelela mumangana autu, oloze Paulu kalitwaminyinyine kuvanangula chipwe kufutuka kumuchima mwomwo yakumutukanako. Shimbu kanda Paulu apwenga muka-Kulishitu, apwile ‘muka-kusaula, muka-kuyanjisa, kaha nawa muka-kasautu.’ (Chimo. 1, 1:13) Ngana muze Yesu amwene Paulu ngwenyi mwakapwa kambaji wamwenemwene, mukiko naPaulu amwene vatu vamuAtene.—Vili. 9:13-15; 17:34.

16-17. Unjiho muka wasolola nge kala mutu nahase kupwa kambaji? Hanenu chakutalilaho.

¹⁶ Mulikulukaji lyamyaka lyakulivanga, vatu vakuvisemwa vyakulisezaseza valumukilenga nakupwa tumbaji twaYesu. Omu Paulu asonekelele vaka-Kulishitu vamuKolinde ambile ngwenyi, vatu vamwe muchikungulwilo kana vapwilenga vihwanga, kaha veka vapwilenga navilinga vyeka vyavipi, shimbu kanda valinangule muchano. Kaha ambile ngwenyi: “Omu mukiko mumwapwilenga nayenu vamwe. Oloze vanamisanyisa lyehi nakumitomesa.” (Koli. 1, 6:9-11) Uno nge mwapwile yenu, kutala kachi mwavamwene ngwenu vatu kana vanahase kwalumuka nakupwa tumbaji tahi?

¹⁷ Makumbi ano, vatu vavavulu vali nakufwila kwalumunako vilinga vyavo mangana vapwenga tumbaji twaKulishitu. Chakutalilaho, ndumbwetu Yukina uze apwa payiniya wakulipwila muAustralia etavilile ngwenyi kala mutu nahase kwitavila mujimbu wamuMbimbiliya. Omu apwile kumilimo, amwene mwanapwevo umwe uze apwile najichato. Yukina ambile ngwenyi, “Ngwalishinjililile  kumuhanjikisa, oloze kutwala muze ngwamuhanjikishile. Omu twashimutwilile ngwawanyine jino nge uze mwanapwevo azangile chikuma kulinangula Mbimbiliya, kaha jichato jimwe apwile najo japwile jivesi jamumukanda waJisamu.” Uze pwevo aputukile kulinangula Mbimbiliya nakuyanga nawa kukukunguluka. *

18. Mwomwo ika katwatela kupopololanga vatuko?

¹⁸ Uno Yesu hakwamba ngwenyi mande anatomasana lyehi anatemo kwaha, apwile nakulumbununa ngwenyi vatu vavavulu navakapwa tumbaji twenyi tahi? Nduma. Mbimbiliya yahanjikilile lyehi chimweza ngwayo, vatu vavandende kaha vakiko navakamufwelela. (Yowa. 12:37, 38) Kaha nawa Yesu apwile nauhashi wakutachikiza vyuma vyapwilenga mumichima yavatu. (Mateu 9:4) Numba tuhu afwililile kukafwa kaha vatu vavandende vaze vamwitavilile, oloze atwalileho lika kwambulila vatu vosena natwima. Hakuwana nge etu katwatwama nauhashi wakutachikiza vyuma veji kushinganyekanga vatuko, ngocho katwatela kupopolola vatu vamungalila yetu chipwe vaze natuwanako. Oloze twatela kuvamonanga kupwa hivatu vaze vanahase kwalumuka nakupwa tumbaji. Marc uze apwa kamishonali muBurkina Faso ahanjikile ngwenyi: “Kakavulu vatu vaze ngweji kumonanga ngwami vanahase kuzovoloka veji kwechanga kulinangula. Oloze vaze ngweji kupopololanga vakiko veji kuzovolokanga kanawa. Ngocho ngwamona jino ngwami, chapwa chachilemu kwitavila shipilitu yaYehova yitutwaminyinenga.”

19. Uno twatela kumona ngachilihi vatu vamungalila yetu?

¹⁹ Shimbu jimwe munahase kumona ngwenu mungalila yenu kamweshi vatu vanafwane nge jimbuto jize jinatemo kwahako. Oloze mwatela kwanuka mazu ahanjikile Yesu kuli tumbaji twenyi ngwenyi, mande anatomasana lyehi, kulumbununa nge anatemo kwaha. Vatu vanahase kwalumuka nakupwa tumbaji twaKulishitu. Kaha Yehova eji kumonanga vatu kana kupwa “vyuma vyandando yayinene.” (Hangai 2:7) Shikaho, nge natumonanga vatu ngana muze avamona Yehova naYesu, kaha natufwilanga kutachikiza kanawa visemwa vyavo navyuma vazanga. Numba tuhu vanahase kupwa vangeji, oloze natuvamona kupwa vatu vaze vanahase kwalumuka nakupwa vandumbwetu.