1-2. Yesu watalishili mudihi chahosheliyi mazu ekala haYowanu 4:35, 36?

YESU wadiña nakuhita mumaha, hadaha mumaha abali yinakukeña kuha. (Yow. 4:3-6) Kunashali tukweji tuwana hakwila chilaaka chakwaañula iyi mbutu chishiki. Yesu wahosheli nsañu yakuhayamisha. Dichi wahosheli nindi: “Fumbulenu mesu enu kulonda mutali maha, chiyanatookashaniwu dehi to-o, anashiki dehi hampinji yakwaañula.” (Tañenu Yowanu 4:35, 36.) Watalishili mudihi?

² Hadaha Yesu wateneneña kwañula kwachifwikija, dikwila nawu antu. Shinshikenu chuma chamwekeni. Hela chakwila aYudeya adiña nakutiyañana wanyi nawaSamariya, Yesu washimwinini mumbanda kaSamariya nawa watiyilili. Kafwampi, hampinji yahosheleñayi Yesu hamaha “chiyanatookashaniwu dehi to-o, anashiki dehi hampinji yakwaañula,” aSamariya atiyili nsañu yahosheli mumbanda hadi Yesu enjileña nakumuwana kulonda adiziliku jajivulu. (Yow. 4:9, 39-42) Muntu wumu wahosha haBayibolu wahosheli haniyi nsañu nindi: “Mpwila yadiña nawantu . . . yamwekesheli nawu adiña neyi tidiku yinashiki dehi hampinji yakwaañula.”

3. Neyi mumonaña antu neyi chayimweneñayi Yesu, nzatilu yenu mumudimu wakushimwina yikwikala ñahi?

³ Indi enu mwayimonaña ñahi antu imwashimwinaña nsañu yayiwahi? Komana mwayimonaña neyi tidiku yinahi dehi yinashiki hakwañula? Neyi dichi mwayimonaña, kudi yuma yisatu yikufumamu: Chatachi, mukushimwinaña mukunyakashana. Mpinji yakwaañula yinakehi; bayi mulabaku. Chamuchiyedi, mukuzañalalaña neyi mumona antu chinakwitejawu nsañu yayiwahi. Bayibolu yahosha nayu: ‘Antu aluñaña hampinji yakwaañula.’ (Isa. 9:3) Chamuchisatu, mukumonaña muntu  wejima nenu nateli kwikala kambanji, dichi mukuhimpa njila yakuyishimwinamu kwesekeja nayuma yakeñawu.

4. Yumanyi yitukudizila kudi kapostolu Pawulu muchinu chibaaba?

⁴ Yesu watoñojokeli wanyi neyi chadi kutoñojoka akwakumulondela nindi aSamariya kwila ekala atumbanji nehi. Ilaña wayimweni nindi anateli kwikala atumbanji twindi. Ninetu twatela kumonaña antu itwashimwinaña netu anateli kwikala atumbanji twaKristu. Kapostolu Pawulu watushila chakutalilahu chachiwahi chitwatela kulondela. Yumanyi yitunateli kudizila kudi yena? Muchinu chibaaba tukuhanjeka (1) chelukiliyi yuma yakuhweleleliwu antu ashimwinineñayi, (2) chelukiliyi yuma yakeñeliwu nankashi (3) nichamweniyi nindi anateli kwikala atumbanji twaYesu.

5. Pawulu wamwekesheli ñahi nindi wayilukili antu ashimwinineñayi musinagogi?

⁵ Kakavulu Pawulu washimwinineña mumasinagogi awaYudeya. Chakutalilahu, musinagogi yamuTesalonika, “hadi sabata jisatu wahanjekeleña nawu kuzatisha Nsona.” (Yilw. 17:1, 2) Chinamwekani neyi Pawulu wadiña wakasunuka kushimwina musinagogi. Amukulishili neyi kaYudeya. (Yilw. 26:4, 5) Pawulu wayilukili aYudeya, nawa wayishimwinini mukukasunuka.—Fwi. 3:4, 5.

6. Indi antu ashimwininiyi Pawulu mumaluña akulandishila muAtenisi anambuki ñahi nawantu ashimwininiyi musinagogi?

⁶ Chelili Pawulu amufumishi muTesalonika nimuBereya kudi akwakumukabisha, wayili kuAtenisi. Cheñi, “watachikili kuhanjeka musinagogi nawaYudeya niantu amakwawu adifukwileña kudi Nzambi.” (Yilw. 17:17) Ilaña hampinji yashimwinineñayi kumaluña akulandishila, wadiña nawantu acheñi. Hakachi kawantiyilili jindi hadiña antu adiza maana awantu niakwaNyuza amweneña yuma yatañishileñayi nawu “ntañishilu yayiha.” Amwilili nawu: “Wunakutañisha yuma yitwabula kutiyahu dehi.”—Yilw. 17:18-20.

7. Kwesekeja naYilwilu 17:22, 23, Pawulu wahimpili ñahi njila yakushimwinamu?

⁷ Tañenu Yilwilu 17:22, 23. Pawulu hayishimwinini akwanyuza amuAtenisi neyi chayishimwininiyi aYudeya musinagogiku. Hadaha wadihwili nindi, ‘Yumanyi yakuhwelelawu awa antu amuAtenisi?’ Washinshikili chikupu yuma yadiñamu nawa wamweni tushidikilu twamunsakililu yawu. Kuhiñahu, Pawulu wasambilili kukeña yuma yakuhweleleliwu yamuNsona kuhiñahu dinu hakuyishimwina. Muntu wumu wahosha haBayibolu wahosheli  nindi: “Chineli wadiña mukwaKristu kaYudeya, welukili nindi aGriki asenji hiyadifukwileña kudi Nzambi ‘walala’ wawaYudeya nawa wawakwaKristuku, ilaña wesekeli kuyikwasha nindi Nzambi washimwinineñayi hiNzambi welukiliwu akwaAtenisi.” Dichi Pawulu wahimpili njila yakushimwinamu. Wayilejeli akwaAtenisi nindi nsañu yashimwineñayi yafumini kudi “Nzambi Wabula Kwilukewa” iyadifukwileñaku. Hela chakwila akwaNyuza adiña eluka wanyi Nsona, Pawulu halekeli kuyishimwinaku. Ilaña wayimweneña nindi adi neyi tidiku yinahi dehi yinashiki hakwañula nawa wahimpili njila yakuyishimwinamu nsañu yayiwahi.

8. (a) Chumanyi chinateli kuyikwasha kwiluka yuma yakuhwelelawu antu mwiluña denu? (b) Neyi muntu yahosha nindi wukweti nsakililu yindi, munateli kumwakula nenudi?

⁸ Kufwana Pawulu, shinshikenuña chidi yuma. Shinshikenuña yuma yinakumwekesha yuma yakuhwelelawu antu amwiluña denu dakushimwina. Shinshikenu mwini itala chinawahishiyi itala. Komana ijina dindi, yakuvwala, mmwekenu hela nhoshelu yindi yinakumwekesha yuma yamunsakililu yindi? Hadaha nayileji nindi wukweti nsakililu yindi. Neyi chumichi chimumwekena payiniya wadimena wejina daFlutura, wakulaña nindi: “Hinenzi nakuyikanjikija kukuhwelela yuma yinakuhwelelaku, ilaña inakukeña nami nihanjeki nenu haniwu mutu . . . ”

9. Yumanyi yimwakuhwelela yinateli kukuhwelelayi muntu wamunsakililu yacheñi?

⁹ Nsañwinyi yimunateli kuhanjeka namuntu wekala munsakililu? Ilukenu yuma yakuhwelelayi neyi diyi yimwakuhwelela. Hadaha wadifukulaña hohu kudi Nzambi wumu, hadaha wamwiluka Yesu nindi diyi Chamwinu chawantu ejima, indi kwiji wakuhwelela nindi tunakushakama mumafuku akukuminina. Zatishenu iyi yuma yimwakuhwelela nawa yakuhwelelayi kulonda muhanjeki nindi munjila yinateli kumusañumuna.

10. Yumanyi yitwatela kwila, nawa muloñadi?

¹⁰ Mwatela kwanuka nenu antu hiyanateli kukuhwelela yuma yejima yatañishañawu munsakililu yawuku. Neyi muneluki dehi nsakililu yindi, esekenuña kwiluka yuma yakuhwelelayi halwindi. David payiniya wadimena wakuAustralia wahosheli nindi, “Antu amavulu makonu abombaña maana awantu nayuma yakuhwelelawu munsakililu.” Donalta wakuAlbania wahosheli nindi, “Antu amakwawu itwawanaña ahoshaña nawu akweti nsakililu, ilaña mukuhita kwampinji ahoshaña nawu hiyamukuhwelela Nzambiku.” Nawa manakwetu mishonali wakuArgentina wamweni nindi amakwawu ahoshaña nawu akuhwelela mudi Anzambi aSatu,  ilaña hiyakuhwelela nawu Tata, Mwana nispiritu yajila hiNzambi wumuku. Wahosheli nindi, “Neyi niluka chumichi chankwashaña kwiluka yuma yakuhwelelayi muntu yinesekani nayinakuhwelela.” Dichi esekenuña kwiluka yuma yakuhwelelawu antu. Kufwana Pawulu munateli “kwikala yuma yejima kudi antu ejima.”—1 Kor. 9:19-23.

11. Kwesekeja naYilwilu 14:14-17, Pawulu washimwinini ñahi antu ashakamineña muLisitira munjila yayiwahi?

¹¹ Tañenu Yilwilu 14:14-17. Pawulu wamweneña yuma yakeñawu antu ashimwinineñayi, dichi niyena wahimpileña njila yakushimwinamu. Chakutalilahu, izaza dawantu dashimwininiyi muLisitira, dadiña deluka chanti hela dabula kwiluka Nsona. Dichi Pawulu wahanjekeli nawu munjila yakwila atweshi kutiya. Wahosheli hayilaaka yakwaañwilamu yakuda nihawuswa wakudiluñisha wumi. Wazatishili mazu niyakutalilahu yaletesheli antu ashimwinineñayi atiyishishi.

12. Munateli kwiluka ñahi yuma yakeñayi muntu nikuhimpa njila yenu yakushimwinamu?

¹² Zatishenuña kashinshi kulonda mwilukeña yuma yakeñawu antu mwiluña dimwashimwinaña nawa himpenu njila yakuyishimwinamu. Munateli kwiluka ñahi yuma yakeñayi muntu neyi munamuwani hela munashiki hetala dindi? Cheñi, shinshikenu yuma yinakwilayi. Hadaha nakudima, nakutaña, nakuloñesha nkinga hela tuhu yuma yikwawu. Neyi chinatwesheki, munateli kutachika kuhanjeka nindi kutalisha hayuma yinakwilayi. (Yow. 4:7) Mpinji yikwawu niyakuvwala yinavwaliyi muntu yamwekeshaña yuma yakeñayi, hadaha kwafumayi, mudimu wazatañayi hela izanvu dayisela dakeñayi. Gustavo wahosheli nindi: “Natachikili kuhanjeka namukwenzi weyala wayaaka 19 wavwalili chikovwelu hadiña mwevulu wañimbi waya mpuhu. Namwihwili kutalisha hachikovwelu chindi, dichi wanlejeli chamukeñelayi iwu ñimbi. Chafuminimu, natachikili kudiza nindi Bayibolu nawa chayinu mpinji himanakwetu.”

13. Munateli kuhanjeka ñahi namuntu chekala ntanjikilu yakudizisha Bayibolu munjila yikumusañumuna?

 ¹³ Neyi mutachika kudiza Bayibolu namuntu, hanjekenu nindi munjila yayiwahi yikumusañumuna; nawa mukwashenu yeluki kudiza chikunateli kumukwasha. (Yow. 4:13-15) Chakutalilahu, muhela Poppy amwiñijili mwitala kudi mumbanda wamwekesheli mpwila yakudiza. Muhela Poppy cheñililiyi mwitala wamweni satifiketi yadiña hambañu yamwekesheleña nawu iwu mumbanda wadiña wadiza chikupu jamashikola, dichi niyena wahosheli nindi ninetu twekala namudimu wakudizisha antu kuhitila muntanjikilu yakuyidizisha Bayibolu nikuhitila mukupompa. Iwu mumbanda wetejeli kudiza Bayibolu nawa ifuku dahiñilimu wayili nakupompa nawa wayili nikukupompa kwañinza. Chimwahitili chaaka, wapapatisheweli. Dichi dihulenu nenu: ‘Yumanyi yakeñawu antu inakafuntilaku? Komana nateli kulumbulula chekala ntanjikilu yetu yakudizisha antu Bayibolu munjila yikuyisañumuna?’

14. Munateli kuhimpa ñahi njila yakudizishilamu Bayibolu kudi kadizi hikadizi?

¹⁴ Neyi munatachiki dehi kudiza Bayibolu namuntu, loñeshenuña chiwahi kudiza hikudiza, toñojokenu hankulilu yindi niyuma yakeñayi. Neyi munakuloñesha, tondenu nsona jimukutaña, mavidiyo imukumutalisha niyakutalilahu yimukuzatisha hakumulumbulwila chalala chamuBayibolu. Dihulenu nenu, ‘Yumanyi yikumusañumuna nikumushika iwu kadizi hamuchima?’ (Yish. 16:23) Mumbanda wadizishileñawu kudi payiniya wejina daFlora muAlbania wahosheli nindi: “Nukwiteja wanyi ntañishilu yakwila nawu kwakela kusañuka.” Flora wamukanjikijili wanyi. Dichi walumbulwili nindi: “Hakusambila natoñojokeli nami watela ntahi kumwiluka Nzambi wakana nindi kwakekala kusañuka.” Kufuma hanidi ifuku neyi anakudiza, Flora wakonkomweneneña hakukeña kwaYehova, maana niñovu jindi. Nkuminaku, kadizi windi wakuhweleleli mukusañuka. Chayinu mpinji hiChinsahu chaYehova wadikita.

15. Kwesekeja naYilwilu 17:16-18, yilwilwinyi yadiña mwituña daGreece dakushankulu yamukabishileña Pawulu, nawa muloñadi chatwalekelelihu kuyishimwina antu amuAtenisi?

¹⁵ Tañenu Yilwilu 17:16-18. Pawulu walekeli wanyi kuyishimwina antu amuAtenisi hela chakwila musumba wawu wenzeli nawantu adifukwileña kudi ankishi, ayivumbi niantu adiña namaana awasenji; nawa hetejeli kasawuntu kawu kumulekesha kushimwinaku. Pawulu niyena wekalili mukwaKristu hela chakwila wadiña “mukwakusawula Nzambi nimukwakukabisha antu jindi nawa mukwakasawuntu.” (1 Tim. 1:13) Neyi chakuhweleleliyi Yesu nindi Pawulu nateli kwikala kambanji, Pawulu niyena wakuhweleleli nindi antu amuAtenisi anateli kwikala atumbanji. Yuma yakuhweleleliyi yazatikili.—Yilw. 9:13-15; 17:34.

16-17. Chumanyi chinakumwekesha nawu antu ejima anateli kwikala atumbanji twaKristu? Shimunenu chakutalilahu.

¹⁶ Mumafuku awapostolu, antu akuyitachi yashiyashana ekalili atumbanji twaYesu. Pawulu chayisonekeleliyi akwaKristu ashakamineña muKorinda mukanda, wahosheli nindi antu amakwawu muchipompelu adiña ambanji hela ayivumbi henohu kanda ekali akwaKristu. Nawa wabombelelihu nindi: “Enu amakwawu dichi chimwadiña. Ilana anayiweleshi nakuyitookesha.” (1 Kor. 6:9-11) Neyi mwadiñi enu mwadi kuyimona nenu awa antu akuhimpa nakwikala atumbanji?

¹⁷ Makonu, antu amavulu anakufwila kuhimpa kulonda ekali atumbanji twaYesu. Chakutalilahu muAustralia, payiniya wadimena  wejina daYukina wetejeli nindi antu ejima anateli kwiteja nsañu yamuBayibolu. Ifuku dimu, wamweni kansi wamumbanda wadiña wadisoneka navwali yakuvwala yamaneni. Wahosheli nindi: “Hakusambila najinokeli, ilaña nkumininaku natachikili kuhanjeka nindi. Nenjili nakwiluka nami wakeñeleña kudiza Bayibolu muloña nsona jimu jadisonekeliyi jadiña himavasi amuMasamu.” Iwu mumbanda watachikili kudiza Bayibolu nikwinza nakupompa. *

18. Muloñadi chitwatela kubula kudiwula antu kwesekeja nammwekenu yawu?

¹⁸ Komana Yesu wamweneña nindi maha anahi dehi nawa anashiki hampinji yakwaañula muloña wakwila watoñojokeleña nindi antu amavulu akumulondelaña? Inehi. Nsona yashimwineñahu dehi nawu antu antesha akamukuhwelela. (Yow. 12:37, 38) Nawa Yesu wadiña nañovu yakumona munyichima yawantu. (Mat. 9:4) Hela chochu, washili maana hadi awa antesha amukuhweleleli nawa washimwinini antu ejima. Ndochu etu twabula wuswa wakumona munyichima yawantu, tukudiwiladi antu ekala mwiluña detu dakushimwina? Dichi monenuña antu nenu anateli kwikala atumbanji. Marc mishonali wakuBurkina Faso, wahosheli nindi: “Antu inatoñojokaña nami anateli kupaminaku kakavulu alekaña kudiza. Ilaña inatoñojokaña nami anateli kupaminaku wanyi diwu apaminañaku. Dichi nadizi nami twatela kuleka spiritu yaYehova yitulomboleña.”

19. Twatela kumonaña ñahi antu ekala mwiluña detu dakushimwina?

¹⁹ Hakusambila munateli kumona nenu mwiluña denu dakushimwina mudi hohu antu antesha adi neyi tidiku yinahi dehi yinashiki hakwañula. Ilaña anukenuña mazu ahosheliyi Yesu kudi atumbanji twindi. Maha anatookashani, dikwila nawu anashiki dehi hakwañula. Antu anateli kuhimpa nakwikala atumbanji twaKristu. Yehova wayimonaña awa antu anateli kwikala atumbanji nindi ‘hiyuma yalema.’ (Hag. 2:7.NWT.) Neyi tumonaña antu neyi chayimonañayi Yehova niYesu, tukwiluka chidi chihandilu chawu niyuma yakeñeshawu. Chatela tuyimoneña netu anateli wanyi kuhimpa, ilaña tukuyimonaña netu anateli kwikala amanakwetu niahela.