1-2. Johana 4:35, 36-a Isua thusawi hian eng awmzia nge a neih?

ISUA chu thlawhhma kal tlangin a zin a, chutih hun lai chuan buhte chu seng a la hun lo a ni. (Joh. 4:3-6) Chûng buhte chu a hnu thla li vêlah chuan seng theih a ni ang. Isua chuan: “Dâk ulang lote en rawh u, tûn apangin seng tûrin a êng a ni,” tih thu dangdai tak mai hi a sawi a ni. (Johana 4:35, 36 chhiar rawh.) A sawi tum chu eng nge ni?

² Isua chuan entîr nei buh seng chungchâng a sawi a nih a rinawm. Chuta thilthleng chu han ngaihtuah teh. Juda mite chuan Samari mite chu an be ngai lo tlângpui a; mahse, Isua chuan Samari hmeichhe hnênah thu a hrilh a, ani chuan a lo ngaithla a ni. Dik tak chuan, Isua’n ‘seng tûra êng tawh’ thlawhhma chungchâng a sawi laiin, Samari hmeichhe hnên aṭanga Isua chanchin hretu chumi khuaa mite chuan hriat belh an duh avângin Isua hnênah an lo kal a. (Joh. 4:9, 39-42) Bible lama mi thiam pakhat chuan hemi chungchângah: “Mite phûrna chuan . . . anni chu seng hun tawh buh ang an ni tih a târ lang,” tiin a sawi.

3. Isua thlîr anga mite i thlîr chuan engtin nge thu hriltu ṭha lehzual i nih theih ang?

³ Chanchin ṭha i hrilh huna i thu ngaithlatute chunga i rilru put hmang chu eng nge ni ve? Anni chu seng hun tawh buh angin i thlîr em? I thlîr a nih chuan, hêng thil pathum hi a dik ang: Pakhatna, hmanhmawh lehzualna rilru put hmang neiin thu i hril ang. Buh seng hna chu hun bi ruat chhûnga thawh a ni a; hun khawhral theih a ni lo. Pahnihna, mite’n chanchin ṭha an chhâng lêt i hmuh hunah i hlim lehzual ang. Bible chuan: ‘Hnam chu buh seng laiin an hlim,’ tiin a sawi. (Is. 9:3) Pathumna, mi tin chu Isua zirtîr ni thei tûr anga i thlîr avângin, an ngaihven tûr zâwngin i thu hrilh dân i siamrem ang.

4. He thuziakah hian tirhkoh Paula hnên aṭangin eng nge kan zir ang?

 ⁴ Isua hnungzuitu ṭhenkhat chuan Samari mite chu Isua zirtîr ni thei tûr angin an thlîr lo mai thei; mahse, ani chuan chutiangin a thlîr lo. Chu aiin, a zirtîrte ni thei tûr angin a thlîr zâwk a ni. Keini pawh, kan rawngbâwlna biala mite chu Krista zirtîrte ni thei tûr angin kan thlîr a ngai a. Tirhkoh Paula chuan kan tân entawn tûr ṭha tak a siam a ni. A hnên aṭangin eng nge kan zir theih? He thuziakah hian, Paula’n (1) a thusawi ngaithlatute thurin chungchâng a hriat dân te, (2) an ngaihven zâwng a hriatthiam dân te, leh (3) Isua zirtîr ni thei tûr anga a thlîr dânte kan sawiho vang.

5. Engvângin nge Paula’n inkhâwmna ina a thu ngaithlatute chu a hriatthiam theih?

⁵ Paula chuan Judate inkhâwmna inah thu a hril fo va. Entîr nân, Thessalonika khuaa inkhâwmna inah, ‘Chawlhni vawi thum Pathian Lehkha Thu aṭangin [Judate chu] khûn takin a chhûtpui ṭhîn.’ (Tirh. 17:1, 2) Ani chuan inkhâwmna ina thu hrilh chu nuam a ti niin a lang. Paula chu Juda mi niin a seilian a. (Tirh. 26:4, 5) Juda mite chu a hriat chian êm avângin inrintâwkna neiin thu a hril thei a ni.—Phil. 3:4, 5.

6. Engtin nge Atheni khuaa dâwr hmuna mite chu inkhâwmna hmuna Paula thu ngaithlatute laka an danglam?

⁶ Tiduhdahtute’n Paula chu Thessalonika khua aṭang leh Beroia khua aṭanga an hnawhchhuah hnuah, Atheni khua a thleng a. Hetah pawh hian, “inkhâwmna inah Judate leh Pathian ngaihsakte a hnial ṭhîn a.” (Tirh. 17:17) Mahse, dâwr hmunahte thu a han hrilh chuan, a thu ngaithlatute chu Juda mite an ni tawh lo. Chûng mite zîngah chuan mi fingte leh a thu hrilh chu “zirtîrna thar” anga ngaitu Jentailte an tel a. Anni chuan Paula hnênah: “Thil mak eng emaw kan bengahte i rawn thlen a ni,” tiin an hrilh a ni.—Tirh. 17:18-20.

7. Tirhkohte 17:22, 23-a sawi angin, engtin nge Paula’n a thu hrilh dân a siamrem?

⁷ Tirhkohte 17:22, 23 chhiar rawh. Paula chuan a thuchah ken chu inkhâwmna ina Juda mite a hrilh dân angin Atheni khuaa Jentailte hnênah a hrilh lo. Ani chuan, ‘Atheni khuaa mite hian eng nge an rin?’ tiin a inzâwt mai thei. A chhehvêla thil awmte chu a chîk a, an sakhaw thiltih dânte chu a chhinchhiah a ni. Chumi hnuah, an sakhaw biak dân leh Pathian Thu-a thutak inanna laite chu a zawng a. Bible lama mi thiam pakhat chuan: “Juda Kristian a nih angin, Paula chuan milem Pathian betu Grik mite’n Judate leh Kristiante biak Pathian  ‘dik’ chu an be lo tih a hria a; mahse, a chanchin a puan Pathian chu, dik tak chuan, Atheni khuaa mite hriat ngai loh a ni lo tih târ lan a tum,” tiin a sawi. Chuvângin, Paula chuan a thusawi dân chu a siamrem a. A thuchah ken chu Atheni khuaa mite’n biak an tum reng ṭhin “Hriat Loh Pathian” hnên aṭanga lo kal a ni tih a hrilh a ni. Jentail mite chuan Pathian Lehkha Thu chu hre tlêm hle mah se, anni chu Kristian ni thei lo tûr angin a thlîr lo. Chu aiin, seng theih tawh buh êng tak angin a thlîr a, chanchin ṭha a hrilh dân chu a siamrem zâwk a ni.

8. (a) I rawngbâwlna biala mite sakhaw thurin chu engtin nge i hriat theih? (b) Miin sakhaw vawn a neih thu a hrilh che chuan engtin nge i chhân lêt theih?

⁸ Paula angin, thil chîk mi ni rawh. I rawngbâwlna biala mite thurinte chu chîk ṭhîn ang che. In neitu chuan a in emaw, a lîrthei emaw chu engtin nge a chei? A hming, a silhfên, a inchei dân, leh a ṭawngkamte aṭangin a sakhaw vawn a hriat theih em? A nih loh leh, sakhaw vawn a neih thu tlang takin a hrilh che pawh a ni thei bawk. Special pioneer unaunu Flutura-i’n chutiang dinhmun a tawh chuan, “Ka thurin hi rintîr che tuma lo kal ka ni lo va, hemi chungchâng . . . hrilh tûr chea lo kal ka ni,” tiin a sawi.

9. Sakhaw vawn nei tuemaw chu eng thu nge i sawipui theih?

⁹ Sakhaw vawn nei tuemaw chu eng chungchâng nge i sawipui theih? In sawi dun theih thute chu thlang ang che. Ani chuan Pathian pakhat chauh a biain, Isua chu mihringte Chhandamtu a ni tih a pawm mai thei a, a nih loh leh nakin lawka boral tûr suahsualna hunah kan awm tih a ring pawh a ni thei. In sawi dun theih thute ṭanchhanin, Bible thuchah chu a ngaihven theih tûr zâwngin hrilh ang che.

10. Eng tih nge kan tum ang a, engvângin nge?

¹⁰ Mite chuan an sakhaw zirtîrna zawng zawng chu an ring vek kher lo tih hre reng ang che. Chuvângin, a sakhaw vawn i hriat tawh chuan, a mi mal ngaih dân chu hriat tum ang che. Australia rama special pioneer David-a chuan: “Tûn laiah mi tam tak chuan an sakhaw thurin leh khawvêl finna an chawhpawlh a ni,” tiin a sawi. Albania rama unaunu Donalta-i chuan: “Kan mi tawh ṭhenkhat chuan sakhaw vawn an neih thu min hrilh a; mahse, Pathian an rin tak tak loh thu a hnuah an sawi a ni,” tiin a sawi. Argentina rama missionary nia rawngbâwl unaupa pakhat chuan mi ṭhenkhatin Trinity an rin thu sawi mah se, Pa leh Fapa, leh thlarau thianghlim chu Pathian pakhat angin an ring tak tak lo tih a hria. Ani chuan: “Chutianga hriatna chuan kan sawi dun theih thute hriat a tiawlsam  lehzual a ni,” tiin a sawi. Chuvângin, mite thurin dik tak chu hriat tum ang che. Chutianga i tih chuan, Paula angin, nang pawh “mi zawng zawng hnênah engkim” i ni thei ang.—1 Kor. 9:19-23.

11. Tirhkohte 14:14-17-a chhinchhiah angin, engtin nge Paula’n a thuchah ken chu Lustra khuaa a thu ngaithlatute ngaihven tûr zâwnga a sawi?

¹¹ Tirhkohte 14:14-17 chhiar rawh. Paula chuan a thu ngaithlatute ngaihven zâwng a hriat avângin a thusawi dân chu a siamrem a ni. Entîr nân, Lustra khuaa a thu ngaithlatute chuan Pathian Lehkha Thu chu an hre tlêm, a nih loh leh an hre lo hulhual a. Chuvângin, ani chuan an hriatthiam theih tûr zâwngin a chhûtpui a ni. Buh seng tûr tam tak a awm thu leh nun chu hlimpui theih a nih thute a sawi a. A thu ngaithlatute hriatthiam nghâl theih tûr ṭawngkamte leh entîrnate a hmang a ni.

12. Engtin nge mite ngaihven zâwng i hriat theih a, chumi mila i thusawi i siamrem theih?

¹² I rawngbâwlna biala mite ngaihven zâwngte hre tûrin hriatthiam theihna hmang la; tichuan, i thusawi chu siamrem ang che. Mite i pan hunah, a nih loh leh an ina i kal hunah engtin nge an ngaihven zâwng i hriat theih ang? Chutiang hunah pawh thil chîk mi ni ang che. Huan a siam emaw, lehkha a chhiar emaw, a lîrthei a siam emaw, thil dang engemaw a ti pawh a ni thei. A rem a nih chuan, in tîtînaah a thiltih chungchâng engvângin nge i telh loh vang? (Joh. 4:7) A kawr hâk chuan a hnam, a hnathawh, a nih loh leh a sports team duh ber a târ lang mai thei a. Unau Gustavo-a chuan: “A T-shirt-a zaithiam hmingthang tak lem chuang, kum 19 mi ka biak chuan chu kawr a hâk chhan ka zâwt a, chu zaithiam chu a duh hle tih min hrilh a ni. Chu kan tîtîna avângin, Bible zirna kan ṭan thei a, tûnah chuan ani chu kan unaupa a ni tawh,” tiin a sawi.

13. Engtin nge Bible zirna chu mite ngaihven tûr zâwnga i sawi hmuh theih?

¹³ Tuemaw chu Bible zirna neih a duh leh duh loh i zawh hunah, a pawm theih tûr zâwng leh a hlâwkpui dân tûrte hrilh ang  che. (Joh. 4:13-15) Entîr nân, unaunu Poppy-i chu rawngbâwlnaah ngaihvenna lantîrtu nu pakhatin a ina lêng tûrin a sâwm a. Unaunu Poppy-i’n chu nu chu zirna lama professor a ni tih târ langtu banga certificate intâr a hmuh chuan keini pawhin Bible zirna leh inkhâwmnate hmangin mite chu finna kan zirtîr tih a sawi uar a. Chu nu chuan Bible zirna neih chu a duh a, a tûkah ani chu inkhâwmnaah telin, a hnu rei vak lovah bial inkhâwmpuiah a tel bawk a ni. Kum khat a liam hnu chuan baptisma a chang ta a ni. Heti hian inzâwt rawh: ‘Ka tlawhkîrte ngaihven zâwng chu eng nge ni? Bible zirpuina kan neih dânte chu an pawm theih tûr zâwngin ka hrilh thei ang em?’ tiin.

14. I Bible zirpui tinte chu engtin nge i kaihhruai theih?

¹⁴ Bible zirna i ṭan tawh chuan, i Bible zirpuite ṭo bul leh an ngaihven zâwngte chu ngaihtuahin, a hrang ṭheuhvin inbuatsaih ang che. I inbuatsaih laiin, i Bible chhiar tûr te, i video chhuahsak tûr te, leh Bible thutak hrilhfiah nâna i hman tûr entîrnate chu thlang lâwk ang che. Tichuan, heti hian inzâwt rawh: ‘He ka Bible zirpui hian eng nge a ngaihven a, engin nge a thinlung khawih ber ang?’ tiin. (Thuf. 16:23) Albania rama pioneer unaunu Flora-i nêna Bible zir hmeichhe pakhat chuan, “Thawhlehna zirtîrna hi ka pawm thei lo,” a ti hlawl mai a. Flora-i chuan chumi thu chu pawm luihtîr a tum lo. Chu aiin, “Thawhlehna zirtîrna chu a pawm theih hmain, chumi tiamtu Pathian chu a hriat hmasak a ngai tih ka hria,” tiin a sawi. Chuta ṭang chuan Flora-i’n Bible zirna an neih apiangin Jehova hmangaihna te, finna te, leh thiltihtheihnate chu a sawi uar ta a. A hnuah, a Bible zirpui chuan thawhlehna chu a ring thei ta a. Tûnah chuan ani chu Jehova Thuhretu ṭhahnemngai tak a ni tawh a ni.

15. Tirhkohte 17:16-18-a sawi angin, hmân lai Grik rama eng nungchangte’n nge Paula tibuai a; mahse, ani chu Atheni khuaa mite chungah engvângin nge a beidawn loh?

¹⁵ Tirhkohte 17:16-18 chhiar rawh. Atheni khua chu milem biakna te, nungchang bawlhhlawhna te, leh milem pathian betute ngaih dânin khat mah se, Paula chuan chuta mite chu zirtîrte ni thei lo tûr angin a thlîr lo va, amah an hmuhsit avângin an chungah a beidawng hek lo. Paula ngei pawh “sawichhetu leh tiduhdahtu leh sawisatu” lo ni tawh ṭhîn mah se, Kristian a rawn ni ta a ni. (1 Tim. 1:12, 13) Isua’n Paula chu zirtîr ni thei tûr anga a thlîr angin, Paula pawhin Atheni khuaa mite chu chutiang chuan a thlîr a. A rin ang ngei chuan a thleng a ni.—Tirh. 9:13-15; 17:34.

16-17. Ṭo bul hrang hranga mite chu Krista zirtîr an rawn ni thei tih engin nge târ lang? Entîrna pe rawh.

¹⁶ Kum zabi khatnaah, ṭo bul hrang hranga mite chu Isua zirtîrte an rawn ni a. Paula’n Grik khawpui Korinth khuaa mite hnêna lehkha a thawn khân, chumi kohhrana mi ṭhenkhat chu nunrâwng takin emaw, nungchang bawlhhlawh takin emaw an lo nung tawh ṭhîn tih a sawi a. Chumi hnuah heti hian a sawi belh a ni: “Nangni ṭhenkhat chutiang mi in nih ṭhin kha; . . . tihthianghlim in ni tawh a,” tiin. (1 Kor. 6:9-11) Chutiang mite chu inthlâk danglamin, Krista zirtîrte an rawn ni thei tih i hmu tawh ngai em?

¹⁷ Tûn laiah, mi tam tak chuan Isua zirtîr ni tûrin inthlâk danglam an duh a. Entîr nân, Australia rama special pioneer unaunu Yukina-i chuan mi chi hrang hrangin Bible thuchah an chhâng lêt thei tih a hmu a ni. Ṭum khat chu, sumdâwnna hmunah a taksa tattoo-a khat, kawr thâwl tak ha hmeichhe tleirâwl pakhat a hmu a. Yukina-i chuan: “Atîr  chuan, ka pan hreh deuh hlek a; mahse, ka han be ṭan a. Bible ngaihven tak a ni tih leh a tattoo ṭhenkhat chu Bible-a Sâm thuziakte a lo ni reng mai!” tiin a sawi. Chu nu chuan Bible a zir ṭan a; inkhâwmahte pawh a tel a ni. *

18. Engvângin nge mite chungah ngaih dân kan siam nghâl mai loh vang?

¹⁸ Isua chuan mi tam takin a hnung an rawn zui ang tih a beisei avânga thlawhhmaa buhte chu seng hun tawh anga thlîr a ni em? Ni lo ve. Bible chuan mi tlêm tê chauhvin amah an ring ang tih a sawi lâwk a. (Joh. 12:37, 38) Chu bâkah, Isua chuan mite thinlung pawh a hre thei bawk. (Mt. 9:4) Chuti chung pawhin, ani chuan amah ringtu tûr mi tlêm tê chu ngaihven tlatin, mi tin hnênah ṭhahnemngai takin thu a hril a ni. Keini chuan thinlunga awmte kan hriat theih loh avângin, kan rawngbâwlna bial leh mite chungchângah ngaih dân kan siam nghâl mai tûr a va ni lo lehzual êm! Chu aiin, mite chu Isua zirtîr ni thei tûr angin kan thlîr zâwk tûr a ni. Burkina Faso rama awm missionary Marc-a chuan heti hian a sawi a ni: “Hmasâwn tûra ka ngaihte chuan Bible zirna chu an chawlhsan fo va. Chutih rualin, hmasâwn vak lo tûra ka ngaihte chuan hma an sâwn hle thung. Chuvângin, Jehova thlarau inkaihhruaitîr chu a ṭha zâwk tih ka hre ta a ni,” tiin.

19. Kan rawngbâwlna biala mite chu engtin nge kan thlîr ang?

¹⁹ Atîr chuan, rawngbâwlna biala seng hun tawh buh ang mite chu an tam lo niin a lang mai thei. Mahse, Isua’n a zirtîrte hnêna a sawi kha hre reng ang che. Lo chu a êng tawh a, chu chu seng hun a ni tawh tihna a ni. Mite chu an inthlâk danglam theiin, Krista zirtîrte an rawn ni thei a. Jehova chuan chutiang mite chu “thil duh zâwngte” angin a thlîr a ni. (Hag. 2:7) Chuvângin, mite chu Jehova leh Isua thlîr anga kan thlîr chuan, an ṭo bul leh an ngaihven zâwngte hriat kan tum ang a. Anni chu mi hrang ang ni lovin, kan unau rawn ni theite angin kan thlîr zâwk ang.