1-2. Dahaka dainai Iesu ese Ioane 4:35, 36 ena hereva e gwauraia?

IESU na uma badidia amo e hanai, reana bali e tubu matama ḡaudia badidia amo. (Ioa. 4:3-6) Bali na hua hani muridiai bae gogoa. To, Iesu ena hereva na idau, badina e gwa: “A gaga isi, uma ba ita, anidia vada e lo, iutuna negana heḡereḡerena.” (Ioane 4:35, 36 ba duahi.) Iena ena hereva anina be dahaka?

² Laulau dalanai, Iesu na taunimanima igogodia ḡaukarana e herevalaia. Mani una negai e vara ḡauna aita laloa. Ena be Iuda taudia ese Samaria taudia na asie hereva henidiava, to Iesu ese Samaria hahinena ta e hereva henia bona una hahine na e hakala. Momokani, Iesu ese “uma . . . anidia vada e lo” e herevalaiava lalonai, hahine ena amo Iesu sivaraina e kamonai Samaria taudia hutuma na ia dekena e laova ia bae hakala henia totona. (Ioa. 4:9, 39-42) Baibul e herevalaiamu bukana ta ese una sivarai na ini e gwauraia tomamu: “Taunimanima na Iesu ena hereva ikamonaina totona ia dekena ela haraḡa . . . karana ese e hahedinaraiamu idia na vada e lo uitina na heto.”

3. Iesu ese taunimanima e lalodia bamona bo lalodiamu neganai, emu haroro dalana be ede be hanamoa tomamu?

³ Sivarai namona o harorolaiamu lalonai o davaridiamu taudia be ede o lalodia tomamu? O laloamu idia be e lo uitidia bamona, a? Bema oibe, ini ḡau toi na be varamu. Ginigunana na, oi na bo uramu haroro ḡaukara na ba karaia haraḡa. Uit iutuna o taboro negana na kwadoḡi; anina na nega na basita haorea kava. Iharuana na, taunimanima ese sivarai namona be kamonaiamu neganai oi na bo moalemu. Baibul na e gwaumu, “taboro” neganai taunimanima na e moalemu. (Isa. 9:3) Bona ihatoina na, bo lalopararamu o davaridiamu taudia ta ta iboudiai na Iesu ena hahediba  ai baela diba dainai, emu haroro herevana lalonai idia ese e lalo badamu ḡaudia bo herevalaimu.

4. Ina atikol ai, aposetolo Paulo ena amo dahaka baita dibamu?

⁴ Iesu ena hahediba taudia haida na e laloava Samaria taudia na Iesu ena hahediba ai basiela diba, to Iesu na unu na se lalo toma. Ia na e laloava idia haida na iena hahediba ai baela diba. Ita danu namona na baita laloparara eda teritori ai e nohomu taudia danu Keriso ena hahediba ai baela diba. Aposetolo Paulo ese haheitalai namona e hahedinaraia ita ese baita tohotohoa totona. Ia amo dahaka baita dibamu? Ina atikol ai, baita herevalaimu ḡaudia na edena dalai Paulo (1) na e diba e haroro henidiava taudia be dahaka e abi daeva, (2) idia e lalo badava ḡaudia e lalopararalai (3) bona idia na Iesu ena hahediba ai baela diba.

5. Dahaka dainai dubu ai Paulo ese Iuda taudia na e lalopararalaidiava?

⁵ Nega momo Paulo na sinagoga o dubu ai e harorova. Heḡereḡere, Tesalonika ai Paulo na ‘Dina Helaḡa toi ai Buka Helaḡa na [Iuda taudia] ida e herevalaia.’ (Apos. 17:1, 2) Toana na Paulo na dubu ai e haroro neganai lalona na goada. Ia na Iuda tauna. (Apos. 26:4, 5) Paulo ese Iuda taudia na e lalopararalaidiava dainai mai ena lalogoada ida e haroro henidiava.​—⁠Flp. 3:4, 5.

6. Edena dalai Atena makedina ai Paulo ese e haroro henidia taudia na idau dubu ai e haroro henidia taudia amo?

⁶ Paulo na Tesalonika bona Berea ai daḡedaḡe taudia daidiai e heau bena Atena ela. Atena ai danu “ia na dubu ai Iuda taudia bona Dirava e toma henia diho taudia ida e herevaherevava.” (Apos. 17:17) To Paulo na makedi ai e harorova neganai, ma taunimanima haida e davaridia, to idia na dia Iuda taudia. Idia haida na aonega taudia, a haida be Idau Bese taudia bona idia ediai Paulo ena hereva na “hahediba matamatana.” Idia ese e hamaoroa, eto: “Emu hereva mamidia na idau.”​—Apos. 17:18-20.

7. Aposetolo Edia Kara 17:22, 23 heḡereḡerena Paulo ese ena haroro herevana be ede e haidaua toma?

⁷ Aposetolo Edia Kara 17:22, 23 ba duahi. Paulo ese Atena ai e nohova Idau Bese taudia e haroro henidia dalana na dia dubu ai Iuda taudia e haroro henidia dalana heḡereḡerena. Reana Paulo na sibona e henanadai, Atena taudia be dahaka e abi daemu? Ia ese edia gabu bona tomadiho ena kastom karadia e ita bona e haerodia. Bona Toretore Helaḡadia amo hereva momokani e herevalaia neganai, ia ese ena hereva ihamatamana totona, ia na idia ese e abi daeva ḡaudia e ḡaukaralaiva. Baibul e herevalaiamu  tauna ta na e gwaumu: “Ia [Paulo] na Iuda Kristen tauna ta dainai, ia na mai dibana dirava koikoidia e toma heni dihomu Grik taudia ese Iuda bona Kristen taudia edia Dirava ‘momokanina’ na asie toma henia dihomu, to ia na e ura baine hahedinaraia ia ese e herevalaia Diravana na Atena taudia ese bae dibaia diba.” Una dainai ta dibamu Paulo na kamonai taudia idurudia totona ena haroro dalana na e haidauava. Ia ese Atena taudia e hamaorodia ia ese e harorolaiava herevana na idia ese e urava bae toma henia diho Diravana, “ASI DIBADA DIRAVANA” ena amo. Ena be Idau Bese taudia na Toretore Helaḡadia na asi dibadia, to Paulo na se lalova idia na Kristen taudia ai basiela diba. Oibe ia na e laloava idia na vaitani e lo uitina na heto una dainai sivarai namona iherevalaina dalana na e haidauava.

8. (a) Emu teritori ai tomadiho taudia ese e abi daemu ḡaudia be ede ba dibadia toma? (b) Bema ta ese be hamaoromumu ia na mai ena tomadiho, oi be ede bo haere tomamu?

⁸ Paulo bamona, taunimanima edia gabu bona edia tomadiho ena kastom karadia baita ita bona baita haero. Emu teritori ai taunimanima ese e abi daemu ḡaudia ba diba totona oi bae durumu ḡaudia ba tahu. Ruma tauna ena motuka o ruma toana be ede bamona? Ia ladana, ena dabua, heḡoeva dalana, bona ena hereva ese e hahedinaraiamu ia be edena tomadiho? Reana ia ese maoromaoro be hamaoromumu ia na mai ena tomadiho. Una na spesel painia taihuna ta ladana Flutura, enai e varava neganai, ini e gwau tomava: “Lau nama na dia oi baina dorimu na abi daemu herevadia bavabi dae totona, to na uramu ina hereva namona ta baina gwauraia dainai nama.”

9. Tomadiho e laloa badamu tauna bona oi ese o abi daemu ḡaudia haida be dahaka?

⁹ Tomadiho e laloa badamu tauna ida be dahaka ba herevalai diba? Ia bona oi ese Baibul ai o abi daemu ḡaudia ba herevalai. Reana ia na Dirava tamona e toma henia dihomu, reana e abia daemu Iesu na taunimanima edia Hahemauri Tauna, eiava reana e abia daemu ita na kara dika e badamu negana ai ta nohomu bona una na kahirakahira be oremu. Umui raruosi ese o abi daemu ḡaudia heḡereḡeredia ai Baibul ba herevalaia, unu amo ia na be uramu baine kamonai.

10. Dahaka baita diba na namo, bona dahaka dainai?

¹⁰ Ba helalotao taunimanima na dia edia tomadiho ese e hahedibalaimu ḡaudia iboudiai e abi daemu. Ena be ta ena tomadiho na o dibaia, to namona na ia ese e abi daemu ḡaudia danu ba dibadia. Australia ai David, spesel painia ta na e gwaumu: “Hari momo na tanobada aonegana bona tomadiho edia hahediba herevadia e ḡaukaralai heboumu.” Bona Albania ai Donalta na e gwaumu: “A davaridiamu taudia haida na e gwaumu idia na mai edia tomadiho, to gabeai ma e gwaumu idia ese Dirava na se abia daemu.”  Argentina ai misinari tadikakana ta danu e gwaumu haida na e tomu toi tamona na e abia daemu, to idia na asie hamomokaniamu Tamana, Natuna bona lauma helaḡa na Dirava tamona. Ia na ini e gwau tomamu: “Una na dibaia dainai egu ai na haraḡa taunimanima ese e abi daemu ḡaudia baina dibadia totona.” Una dainai taunimanima ese e abi dae momokanimu ḡaudia ba dibadia toho. Bena, Paulo heḡereḡerena, oi na “taunimanima idau-idau iboudiai edia ḡau idau-idau iboudiai” baola diba.​—1 Kor. 9:19-23.

11. Aposetolo Edia Kara 14:14-17 heḡereḡerena, Lustera ai Paulo be edena dalai kamonai taudia bae laloparara diba dalanai e haroro?

¹¹ Aposetolo Edia Kara 14:14-17 ba duahi. Paulo na e hakala henia taudia ese e lalo bada ḡaudia na e lalodia bona unu heḡereḡeredia ai ena haroro herevana e haidaua. Heḡereḡere, Lustera ai e haroro henidia taudia haida edia diba Toretore Helaḡadia ai na dia bada a haida be asi dibadia. Una dainai Paulo na idia bae laloparara diba dalanai e haroro. Ia ese madinamo negadia bona mauri bae moalelaia diba karana e herevalaidia. Oibe, Paulo na kamonai taudia ese bae lalopararalai diba herevadia bona haheitalaidia e ḡaukaralai.

12. Edena dalai taunimanima ese e lalo badamu ḡaudia ba lalopararalai bona emu haroro herevana ba haidaua?

¹² Aonega ba ḡaukaralaia unu amo emu teritori ai e nohomu taudia ese e lalo badamu ḡaudia ba lalopararalai bona emu haroro herevana ba haidaua. Ta o uramu ba hereva henia, eiava iena ruma o raka heniamu, oi be edena dalai ia ese e lalo badamu ḡaudia bo dibamu? Paragraf 8 ai tame herevalaia heḡereḡerena, e karamu ḡaudia ba ita bona ba haerodia. Reana ia na uma ai e ḡaukaramu, buka ta e duahiamu, motuka e hanamoamu, eiava ma ḡaukara haida e karamu. Reana ia ese e karaiamu ḡaukarana amo emui herevahereva ba hamatamaia diba. (Ioa. 4:7) Ta ese e hahedokilaiamu dabuana ese be hahedinaraiamu ia be taunimanima ede bamona​—⁠reana iena gabu, ḡaukara, eiava iena sports team. Tadikaka Gustavo na e gwa: “Lau ese laḡanina 19 merona ta na hereva henia, ane abi tauna ta laulauna na ia ese e karaia siedina ai dainai lau ese  emai herevahereva na hamatamaia dalana na una siedi ai tau laulauna na henanadailaia, bena ia ese una ane abi tauna e hanamoamu badina e hamaorolaigu. Bena ia ida Baibul a stadilaia hebou, bona hari ia na iseda tadikaka ta.”

13. Baibul istadilaina dalana o uramu ba hahedinaraia neganai, dahaka ba kara?

¹³ Baibul istadilaina dalana o uramu ba hahedinaraia neganai, kamonai tauna lalona iverina bona ia baine durua dalanai ba herevalaia. (Ioa. 4:13-15) Taihu ta ladana Poppy na kamonai hahinena ta ese ena ruma ai e abia dae. Poppy ese setifikeit ta haba ai e itaia neganai e laloparara una hahine na edukeisin e stadilaia profesana ta, una dainai ena hereva lalonai e hahedinaraia ita danu edukeisin ḡaukarana ta ta karaiamu una na Baibul stadi bona hebou amo taunimanima ta hadibadiamu. Una hahine na stadi e abia dae bona murina dinanai hebou ela, bona se daudau eda sekit hebouhebouna ta ela. Laḡani ta murinai ia na e bapatiso. Sibomu ba henanadai: “Na lou henidiamu taudia be dahaka e lalo badamu?” Baibul istadilaina dalana na idia ese bae ura henia dalanai baina herevalaia diba, eiava?

14. Edena dalai stadi na stiuden ta ta bae durudia dalanai ba karaia?

¹⁴ Baibul stadi ta o hamatamaiamu murinai, emui stadi negadia ta ta totona hanaihanai ba heḡaeḡae guna, bona iena mauri dalana bona e lalo badamu ḡaudia danu ba lalodia. O heḡaeḡaemu neganai, Baibul ena hereva momokanidia ba hahedinarai namonamo totona, bo duahimu siridia, bo itamu vidiodia, bona bo ḡaukaralaimu haheitalaidia bavabi hidi guna. Sibomu ba henanadai, Dahaka ese stiuden tauna lalona be veriamu? (Her. 16:23) Albania ai hahine ta na painia taihuna ta ladana Flora ida e stadiva, una hahine na e gwa: “Lau ese toreisilou hahediba herevana na basina abia dae dibamu.” Flora ese una hahine na se doria una hahediba herevana baine abia dae totona. To ia na e gwa: “Na lalo, namona na ia ese toreisi lou e gwauhamatalaia Diravana baine dibaia guna.” Una nega amo, stadi negadiai Flora na Iehova ena lalokau, aonega bona siahu e herevalai loulouva. Gabeai una hahine na toreisi lou herevana e abia dae. Hari ia na Iehova ena Witnes taihu goadana ta.

15. Aposetolo Edia Kara 17:16-18 heḡereḡerena, idaunegai Greece ai, Paulo be dahaka ese bema hamanokaia diba, to dahaka dainai ia na Atena taudia daidiai se hesiku?

¹⁵ Aposetolo Edia Kara 17:16-18 ba duahi. Paulo na Atena taudia daidiai se hesiku, ena be Atena hanuana na kaivakuku itoma henina diho karana, matabodaḡa karadia, bona dirava asi dibadia taudia edia aonega herevadia amo e honu; bona ihadikana herevadia daidiai danu se lalomanoka. Ena be guna Paulo na e ‘ere dikava, e daḡedaḡeva, [Dirava] ladana e hadikaiava’ to gabeai Kristen tauna ta ai ela. (1 Tim. 1:13) Iesu na e lalo Paulo na hahediba ta ai bainela diba heḡereḡerena, Paulo danu Atena taudia na unu e lalodia toma. Bona ena lalohadai na e momokani.​—⁠Apos. 9:13-15; 17:34.

16-17. Dahaka ese e hahedinaraiamu taunimanima idauidau na Iesu ena hahediba ai baela diba? Haheitalai ta ba gwauraia.

¹⁶ Kristen ginigunadia edia negai, Iesu ena hahediba ai ela taudia edia mauri daladia na idauidau. Paulo ese Greece hanuana Korinto ai e nohova Kristen taudia e tore henidia neganai, ia na e gwa una kongrigeisin taudia haida na guna taravatu utu taudia bona edia mauri na dika herea. Bona ma e gwa: “Umui haida danu gunaguna unu heto; to vada e hurimui.” (1 Kor. 6:9-11) Oi be boma gwau diba idia na edia mauri bae haidau diba bona Iesu ena hahediba ai baela diba, a?

¹⁷ Hari ina negai, momo na e uramu edia mauri bae haidau Iesu ena hahediba ai baela totona.  Heḡereḡere, Australia ai, spesel painia ta ladana Yukina na e diba taunimanima idauidau na Baibul ena hereva bae abia dae diba. Dina ta ia na bisinesi gabuna ta ai bena hahine matamatana ta e itaia, tauanina ai na tatu haida bona e kara dabuadia na babada. Yukina na e gwa: “Matamanai na halahe, to gabeai na hereva henia. Bena laloparara ia na Baibul e laloa badava badina ena tatu haida na Salamo bukana ena siri haida amo e abi.” Una hahine na Baibul e stadilaia matama bona hebou danu ela. *

18. Dahaka dainai taunimanima na basita hahemaoro henidia?

¹⁸ O laloamu Iesu be e laloa taunimanima na bae kamonai diba badina e laloava momo ese ia na be badinaiamu, a? Lasi. Baibul ese e perovetalaia heḡereḡerena haida mo ia bae abidadama henia. (Ioa. 12:37, 38) Bona Iesu na edia lalohadai na mai dibana. (Mat. 9:4) To dounu ia na bae abia dae taudia e lalodia bona taunimanima iboudiai e haroro henidia. Ita na taunimanima kudoudia na asita itamu dainai namona na teritori ai e nohomu taudia o taunimanima ta na basita hahemaoro henia. To, namona na baita laloparara idia na Iesu ena hahediba ai baela diba. Burkina Faso ai, misinari tauna ta ladana Marc na e gwa: “Na laloamu bae goada taudia na nega momo edia stadi na e hadokomu. To na laloamu basie goada taudia ese edia stadi na e goadalaimu. Una dainai na lalopararamu Iehova ena lauma helaḡa ese baine hakauda na namo.”

19. Eda teritori ai e nohomu taudia be ede baita lalodia toma?

¹⁹ Reana matamanai, teritori ai e lo uit bamona taudia na dia momo. To namona na Iesu ese ena hahediba e hamaorodia herevana na ba laloatao. Uma anina na vada e lo, o heḡaeḡae baita gogoa totona. Taunimanima ese edia mauri na bae haidau diba bona Keriso ena hahediba ai baela diba. Iehova na e laloamu hahediba ai baela taudia na “taḡa” o kohu namodia ai baela diba taudia. (Hag. 2:7) Bema taunimanima na Iehova bona Iesu ese e lalodiamu heḡereḡerena baita lalodiamu, edia mauri daladia bona e lalo badamu ḡaudia na baita dibadiamu. Baita lalodia idia na tadikaka taihu ai baela diba.