1-2. Hadia geluaha wehede Yesu si so ba Yohane 4:35, 36?

ME IFALUA Yesu wofanö, itörö gotalua nowi safönu tanömö barli sawena tumbu. (Yoh. 4:3-6) Te awena tola mubasi danömö andrö ba zi öfa waŵa tö. Andrö wa tola manö ambö aboto ba dödö niha geluaha wehede Yesu, me imane, ”Mifaigi no aʼusö nowi ba tola mubasi.” (Baso Yohane 4:35, 36.) Hadia geluaha wehedenia andrö?

² Sindruhunia, famasi nitutunö Yesu manandrösa ia ba wamati, yaʼia daʼö ba wangowuloi niha enaʼö tobali nifahaʼönia. Angeragö hadia zalua fatua lö iwaʼö wehede daʼö Yesu. Awena sibai manuriaigö Yesu khö ndra alawe Zamaria, hewaʼae na si toʼölönia lö fariawö niha Yahudi ba niha Zamaria. Hizaʼi, omasi ndra alawe andrö ba wamondrondrongo Yesu! Sindruhunia, me fahuhuo Yesu sanandrösa ba nowi si no ’aʼusö ba tola mubasi’, ato niha Samaria zangondrasi Yesu ba lafahaʼö ira khönia, börö me no larongo sanandrösa khö Yesu moroi khö ndra alawe andrö. (Yoh. 4:9, 39-42) Imane sambua referensi Zura Niʼamoniʼö, ”Iʼanemaiʼö tohare ira ba wamalukhaisi Yesu ba lafondrondrongo ia. Daʼa zangoromaʼö wa yaʼira andrö hulö zinanö si no tola mubasi.”

3. Hana wa tola itugu sökhi wamaluamö halöwö fanuriaigö na öʼokhögö lala wangera-ngera Yesu ba wamaigi niha böʼö?

³ Hewisa wamaigimö niha nifalukhaisimö ba wanuriaigö? Hadia öwaʼö tödömö wa yaʼira andrö hulö zinanö si no tola mubasi? Na yaʼia, hasambalö öfalua zi tölu ngawalö andre. Si oföna, itugu mangaösö dödömö ba wamalua halöwö fanuriaigö. Tenga irugi zi lö aetu mufalua halöwö wamasi andre. Börö daʼö, lö tahorigö ginötöda ba zi lö moguna. Si dua, örasoi waʼomuso dödö na öʼila niha somasi manemaʼö turia somuso dödö. Iwaʼö Sura Niʼamoniʼö wa larasoi niha ”waʼomuso dödö ba wamasi”. (Yes. 9:3) Si tölu, so ba wangera-ngeramö wa tola tobali nifahaʼö Keriso fefu niha. Daʼö mbörö wa öfaudugö lalamö ba wamörögö fahuhuosa  khöra, enaʼö adöni dödöra ba wamondrondrongo.

4. Ba artikel daʼa, hadia wamahaʼö nihalöda khö zinenge sotöi Faulo?

⁴ Tola manö so ösa nifahaʼö Yesu zangumaʼö wa tebai tobali nifahaʼö Keriso niha Zamaria, hizaʼi tenga simane daʼö wangera-ngera Yesu. Ba wamaiginia, yaʼira andrö no niha sedöna tobali nifahaʼönia. Moguna göi so ba wangera-ngerada, wa niha si so ba nahia wanuriaigöda no niha sedöna tobali nifahaʼö Keriso. No iröi khöda duma-duma si sökhi Faulo sanandrösa ba daʼö. Ba wamahaʼö daʼa, tatutunö hewisa Waulo (1) ba wangalui hadia nifaduhusi tödö niha nifalukhaisinia ba wanuriaigö, (2) iforege enaʼö aboto ba dödönia hadia zomasi ira, ba (3) so ba gera-erania wa yaʼira andrö no niha sedöna tobali nifahaʼö Yesu.

5. Hana wa tola aboto ba dödö Waulo lala wangera-ngera niha si so ba nahia waʼowulo niha Yahudi?

⁵ Asese manuriagö Waulo ba nahia waʼowulo niha Yahudi. Duma-dumania, ba nahia waʼowulo si so ba Desalonika. ”Sagötö ba zi tölu ngaluo sabato, ihaogö wamatunö [ba niha Yahudi] enaʼö aboto ba dödöra hewisa moloʼö Buku Niʼamoniʼö.” (Hal. 17:1, 2) Börö me ba agama niha Yahudi teʼebuaʼö ia, tola manö lö khönia faʼaombö dödö me ilau manuriaigö ba nahia waʼowulo andrö. (Hal. 26:4, 5) Aboto ba dödönia lala wangera-ngera niha Yahudi, andrö wa lö aombö dödönia me manuriaigö ia khöra.​—Fil. 3:4, 5.

6. Hadia gamaehuta niha si so ba fasa ba mbanua Atena, ba niha si so ba nahia waʼowulo niha Yahudi?

⁶ Me no aefa lafakao Waulo ba lafofanö ia moroi ba Desalonika hegöi ba Mberea, ofeta ia ba Atena. Ba daʼö, ifuli zui ’ibörögö fahuhuo ba nahia waʼowulo, ba niha Yahudi hegöi niha böʼö samosumange Lowalangi’. (Hal. 17:17) Hizaʼi, me manuriagö Waulo ba fasa, tenga ba niha Yahudi manuriaigö ia. Ba daʼö, fahuhuo Waulo khö ndra filsuf hegöi ba Niha Baero. Moloʼö yaʼira, turia nifaʼema Waulo andrö no sambua ”wamahaʼö si bohou”. Lamane khönia, ”Öfatunö ngawalö zi lö irai marongo.”​—Hal. 17:18-20.

7. Moloʼö Halöwö Zinenge 17:22, 23, hewisa Waulo ba wamaudugö lalania ba wamörögö fahuhuosa me möi ia manuriaigö?

⁷ Baso Halöwö Zinenge 17:22, 23. Me manuriaigö ia ba Niha Baero si so ba Atena, lö iʼogunaʼö Faulo lala si fagölö simane me manuriaigö ia ba niha Yahudi. Tola manö isofu khönia samösa, ’Hadia nifaduhusi tödö niha si so ba Atena andre?’ Inehegö ngawalö zi so ba zi fasuinia hegöi lala wamosumange nifalua niha si so ba daʼö. Aefa daʼö, iforege ba wangalui hadia manö nifaduhusira tödö si fagölö ba zindruhu si so ba Zura Niʼamoniʼö.  Imane samösa komentator Zura Niʼamoniʼö, ”Börö me yaʼia andrö niha Keriso Yahudi, aboto ba dödönia wa lö lafosumange Lowalangi ’sindruhu’ ira niha Yunani, tenga simane niha Yahudi hegöi niha Keriso. Hizaʼi, iforege ba wangoromaʼö wa Lowalangi nituriaigönia khöra, tenga Lowalangi si lö irai lafosumange.” Iforege sibai Faulo enaʼö tefaudu lalania ba wamörögö fahuhuosa. Ifatunö ba niha Atena wa turia nifaʼemania andrö moroi khö ’Lowalangi si Lö Laʼila’, si no lafosumange iʼotarai mböröta. Hewaʼae na lö aboto ba dödöra nösi Zura Niʼamoniʼö, lö iwaʼö Faulo wa tebai tobali ira niha Keriso. Hizaʼi, ba wamaiginia yaʼira andrö hulö zinanö si no tola mubasi, ba ifaudugö lalania wamörögö fahuhuosa me manuriaigö ia khöra.

8. (a) Hadia zanolo yaʼugö enaʼö aboto ba dödömö agama niha si so ba nahiamö wanuriaigö? (b) Hadia wanema li nibeʼemö na so niha sangumaʼö wa no so agamania?

⁸ Simane Faulo, moguna önehegö hadia manö zi tola manolo yaʼugö enaʼö aboto ba dödömö hadia nifaduhusi tödö niha si so ba nahiamö wanuriaigö. Duma-dumania, tola önehegö hadia manö gama-gama si so ba nomora. Baero daʼö, tola öʼila hadia agama zi samösa niha moroi ba döinia, lala wonukhania, sikhala hegöi lagu wahuhuosania. Mazui tola manö iʼanemaiʼö ifatunö khömö zi samösa niha wa no so agamania. Si toʼölönia, na so zangumaʼö daʼa khö dalifusöda ira alawe sotöi Flutura si no tobali perintis istimewa, imane wanema li, ”Möi ndraʼaga ba daʼa, tenga ba wamaso yaʼugö ba woloʼö hadia nifaduhusima tödö, hizaʼi börö me omasiga maʼila mbua gera-eramö sanandrösa ba zi sambua tuho sadöni dödöda.”

9. Hadia manö waʼafagölö nisöndramö na manuriagö ndraʼugö ba niha si so agama?

⁹ Hadia duho si tola ötutunö ba niha si so agama? Moguna öʼalui hadia nifaduhusinia tödö si fagölö khöda. Tola manö ha samösa Lowalangi nifosumangenia, faduhu dödönia wa Yesu andrö Zangorifi niha gulidanö, mazui faduhu dödönia wa hasambalö muheta waʼalösökhi ba zi lö ara tö. Moroi ba waʼafagölö andrö, faʼema khönia duria si so ba Zura Niʼamoniʼö ba lala sadöni dödönia.

10. Hadia zinangea taforege, ba hadia mbörö?

¹⁰ Törö tödömö, tola manö lö ifaduhusi tödö fefu wamahaʼö ba agamania si samösa niha. Börö daʼö, hewaʼae na no öʼila hadia agamania, moguna öʼalui hadia zindruhunia nifaduhusinia tödö. Imane samösa perintis istimewa ba Australia sotöi David, ”Iadaʼa, asese lafaruka wamahaʼö ba agama faoma famahaʼö niha gulidanö.” Imane talifusöda ira alawe sotöi Donalta moroi ba Albania, ”So ösa niha nifalukhaisima sangumaʼö wa so agamara, hizaʼi ba gafuriata, lafatunö khöma wa lö faduhu dödöra wa so Lowalangi.” Imane samösa dalifusöda ira matua moroi ba Argentina si no tobali  utusan injil, ”So ösa niha sangumaʼö wa faduhu dödöra khö Lowalangi Sambua Tölu, hizaʼi sindruhunia, lö faduhu dödöra wa Ama, Ono, hegöi eheha niʼamoniʼö andrö, no Lowalangi si ha samösa.” Imane nasa, ”Na no taʼila daʼö, tola aoha khöda ba wangalui waʼafagölö.” Börö daʼö, forege ba wangalui hadia zindruhunia nifaduhusi tödö zi samösa niha. Na öfalua daʼö, tola öʼoʼö duma-duma nibeʼe Waulo, samalua ”gofu hewisa lala nitörö”.​—1 Kor. 9:19-23.

11. Simane nisura ba Halöwö Zinenge 14:14-17, hewisa Waulo ba wamaudugö lala wamörögö fahuhuosa ba niha si so ba Lisitera?

¹¹ Baso Halöwö Zinenge 14:14-17. Iforege Faulo ba wangalui hadia zadöni dödö niha nifalukhaisinia, ba ifaudugö ba daʼö lalania wamörögö fahuhuosa. Duma-dumania, me manuriaigö Waulo ba Lisitera, ambö aboto ba dödöra nösi Zura Niʼamoniʼö. Börö daʼö, ha si no aboto ba dödöra nitutunö Waulo, duma-dumania sanandrösa ba mbaŵa wamasi mazui ba wangokhögö faʼomuso dödö ba waʼauri. Iʼogunaʼö wehede hegöi duma-duma salio aboto ba dödö zamondrongo.

12. Hewisa lalamö enaʼö tola öʼila hadia zadöni dödö zi samösa niha ba tola öfaudugö duho nitutunömö?

¹² Forege ba wangiʼila hadia zadöni dödö niha si so ba nahiamö wanuriagö, ba faudugö duho nitutunömö. Hewisa lalamö enaʼö tola öʼila hadia zadöni dödö zi samösa niha me öʼondrasi ia mazui me möiʼö ba nomonia? Sakali tö, moguna önehegö ngawalö zi so ba zi fasuimö. Me tohare ndraʼugö, tola manö mohalöwö ia ba wondrorogö sinanönia, ibaso-baso mbuku, ihaogö moto mazui hondrania si no tekiko, mazui ba wamalua halöwö tanö böʼö. Na tefaudu, tola öbörögö wahuhuosa khönia sanandrösa ba halöwö nifaluania ba ginötö daʼö. (Yoh. 4:7) Moroi ba lala wonukha zi samösa niha, tola taʼila hezo moroi mbanuania, hadia halöwönia, mazui tim olahraga somasi ia. Itutunö samösa dalifusöda ira matua sotöi Gustavo, ”No irai ubörögö fahuhuo khö zi samösa nono matua si 19 fakhe, ba so gambara niha si tehöngö sonekhe manunö ba mbarunia. Me manofu ndraʼo khönia sanandrösa ba  niha sonekhe manunö andrö, itutunö khögu hadia mbörö wa omasi ia ba niha daʼö. Börö nifadunö-dunöma andrö, tola adöni dödönia ba wamahaʼö yaʼia ba Zura Niʼamoniʼo, ba iadaʼa no tobali ia talifusöda ba wamati.”

13. Hewisa lalamö enaʼö adöni dödö niha ba wanemaʼö famahaʼö ba Zura Niʼamoniʼö?

¹³ Na öfarou zi samösa niha enaʼö ifahaʼö ia ba Zura Niʼamoniʼö, ombakhaʼö khönia wa tola möi fanolonia wamahaʼö andrö. (Yoh. 4:13-15) Duma-dumania, so samösa ndra alawe sadöni tödö ba Zura Niʼamoniʼö, ikaoni dalifusöda Poppy weʼamöi ba nomonia. Ba nomo ndra alawe andrö, so zura nifalemba ba dowa, sangoromaʼö wa mohalöwö ia tobali samahaʼö ba zekola salawa. Me iʼila daʼö talifusöda Poppy, ifatunö khö ndra alawe andrö wa so göi lala wamahaʼö nifalua ndra Samaduhuʼö Yehowa, yaʼia daʼö famahaʼö ba Zura Niʼamoniʼö hegöi ba gangowuloa. Omasi ndra alawe daʼö ba wanemaʼö famahaʼö ba Zura Niʼamoniʼö, mahemolunia möi ia ba gangowuloa, ba lö ara aefa daʼö iʼondrasi kebaktian wilayah. Döfi aefa daʼö, tebayagö ia idanö. Sofu khöu samösa, ’Hadia zadöni dödö niha si no irai ufuli ufalukhaisi? Hadia no uʼogunaʼö lala si tefaudu irege adöni dödönia ba wamahaʼö ba Zura Niʼamoniʼö?’

14. Hewisa lalamö ba wamaudugö famahaʼö nifaʼemamö ba niha nifahaʼömö?

¹⁴ Na so niha sadöni tödö ba wamahaʼö yaʼira ba Zura Niʼamoniʼö, moguna öfaʼanö fefu wamahaʼö nidöniaʼömö. Angeragö waö-waö waʼauri hegöi zadöni dödö niha nifahaʼömö. Me öfaʼanö ndraʼugö, tatugöi hadia manö ayati nibasomö, video nifutamö, hegöi duma-duma niʼogunaʼömö ba wanutunö hadia nifahaʼö Zura Niʼamoniʼö. Sofu khöu samösa, ’Hadia zabölö adöni dödönia hegöi sabölö tofakha ba dödönia?’ (Gamd. 16:23) Ba Albania, so samösa ndra alawe nifahaʼö dalifusöda perintis sotöi Flora. Si fao faʼafaduhu dödö, imane ira alawe andrö, ”Lö fao dödögu ba wamahaʼö sanandrösa ba wanusugi.” Lö ifaso ia Flora, enaʼö iʼanemaiʼö ifaduhusi tödö wamahaʼö andrö. Imane Flora, ”Moloʼö yaʼo, enaʼö tola faduhu dödönia ba wanusugi, moguna ua aboto ba dödönia sanandrösa khö Lowalangi samabuʼu wa hasambalö tesusugi niha si no mate.” Iʼotarai daʼö, ero lafalua wamahaʼö, lö mamalö iʼombakhaʼö Flora sanandrösa ba waʼomasi, faʼatua-tua, hegöi faʼabölö Yehowa. Ba gafuriata, faduhu dödö niha nifahaʼönia andrö ba wanusugi. Iadaʼa, no tobali ia samösa Samaduhuʼö Yehowa sowölö-ölö.

15. Moloʼö Halöwö Zinenge 17:16-18, Hadia manö zi so ba Yunani si tobali fanaisi khö Waulo, ba hadia mbörö wa lö iböhöli wanuriaigö ba niha Atena?

¹⁵ Baso Halöwö Zinenge 17:16-18. Hewaʼae na ato zamalua famosumange adu, amuata fohorö, hegöi soloʼö famahaʼö niha gulidanö, lö iʼanemaiʼö iwaʼö Faulo wa tebai tobali nifahaʼö Keriso niha Atena. Lö iböhöli göi Faulo ba wanuriaigö khöra, hewaʼae na ato zangoʼaya yaʼia. Tola tobali niha Keriso Waulo hewaʼae na ba wamobörö yaʼia andrö niha ’sangoʼaya Lowalangi, samakao, ba si fayawa’. (1 Tim. 1:13) Faduhu dödö Yesu wa tola tobali nifahaʼönia Waulo. Andrö wa simane daʼö göi lala wangera-ngera Waulo ba niha si so ba Atena. Ba gafuriata, so ösa ba mbanua andrö zi tobali nifahaʼö Keriso.​—Hal. 9:13-15; 17:34.

16-17. Hewaʼae na faböʼö-böʼö waö-waö waʼauri zi samösa niha, hadia zangoromaʼö wa tola tobali ira nifahaʼö Keriso? Beʼe duma-duma.

¹⁶ Me abad siföföna, no faböʼö-böʼö waö-waö waʼauri niha si tobali nifahaʼö Keriso. Me isura Faulo zurania ba niha Keriso si toröi ba mbanua Gorindro si so ba Yunani, iwaʼö wa fatua lö tobali ira niha Keriso, so ösa ba gotaluara zamalua amuata si lö sökhi mazui si raʼiö. Aefa daʼö inönö wangumaʼö, ”So ba gotaluami me föna zamalua simane daʼö. Iadaʼa no tesasai ami.” (1 Kor. 6:9-11) Na auri ndraʼugö ba götö daʼö, hadia faduhu dödömö wa tola labulöʼö gamuatara ba tobali nifahaʼö Keriso?

 ¹⁷ Iadaʼa, ato niha somasi mamulöʼö amuatara enaʼö tobali nifahaʼö Keriso. Duma-dumania, nehegö zalua khö zi samösa dalifusöda ira alawe sotöi Yukina, si no tobali perintis istimewa ba Australia. Samuza maʼökhö, falukha ia khö ndra alawe sangokhögö tato, me so ia ba gödo zamawa properti. Imane Yukina, ”Ba wamobörö, aombö dödögu, hizaʼi ba gafuriata fahuhuo ndraʼo khönia. Awena uʼila wa adöni sibai dödönia ba Zura Niʼamoniʼö. Ba tatonia andrö, so ösa ayati moroi ba zura Zinunö!” Ibörögö ifahaʼö ia ira alawe daʼö ba Zura Niʼamoniʼö, ba möi ia ba gangowuloa. *

18. Hana wa tebai tahuku niha böʼö?

¹⁸ Me iwaʼö Yesu wa no tola mubasi nowi, hadia daʼö geluahania wa itötöna enaʼö ato niha soloʼö khönia? Tatu manö löʼö. Aboto ba dödö Yesu wa ato niha si lö mamati khönia, börö me no mufaʼeleʼö daʼö. (Yoh. 12:37, 38) Iʼokhögö göi Yesu waʼabölö ba wangiʼila nösi dödö niha. (Mat. 9:4) Hewaʼae simanö, lö mamalö iʼosambuaʼö dödönia ba wanolo niha somasi mamati khönia, ba ilau manuriaigö ba niha fefu, si fao faʼaterou dödö. Tebai taʼila nösi dödö niha. Andrö, lö omasi ita tahuku niha si so ba nahiada wanuriaigö. Hizaʼi, tawaʼö tödöda wa fefu niha no sedöna tobali nifahaʼö Keriso. Imane samösa utusan injil ba Burkina Faso sotöi Marc, ”Niha niwaʼögu tola tedou ba wamati, asese labato ba wahamaʼö yaʼira. Hizaʼi, niha niwaʼögu tebai tedou ba wamati, sökhi sibai waʼatedoura. Andrö, ufahaʼö ndraʼo wa abölö sökhi na taʼodaligö waʼabölö geheha niʼamoniʼö moroi khö Yehowa ba wameʼe khöda fanuturu lala.”

19. Hewisa zinangeania ba wamaigida niha si so ba nahiada wanuriaigö?

¹⁹ Ba wamobörö, te öwaʼö tödöu wa ha maʼifu niha si no tola mubasi ba nahiamö wanuriaigö. Hizaʼi, törö tödöu wehede Yesu khö ndra nifahaʼönia. Mifaigi, no aʼusö nowi ba tola mubasi. Tola tebulö lala waʼauri zi samösa niha ba tobali nifahaʼö Keriso. Ba wamaigi Yehowa, niha sedöna tobali nifahaʼö Keriso no simane ”anaʼa”. (Hag. 2:7) Na taʼokhögö lala wangera-ngera Yehowa hegöi Yesu, tola aboto ba dödöda waö-waö waʼaurira hegöi sadöni dödöra. Enaʼö ba wamaigida, yaʼira andrö tenga niha sawena taʼila, hizaʼi niha sedöna tobali talifusöda.