1-2. E na anua Jizɔs bee kɔ pya ue a le bu kpa Jɔn 4:35, 36 a?

JIZƆS ebee kia tɛɛ̄ kɛ̄ ba foh nu, sa a ebee muɛ̄ nage kpakpaa a gaa nyim aakɛ̄. (Jɔn 4:3-6) Siga nia enɔɔ̄ lɛɛ nu alu efoh ama lee egbī aā wii. Jizɔs kɔ nu a dap lu nyɛŋia loo pya nɛɛ sɔ̄ a kɔ: “Danaa bui dɛɛ̄ nɛ nyɔɔ, ɛbaa wii, kɔmɛ ba e’ɛɛra anyaawo lo esu nu a wa le bu.” (Buū Jɔn 4:35, 36.) E na a gaa bee kɔ a?

² Nu Jizɔs gaa bee kɔ na bɔŋɛnɛloo pya nɛɛ, e a naale nu alu efoh wii. Naa kɛɛrɛ nu a ebee sira. Kere pya Juu naa wee ɛrɛ lɔgɔ nu enyɔɔnɛ pya Sameria dania, Jizɔs bee zue ue nɛ wa Sameria, e a gbaɛ̄ ye tɔ̄! Bu kaka, sɔ̄ Jizɔs gaa bee kɔ nu akiiloo wii a e “e’ɛɛra lo esu nu a le bu,” eku pya Sameria ba bee dā nu a ye kiiloo aānu lo wa a bee zue ue nɛ a, gaa bee lu wee nɔnu ye e aābah. (Jɔn 4:9, 39-42) Ziī nɛɛ a wee kɔ nu akiiloo Baibol bee kɔ: “Taɛ pya nɛɛ ama ɛrɛ lo elu wee gbaɛ̄tɔ̄ Jizɔs tɔgɛ kɔ ba bee le doodoo kpakpaa eleera efii aā wii.”

3. Lo o ɛp pya nɛɛ dookɛ̄ Jizɔs bee wa ɛp doo, o zue ue edɔbiī wa nɛ doodoo wa?

³ E kiiloo pya nɛɛ o zue ue nɛ ni ā? O ɛpge wa doodoo kpakpaa eleera efii aā wii ni? Lo a le wo, taa nu ama etɔgɛ kɔ lo ama lu kaka. Tuatua, o su tam zue ue nua kirikiri. Gbī nu aā wii naa wee aadee su sɔ̄; naa lee epee sɔ̄. Eree baɛ, bu a e ɛɛ sɔ̄ o muɛ̄ kɛ̄ pya nɛɛ gbaɛ̄tɔ̄ le yereue doo. Baibol kɔ: Pya nɛɛ “ɛɛŋa bu sɔ̄ etup mum.” (Ais 9:3) E lo eree taa, o ɛp ziī ziī nɛɛ nua nɛɛ edap nyɔɔnɛ dumɛ Jizɔs, nyɔɔwo o kwabaloo o sīdee zue ue kɔ a dana taɛ.

4. Bu ekobee ue ama, e na i gaa le nɔ aāloo nɛɛ lɛɛratam Pɔɔl a?

 ⁴ Jizɔs naa bee ɛp pya Sameria kumakɛ̄ dookɛ̄ pya a wee ye nyɔɔnɛ dumɛ bee doo. Taāwo, a bee wa ɛp nua pya nɛɛ edap ye nyɔɔnɛ dumɛ. Ili dap nage ɛp pya nɛɛ a le i kɛ̄ zue ue nua pya nɛɛ edap nyɔɔnɛ dumɛ Jizɔs. Nɛɛ lɛɛratam Pɔɔl bee sere gbɛnɛ le edoba kɛ̄ i nɛ. E na i ye dap nɔ aāloo a? Bu ekobee ue ama, i gaa le nɔ sīdee a bee (1) suā nu pya nɛɛ a zue ue nɛ yiga, (2) dābeeloo nu ba ɛrɛ taɛ bu, le (3) wa ɛp nua pya nɛɛ enyɔɔnɛ dumɛ Jizɔs.

5. E na anua Pɔɔl bee dap dābeeloo pya a bee ye gbaɛ̄tɔ̄ bie bu tɔkaɛ a?

⁵ Gbɛnɛkpo sɔ̄, Pɔɔl wee zue ue nɛ pya Juu bie bu tɔkaɛ. Bu edoba, bie bu tɔkaɛ li Tɛsalɔnaika a bee ‘nyɔɔnɛ pya Juu ɛrɛ ekɛɛrɛ nyɔɔ nu a le bu Kpa Kaɛ nyɔɔ taa dee fɛɛrɛloo.’ (Doonu pya Nɛɛ lɛɛratam 17:1, 2) Naa daba, loo Pɔɔl wee sukɛ̄ sɔ̄ a le tɔkaɛ. A bee lu ekpɔā ye aākɛ̄ doodoo nɛɛ Juu. (Doonu pya Nɛɛ lɛɛratam 26:4, 5) Pɔɔl wee nyɔɔnɛ pya Juu danianu, nyɔɔwo, a bee wa dap su e’agaloo zuema ue nɛ.—Fil 3:4, 5.

6. Bu mɛ sīdee na pya a bee le kɛ̄du bie Atɛns lu kee loo pya nɛɛ Pɔɔl bee zue ue nɛ bie tɔkaɛ a?

⁶ Sɔ̄ pya gbanasī ekpoa Pɔɔl lɛɛ Tɛsalɔnaika le Beroea, a bee kii Atɛns. Dɔɔ̄na sɔ̄, ‘a bee nyɔɔnɛ pya Juu le pya a ɛrɛ enwadɛɛ̄ loo Bari ɛrɛ ekɛɛrɛ bie bu tɔ bɔŋanaloo.’ (Doonu pya Nɛɛ lɛɛratam 17:17) Mɛ sɔ̄ a gaa zue ue bie kɛ̄du, a bee zɔ̄ŋia pya a aa keekee kɛ̄. Pio pya a bee zue ue nɛ na pya gbɛnɛ suānu le pya dɔɔ̄na buɛ̄ lo ba bee ɛp yereue Pɔɔl nua “aā tɔgɛnu.” Ba bee ye kɔ nɛ kɔ: “O su pio nu a lu aā i nua bu tɔ̄.”—Doonu pya Nɛɛ lɛɛratam 17:18-20.

7. Dookɛ̄ kpa Doonu pya Nɛɛ lɛɛratam 17:22, 23 kɔ doo, bu mɛ sīdee na Pɔɔl bee kwabaloo kɛ̄ a zue ue doo a?

⁷ Buū Doonu pya Nɛɛ lɛɛratam 17:22, 23. Pɔɔl naa bee su aba sīdee a bee zuema ue nɛ pya dɔɔ̄na buɛ̄ a bee le Atɛns a, zuema nage ue nɛ pya Juu a bee le bu tɔkaɛ. Naa daba Pɔɔl bee bip aba ɛɛ kɔ, ‘E na pya a le Atɛns yiga a?’ A bee ɛp pya nu a ye tɛɛ̄ ɛŋɛnɛ sa suā kɛ̄ sīdee doonu pya nɛɛ wee mɛā doo. Lo dɔɔna, Pɔɔl bee su nu pya nɛɛ ama yiga le kaka ue a aabu Kpa Kaɛ wa kɔāue nɛ. Ziī nɛɛ a wee kɔ ue akiiloo Baibol bee kɔ: “Doodoo Nɛɛ Kraist alu Juu, Pɔɔl bee suā kɔ pya  Grik a dee kere naa wee taāŋabah ‘kaka’ Bari pya Juu le pya Nɛɛ Kraist, mɛ a bee piiga lo etɔgɛ wa kɔ Bari a gaa kɔe nu akiiloo lu kaka sa naa lu aā nu loo pya a le Atɛns.” Nyɔɔwo, Pɔɔl bee kpɛ̄naloo ekwabaloo ye ekɔaue. A bee kɔ nɛ pya a le Atɛns kɔ ye yereue aabah “Bari A Naa Lu Esuāloo,” lo ba kɔ ba gaa taāŋaebah. Kere adoo pya Dɔɔ̄na Buɛ̄ naa bee suā nu a le bu Kpa Kaɛ, Pɔɔl naa bee kɛɛrɛ kɔ ba naale edap lu pya a nyɔɔnɛ dumɛ Kraist. Taāwo, a bee wa ɛp doodoo kpakpaa eleera efii aā wii, e a bee kwabaloo sīdee a wa zuema le yereue nɛ.

8. (a) E na edap a yerebah nɛ kɔ o suā nu pya nɛɛ a le o kɛ̄ zue ue yiga a? (b) Lo ziī nɛɛ kɔ a ɛrɛ tɔbari a wee sie, o agara ue ye nɛ doodoo wa?

⁸ Doodoo Pɔɔl, lu nɛɛ a para ɛp nu. Yere nukuādɛɛ̄ loo pya nu a tɔgɛ nu pya nɛɛ a le o kɛ̄ zue ue yiga. Lo tɛ ɛrɛ tɔ sere ye be ale ye fah doodoo wa? Ekɔ ye bee, nu a yaa, kɛ̄ a kwaaloo doo, le kɛ̄ a kɔ ue doo tɔgɛ tɔbari a wee si ni? Naa daba ekɔa a nɛ kɔ a ɛrɛ tɔbari a wee sie. Sɔ̄ lo ama bee sira loo wuga Flutura a gaa sɛmdee bu keebee sīdee, a bee agara kɔ, “Mm bee lu wee su bah ekpo a e’aā kɔ o yiga nu m yiga, mɛ m bee lu wee nyɔɔnɛ a kɔnia ue nyɔɔ ekobee ue a kɔ . . . ”

9. Pio e na i dap yira nyɔɔ kɔ ue nɛ nɛɛ a kɔ a wee sie tɔbari a?

⁹ Amunu ekobee ue na o dap nyɔɔnɛ nɛɛ a wee si tɔbari kɔnia a? Gbī nu o dap bɔātɛ̄ o ekɔaue aāloo. A dap taāŋabah aba ziī ka Bari, a dap suā kɔ Jizɔs na alu Nɛɛ a Kpɔā pya nɛɛ a, ale bee a dap nage yiga kɔ i gaa tɔɔ̄dum pɔrɔ sɔ̄ le kɔ nyɔuwe ama esaa e’ina kuma. Su pya nu a yiga a bɔloo ama ye nyɔɔnɛ bɔātɛ̄ kɔnia ue aābu Baibol bu sīdee edana ye taɛ.

10. E na i piiga lo edoo a, e e na anua a?

¹⁰ Suā leere kɔ pya nɛɛ naa wee yiga dɛ̄dɛɛ̄ nu pya wa tɔbari tɔgɛ. Nyɔɔwo, kere o esuā tɔbari lo nɛɛ wee si, piiga lo esuā taɛ nu alɛ yiga. David alu wuga a le bu keebee tam sɛmdee bie Australia bee kɔ, “Gbɛnɛ-edo nɛɛ esua suānu miɔŋɔ nɛɛ gwa yɛɛ wa yigabari.” Donalta a le Albania bee kɔ, “Pio pya i zɔ̄ŋia kɔ ba wee sie tɔbari, mɛ ba sikɛ̄ kɔ ba naa yigae kɔ Bari le.” E ziī wuga nɛɛdam a wee zue ue aā ziī edo yii ziī bie Argentina yere nukuādɛɛ̄ loo kɔ pio nɛɛ kɔ ba yigae bu Taa Ka Bari bu ziī, mɛ a dap lu kɔ ba naa yiga kɔ Tɛ, Nwiīnɛɛdam, le kaɛ edɔɔ̄ lu ziī ka Bari. A bee sikɛ̄ kɔ, “Susuā kɔ nɛɛ m gaa kɔ ue nɛ naa yiga dɛ̄dɛɛ̄ nu pya wa tɔbari tɔgɛ doo kɔ m muɛ̄ pya nu m dap  yira nyɔɔ ye kɔ ue nɛ.” Nyɔɔwo, piiga lo esuā taɛ nu pya nɛɛ yiga. Lo sɔ̄, o dap “lu dɛ̄dɛɛ̄ nu loo dɛ̄dɛɛ̄ nɛɛ” doodoo Pɔɔl.—1 Kɔr 9:19-23.

11. Dookɛ̄ kpa Doonu pya Nɛɛ lɛɛratam 14:14-17 kɔ doo, Pɔɔl bee kɔ ue bu sīdee edana taɛ pya nɛɛ a gaa bee kɔ ue nɛ li Listra doodoo wa?

¹¹ Buū Doonu pya Nɛɛ lɛɛratam 14:14-17. Pɔɔl bee suā nu pya a gaa bee kɔ ue nɛ ɛrɛ taɛ bu, sa a bee kwabaloo ye ekɔaue kɔ a gbaaloo. Bu edoba, pya eku nɛɛ a bee kɔ ue nɛ bie Listra bee dap suā pio nu a le bu Kpa Kaɛ ale ba naa bee suā. Nyɔɔwo, Pɔɔl bee wa kɔ ue nɛ bu sīdee ba edābeeloo. A bee kɔ nu akiiloo kɛ̄ gbī nu aā wii dɔbiī doo le kɛ̄ e doodoo ɛrɛ ekpeloo loo dum. A bee su pya ue le edoba a waɛ edābeeloo kɔā ue nɛ pya a gaa bee ye gbaɛ̄tɔ̄.

12. Bu mɛ sīdee na o dap suā taɛ nɛɛ ɛrɛ sa o kwabaloo o ekɔaue kɔ a suloo a?

¹² Su suānu daābeeloo nu pya a le o kɛ̄ zue ue ɛrɛ taɛ bu sa o kwabaloo o ekɔaue sueeloo. O tɛɛ̄ doodoo wa suā nu nɛɛ ɛrɛ taɛ bu sɔ̄ o ye yii loo ale sɔ̄ o yii ye be ni? Dɔɔ̄na sɔ̄, lu nɛɛ a para ɛp nu. Naa daba, a gaa foh nu, buū kpa, kwa fah, ale a gaa doo pya dɔɔ̄na nu. Lo a bɔloo o dap su pya nu ama ye nyɔɔnɛ bɔātɛ̄ kɔnia ue. (Jɔn 4:7) Kere bɛloo nɛɛ yaa dap nage kɔ nu a ye kiiloo doodoo, barasī a aa, tam a wee si, le pya eku bira ekɔ a wee ye nia. Gustavo bee kɔ, “M bee bɔātɛ̄ enyɔɔnɛ ziī nwiīnɛɛdam a le 19 zua lo a bee yaa bɛloo ziī nɛɛ a wee uɛ yɔɔ a siābee kaāna kɔnia ue. M bee ye bip nu akiiloo ye bɛloo, e lo nwiīnɛɛdam bee mɛ kɔ nɛ nu anua lo nɛɛ nia ye. Ekɔaue ama bee doo kɔ i a bɔātɛ̄ enɔānu Baibol, e nyaawo lo gbara elua ziī nɛɛ Ekeebee.”

13. Bu mɛ sīdee na o dap bɔātɛ̄ enɔānu Baibol bu sīdee enia pya nɛɛ a?

¹³ Sɔ̄ o yiga lo enyɔɔnɛ ziī nɛɛ nɔ Baibol, doo kɔ a ɛrɛ taɛ bu; tɔgɛ ye kɛ̄ nɔ nu  eyerebah ye nɛ doo. (Jɔn 4:13-15) Bu edoba, ziī wa a ɛrɛ taɛ bee kue wuga nɛɛwa a kura Poppy nua ye tɔ. Sɔ̄ Poppy bee muɛ̄ certificate a le kpaɛ̄ daɛ̄ a tɔgɛ kɔ lo wa ɛɛ nɛɛ enɔā gbɛnɛ kpa, a bee baatɛ̄ kɔ ili wee nɔɛ̄nu pya nɛɛ tɛ̄maloo Baibol le pya i enɔānu. Lo wa bee yiga kɔ enɔe Baibol, a si enɔānu lo dee a nyɔɔnɛ, sa si sɛkiut asɛmbli a bee lu esikɛ̄ ɛrɛ. Sɔ̄ ziī zua etɛ̄na, a bee liamaā. Bip aba ɔɔ kɔ: ‘E na pya nɛɛ m wee obia si loo wee ɛrɛ taɛ bu a? M dapge baatɛ̄ kɛ̄ i enɔānu Baibol wee mɛā doo bu sīdee ba e’ɛrɛ taɛ bu ni?’

14. O dap kwabaloo o enɔānu Baibol sueeloo ziī ziī nɛɛ o gaa nyɔɔnɛ nɔnu doodoo wa?

¹⁴ Sɔ̄ o ebɔātɛ̄ enɔānu Baibol, kpɛ̄naloo leere lɛɛ o gae kii wee nɔɛ̄ Baibol ziī ziī aba. Suā kɛ̄tɔɔ̄ pya nɛɛ o gaa nyɔɔnɛ nɔnu le nu ba ɛrɛ taɛ bu. Sɔ̄ o gaa kpɛ̄naloo, suā pya dɔ kpa kaɛ o buū, vidio o tɔgɛ lo nɛɛ, le edoba nu o su baātɛ̄ pya kaka ue a le bu Baibol. Bip aba ɔɔ kɔ, ‘Taɛ e na enia nɛɛ m gaa nyɔɔnɛ nɔnu ama sa ye ina bu beenyiɛ a? (Kam 16:23) Ziī wa a gaa bee nyɔɔnɛ ziī wuga nɛɛwa a kura Flora a le Albania nɔnu bee kɔ, “Mm le edap yiga tɔgɛnu a kɔ aakɛ̄ bu luh ele.” Flora naa bee ye su bah ekpo aā kɔ a yiga aba lo sɔ̄. A bee kɔ, “M kɛɛrɛ kɔ lɛɛ a gae yiga kɔ aakɛ̄ bu luh le, a ɛrɛ edasī suāloo Bari a yira yii akiiloo aakɛ̄ bu luh leere.” Aā lo sɔ̄, ɛrɛgeba sɔ̄ ba gaa nɔnu, Flora wee baatɛ̄ kɔ Jɛhova ɛrɛ wereloo, suānu, le ekpo. Sɔ̄ a esaa, nɛɛ a gaa bee nyɔɔnɛ nɔnu a bee yiga kɔ aakɛ̄ bu luh le. Nyaawo, lo wa elua nɛɛ Ekeebee a gaa su mɛm siātam nɛ Jɛhova.

15. Dookɛ̄ kpa Doonu pya Nɛɛ lɛɛratam 17:16-18 kɔ doo, amunu elap dogo pya Gris a dee kere na a bee taɛ̄ŋɛ Pɔɔl a, mɛ e na anua a naa bee biewo ezue ue nɛ pya a bee le Atɛns a?

¹⁵ Buū Doonu pya Nɛɛ lɛɛratam 17:16-18. Pɔɔl naa bee biewo ezue ue nɛ pya a le Atɛns, kere taāŋabah yɔ, dogo kunagā, le ekwɔ sīdee doonu bee mma wa buɛ̄; e a naa bee ɔbɛ ezue ue wa nɛ kere ba bee ye gbɛ. Pɔɔl bee lunage Nɛɛ Kraist, kere adoo tua sɔ̄ a bee le nɛɛ a “kɔ Bari gbee sa tɛ̄ŋaloo sa ye gbee bee.” (1 Tim 1:13) Dookɛ̄ Jizɔs bee ɛp kɔ Pɔɔl dap lu nɛɛ a ye nyɔɔnɛe dumɛ doo, kɛ̄ Pɔɔl ɛp nage pya a le Atɛns nua pya edap nyɔɔnɛ dumɛ Jizɔs doo lo. E dɛrɛ nyiɛ nyɔɔ Pɔɔl bee ɛrɛ ama bee bɔloo.—Doonu pya Nɛɛ lɛɛratam 9:13-15; 17:34.

16-17. E na a tɔgɛ kɔ ɛrɛgeba nɛɛ dap lu nɛɛ a nyɔɔnɛ dumɛ Jizɔs a? Naa nɛ edoba.

¹⁶ Bu tua sɔ̄ o’oo tup zua a, pya nɛɛ a aa keekee barasī bee lu pya a nyɔɔnɛ dumɛ Jizɔs. Sɔ̄ Pɔɔl bee ɛm kpa ma pya Nɛɛ Kraist a le Grik li Kɔrint, a bee kɔ pio nɛɛ a le bu lo bɔŋanaloo bee le pya bag dogo le pya a wee tɔɔ̄dum a naa ɛɛ tua sɔ̄. Lɛɛ a kɔ yereloo kɔ: “Pio bui bee le doo wo ama. Mɛ bui bee loga.” (1 Kɔr 6:9-11) Lo o bee le Pɔɔl o bee ɛpge pya nɛɛ ama nua pya ekiiya sɔ̄ a esaa sa nyɔɔnɛ dumɛ Jizɔs ni?

¹⁷ Nii’ee ama, gbɛnɛ-edo nɛɛ gaa kpɛ̄naloo ekwabaloo wa sīdee tɔɔ̄dum lokwa ba dap lu pya a nyɔɔnɛ dumɛ Jizɔs. Bu edoba, ziī wuga nɛɛwa a le bu keebee tam sɛmdee a kura Yukina bie Australia bee kɔ a muɛ̄e kɔ pya nɛɛ a aa dɛ̄dɛɛ̄ barasī dap gbaɛ̄tɔ̄ le yereue a le bu Baibol. Ɛrɛ dee a bee le uwe tam sa a muɛ̄ ziī wa a ɛma tatoo loo ye sa yaa  gbɛnɛ ka bɛloo. Yukina kɔ, “M bee dasī yira kina, lɛɛ m bɔātɛ̄ ekɔ ue ye nɛ. M bee muɛ̄ kɔ a ɛrɛ taɛ bu ue a le bu Baibol mmɛ lo kɛ̄ tatoo a bee tɔā loo ye lu pya ue a aabu kpa Le-yɔɔ.” Lo wa bee bɔātɛ̄ nɔ Baibol sa si enɔānu. *

18. E na anua ii le ebiaɛ pya nɛɛ a?

¹⁸ Ekɔ Jizɔs bee ɛpge kɔ nu a le wii eleera egbī nyɔɔbee a gaa bee ɛmadɛɛ̄ kɔ gbɛnɛ-edo nɛɛ enyɔɔnɛe ye dumɛ ni? Eeye doo pippip. Kpa Kaɛ ebee kɔ sere kɛ̄ kɔ kunɛ nwī epoo loo nɛɛ na e’ɛrɛ ye yira bu a. (Jɔn 12:37, 38) E Bari bee nɛ ekpo Jizɔs lo edap suā nu a le bu beenyiɛ nɛɛ. (Mat 9:4) Kerewo, a bee sere ekɛɛrɛ nyɔɔ epoo loo pya nɛɛ ba e’ɛrɛ ye yira bu, sa a su mɛm zuema ue nɛ dɛ̄dɛɛ̄ nɛɛ. Nyɔɔwo kuma sɔ̄ ili ii dap suā nu a le bu beenyiɛ nɛɛ a, naa lee kɔ i biaɛ pya nɛɛ a le i kɛ̄ zue ue ale nɛɛ i gbī ezue ue nɛ! Taāwo, muɛ̄ le a wa le bu. Marc nɛɛ a wee zue ue aā ziī edo yii ziī li Burkina Faso bee kɔ: “Gbɛnɛkpo sɔ̄, pya nɛɛ m kɛɛrɛ kɔ ba ekiisī leere na ba wee ɔbɛ enɔ Baibol a. Mɛ pya nɛɛ mm ɛmadɛɛ̄ kɔ ba enɔ Baibol na ba wee kiisī leere a. Nyɔɔwo, m enɔā kɔ a lee elɛɛbaloo kɔ edɔɔ̄ Jɛhova a baɛ i loo.”

19. I ɛp pya a le i kɛ̄ zue ue doodoo wa?

¹⁹ Tua sɔ̄, o dap kɛɛrɛ kɔ pya a le bui kɛ̄ zue ue naa le doodoo kpakpaa eleera efii aā wii. Mɛ nyɛŋiabu nu Jizɔs bee kɔ nɛ pya a wee ye nyɔɔnɛ dumɛ. Nu a le wii e ɛɛra, lo a kura kɔ, ba eleera egbī aā wii. Pya nɛɛ dap nyaa sa lu pya a nyɔɔnɛ dumɛ Jizɔs. Jɛhova ɛp pya nɛɛ enyɔɔnɛ Jizɔs ama nua nu “a si gbɛnɛ du.” (Hag 2:7) Lo i ɛp pya nɛɛ dookɛ̄ Jɛhova le Jizɔs wa ɛp doo, i suā wa kɛ̄tɔɔ̄ le nu a wa nia. Ii le e’ɛp wa doodoo pya saanɛɛ, mɛ doodoo pya nɛɛ a elu pya i wuga nɛɛdam le nɛɛwa.