1-2. Antoy tutukoyen nen Jesus ed samay imbaga to ya nabasad Juan 4:35, 36?

PAARAP ed Galilea si Jesus, tan wala ray adalan ton kaumaan ya ataneman na sebada. (Juan 4:3-6) Manga apat bulan ni antis na panag-ani. Kanian no wadman ka, ompan agmo napanisiaan iyan imbaga nen Jesus: “Nengneng yo iray kaumaan, ya amputi la ra parad panag-ani.” (Basaen so Juan 4:35, 36.) Antoy labay ton ibaga?

² Mapatnag ya say tutukoyen nen Jesus et simbolikon panag-ani. Imanoen no antoy agawa antis to itan ya imbaga. Anggano agmantotongtong iray Judio tan Samaritano, pinulongan nen Jesus so sakey a Samaritana tan sikatoy madengedengel. Diad tua, legan ya ibabaga nen Jesus ya saray kaumaan et “amputi la ra parad panag-ani,” wala lad dalan iray dakel ya Samaritano ya labay dan narengel a mismo si Jesus lapud saray imbalita na samay bii. (Juan 4:9, 39-42) Oniay insulat na sakey ya iskolar na Biblia nipaakar ed sayan inkagawa: “Talagan eksayted iray totoo ya onlad si Jesus . . . kanian singa ra pagey ya magano lan anien.”

3. Antoy epekto ed panagpulong mo no aligen moy pangipapasen nen Jesus ed totoo?

³ Sika ey, antoy pakanengneng mo ed saray totoo ya napupulongan mo? Kasin ipapasen mo ya singa ra pagey ya magano lan anien? No on, walay taloran epekto tod sika. Unona, mas mankuli ka ya manpulong. Say panag-ani et sambotan, kanian agnayari manpaleen. Komadua, maliket ka no wala ray mangawat ed maong a balita. Ibabaga na Biblia: ‘Manliket so totoo ed panaon na panag-ani.’ (Isa. 9:3) Komatlo, lapud ipapasen mo ya  kada toon nakatongtong mo et posiblin magmaliw ya disipulo, iparaan mon maong iray presentasyon mo pian nasagyat so interes da.

4. Diad sayan artikulo, anto ray aralen tayo ed si apostol Pablo?

⁴ Nayarin negatibo so pakanengneng na arum ya papatumbok nen Jesus ed saray Samaritano. Balet duma si Jesus ta impasen to ya posible iran magmaliw ya disipulo to. Nepeg tayo met ya isipen ya saray totoo ed teritorya tayo et posiblin magmaliw ya disipulo nen Kristo. Balibalin aligen so alimbawa nen apostol Pablo ed saya. Antoy naaralan tayo ed sikato? Diad sayan artikulo et aralen tayo (1) no panon ton inkonsidera so papanisiaan na saray pinulongan to, (2) no antoy ginawa to pian naamtaan to ray labay dan pantongtongan, tan (3) no panon ton impasen ya posible iran magmaliw ya disipulo nen Jesus.

5. Akin ya kabisado nen Pablo iray pupulongan tod sinagoga?

⁵ Mabetbet ya nampulong si Pablo ed sinagoga na saray Judio. Singa bilang, taloran nantutumbokan a sabaton ya sikatoy akikatunongan manlapud Kasulatan diad sinagoga ed Tesalonica. (Gawa 17:1, 2) Seguradon mainomay nen Pablo so manpulong ed sinagoga ta binmaleg ed pamilyan Judio. (Gawa 26:4, 5) Kabisado to iray papanisiaan na saray Judio kanian amta to no panon to ran pulongan.​—Fil. 3:4, 5.

6. Antoy pidumaan na saray walad tindaan na Atenas ed saramay pinulongan nen Pablo ed sinagoga?

⁶ Nen apilitan si Pablo ya taynan so Tesalonica tan Berea lapud panamasegsegang, sikatoy akasabi ed Atenas. Antoy ginawa to lamet diman? “Sikatoy akikatunongan ed saray Judio tan ed arum nin totoo a mandadayew ed Dios diad sinagoga.” (Gawa 17:17) Balet nen dia lad tindaan so pampupulongan to, duma la ray mandengdengel. Wadman iray matatalinon totoo tan saray aliwan Judio ya inisip dan say ipupulong nen Pablo et “balon bangat.” Imbaga rad sikato: “Wala ray ibabagam a duma ed pakadngel mi.”​—Gawa 17:18-20.

7. Base ed Gawa 17:22, 23, antoy ginawa nen Pablo pian ombagay so presentasyon to ed saray pupulongan to?

⁷ Basaen so Gawa 17:22, 23. Say impanpulong nen Pablo ed saray aliwan Judio diad Atenas et duma ed samay impanpulong to ed saray Judio ed sinagoga. Intepet seguro nen Pablo ed sarili to, ‘Anto kasi papanisiaan na saray taga Atenas?’ Inimano ton maong so kaliberliber tan inobserbaan toy paraan na panagdayew da. Tan nanisip na paraan pian nikonekta to so panagdayew da ed no antoy ibabangat na Kasulatan. Insan atan so inusar  to pian nigapoy tongtongan. Oniay imbaga na sakey ya iskolar na Biblia ed satan ya ginawa nen Pablo: “Lapud sikatoy sakey a Judion Kristiano, amta to ya saray paganon Griego et agda dadayewen so ‘tuan’ Dios na saray Judio tan Kristiano, balet nanggawa na paraan pian nipaamta to ed saray taga Atenas ya say Dios ya ipupulong to et aliwa lan balo ed sikara.” On, nanisip si Pablo na duman presentasyon ya ombagay ed sikara. Imbaga tod saray taga Atenas ya say mensahe to et nanlapud dadayewen dan “Dios ya Agkabat.” Anggano ag-amta na saray aliwan Judio so ibabangat na Kasulatan, ag-inisip nen Pablo ya ag-ira magmaliw ya Kristiano. Impasen to ya singa ra pagey ya magano lan anien, tan angusar na duman presentasyon pian nipulong tod sikara so maong a balita.

8. (a) Panon mon naamtaan iray papanisiaan na totoo ed teritorya yo? (b) No ibaga na unabung ya wala lay relihyon to, antoy nayarin iyebat mo?

⁸ Singa si Pablo, man-obserba ka. Imanom iray nayarin pakanengnengan mo no antoy papanisiaan na saray totoo ed teritorya yo. Anto ray akasabit ed abung o luluganan na katongtong mo? Ompan diad ngaran, panangawes, panag-ayos, odino anggan diad panagsalita to et naamtaan mo la no antoy relihyon to. Odino ompan direkta ton ibaga ya wala lay relihyon to. No ontan so ibabaga na unabung, oniay iyeebat na espisyal payunir ya si Flutura: “Agak dia linma ed sikayo pian ipasoot so papanisiaan ko. Linma ak dia pian itongtong so topic ya . . . ”

9. Anto ran topic so sarag mon itongtong ed sakey a relihyoso?

⁹ Anto ran topic so sarag mon itongtong ed sakey a relihyoso? Manisip kay topic ya napampaknaan yo. Ompan sakey labat ya Dios so dadayewen to, manisia ya si Jesus so mangisalba ed saray totoo, odino manisia ya asingger lay anggaan na sayan mauges ya mundo. No antam la iray topic ya napampaknaan yo, ibasem ditan so presentasyon mo pian nasagyat mon ondengel ed mensahe na Biblia.

10. Antoy nepeg tayon gawaen, tan akin?

¹⁰ Tandaan ya anggano walay relihyon na sakey a too, ompan agto panisiaan so arum ya ibabangat na relihyon to. Kanian anggano antam lay relihyon na katongtong mo, salim ya amtaen no anton talagay papanisiaan to. “Dakel natan so walay relihyon da balet manisia met irad saray pilosopiya na totoo,” so imbaga nen David ya espisyal payunir ed Australia. Oniay imbaga nen Donalta ya taga Albania: “Wala ray nakakatongtong mi ya ibaga ran membro ira na sakey a relihyon, balet ibaga da lanlamang ya ag-ira manisia ya walay Dios.” Naimano met na sakey a misionero ed Argentina ya wala ray totoon ibabaga ra ya  manisia irad Trinidad, balet diad tua et ag-ira manisia ya say Ama, say Anak, tan say masanton espiritu et saksakey a Dios. “Lapud sankanonot ko itan, mas mainomay koy manisip na topic ya napampaknaan mi,” so kuan to. Kanian amtaen no anton talagay papanisiaan na katongtong mo. Bilang resulta, singa si Pablo et sarag moy ‘magmaliw ya amin a bengatla ed amin a klase na totoo.’—1 Cor. 9:19-23.

11. Diad Gawa 14:14-17, antoy ginawa nen Pablo pian dengelen na saray taga Listra so mensahe to?

¹¹ Basaen so Gawa 14:14-17. Inisip nen Pablo no anto ray labay ya pantongtongan na totoo, tan imbase to ditan so presentasyon to. Singa bilang, saray totoo diad Listra et dagdaiset odino anggapo ni ingen so amta rad Kasulatan. Kanian angusar si Pablo na topic ya natalosan da. Imbaga toy nipaakar ed mabungan panag-ani tan maliket a bilay. Sikatoy angusar na saray simplin salita tan alimbawa ya mainomay dan natalosan.

12. Panon mon naamtaan no antoy labay ya pantongtongan na sakey a too, tan antoy gawaen mo pian ombagay so presentasyon mo?

¹² Isip mon maong no anto ray labay ya pantongtongan na totoo ed teritorya yo tan manisip ka na ombagay ya presentasyon. Antis mon asinggeran odino nakatongtong so sakey a too, antoy gawaen mo pian naamtaan moy labay ton pantongtongan? Man-obserba ka. Kasin sikatoy mansasalog na tanaman, manbabasa na libro, mangaapiger na luluganan, odino arum ni? Ompan sarag mon igapoy tongtongan base ed gagawaen to. (Juan 4:7) Odino nayarin walay naamtaan mod sikato diad kawes to​—no antoy lahi to, trabaho to, odino paborito ton team ed isports. “Walay akatongtong kon laki ya 19 so taon to tan diad T-shirt to et wadmay lupa na sikat ya singer,” so kuan nen Gustavo. “Tinepetan ko nipaakar ed T-shirt to, tan imbaga to no akin ya paborito to iman ya singer. Saman ya tongtongan mi et nanresulta ed panangiyaral na Biblia tan natan et Tasi la.”

13. Panon mon ibaga so nipaakar ed panagaral na Biblia diad paraan ya nagustoan na totoo?

 ¹³ Sano ibabagam so nipaakar ed panagaral na Biblia ed sakey a too, ipresentam itan diad paraan ya nagustoan to tan nanengneng ton makatulong itan ed bilay to. (Juan 4:13-15) Singa bilang, walay sister ya say ngaran to et Poppy ya pinaloob na interesadon bii ya apulongan to. Nen anengneng nen Poppy so akasabit ya diploma na bii, naamtaan to ya propesor manaya. Kanian imbaga nen Poppy ya manbabangat tayo met panamegley na panagaral na Biblia tan diad saray aral tayo. Nampaiyaral imay bii, inmatendi ed Kingdom Hall diad tinmumbok ya agew, tan ag-abayag et inmatendi ed sirkiton asemblea. Kayari sakey taon, sikatoy nampabautismo. Kanian pannonotan mo iya: ‘Anto ray labay ya pantongtongan na saray papawilen ko? Antoy ibagak pian natalosan da ya makatulong ed bilay da so panaral na Biblia?’

14. Antoy gawaen mo pian nasabi so puso na kada iyaaralan mo?

¹⁴ No wala lay nigapom ya iyaaralan na Biblia, iparaan mo so kada panaral yo, ya sankanonot moy situasyon to tan no anto ray makasagyat ed interes to. Legan kan manpaparaan, pilim no anto ran teksto so basaen yo, no anto ran video so ipabantay mo, tan no anto ran ilustrasyon so usaren mo pian nipaliwawam iray katuaan ed Biblia. Isip mo, ‘Anto kasi ibagak pian nasabi so puso to?’ (Pro. 16:23) Diad Albania, iyaaralan na payunir ya si Flora so sakey a bii ya angibagan, “Agak manisian nabilay iray inaatey.” Agpinilit nen Flora ya panisiaan ton tampol itan. Imbaga nen Flora: “Naisip ko ya antis ton panisiaan so kioli, kaukolan to nin kabaten so Dios ya angisipan ed satan.” Manlapu lad saman, kada no manaral ira, lanang ya idadanet nen Flora so panangaro, karunongan, tan pakapanyari nen Jehova. Ag-abayag, manisia lad kioli imay iyaaralan to tan natan et maseseg lan Tasi nen Jehova.

15. Base ed Gawa 17:16-18, anto ray kipapasen ed Gresya nensaman ya naobserbaan nen Pablo, balet akin et pinulongan to nin siansia iray taga Atenas?

¹⁵ Basaen so Gawa 17:16-18. Pinulongan nin siansia nen Pablo iray taga Atenas anggano say syudad da et napno na idolo, imoralidad, tan pagano iran tradisyon. Tan agtinmundan nampulong anggano sikatoy ininsulto ra. Si Pablo ya mismo et datin “managmudmora ed Dios tan managpairap tan agmangikabkabilangan” antis ya nagmaliw a Kristiano. (1 Tim. 1:13) No panon ya matalek si Jesus ya si Pablo et sarag toy manguman tan magmaliw ya disipulo, onman met so inisip nen Pablo ed saray taga Atenas. Tan wala ran talagay nagmaliw ya Kristiano diman.​—Gawa 9:13-15; 17:34.

16-17. Anto ray paneknek ya sarag na amin ya klase na too so magmaliw ya disipulo nen Kristo? Mangiter na alimbawa.

¹⁶ Nen inmunan siglo, saray nagmaliw ya disipulo nen Jesus et nandurumay apalabas da. Nen sinulatan nen Pablo iray Kristiano ed Corinto, ya sakey a syudad ed Gresya, imbaga to ya say arum ed satan a kongregasyon et datin kriminal odino imoral. Insan to intuloy: “Ontan so arum ed sikayo nensaman. Balet naurasan tan alinisan kayo la.” (1 Cor. 6:9-11) No sika so wadman, kasin naisip mo ya manguman iraman ya totoo tan magmaliw iran disipulo?

¹⁷ Dakel met natan so napapakiwas ya manguman pian magmaliw iran disipulo nen Jesus. Singa bilang, diad Australia, apaneknekan a mismo na espisyal payunir a si Yukina ya sarag na amin a klase na too ya unoren so ibabaga na Biblia. Aminsan, nen sikatoy walad opisina na real estate, naimano toy sakey a kabataan a bii ya wala ray tattoo ed laman to tan  malakob so kawes to. “Agko lawari asinggeran,” so kuan nen Yukina, “balet kinatongtong ko lanlamang. Naamtaan ko ya interesadon maong ed Biblia tan wala ray tattoo to ya bersikulo manaya ed Salmo!” Nampaiyaral iman ya kabataan tan natan et mimiaral la. *

18. Akin et agtayo nepeg ya husgaan iray totoo?

¹⁸ Kasin imbaga nen Jesus ya amputi la ray kaumaan parad panag-ani lapud iilaloan to ya dakel so magmaliw ya patumbok to? Andi. Impasakbay la na Kasulatan ya daiset labat so manisia ed sikato. (Juan 12:37, 38) Tan sarag nen Jesus ya basaen so puso na sakey a too kanian amta to ya dakel so agmangawat ed sikato. (Mat. 9:4) Anggaman ontan, sikatoy nampokus ed saramay daiset ya manisia, tan maseseg ton pinulongan so amin. No si Jesus ya sarag ton basaen so puso et agto hinusgaan iray totoo, lalo la sirin ed sikatayo ta agtayo nabasa so puso na totoo! Kanian agmo huhusgaan so sakey a teritorya odino anggan siopan too. Imbes, isip mo ya posiblin magmaliw ya disipulo iray totoo. Oniay imbaga nen Mark ya misionero ed Burkina Faso: “Wala ray iyaaralan ko ya say amtak et sikara so mantultuloy, balet tinmunda ra. Wala ra balet so iyaaralan koy Biblia ya say amtak et ontunda ira lanlamang, anta manaya et sikara so man-Tasi. Kanian mas maong no paigiya tayod espiritu nen Jehova pian naanap tayo iramay talagan narasan ed katuaan.”

19. Antoy nepeg ya pangipasen tayo ed saray totoo ed teritorya tayo?

¹⁹ Ompan singa pigpigara labat ya totoo ed teritorya yo so singa pagey ya magano lan anien. Balet tandaan mo ya si Jesus a mismo so angibaga ya saray kaumaan et amputi la parad panag-ani. Sarag na totoo so manguman tan magmaliw ya disipulo nen Kristo. Ipapasen ira nen Jehova ya “ankabli a bengatla.” (Ag. 2:7) No aligen tayoy pangipapasen nen Jehova tan nen Jesus ed saray totoo, nonoten tayoy situasyon da tan no anto ray makasagyat ed interes da. Agtayo ra huhusgaan, noagta isipen tayo ya posiblin magmaliw iran agagi tayo.