1-2. Mbimbi jia Yesu jidi mu Yone 4:35, 36 jiakotelesa itshi?

Hakhalele Yesu mu vuayaje, wabalegele mu mahia a orge, yajiya gukhala egi mahia ene akhalele nu mbuto jia orge jiakhalele hehi ha gukola. (Yone 4:3-6) Idi mumonega egi guasalele mbeji nguana hagula athu amune mbuto. Uvi Yesu wazuelele ndaga imoshi yajiya gutuma alandudi enji ha gudihula, wazuelele egi: “Zumbudienu meso, mutale mu mahia mbuto jiakodi gale ha gumuna.” (Tanga Yone 4:35, 36.) Itshi gatshiginyile guzuela?

² Yesu wakhalele muzuelela sungi ya gumuna athu mu luholo lua gifuanesa. Tutadilenu ndaga yabuile gungima. Enya Yuda akhalelego gudivua nu enya Samaliya, uvi Yesu walongesele mukhetu mumoshi wa gu Samaliya, mukhetu muene wamutegelele! Tangua Yesu gakhalele muzuelela ndaga yatadila ‘mahia akhalele nu mbuto jia gukola’, enya Samaliya avula anyi avuile ndaga jiatadila Yesu gudi mukhetu muene, ajile gudi Yesu ha gujiya ndaga jiavula jiamutadila. (Yone 4:9, 39-42) Komantere imoshi ya Biblia idi muzuela egi: “Luholo athu ajile muphushi ha gutegelela Yesu . . . yamonesele egi akhalele gifua mbuto jia gukola jidi hehi nu gumunyiwa.”

3. Luholo lutshi wajiya gubua mulongeshi wabonga gifua muakhalele Yesu?

³ Luholo lutshi wana tadila athu wana longesa lukuma luabonga? Wana guamona gifua mbuto jidi hehi nu gumunyiwa ba? Gila idi ngenyi, tala ndaga eji thathu jia ndando jiajiya gugubuila. Ya thomo, mbawukhala hehi ha gulongesa muavula. Sungi ya gumuna ishigo yaleha; tushigo naye gubalegesa tangua. Ndaga ya mbadi idi egi, mbawusuanguluga tangua mbawumona athu mutegelela lukuma luabonga. Biblia idi muzuela egi: ‘Athu ana suanguluga mu sungi ya gumuna mbuto.’ (Yesh. 9:3) Ndaga ya thathu idi egi,  mbawudi mumona egi muthu wagasue wajiya gubua mulandudi wa Klisto, nu mbawutadila ndaga jiana guasuanguluisa ha gusombegesa luholo luaye lua gualongesa.

4. Longo ditshi tuajiya guzula gudi mupostolo Phaula?

⁴ Alandudi a Yesu akhalele mumona egi enya Samaliya ajiyilego gubua alandudi a Yesu, uvi Yesu gakhalelego mutangiza ngenyi. Wakhalele mujiya egi ajiya gubua alandudi enji. Esue nji, tudi naye gujiya egi athu a mu terituare yetu ajiya gubua alandudi a Klisto. Mupostolo Phaula watubembele gifezegeselo giabonga. Longo ditshi tuajiya guzula gudi mupostolo Phaula? Mu longo edi, tuza muzuelela luholo Phaula gakhalele (1) mujiya ndaga jia gikombelelo gia athu gakhalele mulongesa, (2) mukotelesa ndaga jiakhalele guasuanguluisa, nu (3) guamona egi ajiya gubua alandudi a Yesu.

5. Mukunda natshi Phaula akhalele gudivua muabonga nu athu akhalele mu sinagoga?

⁵ Phaula walongesele nji mu sinagoga jia enya Yuda. Ha gufezegesa, walongesele mu sinagoga ya gu Tesalonike, ‘masugu thathu a guhuluguga nu watele nawo [enya Yuda] maga atadila mbimbi ya Nzambi.’ (Makal. 17:1, 2) Phaula wadivuile muabonga diago mu sinagoga yene. Handaga muene nji wakhalele muenya Yuda. (Makal. 26:4, 5) Wakhalele gudivua muabonga nu enya Yuda, gakhalelego nu ba dute tangua gakhalele guawambela ndaga.—Fili. 3:4, 5.

6. Luholo lutshi athu akhalele ha mafundo a zando (kisalo) a gu Atene akhalele a gudisha nu athu anyi akhalele mutegelela Phaula mu sinagoga?

⁶ Tangua mbalagaji jiakayele Phaula gu Tesalonike nu gu Bere, wayile gu dimbo dia Atene. Ha hetele Phaula guene, ‘wasendesele guta maga mu sinagoga nu enya Yuda nu athu ako akhalele mukombelela Nzambi.’ (Makal. 17:17) Uvi hakhalele muene mulongesa ha mafundo a zando (kisalo), athu akhalele gumutegelela akhalelego enya Yuda. Mukatshi dia athu ene, muakhalele nu enya filozofi nu athu a ifutshi iko, anyi akhalele mumona malongo a Phaula gifua ‘malongo ahe-ahe.’ Amuwambelele egi: ‘Ndaga aye udi muzuela tushigo gujikotelesa muabonga.’—Makal. 17:18-20.

7. Ha gutadila Makalegelo 17:22, 23, luholo lutshi Phaula gasombegesele luholo luenji lua gulongesa?

⁷ Tanga Makalegelo 17:22, 23. Phaula galongeselego enya gu Atene luholo lumoshi nu enya Yuda anyi akhalele gumutegelela mu sinagoga. Idi naye gukhala egi Phaula wadihudile egi, ‘Ndaga jitshi jia gikombelelo enya gu Atene ana tshigina?’ Wakhalele mutala muabonga ndaga jiakhalele hehi nu ene, ha gujiya kutime jia gikombelelo giawo. Gungima, Phaula wakambele gudivua gudi mukatshi dia ndaga jiene nu jinyi Mbimbi ya Nzambi yana longesa. Muenya ndunge mumoshi  udi muzuela egi: “Luholo [Phaula] gakhalele Muklisto wa muenya Yuda, wakhalele mujiya egi aphagano a enya Greki akhalelego mukombelela Nzambi wa ‘giamatshidia’ wa enya Yuda, uvi waawambelele egi Nzambi muene gadi gualongesa gashigo Nzambi muko, uvi yonu ene adi mujiya.” Hene phaula wakhalele musombegesa ba metode a gulongesa ha gudivua nu ndaga akhalele mutagana najio. Wawambelele enya gu Atene egi ndaga jidi mulongesa muene jiakatuga “gudi Nzambi udi gashigo mujiyiwa,” yonu ene adi mukombelela. Ngatshima enya ifutshi iko akhalele khenji ajidila gale ndo nu Mbimbi ya Nzambi, uvi Phaula gatangijilego egi ene ajiyilego gubua alandudi a Yesu. Uvi wakhalele guamona gifua mbuto jidi hehi ha gumuna, nu wasombegesele luholo luenji lua gualongesa lukuma luabonga.

8. (a) Luholo lutshi wajiya gukotelesa ndaga jia gikombelelo gia athu a mu terituare yaye? (b) Gula muthu mumoshi wazuela egi udi nu gikombelelo gienji, luholo lutshi wajiya gumuhana mvutu?

⁸ Kalegela meso aye ha gutala ndaga jidi hehi, gifua muatshitshile Phaula. Kamba gujiya ndaga jiajiya gugukuatesa ha gukotelesa ndaga jia gikombelelo gia enya mu terituare yaye. Luholo lutshi fumi’a inzo galondega inzo yenji nga gamiyo genji? Jina dienji, milele yenji, nu guzuela guenji gudi mumonesa gula udi muenya gikombelelo gitshi ba? Yajiya gukhala egi waguwambela haphelo egi udi nu gikombelelo gienji. Pionye spesiale mumoshi mu jina dia Flutura, watagenele nu ndaga ya luholo elu, wana guzuela egi: “Ngushigo gugutuma gu ngolo ha gutshigina ndaga jia gikombelelo giami, uvi ngumutshigina guguwambela ndaga imoshi yatadila . . . ”

9. Ndaga jitshi jiabonga wajiya gumona gudi muthu wana khala nu gikombelelo gienji?

⁹ Ndaga jitshi wajiya guzuelela nu muthu udi muzuela egi udi nu gikombelelo gienji? Kamba gujiya ndaga jinyi enue mbadi mudi mutshigina. Yajiya gukhala egi muthu muene wana kombelela phamba Nzambi mumoshi, wana tshigina egi Yesu muene mbawuhuluisa athu agasue, nga ndo wana tshigina egi tudi mujinga mu masugu a gisugishilo, nu wana jiya egi gualeha ndo gubola guagasue mbaguhua. Ha gutadila ndaga jinyi mudi gudivua n’enji, mulongese Biblia mu luholo luajiya gumusuanguluisa.

10. Ndaga itshi tudi naye gukamba gukalagala, nu mukunda natshi?

¹⁰ Jiya egi athu avula anago gutshigina ndaga jiagasue ana gualongesa mu ikombelelo yawo. Hene, gula wajiya gikombelelo gia muthu, kamba gujiya ndaga jiana gutshigina muene. Muvundji wa muhola mumoshi wa gu Australie mu jina dia David udi muzuela egi: “Athu avula ana bungisa malongo a gikombelelo giawo nu malongo a filozofi.” Phangi Donalta wa gu Albanie udi muzuela gamba: “Athu ako tuana tagana nawo, ana zuela egi adi nu gikombelelo giawo, uvi gungima ana zuela egi Nzambi gakhalago guene.” Phangi mumoshi wa misionere gu Argentine udi muzuela egi, athu avula ana tshigina malongo a uthathu,  uvi ana tshigina ndo egi Tata, nu Mona nu nyuma yabonga akhala Nzambi mumoshi. Udi muzuela egi: “Gula ngajiya egi muthu muene ganago gutshigina ndaga jiagasue ana gualongesa gu gikombelelo giawo, ngana kamba ndaga jinyi esue mbadi tudi mutshigina n’enji hagula ngumulongese.” Hene, kamba gujiya ndaga jia gikombelelo athu ene ana gutshigina diago. Gifua Phaula, ‘mbawubua yagasue mukunda nu athu a maluholo agasue.’—1 Kol. 9:19-23.

11. Ha gutadila Makalegelo 14:14-17, luholo lutshi Phaula alondegele luholo luenji lua gulongesa gudi enya gu Lystre?

¹¹ Tanga Makalegelo 14:14-17. Phaula wakhalele mukamba gujiya ndaga athu akhalele musuanguluga najio, nu wakhalele musombegesa luholo luenji lua gulongesa athu agasue ha gutadila ndaga jiawo. Tufezegese gale, thundu ya athu yakhalele mulongesa muene gu Lystre yakhalelego mujiya ndaga jiavula jiatadila Mbimbi ya Nzambi. Hene Phaula waalongesele mu luholo lua leba hagula ene ajiya gukotelesa. Waawambelele ndaga jiatadila sungi jia gukatula mbuto nu ima yana gusuanguluisa athu. Wakhalele mukalegela ifezegeselo nu mbimbi jialeba hagula athu anyi akhalele gumutegelela akotelese.

12. Luholo lutshi wajiya gujiya ndaga jiana suanguluisa muthu, nu gusombegesa luholo luaye lua gulongesa?

¹² Kalegela meso aye ha gujiya ndaga athu ana gusuanguluga najio mu terituare yaye, nu sombegesa luholo luaye lua gulongesa. Luholo lutshi wajiya gujiya ndaga jiana suanguluisa muthu tangua udi mu luphango luenji? Kalegela meso aye muabonga. Yajiya gukhala egi muthu muene udi mulondega luphango luenji, udi mutanga mukanda, udi mulondega gamiyo nga udi mutshita ndaga iko. Gila luholo ludi guene, wajiya gusendesa guta nenji maga a ndaga idi mukalagala muene ba? (Yone 4:7) Milele yasudiga muthu muene yajiya gukotelesa ndaga jiavula—yajiya gumonesa gifutshi gienji, mudimo gana kalagala, nga sport yana tshigina muene. Phangi Gustavo udi muzuela egi: “Ngasendesele guta maga nu muvuala mumoshi wa ivo 19 wasudigile mulele wakhalele nu gifuanesa gia musicien mumoshi wajiyiwa muavula. Ngamuhudile mihu mukunda nu gifuanesa giene, wanguwambelele mukunda natshi gana zumba musicien  muene. Maga ene atukuatesele ha gusendesa gulonguga Biblia, mangino yala muene udi Temue wa Yehowa.”

13. Mu luholo lutshi wajiya gulongesa Biblia hagula athu asuanguluge nayo?

¹³ Gila udi mulonguga Biblia nu muthu, mumonese ndaga jiagasue haphelo, mulegeze gubonga gulonguga Biblia mbagumubatela. (Yone 4:13-15) Phangi wa mukhetu mu jina dia Poppy, watamegewe ha gungina monzo ya mukhetu mumoshi wasuangulugile nu giamatshidia. Tangua Poppy gamonele diplome dia guhaga gu gibayi, wajiyile egi mukhetu muene wakhalele mulongeshi wa khalasa, phangi muene wamudijigile egi esue nji tudi alongeshi, tuana longesa athu mu njila ya Biblia nu munjila ya gudibungisa gua mu hungu. Mukhetu muene watshiginyile ha gulonguga Biblia, lusugu lua landuile, wayile mu gudibungisa gua mu hungu, gungima wayile gu asamble a lusugu lumoshi. Gungima dia givo gimoshi, mukhetu muene wabatijiwe. Dihule egi: ‘Ndaga jitshi jiana suanguluisa athu ngana vutugila mu mudimo wa gulongesa? Luholo lutshi ngajiya gulondega programe yetu ya gulonguga Biblia hagula asuangulege nayo?’

14. Luholo lutshi wajiya gusombegesa luholo luaye lua gulongesa Biblia gudi athu wana longuga nawo?

¹⁴ Tangua wasendesa gulonguga Biblia nu muthu, londegenu nenji longo mbamulonguga gungima, tangiza muabonga fami yenji nu ndaga jiana gumusuanguluisa. Tangua udi gudilondega, tomba verse mbawutanga, video mbawumutalesa, nu ifezegeselo mbawukalegela ha gumukotelesela giamatshidia gia Biblia. Dihule egi, ‘Ndaga itshi yajiya gusuanguluisa nu gukuata mutshima wa muthu ngudi mulongesa Biblia?’ (Ish. 16:23) Gu Albanie, phangi Flora wakhalele mulonguga Biblia nu mukhetu mumoshi, mukhetu muene udi muzuela egi: “Ngakhalelego mutshigina longo dia gufuzumuga.” Flora gamushinjigilego ha gutshigina longo diene. Flora udi muzuela egi: “Ngamonele egi, udi naye thomo gujiya Nzambi yonu walayele egi athu mbaafuzumuga gutuama egi atshigine longo diene.” Hene, lusugu luagasue akhalele mulonguga, Flora wakhalele muzuelela muavula guzumba, ngolo nu ndunge jia Yehowa. Gungima, mukhetu muene watshiginyile longo dia gufuzumuga. Mangino, mukhetu muene udi Temue wa Yehowa wa gikhesa.

15. Ha gutadila Makalegelo 17:16-18, makalegelo atshi abola akhalele nawo enya gu Atene, nu mukunda natshi Phaula gabembelego gualongesa?

¹⁵ Tanga Makalegelo 17:16-18. Dimbo dia Atene diakhalele diazala pha nu nzambi jia isongo, uthambi nu malongo a filozofi, nu akhalele mushinga Phaula, uvi muene galebelego muila, nu gabembelego gualongesa. Phaula wabuile Muklisto, uvi thomo wakhalele ‘muenya lusegu, musageshi nu muenya mashingo.’ (1 Tim. 1:13) Yesu wajiyile egi Phaula wajiya gubua mulandudi wenji, luholo lumoshi nji, Phaula wakhalele mujiya egi enya gu Atene ajiya gubua alandudi a Yesu. Phaula gadihuigilego luholo gatangijile ngenyi.—Makal. 9:13-15; 17:34.

16-17. Itshi idi mumonesa egi athu a maluholo agasue ajiya gubua alandudi a Klisto? Fezegesa.

¹⁶ Mu siekle ya thomo, athu a maluholo agasue abuile alandudi a Yesu. Tangua Phaula gasonegele mukanda gudi Aklisto a gu Kolinto, wazuelele gamba athu ako a mu hungu diene akhalele thomo mbundudi, nga ndo akhalele mukalagala ndaga jia musonyi. Nu wazuelele luko egi: “Athu ako mukatshi dienu akhalele athu a luholo luene. Uvi muawevewe.” (1 Kol. 6:9-11) Wajiya gutangiza egi athu a luholo elu ajiya gusombegesa makalegelo awo abola nu ajiya nji gubua alandudi a Klisto ba?

¹⁷ Mangino, athu avula ana gusombegesa makalegelo awo nu ana gubua alandudi a Yesu. Pionye spesiale mumoshi mu jina dia Yukina gu Australie, wakotelesele gamba, athu a maluholo agasue ajiya gutegelela lukuma luabonga lua Biblia. Lusugu lumoshi, hakhalele muene gu fundo dia mudimo, wamonele mukhetu mumoshi  wakhalele nu tatouage mu muila, nu gasudigilego mu luholo luawaha. Yukina udi muzuela egi: “Thomo, ngavuile woma, uvi gungima ngasendesele guta nenji maga. Ngakotelesele diago egi wakhalele musuanguluga nu Biblia, tatouage jiko jiasonegele muene mu muila jiakhalele verse jia mukanda wa Ngimbo!” Mukhetu muene wasendesele gulonguga Biblia nu guya mu gudibungisa gua mu hungu. *

18. Mukunda natshi tushigo naye gusophesa athu ako?

¹⁸ Tangua Yesu gazuelele gamba mbuto jidi hehi ha gumunyiwa, idi mumonesa egi wakhalele mutangiza egi athu avula mbaabua alandudi enji ba? Ndo sha. Biblia yadiangele guzuela gamba, phamba athu azonda mbaahaga gutshigina gudi Yesu. (Yone 12:37, 38) Yesu wakhalele nu ngolo jia gujiya ndaga jidi mu mitshima ya athu. (Mat. 9:4) Gahagelego mutshima phamba gudi athu azonda akhalele muhaga gutshigina gudi muene, uvi walongesele nji nu gikhesa gudi athu agasue. Esue tuanago gujiya ndaga jidi mu mitshima ya athu, hene tuajiyilego gukhala nu matangi abola mukunda nu athu a mu terituare yetu! Uvi, mona athu ene egi ajiya gubua alandudi a Klisto. Phangi Marc yonu udi misionere gu Burkina Faso udi muzuela egi: “Athu ngakhalele mutangiza egi ajiya gukula mu nyuma, gungima atunyile gawo gulonguga Biblia. Uvi anyi ngakhalele mutangiza egi mbaakudigo mu nyuma, ene akudile. Hene, longo ngazudile didi egi tudi naye gubemba egi nyuma ya Yehowa itutuameze.”

19. Luholo lutshi tudi naye gutadila athu a mu terituare yetu?

¹⁹ Thomo wajiya gutangiza egi mu terituare yaye mushigo nu athu avula adi gifua mbuto jidi hehi ha gumunyiwa. Uvi, ujimbilago ndaga Yesu gawambelele alandudi enji. Mbuto jiakodi gale, nu jidi hehi ha gumunyiwa. Athu ajiya gusombegesa nu ajiya gubua alandudi a Klisto. Yehowa wana gumona athu ene gifua ‘ima ya ndando.’ (Hag. 2:7) Gula tudi mumona athu ene gifua luholo Yehowa nu Yesu ana guamona, mbatukamba gujiya ndaga jia fami jiawo nu eji jiana guasuanguluisa. Mbatushigo mutadila athu gifua ngenji, uvi mbatuamona egi ajiya gubua Matemue a Yehowa.