1-2. Ia wehwehn sapwellimen Sises mahsen ko nan Sohn 4:35, 36?

SISES ketin alialu karanih mwaht akan, ele mwaht en parli me ahpwtehn tepida kekeirda. (Sohn 4:3-6) Wahn mwaht pwukat pahn kakehr dondol sounpwong pahieu mwurin ahnsowo. Eri dahme Sises mahsanih ele ekis ehusoahng. E mahsanih: “Sarada oh kilangwohng mwaht akan me mahier oh kakehr dondol.” (Wadek Sohn 4:35, 36.) Ia wehwehn met?

² E sansal me dahme Sises mahsanih kin dokedoke doadoahk en kihpene aramas akan. Medewehla dahme ahpwtehn wiawi. Mendahki mehn Suhs kan kalapw soikala mehn Sameria kan, Sises ketin kalohk ong lihen Sameria men, oh liho rong ih! Ni mehlel, nin doken Sises eh mahmahsanih duwen mwaht akan me “mahier oh kakehr dondol,” pokon en mehn Sameria kei me rongasang liho duwen Sises kohkohdo reh pwe ren kalaudehla arail esehla duwen ih. (Sohn 4:9, 39-42) Emen ohl me samanih Paipel koasoia duwen ahnsowo: “Ngoang me aramas ako ahneki . . . kasalehda me re rasehng wahn mwaht kan me kakehr dondol.”

3. Ma ke kin kilangwohng aramas akan ni ahlohte me Sises kin ketin wia, ia duwen met eh kak kamwahwihala omw kin kalohk?

³ Ahpw ia duwen aramas akan me ke kin kalohkihong rongamwahwo? Ke medewe me re rasehng wahn mwaht akan me kakehr dondol? Ma ei, mie soahng siluh me pahn wiawi. Keieu, ke pahn kalaudehla omw karuwaru nan doadoahk en kalohk. Mie irepen ahnsoun dondol, eri dehr kauwehla mwahl ahnsowo. Keriau, ke pahn peren ni omw kilang aramas akan ar mwekidki rongamwahwo. Paipel mahsanih: “Aramas akan . . . kin pereperenki ar kin dolung wahnsahpw.” (Ais. 9:3) Oh kesiluh, ke pahn kilangwohng emenemen aramas nin duwen emen me kak wiahla tohnpadahk men, eri ke pahn wekidala mwomwen omw koasoi pwehn kak pahrekiong dahme e kin nsenohki.

4. Dahme kitail pahn sukuhlkihsang wahnpoaron Pohl nan iren onop wet?

 ⁴ Ekei sapwellimen Sises tohnpadahk kan ele medewe me mehn Sameria kan sohte pahn kak wiahla sapwellime tohnpadahk. Ahpw Sises sohte ketin medewe met. E ketin kilangwohng irail nin duwen aramas kei me kak wiahla sapwellime tohnpadahk. Kitail pil anahne kilangwohng aramas akan nan atail wasahn kalohk nin duwen aramas kei me kak wiahla sapwellimen Krais tohnpadahk. Wahnpoaron Pohl wiahda mehn kahlemeng me uhdahn mwahu me kitail en alasang. Dahme kitail kak sukuhlkihsang ih? Nan iren onop wet, kitail pahn koasoiapene ia duwen Pohl eh (1) ese dahme aramas akan kin kamehlele, (2) wehwehki dahme re kin nsenohki, oh (3) kin kilangwohng irail nin duwen aramas kei me kak wiahla sapwellimen Sises tohnpadahk.

5. Dahme kahrehda Pohl kak wehwehki aramas ako nan sinakokeo?

⁵ Pohl kin kalapw kalohk nan sinakoke kan en mehn Suhs ko. Karasepe, nan sinakoke en Deselonika, “erein rahnen sapad siluh, e kin padahkih irail [mehn Suhs kan] sang ni eh sewesehkin irail en medemedewe Nting Sarawi kan.” (Wiewia 17:1, 2) Ele Pohl ahn mihmi nan sinakokeo. E tikida nin duwen mehn Suhs men. (Wiewia 26:4, 5) Pohl kak wehwehki mehn Suhs ko, eri e kak padahk ong irail ni soh per.​—Pil. 3:4, 5.

6. Ia duwen aramas akan nan wasahn netinet en mehn Adens ko ar weksang irail kan me Pohl koasoiong nan sinakokeo?

⁶ Mwurin sounuhwong kei pwakihasang Pohl nan Deselonika oh mwuhr sang Peria, e lella Adens. E pil pwurehng “tepida padapadahk nan sinakokeo ong mehn Suhs oh meteikan me kin kaudokiong Koht.” (Wiewia 17:17) Ahpw ni eh kalohk nan wasahn netinet kan, aramas akan wasao weksang irail me e koasoiong nan sinakokeo. Nanpwungen aramas akan me e koasoiong iei sounpadahk kei oh mehn liki kei me ndahki ahn Pohl padahko “padahk kapw” ehu. Irail ndaiong Pohl: “Ke kin koasoia soahng kei me se sohte kin rong.”​—Wiewia 17:18-20.

7. Nin duwen me Wiewia 17:22, 23 mahsanih, ia duwen Pohl eh kin wekidala mwomwen eh koasoi?

⁷ Wadek Wiewia 17:22, 23. Mwomwen Pohl eh padahk ong mehn likih kan nan Adens weksang mwomwen eh koasoiong mehn Suhs kan nan sinakokeo. Ele Pohl pein idek reh, ‘Dahme mehn Adens pwukat kamehlele?’ E kin tehk mwahu soahng kan me mi wasao oh pil ahn aramas ako tiahk ong kaudok. Eri, ni eh padahkihong irail duwen padahk mehlel sang Nting Sarawi kan, e tepikihda soahng kan me re eseier oh kamehlele. Emen ohl me samanih Paipel koasoia: “Nin duwen mehn Suhs Kristian men, e ese  me mehn Krihs kan sohte kin kaudokiong Koht ‘mehlelo’ me mehn Suhs oh Kristian kan kin kaudokiong, ahpw e kin song en kasalehiong mehn Adens ko me Kohto me e kin kalohki duwe iei ih Kohto me irail pil kin ese.” Eri Pohl kin men wekidala mwomwen eh koasoi. E ndahng mehn Adens kan me dahme e kalohki kin kohsang rehn “Koht Emen me Sohte me Ese,” me re kin songosong en kaudokiong. Mendahki mehn likih kan sohte ese duwen Nting Sarawi kan, Pohl sohte medewe me re sohte pahn kak wiahla Kristian kei. Ahpw e kilangwohng irail nin duwen aramas kei me rasehng wahn mwaht kan me kakehr dondol, oh e wekidala mwomwen eh koasoia rongamwahwo.

8. (a) Ia duwen omw kak esehda mehnia pelien lamalam me aramas akan nan omw wasahn kalohk kin iang? (b) Ma emen pahn nda me mie pein eh pelien lamalam, ia duwen omw pahn sapeng?

⁸ Duwehte Pohl, tehk mwahu soahng kan. Rapahki soahng kan me kak seweseiuk en wehwehki dahme aramas akan nan omw wasahn kalohk kin kamehlele. Ia mwomwen tohnihmwo eh kapwatahda imweo de were sidohsao? Ia duwe, ke kak kasawihada mehnia pelien lamalam me e kin iang sang ni edeo, eh likou oh kapwat, de pil mwomwen eh koasoi? Mwein e ndaiong uhk ni inen me mie pein eh pelien lamalam. Ni ahnsou me met wiawihong emen pioneer tohrohr me adaneki Flutura, e sapengki tohnihmwo, “I kohdo, kaidehn pwehn idingkihong uhk en kamehlele dahme I kin kamehlele, ahpw pwehn koasoiaiong uhk duwen ire wet . . . ”

9. Ire dah kan me ke kak koasoiaiong emen me kin poadidiong eh pelien lamalam?

⁹ Ire dah kan me ke kak koasoiaiong emen me kin poadidiong eh pelien lamalam? Song en diarada soahng kan me kumwa koaros pwungki. Ele e kin kaudokiong Koht emente, pohnese me Sises iei Sounkomourpatail, de mwein e kin kamehlele me kitail mi ni ahnsou suwed ehu me pahn kereniong imwisekla. Doadoahngki dahme kumwa pwungkipene pwehn ehukihong ih padahk en Paipel ni ahl ehu me e pahn perenki rong.

10. Dahme kitail anahne song en wia, oh dahme kahrehda?

¹⁰ Tamataman me aramas akan ele sohte kamehlele soahng koaros me arail pelien lamalamo kin padahngki. Eri mwurin omw esehda mehnia pelien lamalam me emen kin iang, song en esehda dahme pein ih kin kamehlele. David, emen pioneer tohrohr sang Australia koasoia: “Aramas tohto ahnsou wet kin doaloapene padahk en aramas loalokong kan en sampah ong padahk en arail pelien lamalamo.” Donalta sang Albania koasoia: “Ekei me se tuhwong kin nda me mie pein arail pelien lamalam, ahpw mwuhr re uhd nda me re sohte uhdahn kamehlele duwen Koht.” Oh emen brother me wia misineri sang Argentina koasoia me ekei aramas nda me  re kamehlele padahk en Koht Sahm, Koht Nah, Koht Ngehn Sarawi, ahpw re sohte uhdahn kamehlele me Sahmo, Sapwellimeo, oh ngehn sarawi wia Koht tehmen. E nda: “Ei ese duwen met kin kahrehda en mengei ong ie en diarada ire ehu me se kak pwungkipene.” Eri song en diarada dahme aramas akan kin uhdahn kamehlele. Ma ke wia met, ke kak “wialahr soahng koaros rehn soangen aramas koaros,” duwehte me Pohl kin wia.​—1 Kor. 9:19-23.

11. Nin duwen me Wiewia 14:14-17 mahsanih, ni ahl kaselel dahieu me Pohl koasoiong aramas akan nan Listra?

¹¹ Wadek Wiewia 14:14-17. Pohl esehda dahme sounrongorong kan kin nsenohki, oh e wekidala mwomwen eh koasoi. Karasepe, pokon me e koasoiong nan Listra sohte ese duwen Nting Sarawi kan. Eri Pohl koasoi ni ahl ehu me re kak wehwehki. E koasoia duwen ahnsoun dolung wahnsahpw oh arail kak ahneki mour nsenamwahu. E doadoahngki lepin lokaia oh karasaras kan me sounrongorong kan kak mwadang wehwehki.

12. Ia duwen omw kak esehda dahme emen kin nsenohki oh wekidala mwomwen omw koasoi?

¹² Doadoahngki loalokong pwehn esehda dahme aramas akan nan omw wasahn kalohk kin nsenohki oh wekidala mwomwen omw koasoio. Ia duwen omw kak esehda dahme aramas emen nsenohki ni omw alialu kohlahng ni imweo? Duwehte dahme kitail koasoia mwoweo, tehk mwahu soahng kan. Mwein e wie doadoahk nan eh mwetuwelo, wadewadek pwuhk, wiewia were sidohsao, de wiewia soahng teikan. Ma konehng, ke seu koasoia dahme e wiewiao pwehn tapiada amwa koasoi? (Sohn 4:7) Pil mwomwen ahn emen likou kak padahkihong uhk duwen aramaso​—mwein wasa me e kohsang ie, soangen doadoahk dah e kin wia, de mehnia pwihnen mwadong me e kin perenki. Gustavo nda: “I tepida koasoiong mwahnakapw men me sounpar 19 me eh singileso kasalehda sounkoul ndand men. I idek reh duwen sounkoulo, oh mwahnakapwo ndaiong ie dahme kahrehda e perenki sounkoulo. At koasoio imwikihla at tepida onop Paipel, oh met e wiahlahr emen riatail Kristian.”

13. Ia duwen omw kak tapiada onop en Paipel ni ahl ehu me pahn kamwakid aramas?

 ¹³ Ni omw pahn idek rehn emen ma e men onop Paipel, wia ni ahl ehu me e pahn mwekidki oh kasalehiong ih ia duwen onop Paipel eh pahn sewese ih. (Sohn 4:13-15) Karasepe, tohnihmw men me perenki rong lukehlong sister men me ede Poppy nan imweo. Poppy kilangada diploma ehu ni ahn liho dihdo me kasalehda me liho professor men me sukuhlki duwen palien kasukuhl. Ni Poppy eh esehda met, e kawehwehda mwahu me kitail pil kin kasukuhlih aramas akan sang atail prokram en onop en Paipel oh pil atail mihting kan. Liho pwungki en onop Paipel, rahno mwuri e iang mihting, oh sohte pwand mwurin mwo, e kohla iang towehda mihting tohrohr ehu. Sounpar ehu mwuri, liho papidaisla. Pein idek rehmw: ‘Dahme irail kan me I kin pwurehng pwurala rehrail kin nsenohki? I kak kawehwehda atail prokram en onop Paipel ni ahl ehu me pahn kamwakid irail?’

14. Ia duwen omw kak wekidala mwomwen omw onop Paipel rehn emenemen noumw tohnsukuhl?

¹⁴ Mwurin omw tepida onopki Paipel rehn emen, kaunopada mwahu ong ehuehu onop ko me ke pahn wia reh. Medewehla duwen soangen aramas dah ih oh dahme e kin men ese. Ni omw kin kaunopada, pilada iren Paipel kan me ke pahn wadek, kisin kasdo kan me ke pahn kasalehda, oh karasaras kan me ke pahn doadoahngki pwehn kawehwehda padahk mehlel en Paipel kan. Pein idek rehmw, ‘Dahme pahn uhdahn kamwakid oh sair mohngiong en tohnsukuhl menet?’ (Lep. Pad. 16:23) Nan Albania, pioneer men me ede Flora kin onop rehn lih emen me nda, “I sohte kak pwungki padahk en kaiasada.” Flora sohte song en idingkihong liho en mwadang pwungki padahk wet. E nda, “I medewe me e anahne mahs esehla Kohto me ketin inoukihda duwen kaiasada.” Sang ahnsowo kohla, ni ehuehu ahnsoun onop ko, Flora kin kawehwehda mwahu duwen sapwellimen Siohwa limpoak, erpit oh kehl. Mwuhr, nah tohnsukuhlo pwosonla duwen kaiasada. Met e wia Sounkadehdehn Siohwa ngoang men.

15. Nin duwen me Wiewia 17:16-18 mahsanih, soangen tiahk dah kan me mehn Krihs kan kin wia me kapwunode Pohl, ahpw dahme kahrehda e sohte uhdihsang kalohk ong irail?

¹⁵ Wadek Wiewia 17:16-18. Pohl sohte uhdihsang kalohk ong mehn Adens kan, mendahki arail kin kaudokiong dikedik kan oh wia tiahk samin me pid wia nsenen pwopwoud oh kamehlele erpit en irail kan me sohte kin nsenohki Koht. Oh e sohte uhdihsang kalohk ong irail mendahki arail kauwe ih. Pein Pohl wiahla Kristian men, mendahki e wia “sounlahlahwe, sounkalokolok oh aramas pohnmwahso men.” (1 Tim. 1:13) Duwehte Sises eh ketin kamehlele me Pohl kak wiahla emen tohnpadahk, Pohl pil kamehlele me mehn Adens kan kak wiahla tohnpadahk kei. Oh dahme e medewe uhdahn pweida.—Wiewia 9:13-15; 17:34.

16-17. Dahme kasalehda me soangsoangen aramas koaros kak wiahla sapwellimen Krais tohnpadahk? Menlau kihda ehu karasaras.

¹⁶ Ni mwehin wahnpoaron ko, soangsoangen aramas akan wiahla sapwellimen Sises tohnpadahk kei. Ni Pohl eh ntinglahng Kristian kan me kin kousoan nan ehu kahnimw nan Krihs me adaneki Korint, e nda me ekei nan mwomwohdisou wia aramas mwersuwed kei mahso de re kin mourki tiahk samin me uhdahn kapwuriamwei. Ahpw e pil nda: “Ih duwen ekei kumwail mahso. Ahpw met kumwail mwakelekeldahr.” (1 Kor. 6:9-11) Ia duwe, ke pahn kak kasawihada me aramas ako kak wekila oh wiahla tohnpadahk kei?

¹⁷ Rahnwet, me tohto men wiahda wekidekla kan me anahn pwe ren wiahla sapwellimen Sises tohnpadahk. Karasepe, nan Australia, pioneer tohrohr men me adaneki Yukina esehda me soangsoangen aramas koaros kak mwekidki  padahk en Paipel. Ehu pako, nan ohpis en pesines ehu, e kilang peinakapw men me diren pelipel ni kilio oh likawih likou me nohn walek. Yukina nda: “I ekis pweiek nin tapio, ahpw mwuhr I tepida koasoiong ih. I diarada me e kin uhdahn perenki Paipel me kahrehda ekei pelipel ko me ntingdi ni kilio kohsang pwuhken Melkahka!” Peinakapwo tepida onop oh towehda mihting kan. *

18. Dahme kahrehda kitail en dehr kadeik aramas akan?

¹⁸ Ia duwe, Sises ketin medewe me mwaht akan mwahuwongehr dondol pwehki e ketin kasik me pali laud en aramas akan pahn idawehnla ih? Uhdahn soh. Paipel kohpada me aramas malaulaute me pahn pwosonla ih. (Sohn 12:37, 38) Sises pil sapwellimanki koahiek en mwahngih dahme mi nan mohngiong en aramas. (Mad. 9:4) Ahpw e ketin medemedewehte irail me malaulau kan me pahn kamehlele ih, eri ni ngoang, e ketin kalohk ong koaruhsie. Kitail sohte kak ese dahme mi nan mohngiong en aramas, eri kitail en dehr kadeikada emen de atail wasahn kalohk! Ahpw kitail en kilang me aramas kak wiahla tohnpadahk men. Marc, emen misineri nan Burkina Faso, nda: “Aramas akan me I leme pahn kekeirda kin kalapw uhdihsang onop. Ahpw aramas akan me I medewe sohte pahn kekeirda kin uhdahn pweida mwahu. Eri I sukuhlki me e mwahu en mweidohng sapwellimen Siohwa manaman en kaweid kitail.”

19. Ia duwen atail en kilangwohng aramas akan nan atail wasahn kalohk?

¹⁹ Nin tapio, ele ke medewe me aramas malaulaute nan wasahn kalohko me rasehng wahn mwaht akan me kakehr dondol. Ahpw tamataman dahme Sises mahsanihong sapwellime tohnpadahk ko. Mwaht akan mahier oh kakehr dondol. Aramas akan kak wekila oh wiahla sapwellimen Krais tohnpadahk. Siohwa ketin kilangwohng irail pwukat me kak wiahla tohnpadahk kei nin duwen “dipwisou kesempwal” kei. (Ak. 2:7) Ma kitail kin kilangwohng aramas akan ni ahlohte me Siohwa oh Sises kin ketin wia, kitail pahn esehda soangen aramas dah kei irail oh dahme re kin nsenohki. Kitail pahn kilangwohng irail, kaidehn nin duwen aramas ekei me kitail sehse, ahpw nin duwen riatail Kristian kei.