1, 2. ¿Tuku xlakata Jesús wa tachuwin nema likgalhtawakgayaw kJuan 4:35, 36?

AKXNI Jesús xʼama kʼGalilea, makglhuwa titaxtulh klhuwa kapukuxtun niku xchankanit cebada, nema xaxtakniku xtasiya o aku xpuma (Juan 4:3-6). Maski xtsankga akgtati papaʼ xlakata xmakika tachanan. Wa xlakata kstalaninanin Jesús kaks lilakawankgolh akxni kawanilh: «Katalakayawatit chu kaʼakxilhtit, kapukuxtun lhmukukuta, chu tlantiya namakikan tachanan» (kalikgalhtawakga Juan 4:35, 36). ¿Tuku xkilhchanima?

² Jesús kaj wi tuku xtamalakxtumima uma, xkakilhchanima latamanin. Kalilakpuwaw tuku lalh. Maski judíos ni xtalalinkgo samaritanos, Jesús tachuwinalh chatum puskat xalak Samaria, chu puskat liwana kgaxmatnilh. Akxni Jesús xlichuwinama pi «kapukuxtun lhmukukuta, chu tlantiya namakikan tachanan», puskat kalitachuwinalh lhuwa samaritanos xlakata Jesús chu xlakan talakatsuwikgolh xlakata tlakg nakatsikgo (Juan 4:9, 39-42). Maktum libro nema lu lakgapaskan wan: «Xlakata uma latamanin lu xkatsiputunkgo, limasiyalh pi xtachuna talhtsi xwankgonit nema xtalakaskin namakikan».

3. ¿Tuku xlakata tlakg tlan nalichuwinanaw Dios komo nakaʼakxilhaw latamanin chuna la xkaʼakxilha Jesús?

³ ¿Chu akinin? ¿La kaʼakxilhaw latamanin tiku kaliniyaw xalakwan tamakatsinin? ¿Lakpuwanaw pi latamanin xtachuna la talhtsi nema katlata xlakata namakikan? Komo chuna natlawayaw, pulaktutu tuku tlan nakitaxtu. Pulana, tlakg xlakaskinka naʼakxilhaw nalichuwinanaw Dios. Xlakata xakatla tachanan ni lhuwa kilhtamaku makgapala, talakaskin lu namalakapaliyaw. Xlipulaktiy,  lipaxuwayaw akxni tlawayaw uma taskujut. Biblia wan: «Latamanin paxuwakgo akxni xlitamakita tachanan» (Is. 9:3). Chu xlipulaktutu, nakaʼakxilhaw chatunu latamanin la komo tiku xasasti kstalaninanin Cristo nalitaxtu, wa xlakata nalitachuwinanaw akgtum tema xalak Biblia nema xla katsiputun.

4. ¿Tuku katsiniyaw xlakata apóstol Pablo kʼuma artículo?

⁴ Jesús ni lakpuwa pi samaritanos nikxni kstalaninanin xʼamakgo litaxtukgo, chuna la xlakpuwankgo makgapitsi kstalaninanin. Wata kaʼakxilhli la komo tiku kstalaninanin xlitaxtukgolh. Nachuna nakaʼakxilhaw latamanin niku lichuwinanaw Dios. Apóstol Pablo kinkawilinin lu tlan liʼakxilhtit. Kʼuma artículo nalichuwinanaw pulaktutu tuku tlan nakatsiniyaw xpalakata. Pulana, xkatsi tsinu tuku xkanajlakgo tiku xkgaxmatnikgo. Pulaktiy, xkaʼakgatekgsni tuku xlilakgaputsakgo. Chu xlipulaktutu, xkaʼakxilha la komo tiku kstalaninanin Cristo xʼamakgo litaxtukgo.

5. ¿Tuku xlakata xkaʼakgatekgsni Pablo tiku xkgaxmatnikgo ksinagoga?

⁵ Pablo ankgalhin xlichuwinan Dios ksinagogas xla judíos. Akgtum liʼakxilhtit, katachuwinalh judíos ksinagoga nema xwi kTesalónica, chu «makgtutu xlimixatujunan akxni [sábado], lalixakgatlikgolh xtachuwin Dios» (Hech. 17:1, 2). Max lu tlan xmakgkatsi xtawila ksinagoga, xlakata xmakgastakkanit chuna la chatum judío (Hech. 26:4, 5). Xkaʼakgatekgsni judíos chu wa xlakata ni xpekuan akxni xkalitachuwinan Dios (Filip. 3:4, 5).

6. ¿Tuku xlitalakgpali tiku xkgaxmatnikgo Pablo ksinagoga chu tiku xwilakgolh kmercado xalak Atenas?

⁶ Akxni xtalamakgasitsin Pablo tlawakgolh pi xtaxtulh kTesalónica chu nachuna tlawaka kBerea, alh kʼAtenas. Akxni anta xwi «xtalaxakgatlikgoy judíos kxpukgalhtawakgakan, chu nti xmaxkiy nkakni Dios» (Hech. 17:17). Pero akxni lichuwinalh Dios kmercado katatanokglhli atanu latamanin. Na anta xwilakgolh filósofos chu tiku ni judíos xwankgonit, wa xlakata xtachuwin Pablo xliʼakxilhkgo la «xasasti tamasiyun». Wanikgolh: «Sampi xalaksasti tachuwin ntu nkinkalixakgatliya» (Hech. 17:18-20).

7. Chuna la wan Hechos 17:22, 23, ¿tuku tlawalh Pablo xlakata nalichuwinan Dios?

⁷ (Kalikgalhtawakga Hechos 17:22, 23). Pablo nichuna kalitachuwinalh xtachuwin Dios latamanin xalak Atenas chuna la kalitachuwinalh judíos xalak sinagoga. Max lu lilakpuwa tuku xkanajlakgo tiku xalak Atenas. Lu kuentajtlawalh tuku xʼanan anta chu  xtalismaninkan xlakata xtakanajlakan. Alistalh kuentajtlawalh tuku xkanajlakgo chu putsalh la nakalitachuwinan xTachuwin Dios. Chatum tiku lakputsanani Biblia lichuwinan xlakata Pablo: «Xlakata xla judío tiku kstalanina Cristo xwanit, xkatsi pi lhuwa griegos ni wa xmaxkikgo kakni “xaxlikana” xDioskan judíos chu kstalaninanin Cristo chu xkamasiyaniputun pi [...] Dios nema xla xlichuwinama ni wa chatum Dios nema xlakan ni xlakgapaskgolh». Wa xlakata apóstol Pablo kuentajtlawalh la xʼama kalitachuwinan Dios. Kawanilh latamanin xalak Atenas pi tamakatsinin nema xlichuwinan wa xla chatum Dios tiku «ni lakgapaskan» tiku xlakan xkakninaniputunkgo. Maski tiku ni judíos ni xlakgapaskgo Tatsokgni, Pablo ni lakpuwa pi xlakan nila kstalaninanin Cristo xlitaxtukgolh. Wata kaʼakxilhli xtachuna la talhtsi xakatlata nema xlitamakita chu kuentajtlawalh la xkalitachuwinalh xalakwan tamakatsinin.

8. 1) ¿Tuku nakinkamakgtayayan nakatsiyaw tuku kanajlakgo latamanin niku lichuwinanaw Dios? 2) ¿Tuku tlan nawaniyaw komo wi tiku nakinkawaniyan pi kgalhiya xtakanajla?

⁸ Chuna la Pablo, liwana kaʼakxilhwi tuku anan. Liwana kaʼakxilhwi tuku kgalhikgo latamanin niku lichuwinanaw Dios xlakata nakatsiyaw tuku kanajlakgo. ¿Wi tuku anan kxchik? ¿Xtukuwani, xtalhakgan, la takaxtaya o la chuwinan kinkamasiyaniyan tuku takanajla kgalhi? O max kinkawanikgoyan pi kgalhikgoya xtakanajlakan. Akxni chuna titaxtu chatum precursora especial wan: «Ni wa klilakgmiman xlakata nakanajlaya tuku kknajla, kajwatiya klitachuwinamputunan xlakata...».

9. ¿Tuku kanajlayaw nema amakgapitsin nachuna kanajlakgo?

⁹ ¿Tuku tlan nalitachuwinanaw chatum lataman tiku kgalhiya xtakanajla? Kaputsaw tuku nalichuwinanaw. Max xla kanajlani chatum Dios, katsi pi Jesús kinkalakgmaxtun ktalakgalhin o lakpuwan pi namasputukan tuku nitlan lama. Kalimaklakaskiw tuku na kanajlayaw xlakata tlakg tlan nalitachuwinanaw Biblia.

10. ¿Tuku naliskujaw natlawayaw chu tuku xlakata?

¹⁰ Kalilakpuwaw pi max lataman ni kanajla putum tuku masiyakan kxtakanajla. Wa xlakata akxni nakatsiyaw niku tapakgsi, kaliskujwi nakatsiyaw tuku kanajla. Chatum precursor xalak Australia wanikan David wan: «La uku, lhuwa lakgxtum tatlawakgo xtakanajlakan tuku lakpuwankgo xalakgskgalalan latamanin». Chatum tala puskat xalak Albania wanikan Donalta wan: «Min kilhtamaku kkatachuwinanaw latamanin tiku wankgo pi kgalhikgoya xtakanajlakan, pero alistalh wankgo pi ni kanajlanikgo Dios». Chu chatum misionero xalak Argentina wan pi makgapitsi kanajlanikgo trinidad pero ni kanajlakgo pi xaTlat, xaKgawasa chu espíritu  santo kaj chatum litaxtu. Chu wampara: «Komo nakatsiya uma, namakgtayayan tlakg ni tuwa nalitachuwinana Dios». Wa xlakata, kaliskujwi nakatsiyaw tuku xlikana kanajlakgo latamanin. Wa xlakata, chuna la Pablo nalitaxtuyaw «kaxatikawaj» latamanin (1 Cor. 9:19-23).

11. Chuna la wan Hechos 14:14-17, ¿la tlawalh Pablo xlakata latamanin xalak Listra nalakgatikgo la xlichuwinan Dios?

¹¹ (Kalikgalhtawakga Hechos 14:14-17). Pablo x’akxilha tuku xlilakgaputsakgo tiku xkatachuwinan chu wa xlakata wa xkalitachuwinan tuku xlilakgaputsakgo. Akgtum li’akxilhtit, latamanin xalak Listra ni lhuwa xkatsikgo o nitu xkatsikgo xlakata Tatsokgni. Wa xlakata Pablo kalitachuwinalh tuku xlakan xlakgapaskgo, la komo lhuwa tachanan chu la xatapaxuwan latamakan. Maklakaskilh tachuwin chu li’akxilhtit nema ni laktuwa.

12. ¿Tuku tlan natlawayaw xlakata nakatsiyaw tuku lilakgaputsa chatum lataman chu wa nalitachuwinanaw tuku lilakgaputsa?

¹² Kaliskujwi nakatsiyaw tuku lilakgaputsa chatum lataman niku lichuwinanaw Dios chu wa kalitachuwinan tuku lilakgaputsama. ¿La natlawayaw xlakata nakatsiyaw tuku lilakgaputsa chatum lataman akxni nalakgtalakatsuwiyaw o akxni natalakatsuwiyaw kxchik? Chuna la lichuwinaw, talakaskin liwana na’akxilhaw tuku anan. Max skujma kjardín, likgalhtawakgama maktum libro, kaxtlawama putlaw o atanu tuku tlawama. Komo tlan akxilhaw, tlan nalimatsukiyaw takgalhchuwin xlakata tuku tlawama (Juan 4:7). Asta klhakgat lataman wi tuku nakinkamasiyaniyan xpalakata: xkachikin, tuku liskuja o tuku takgaman lakgati. Chatum tala wanikan Gustavo wan: «Ktsukulh tachuwinan chatum kgawasa tiku kgalhi 19 kata tiku klhakganit maktum playera xla chatum tiku kilhtli. Wi tuku kgalhskilh xlakata xplayera, chu kiwanilh tuku xlakata xlakgati la xkilhtli ama lataman. Uma kgawasa makglhtinalh takgalhtawakga xalak Biblia, chu la uku chatum kintalakan litaxtu».

13. ¿La tlan namalaknuyaw akgtum takgalhtawakga xalak Biblia xlakata lataman lu nalakgati?

¹³ Akxni namalaknuniyaw akgtum takgalhtawakga xalak Biblia chatum lataman natlawayaw  pi lu nalakgati. Kawaniw la namakgtaya kxlatamat (Juan 4:13-15). Akgtum liʼakxilhtit, chatum puskat wanilh chatum tala wanikan Hester pi xtanulh kxchik, xlakata puskat lakgatilh tuku litachuwinanka. Akxni tala akxilhli xdiploma uma puskat katsilh pi makgalhtawakgana xwanit, wanilh pi akinin nachuna masiyayaw kkintamakxtumitkan chu limakgalhtawakgananaw Biblia. Puskat makglhtinalh takgalhtawakga xalak Biblia, lichali kilalh kʼakgtum tamakxtumit chu alistalh kilalh kʼakgtum xalanka tamakxtumit. Titaxtulh akgtum kata tamunulh. Kalilakpuwaw: «¿Tuku lilakgaputsakgo latamanin tiku kkalakgapaxialhnan? ¿Tlan liwana nakkawani la tlawakan takgalhtawakga xalak Biblia xlakata nalakgatikgo?».

14. ¿La natlawayaw xlakata chatunu chatunu tiku makgalhtawakgayaw wa nalitachuwinanaw tuku lilakgaputsa?

¹⁴ Komo matsukinitaw akgtum takgalhtawakga xalak Biblia, liwana kalakkaxwiliw tuku nalitakgalhtawakgayaw, chu kuenta natlawayaw tuku lilakgaputsa chu tuku katsiputun. Kalilakpuwaw textos nema nalikgalhtawakgayaw, videos nema namasiyaniyaw chu liʼakxilhtit nema namaklakaskinaw xlakata nalitachuwinanaw tuku xaxlikana xalak Biblia. Kalilakpuwaw tuku lu katsiputun chu nalakgchan xnaku (Prov. 16:23). Anta kʼAlbania, chatum precursora wanikan Flora xlimakgalhtawakgama Biblia chatum puskat tiku lichuwinalh: «Nila kmakgamakglhtinan tamasiy xla talakastakwanat». Flora ni fuerza wanilh. Xla lichuwinan: «Kkatsilh pi uma puskat pulana xlakgapasli Dios tiku malaknu talakastakwanat». Lata ama kilhtamaku, akxni xʼan makgalhtawakge, Flora tlakg xlichuwinan xtapaxkit, xliskgalala chu xlitliwakga Jehová. Titaxtulh kilhtamaku, puskat makgamakglhtinalh uma tamasiy. Chu la uku xatapaxuwan skujnanima Jehová.

15. Chuna la wan Hechos 17:16-18, ¿tuku talismanin xkgalhikgo xalak Atenas nema nitlan xʼakxilha Pablo, pero tuku xlakata ni lakpuwa pi nila kstalaninanin Cristo xlitaxtukgolh?

¹⁵ (Kalikgalhtawakga Hechos 17:16-18). Latamanin xalak Atenas xkakninanikgo nixaxlikana dioses, xtlawakgo talakgxtumit xalimaxana chu xkanajlakgo nixaxlikana xtamasiykan filósofos. Pero Pablo ni lakpuwa pi nila kstalaninanin Cristo xlitaxtukgolh chu ni litaxlajwanilh maski xmamaxanikgo. Xla kstalanina Cristo litaxtulh maski “xalipulana xmaxkajwaliy Jesús, chu na xtalatlaway, chu na xliʼakgxlokgonan” (1 Tim. 1:13). Chuna la Jesús akxilhli Pablo la komo chatum kstalanina, Pablo nachuna kaʼakxilhli latamanin xalak Atenas. Chu chuna kitaxtulh, xnatalan litaxtukgolh (Hech. 9:13-15; 17:34).

16, 17. ¿Tuku liʼakxilhtit kinkamasiyaniyan pi kaxatikawa latamanin tlan kstalaninanin Cristo nalitaxtukgo?

¹⁶ Kxapulana siglo, kaxatikawa latamanin kstalaninanin Jesús litaxtukgolh. Akxni Pablo katsokgnanilh kstalaninanin Cristo xalak Corinto, lichuwinalh pi xapulana makgapitsi kgalhananin xwankgonit chu xtlawakgo talakgxtumit xalimaxana. Chu alistalh wampa: «Pero wixin kachakgakanitantit» (1 Cor. 6:9-11). ¿Xlakpuwaw pi ama latamanin tlan xlakgpalikgolh xlatamatkan chu kstalaninanin Cristo xlitaxtukgolh?

¹⁷ La uku, lhuwa latamanin lakgpaliputunkgo xlatamatkan xlakata kstalaninanin Cristo nalitaxtukgo. Akgtum liʼakxilhtit, chatum precursora especial xalak Australia wanikan Yukina akxilhli pi kaxatikawa lataman tlan namakgamakglhtinan tamakatsinin xalak Biblia. Akgtum kilhtamaku xwi anta niku kstakan chiki chu akxilhli chatum tsumat tiku xkgalhi tatuajes chu nitlan klhakgananit. Yukina lakapastaka: «Ni xaktachuwinamputun. Pero akxni ktachuwinalh,  kakxilhli pi lu xlakgati tuku lichuwinan Biblia chu asta makgapitsi xtatuajes xlimin makgapitsi tatsokgni xla Salmos». Uma tsumat makgamakglhtinalh takgalhtawakga xalak Biblia chu tsukulh an ktamakxtumit. *

18. ¿Tuku xlakata ni tunkun nalakpuwanaw pi latamanin ni katitalakgpalikgolh?

¹⁸ ¿Jesús lichuwinalh pi kapukuxtun tlantiya xmakika xatawakat xlakata xlakaskin pi putum latamanin kstalanikgolh? Ni, nichuna. Biblia xlichuwinanit pi kaj ni lhuwa tiku xʼamakgolh kanajlanikgo (Juan 12:37, 38). Nachuna Jesús tlan xkatsi tuku xwi kxnakujkan latamanin (Mat. 9:4). Maski chuna, xatapaxuwan kalitachuwinalh Dios putum latamanin, pero tlakg kalilakgaputsalh tiku kanajlanikgolh. Xlakata akinin ni katsiyaw tuku wi kxnakujkan latamanin, kaliskujwi xlakata ni tunkun nalakpuwanaw pi ni katitalakgpalikgolh. Wata kakaʼakxilhwi pi tlan kstalaninanin Cristo nalitaxtukgo. Chatum Misionero xalak Burkina Faso wanikan Marc, lichuwinan: «Klakpuwan pi tiku kstalanina Cristo tlan nalitaxtu ankgalhin makgxtakga xtakgalhtawakga. Pero tiku kakxilha pi ni kstalanina Cristo katilitaxtulh, lakapala tsuku tlawa talakgpalit. Kkatsininit pi tlakg tlan namastayaw talakaskin pi xʼespíritu Jehová nakinkapulalinan».

19. ¿La nakaʼakxilhaw latamanin niku lichuwinanaw Dios?

¹⁹ Max akxilhaw pi ni lhuwa latamanin niku lichuwinanaw Dios tasiyakgo xtachuna la talhtsi nema xakatlata chu tlantiya namakikan. Pero kalakapastakwi tuku kawanilh Jesús kstalaninanin. Kapukuxtun lhmukukuta, kilhchanima pi tlantiya namakikan tachanan. Latamanin tlan lakgpalikgo xlatamatkan chu kstalaninanin Cristo nalitaxtukgo. Xlakata Jehová “lhuwa xtapalh kaliʼakxilha” (Ageo 2:7). Komo chuna nakaʼakxilhaw la Jehová chu Jesús, nakaʼakgatekgsniyaw tuku lilakgaputsakgo latamanin chu tuku katsiputunkgo. Chu ni nakaʼakxilhaw la komo tiku nikxni katitalakgpalikgolh, wata nakaʼakxilhaw la tiku kinatalankan nalitaxtukgo.