1, 2. ¿Ambe arhikuekaspi Jesusi enga uandapka ambe enga Juanu 4:35, 36 jimbo jaka?

ENGA Jesusi Galilea nirani japka, jimesïsï nitamaspti nani enga tarekata japka, jamberi jimesïsï enga sebada uénapkia andarani (Juanu 4:3-6). Útasï tʼámu kutsï ísï kuerataxati para uarhotanhani. Jimajkani, Jesusi arhiasïndi imeri chúxapatichani ambe ma engaksï no újka sési kurhanguni: “Erajpa je iápurisï jimboka iámindu tsïpambiskia ka jarhastia para uarhotani” (arhinta je Juanu 4:35, 36). ¿Ambe arhikuekasïni Jesusi?

² Jesusi arhikuekaxati eskaksï jorhendauaka kʼuiripuechani Tata Diosïri ambe. Ju je eratsentani ini ambe. Nájkirukaksï judiuecha no kúnguarhijka samaritanuecha jingoni, Jesusi aiangusïndi Tata Diosïri ambe jima anapu uarhiitini ma enga jingontku kurhajchajka. Enga Jesusi útasï arhiani jarhajka eska iápurisï “tsïpambiskia” ka eska “jarhaskia para uarhotani”, uánikua Samaria anapuecha enga uarhiiti Jesusiri ambe aianguapka, nirasïndiksï Jesusini andarhierani paraksï sánderu jorhenguarhini imeri ambe (Juanu 4:9, 39-42). Inbestigadori ma ari ambe karasti: “Engaksï kʼuiripuecha ísï tsípikua jingoni nípka jirinhantani Jesusini [...] xarhatasptiksï eskaksï ísïspka enajkiksï listu japia paraksï uarhotanhani”.

3. ¿Andisïchi niáraa sánderu sési aianhpini engachi ísï exeaska kʼuiripuechani eska Jesusi na exeauenga?

³ ¿Ka juchaia? ¿Nénachi exeasïni imani kʼuiripuechani engachi Tata Diosïri ambe aianguajka? ¿Ísïchi exeasïni enajkiksï listu jakiia para uarhotanhani? Enga ísïka, jatsiskachi para tanimu ambe úni. Orheta, sánderuchi jánguarhintaaka aianhpini. Jimboka no káni tiempu jarhasïnga para pʼikuntskua o uarhotani ambe ma, jatsiskachi para sési úrani tiempuni. Tsimani úni jámani, sésichi pʼikuarheraaka engachi  jánguarhintaska ini ánchikuarhitani úni. Biblia arhisïndi eska kʼuiripu tsípisïnga jiáni enga tiempueka para pʼikuntskua (Is. 9:3). Ka tanimu úni jámani, jatsiskachi para ísï exeni kʼuiripuni eska sánderu orhepani niáraaka Jesusiri chúxapatini, ísï jimbo, jatsiskachi para ísï aianguani Tata Diosïri ambe seguni ambe engaksï imecha tsitijka.

4. ¿Ambechi jorhenguarhia apostuli Pablueri ambe ini jorhenguarhikua jimbo?

⁴ Jesusi no méni eratsespti eskaksï Samaria anapuecha no méni niárapiringa imeri chúxapatini, ísï eskaksï jamberi na eratsepiringa máru imeri chúxapaticha. Sánderu sési, eratsespti eskaksï sánderu orhepani niárapiringa imeri chúxapatini. Juchajtuchi jatsika para ísï exeani jima anapu kʼuiripuechani nani engachi aianhpijka. Apostuli Pablu ambakiti ejemplu máesti parachi juchajtu májkueni úni. Ini jorhenguarhikua jimbo, exeakachi tanimu ambe engachi uáka jorhenguarhini imeri ambe. Orheta, ima mítespti ambe engaksï jakajkuenga ima kʼuiripuecha enga aianguauenga. Tsimani úni jámani, exesïrendi ambe engaksï tsitienga. Ka tanimu úni jámani, exesïrendi eskaksï ima kʼuiripuecha úpiringa Jesusiri chúxapatini.

5. ¿Andisï uéni Pablu kurhangukuani imechani enga Tata Diosïri ambe aianguauenga sinagogarhu?

⁵ Pablu someni aianhpisïrendi judiuecheri sinagoguecharhisï. Por ejemplu, sinagogarhu enga Tesalonika japka, Pablu uandontskuarhespti judiuecha jingoni ka “tanimu semana jámaspti arhistakuani [...] Diosïri Karakatani jimbo” (Uku. 17:1-3). Ima kánikua sési pʼikuarherendi sinagogarhu, jimboka ísï kʼuiripespka eska judiu ma (Uku. 26:4, 5). Pablu kurhangukuasïrendi judiuechani ka jimbosï uéni sési uandontskuarheni imecha jingoni (Filip. 3:4, 5).

6. ¿Andiksïsï no májkuenipi ima kʼuiripuecha engaksï sinagoguecharhu kurhajchapka Pabluni ka ima kʼuiripuecha engaksï Atenasi anapu merkadurhu japka?

⁶ Engaksï imeri ikiatspiticha chúntapka Pabluni Tesalonika uératini ka ísï tátsekua jini Berea, ima Atenasi niraspti. Enga jini japkia, ménderu uénaspti “arhistakuani imechani engaksï janhanharhienga Diosïni ka ístu Israeli anapuechani [sinagogarhu]” (Uku. 17:17). Peru enga merkadurhu ísï aianhpienga, jima máteru jásï kʼuiripuechani exeantasïrendi. Jimesïsïksï jarhasïrendi kʼérati jorhenaticha ka ístu no judiuecha engaksï no méni kurhaani japka ambe enga Pablu aianhpienga. Arhisptiksï Pabluni: ‘I ambe engari tʼu uandajka iatiru ménderueni kurhangukuarhisïndi para jucha’ (Uku. 17:18-20).

7. Eska na arhijka Ukuecha 17:22, 23, ¿Pablu néna jirinhakuntasïreni para sési aianhpini?

⁷ (Arhinta je Ukuecha 17:22, 23). Pablu no májkueni aianguasïrendi Tata Diosïri ambe Atenasi anapuechani engaksï no judiuepka ka eska judiuechani engaksï sinagoguecharhisï jarhenga. Jamberi kurhamarhikuarhipti ambeksï jakajkueni Atenasi anapuecha. Jánguarhintasïrendi iámindu ambe exeni ka ístu imecheri relijioniri anapu  pʼindekuechani. Tátsekua, exesïrendi néna uénani uandontskuarheni ma amberi engaksï imecha jakajkuenga ka enga terukuntenga Tata Diosïri Karakata jingoni. Kʼuiripu ma enga Bibliaeri ambe inbestigarijka arini ambe uandasïndi apostuli Pablueri ambe: “Jimboka judiu máespka enga kristianuepka, exesïndi eskaksï grieguecha no kʼéri ambe arhisïnga judiuecheri ka kristianuecheri Tata Diosïni enga ‘jurhimbitika’, ka jánguarhintasïndi xarhatakuani [...] eska Tata Diosï enga ima kómarhijka, no jindeska Tata Diosï ma engaksï Atenasi anapuecha no míteka”. Jimajkani, apostuli jirinhakuntasïrendi néna aianhpini. Arhiaspti Atenasi anapuechani eska ambe enga ima aianhpienga, imani Tata Diosïri ambespka “enga no nema míteka” engaksï imecha jánguarhintenga kómarhini. Nájkirukaksï no judiuecha no mítepka ambe enga arhienga Tata Diosïri Karakata, Pablu no méni eratsespti eskaksï imecha no méni niárapiringa Jesusiri chúxapatini. Sánderu sési, ísï exeaspti enajkiksï listu japia para uarhotanhani ka jirinhakuntaspti néna aianguani ambakiti aianhperakuani.

8. a) ¿Ambejtsïni jarhuataa míteni ambeksï jakajkusïni kʼuiripuecha engachi Tata Diosïri ambe aianguajka? b) ¿Ambechi úpirini arhiani imechani engajtsïni arhijka eskaksï jatsiskia relijioni ma?

⁸ Ísï eska Pablu, ju je jánguarhintani iámindu ambe exeni. Ju je jánguarhintani exeni imani ambe engajtsïni jarhuataaka míteni ambeksï jakajkusïni jima anapu kʼuiripuecha nani engachi aianhpijka. ¿Jarhaski ambe ma imecheri kʼumanchikuarhu o trokarhu? ¿Úpirinchi imeri arhinhakua jimbo, o na engaksï xukuparhajka o na engaksï uandajka, míteni náki relijioniri anapueskiksï? O jamberijtsïni imecha mismu arhini eskaksï jatsiskia relijioni ma. Enga nema ísï arhijka pirenchini ma enga kʼamakʼamasï marhuakujka Jeobani, ima arhiasïndi: “Nóksïni jurhaska pʼorhembini parani úni eskajtsï jakajkuaka ambe engani ji jakajkujka. Solu uékasïnga arini ambe uandontskuarheni chánksïni jingoni...”.

9. ¿Ambeerichi úpirini uandontskuarheni kʼuiripu ma jingoni enga jatsikia imeri relijioni?

⁹ ¿Ambeerichi úpirini uandontskuarheni kʼuiripu ma jingoni enga jatsikia imeri relijioni? Ju je jánguarhintani imeri ambe uandontskuarheni enga kʼuiripu ka jucha májkueni exejka. Jamberi ima kʼuiripu, ma Tata Diosïntku kómarhijti, jiókuarhini eska Jesusi jindeska kʼuiripuecheri Pʼímutantspiti o jakajkuni eska no ióni jimbo iámindu no sési jásï ambe kʼamajkunhaaka. Ju je úrani ambe engachi májkueni jakajkujka parachi úni eska kʼuiripu uékaaka kurhaani Bibliaeri ambe.

10. ¿Ambechi jatsiski para jánguarhintani úni ka andi?

¹⁰ Ístu, ju je miáni eska jamberi kʼuiripu no iámindu ambe jakajkusïnga ambe enga imeri relijioni jorhentpijka. Ísï jimbo, engachi na míteakia náki relijionurhu jarhaski, ju je jánguarhintani míteni ambe jakajkusïni. David, Australia anapu erachi ma enga kʼamakʼamasï marhuakujka Jeobani, uandasïndi: “Uánikua kʼuiripu jakajkusïndi ambe enga imecheri relijioni jorhentpijka ka ístu ambe engaksï máru kʼuiripuecha eratsejka eska ísïska o filosófia ambe”. Donalta, Albania anapu pirenchi ma, uandantasïndi: “Ménisïchi uandontskuarhesïnga kʼuiripuecha  jingoni engajtsïni arhijka eskaksï jatsiskia relijioni ma, peru tátsekuaksï uandasïndi eskaksï no jakajkusïnga eska jarhaska Tata Diosï ma”. Ka máteru erachi Argentina anapu enga ístu kʼamakʼamasï marhuajka, uandantasïndi eska máru engaksï jakajkujka trinidadiri ambe, nóksï meru jakajkusïnga eska Táti, Uájpa ka espiritu santu májku Tata Diosïska. Ka i erachi ístu uandasïndi: “Ini ambe míteni, jarhuatasïndikini exeni amberiri uandontskuarhea kʼuiripuecha jingoni”. Ísï jimbo, ju je jánguarhintani míteni ambeksï meru jakajkusïni kʼuiripuecha. Ka májkueni eska Pablu, niáraakachi iámindu jásï kʼuiripuni terukukuntani (1 Kor. 9:19-23).

11. Eska na uandajka Ukuecha 14:14-17, ¿Pablu néna aianguaspi Listra anapuechani Tata Diosïri ambe?

¹¹ (Arhinta je Ukuecha 14:14-17). Pablu exesïrendi ambe engaksï kʼuiripuecha tsitienga ka imeri ambe uandontskuarhikuasïrendi. Por ejemplu, imani kʼuiripuechani enga Listra aianguapka Tata Diosïri ambe, jamberiksï sánisï mítepti Tata Diosïri Karakateri ambe o nómbe. Ísï jimbo, Pablu uandontskuarhikuaspti ambe engaksï imecha úpiringa kurhanguni, por ejemplu, ambakiti pʼikuntskueri ambe ka tsípikua jingoni irekani. Úraaspti uandakuechani ka ejempluechani engaksï no úkua jukapka para kurhanguni.

12. ¿Ambechi uá úni para míteni ambe tsitisïni kʼuiripu ma ka ísïchi úni aianguni Tata Diosïri ambe?

¹² Ju je jánguarhintani míteni ambeksï tsitisïni ima kʼuiripuecha engaksï jimesïsï irekaka nani engachi jucha aianhpijka ka ju je ima amberi uandontskuarhekuani. ¿Nénachi uá míteni ambe tsitisïni ima kʼuiripu engachi andarhierani jarhajki para uandontskuarhekuni o engachi imeri kʼumanchikuarhu niárani jarhajkia? Ju je jánguarhintani iámindu ambe exeni. Jamberi ima kʼuiripu jima jámani jati nani enga tsiri jatsintaka, radiu kurhaani, karruni ma jatsintani o máteru ambe úni jarhani. Engachi exeaka eskachi uáka uandontskuarheni imeri ambe enga kʼuiripu úni jaka, ju je ísï úni (Juanu 4:7). Asta na enga xukuparhatini jauaka kʼuiripu ma, uákachi míteni nani anapueski, ambe ánchikuarhisïni o náki ekipuni tsitisïni. Erachi ma enga Gustavo arhinhajka, uandasïndi: “Tumbi ma jingoni uandontskuarhespka enga 19 jatiripka ka kamiseta ma jukarixapti enga pireri ma jukanharhipka enga kánikua mítekateka. Kamisetaeri ambe kurhamarhispka ka imarini aianguspti andisï tsitieni imani pirerini. Tátsekua niáraspka Bibliaeri ambe jorhendani, ka iásï i tumbi juchari erachi máestia”.

13. ¿Nénachi uá úni paraka kʼuiripu ma uékaaka Bibliaeri ambe jorhenguarhini?

 ¹³ Engachi aiakuaka nemani parachi Bibliaeri ambe jorhendani, ju je jirinhakuntani ambechi uá arhini paraka ima uékaaka jorhenguarhini. Ju je aianguni néna uá jarhuatani ambe enga jorhenguarhiaka (Juanu 4:13-15). Por ejemplu, uarhiiti ma enga tsitipka Tata Diosïri ambe kurhaani, imecho inchaataspti pirenchini ma enga Hester arhinhajka. Enga pirenchi exepka eska paredirhu diploma ma jarhaspka enga xarhatenga eska ima uarhiiti jorhentpirispka, pirenchi arhispti eskachi juchajtu jorhentpisïnga Bibliani úraparini ka tánguarhikuecha jimbo. Uarhiiti jiókuarhispti jorhenguarhini Bibliaeri ambe, ísï pauandikua niraspti tánguarhikuarhu ka ísï tátsekua niraspti kʼéri tánguarhikua sirkuitueri ma jimbo. Ísï ma uéxurhini jimbo, niáraspti itsï atakuarhini. Ju je kurhamarhikuarhini: “¿Ambeksï tsitisïni ima kʼuiripuecha engani nirajka pʼorhembiani? ¿Uá aianguani nénachi jorhendaasïni kʼuiripuechani Bibliaeri ambe paraka kʼuiripu uékaaka jorhenguarhini?”.

14. ¿Nénachi uá jorhentpini Bibliaeri ambe, exeparini ambe enga mándani kʼuiripu uétarhinchajka?

¹⁴ Engachi uénakia jorhendani nemani Bibliaeri ambe, ju je sési prepararikuarhini mándani jorhenguarhikua jingoni, miáparini ambe nitamakuarhixaki jorhenguarhiri o ambe tsitisïni. Ju je exeni náki tekstuechanchi arhiantaua, bideuechani engachi exerauaka ka ejempluechani engachi úrauaka para Bibliaeri jurhimbikua ambe jorhendani. Ju je kurhamarhikuarhini ambe uékapirini sánderu míteni jorhenguarhiri ka ambe uá mintsitarhu niárakuni (Prov. 16:23). Albania anapu uarhiiti ma enga Bibliaeri ambe jorhenguarhini japka pirenchi ma jingoni enga Flora arhinhajka, uandaspti: “No jakajkusïnga eska tsíntskua jauaka”. Pirenchi Flora no úspti eska afuersa jakajkupiringa indeni ambe. Pirenchi uandasïndi: “Exespka eska ima orheta jatsispka para míteni imani Tata Diosïni enga aiatspejka eska tsíntskua jauaka”. Jiáni uératini, méni enga Flora nirenga jorhendani Bibliaeri ambe imani uarhiitini, jánguarhintasïrendi xarhatani na enga Jeoba xáni uékpitika, jánhaskatini ka uinhapitiini. Tátsekua, uarhiiti niáraspti jakajkuni eska jauaka tsíntskua. Ka iásï, tsípikua jingoni marhuakusïndia Jeobani.

15. Eska na uandajka Ukuecha 17:16-18, ¿Pablu náki pʼindekuechani no jaiapanhiantasïreni engaksï Atenasi anapuecha uáuenga, peru andisï no méni kuatantapi aianguani Tata Diosïri ambe?

¹⁵ (Arhinta je Ukuecha 17:16-18). Ísïsti eskaksï Atenasi anapuecha diosï úkatechani kómarhiasïrenga, ísku jándikua ambeksï niátani ka relijioni no jurhimbiticheri jorhentperakua ambeksï jakajkuni. Peru apostuli Pablu no méni eratsespti eskaksï imecha no méni niárapiringa Jesusiri chúxapatini ka seguirispti aianhpini nájkirukaksï imecha no sési arhienga. Pablu mismu niáraspti kristianu úkuarhini nájkiruka antesi “no sési arhienga Diosïni, ka no sési kaani jakajkutichani ka xukajchaani” (1 Tim. 1:13). Ísï eska Jesusi na eratsepka eska Pablu niárapiringa imeri chúxapatini, Pablu májkueni eratsespti Atenasi anapuecheri ambe. Ka niáraspti ísï úkuarhini (Uku. 9:13-15; 17:34).

16, 17. ¿Náki ejemplu xarhatasïni eska iámindu jásï kʼuiripu uáka Jesusiri chúxapatiini?

¹⁶ Primeru siglurhu, iámindu jásï kʼuiripuechaksï niáraspti Jesusiri chúxapatini. Jiáni enga Pablu, Korintu anapu kristianuechani karakuapka engaksï griegu uandenga, uandaspti eskaksï máru imecha antesi sïpani jámasïrenga ka eskaksï ísku jándikua ambe niátasïrenga. Ka tátsekua uandaspti: “Peru iásïjtsï juparhiminhantaskia chári mintsitechani” (1 Kor. 6:9-11). ¿Eratsepirinchi eskaksï ima kʼuiripuecha niárapiringa mójtakurhini ka Jesusiri chúxapatiini?

¹⁷ Ini jurhiatikuecha jimbo, uánikua kʼuiripuechaksï uékasïndi mójtakuni ambe enga xáni uétarhijka paraksï úni Jesusiri chúxapatini. Por ejemplu, Australia anapu pirenchi ma enga Yukina arhinhajka, exestia eska náki uéjki kʼuiripu uáka úni ambe enga Biblia uandajka. Ma jurhiani, pirenchi, negosiurhu ma jarhaspti, ka uátsïni ma exespti enga uánikua tatuajichani jukaapka ka enga no káni sési xukuparhatini japka. Pirenchi miásïndi: “No tekaaxapka  andarhierani. Peru engani uénapka uandontskuarhekuni, exespka eska uátsï xáni tsitisïrenga Bibliaeri ambe engaksï jamberi máru tatuajicha salmuecharhu pʼitakatepka”. Ima uátsï uénaspti Bibliaeri ambe jorhenguarhini ka tánguarhikuecharhu nirani. *

18. ¿Andichisï no jatsi para tʼuini eratsenia eska kʼuiripu ma no niáraaka marhuakuni Jeobani?

¹⁸ ¿Uandaspi Jesusi eska tiempuespkia para pʼikuntani jimboka eratsexapka eskaksï sáno iámindu kʼuiripuecha niárapiringa imeri chúxapatiini? Nómbe. Tata Diosïri Karakata tʼuini uandasïrendia eskaksï namunitu kʼuiripuecha niárapiringa Jesusini jakajkuni (Juanu 12:37, 38). Ima úsïrendi míteni ambe enga kʼuiripuecheri mintsitarhu jarhenga (Mat. 9:4). Peru tsípikua jingoni aianguasïrendi iáminduechani ka jánguarhintaspti jarhuataani imani namunitu kʼuiripuechani engaksï jakajkupka imani. Ka jimbokachi jucha no úsïnga míteni ambe enga kʼuiripuecheri mintsitarhu jarhajka, ju je jánguarhintani no tʼuini eratsenia eska ma kʼuiripu no niáraaka marhuakuni Jeobani o no sési eratseni jarhani imani lugariri ambe nani engachi aianhpijka. Sánderu sési, ju je eratseni eskaksï ima kʼuiripuecha ma jurhiani niáraaka Jesusiri chúxapatini. Burkina Faso anapu erachi ma enga Marc arhinhajka ka enga kʼamakʼamasï marhuakujka Jeobani, arini ambe uandasïndi: “Sáno méntkisï, ima kʼuiripuecha engani ji eratsejka eskaksï niáraaka marhuakuni Jeobani, niárasïndiksï nóteru uékania Bibliaeri ambe jorhenguarhini. Peru imecha engani exeajka eskaksï no niáraaka marhuakuni, sánderuksï kókuani niárasïndi marhuakuni. Jimbosïni iásï eratsejka eska sánderu sésiska jurajkuni eskajtsïni Jeobaeri espiritu santu jarhuataaka”.

19. ¿Nénachi jatsiski para exeani imani lugarirhu anapu kʼuiripuechani nani engachi aianhpijka?

¹⁹ Jamberi ma ambe engachi úpiringa sóntku eratseni imani lugariri ambe nani engachi aianhpijka, jindesti eskaksï no uánikua kʼuiripuecha niáraaka Jesusiri chúxapatini. Peru ju je miáni ambe enga Jesusi arhiapka imeri chúxapatichani. Eska iápurisï tsïpambispkia, eska tiempuespkia para pʼikuntani. Kʼuiripuechaksï úsïndi mójtakurhini ka niárasïndiksï Jesusiri chúxapatini. Jeoba kánikua jukaparharaasïndi kʼuiripuechani (Ageo 2:7). Engachi ísï exeaska eska Jeoba ka Jesusi na exeajka, jánguarhintaakachi kurhangukuani ambe engaksï imecha nitamakuarhijka ka ambe engaksï tsitijka. Ka nóchi ísï exeauaka enajkichi no mítea imani kʼuiripuechani, sino eskaksï sánderu orhepani niáraaka juchari erachicheeni.