1-2. Eaha ta Iesu i hinaaro e parau i roto i te Ioane 4:35, 36?

 A PORO ai Iesu, ua ite oia i te mau faaapu kerite. (Ioa. 4:3-6) E maha avaˈe e toe ra e ineine ai te reira no te ootiraa. Ua maere roa paha ïa te mau pǐpǐ a parau ai Iesu: “A hiˈo i te faaapu, ua paari te huero maa no te ootiraa.” (A taio i te Ioane 4:35, 36.) Eaha te auraa o ta Iesu mau parau?

² E au ra e aita Iesu i manaˈo i te ootiraa i te hoê faaapu, i te hoê râ ootiraa i te taata. Na te ohipa i tupu na mua ˈtu e haapapu mai. Noa ˈtu eita te mau ati Iuda e afaro i to Samaria, ua poro Iesu i te hoê vahine Samaria tei farii maitai i te poroi. A parau ai Iesu “ua paari [aore ra ua teatea] te huero maa no te ootiraa,” te faafatata mai ra te hoê pǔpǔ taata Samaria o te hinaaro ra e ite i ta ˈna e haapii atu. (Ioa. 4:9, 39-42) Teie ta te hoê aivanaa hiˈopoa Bibilia i parau: “Te faaite ra to ratou anaanatae . . . ua ineine teie mau taata no te ootiraa.”

3. Ia hiˈo tatou i te taata mai ia Iesu, eaha ta tatou e rave?

³ Ua ineine atoa anei te feia ta tatou e poro ra no te ootiraa? Te hiˈo atoa ra anei tatou i te taata mai te huero o tei ineine i te ootihia? Mai te peu e e, e toru ohipa ta tatou e rave. A tahi, e poro tatou i te taata ma te hoê feruriraa ru. Ua ite hoi tatou e taime poto te faataahia no te ootiraa. A piti, e tupu te oaoa ia farii te taata i te parau apî oaoa. Te parau ra hoi te Bibilia, e itehia “te oaoa i te auhuneraa.” (Isa. 9:3) A toru, e hiˈo tatou i te taata tataitahi mai te hoê taata o te nehenehe e riro ei pǐpǐ na te Mesia. E maiti ïa tatou i te tumu parau e anaanatae ai ratou.

4. Eaha te haapiiraa e huti mai i te hiˈoraa o te aposetolo Paulo?

 ⁴ Aita Iesu i faaoti aita e faufaa ia poro i to Samaria, ua hiˈo râ o ˈna ia ratou mai te mau taata o te nehenehe e riro ei pǐpǐ na ˈna. Mai ia Iesu, ua hiˈo atoa te aposetolo Paulo i te taata o te tuhaa fenua mai te feia o te nehenehe e pee i te Mesia. No reira i roto i teie tumu parau, e huti mai tatou e toru haapiiraa i to Paulo hiˈoraa. A tahi roa, ua ite maitai oia i ta te taata e tiaturi ra. A piti, ua taa ia ˈna eaha te mau tumu parau e anaanatae ai te taata. A toru, ua hiˈo o ˈna ia ratou mai te taata o te nehenehe e riro ei pǐpǐ na te Mesia.

5. Eaha te tumu i matau ai Paulo i te poro i roto i te sunago?

⁵ Ei ati Iuda, ua matau Paulo i te poro i te ati Iuda i roto i te sunago. (Ohi. 26:4, 5) I Tesalonia, ua haaferuri o ˈna i te mau ati Iuda “i nia i te mau Papai e toru Sabati.” (Ohi. 17:1, 2) Mea ohie ïa no ˈna ia poro i te nunaa ati Iuda.—Phil. 3:4, 5.

6. I Ateno, eaha te taa-ê-raa i rotopu i te feia ta Paulo i farerei i te mahora e i te feia ta ˈna i poro i te sunago?

⁶ Ua tiahi to Tesalonia e to Berea ia Paulo e haere atura oia i Ateno. Mai ta ˈna i matau, “i roto i te sunago, haaferuri atura oia i te ati Iuda e te tahi atu mau taata e haamori ra i te Atua.” (Ohi. 17:17) I te mahora râ, ua farerei Paulo i te mau philosopho e te tahi atu mau taata nunaa ê. Teie ta ratou i parau ia Paulo: “Te faahiti nei hoi oe i te tahi mau parau e mea huru ê i to matou tariˈa.”—Ohi. 17:18-20.

7. Ia au i te Ohipa 17:22, 23, mea nafea Paulo i te faatanoraa i ta ˈna huru pororaa?

⁷ A taio i te Ohipa 17:22, 23. I Ateno, mea taa ê ta Paulo raveraa no te poro i te mau ati Iuda e i te feia nunaa ê. Ua feruri na mua paha Paulo, ‘Eaha ta to Ateno e tiaturi ra?’ I muri iho, ua hiˈo haere oia ati aˈe ia ˈna, ua imi o ˈna i te tahi mau tapao e faaite ra i ta ratou e tiaturi ra. I muri mai, ua feruri Paulo eaha te tahi mea maitai i roto i ta ratou e rave ra. Teie ta te tahi aivanaa Bibilia e parau ra: “Ei ati Iuda, ua taa ia Paulo aita te feia o te mau nunaa ěê e haamori ra i te hoê â Atua haamorihia e te mau ati Iuda e Kerisetiano. Ua faatano ïa Paulo i ta ˈna huru paraparau ma te parau te haere atu nei oia e faaite ia ratou o vai tera Atua.”  Noa ˈtu aita to Heleni i matau i te mau Papai, ua poro Paulo ia ratou. Ua hiˈo Paulo i teie mau taata mai te mau huero o tei paari no te ootiraa. I muri iho, ua faatano oia i ta ˈna huru pororaa ia farii ratou i te parau apî oaoa.

8. (a) Eaha te tauturu mai ia ite i ta te taata e tiaturi ra? (b) Ia faaite mai te hoê taata eaha ta ˈna haapaoraa, e nafea outou ia pahono atu?

⁸ Mai ia Paulo, mea faufaa atoa ia hiˈo haere tatou a poro ai. E imi anaˈe i te tahi mau tapao o te tauturu mai ia ite eaha ta te taata e tiaturi ra. E taa paha ia tatou eaha ta ratou haapaoraa na nia i te mau taoˈa i roto i to ratou fare aore ra pereoo, to ratou iˈoa, faaahuraa, faaneheneheraa aore ra ta ratou huru paraparau. E nafea râ outou ia faaite mai te hoê taata i ta ˈna haapaoraa? Teie ta te hoê pionie taa ê o Flutura te iˈoa e parau: “Aita vau i haere mai no te faahepo ia oe ia farii i ta ˈu e tiaturi ra, e hinaaro noa vau e ite i to oe manaˈo no nia i teie tumu parau . . . ”

9. Eaha te tumu parau e anaanatae ai te hoê taata e tiaturi ra i te Atua?

⁹ A feruri eaha te mau tumu parau ta te taata e anaanatae, o te ore râ e faatupu i te aimârôraa. Peneiaˈe, te haamori ra teie taata i te hoê anaˈe Atua, te tiaturi ra paha o Iesu to tatou Faaora aore ra te farii ra ua rahi roa te ohipa ino i teie mahana e fatata te reira i te faaorehia. Ia paraparau outou i nia i te tumu parau eita te aimârôraa e tupu, e nehenehe te taata e anaanatae mai i te poroi Bibilia.

10. A poro ai i te taata, eaha ta tatou e imi maite e no te aha?

¹⁰ Aita paha te hoê taata e tiaturi ra i te mau mea atoa e haapiihia e ta ˈna haapaoraa. No reira mea faufaa roa ia imi maite tatou eaha ta tera e tera taata e tiaturi nei. Ua parau David te hoê pionie taa ê i Auteralia: “Mea rahi o te anoi nei te mau manaˈo taata e te mau haapiiraa a ta ratou haapaoraa.” Area Donalta i Albanie, ua parau ïa: “Ua farerei au vetahi taata o tei parau mai e haapaoraa ta ratou o te ore râ e tiaturi mau ra i te Atua.” E parau atoa vetahi te tiaturi ra ratou e Toru tahi te Atua, no ratou râ, mea taa ê te Metua, te Tamaiti e te varua moˈa! Te na ô ra te tahi taeae mitionare no Raparata: “Mea faufaa ia imi maite eaha te tumu parau e anaanatae ai tera e tera taata, eiaha râ te reira ia faatupu i te aimârôraa.” Mai ia Paulo, e faaau anaˈe ia tatou i “te mau huru taata atoa” no te faaite atu i te parau apî oaoa.—Kor. 1, 9:19-23.

11. Ia au i te Ohipa 14:14-17, ua nafea Paulo ia anaanatae te taata i Lusetera i ta ˈna poroi?

¹¹ A taio i te Ohipa 14:14-17. Ua feruri maite Paulo i te feia ta ˈna e poro e i muri iho, ua faatano i ta ˈna huru paraparau. Ei hiˈoraa, aita te nahoa ta ˈna i poro i Lusetera i ite i te mau Papai. Ua nafea Paulo? Ua haaferuri o ˈna ia ratou no nia i te tau auhune e te mau mea e faaoaoa i te taata. Ua faahiti Paulo i te mau parau e hiˈoraa taahia e te taata ta ˈna e poro atu ra.

12. E nafea tatou e ite ai i ta te taata e anaanatae ra a faatano atu ai i ta tatou omuaraa parau?

¹² A feruri maite i ta te taata e anaanatae ra e a faatano i ta outou omuaraa parau. Eaha te tauturu mai ia tatou ia na reira? E hiˈo haere anaˈe ati aˈe i tera fare. Peneiaˈe, te atuatu ra te tahi taata i to ˈna aua, te taio ra i te buka, te tataî ra i to ˈna pereoo aore ra te rave ra i te tahi atu ohipa. No te aha e ore ai e faaohipa i te reira no te faatupu i te aparauraa? (Ioa. 4:7) E nehenehe atoa te faaahuraa o te hoê taata e faaite mai no teihea nunaa o ˈna, eaha ta ˈna ohipa aore ra te pǔpǔ tuaro ta ˈna e au ra. Te na ô ra Gustavo: “Ua tauaparau vau e te hoê taurearea 19 matahiti e i nia iho i to ˈna piriaro, te vai ra te hohoˈa o te hoê taata himene tuiroo. Ua paraparau mâua no nia i to ˈna piriaro e ua faataa maira no te aha o ˈna e au ai i tera taata himene. I muri aˈe, ua haamata oia i te haapii i te Bibilia e e taeae o ˈna i teie nei.”

13. E nafea ia pûpû i te haapiiraa Bibilia ia anaanatae iho â te taata i te reira?

¹³ A pûpû i te hoê haapiiraa Bibilia ia anaanatae iho â te taata i te reira. A faaite atoa e nafea ratou e faufaahia ˈi i te hoê haapiiraa Bibilia. (Ioa. 4:13-15) I to te tuahine Poppy tomoraa i roto i te fare o te tahi vahine ta ˈna i poro, ua ite oia i te hoê parau tuite i nia i te pǎpai. Ua  taa ia Poppy e orometua haapii tamarii teie vahine. Faataa ˈtura Poppy, te haapii atoa nei tatou i te taata maoti te hoê haapiiraa Bibilia e ta tatou mau putuputuraa. I muri mai, ua farii tera vahine i te haapii i te Bibilia. I te mahana i muri iho, ua tae mai i te putuputuraa, e i muri aˈe, i te hoê tairururaa haaati. Hoê noa matahiti tei mairi, ua bapetizohia teie vahine. No reira, e ui anaˈe ia tatou iho, ‘Eaha te mea e anaanatae ai te taata ta ˈu e hoˈi e farerei? E nafea vau ia pûpû i te haapiiraa Bibilia ia anaanatae iho â ratou i te reira?’

14. E nafea ia faaineine ia outou no te hoê haapiiraa Bibilia?

¹⁴ Ia farii te hoê taata i te haapii i te Bibilia, a faaineine maitai hou a faatere ai i ta ˈna haapiiraa. A feruri i to ˈna tupuraa e te mea e anaanatae ai o ˈna. A maiti atoa i te mau irava Bibilia, video e faahohoˈaraa ta outou e faaohipa no te faataa i te pue parau mau Bibilia. A ui ia outou iho, ‘Eaha te tauturu i teie taata ia anaanatae i ta ˈna haapiiraa Bibilia e eaha atoa te haaputapû i to ˈna aau?’ (Mas. 16:23) I Albanie, ua haapii te tahi pionie o Flora te iˈoa i te Bibilia i te hoê vahine o tei ore i tiaturi i te tia-faahou-raa. Aita oia i faahepo i tera vahine ia farii i tera haapiiraa Bibilia. Te na ô ra Flora: “Mea titauhia ia ite na mua teie vahine o vai tera Atua o te fafau ra i te faatupu i te tia-faahou-raa.” No reira i te mau taime atoa a haapii ai raua i te Bibilia, ua haamatara Flora i te mau huru maitatai o Iehova mai to ˈna here, paari e puai rahi. I muri mai, ua farii teie vahine e tupu iho â te tia-faahou-raa e e Ite no Iehova itoito mau oia i teie nei!

15. Ia au i te Ohipa 17:16-18, eaha te mau peu ta Paulo i ite i Ateno e no te aha aita te reira i tapea ia ˈna ia poro?

¹⁵ A taio i te Ohipa 17:16-18. I Ateno, ua ite Paulo i te mau idolo, te peu taotoraa tia ore e te mau haapiiraa philosopho, aita râ te reira i tapea ia ˈna ia poro. Aita atoa o ˈna i haaparuparu i mua i ta ratou mau faainoraa. Hou a riro mai ai ei Kerisetiano, e taata faaino Paulo i te Atua e “te hamani ino i te taata e te faateitei.” (Tim. 1, 1:13) Mai ta Iesu huru hiˈoraa ia Paulo, ua tiaturi atoa Paulo e nehenehe to Ateno e riro ei pǐpǐ na te Mesia e ua tano iho â o ˈna i te na reiraraa.—Ohi. 9:13-15; 17:34.

16-17. Eaha te faaite ra e nehenehe te mau huru taata atoa e riro ei pǐpǐ na te Mesia? A horoa i te hiˈoraa.

¹⁶ I te senekele matamua, mau huru taata atoa tei riro mai ei pǐpǐ na te Mesia. I to Paulo papairaa i ta ˈna rata i to Korinetia, te tahi oire Heleni, ua parau oia e feia rave hara vetahi mero o te amuiraa na mua ˈˈe e i rave atoa na ratou i te peu taotoraa tia ore haama mau. Tera râ, ua parau Paulo: “Mai te reira na hoi vetahi o outou. Ua tamâ-roa-hia râ outou.” (Kor. 1, 6:9-11) Ahani o outou Paulo, e tiaturi anei outou e nehenehe taua mau huru taata ra e taui e e riro mai ei pǐpǐ na te Mesia?

¹⁷ I teie mahana, mea rahi atoa te taata o te rave nei i te mau tauiraa no te riro ei pǐpǐ na te Mesia. Ua tapao Yukina, te hoê pionie taa ê i Auteralia, e nehenehe iho â te mau huru taata atoa e farii i te poroi Bibilia. I te hoê mahana, ua ite o ˈna i te hoê vahine mea rahi te tatau i nia i to ˈna  tino e mea haapaoraa ore atoa te faaahuraa. Noa ˈtu to ˈna taiâ i te haamataraa, ua faafatata ˈtu Yukina no te paraparau i tera vahine e ite atura ua tatauhia te tahi mau irava no roto mai i te mau Salamo i nia to ˈna tino. E tapao faaite ïa mea anaanatae na ˈna i te Bibilia. I muri mai, ua farii oia i te haapii i te Bibilia e i te apiti mai i te mau putuputuraa. *

18. No te aha eiaha tatou ia faaoti noa aita e faufaa ia poro i tera e tera taata?

¹⁸ Ua manaˈo anei Iesu ua paari te mau huero no te ootiraa no te mea ua tiaturi oia e pee mai te rahiraa ia ˈna? Aita roa ˈtu, ua tohu hoi te mau Papai mea iti roa te faatupu i te faaroo ia Iesu. (Ioa. 12:37, 38) Noa ˈtu e nehenehe Iesu e ite i roto i te aau o te taata, ua tutava oia i te poro i te mau huru taata atoa ma te ore e maitiiti. (Mat. 9:4) Aita to tatou e mana no te ite i roto i te aau o te taata, eiaha ïa e faaoti noa aita e faufaa ia poro i tera tuhaa fenua aore ra i tera e tera taata! E tiaturi anaˈe râ e nehenehe te mau taata atoa e riro ei pǐpǐ na te Mesia. Ta Marc ïa, te hoê mitionare i Burkina Faso i haapapu: “Te feia ta ˈu i manaˈo e haere i mua, ua faaea ïa i te haapii. Area te feia ta ˈu i manaˈo eita e haere i mua, o ratou ïa tei rave i te mau tauiraa. No reira mea maitai aˈe ia vaiiho i te varua moˈa ia aratai ia tatou.”

19. E nafea tatou ia hiˈo i te mau taata i roto i ta tatou tuhaa fenua?

¹⁹ E nehenehe tatou e manaˈo mea iti roa te taata e au i te mau huero tei paari no te ootiraa. Mea titauhia ïa ia haamanaˈo i ta Iesu i parau i ta ˈna mau pǐpǐ. Ua teatea, aore ua paari, te mau huero no te ootiraa. E nehenehe te taata e taui e e riro mai ei pǐpǐ na te Mesia e ei taoˈa “hinaarohia” e Iehova. (Hag. 2:7) Ia hiˈo tatou i te taata mai ia Iehova raua Iesu, e feruri tatou i to ratou tupuraa e i te mea e anaanatae ai ratou a tiaturi atoa ˈi e nehenehe ratou e riro ei taeae e ei tuahine no tatou.