1. O sowal no Fangcalay Cudad, samanay ko pinengneng ni Yihofa to tamdaw hani? Hano parihaday konini kitaanan hani?

MAOLAHAY kiso mitoor to fanges, pising ato tatirengan iso a misawkit ko tao kisowanan han? Ecato ka olah. Kao ngaˈayay cowa ko papotal ko minengnengan ni Yihofa, parihadayay kitaanan. Kinacecayay, palimoˈotan ni Yihofa ci Samuil minilnil to cecay wawa ni Yisi malo hongti no Israil, kawra cowa pasowal to o cima. Maˈaraw ni Samuil ko taˈangayay wawa ni Yisi ci Iliyap i, o pising ko minengnengan ningra, sanay: ‘Oniya i kaˈayaway ni Yihofa a tamdaw, madeng o nanilnilen ningra a mala hongti.’ Soˈlinay makapahay ko tatirengan ni Iliyap, kawra pasowalan ni Yihofa ci Samuil: ‘Hamaan o papotal ato kaˈakawang no tireng ko nengnengen, cowa ko papiliˈen Ako cingra.’ Misamanay hani? Sanay ci Yihofa: ‘O potal ko minengnengen no tamdaw, o kemoday falocoˈ ko minengnengen ni Yihofa.’—1 Samuil 16:1, 6, 7.

2. Sowal no Yohani 7:24, coka ngaˈay kita mitoor to papotal a misawkit to tao, misamaanay? Tinokoen mitadtad.

² Cowa ko malefotay kita, madoloay mitoor to papotal a misawkit to tao. (ˈOsien ko Yohani 7:24.) Kawra o maˈaraway no mata, o mimingay aca nora tamdaw. Tinakoen, o cecay ising o pinengneng aca ko mitiˈeran, ano samaanto a inaneng, adihay ko nalifetan, citolasay ko kacipinang to adadaay tamdaw. Saka tatodongaw ko piadah, wa misongilaˈ a mitengil to sowal no adadaay, cipinang to pifekad no adada, nafalocoˈan ato roma demak, latekay misaaliay to X-kowang ko adadaay, hoeca ka raraw ko piadah. Malecaday, ano papotal aca no salikaka ko nengnengen ita, cacitolas ko kacipinang cangraanan. O mamisaˈicel kita  a cipinang to kemoday falocoˈ no salikaka. Manaokaniw, cowa kalecad kita ci Yihofaan, mafanaˈ to miharatengan no falocoˈ no tao, kawra wa ngaˈayho minanam ci Yihofaan. Sasamaan ko hademak ita hani?

3. O masowalay noniya lalakaw a maˈoningay i Fangcalay Cudad wa mananam ita ko maanan hani?

³ Haratengen ita samanay ci Yihofa micada to midokoay Cingraanan a tamdaw. Mitengilay Cingra to nafalocoˈan nangra, cipinangay to nalifetan ato pakayraan nangra i salakat ato aniniay, tada siniˈadaay cangraanan. Dotoc nengnengen ita, samanay ci Yihofa padama ci Yonaan, Iliya, Hakar, aci Lotoan, wa minanamho samaan malecad ci Yihofaan a micada to salikaka.

4. Misamaanay hano aira alatek ko tatiihay a noka pinengneng ita ci Yonaan hani?

⁴ Haratengen ci Yona, palimoˈotan ni Yihofa cingra tayra i Ninifi milasil to sasawkit a lihaf, kawra mikalicay cingra to tamina pasayra masafelitay a patosokan malingad, ‘sapilimekaw ci Yihofaan.’ (Yona 1:1-3) Pakayni ka cangoˈot no kacipinang ci Yonaan, o cowa kangaˈay pakasoˈlinen cingra, o cowa ka madimadi wa saan ko piharateng ita. Ano kiso i, wa pafelienho iso ci Yona to hatoki han? Eca alatek. Kawra pafelienho cingra to toki sanay ko piharateng ni Yihofa.—Yona 3:1, 2.

5. Mikitini i Yona 2:1, 2, 9 a sowal ni Yona, wa mahapinang iso o masamanay a tamdaw cingra hani?

⁵ O satolon ni Yona i tiyad no foting, wa mahapinang ita ko soˈlinay a waywayan ningra. (ˈOsien ko Yona 2:1, 2, 9.) Madeng kinapinapinaay ci Yona mitolon ci Yihofaan, oniya satolon paihkalay, o misapoeneray ko falocoˈ ningra, matomesay to miakoˈiday a falocoˈ, misetekay to falocoˈ midofdof to limoˈot ni Yihofa. Mihaenay, soˈlin na milaliway cingra, pacaˈofanho ni Yihofa ko satolon ningra, padadotoc malo pairasolay cingranan.

6. Hano mamisongilaˈ kita a mitengil to sowal no tao hani?

⁶ Pairaen ita ko misapoeneray falocoˈ ato mihadidiay a waywayan misongilaˈ mitengil to sowal no tao. Ciepocay mihaen to demak, misamanay hani? Saka 1, mihaen ko demak ita ecato pakararaw to tao. Saka 2, matongal ko kacipinang ita to harateng ato nafalocoˈan no salikaka, madoloto a siniˈada cangraanan. Saka 3, ngaˈay kita padama to salikaka cipinang to harateng no niyah, latekay, hadaken no tamdaw ko  sowal, ngaˈ mafanaˈay to samanay ko harateng no niyah. (Taneng 20:5) Cecay itiniay Asia a malohemay malitengay sanay ko sowal: “Kinacecayay, cowa pisongilaˈ kako mitengil, caloh sanay paini to tao. Pasowalan ako ko cecay fafahiyan salikaka, o sasalofen ko caˈof ningra i kasaˈopoan, ikor mahapinangay, pakayra cingraanan pasangaray a miasip, pasangaray a mihadak to sapacaˈof.” Mihaenay, o malohemay malitengay salakatho mafanaˈ to samanay ko demak itiya sato a paini to tao. Tada kalimlaan mihaen to demak!—Taneng 18:13.

7. Mikini pipadama ni Yihofa ci Iliyan mananan iso ko maanan hani?

⁷ O roma salikaka pakayni i serangawan, capeling anca nalifetan i salakat, pasangaray pasowal to tao to nafalocoˈan no niyah. Sasamaan ko demak ita, ho madolo cangra mifohat to falocoˈ hani? Haratengen, miliyas ci Iliya ci Yicipilan i, samanay ci Yihofa padama cingraanan. Itiya, ikor no pina romiˈad ngaˈ pasowalay ci Iliya ci Yihofaan to nafalocoˈan, misongilaˈay ci Yihofa mitengil, pakalalokayho cingranan, patorod to kalimlaan a tayal cingraanan. (1 Hongti 19:1-18) Latekay, wa mitala kita to koˈedaway toki, rihaday sanayho ko salikaka a mihadak to nafalocoˈan a sowal, pacipinang kitaanan to harateng nangra. Ano malecad kita ci Yihofaan ira ko mihadidiay falocoˈ, wa malifok ko pakasoˈlin no salikaka. Ano pasowal cangra kitaanan i, o mamisongilaˈ kita a mitengil.

8. Pakayni i Satapangan 16:7-13, samanan ni Yihofa padama ci Hakar hani?

⁸ O sikawdan ni Sara ci Hakar, ikor malo fafahiyay ni Apraham. Ikor no mapoyapoy cingra misakahemaway ci Saraan, samanen awaay ko wawa ni Sara. Tada pakidemayto ci Hakar, orato milaplapan ni Sara cingra. (Satapangan 16:4-6) O pinengneng no kalo tamdaw, misatakalaway ci Hakar, matatodongayto a malaplap, kawra cowa pihaen ko pinengneng ni Yihofa cingraanan. Miocoran ni Yihofa ko coyoh padama cingraanan misalof to waywayan no niyah, palemedayho cingraanan. Itiyaayto a mafanaˈ ci Hakar, o padotocay a misinanot ci Yihofa cingraanan, cipinangay to kihcod a malifaay ningra. Mitemeray to falocoˈ ningra, somowal to ‘maˈaraway ni Yihofa ko kihcod,’ pangangan Cingranan to ‘pakaˈaraway takowanan a Kawas.’—ˈOsien ko Satapangan 16:7-13.

9. O maanan a lalangian ko misimsiman ni Yihofa, mansa sidaˈit a micada ci Hakaran?

⁹ O maanan ko maˈaraway ni Yihofa i tireng ni Hakar hani? Cipinangay ci Yihofa to kalengawan ato malifaay ni Hakar. (Taneng 15:3) O Icip a tamdaw cingra, itiniay lomaˈ no Israil, o ˈalafang ko niyah sanay miharateng hokira? Maˈilolay cingra to paro no lomaˈ i nalacolan hokira? Roma i, cowa ko dengan a fafahi ni Apraham ci Hakar. Soˈlin araaw no Kawas cecay aca ko fafahi, kawra, cecay liyad, o midokoay to Kawas a faˈinayan adihayay ko fafahi. (Matay 19:4-6) Itini mahaenay pakayraan, madoloay mifekad ko maˈinapay ato ˈintehay. Manaokaniw, cowa pihai ci Yihofa ira ko lalangian ni Hakar a misakahmaw ci Saraan, kawra misimsimay to nafalocoˈan ni Hakar, mansa sidaˈit a micada cingraanan.

10. Samaan ko demak ita, ngaˈ matongal ko kacipinang to salikaka hani?

¹⁰ Ngaˈay kita minanam ci Yihofaan, misarocod a cipinang to salikaka. Ngaˈayay malacafay cangraanan mitosil, ˈayaw ato ikor no saˈopo masasowal cangranan, anca tahidangen cangra a mitahka. Mihaen,  wa mahapinang iso: Cecay fafahiyan salikaka maomoyay, ˈarawhan o mangodoay; Cecay faˈinayan salikaka maolahay to sinowayay, ˈarawhan makahiay a paladaˈ; Maosoyayto ko cecay lalomaˈan masaˈopo, ˈarawhan misafelitay ko salawina cangraanan. (Yopu 6:29) Manaokaniw, cowa kangaˈay kita ‘hina capid to demak.’ (1 Timoti 5:13) Kawra ano cipinang kita to salikaka ato malifaay nangra, wa matongal ko kasiniˈada cangraanan.

11. Cipinang ko malohemay malitengay to salikaka hano masakalimlaan hani?

¹¹ Mangalefay o malohemay malitengay o cacipinang to kalengawan ato pakayraan no salikaka. Cipinangay ci Yihofa to sikawdan Ningra, mafanaˈ to o maanan ko malifaay nangra a roray. (Kasadakan 3:7) Ano malecad ci Yihofaan ko malohemay malitengay a cipinang to salikaka, wa ngaˈay ko pipadama cangraanan. Cecay kasakilac kantok ci Atoe, malacafayay to cecay malohemay malitengay milisoˈ to misiwatikay a fafahiyan salikaka. Sanay ci Atoe: “Cipinangay kami, caka halafin cingra ciraramod, mapatayayto ko faˈinay, soˈlin pasangaray ko kaˈorip, malaˈosiay ko pasifanaˈ to tosa wawa malo maolahay ci Yihofaan a tamdaw. Nohatini, cowato ka ngaˈay ko mata, matoleday ko falocoˈ. Kamayanho cingra maolah ci Yihofaan, pakasoˈlinay to Kawas. Mikitini cingraanan adihayay ko mananamay niyam.” (Filipi 2:3) Oniya kasakilac kantok soˈlinayto a mitodong to taˈarawan ni Yihofa.

12. Mitongalan ni Yie ko kafanaˈ to cecay salikaka, iraay ko maanan ngaˈayay minaroˈan?

¹² Ano mapiliˈ kiso minengneng to cecay salikaka i kasakopang, tanamen mitongal to kafanaˈ cingraanan, mihaen o papatado cingraanan miharateng. O cecay Asiaay fafahiyan salikaka ci Yie, sanay: “Itini kasakopang iraay ko cecay fafahiyan salikaka taˈangayay ko ngiha a caciyaw. Salakat miharateng kako awaay ko pikangodo ningra, ikor malacafay kako cingraanan mitosil, mafanaˈ to pacafayay cingra to wama wina i icifa pacakay to foting, taˈangay ko ngiha ngaˈ masolot ko lafang. Mikitini toniya nalifetan mananamay ako, tatongalen ko kacipinang to kalengawan no salikaka, mihaen ngaˈ soˈlin a patado cangraanan a miharateng.” Mankora, mamisadak to ˈicel, kawra ano tooren ita ko sowal no Fangcalay Cudad ‘misakakahad to falocoˈ,’ wa malecad ci Yihofaan maolah to ‘masakenaay a tamdaw.’—2 Korinto 6:11-13; 1 Timoti 2:3, 4.

13. Pakayni i Satapangan 19:15, 16, minayar caka romakat ci Loto i, samanay ko demak no coyoh hani? Misamanay?

¹³ Miocoran ni Yihofa ko tatosa a coyoh tayra i lomaˈ ni Loto, pasowal cingraanan milaliw to Sotom, kawra cowa ka tangsol ci Loto mitengil to sakayat, sanay ko coyoh: ‘Wa palaˈafoen ako koniya pala.’ (Satapangan 19:12, 13) Tahinito i dafak, cowaho pilaliw ci Loto ato paro no lomaˈ. Orato miliyaway ko coyoh mirikec ci Lotoan, kawra ‘kamayan a minayar caka romakat’ cingra. Miharateng kita cowa ka i falocoˈen ni Loto ko limoˈot ni Yihofa, anca cowa pidofdof cingra to Kawas saan. Kawra cowa ka sawaden ni Yihofa ci Loto, sanay ko Fangcalay Cudad ‘siniˈadaay ci Yihofa cingraanan.’ Orato, tengteng hananay no coyoh ci Loto ato paro no lomaˈ ningra, mikayat cangranan masadak i Sotom.—ˈOsien ko Satapangan 19:15, 16.

14. Hano siniˈada ci Yihofa ci Lotoan hani?

¹⁴ Hano siniˈada ci Yihofa ci Lotoan hani? Mafanaˈay Cingra minayar ci Loto caka romakat, matalaway to potalay no niyaroˈ a tamdaw alatek. Roma i, o fideloan adihayay ko hefong, na matengilay ni Loto malefongay ko tatosa hongti toniya hefong. (Satapangan 14:8-12) Iraay ko fafahi ato wawa ningra, madeng calemcemay to rihaday no paro no lomaˈ. Hanaca, cihafayay ci Loto, makapahay ko lomaˈ ningra i Sotom. (Satapangan 13:5, 6) Manaokaniw, cowa ko lalangian a eca pidofdof konini, kawra o pinengneng ni Yihofa ci Lotoan kamayan o ‘moecelay a tamdaw,’ cowa ko raraw aca ningra ko minengneng.—2 Pitiro 2:7, 8.

15. Sapinanamaw kita ci Yihofaan, sasamaan ko hademak?

¹⁵ Nanamem ita ci Yihofa, hamaan pakayni waywayan no tao ira ko tatiihay pinengneng cangranan, mamisaˈicel a cipinang to nafalocoˈan nangra. O cecay itiniay i Iwropa fafahiyan salikaka ci Wilonika, sanay cingra: “Cecay fafahiyan salikaka sateked sanay, hato cowa ka rihaday ko falocoˈ. Latekay matalaway kako masasowal cingraanan. Kawra ikor miharateng  kako, ano cingra kako i, madeng misaaliay kako to widang. Orato, milicayan ako cingra samanay ko kaˈorip, ˈarawhan mihadakay cingra to nafalocoˈan a sowal. Matongalay ko kacipinang ako cingranan no hatini.

16. Hano mamicangacang kita to sapadama ni Yihofa siniˈada to tao hani?

¹⁶ Edengan ci Yihofa ko masongilaˈay ko kacipinang to cecay tamdaw. (Taneng 15:11) Mihaenay o cacangacangen ita ci Yihofa padama kitaanan mihapinang to soˈlinay a waywayan no tao, hanaca paihkel to siniˈadaay falocoˈ cangraanan. Iraay ko mahaenay nalifetan ni Ancira, cecay liyad tatokian, itini kasakopang ningra iraay ko cecay fafahiyan salikaka cowa kangaˈay kalacafayen. Sanay cingra: “Soˈlin lalikafen ako koniya salikaka miliyas cingraanan, kawra ikor micangacangay kako to sadama ni Yihofa padama takowanan siniˈada toniya salikaka.” Samanay ko caˈof ni Yihofa to satolon ningra hani? Sanay cingra: “Malacafayay kami a mitosil, ikor halafinay masasowal. Siniˈaday ko falocoˈ ako a mitengil to sowal ningra. Nohatini matongalay ko olah ako cingraanan, misaˈosi to falocoˈ a padama cingraanan.”

17. Maharek minanam toniya lalakaw, misaˈosi ko falocoˈ iso misamaan ko demak?

¹⁷ Cowa ka ngaˈay kita o papina aca a salikaka ko paihkalen to siniˈadaay falocoˈ. Malecad ci Yonaan, Iliya, Hakar aci Lotoan tahalifa to pasangaray alatek, latekay o pasangaray no roma tamdaw oniyah ko mifekaday alatek. Kawra, o kahacecay tamdaw na pairaay to pasangaray no niyah, mansa misaali ci Yihofa kitaanan ‘palecad to falocoˈ no tao.’ (1 Pitiro 3:8) Mikiriwiˈay ko paro no lomaˈ ni Yihofa, o masakenakenaay a tamdaw ko misakapotay. Ano midofdof kita ci Yihofaan, wa ngaˈay micowat to kakelec noniya paro no lomaˈ. Mihaenay, misongilaˈ kita mitengil, misarocod a cipinang, paihkal to siniˈadaay falocoˈ.