1. Aha do na boi taparsiajari sian Bibel taringot Jahowa?

BOHA do molo adong halak na pittor manguhumi hamu alani warna kulitmuna, bohimuna, manang alani balga ni pamatangmuna? Tottu dang lomo rohamu ate. Alai las do rohatta ala taboto Jahowa dang manguhumi halak sian aha na boi diida jolma. Misalna, tikki disuru ibana si Samuel mamillit sada sian anak ni si Isai lao gabe raja di Israel, dang sarupa cara ni si Samuel mangida akka anak ni si Isai songon cara ni Jahowa mangida nasida. Tikki diida si Samuel anak ni si Isai, i ma si Eliab, didok ibana ma, “On do huroha simiahan di jolo ni Jahowa!” Memang uli do rupa ni si Eliab, jadi dirippu si Samuel cocok do ibana gabe raja. “Alai didok Jahowa ma tu si Samuel: ‘Unang ho mamereng tu rupana, manang tu tongam di dagingna, ai nungnga hubolongkon anggo ibana.’” Aha ma parsiajaranna? Didok Jahowa ma muse, “Ianggo jolma rupa do na niidana, alai anggo Jahowa roha di bagasan do na niidana.”​—1 Sam. 16:1, 6, 7.

2. Songon na didok di Johannes 7:24, boasa dang boi tauhumi sasahalak holan sian penampilanna? Paboa ma tudosanna.

² Ala jolma na so sempurna do hita, olo do pittor hatop tauhumi sasahalak sian penampilanna. (Jaha Johannes 7:24.) Alai dang boi tabahen penilaian tu sasahalak holan sian na boi taida. Umpamana, dokter na berpengalaman jala na malo pe, dang boi ibana mamboto takkas sahit ni sahalak pasien molo holan mangida halakna. Ikkon jolo ditangihon ibana do pasienna i. Asa diboto songon dia do kesehatanna saleleng on, boha do pakkilalaanna, jala aha do keluhanna. Jala adong do dokter na ikkon ma-rontgen pasienna. Alana molo dang, olo do gabe sala diagnosa. Suang songon i ma, dang boi pittor taattusi  situasi ni akka donganta molo holan mamereng sian penampilanna. Ikkon marsitutu do hita mangattusi na di bagasan rohana, asa taboto halak na songon dia do ibana. Memang dang boi hita songon Jahowa na mamboto aha na di bagasan roha ni sasahalak. Alai boi do hita marsitutu maniru Jahowa. Boha carana?

3. Songon dia akka carita di Bibel na lao taulas di parsiajaran on boi mangurupi hita asa maniru Jahowa?

³ Songon dia do Jahowa maradoppon akka naposona? Ditangihon Ibana do nasida. Diattusi Ibana do latar belakang dohot situasi ni nasida. Jala asi do rohana mida nasida. Saonari, taulas ma songon dia Jahowa patuduhon i sude tu si Jona, si Elia, si Hagar dohot si Lot. Dung i, taulas ma songon dia hita boi maniru Jahowa tikki maradoppon akka donganta.

4. Boasa olo gabe tadok dang denggan parange ni si Jona?

⁴ Ala dang taboto sude situasi ni si Jona, olo do ra gabe didok rohatta molo si Jona on halak na so setia jala dang boi diandalhon. Diparettahon Jahowa do ibana lao tu Ninive pasahatton barita panguhuman. Alai dang olo ibana, gabe ‘maporus do ibana sian Jahowa’. Lao do ibana markapal tu luat na asing. (Jona 1:1-3) Olo do hamu mangalehon kesempatan muse tu si Jona asa mandapot tugas? Ra, daong ate. Alai, dilehon Jahowa do muse kesempatan tu ibana.​—Jona 3:1, 2.

5. Sian hata ni si Jona na disurat di Jona 2:2, 3, 10, aha do na boi taparsiajari sian ibana?

⁵ Sian tangiang ni si Jona, boi ma taboto halak na songon dia do ibana sasittongna. (Jaha Jona 2:2, 3, 10.) Tottu jotjot do ibana martangiang. Sada tangiangna i ma tikki ibana di butuha ni dekke. Sian tangiangna i taboto ma, adong do parangena na denggan, nang pe hea ibana mangulahon na sala. Sian hatana di tangiang i boi ma taboto serep do rohana, diargai ibana do Jahowa, jala unduk do ibana tu Jahowa. I do alana, dang holan hasalaanna na diida Jahowa. Dialusi Jahowa do tangiang ni si Jona jala dipakke do muse ibana gabe panurirang.

6. Boasa rikkot di hita asa denggan manangihon?

⁶ Asa boi denggan tatangihon halak na asing, porlu do serep rohatta jala sabar. Memang dang mura i, alai adong tolu laba na boi tadapot. Na parjolo, gabe dang sala be penilaianta tu sasahalak. Na paduahon, gabe taboto ma boha pakkilalaan ni sasahalak, jala boasa songon i pangalahona. Gabe ummura ma hita patuduhon asi ni roha tu ibana. Na patoluhon, gabe boi ma taurupi halak asa  lam mangattusi dirina sandiri. Sipata, ikkon jolo dipaboa sasahalak do aha na di bagasan rohana, baru pe diboto ibana boha pakkilalaanna. (Poda 20:5) Adong sahalak sintua di Asia marcarita, “Hea do sala au. Pittor makkatai au dang jolo hutangihon. Hudok ma tu sahalak donganta borua, asa dibahen ibana muse komentar na umdenggan di parpunguan. Alai ujungna, baru pe huboto maol do hape donganta i manjaha. Alani i dang mura di ibana lao mangalehon komentar.” Jadi massai rikkot do di ganup sintua asa jolo ‘mambege parsoalanna’, baru pe mangalehon poda.​—Poda 18:13.

7. Aha do na boi taparsiajari sian Jahowa tikki maradoppon si Elia?

⁷ Adong do akka dongan na maol paboahon pakkilalaanna. Ra, ala nungnga songon i nasida sian na gelleng, manang nungnga songon i parangena. Boha do caratta mangurupi nasida asa ummura paboahon na di rohana? Taingot ma cara ni Jahowa maradoppon si Elia tikki naeng dibunu si Izebel ibana. Dung piga-piga ari, baru pe boi dipaboa si Elia pakkilalaanna tu Jahowa. Denggan do ditangihon Jahowa ibana. Dung i, dipatogu Jahowa ma ibana. Jala dilehon do tugas na massai rikkot tu ibana. (1 Raj. 19:1-18) Akka donganta pe, sipata porlu do talehon tikki tu nasida asa boi paboahon na di rohana. Asa boi nasida marcarita tu hita, porlu do hita sabar songon Jahowa. Jala molo nungnga pos roha ni nasida lao marcarita tu hita, manat ma tatangihon nasida.

8. Songon na disurat di 1 Musa 16:7-13, songon dia do Jahowa mangurupi si Hagar?

⁸ Si Hagar, hatoban ni si Sarai hea do mangulahon na sala dung gabe istri ni si Abram ibana. Hamil ma ibana, jala gabe lea ma rohana mangida si Sarai, ala dang adong ianakhonna. Gabe dang denggan be hubungan ni nasida na dua, jala gabe lao ma si Hagar ala disusai si Sarai. (1 Mus. 16:4-6) Olo do ra tapikkir, memang cocok do dibahen songon i tu si Hagar, alana dang denggan pangalahona. Alai dang holan i na diida Jahowa sian si Hagar. Disuru do suru-suruan lao manjuppangi ibana. Jala marhite suru-suruan i diurupi Jahowa ma si Hagar paubahon pangalahona, jala dipasu-pasu do ibana. Gabe diboto si Hagar ma na sai toktong do diparrohahon Jahowa ibana. Jala diattusi do songon dia situasina. Alani i, gabe didok si Hagar ma tu Jahowa, “Ho do Debata na manatap ahu.”​—Jaha 1 Musa 16:7-13.

9. Aha do na diingot Jahowa tikki maradoppon si Hagar?

⁹ Aha do na diida Jahowa sian si Hagar? Diingot Ibana do songon dia latar belakang ni si Hagar jala situasi aha do naung diadopi ibana. (Poda 15:3) Halak Mesir do si Hagar on, jala tading dohot halak Heber. Olo do ra lungun rohana ala holan ibana halak Mesir disi. Jala masihol do ra ibana tu keluargana dohot hutana. Jala dang holan ibana istri ni si Abram. Di tikki i boi dope naposo ni Jahowa godang istrina, hape sasittongna dang songon i lomo ni roha ni Jahowa. (Mat. 19:4-6) I do umbahen gabe godang parsoalan di situasi si songon i. Adong ma na cemburu, adong ma na marsogo ni roha. Memang, dang lomo roha ni Jahowa mangida si Hagar mangaleai si Sarai, alai diattusi Jahowa do situasi dohot latar belakang ni si Hagar. I do umbahen na burju Jahowa tu ibana.

10. Songon dia do asa boi lam tatanda akka donganta?

¹⁰ Songon Jahowa, marsitutu ma hita mangattusi situasi ni halak. Porlu do asa lam tatanda akka donganta. Marsaor ma hita tu nasida di parpunguan. Tadongani ma nasida marbarita. Jala, boi do tatogihon nasida mangan di jabutta. Molo taulahon i, gabe taboto ma situasi ni nasida. Olo do ra adong dongan  na dirippu hamu sombong, hape sasittongna na parila do ibana. Adong do dongan na dirippu hamu materialistis ala godang hepengna, hape sasittongna burju do ibana mangalehon jala mangurupi akka dongan. Manang adong sada keluarga na jotjot tarlambat marpungu, hape diboto hamu ma na adong do paraloan na diadopi nasida. (Job 6:29) Memang, dang boi hita ‘mangantoi na so urusanta.’ (1 Tim. 5:13) Alai, denggan do molo tatanda akka donganta, jala taboto parange dohot situasi ni nasida.

11. Boasa ikkon ditanda sintua akka biru-biruna?

¹¹ Rikkot do sintua mamboto latar belakang ni akka dongan na diurupi nasida. Parrohahon ma pengalaman ni sahalak pengawas wilayah na margoar si Artur. Hea ma ibana dohot sahalak sintua ro tu jabu ni sahalak donganta borua na parila. Didok si Artur ma, “Baru pe diboto hami na hatop do hape marujung ngolu suamina, dang sadia leleng dukkon marhasohotan nasida. Alai nang pe songon i, boi do ibana mangurupi dua boruna toktong manomba Jahowa. Saonari nga lam maol be ibana marnida, jala depresi do ibana. Alai toktong do balga holong dohot haporseaonna tu Jahowa. Gabe diboto hami ma, godang do hape akka na denggan na boi ditiru hami sian donganta on.” (Plp. 2:3) Jahowa do na ditiru pengawas wilayah i. Ditanda Jahowa do akka biru-biruna, jala diboto do akka hasusaan na diadopi nasida. (2 Mus. 3:7) Jadi, molo ditanda akka sintua do biru-biruna, gabe lam mura ma nasida lao mangurupi.

12. Aha do parsiajaran na didapot si Yip Yee ala marsitutu ibana mananda sahalak donganna di huria?

¹² Olo do ra, jut rohatta mangida sahalak donganta. Alai molo taattusi latar belakangna, boi do gabe mura hita patuduhon asi ni roha tu ibana. Adong sada pengalaman sian donganta si Yip Yee na tading di Asia. Didok ibana, “Adong sada dongan na gogo hian suarana molo makkatai. Huhilala dang denggan pangalahona i. Alai, tikki rap hami marbarita, baru pe huboto molo saleleng on na mangurupi natua-tuana do ibana martiga-tiga dekke. Jadi ikkon gogo ma suarana asa ro halak manuhor.” Didok si Yip Yee ma muse, “Sian i huparsiajari ma, ikkon taboto do songon dia latar belakang ni akka donganta asa boi taattusi nasida.” Memang ikkon marsitutu do hita lao mananda akka donganta. Alai, molo taihutton do poda sian Bibel lao mambukka roha, on patuduhon na tatiru do Jahowa na makkaholongi “saluhut jolma”.​—1 Tim. 2:3, 4; 2 Kor. 6:11-13.

13. Songon na disurat di 1 Musa 19:15, 16, aha do na diulahon akka suru-suruan i tikki dipalambat-lambat si Lot langkana, jala boasa?

¹³ Tikki dilehon Jahowa tudu-tudu na massai rikkot tu si Lot, dang pittor hatop ibana mangihutton i. Adong ma dua suru-suruan na manjuppangi si Lot, jala dipaboa ma asa lari ibana dohot keluargana sian Sodom. Didok dua suru-suruan i, “Ai naeng mangaripashon huta on do hami.” (1 Mus. 19:12, 13) Marsogotna i dang lao dope si Lot dohot keluargana. Jadi dipaingot akka suru-suruan i ma muse si Lot. Alai, tong do “sai [dipalambat-lambat] langkana”. Olo do ra gabe tadok di rohatta, na so olo do si Lot on manangihon hata ni Jahowa. Alai marsitutu do Jahowa lao paluahon ibana. Ala ‘asi do roha ni Jahowa di ibana’, ditarik akka suru-suruan i ma tangan ni nasida sekeluarga, jala diboan ma nasida kaluar sian kota i.​—Jaha 1 Musa 19:15, 16.

14. Boasa asi roha ni Jahowa mangida si Lot?

¹⁴ Adong piga-piga alasan boasa Jahowa marasi ni roha tu si Lot. Ra, na mabiar do si Lot tu akka halak na adong di luar ni kota i. Adong do muse bahaya na asing. Ra, diboto si Lot do taringot dua raja na madabu tu lombang na marisi aspal, jala jonok do lombang i sian inganan i. (1 Mus. 14:8-12) Adong do istri dohot boruna. Tottu mabiar do si Lot annon gabe susa nasida. Asing ni i, godang do arta ni si Lot. Ra, bagak do jabuna na di Sodom. (1 Mus. 13:5, 6) Memang dang boi sudena i gabe alasan ni si Lot asa dang mangoloi paretta ni Jahowa. Alai, dang holan hasalaan ni si Lot na diida Jahowa. Diida Ibana do si Lot “halak na mangulahon lomo ni rohana”.​—2 Ptr. 2:7, 8.

15. Asa unang hatop tauhumi sasahalak, aha do na ikkon taulahon?

¹⁵ Unang pittor tauhumi halak holan sian aha naung diulahon ibana. Marsitutu ma hita lao mangattusi pakkilalaanna. I ma na diulahon donganta si Veronica na di Eropa. Didok ibana, “Adong do donganta borua na sai mutung bohina. Sipata, mabiar do au lao makkatai tu ibana. Alai hurimangi ma, ‘Molo songon ibana do situasikku, porlu do adong donganku.’ Jadi, husukkun ma boha do pakkilalaanna.  Dicaritahon ibana ma tu au aha na di rohana. Saonari, lam huattusi ma ibana.”

16. Boasa ikkon martangiang hita asa boi marasi ni roha?

¹⁶ Jahowa do na boi takkas mangattusi hita sude. (Poda 15:11) Jadi, tapangido ma tu Jahowa asa diurupi hita maniru carana mangida akka dongan. Jala asa taattusi songon dia hita marasi ni roha tu nasida. Sahalak donganta na margoar si Anzhela makkilala, gabe ummura do ibana marasi ni roha dung martangiang. Hea do adong donganna di huria na maol didongani. Didok si Anzhela, “Sai holan parangena na roa i do na huida. Gabe dang lomo rohakku jonok tu ibana. Alai hupangido ma tu Jahowa asa boi au marasi ni roha tu donganta i.” Dialusi Jahowa do tangiangna i? Didok ibana, “Rap marbarita na uli ma hami. Dung i, makkata-hatai ma hami saleleng piga-piga jom. Manat do hutangihon ibana. Saonari, lam holong do rohakku tu donganta i. Jala, marsitutu do au asa boi mangurupi ibana.”

17. Aha do na ikkon taulahon?

¹⁷ Dang boi tatottuhon ise do dongan na tama manjalo asi ni rohatta. Sude do nasida mangadopi masalah songon na diadopi si Jona, si Elia, si Hagar, dohot si Lot. Sipata, nasida sandiri do na mambahen dirina gabe susa. Alai sasittongna, hita pe hea do gabe susa alani salatta sandiri. I do umbahen dipangido Jahowa tu hita asa marroha sapakkilalaan tu na asing. (1 Ptr. 3:8) Molo taoloi Jahowa, gabe lam marsada ma hita tu akka dongan di liat portibi on. Jadi, toktong ma tatangihon akka dongan, taattusi ma pakkilalaanna, jala tapatudu ma asi ni roha tu nasida.