1. Ro Refo, rosai kofarkor ro Yahwe I ḇefrur fa kosnesna naprei?

WAMARISEN snonkaku sya smam Au ro kif, mka, ḇaido baba ro baken Bedi ke? Na wamarisen ḇa. Ḇape Yahwe dakmam ko imnis rarirya ḇa, nane nafrur fa kosnesna naprei. Rwama komam fawar oso ine. Yahwe ikofen ḇe Samuel i ḇo doḇe oso ro Isai romawa ḇyedi nari dakḇe raja ro Israel. Manseiri? Samuel myam Isai romawa ḇyesi raris moḇ Yahwe myam si raya ḇa. Rofyor Samuel myam faro Isai romawa ḇepon ḇyedi ḇenir ḇe Eliab, doḇe, ”Yakyar ine iso snonkaku Yahwe ryem diri.” Myam Eliab i mande, isrow fa ḇye raja. ”Mboi Yahwe ikofen yoḇ Samuel i, ’Mam awer ro moḇsa isnai rai, ma kakaki ḇyena, snar ima snonkaku Yakinfir dirya ḇa.’” Farkarkor rosai kun ya? Yahwe ikofen wer, ”Snonkaku smam roi ḇesnai ro simkasna, mboi Yahwe myam sisnesna.”​—1 Sam. 16:1, 6, 7.

2. Imnis mnuk ro Yohanes 7:24, rosai ḇefnai fa komamkara snonkaku sya ro rosai komam ro ḇandi monda awer?

² Koinema konapes ḇa, inja fyorno ido komamkara snonkaku sya ro rosai komam ro ḇandi monda. (Wasya Yohanes 7:24.) Mboi komam snonkaku ḇese ro ḇandi monda ido, na kofawi pyum si ḇaim. Kwarapan roi nane, dokter oso ima ifawi pyum kwar dafduf ḇekur snonkaku sya ma ifnoḇek si kwar fa siprei. Mboi, imbe fyawi mnis dafduf rosai ḇekur snonkaku oso ido, na iknower i monda ḇa. Na ryower pyum rosai ikofen ya insama ifawi dafduf rosai ḇekur i, roi ḇyaḇir na, moḇsa iduf rai. Dokter ani na dor i fa ḇye-ronsen insama myam roi ḇero baken ḇyedi dori. Ifrur rarirya insama ifawi mnis dafduf ḇyena ma ifawi nyan ḇesrow fa ifnoḇek i. Rarirya kako, na kopok  kofawi mnis naek srar koḇesi ḇa fyor komam si ro ḇandi monda. Kosewar fa kofawi rosai skara na ma komambir pyum si. Kakuḇae, koma komnis Yahwe I ḇa ḇefawi mnis snonkaku sya sisnesna. Ḇape, na kosewar kaku fa koso Yahwe moḇ myam si raya. Rariso?

3. Rariso fawar ro Refo kawos ro farkarkor ine nafnoḇek ko fa koso Yahwe I?

³ Rariso Yahwe ifrur pyum manfamyan Ḇyesi? Ryower pyum si. Kyara asuser moḇ srama ya ma kenem sena. Mura fyasnai sawarwar ḇe si. Nari kawos moḇsa Yahwe fyasnai ro nane faro Yunus, Elia, Hagar, ma Lot. Na kofarkor kako moḇsa kakso Yahwe nyan Ḇyenane faro naek srar koḇesi.

4. Rosai ḇefnai fa imbude kona kakara ḇesasar faro Yunus i?

⁴ Kofawi mnis Yunus kenem ḇyena ḇa ido, na kokara ima snonkaku ḇemakakak ma isouser ḇa. Yahwe iwan i fa ikofenḇair anun samamyai faro mnu Niniwe. Mboi, Yunus isouser ḇa ḇo ”ifrar ibur Yahwe I” ma dek kapal ḇe moḇ ḇese. (Yun. 1:1-3) Au ido na buk swaf wer ḇe Yunus i fa duf fararur ani ke? Imbude roḇa. Ḇape, Yahwe ima myam roi ḇepyum ro Yunus i, inja ḇyuk swaf wer ḇe i.​—Yun. 3:1, 2.

5. Rosai wafarkor ro Yunus i imnis mnuk ḇefas ro Yunus 2:1, 2, 9 ya?

⁵ Kowasya Yunus nadi ḇyena ido na kofawi ima snonkaku ḇemnis rariso. (Wasya Yunus 2:1, 2, 9.) Yunus ḇyenadi ḇe Yahwe ḇesya kwar. Rofyor ḇyenadi ro in ḇeba anya snewar ḇyeja, wos ikofen na nafnoḇek ko fa kofawi sasar ḇyena monda ḇa mboi komam rari ḇepyum ḇyena kako. Roi ikofen na nfasnai nya sne ḇerun, syowi, ma dun snemuk fa isouser Yahwe I. Iso ḇefnai fa Yahwe myam monda faro Yunus sasar ḇyena ḇa, kyarem nadi ḇyena, ma ḇyuk fararur fa ifarmyan ḇe nabi pdef!

6. Rosai befnai fa fandun kaku korower pyum snonkaku ḇesesya?

⁶ Insama korower pyum snonkaku ḇesesya, fandun fa kona sne ḇerun ma kokḇaḇ. Ine roi ḇepyan ḇa, ḇape na kosmai fainda rikyor. Ḇepon ya, na kokara sasar ker snonkaku ḇesesya ḇa. Ḇesuru ya, bisa kofawi mnis naek srar koḇesi roi sḇaḇir na ma roi ḇefnai fa sifrur roi oso insama bisa kofasnai sawarwar  faro si. Ḇekyor ya, kofnoḇek snonkaku oso fa myambir pyum mankundi. Fyorno ido, na kofawi mnis roi koḇaḇir na fyor kofawar kwar roi ḇekur ko na ḇe snonkaku ḇese. (Ams. 20:5) Penatua oso ro sup Asia ikofen, ”Ras oso yarower mnis ḇaim ḇo yawose. Yakofenḇair ḇe srar oso fa ḇyuk kankarem ḇepyum syadi ro fananjur. Mboi ḇarpur mura, insape yafawi iwasya kir ḇa ma syewar kaku fa ḇyuk kankarem.” Inja, fandun kaku fa penatua oser-oser sfawi mnis resari samswen oso insape sḇuk wos anun!​—Ams. 18:13.

7. Rosai kofarkor ro nyan Yahwe ifnoḇek Elia i?

⁷ Naek srar ḇeḇeso imbude samswen fa sikofenḇair roi sḇaḇir na kukro roi ḇekur si ro fafisu naiwara, moḇ siba ro ya, ḇaido rari sena. Moḇsa kofnoḇek si insama simarisen sfawar roi sikram ro sisnesna? Koswarepen nyan Yahwe ifnoḇek Elia i. Fafisu ifrarbur Ratu Izebel i, ḇyenadi ḇeri ḇe Yahwe I ḇa. Ras ḇeḇeso mura insape fyawar roi ḇyaḇir na faro Yahwe I. Imbape Yahwe imarisen ryower pyum i. Syambraḇser Elia ma ḇyuk fararur ḇefandun fa duf na. (1 Raj. 19:1-18) Naek srar koḇesi imbude sfandun swaf kawan insape sfawar roi sḇaḇir na ḇe ko. Komarisen kofawi roi ḇero sisnesna ido fandun fa koso Yahwe I kuker kokḇaḇ faro si kada. Rarirya nari simarisen sfawar roi sikram ro sisnesna ḇe ko. Ma fafisu sfawar yoḇ ko, ipyum fa korower pyum si.

8. Ro Kejadian 16:7-13 ya, rariso Yahwe ifnoḇek Hagar i?

⁸ Sarai ḇyuk binfyan ḇyedi, Hagar i, fa fyarḇuk kuker Abram i. Mboi ḇarpur mura, ifrur pyum Sarai ḇa. Rofyor Hagar fyadores kwar, myamkyof Sarai kukro pyansnasem. Iso ḇefnai fa Sarai ifrur pyum Hagar i ḇa isof ifrarbur i. (Kej. 16:4-6) Snar konapes ḇa, inja na kokara Hagar ismai roi ḇeradirya kukro dararer i. Ḇape, Yahwe myam Hagar imnis rarirya ḇa. Iwan malaikat fa isrow Hagar i. Malaikat anine ifnoḇek Hagar i fa fyadwer kenem ḇyedi ma ikofen Allah nari ḇyuk romawa sibor ḇe i. Hagar ifawi kaku Yahwe isya myam ma ifawi roi ḇekur i na. Nane nadif i fa ikofen ḇe Yahwe I, ”Auso Allah ḇemam roi nakam . . . [ma] ḇemam aya.”​—Wasya Kejadian 16:7-13.

9. Rosai ḇefnai fa Yahwe ifrur pyum Hagar i?

⁹ Rosai Yahwe myam ro Hagar i? Yahwe ifawi kaku Hagar i ma rosai monda ḇekur i na. (Ams. 15:3) Hagar ima bin ḇeraker sup Masir ḇo ḇyarekus kina ḇero Ibrani. Swaf ono kyara ḇyarek ro mankundi ke? Myander kina ḇyesi ma sup marin ḇyedi ke? Oso wer ido, ima derer monda ḇa ḇe swa faro Abram i. Ro fafisu anya, snon ḇesyom faro Yahwe ono sisya sfarḇuk bin oser monda ḇa. Ḇape, ima roi Yahwe imarisen ro randak ya ḇa. (Mat. 19:4-6) Roi sifrur anna nafnai mamḇayayir ma masasor ro kina yadori. Kakuḇae, Yahwe imarisen ḇa fyor myam Hagar ḇyesyowi Sarai ḇa. Ḇape, Yahwe ifawi pyum Hagar sneḇaḇir ḇyena ma roi ḇekur i na, inja ifrur pyum Hagar i.

10. Rariso na komambir pyum naek srar koḇesi?

¹⁰ Na koso Yahwe nyan Ḇyena kuker kofawi naek srar koḇesya. Kosewar fa komambir pyum si. Kawos kuker si fyor fananjur ya imbran ḇaim ma posa kwar. Kor si fa sakso ko ro ḇaḇeḇaryas, ma bisa ido kor si fa sanan kayam kuker ko.  Kofrur rarirya ido, insape na kofawi pyum si. Raris imbesrar oso imbude rya imewer fyanam yoḇ ko, mboi kaku ya ima imamyai. Manbesrar oso nya pipi nabor, mboi fyasnai snemura ma iswar syadi pipi ḇyena ḇa. Ḇaido, kina oso srama fasaw ḇe fananjur ya ḇa, mboi kaku ya sismai roi ḇedwarek. (Ayb. 6:29) Kakuḇae, na komewer kosowarpu ro snonkaku ḇesesya fandun sena. (1 Tim. 5:13) Ḇape, kosewar kaku fa kofawi naek srar koḇesi ma rosai ḇekur si kwar. Rarirya, na komambir pyum si.

11. Rosai ḇefnai fa penatua sya fandun fa sifawi pyum naek srar ro sidang?

¹¹ Ḇepon syadi, penatua sya fandun fa sifawi pyum naek srar ro sidang. Kwarapan fawar ro pengawas wilayah oso ḇenir ḇe Artur. Penatua ḇese fnoḇek i ḇo sura sumamfar imbesrar oso, mboi rya imbesrar ine imamyai ma imewer fyanam kuker ḇesesya. Naek Artur doḇe, ”Insape nufawi swari ryobur i fyor sufarḇuk taun ḇeḇeso kwar. Ismai samswen nabor, mboi fyaduru pyum inai ḇyesu fa sufarmyan ḇe Yahwe I. Ḇape kirine, myam mnis wer ḇa ma iḇor ḇyerari. Rarirya mboi, iswar ma ikyar nako faro Yahwe I. Nukara mboi bisa nufarkor roi ḇepyum nabor imbesrar ine fyasnai kwar na.” (Flp. 2:3) Pengawas wilayah ine iso pyum Yahwe nyan Ḇyena. Yahwe ifawi pyum manfamyan Ḇyesi ma kandera sena. (Kel. 3:7) Penatua sya smambir pyum naek srar ro sidang ido, nari napyan fa sḇuk fafnoḇek.

12. Rariso imbesrar ḇenir ḇe Yip Yee ismai fainda kukro syewar fa myambir pyum imbesrar oso?

¹² Imbude Ausya wafafayaf faro oso ro sidang. Mboi swewar fa wafawi pyum i kada, nari napyan fa wafasnai sawarwar faro i. Kwarapan fawar ro imbesrar oso ḇeḇarek ro Asia ḇenir ḇe Yip Yee, doḇe, ”Ro sidang yedi, imbesrar oso imbe dawos ido dawos naba kaku. Yakara ifawi adat ḇa. Ḇape, rofyor yafararur kayam fnoḇek i ro ḇaḇeḇaryas, insape yafawi fyor iwara ifnoḇek sinan ḇyesu fa sḇaḇoḇ in ro pasar. Inja, na dawos naba insama kawasa sya srama skoḇes.” Srar Yip Yee ikofen wer, ”Fandun kaku yasewar fa yafawi ḇepon naek srar sya resari insama yamambir pyum si.” Kakuḇae, ipyum ya kosewar fa komambir pyum naek srar koḇesya. Ḇape, insama ido koso Yahwe nyan Ḇyena fa koswar  snonkaku syakam, koso pyum anun ro Refo fa kobas kosnesna kada.​—1 Tim. 2:3, 4; 2 Kor. 6:11-13.

13. Imnis ḇefas ro Kejadian 19:15, 16, fyor Lot iyaryar ker, rosai malaikat ansuya sufrur ya, ma rosai ḇefnai ya?

¹³ Rofyor Yahwe iwan Lot fa ifrur roi ḇeyun ḇaḇye faro i ma kina ḇyesi, Lot isouser ḇeri ḇa. Malaikat risuru sumamfar Lot ma sukofen yoḇ i fa dun kina ḇyesi ḇo sisasyarbur mnu Sodom. Kukro? Suyoḇe, ”Nari numkokpres moḇ ine.” (Kej. 19:12, 13) Ras meser arwo ya, Lot ma kina ḇyesi sibur rum sedi ḇaim. Inja, malaikat ansuya suḇuk swarapepen wer ḇe Lot i. Ḇape, ”Lot iyaryar ker”. Imbude kokara Lot ima fyandun faro rosai Yahwe ikofen na ḇa ma isouser ḇa. Imbape, Yahwe syewar fa ifnoḇek i pdef. ”Snar Yahwe iswar [Lot]”, malaikat ansuya suyamkepen Lot, swari, ma inai suḇesuya siḇrasna ma suyun si fa sisasyarbur mnu ḇeba ani.​—Wasya Kejadian 19:15, 16.

14. Rosai ḇefnai fa Yahwe fyasnai sawarwar ḇe Lot i?

¹⁴ Rya roi ḇeḇeso naisya ḇefnai fa Yahwe iswar Lot i. Imbude kawasa ḇeḇarek fanam ro mnu Sodom siḇarḇor kaku, inja naiso ḇefnai fa Lot iyaryar fafisu imbe ibur rum ḇyedi kukro imkak si. Oso wer ido, roi ḇemun ḇese naisya wer. Rya Lot ifawi raja risuru ḇesapi ro der ḇefo kuker aspal ro wandow ḇefanam moḇ ani. (Kej. 14:8-12) Lot iso ḇebukor ro kina ma nya romawa, inja na imkakwarek kina ḇyesi. Nya kako nana nabore, inja rum ḇyedi ḇero Sodom na ipyum kaku. (Kej. 13:5, 6) Mboi, Lot syewar nyan ro roi nane kam ḇa fa isouser faro Yahwe I ḇa. Ḇape, Yahwe myam ro Lot sasar ḇyena ḇa mboi myam Lot i ḇe ”snonkaku ḇenapes”.​—2 Ptr. 2:7, 8.

15. Ipyum ya koḇemankara awer naek srar koḇesi, mboi rosai fandun fa kofrur ya?

¹⁵ Koḇemankara fasawsaw awer snonkaku  sya ro rosai sifrur na, mboi kosewar kaku fa kofawi mnis roi sḇaḇir na. Iso imbesrar oso ḇenir ḇe Veronica ro sup Eropa syewar kaku fa dakfrur na. Doḇe, ”Yamam imbesrar oso rya fyasasis ker. Imewer fyanam snonkaku ḇese. Fyorno ido, yamkak yawos yoḇ i. Ḇape yakara, ’Yakmnis i ido, na yamarisen oso fyanam aya.’ Inja, yafanam i ḇo yafuken i. Mura, imarisen fyawar yoḇ aya! Fafisu ine, yamambir pyum i kwar.”

16. Rosai ḇefnai fa koḇenadi kor insama Yahwe ifnoḇek ko fa kofawi roi snonkaku sya sḇaḇir na?

¹⁶ Yahwe derer monda iso ḇefawi pyum ko. (Ams. 15:11) Inja, kor Yahwe I fa ifnoḇek ko insama komam naek srar koḇesi raris moḇ Yahwe myam si raya ma kofawi rariso kofasnai sawarwar faro si. Nadi ifnoḇek imbesrar oso ḇenir ḇe Anzhela fa fyawi pyum snonkaku ḇesesya roi sḇaḇir na. Imbesrar oso ro sidang ḇyedi ifrur fafayaf. Srar Anzhela ikofen, ”Rya imbe yawosbos i ma yaḇinkwanbur i. Mboi, yaḇenadi insama Yahwe ifnoḇek aya fa yafawi pyum imbesrar ani.” Yahwe kyarem srar Anzhela nadi ḇyena ke? Doḇe, ”Nufararur kayam ro ḇaḇeḇaryas, mura nukain nufarfyar kawan kaku. Fafisu kyain fyawar, yarower pyum i. Kirine yaswar syadi i, ma yasewar kaku fa yafnoḇek i.”

17. Rosai fandun fa kofrur faro naek srar koḇesi?

¹⁷ Kopok fa kokinfir awer naek ma srar mansei na kofasnai sawarwar faro si. Sikam saksmai samswen raris Yunus, Elia, Hagar, ma Lot. Fafisu ono, imbude naek srar ḇeḇeso sismai samswen kukro mankunsi sifrur sasar. Kakuḇae, ras ono kokame kakfrur rarirya kako. Iso ḇefnai fa Yahwe dor ko insama kakḇaḇir roi snonkaku ḇese sḇaḇir na. (1 Ptr. 3:8) Kosouser Yahwe ido, nari nafrur fa ḇaḇeoser koḇena kuker naek srar ḇerama ro er ḇese ro supswan ine ḇesiper syambraḇ syadi. Inja, komarisen fa korower pyum si, komambir pyum si, ma kofasnai sawarwar faro si.