1. ?Baebol i tokbaot wanem gudfala fasin blong Jehova?

?OLSEM WANEM? ?Yu yu glad taem man i jajem yu from kala blong skin, o fes mo bodi blong yu? Ating nogat. !Yumi glad se Jehova i no jajem yumi olsem ol man oli jajem yumi! Traem tingbaot Samuel. Taem hem i luk ol boe blong Jese, hem i no luk samting we Jehova i luk. Jehova i talem long hem se wan boe blong Jese bambae i kam king blong Isrel. ?Be weswan? Taem Samuel i luk Eliab, fasbon blong Jese, hem i talem se, “Man ya we i stap stanap long fes blong Hae God, ating hem nao we hem i jusumaot.” Long tingting blong Samuel, Eliab i stret blong kam king. Be Jehova i talem long hem se: ‘Yu no tingbaot we man i longfala mo i naes. Mi mi no wantem hem.’ ?Yumi lanem wanem? Jehova i gohed se: “Man i stap lukluk long bodi blong man nomo, be mi mi stap lukluk long tingting blong hem.”—1 Saml. 16:1, 6, 7.

2. ?From wanem yumi no mas jajem narafala from samting we yumi luk, olsem Jon 7:24 i talem? Talem wan pijatok.

² From we yumi evriwan i sinman, plante taem yumi jajem narafala from samting we yumi luk. (Ridim Jon 7:24.) Be hemia i givim smol save nomo long saed blong wan man. Traem tingbaot wan dokta. Nating se hem i dokta longtaem finis, be sipos hem i lukluk bodi mo fes blong sikman nomo, bambae hem i no kasem save gud long sik blong hem. Hem i mas lesin gud blong faenemaot tingting blong hem, ol sik we hem i kasem bifo, mo from wanem hem i stap harem nogud naoia.  Maet dokta i mekem eksre tu blong luk insaed long bodi blong hem. Sipos hem i no mekem olsem, maet hem i givim rong meresin. Long sem fasin, taem yumi lukluk nomo fes mo bodi blong ol brata mo sista, yumi no kasem save gud long olgeta. Yumi mas traehad blong kasem save tingting blong olgeta. I tru se yumi no save wanem i stap long hat blong olgeta, taswe bambae yumi neva kasem save long olgeta olsem Jehova i kasem save. Be yumi save mekem bes blong yumi blong folem fasin blong Jehova. ?Yumi mekem olsem wanem?

3. ?Ol stori blong Baebol long stadi ya bambae oli halpem yumi blong folem wanem fasin blong Jehova?

³ ?Jehova i mekem wanem fasin long ol man we oli wosipim hem? Hem i lesin gud long olgeta. Hem i kasem save long laef blong olgeta mo ples we oli gruap long hem. Mo hem i soemaot sore long olgeta. Naoia bambae yumi tokbaot olsem wanem Jehova i soemaot ol fasin ya long Jona, Elaeja, Hega, mo Lot, mo olsem wanem yumi tu yumi save soemaot ol fasin ya long ol brata mo sista.

4. ?From wanem yumi save gat nogud tingting long Jona?

⁴ From we yumi gat smol save nomo long Jona, maet yumi tingbaot hem olsem wan man we Jehova i no moa save trastem hem, o wan man we i lego Jehova. Jehova i bin talem long Jona blong i go talemaot jajmen blong hem long ol man Nineve, be hem i no obei. Hem i girap, i jam long wan sip we i stap go long narafala ples. Hem i traem blong “ronwe long Hae God.” (Jona 1:1-3) Sipos yu, ?bambae yu givim wan moa janis long Jona? Maet nogat. Be Jehova i luk se i stret blong givim narafala janis long hem.—Jona 3:1, 2.

5. ?Ol tok blong Jona long Jona 2:1, 2, 9 oli soemaot wanem long saed blong hem?

⁵ Taem Jona i prea, hem i soemaot wanem i stap long hat blong hem. (Ridim Jona 2:1, 2, 9.) Nating se hem i ronwe long wok we Jehova i givim, be prea ya mo ol narafala prea blong hem oli soemaot se hem i gat tingting daon, hem i gat fasin blong talem tangkiu, mo hem i wantem tumas blong obei long Jehova. !Taswe, Jehova i no tingbaot mastik blong Jona, be i ansa long prea blong hem, mo i gohed blong yusum hem olsem wan profet!

6. ?From wanem i impoten blong lesin gud?

⁶ Blong lesin gud, yumi mas gat tingting daon mo longfala tingting. ?From wanem i  impoten blong lesin gud? I gat tri risen. Faswan, bambae yumi no hareap blong tingting nogud long ol brata mo ol sista. Sekenwan, bambae yumi kasem save long filing mo tingting blong olgeta, nao yumi save soemaot sore. Mo namba tri, taem brata o sista i stap toktok, maet hem tu i kasem save moa long filing blong hem. Samtaem, yumi evriwan i mas tokbaot ol filing blong yumi, blong kasem save long olgeta. (Prov. 20:5) Wan elda long Esia i talem se: “Mi tingbaot wan taem we mi mestem, nao mi toktok bifo we mi lesin gud. Mi talem long wan sista se hem i mas mekem ol ansa blong hem long miting oli kam gud moa. Biaen, mi faenemaot se hem i no save rid gud, mo hem i stap traehad bigwan blong givim ol ansa.” !I impoten tumas we ol elda oli “lesin long tok blong ol man fastaem,” nao biaen oli jes givim advaes!—Prov. 18:13.

7. ?Fasin we Jehova i mekem long Elaeja i tijim yumi long wanem?

⁷ I had blong sam brata mo sista oli tokbaot ol filing blong olgeta, from we oli sem o oli gruap long wan kalja we ol man oli no mekem olsem. ?Olsem wanem yumi save mekem i isi blong oli talemaot filing blong olgeta? Traem tingbaot samting we Jehova i mekem long Elaeja taem hem i stap ronwe long Jesebel. Afta we plante dei i pas, Elaeja i jes talemaot ol filing blong hem long Jehova. Jehova i lesin gud, i leftemap tingting blong Elaeja, mo i givim wan gudfala wok long hem. (1 King 19:1-18) Maet i tektaem blong wan brata o sista i talemaot ol filing blong hem, be taem hem i mekem olsem, bambae yumi kasem save long hem. Sloslo bambae hem i trastem yumi sipos yumi gat longfala tingting olsem Jehova. Nao taem hem i rere blong tokbaot ol filing blong hem, yumi mas lesin gud.

8. Folem Jenesis 16:7-13, ?Jehova i givhan olsem wanem long Hega?

⁸ Hega, we i woman slef blong Sarae, i mekem wan fasin we i no stret afta we hem i kam waef blong Ebram. Taem Hega i gat bel, hem i lukluk rabis long Sarae, we i no gat pikinini. Sarae i harem nogud tumas nao hem i ronemaot Hega. (Jen. 16:4-6) Maet long tingting blong yumi, Hega i wan rabis woman mo i stret nomo we hem i kasem panis. Be hemia i no tingting blong Jehova. Hem i sanem wan enjel blong faenem Hega, mo blong givhan long hem blong i jenisim fasin blong hem. Mo tu, hem i blesem hem. Hega i harem save se Jehova i stap lukluk hem, mo i kasem save long trabol blong hem. Taswe hem i talem se: “God i stap lukluk mi.”—Ridim Jenesis 16:7-13.

9. ?God i tingbaot wanem long saed blong Hega?

⁹ ?Jehova i tingbaot wanem long saed blong Hega? Hem i save gud long laef blong Hega, mo ol trabol we hem i kasem. (Prov. 15:3) Hega i wan woman Ijip we i stap wetem ol Hibru. Maet hem i harem se oli no laekem hem. Maet hem i tingbaot famle mo kantri blong hem. Mo tu, i no hem nomo we i waef blong Ebram. Long taem bifo, sam man blong God oli gat moa long wan waef. Be hemia i no tingting blong Jehova fastaem. (Mat. 19:4-6) Taswe yumi no sapraes se i gat jalus mo kros long ol famle olsem. I tru se Jehova i no glad long Hega taem hem i jikim Sarae, be hem i kasem save long laef mo trabol blong Hega.

10. ?Olsem wanem blong save gud ol brata mo sista?

¹⁰ Taem yumi traehad blong kasem save long ol brata mo sista, yumi folem fasin blong Jehova. Traem save gud olgeta. Storian wetem olgeta bifo mo afta long miting, prij wetem olgeta, mo singaot olgeta oli kam kakae  long haos. Taem yu mekem olsem, maet yu faenemaot se wan sista we yu ting se i flas, hem i sem, mo wan brata we yu ting se i ronem ol sas samting, hem i gat gudfala fasin blong singaot ol man oli kam long haos, mo wan famle we plante taem oli kam let long miting, oli stap stanap strong nating se samfala oli agensem olgeta. (Job 6:29) I tru, yumi no mas “pusum nus long bisnes blong ol narafala man.” (1 Tim. 5:13) Be i gud blong save sam samting long saed blong laef blong ol brata mo sista. Samting ya i save halpem yumi blong kasem save long fasin blong olgeta.

11. ?From wanem i impoten blong ol elda oli save gud ol sipsip?

¹¹ Ol elda oli mas save gud ol brata mo sista. Traem tingbaot wan eria elda we nem blong hem Ata. Hem i go wetem wan narafala elda blong visitim wan sista we i luk olsem se i stap sem. Ata i talem se: “Mitufala i faenemaot se smoltaem afta we sista ya i mared, man blong hem i ded. Nating se laef blong hem i had, hem i lukaot long tufala gel blong hem mo i tijim tufala blong oli lavem Jehova. Be naoia ae blong hem i nogud, mo tingting blong hem i foldaon. Nating se i olsem, hem i lavem Jehova yet mo i bilif strong long hem. Mitufala i lanem plante samting long gudfala eksampol blong sista ya.” (Fil. 2:3) Eria elda ya i stap folem fasin blong Jehova, we i save gud ol sipsip blong hem mo trabol blong olgeta. (Eks. 3:7) Taem ol elda oli save gud ol sipsip, oli save givhan moa long olgeta.

12. Taem Yipyi i save gud wan sista, ?olsem wanem samting ya i givhan long hem?

¹² Maet fasin blong wan brata o sista i stap mekem yu yu kros. Be sipos yu traem save gud long laef blong hem, ating bambae yu sore long hem. Tingbaot wan sista long Esia, nem blong hem Yipyi. Hem i talem se: “Mi no laekem fasin blong wan sista long kongregesen from we oltaem hem i stap toktok long bigfala voes. Be taem mi prij wetem hem, mi faenemaot se bifo, hem i stap givhan long papa mo mama blong hem blong oli salem fis long maket. Mo hem i mas singaot bigwan blong pulum ol kastoma. Hemia i tijim mi se, blong kasem save long ol brata mo sista, mi mas save gud laef blong olgeta.” I no isi blong kasem save long ol brata mo sista. Be taem yu folem advaes blong Baebol mo openem hat blong yu, yu stap folem fasin blong Jehova we i lavem “ol defdefren kaen man.”—1 Tim. 2:3, 4; 2 Kor. 6:11-13.

13. Folem Jenesis 19:15, 16, ?tu enjel i mekem wanem taem Lot i stap tektaem, mo from wanem?

¹³ Taem laef blong Lot i stap long denja, hem i slo blong obei long Jehova. Tu enjel i kam luk Lot, mo tufala i talem se hem mo famle blong hem oli mas aot long Sodom. Tufala i talem se: “Bambae mitufala i spolem taon ya.” (Jen. 19:12, 13) Long nekis dei, Lot mo famle blong hem oli stap yet long taon ya. Ale tufala enjel ya i givim woning long Lot bakegen. Be hem i “stap tektaem.” Maet yumi ting se Lot i ting nating long tok blong Jehova o i no wantem obei. Be Jehova i gohed nomo blong givhan long hem. “Hae God i gat sore long hem,” taswe tufala enjel ya i holem han blong Lot mo famle blong hem, mo pulum olgeta oli kam afsaed long taon.—Ridim Jenesis 19:15, 16.

14. ?Maet Jehova i sore long Lot from wanem?

¹⁴ ?From wanem Jehova i sore long Lot? I gat plante risen. Maet Lot i slo blong ronwe from we hem i fraet long ol man we oli stap afsaed long taon. I gat sam narafala denja tu. Ating Lot i harem stori finis long saed blong tu king we tufala i stap wokbaot long level ples klosap long taon, nao tufala i foldaon insaed long ol bigfala hol we oli fulap long kolta. (Jen. 14:8-12) I sua se Lot i wari long famle blong hem. Mo tu, Lot i wan rijman, taswe ating hem i gat wan gudfala haos long Sodom. (Jen. 13:5, 6) I tru se, ol samting ya oli no gudfala risen blong Lot i slo blong obei long Jehova. Be Jehova i no tingbaot mastik blong Lot. Long tingting blong hem, Lot i wan “stret man.”—2 Pita 2:7, 8.

15. ?I moa gud yu mekem wanem, i bitim we yu jajem narafala?

¹⁵ I moa gud yu traehad blong kasem save long filing blong narafala, i bitim we yu jajem hem. Wan sista long Yurop, Veronika, i traehad blong mekem olsem. Hem i talem se: “I gat wan sista we oltaem mi luk se hem i harem nogud. Hem i stap longwe long ol narafala. Samtaem, mi fraet blong toktok long hem. Be afta, mi tingting se: ‘Sipos mi mi olsem sista ya, bambae mi nidim wan gudfala fren.’ Ale mi go askem long hem sipos hem i oraet. !Nao  hem i talemaot evri samting we i stap long hat blong hem! Hemia i givhan long mi blong mi kasem save gud long hem.”

16. ?From wanem yumi mas prea blong kasem save long filing blong narafala?

¹⁶ I gat wan Man nomo we i kasem save fulwan long yumi, hemia Jehova. (Prov. 15:11) Taswe yumi mas askem long hem blong yumi save gat tingting olsem hem long ol narafala, mo blong yumi save olsem wanem blong soemaot sore long olgeta. Prea i givhan long wan sista we nem blong hem Anjela, blong i kasem save long filing blong narafala. I gat wan sista long kongregesen we i had blong joen gud wetem hem. Anjela i talem se: “Mi harem se mi no laekem fasin blong sista ya mo mi no wantem joen wetem hem. Be mi askem long Jehova blong i halpem mi blong mi kasem save long filing blong hem.” ?Olsem wanem? ?Jehova i ansarem prea blong Anjela? Anjela i talem se: “Mitufala i prij tugeta mo mitufala i storian blong plante aoa. Mi lesin gud long hem mo mi sore long hem. Naoia mi lavem hem tumas, mo mi wantem givhan long hem.”

17. ?Yumi mas gat strong tingting blong mekem wanem?

¹⁷ Yu no save jusum weswan brata o sista i stret blong soemaot sore long hem. Oli fesem ol trabol olsem Jona, Elaeja, Hega, mo Lot. Sam long olgeta oli pulum trabol i kam long olgeta bakegen. Be blong talem stret, samtaem yumi evriwan i mekem olsem. Taswe, taem Jehova i askem long yumi blong soemaot sore long ol narafala, hem i no mekem i strong tumas long yumi. (1 Pita 3:8) Mo taem yumi obei, yumi givhan blong mekem bigfala famle blong yumi long fulwol i joen gud. Taswe i gud yumi gat strong tingting blong lesin, kasem save, mo soemaot sore long ol brata mo sista.