1. Humbani Bibel, aha ma na iparlajari hita pasal Jahowa?

NAHA pangahapmu anggo dong halak na manguhumi ham dob mangidah warna kulitmu, bohimu, atap pe banggal ni angkulamu? Tontu lang marosuh ham. Somal do jolma manguhumi halak mangihutkon na taridah. Tapi anggo Jahowa lang sonai! Umpamani, sanggah isuruh Jahowa si Samuel mamilih sada humbani anak ni si Isai gabe raja Israel, mintor marosuh ma si Samuel dob mangidah si Eliab, anak na sikahanan. Nini ma, “Tontu on ma gakni siminakan i lobei ni Jahowa.” Ra, sonai ninuhurni dob mangidah rupani si Eliab. “Tapi nini Jahowa ma dompak si Samuel, ‘Ulang ma tonggor rupani barang togap ni badanni, ai seng ia sipilihon-Ku.’” Aha ma parlajaranni? Ihatahon Jahowa use, “Anggo jolma rupa do iidah, tapi anggo Jahowa uhur na ibagas ai do iidah.”​—1 Sam. 16:1, 6, 7.

2. Bani Johannes 7:24 ihatahon lang boi hita manguhumi pitah mangihutkon na taridah tumang. Mase sonai? Bere ma contohni.

² Halani lang sempurna, urah-urah do hita manguhumi halak mangihutkon na taridah dassa. (Basa Johannes 7:24.) Tapi sasintongni lang boi tangkas itanda hita sasahalak anggo pitah mangidah ia dassa. Contohni, hassi pe sahalak dokter marpangalaman janah pandei, tapi lang mintor ibotoh ia aha naborit ni pasienni anggo pitah mangidah tumang. Maningon ibogei ia do lobei pasienni laho mambotoh sonaha pangahapni, ija do maborit, atap na adong do naboritni na legan sadokah on. Anggo porlu, ra do isuruh ia pasienni ai i-rontgen laho mambotoh aha do sasintongni panahitni. Anggo lang ibahen ia sonai, ra do lepak holi ia manambari. Sonai ma homa hita hubani sanina botounta. Lang boi itanda hita sidea, anggo pitah mangidah tumang. Maningon marusaha do hita mambotoh aha na ibagas uhurni. Tongon, hita lang songon Jahowa na  boi mambotoh ibagas uhur. Hassi pe sonai boi do itiru hita Ia. Naha carani?

3. Sonaha contoh hun Bibel boi mangurupi hita maniru Jahowa?

³ Naha do ibahen Jahowa sanggah Ia marurusan pakon juakjuak-Ni? Itangihon Ia do sidea. Iarusi do situasi ampa na masa bani sidea hinan. Dob ai, ipatuduh do idop ni uhur hubani sidea. Sonari ulas hita ma sonaha Jahowa mambahen na sisonai hubani si Jona, si Elias, si Hagar, pakon si Lot. Iulas hita homa sonaha hita maniru Jahowa sanggah hita marurusan pakon sanina botounta.

4. Aha do ra na mambahen lepak hita manguhumi si Jona?

⁴ Halani lang mambotoh situasi ni si Jona na sasintongni, ra do iagan hita ia halak na lang setia. Domma iparentahkon Jahowa ase ia mambaritahon panguhuman hu Ninive. Hape lintun do ia “hun lobei ni Jahowa” janah markapal hu ianan na legan. (Jon. 1:1-3) Ai ra ope ham manggunahon si Jona? Ra do lang tene. Tapi anggo Jahowa, totap do igunahon Ia si Jona.​—Jon. 3:1, 2.

5. Aha ma na boi iparlajari hita humbani tonggo ni si Jona na isurat bani Jona 2:2, 3, 10?

⁵ Anggo ipardiateihon hita tonggo ni si Jona, lambin itanda hita ma halak na sonaha do ia. (Basa Jona 2:2, 3, 10.) Gati do ia martonggo. Sanggah ibagas boltok ni dengke pe, martonggo do ia. Humbani tonggoni ai, taridah ma anggo ia toruh maruhur, sahalak na partarima kasih, janah sihol unduk bani Jahowa. Tontu ai do na mambahen ase ra Jahowa mambalosi tonggoni janah totap manggunahon ia gabe nabi!

6. Aha do gunani anggo tongon-tongon hita manangihon halak?

⁶ Ase boi tongon-tongon manangihon halak, porlu do hita martoruh ni uhur janah sabar. Tongon lang urah ai. Tapi dong tolu gunani anggo ibahen hita sonai. Na parlobei, lang be urah-urah hita manguhumi halak. Na paduahon, gabe iarusi hita ma pangahap ampa pambahenanni. Gabe urah ma hita sapangahapan pakonsi. Anjaha na patoluhon, gabe boi ma iurupi hita ia laho mangarusi situasini na sasintongni. Sipata, dong do halak na lang mangarusi pangahap ni sandiri anggo lape marsarita ia hubani hasomanni. (Pod. 20:5) Sahalak sintua i Asia mangkatahon, “Ongga do hupodahi sada botou paima hutangar lobei saritani. Huhatahon ma bani ase dear ia mambere komentar i partumpuan. Hape dobni ai, hubotoh ma anggo ia lang  lancar mambasa janah domma marusaha ia ase boi markomentar.” Tangkas ma, porlu do sahalak sintua anget ‘mambogei’ paima mamodahi!​—Pod. 18:13.

7. Aha ma na boi iparlajari hita humbani cara ni Jahowa mangurupi si Elias?

⁷ Dong do sanina botou na lang urah patugahkon pangahapni hubanta halani domma sonai ia humbani na hinan. Atap halani sonai do hasomalan ni halak i iananni. Jadi, naha ma ibahen hita ase ra ia patugahkon na ibagas uhurni? Dingat ma aha na ibahen Jahowa sanggah lintun si Elias humbani si Isebel. Sanggah ai, lang mintor ipatugah si Elias hubani Jahowa sonaha pangahapni. Dob piga-piga ari pe, baru isaritahon ia naha na ibagas uhurni. Hassi pe sonai, tongon-tongon do Jahowa manangihonsi. Dob ai, ipatoguh Jahowa ma ia, janah ibere ma tugas na ponting hu bani. (1 Raj. 19:1-18) Ra do adong sanina botou na lang mintor ra patugahkon pangahapni. Songon Jahowa, maningon sabar ma hita. Anggo domma pos uhurni marsarita, tongon-tongon ma itangihon hita saritani.

8. Domu bani 1 Musa 16:7-13, sonaha Jahowa mangurupi si Hagar?

⁸ Ongga do si Hagar, jabolon ni si Sarai ai, mambahen na lepak dob gabe istri ni si Abram ia. Dob hamil ia, gabe pis ma matani mangidah si Sarai na lang dong anakni. Gabe lintun ma si Hagar halani iarsik-arsik si Sarai ia. (1 Mus. 16:4-6) Halani hita lang sempurna, ra do ninuhurta gijang do uhur ni si Hagar ai, janah sosok ma ibahen sonai hu bani. Tapi anggo Jahowa, lang sonai pangahap-Ni bani si Hagar. Isuruh Ia ma malekat manjumpahi si Hagar. Marhitei malekat ai, iurupi ma ase mubah si Hagar. Dob ai, ipasu-pasu ma ia. Gabe ibotoh si Hagar ma ipardiateihon Jahowa do ia janah ibotoh do situasini. Halani ai, nini ma bani Jahowa, “Ham do Naibata Sipanatap.”​—Basa 1 Musa 16:7-13.

9. Mase totap bujur Jahowa hubani si Hagar?

⁹ Aha do na ipardiateihon Jahowa humbani si Hagar? Ibotoh Jahowa do situasini ampa na dob masa hu bani. (Pod. 15:3) Halak Masir do ia, janah gabe jabolon i rumah ni halak Heber. Ai lungunan do sipata pangahapni? Ai siholan do ia hubani kaluarga ampa hutani? Leganni ai, lang pitah ia istrini si Abram. Ijia, somal do juakjuak ni Naibata mambuat bahat istri. Tapi sedo pangaturan humbani Jahowa ai. (Mat. 19:4-6) Ai do na mambahen bahat parsoalan. Dong ma na simburu ampa na marsogam ni uhur. Hassi pe ibotoh Jahowa lepak do pambahenan ni si Hagar hubani si Sarai, tapi iarusi Ia do naha pangahap ampa situasi ni si Hagar. Ai ma na mambahen Jahowa totap bujur hu bani.

10. Aha na porlu ibahen hita ase lambin mananda sanina botou?

¹⁰ Songon Jahowa, porlu do homa iarusi hita sanina botounta. Marusaha ma ase lambin mananda sidea. Marsaor ma hita pakon sidea i partumpuan, arahkon ma sidea marbarita, janah anggo boi ontang ma sidea mangan. Sanggah ibahen ham sonai, ra do adong sanina atap botou na sadokah on iahap ham lang basar hape sasintongni parmaila do ia. Atap ra do adong botou na iahap ham mata duitan halani bayak ia, hape lang sonai janah rosuh do ia manjalo tamu. Atap ra do adong ididah ham kaluarga na gati tarlambat hu partumpuan, hape halani bahat do tantanganni ase sonai ia. (Mat. 7:1) Tongon, lang boi hita “hertep” atap mangastui urusan ni halak. (1 Tim. 5:13) Hassi pe sonai, maningon marusaha do hita mananda sanina botounta janah mambotoh  sonaha situasini, ase boi iarusi hita sonaha pangahapni.

11. Mase maningon tangkas itanda sintua sanina botou?

¹¹ Ponting tumang do itanda sintua sanina botou i kuria. Pardiateihon ma pangalaman ni Sanina Artur na mangidangi gabe sintua kaliling. Ongga do ia pakon sintua na legan roh hu rumah ni sada botou na parmaila. Nini si Artur ma, “On pe ibotoh hanami lang piga dokah dob marhajabuan, matei ma suamini. Tapi, boi do iurupi ia haduasi boruni gabe sisombah Jahowa. Sonari, domma hurang tangkas pangidah ni botou ai, janah depresi homa ia. Hassi pe sonai, totap do ia mangkaholongi Jahowa janah lambin toguh do haporsayaonni. Bahat do na boi itiru hanami humbani botou ai.” (Pil. 2:3) Jadi, itiru sintua kaliling ai do Jahowa. Itanda Jahowa do juakjuak-Ni janah ibotoh do sitaronon ni sidea. (2 Mus. 3:7) Anggo tangkas itanda sintua sanina botou i kuria, lambin urah ma sidea mangurupi.

12. Aha ma gunani bani si Yip Yee halani marusaha mananda sada hasoman i kuria?

¹² Ra do adong sanina atap botou na ihasogamkon ham i kuria. Tapi anggo marusaha ham mananda ia, ra do gabe boi ham sapangahapan pakonsi. Pardiateihon ma pangalaman ni si Yip Yee, hasomanta naboru hun Asia. Ia mangkatahon, “Dong sada sanina na gogoh sorani anggo marsahap. Huahap lang dear sonai. Hape sanggah marbarita ahu pakonsi, gabe hubotoh ma gati do hinan ia mangurupi namatorasni marjual dengke i tiga. Jadi maningon gogoh ma ia marsora ase roh halak mamboli.” Nini use, “Hunjon gabe hubotoh ma ase boi iarusi hita sanina botounta maningon itanda hita do lobei ia.” Tongon, lang urah mananda sidea. Tapi, anggo ihaholongi hita sidea songon na ihatahon bani Bibel, dos do artini ai hita maniru Jahowa, Naibata na mangkaholongi “haganup jolma”.​—1 Tim. 2:3, 4; 2 Kor. 6:11-13.

13. Domu bani 1 Musa 19:15, 16, aha ma na ibahen malekat sanggah ipadokah-dokah si Lot kaluar hun Sodom, janah mase?

¹³ Sanggah ibere Jahowa tugah-tugah hubani si Lot, lang mintor podas ia mandalankon ai. Sanggah ai, dong dua malekat na manjumpahi si Lot janah marsuruh ase iboan ia kaluargani kaluar hun Sodom. Mase? Nini malekat ai, “Sihol ripaskononnami ma huta on.” (1 Mus. 19:12, 13) Hape sogodni, i rumah ope si Lot pakon kaluargani. Jadi, ipasingat malekat ai ma use si Lot. Tapi lalab do  “ipadokah-dokah” si Lot. Ra ninuhurta, halak na jugul do si Lot ai janah lang ra unduk bani Jahowa. Tapi lang sonai pangahap ni Jahowa. ‘Sihol paluahon-Ni’ do si Lot halani idop uhur-Ni mangidahsi. Mintor isintak malekat ai ma tanganni janah iboan ma sidea kaluar hun huta ai.​—Basa 1 Musa 19:15, 16.

14. Aha do ra na mambahen Jahowa maridop ni uhur hubani si Lot?

¹⁴ Ra do adong piga-piga alasan mase maridop ni uhur Jahowa hubani si Lot. Ra do lang ra si Lot manadingkon rumahni halani mabiar bani halak i luar huta ai. Dong homa bahaya na legan. Ra do ibotoh si Lot pasal dua raja na madabuh hubagas lombang na gok aspal dohorhon huta ni sidea. (1 Mus. 14:8-12) Dob ai, haru do homa uhurni mamingkiri istri pakon boruni. Anjaha bahat do homa artani, janah ra do jenges tumang rumahni i Sodom. (1 Mus. 13:5, 6) Tontu ganupan ai lang boi gabe sidalianni ase lang manangihon Jahowa. Hassi pe sonai, lang hasalahanni ai na idingat Jahowa. Tapi totap do idingat Jahowa ia sahalak “parpintor”.​—2 Ptr. 2:7, 8.

15. Aha ma na maningon bahenonta ase ulang urah-urah manguhumi halak?

¹⁵ Ulang ma urah-urah hita manguhumi halak. Tapi marusaha ma hita mangarusi pangahapni. Sonai ma na ibahen si Veronica, hasomanta hun Eropa. Ia mangkatahon, “Dong sada hasoman lalab mutung bohini janah papuligkon diri humbani na legan. Sipata, mabiar do ahu mamparsahapkonsi. Tapi ninuhurhu ma, ‘Porini ahu ia, tontu marosuh do ahu dong hasomanku.’ Jadi, huparsahapkon ma ia janah husungkun naha pangahapni. Hape, mintor ra ma ia marsarita hubangku! Sonari, domma lambin huarusi ia.”

16. Mase porlu hita martonggo ase iurupi mangarusi pangahap ni sanina botounta?

¹⁶ Pitah Jahowa do na tongon-tongon mangarusi uhurta. (Pod. 15:11) Jadi, martonggo ma ase iurupi hita mangidah sanina botou songon Jahowa mangidah sidea janah mambotoh sonaha carani patuduhkon idop ni uhur bani sidea. Sonai ma na iahapkon si Anzhela. Dob martonggo, gabe boi ma ia patuduhkon idop ni uhur. Dong sada hasoman i kuria na  hurang dear parlahouni. Nini si Anzhela ma, “Sihol hugilai do namin ia. Janah ninuhurhu ma lang pala marhasoman pakonsi. Tapi mintor martonggo ma ahu bani Jahowa ase iurupi ahu mangarusi sonaha pangahap ni sanina ai.” Ai ibalosi Jahowa do tonggoni ai? Nini si Anzhela use, “Rap marbarita ma hanami. Dobkonsi ai, dokah ma hanami marbuali. Tongon-tongon ma hutangar saritani. Sonari, domma lambin holong uhurhu hu bani janah marusaha do ahu mangurupisi.”

17. Aha do na sihol bahenonta?

¹⁷ Lang boi ipilih-pilih hita hubani ise hita patuduhkon idop ni uhur. Ra do adong hasomanta na sunsah songon si Jona, si Elias, si Hagar, pakon si Lot. Janah sipata ra do hasomanta ai sunsah halani hasalahanni sandiri. Sasintongni ganup hita ongga do sonai. Halani ai ma ase ipindo Jahowa hita patuduhkon uhur na sapangahapan bani sanina botou. (1 Ptr. 3:8) Anggo idalankon hita ai, lambin marsada ma hita hubani ganup hasoman i sab dunia on. Jadi, sanggah marurusan pakon sanina botou, marusaha ma hita manangar saritani, lambin mananda ia, janah patuduhkon idop ni uhur hu bani.