1. Arah Pustaka, kai si banci sipelajari kerna Jahwe? Janah ngkai maka e mpebelin pusuhta?

MERIAH nge ukurndu adi ihakimi kalak kam erkiteken warna kulitndu, ayondu, ntah pe erkiteken potongen dagingndu? Pasti lang. Meriah kel ukurta perban la ihakimi Jahwe kita arah kai si teridah. Mari sibahas sada contoh. Ikataken Jahwe man Samuel maka lit salah sada anak Isai si pagi jadi raja Israel. Tapi si apai? Sanga idah Samuel Eliap, anak Isai sintua, nina, “Si enda, si tedis i jenda i bas adep-adepen [Jahwe], la banci lang enda me si nggo ipilihNa.” Arah penampilenna, cocok kel Eliap e jadi raja. Tapi, la inen Samuel kai si inen Jahwe. Nina Jahwe man Samuel, “Ola nehen kuga gedangna ras kuga jilena rupana. La ia Kupilih.” Kai pelajarenna? Nina Jahwe, “Adi manusia inehenna si teridah arah darat, tapi Aku Kupernehen pusuhna.”​—1 Sam. 16:1, 6, 7.

2. Menurut Johanes 7:24, ngkai maka la banci sihakimi kalak si deban arah kai si teridah? Ban contohna.

² Perban kita la sempurna, rusur sihakimi kalak arah kai si teridah. (Baca Johanes 7:24.) Tapi, situhuna la melala si banci siteh kerna sekalak jelma adi sinen arah kai si teridah saja. Contohna, sekalak dokter si seh kel beluhna ras si nggo erpengalamen pe, la banci jelas kel itehna uga keadan pasien adi inenna saja pasien e. Arus tuhu-tuhu ibegiken dokter e pasienna gelah banci itehna uga keadan kesehaten pasienna e sedekah enda, uga perasanna, ras gejala kai saja si nggo igejapkenna. Janah, banci saja isuruhna pasien e i-ronsen gelah banci itehna uga kin situhuna pinakit pasien e. Alu bage, banci ibereken dokter e tambar si cocok. Bage ka pe, la banci tuhu-tuhu siteh kerna turang seninata arah kai si teridah  saja. Arus siusahaken ngangkai kalak si uga kin ia situhuna. Memang la banci siteh isi pusuh kalak, emaka la mungkin banci siangkai kalak si deban bali bagi Jahwe. Tapi banci siusahaken asa ngasupta ngusih Jahwe. Uga carana?

3. Arah kisah-kisah Pustaka si ibahas bas artikel enda, kai si banci siusih arah Jahwe?

³ Kai nge si ilakoken Jahwe man umatNa? IbegikenNa kalak e. IpertimbangkenNa uga latar belakang ras keadan kalak e. Janah mekuah ateNa man kalak e. Sibahas kari uga Jahwe ngelakokenca sanga erurusen Ia ras Juna, Elia, Hagar, ras Lut. Sibahas ka uga kita banci ngusih Jahwe sanga erurusen ras turang seninata.

4. Engkai maka banci saja la mehuli siakap Juna e?

⁴ Perban la siteh uga situhuna keadan Juna, banci saja siakap Juna e la terteki janah la setia. Iperentahken Jahwe ia mberitaken berita penghakimen man Niniwe. Tapi, la ilakoken Juna. Kiam ia janah lawes naik kapal ku arah si deban. (Jun. 1:1-3) Nggit nge kam mereken kesempaten si peduaken man Juna? Banci saja lang. Tapi, Jahwe la bage.​—Jun. 3:1, 2.

5. Kai si ipelajarindu kerna Juna arah kata-katana si lit bas Juna 2:1, 2, 9?

⁵ Banci siteh kalak si uga kin Juna e arah pertotonna. (Baca Juna 2:1, 2, 9.) Pasti rusur kel Juna ertoto man Jahwe. Arah salah sada toto Juna si ipesehna bas beltek ikan nari, banci siteh sipat-sipat Juna si mehuli. Amin gia kiam Juna bas tugasna nari, arah totona siteh maka ia meteruk ukur, nggit ngata bujur, janah iusahakenna kel patuh man Jahwe. E me sebapna labo kesalahen Juna saja si inen Jahwe. Ijawap Jahwe toto Juna janah terus igunakenNa ia jadi nabi!

6. Engkai maka arus lit usahata gelah banci tutus ateta megiken kalak si deban?

⁶ Gelah banci tutus ateta megiken kalak si deban, arus kita meteruk ukur ras sabar. Memang arus lit usahata ngelakokenca. Tapi, lit telu gunana banta. Si pertama, la mis siban kesimpulen si salah kerna kalak si deban. Si peduaken, banci lebih siangkai uga perasan turang seninata bage pe kai si ilakokenna ras kai alasenna ngelakokenca. Janah e banci erban mekuah ateta ia. Ras si peteluken, banci ka sisampati turang seninata e gelah banci iangkaina uga kin situhuna perasanna. Mon-mon, kenca iceritaken kalak  uga perasanna, i je me maka itehna uga kin situhuna perasanna e. (Kua. 20:5) Nina sekalak pertua i Asia, “Kuinget pernah aku salah ngerana sope kuteh uga kin keadan situhuna. Kukataken man sekalak turang senina gelah reh ulina min komentarna bas perpulungen. Tapi bas pudi wari, kuteh maka kepeken kurang beluhna ia mbaca. Janah arus iusahakenna kel gelah banci mere komentar.” Jelas me, kerina pertua arus ‘ndengkehken lebe’ ope denga mereken nasehat.​—Kua. 18:13.

7. Kai si banci ipelajarindu arah cara Jahwe nampati Elia?

⁷ Banci saja mesera iakap piga-piga turang seninata nceritaken kerna perasanna perban latar belakangna, budayana, ntah pe sipat-sipatna. Kai si banci silakoken gelah reh nukahna iakap kalak e nceritaken isi pusuhna? Ingetlah cara Jahwe nampati Elia. Sanga kiam ia arah Ratu Isebel, la ia mis ertoto man Jahwe. Piga-piga wari kenca si e me maka iceritaken Elia perasanna man Bapakna si i surga. Tutus kel ate Jahwe megiken ia. Kenca si e, ipegegehiNa Elia janah ibereNa tugas si penting. (1 Raj. 19:1-18) Banci saja la mis turang seninata cerita man banta, perlu ia waktu ngasa nggo pas kapna waktuna cerita. Emaka adi siteh ateta uga kin situhuna isi pusuh kalak e, perlu kita sabar bagi Jahwe. Alu bage, dungna banci kalak e tek banta. Janah sanga cerita kalak e banta, tutuslah ateta megikenca.

8. Menurut Kejadin 16:7-13, uga Jahwe nampati Hagar?

⁸ Hagar eme budak Sarai. Kenca Hagar jadi ndehara Abram janah hamil ia, la mehuli perbahanenna man Sarai janah lanai iergaina ia sebap la lit anakna. Perban lanai mehuli hubungen kalak e, kiam dungna Hagar. (Kej. 16:4-6) Erkiteken la sempurna carata rukur, banci saja siakap Hagar e sekalak diberu si sombong janah arus iukum. Tapi Jahwe la bage perukurenna kerna Hagar. Isuruh Jahwe malekatNa njumpai Hagar. Isampati malekat e Hagar mperobahi perbahanenna, kenca si e ipasu-pasuna ia. Igejapken Hagar me maka iperdiateken Jahwe ia janah tuhu-tuhu iangkai Jahwe uga keadanna. Kena kel ku pusuh Hagar perbahanen Jahwe e, emaka nina, “Dibata si mperdiateken aku.”​—Baca Kejadin 16:7-13.

9. Sanga erurusen ras Hagar, kai saja nge si iperdiateken Jahwe?

⁹ Kai nge si inen Jahwe bas Hagar nari? Iteh Jahwe uga latar belakang Hagar bage pe kerina si pernah terjadi man bana. (Kua. 15:3) Hagar e kalak Mesir si tading ras keluarga kalak Heber. Banci saja e erbanca sisada kapna bana. Ntah pe banci saja tedeh atena keluargana ras kuta kemulihenna. Selain si e, labo ia ngenca ndehara Abram. Paksa si e, piga-piga dilaki si nembah Jahwe la sada ngenca ndeharana. Tapi e labo pengaturen kerna perjabun si tangtangna iban Dibata. (Mat. 19:4-6) Emaka labo ateta mamang adi lit melala masalah bas keluarga, misalna lit perasan cemburu ras segat ate. Memang, tetap nge salah iakap Jahwe perbahanen Hagar si la ngergai Sarai. Tapi perban iangkai Jahwe uga perasan ras keadan Hagar, mehuli perbahanenNa man Hagar.

10. Uga carana gelah banci lebih sitandai turang seninata?

¹⁰ Banci siusih Jahwe adi siusahaken ngangkai turang seninata. Siusahakenlah nandai kalak e terdeheren. Ercakap-cakaplah ras kalak e sope ras kenca dung perpulungen, siajak ia erberita, janah adi banci, siundang ka kalak e man. Adi bage banndu, banci saja  iangkaindu kai si la pernah itehndu kerna kalak e. Misalna, lit sekalak turang seninata si kurang mbacarna, kepeken ia permela. Lit ka sekalak turang seninata si melala senna, tapi kepeken la ia merangap nandangi sen janah nggit ia mere. Ntah, lit sekalak pernanden ras anak-anakna si rusur terlambat reh ku perpulungen, kepeken lit tentangen si iadapina. (Jop 6:29) Tentu saja, la banci ‘sicampuri urusen kalak.’ (1 Tim. 5:13) Tapi, perlu siusahaken nandai turang seninata ras siusahaken meteh kai si iadapina. Alu bage, banci lebih siangkai kalak e.

11. Engkai maka arus tuhu-tuhu iteh pertua keadan turang seninana?

¹¹ Pertua-pertua khususna perlu itehna uga latar belakang turang seninana bas runggun. Perdiateken pengalamen turang seninata si gelarna Artur si ngelayani jadi pertua keliling. Ia ras sekalak pertua si deban ndahi sekalak turang seninata si diberu si permela janah la nggit ergaul. Nina Artur, “Mbaru denga iteh kami kepeken perbulangenna nggo mate piga-piga tahun kenca kalak e erjabu. Lit dua anakna diberu. Amin gia mberat kel iakapna, banci ipebelinna anakna e jadi umat Jahwe si setia. Tapi gundari, nggo lanai terang pengidahna, janah stres ka ia. Amin gia bage, tetap paguh kinitekenna bage pe kekelengenna man Jahwe. Melala kepeken si banci ipelajari kami arah turang seninata e.” (Pil. 2:3) Iusih pertua keliling e Jahwe. Itandai Jahwe kerina biri-biriNa eme umatNa si setia, janah itehNa kai saja masalah kalak e. (Kel. 3:7) Adi tuhu-tuhu itandai pertua biri-biri eme turang seninana bas runggun, banci reh nukahna iakap kalak e mereken penampat.

12. Perban iusahaken sekalak turang seninata nandai sekalak turang senina bas runggunna, kai gunana man bana?

¹² Banci saja lit si ilakoken turang seninata si kurang siakap cocokna. Tapi, adi usahakenndu ngangkai uga latar belakangna, banci saja mekuah atendu ia. Perdiateken pengalamen sekalak turang seninata i Asia. Nina, “Bas runggun kami, lit sekalak turang senina si megang kel sorana. Bagi si kurang sopan kuakap ia. Tapi kenca ras kami erberita, kuteh maka kepeken mbarenda rusur ia ras orang tuana ndayaken ikan bas pajak. Arus megang kel sorana gelah reh kalak si nukur.” Nina ka, “Erlajar aku maka perlu kuteh uga latar belakang turang senina gelah banci kuangkai kalak e.” Memang, perlu lit usahata gelah banci sitandai turang seninata. Tapi,  adi sidalanken pedah Pustaka guna mpebelin kekelengenta, banci siusih Jahwe si keleng ateNa “erbage-bage kalak.”​—1 Tim. 2:3, 4; 2 Kor. 6:11-13.

13. Menurut Kejadin 19:15, 16, kai nge si ilakoken malekat-malekat sanga la tetap ukur Lut? Janah ngkai?

¹³ Tertaren-taren kel Lut ndalanken perentah Jahwe bas waktu si seh kel pentingna. Paksa si e, reh dua malekat njumpai Lut janah isuruhna gelah ibaba Lut keluargana ndarat arah Sodom. Engkai? Nina malekat e, “Ikernepken kami ate kami kuta enda.” (Kej. 19:12, 13) Paginna, lenga itadingken Lut ras keluargana rumah kalak e. Emaka ipersingeti malekat e Lut mulihi. Tapi, “langa tetap ukur Lut.” Banci saja siakap Lut e la diatena persinget bas Jahwe nari ntah pe la ia patuh. Tapi, tetap iusahaken Jahwe nampati ia. Perban “mekuah ate [Jahwe] man Lut,” itagangi malekat-malekat e tan Lut ras keluargana jenari ibabana kalak e ndarat arah kuta e.​—Baca Kejadin 19:15, 16.

14. Engkai maka mekuah ate Jahwe man Lut?

¹⁴ Banci saja, lit piga-piga alasen ngkai maka mekuah ate Jahwe man Lut. Banci saja mbiar Lut man penduduk si lit i sekitar kuta Sodom, emaka la mis itadingkenna rumahna. Lit ka piga-piga bahaya si deban. Bas lembah i deher Sodom, melala lubang si isina ter, ntah pe aspal. Banci saja iteh Lut kerna dua raja si ndabuh ku lubang-lubang e. (Kej. 14:8-12) Perban Lut e sekalak perbulangen ras perbapan, pasti kuatir kel ia man keluargana. Selain si e, melala kel erta Lut, emaka banci saja mejile kel rumahna si lit i Sodom. (Kej. 13:5, 6) Memang, si e kerina la banci jadi alasen man Lut la mis ndalanken perentah Jahwe. Tapi, labo kesalahen Lut saja si inen Jahwe. IanggapNa Lut e “kalak si benar.”​—2 Pet. 2:7, 8.

15. Asangken sihakimi kalak si deban, kai si arusna silakoken?

¹⁵ Asangken mis sihakimi perbahanen kalak si deban, siusahakenlah ngangkai uga perasanna. E me si ilakoken sekalak turang seninata i Eropa si gelarna Veronica. Nina, “Lit sekalak turang seninata si diberu si lalap berjut  ayona. La ia nggit ergaul ras ise pe. Mon-mon mbiar pe aku mperkuankenca. Tapi kuukuri, ‘Adi aku si arah ia e, pasti perlu kel aku teman.’ Emaka dungna kusungkuni uga beritana. Kepeken nggit ia cerita man bangku! Gundari nggo lebih kuangkai ia.”

16. Engkai maka perlu kita ertoto gelah banci mekuah ateta kalak si deban?

¹⁶ Dibata Jahwe ngenca si banci tuhu-tuhu ngangkai kita. (Kua. 15:11) Emaka, pindolah penampatNa gelah seri perukurenndu ras Ia nandangi turang senina. Janah, pindolah penampatNa gelah itehndu uga carana ncidahken perkuah ate man kalak e. Lit sekalak turang seninata si gelarna Anzhela. Banci mekuah atena kalak si deban perban ia ertoto. Bas runggunna, lit sekalak turang senina si kurang mehuli perbahanenna. Nina Anzhela, “La cocok kuakap perbahanenna e janah kupandangi kel ateku ia. La ateku ndeher ras ia. Tapi, ertoto aku man Jahwe gelah isampatiNa aku ngangkai seninaku e.” Ijawap Jahwe nge toto Anzhela? Nina, “Ras kami erberita, kenca si e ndekah kel kami ngerana-ngerana. Tutus kel ateku megiken ia. Gundari, reh kelengna ateku ia janah kuusahaken kel nampatisa.”

17. Kai si arus terus siusahaken?

¹⁷ La banci ipilihindu man turang senina si apai atendu ncidahken perkuah ate. Kerina kalak e ngadapi masalah bali bagi Juna, Elia, Hagar, ras Lut. Tapi piga-piga arah kalak e ngadapi masalah perban kesalahenna sendiri. Situhuna, kita pe kerina pernah ngadapi masalah perban kesalahenta. E me sebapna, isuruh Jahwe kita gelah sepenggejapen ras kalak si deban. (1 Pet. 3:8) Adi patuh kita man Jahwe, reh paguhna me hubungenta ras turang seninata i sebelang doni, si rehna arah erbage-bage latar belakang. Emaka sanga kita erurusen ras turang seninata, mbera terus siusahaken megiken kalak e, nandai kalak e terdeheren, janah mekuah ateta man kalak e.