1. Ki nou aprann lo Zeova dan Labib ki vreman rekonfortan?

ESKI ou ti pou kontan si dimoun ti ziz ou dapre ou kouler lapo, ou figir oubyen ou groser? I tre probab ki non. I vreman rekonfortan pour konnen ki Zeova pa ziz nou dapre sa ki lezot i vwar. Par egzanp, ler Samyel ti get bann garson Zese, i pa ti vwar sa ki Zeova ti vwar. Zeova ti’n dir Samyel ki enn parmi bann garson Zese ti pou vin lerwa Izrael. Me lekel sa enn? Ler Samyel ti vwar Eliyab, ki ti pli gran garson Zese, i ti dir ki Eliyab ti sirman sa enn ki Zeova in swazir. Eliyab ti resanble en lerwa. “Me [Zeova] ti dir Samyel, ‘Pa get son laparans ni son grander, akoz mon’n rezet li.’” Ki sa i montre? Zeova ti osi dir: “Zonm i get laparans eksteryer, me [Zeova] i get dan leker.”​—1 Sam. 16:1, 6, 7.

2. Dapre Zan 7:24, akoz nou pa devret ziz en dimoun dapre son laparans? Donn legzanp.

² Konman imen enparfe, nou tou nou annan sa tandans pour ziz lezot dapre zot laparans. (Lir Zan 7:24.) Me si ou zis get en dimoun avek ou lizye, ou pa pou aprann bokou lo li. Par egzanp, menm en dokter eksperyanse pa pou konnen ki en pasyan i gannyen si zis i get sa pasyan. I bezwen ekout atantivman sa pasyan si i oule konnen ki problenm lasante i’n annan dan lepase, ki mannyer i santi konsernan son sityasyon oubyen ki sentonm i pe gannyen. Sa dokter i menm kapab anvoy sa pasyan fer en x-ray pour vwar dan lekor sa pasyan. Si non, sa dokter i kapab donn sa pasyan en tretman ki pa ale avek son problenm lasante. Pareyman, nou pa kapab byen konpran  nou bann frer ek ser zis par get zot laparans. Nou bezwen esey konpran ki kalite dimoun zot vreman ete. Byensir, nou pa kapab lir dan leker en dimoun, alor nou pa pou zanmen kapab konpran lezot parey Zeova. Me nou kapab fer nou mye pour swiv legzanp Zeova. Ki mannyer?

3. Ki mannyer bann resi Labib dan sa lartik pou ed nou swiv legzanp Zeova?

³ Ki mannyer Zeova i tret son bann serviter? I ekout zot. I konpran zot sityasyon ek tou bann keksoz ki’n enfliyans zot. I demontre konpasyon anver zot. Anmezir ki nou diskit lo ki mannyer Zeova ti tret Zonas, Eliya, Agar ek Lot, annou vwar ki mannyer nou kapab swiv legzanp Zeova dan lafason ki nou tret nou bann frer ek ser.

4. Akoz nou kapab annan en move lopinyon lo Zonas?

⁴ Vi ki nou pa konn tou keksoz lo sityasyon Zonas, nou kapab krwar ki i pa ti serye oubyen menm ki i ti enfidel. Zeova ti donn li lord pour anons en mesaz zizman dan lavil Niniv. Me olye obei, Zonas ti pran en bato ki ti pe al dan en lot direksyon, “lwen devan prezans [Zeova].” (Zonas 1:1-3) Eski ou ti pou’n donn Zonas en dezyenm sans pour obei lord Zeova? I tre probab ki non. Me, Zeova ti vwar ki Zonas ti merit en lot sans.​—Zonas 3:1, 2.

5. Dapre Zonas 2:1, 2, 9, ki nou aprann lo Zonas?

⁵ Zonas ti montre ki kalite dimoun i ti vreman ete dan son lapriyer. (Lir Zonas 2:1, 2, 9.) San dout Zonas ti abitye priy Zeova. Ler i ti dan vant en pwason, i ti fer en lapriyer ki ed nou konpran ki i pa ti zis anvi sove pour pa fer sa ki i ti’n ganny demande pour fer. Son bann parol i montre ki i ti annan limilite, i ti rekonesan e i ti determinen pour obei Zeova. Alor, nou pa sirprann si Zeova pa ti konsantre lo fot ki Zonas ti’n fer. O kontrer, i ti ekout son lapriyer e kontinyen servi li konman profet.

6. Akoz i vo lapenn pour nou ekout byen?

⁶ Pour ekout byen lezot, nou bezwen annan limilite ek pasyans. I vo lapenn pour ekout byen lezot pour omwen trwa rezon. Premyerman, i pou pli difisil pour annan bann move lopinyon lo lezot dimoun. Dezyenmman, nou kapab  konpran santiman nou frer oubyen nou ser, akoz i fer serten keksoz e sa pou ed nou demontre plis konpasyon anver li. Trwazyenmman, ler nou les nou frer oubyen nou ser koze, i kapab aprann en keksoz lo son lekor. Parfwa, nou pa vreman konpran nou prop santiman ziska ler nou koz lo la. (Prov. 20:5) En ansyen ki reste Lazi i admet: “Mon rapel en fwa mon ti koze avan ekout tou lenformasyon. Mon ti dir en ser ki i ti bezwen amelyor son bann komanter ki i ti fer dan renyon. Pli tar, mon ti aprann ki i ti annan difikilte pour lir e ki i ti fer bokou zefor pour li donn son bann komanter.” I vreman enportan pour en ansyen “ekoute” avan i donn konsey!​—Prov. 18:13.

7. Ki ou aprann avek lafason ki Zeova ti tret Eliya?

⁷ Serten nou bann frer oubyen ser i vwar li difisil pour koz lo zot santiman, akoz bann keksoz ki’n ariv zot dan lepase oubyen akoz zot personnalite. Ki mannyer nou kapab fer li pli fasil pour zot koz lo zot santiman avek nou? Mazinen ki mannyer Zeova ti tret Eliya ler i ti sove akoz Zezabel. I ti pran li plizyer zour avan ki i ti dir son papa ki dan lesyel ki mannyer i ti pe santi. Zeova ti ekout li byen. Apre sa, i ti ankouraz Eliya e donn li en travay enportan pour fer. (1 Rwa. 19:1-18) I kapab pran letan pour nou bann frer ek ser santi zot konfortab pour koz avek nou, me nou pou kapab konpran zot vre santiman apre ki zot in koz avek nou. Si nou annan pasyans parey Zeova, zot pou pli pare pour dir nou ki mannyer zot santi. Apre sa, ler zot in pare pour partaz zot santiman avek nou, nou devret ekout zot byen.

8. Dapre Zenez 16:7-13, ki mannyer Zeova ti ed Agar?

⁸ Agar, ki ti servant Sarai, ti azir dan en fason bet apre ki i ti’n vin madanm Abram. Agar ti tonm ansent e i ti konmans mank respe pour Sarai, ki ti napa okenn zanfan. Sa sityasyon ti vin sitan move ki Agar ti bezwen sove akoz lafason ki Sarai ti tret li. (Zen. 16:4-6) Vi ki nou enparfe, nou kapab krwar ki Agar ti en move madanm ki ti merite ganny pini. Me Zeova pa ti santi koumsa anver Agar. I ti anvoy son lanz kot li. Ler sa lanz ti vwar li, i ti ed li sanz son latitid e beni li. Agar ti realize ki Zeova ti pe get li e ki i ti konn byen son sityasyon. I ti sitan ganny touse ki i ti apel li “sa Bondye ki war mwan.”​—Lir Zenez 16:7-13.

9. Kwa ki Zeova ti pran kont dan lafason ki i ti tret Agar?

⁹ Ki Zeova ti remarke dan Agar? I ti konn tou sa ki ti’n arive avek Agar dan lepase. (Prov. 15:3) Agar ti en Ezipsyen ki ti pe reste dan lakour bann Ebre. Eski parfwa i ti santi ki zot pa ti kontan li? Eski i ti mank son fanmir ek son pei? Pa zis li ki ti madanm Abram. Sa letan, bann zonm fidel ti kapab annan plis ki en madanm. Me sa pa ti dan plan Zeova o konmansman. (Mat. 19:4-6) I pa ti drol ki sa sityasyon ti souvan anmenn bann problenm serye tel ki zalouzi ek laenn dan fanmir. Zeova ti konnen ki i ti mal pour Agar mank respe pour Sarai. Me i ti osi konpran santiman Agar ek son sirkonstans alor I ti tret li avek ladouser.

10. Ki mannyer nou kapab aprann konn nou bann frer ek ser pli byen?

¹⁰ Nou kapab swiv legzanp Zeova, ler nou esey konpran nou bann frer ek ser.  Aprann konn ou bann frer ek ser pli byen. Koz avek zot avan e apre bann renyon, travay avek zot dan predikasyon e si posib, envit zot pour en repa. Ler ou fer sa, ou kapab aprann ki en ser ki paret pa amikal, i timid. Osi, en frer ki ou ti krwar i kontan keksoz materyel, i vreman zenere oubyen en fanmir ki souvan ariv an retar pour renyon, pe fer fas avek lopozisyon. (Zob 6:29, NWT) Byensir, nou pa devret “mel dan zafer dimoun.” (1 Tim. 5:13) Toudmenm, i byen pour konn en keksoz lo nou bann frer ek ser ek bann leksperyans ki zot in pas atraver. Sa i kapab ed nou pour konpran zot pli byen.

11. Akoz i enportan ki bann ansyen i konn zot bann mouton byen?

¹¹ Bann ansyen sirtou, zot bezwen vreman konn bann frer ek ser ki zot pe pran swen avek. Annou vwar legzanp en frer ki apel Arthur ki ti pe servi konman en sirveyan rezyonal. Li avek en lot ansyen ti vizit en ser ki ti paret timid e trankil. Arthur i dir: “Nou ti aprann ki son msye ti mor en pti pe letan apre ki zot ti’n marye. Menm si son lavi ti vreman difisil, i ti montre son de fiy pour kontan Zeova e zot in vin de serviter fidel Zeova. Me aprezan i konmans pa vwar kler e i soufer avek depresyon. Kantmenm sa, son lanmour pour Zeova ek son lafwa dan li i reste for. Nou ti realize ki nou ti annan en kantite pour aprann avek bon legzanp nou ser.” (Fili. 2:3) Sa sirveyan ti pe swiv legzanp Zeova. Zeova i konn son bann mouton ek zot bann soufrans. (Egz. 3:7) Alor, bann ansyen ki konn zot bann mouton byen i dan en pli bon pozisyon pour ed zot.

12. Ki byenfe en ser ki apel Yip Yee ti gannyen ler i ti konn byen en ser dan son kongregasyon?

¹² Ler ou’n konn byen ou frer oubyen ser, sa pou fer ou konpran son santiman olye ankoler avek li. Annou vwar en legzanp. Yip Yee, ki reste Lazi, i dir: “En ser dan mon kongregasyon ti koz vreman for. Mon pa ti kontan son fason koze. Me ler mon ti travay avek li dan predikasyon mon ti aprann ki i ti abitye vann pwason dan bazar avek son paran. I ti bezwen koz for pour fer dimoun vin aste pwason.” Yip Yee i osi dir: “Mon’n aprann ki pour mwan konpran mon frer ek ser, mon ti bezwen konn zot byen.” I demann zefor pour ou konn ou bann frer ek ser byen. Toudmenm, ler ou  swiv konsey Labib pour ouver gran ou leker, ou swiv legzanp Zeova ki kontan “tou sort kalite dimoun.”​—1 Tim. 2:3, 4; 2 Kor. 6:11-13.

13. Dapre Zenez 19:15, 16, ki bann lanz ti fer ler Lot ti ezite e akoz?

¹³ I ti annan en moman enportan dan lavi Lot kot i ti ezite pour obei lenstriksyon Zeova. De lanz ti vizit Lot e ti dir li sorti dan lavil Sodonm avek son fanmir. Akoz? Zot ti dir: “Nou pour detri sa lavil.” (Zen. 19:12, 13) Son lannmen bomaten, Lot ek son fanmir ti ankor dan zot lakaz. Alor sa bann lanz ti averti Lot ankor. Me “Lot ti ezite.” Nou kapab krwar ki Lot pa ti enterese avek sa ki Zeova ti dir li fer oubyen ki i ti menm dezobeisan. Me Zeova pa ti abandonn li. Vi ki “[Zeova] ti pran pitye pour li,” sa bann lanz ti atrap sa fanmir par zot lebra e anmenn zot an deor sa lavil.​—Lir Zenez 19:15, 16.

14. Petet akoz Zeova ti annan konpasyon pour lot?

¹⁴ Zeova ti annan konpasyon pour Lot pour plizyer rezon. Petet Lot ti per pour kit son lakaz deswit akoz i ti per sa bann dimoun an deor sa lavil. I ti annan lezot danze osi. I tre probab ki Lot ti konnen ki ti’n arive avek sa de lerwa ki ti’n tonm dan bann pwi koltar dan en vale ki pa ti lwen. (Zen. 14:8-12) Konman en msye e en papa, Lot ti bezwen enkyet pour son fanmir. An plis ki sa, Lot ti ris, alor i ti bezwen annan en zoli lakaz dan lavil Sodonm. (Zen. 13:5, 6) Byensir, ni enn sa bann keksoz pa ti en bon rezon pour Lot pa obei Zeova deswit. Par kont, Zeova pa ti konsantre lo fot Lot me i ti konsider li konman en “zonm drwat.”​—2 Pyer 2:7, 8.

15. Dan plas ziz en dimoun, ki nou devret fer?

¹⁵ Dan plas ziz en lot dimoun, fer ou mye pour konpran ki mannyer i santi. En ser Lerop ki apel Veronica, ti esey fer sa. I dir: “En ser ti toultan paret dan en  move limer. I ti kontinyen reste lwen avek lezot. Parfwa mon ti per pour koz avek li. Me mon ti mazinen, ‘Si mon ti dan son sityasyon, mon ti pou bezwen annan en zanmi.’ Mon ti deside pour demann li ki mannyer i ti pe santi. Alor, i ti konmans koz lo son santiman avek mwan! Aprezan, mon konn li pli byen.”

16. Akoz nou devret priye pour devlop plis konpasyon?

¹⁶ Zeova i sa sel personnaz ki konpran nou byen. (Prov. 15:11) Alor, demann li pour ed ou vwar lezot parey li i vwar zot e pour ed ou konpran ki mannyer pour demontre konpasyon anver zot. Lapriyer ti ed en ser ki apel Anzhela pour annan plis konpasyon. I ti annan en ser dan son kongregasyon ki pa ti fer li fasil pour lezot koz avek li. Anzhela i dir: “I ti pou fasil pour kritik sa ser e pa fatig mwan avek li. Me mon ti demann Zeova pour ed mwan pour konpran sa ser.” Eski Zeova ti reponn lapriyer Anzhela? I dir: “Nou ti al predikasyon ansanm e apre sa nou ti koze pour plizyer erdtan. Mon ti ekout li avek konpasyon. Aprezan, mon annan plis lanmour pour li e mon determinen pour ed li.”

17. Ki nou devret determinen pour fer?

¹⁷ Ou pa kapab swazir lekel frer oubyen ser ki merit ou konpasyon. Zot tou zot fer fas avek problenm parey Zonas, Eliya, Agar ek Lot. Dan serten ka, zot ki’n anmenn problenm lo zot lekor e i annan defwa ki nou osi nou’n fer parey. I rezonnab alor, ki Zeova i demann nou pour konpran santiman kanmarad. (1 Pyer 3:8) Ler nou obei Zeova, nou ranforsi sa linite ki i annan dan nou gran fanmir enternasyonal. Alor, annou determinen pour ekoute, aprann e demontre konpasyon anver nou bann frer ek ser.