1. Ni on biten Labib ka di-nou asi Jéova é ki ka rékonfòwté-nou. Ki biten ésa ?

ÈS OU té’é pran on moun jijé-w parapòt a sa i ka vwè lè i ka gadé-w ? Pa ègzanp, parapòt a koulè a po a-w, parapòt a figi a-w oben parapòt a gwosè a-w. An pa’a kwè ! Ében, li Jéova, i pa’a jijé-nou dapré sa lézòm ka vwè. A pa ti kontan nou kontan dè sa ! Pa ègzanp, lè Samiyèl gadé sé gason a Jésé la, i pa vwè sa Jéova té ka vwè. Jéova té di Samiyèl kè ni yonn adan sé gason a Jésé la ki té’é vin wa a Izrayèl. Men kilès la ? Lè Samiyèl vwè Élyab, pi gran gason a Jésé, mi sa i di : « An sèten sé-y Jéova chwazi. » Élyab té ka sanm on wa. Men mi sa Jéova di Samiyèl : « Pa arété-w asi sa ou ka vwè lè ou ka gadé-y ni asi hotè a-y, pas a pa-y an chwazi. » Ka sa ka aprann-nou ? Mi sa Jéova ka di : « On nonm ka vwè sa zyé a-y ka ba-y, men, li Jéova ka vwè sa ki ni an tchè-la » (1 Sam. 16:1, 6, 7).

2. Dapré sa Jan 7:24 ka di, poukwa fò pa nou jijé on moun dapré sa zyé an nou ka vwè ? Bay on ègzanp.

² Konm nou enpawfè, byensouvan, nou ka jijé lézòt dapré sa zyé an nou ka vwè (li Jan 7:24). Men a pa sa zyé an nou ka vwè ki ka pèwmèt-nou konnèt on moun byen. An-nou pran on ègzanp : Menmsi on mèdsen ni onpakèt diplòm é kè sa ka fè lanné é lanné i dòktè, si sé yenki gadé i gadé malad-la, a pa granzafè i ké pé fè ba-y. Fò i pran tan kouté-y pou i sav ki maladi i té ni avan é kijan i ka viv sitiyasyon a-y. Fò i kouté-y osi pou i ni sèwten enfòwmasyon ki ké édé-y sav dè ki biten moun-la ka soufè. Pétèt kè i ké jous voyé-y fè on radyo pou i sav sa ki ka pasé andidan kò a-y. Si i pa fè sa, i pé di kè moun-la ka soufè dè on biten alòskè a pa sa. Menmjan-la, nou pé’é jen rivé konprann frè é sè an nou vréman si nou ka arété-nou yenki si sa nou  ka vwè. Fò-nou ay pli lwen ki sa, pou nou vwè kijan dè moun yo yé vréman. Sé vré kè nou pé’é jen pé konprann lézòt menmjan ki Jéova pas nou pé pa li an tchè a yo. Men nou pé fè tousa nou pé pou imité-y. Kijansa ?

3. Adan awtik-lasa nou ké ègzaminé déotwa istwa ki an Bib-la. Kijan yo ké édé-nou imité Jéova ?

³ Kijan Jéova ka aji èvè sèwvitè a-y ? I ka pran tan kouté-yo. I ka tchenn kont dè sa yo ja viv é dè sitiyasyon a yo. I ka aji èvè konpasyon épi yo. An-nou ègzaminé kijan i aji èvè Jonas, Éli, Aga, é Lòt. É toupannan nou ka fè sa, nou ké vwè kijan nou pé imité Jéova lè nou ka aji èvè frè é sè an nou.

4. Poukwa nou té’é pé kwè kè Jonas té on boug an kouyonnad ?

⁴ Si ou pa konnèt istwa a Jonas byen, pétèt ou ké ni lenprésyon kè pa té ni mwayen fè pwofèt-lasa konfyans é kè a pa té on moun fidèl. Sé Jéova limenm ki té voyé-y anonsé on jijman a Niniv. Men olyé i té obéyi, i monté òbò on bato ki té k’ay an lòt sans-la, « lwen a Jéova » (Jonas 1:1-3). Ès ou té’é ba-y on dézyèm chans pou i fè sa ou té ba-y fè la ? Pétèt kè non. Men li Jéova, i ba-y on dézyèm chans (Jonas 3:1, 2).

5. Lè ou ka li Jonas 2:1, 2, 9, ka ou ka aprann asi Jonas ?

⁵ Nou ka vwè kijan dè moun Jonas té yé vréman lè nou ka gadé priyè-la i fè la (li Jonas 2:1, 2, 9). Jonas té ja fè onpakèt priyè an vi a-y, men tala ka édé-nou konprann kè fò pa nou rètyenn sèlman kè sé té on boug ki pa fè sa yo té mandé-y. Sé pawòl-la i di la ka montré kè i té ni onlo imilité, kè i té ni rèkonésans é kè i té paré a fè tousa i pé pou fè sa Bondyé mandé-y. Sé pousa sa pa ka étoné-nou si Jéova pa arété-y asi érè-la Jonas fè la. Olyé dè sa, i réponn a priyè a-y é i kontinyé sèvi èvè-y antankè pwofèt.

6. Poukwa sa enpòwtan kè nou pran tan kouté frè é sè an nou ?

⁶ Pou nou pé sa kouté lézòt byen, fò-nou ni imilité é fò-nou ni pasyans. Fò-nou kouté frè é sè an nou pou omwen 3 rézon. 1) Nou ké mwens anvi pòté on mové jijman asi frè é sè an nou. 2) Sa ké édé-nou vwè sa yo ka rèsanti é sa ki ka pousé-yo fè sèwten biten. Konsa, nou ké pé aji èvè plis konpasyon épi yo. 3) Lè nou ka lésé frè é sè an nou palé, yomenm a yo ka konprann pibyen sa yo  ka rèsanti, piskè délè, on moun pa’a rivé konprann sa i ka rèsanti touttan i po’o palé dè sa (Pwov. 20:5). Mi sa on ansyen ki ka viv an Azi ka rèkonnèt : « An ka sonjé on jou, an ay fè lèmalè dè palé avan an té kouté. An ay di on sè kè sa té’é byen si i té ka fè pi bèl komantè lè i réinyon. Aprésa, an vin sav kè i pa té ka li byen é kè i té ka fè onlo éfò pou bay komantè. » Avan on ansyen ba on moun on konsèy, fò i chèché a ni enfòwmasyon asi moun-la. Sa enpòwtan toubònman ! (Pwov. 18:13).

7. Lè nou ka gadé jan Jéova aji èvè Éli, ka sa ka aprann-nou ?

⁷ Sèwten frè é sè pa’a rivé palé dè sa yo ka rèsanti akòz dè sa yo ja viv, dè kilti a yo oben dè karaktè a yo. Kijan nou pé édé-yo ? Sonjé kijan Jéova aji èvè Éli lèwvwè i té ka kaché pou Jézabèl pa té tchouyé-y. Éli pa rivé di Jéova sa i té ka rèsanti tousuit. I fè sa plizyè jou apré. Aprésa, Jéova pran tan kouté-y. I ankourajé-y osi é i ba-y on travay enpòwtan a fè (1 Wa 19:1-18). Sé frè é sè la pé’é wouvè tchè a yo ban nou onsèl kou konsa. Pétèt sa ké pran tibwen tan pou yo santi-yo alèz èvè nou. Sé pousa, fò-nou pran pasyans èvè yo pou nou rivé konprann sa yo ka rèsanti vréman. Si nou ni pasyans menmjan ki Jéova, yo ké pé fè-nou konfyans é pétèt yo ké fin pa di-nou sa yo ka rèsanti. A moman-lasa, fò-nou ké pran tan kouté-yo byen.

8. Sèlon Jénèz 16:7-13, kijan Jéova édé Aga ?

⁸ Aga té sèwvant a Saray. I vin madanm a Abraam é i koumansé fè fanm ba Saray. Lè i tonbé ansent, i mété-y ka méprizé Saray pas Saray pa té ka fè timoun. Tèlman biten-la vin rèd, Saray pa té pé èvè-y ankò é i té oblijé fè-y pati (Jén. 16:4-6). Konm nou enpawfè, nou té’é pé pansé kè Aga té on madanm ki té méchan é kè sa ki rivé-y la byen fèt ba-y. Men a pa konsa Jéova té ka vwè sa. I voyé on zanj owa-y. Zanj-la édé-y chanjé mantalité é i béni-y. Aga rann-li kont kè Jéova té ka obsèwvé-y é kè i té konnèt sitiyasyon a-y byen. Sa touché-y tèlman kè i té oblijé di Bondyé : « Ou sé on Bondyé ki ka vwè tousa ki ka pasé, [...] sila ki ka obsèwvé-mwen la » (li Jénèz 16:7-13).

9. Poukwa Bondyé aji konsa èvè Aga ?

⁹ Lèwvwè Jéova té ka gadé Aga, ka i té ka vwè ? I té konnèt byen tousa malérèz-la té ja viv é tout penn é péripési i té ja pasé (Pwov. 15:3). Sé té on éjypsyèn ki té ka viv adan on fanmi ébré. Pétèt kè i té ni lenprésyon kè yo té ka pran-y pou on manb initil. Pétèt kè fanmi a-y té ka manké-y é kè i té anvi viré an péyi a-y. Anplisdisa, Abram té ni dòt madanm. Pannan on tan, sèwten nonm ki té fidèl a Bondyé té ni plizyè madanm men a pa sa Jéova té prévwa odépa (Mat. 19:4-6). Nou ka tou konprann kè sé sitiyasyon-lasa té ka menné bon pwoblèm adan sé fanmi-la, pwoblèm kon jalouzi é rankin. Jéova té sav byen kè Aga dérèspèkté Saray. Men i tchenn kont osi dè sa Aga té ka rèsanti é dè sitiyasyon a-y. Sé pousa i montré-y janti èvè-y.

10. Ka pou nou fè pou nou aprann konnèt frè é sè an nou pibyen ?

¹⁰ Nou pé imité Jéova lè nou ka fè éfò pou nou konprann frè é sè an nou. Aprann konnèt frè é sè a-w pibyen. Ou pé fè sa lè ou ka palé èvè yo avan é apré sé réinyon-la, lè ou ka préché èvè yo é lè  ou ka envité-yo a manjé èvè-w si ou pé. Pétèt ou ké rann-vou kont kè on sè ki ka sanm sa i sovaj pé pa pi timid ki sa. Pétèt ou ké rann-vou kont osi kè on frè ki plen lajan pa matéryalis men kè i pé pa pi donan ki sa. É pétèt on sè é timoun a-y ka rivé an réinyon anrèta souvan. Men ou ké rann-vou kont kè mari a-y ka ba-y bon gaz é kè ja ka fè on bon moman kè i ka andiré sitiyasyon-lasa (Jòb 6:29). Sé vré, nou vé pa ‘mélé-nou adan sa i pa’a gadé-nou’ (1 Tim. 5:13). Men sa byen dè aprann konnèt frè é sè an nou é dè chèché a sav sa yo ja viv. Konsa nou ké pé konprann-yo pibyen.

11. Poukwa sa enpòwtan kè sé ansyen-la konnèt sé timouton-la byen ?

¹¹ Fò sé ansyen-la konnèt frè é sè a yo byen. Sa enpòwtan toubònman ! An nou pran ègzanp a Artur, on frè ki té rèsponsab a siwkonskripsyon. On jou, li èvè ondòt ansyen, yo ay vwè on sè ki té ka sanm sa i té byen timid. Mi sa Artur ka di : « Nou aprann kè i pèd mari a-y kèlkè lanné apré yo mayé. Menmsi sa té rèd, i édé 2 fi a-y enmé Jéova é yo toulédé byen doubout adan lavérité. Malérèzman, i koumansé pa’a vwè klè ankò é i vin déprésif. Men magrésa, i té enmé Jéova onlo é fwa a-y toujou rété fò. Nou rann-nou kont kè sè-lasa té ni onlo biten a aprann-nou » (Filip. 2:3). An réyalité, rèsponsab a siwkonskripsyon-lasa imité Jéova. Jéova konnèt timouton a-y byen é tousa yo ka sipòté (Ègz. 3:7). Lè sé ansyen-la konnèt sé timouton-la byen, yo ka pé édé-yo pibyen.

12. On sè non a-y sé Yip Yee chèché a konnèt on sè ki an lasanblé a-y pibyen. Ka sa aprann-li ?

¹² Si ou ni dimal a sipòté on frè ou on sè, chèché a konnèt-li myé. Sa ké pi fasil pou ou aji èvè konpasyon épi-y. An-nou palé dè ègzanp a Yip Yee ki ka viv an Azi. Mi sa i ka èspliké : « On sè a lasanblé an mwen té ka palé fò toubònman. An té ka touvé sa malélivé. Men on jou, pannan nou té an prédikasyon, i rakonté-mwen kè avan, i té ka édé fanmi a-y vann pwason asi on mawché é fò i té palé fò pou sé moun-la vin achté. » Mi sa Yip Yee ka ajouté : « An aprann kè pou konprann frè é sè an mwen, fò-mwen chèché a konnèt-yo pibyen. » Vou osi, fò ou fè onlo éfò pou aprann konnèt frè é sè a-w. Anplisdisa, si ou aprann enmé tout frè é sè a-w, kon Labib ka di,  ou ké imité Jéova, ki enmé « tout kalté moun » (1 Tim. 2:3, 4 ; 2 Kor. 6:11-13).

13. Dapré sa Jénèz 19:15, 16 ka di, ka sé zanj-la fè padavwa Lòt té ka pran tout tan a-y, é poukwa ?

¹³ Lòt té ka viv on sitiyasyon ki té rèd menm, men olyé i té fè sa Jéova mandé-y tousuit, i pran onlo tan pou obéyi. 2 zanj vin vwè-y é yo di-y sòti Sodòm èvè fanmi a-y. Poukwa sa ? Mi sa yo èspliké-y : « Nou kay détwi koté-lasa » (Jén. 19:12, 13). Lèlandèmen maten, Lòt é fanmi a-y té akaz a yo toujou. Kifè, sé zanj-la wouavèti-y ankò. Men Lòt « té ka pran tout tan a-y ». Nou té’é pé pansé kè i pa ba sa Jéova té di-y la pon enpòwtans. É nou té’é jous pé rivé a di kè i pa té obéyisan. Men Jéova pa jen abandoné-y : ‘i té ni konpasyon pou-y’. Sé pousa sé zanj-la tchenbé men a-y é men a fanmi a-y é yo menné-yo andéwò a vil-la (li Jénèz 19:15, 16).

14. Pétèt kè Jéova té ni konpasyon pou Lòt pou plizyè rézon diféran. Kilès ?

¹⁴ Pétèt kè Jéova té ni konpasyon pou Lòt pou plizyè rézon diféran. Si Lòt tadé pou i té pati, sé pétèt pas i té pè sé nasyon-la ki té alantou a-y la. É té ni dòt danjé ankò. Pétèt kè Lòt té tann palé dè 2 wa ki té tonbé adan pui ki té plen goudwon é sé pui-lasa té adan on fon ki pa té lwen Sodòm (Jén. 14:8-12). Konm sé té on papa é on mari, i dwèt té ka enkyété-y pou fanmi a-y. Anplisdisa, konm sé té on nonm rich, i dwèt té ni on bèl kaz a Sodòm (Jén. 13:5, 6). Men tout sé biten-lasa, pa té ka ba-y dwa tadé pou i té obéyi Bondyé. Men Jéova pa rété gadé érè-la i fè la, é pou-y, Lòt sé té on nonm ki té « jis » (2 Pyè 2:7, 8).

15. Olyé ou jijé sa on moun ka fè, ka pou ou fè ?

¹⁵ Olyé ou jijé sa on frè oben on sè ka fè, fò ou fè éfò pou konprann sa i ka rèsanti. Sé sa Veronica, on sè ki ka viv an Éwòp, éséyé fè. Mi sa i ka èspliké : « Ni on sè, lè ou té ka gadé-y ou té’é di i té toujou égri. I té enmé rété tousèl. Dépawfwa, an té jous pè palé ba-y. Men mi sa an di an tchè an mwen : “Si an té adan  sitiyasyon a-y, an té byen enmé ni on ti zanmi.” Alò an désidé mandé-y nouvèl a-y. É i wouvè tchè a-y ban mwen ! Jòdijou, an ka konprann-li pibyen. »

16. Poukwa fò-nou mandé Jéova édé-nou pou nou pé sa aji èvè konpasyon épi lézòt ?

¹⁶ Sèl moun ki ka konprann-nou a san pou san, sé Jéova (Pwov. 15:11). Alò mandé-y édé-w pou ou pé sa vwè lézòt kon i ka vwè-yo. É mandé-y gidé-w osi pou ou vwè ka ou pé fè pou montré lézòt kè ou ni konpasyon pou yo. Afòs priyé, on sè non a-y sé Angela rivé konprann lézòt pibyen. Ni on sè a lasanblé a-y kè ponmoun pa té ka rivé sipòté ankò. Mi sa Angela limenm ka admèt : « An té’é pé mèt-mwen ka malpalé sè-la san pwoblèm é an té’é pé pa lévé-y digad. Men an pa té vlé tonbé adan pyèj-lasa. Alò, an mandé Jéova édé-mwen konprann sè-la. » Ès Jéova réponn a priyè a-y ? Mi sa i ka ajouté : « Nou ay préché é aprésa, nou rété on bon ti moman ka palé. An kouté-y èvè onlo konpasyon. Konnyéla, an enmé-y plis ki avan é an byen désidé a soutyenn-li. »

17. Ka fò-nou byen désidé a fè ?

¹⁷ A pa yenki èvè déotwa frè é sè sèlman pou ou aji èvè konpasyon ! Sé vré kè ni déotwa adan yo ki on ti jan kon Jonas, Éli, Aga é Lòt pas sé yomenm ki ay chèché bab a yo. Men fò-nou gadé laréyalité anfas : défwa sé noumenm an nou ki ka mété-nou an pwoblèm. Sé pousa lèwvwè yonn adan nou ka soufè, fò-nou soufè ansanm èvè-y. Sé sa Jéova ka mandé-nou fè é sa toutafè nòwmal ! (1 Pyè 3:8). Nou adan on bèl fanmi entèwnasyonal ki plen moun diféran adan-y. Men si nou ka kouté Jéova, fanmi-lasa ké vin pi soudé. Alò fò-nou byen désidé a kouté frè é sè an nou, a aprann konnèt-yo byen, é a aji èvè yo épi konpasyon.