1. Anni nga makapabannay nga kinakurug meyannung kani Jehova i kagian na Biblia?

KAYÀ mu kari nga husgan naka na tanakuan base ta kulor na tabbi mu, itchuram, onu ta kadakal na baggim? Siempre, kammu kayà yatun. Pia ngana laman gafu ta ari ittam husgan ni Jehova base ta masingan na mata na tolay! Angngariganna, turi ta nasingan ni Samuel i ána nga lallaki ni Jesse, arianna nasingan i nasingan ni Jehova. Kinagi ni Jehova kani Samuel nga tadday ta ana nga lalaki ni Jesse i mabbalin tu patul na Israel. Ngem sinni nira? Ta pakasingan ni Samuel ta kaka nga lalaki nga ana ni Jesse nga si Eliab, kinagina: “Siguradu nga yaw ngana i sinunno ni Jehova.” Kagitta na tadday nga patul si Eliab. “Ngem kinagi ni Jehova kani Samuel: ‘Kammu innan i itchurana anna i katannanna, megafu ta manaki ku yayya.’” Anni i leksion? Kunna paga ni Jehova: “Innan na tolay i masingan na matana, ngem innan ni Jehova i egga ta futu.”​—1 Sam. 16:1, 6, 7.

2. Kagitta na mabibbig ta Juan 7:24, ngatta ariattam nakuan husgan i tadday nga tolay base ta itchurana? Iyilustra.

² Megafu ta imperfekto ittam, egga i tendensia tam ngamin nga husgan i tanakuan base ta itchurada. (Bibbigan i Juan 7:24.) Ngem baddi laman i mammuattam ta tolay base ta masingattam. Tapenu iyilustra, nu basta laman innan na doktor i pasientena, maski paga nu malalaki anna ekspiriensadu yayya, baddi laman i malana tu informasion. Mawag tu magginna yayya tu mapia ta pasiente tapenu mammuanna i taka-takina ta nappasa, i mataga-tagenona ta situasionna, onu i sintomas ira nga maekspiriensana. Baka ikiddaw paga lagu na doktor nga mappa-X-ray i pasiente tapenu masingan i unag na baggina. Nu arianna kuan yatun, baka makkamali yayya ta panguruna.  Kunnatun gapa, ariattam mammuan tu mapia i wawwaragi tam gukaban na paningan laman ta itchurada. Mawag tu alippawatattam i kata-katoleda. Siempre, ari ittam makabibbig tu futu, yari tu ariattam vuluvuga nga malippawa i tanakuan nga kunna pangalippawa ni Jehova. Ngem awayya tam kuan i adde na mawayya tam tapenu maparigan si Jehova. Kunnasi?

3. Kunnasi ittam moffunan na rekord ira ta Biblia taw nga artikulo tapenu maparigan si Jehova?

³ Kunnasi nga tratuan ni Jehova i maddayarayaw nisa? Ginnanna ira. Ikonsiderana i sirkumstansiada anna i ngamin nga gannug nga nanginfluwensia nira. Anna ikallona ira. Durante nga gigiammuattam nu kunnasi nga kingngua yatun ni Jehova kada Jonas, Elias, Hagar, anni Lot, innan nu kunnasi tam maparigan si Jehova ta pattratu tam ta wawwaragi tam.

4. Ngatta awayyana nga negatibo i pagimamma tam kani Jonas?

⁴ Megafu ta ariattam ammu i ngamin meyannung ta situasion ni Jonas, baka nonopattam nga ari yayya mapaddependeyan anna ari nga minattuppal. Nakalawa yayya tu direkta nga bilin kani Jehova nga ilayyagayya i mensahe na pamanunnu ta Nineve. Imbes nga tuttulan yatun ni Jonas, nattakay yayya ta barku nga mabbiahe ta tanakuan nga direksion “tapenu tammangnganna si Jehova.” (Jonas 1:1-3) Nu sikaw, iddammu kari uli si Jonas tu tiansa tapenu tuppalan i bilin ni Jehova? Baka ari. Ngem para kani Jehova, mepangngo paga nga meddan uli tu tiansa si Jonas.​—Jon. 3:1, 2.

5. Anni i magigiammum kani Jonas ta pakimallona nga nerekord ta Jonas 2:1, 2, 9?

⁵ Nipasingan ni Jonas ta pakimallona nu anni nga klase yayya na tolay. (Bibbigan i Jonas 2:1, 2, 9.) Siguradu nga namippiga nga nakimallo si Jonas kani Jehova. Nu alippawatattam i pakimallona ta unag na san na manango, masingattam nga ari laman yayya nga tolay nga nattammang ta annunganna. Ipasingan na uvovugna ira nga minappakalinno yayya, minappabalo, anna determinadu nga tuttulan si Jehova. Yayya nga ari tu kakkadda-kaddag nga ari naffokus si Jehova ta liwa ni Jonas. Sinabbagna lallagu i pakimallona anna niyusana lagapa yayya bilang profeta!

6. Ngatta sulit nittam nga magginna tu mapia?

⁶ Tapenu maginna tam tu mapia i tanakuan, mawag tu minappakalinno anna mapasensia ittam. Egga i tallu nga rason nu ngatta sulit yatun. Ollu, mas baddi i tiansa nga makkamali ittam ta konklusion meyannung ta tadday  nga tolay. Mekadua, malippawa tam i mataga-tageno anna motibo ira na wagi tam, anna makoffun yatun tapenu mas makepasingan ittam tu allo. Mekatallu, nu ipamavuluttam nga magistoria i wagi tam, awayyana nga egga paga i mammuanna ta baggina. Nu mittan, ari kuruga malippawa na tadday nga tolay i mataga-tagenona adde ta arianna ikagi yatun. (Prov. 20:5) Inamin na tadday nga elder nga taga-Asia: “Meraddammakku nga egga gapa mittan nga nakkomento ngà insigida nige ku paga nammuan i ngamin nga informasion. Kinagì ta tadday nga sister nga mawag tu pakastanna i kualidad na komentona ta study ira. Tapus, nammuakku nga arianna balo ammu kuruga i mabbibbig anna dakal nga pappursigi i kawaganna tapenu laman makapakkomento.” Kuruga importante gafu ta kada elder nga “maginna i detalye ira” nigeda manabarang!​—Prov. 18:13.

7. Anni i magigiammum ta pinattratu ni Jehova kani Elias?

⁷ Marigatan i karuan nga wawwaragi tam nga ikagi i mataga-tagenoda megafu ta nesimmu nira ta nappasa, kulturada, onu ta personalidadda. Kunnasi tam ira moffunan tapenu mas alistuda laman nga mekagi nittam i mataga-tagenoda? Daddamman i pinattratu ni Jehova kani Elias tagga ta sinammangnganna si Jezebel. Piga aggaw labbi i nappasa nige nga nevuvvu ni Elias i ngamin nga mataga-tagenona ta nelangitan nga Yamana. Nagginna tu mapia si Jehova. Pinagaramna si Elias anna niddanna yayya tu importante nga trabahu. (1 Pat. 19:1-18) Awayyana nga kawagan i tiempo nige nga mabbalin tu komfortable i wawwaragi nga makibbida nittam, ngem malippawa tam laman i kurug nga mataga-tagenoda nu makiyuvovug ira nittam. Nu parigattam si Jehova nga minappasensia, mala tam i pattaloda. Tapus, nu komfortable ngana ira nga ikagi i mataga-tagenoda, sigga-paran ittam nakuan nga magginna tu mapia.

8. Segun ta Genesis 16:7-13, kunnasi zinuffunan ni Jehova si Hagar?

⁸ Si Hagar nga aripan ni Sarai ay nagguyu tu ari masirib turi ta nabbalin yayya tu atawa ni Abram. Turi ta nabussi si Hagar, tagibadditanna ngana si Sarai megafu ta awan tu sarilina nga ana. Naggrabe i situasion adde ta nanaw si Hagar megafu ta pinattratu ni Sarai nisa. (Gen. 16:4-6) Megafu ta imperfekto ittam, baka nonopattam nga mepangngo laman ta minappakatannang nga si Hagar i nesimmu nisa. Ngem ari tu kunnatun i panageno ni Jehova kani Hagar. Naddog yayya tu anghelna nisa. Turi ta nalegan yayya na anghel, zinuffunan yayya na anghel nga ulian i appanonona anna binendisionanna yayya. Nalippawana nga iinnan balo yayya ni Jehova anna ammu ni Jehova i ngamin nga situasionna. Nappabbaw si Hagar yatutta inagalanna yayya bilang “Dios nga makasingan ta ngamin, . . . i tadday nga makasingan niakan.”​—Bibbigan i Genesis 16:7-13.

9. Ngatta masippo i pinattratu ni Jehova kani Hagar?

⁹ Anni i nasingan ni Jehova kani Hagar? Ammuna i nappasa-pasan anna i ngamin nga inattattamman ni Hagar. (Prov. 15:3) Tadday nga Ehipsio si Hagar nga maddian ta balay na tadday nga Hebreo. Nu karuan kari matagenona nga dayu yayya? Kanappanna kari i familiana anna i lugarda? Ari laman tu yayya i atawa ni Abram. Egga i tiempo nga ari laman tu tadday i atawa na karuan nga matalo nga lallaki. Ngem ari tu yatun i orihinal nga gakkag ni Jehova. (Mat. 19:4-6) Yayya nga ari gafu kakkadda-kaddag nga marresulta i kunnatun nga unnug ta passil anna taki na nono. Ammu ni Jehova nga mali nga tagibadditan ni  Hagar si Sarai. Ngem nalippawa ni Jehova i mataga-tageno anna situasion ni Hagar yari tu masippo i pinattratuna nisa.

10. Kunnasi tam mammuan tu mas mapia i wawwaragi tam?

¹⁰ Maparigattam si Jehova gukaban na pangalippawa ta wawwaragi tam. Ammuan tu mapia i wawwaragim. Makistoria nira nige anna kabalin na study ira, makipattrabahu nira ta ministerio, anna nu posible, imbitan ira nga kuman. Nu kuammu yatun, baka makannammuammu nga i sister nga ari kuruga minakkikofun ay minappasiran balo, i brother nga abbo mu tu materialistiko ay minammadulo, onu i familia nga kanayun nga mapporyan ta study ira ay magatta-attam balo ta kapeppersigi. (Job 6:29) Siempre ariattam nakuan mabbalin tu “minakki-alam ta pattolay na tanakuan.” (1 Tim. 5:13, NW ) Ngem makasta nga egga i mammuattam ta wawwaragi tam anna ta nappasa-pasadda ta pattoleda tapenu matindiattam i personalidadda.

11. Ngatta importante nga ammammu tu mapia na elder ira i karneru ira?

¹¹ Netallugaring nga mas ammuan nakuan na elder ira i nappasa-pasan na wawwaragi ta kongregasion. Ikonsidera i ekspiriensa na manangngal ta sirkito nga si Artur. Binisitana anna na tadday paga nga elder i tadday nga sister nga gittana minappasiran. “Nammuammi nga natay i atawana ari nabbayag kabalin na kasalda,” kunni Artur. “Maski nu mariga i situasionna, napadakalna lagapa nga matuyag ta espiritual i dua nga anana nga babay. Ngem sangawe makkakafi ngana i matana, anna egga i depressionna. Maski kunna, matuyag lagapa i aya anna pangurugna kani Jehova. Nammuammi nga aru balo i magigiammumi ta makasta nga ehemplo naw nga sister.” (Fil. 2:3) Tuttuttulan naw nga manangngal ta sirkito i ehemplo ni Jehova. Ammammu ni Jehova i karneruna ira anna i ziga-rigada. (Ex. 3:7) Danuri elder nga ammammuda tu mapia i karneru ira ay mas nga egga ta lugar nga makoffun nira.

12. Kunnasi nakoffun ta sister nga si Yip Yee i pangammuna tu mapia ta kakongregasionna?

¹² Nu ammuammu tu mapia i wawwaragim nga ikalussom, siguradu nga ikallo mu ira. Ikonsidera i tadday nga angngarigan. “Kitassikan i ngaral na tadday nga sister nga kakongregasiokku nu mabbida,” kunni Yip Yee, nga taga-Asia. “Para niakan, gittana awan tu modona. Ngem turi ta nakavulu ku yayya ta ministerio, nammuakku nga dudduffunanna balo dati i maganana nga mallaku tu manango ta palengke. Mawag tu masikan i ngaralna tapenu umaranni i kostumer ira.” Kunna paga ni Yip Yee: “Nammuakku nga tapenu  balo malippawa ku i wawwaragì, mawag tu ammuakku labbi ira tu mapia.” Mawag i appursigi tapenu mammuan tu mapia i wawwaragim. Ngem nu tuttulammu i tabarang na Biblia nga vukatammu tu mapia i futum, paparigammu si Jehova nga mangaya ta ‘ngamin nga totolay.’​—1 Tim. 2:3, 4; 2 Cor. 6:11-13.

13. Segun ta Genesis 19:15, 16, anni i kingngua na anghel ira turi ta mabbaya-bayag pagalaman si Lot, anna ngatta?

¹³ Ta kritikal nga tiempo ta pattolay ni Lot, nitala-talattanna nga parulattan i instruksion ni Jehova. Dua nga anghel i nabbisita kani Lot anna kinagida nisa nga ilawanna ngana ta Sodoma i familiana. Ngatta? Kinagida: “Daralammi yaw nga lugar.” (Gen. 19:12, 13) Ta kinommananna, egga paga si Lot anna i familiana ta baleda. Yayya nga inabisowan mangana na anghel ira si Lot. Ngem “mabbaya-bayag paga yayya.” Baka husgattam si Lot nga awan tu paki-alamna anna ari yayya nga minammarulo. Ngem ari nagimmang si Jehova ta pangipaliag nisa. “Megafu ta allo ni Jehova sa,” kinemmi ngana yayya na anghel ira anna i familiana tapus nilawadda ira ta siudad.​—Bibbigan i Genesis 19:15, 16.

14. Ngatta nikallo ni Jehova si Lot?

¹⁴ Nikallo ni Jehova si Lot megafu ta aru nga rason. Awayyana nga magalangan si Lot nga mallawan ta balena gafu ta ikassinna i totolay ta lawan na siudad. Egga paga i tanakuan nga peligro. Siguradu nga ammu ni Lot i nesimmu ta dua nga patul nga nataga ta avvu ira na bitumen, onu aspalto, ta aranni laman nga tana. (Gen. 14:8-12) Bilang atawa anna yama, magga mavurung si Lot para ta familiana. Kunne na paga, mariku si Lot, yayya nga posible nga makakkasta i balena ta Sodoma. (Gen. 13:5, 6) Siempre, awan tu maski anni tatun i rasonable nga rason tapenu ari nga insigida nga parulattan ni Lot si Jehova. Ngem, ari nga naffokus si Jehova ta kamali ni Lot anna minammatanna yayya bilang “matunung nga tolay.”​—2 Ped. 2:7, 8.

15. Imbes nga husgan i kukukuan na tadday nga tolay, anni nakuan i kuattam?

¹⁵ Imbes nga husgan i kukukuan na tanakuan,  kuammu i adde na mawayyam tapenu alippawatan i mataga-tagenoda. Kunnatun i kingngua na sister nga si Veronica nga taga-Europe. “Gittana kanayun nga agga-muzzu i tadday nga sister,” kunna. “Kanayunna nga isisina i baggina ta tanakuan. Nu mittan, ikassikku yayya nga arannian. Ngem kukku, ‘Nu sakan i egga ta situasionna, magga mawag ku i kofun.’ Yari tu nigutu ku nga kamustan yayya. Tapus nivuvvuna niakan i mataga-tagenona! Mas matindiakku ngana yayya sangawe.”

16. Ngatta ipakimallo tam nakuan nga makultiba i pabbalin tu minangngikallo?

¹⁶ Si Jehova laman i interamente nga makalippawa nittam. (Prov. 15:11) Yatutta mappoffun nisa tapenu masingan i tanakuan nga kunna paninganna anna malippawa nu kunnasi ira nga ikallo. Pakimallo i nakoffun ta sister nga si Anzhela tapenu mabbalin tu minangngikallo. Mariga nga makasundu i tadday nga sister ta kongregasiodda. Inamin ni Anzhela: “Mabi laman nga kritikan anna lisian yatun nga sister. Ngem nakimallo ngà kani Jehova tapenu malippawa ku yatun nga sister.” Sinabbag kari ni Jehova i pakimallo ni Anzhela? Kunna: “Navvulu kami ta ministerio anna kabalin natun piga oras kami nga nakka-istoria. Nagginna ngà nisa tu mapia. Sangawe, mas ayatakku ngana yayya, anna determinadu ngà nga duffunan yayya.”

17. Anni nakuan i determinasiottam?

¹⁷ Ariammu mapili nu sinni nga wagi i mepangngo ta pangikallo mu. Ira ngamin ay maka-ekspiriensa ta problema ira kagitta da Jonas, Elias, Hagar, anni Lot. Ta aru nga situasion, ira lagapa i makalliwa ta problemada. Ngem kakuruganna, egga gapa i tiempo nga kunnatun i nesimmu nittam ngamin. Rasonable gafu nga ikiddaw ni Jehova nga ikallo tam i kataggi-tadday. (1 Ped. 3:8) Nu tuttulattam si Jehova, makoffun ittam ta pattaradday na makapabbaw anna nadduruma nga interu-mundo nga familia tam. Yatutta determinadu ittam nakuan nga ginnan, ammuan tu mapia, anna ikallo i wawwaragi tam.