16-زەرتتەۋ ماقالاسى
تىڭداڭىز، جاقىنىراق ٴبىلىڭىز، جاناشىرلىق تانىتىڭىز
«ادامعا سىرت كورىنىسىنە قاراپ ۇكىم ايتۋدى قويىڭدار، ٵدىل ۇكىم ايتىڭدار» (جوح. 7:24).
101-ٵن بىرلەسە قىزمەت ەتەيىك
اڭداتپا *
1. كيەلى كىتاپتا ەحوبا جايلى قانداي جۇبانىش بەرەتىن شىندىق جازىلعان؟
ادامداردىڭ ٴسىز جايلى تەرىڭىزدىڭ تۇسىنە، بەتىڭىزدىڭ پىشىنىنە يا دەنە بىتىمىڭىزگە قاراپ تۇجىرىم جاساعانىن قالار ما ەدىڭىز؟ قالامايتىن شىعارسىز. ەحوبانىڭ ٴبىزدى سىرت كورىنىسىمىزگە قاراپ سوتتامايتىنى نەتكەن جۇبانىش! مىسالى، سامۋيل پايعامبار ەسەيدىڭ ۇلدارىن كورگەندە، ەحوبا بايقاعاندى بايقامادى. ەحوبا وعان ەسەي ۇلدارىنىڭ ٴبىرى يسرايلدىڭ پاتشاسى بولاتىنىن ايتقان بولاتىن. ول كىم ەدى؟ سامۋيل ەسەيدىڭ تۇڭعىش ۇلى ەلياپتى كورگەندە: «ەحوبانىڭ مايلانعانى وسى بولۋ كەرەك»،— دەدى. وعان ەلياپ پاتشا بولاتىنداي كورىندى. الايدا ەحوبا سامۋيلگە: «ونىڭ كەلبەتى مەن بويشاڭدىعىنا قاراما، مەن تاڭداعان ادام — بۇل ەمەس»،— دەدى. بۇدان قانداي ساباق الامىز؟ ەحوبا ٵرى قاراي: «پەندە ادامنىڭ سىرت كەلبەتىنە قارايدى، ال ەحوبا جۇرەگىنە قارايدى»،— دەدى (سام. 1-ج. 16:1، 6، 7).
2. جوحان 7:24 كە ساي، نەگە ادامنىڭ سىرت كورىنىسىنە قاراپ تۇجىرىم جاساماۋىمىز كەرەك؟ مىسال كەلتىرىڭىز.
2 پەندە بولعاندىقتان ٴبارىمىز دە وزگەلەردىڭ سىرت كورىنىسىنە قاراپ، وي تۇزۋگە بەيىمبىز (جوحان 7:24 وقىڭىز). ٴبىراق ٴبىز ادامنىڭ تەك سىرت كەلبەتىنە قاراپ كوپ نارسە بىلە المايمىز. مىسالى، وتە ٴبىلىمدى ٵرى تاجىريبەلى دارىگەردىڭ ٶزى ناۋقاس ادامعا قاراپ كوپ نارسە ايتا المايدى. ول ناۋقاستى مۇقيات تىڭداپ، ونىڭ بۇرىن نەمەن اۋىرعانىن، قازىر نە سەزىنەتىنىن جانە بويىندا اۋرۋدىڭ قانداي بەلگىلەرى بار ەكەنىن ٴبىلۋى قاجەت. دارىگەر ٴتىپتى ونىڭ ىشكى قۇرىلىسىن تەكسەرۋ ٷشىن رەنتگەنگە تۇسۋگە جىبەرۋى مۇمكىن. ايتپەسە وعان قاتە ناقتاما قويۋى عاجاپ ەمەس. سول سياقتى ٴبىز دە باۋىرلاستارىمىزدىڭ سىرت كورىنىسىنە قاراپ، ولاردى تولىعىمەن تۇسىنە المايمىز. ٴبىز ادامنىڭ ىشكى جان دۇنيەسىن تۇسىنۋگە تىرىسۋىمىز قاجەت. ارينە، ٴبىز ادامداردىڭ جۇرەگىن كورە المايمىز، سوندىقتان ولاردى ەحوبا تۇسىنگەندەي تۇسىنە المايمىز. الايدا قولىمىزدان كەلگەنشە ەحوباعا ەلىكتەي الامىز. قالاي؟
3. بۇل ماقالاداعى كيەلى كىتاپ ۇزىندىلەرى ەحوباعا ەلىكتەۋگە قالاي كومەكتەسەدى؟
3 ەحوبا وزىنە عيبادات ەتەتىندەرگە قالاي قارايدى؟ ول ولاردى تىڭدايدى. ولاردىڭ شىققان ورتاسى مەن جاعدايلارىن تۇسىنەدى. سونداي-اق ولارعا جاناشىرلىق تانىتادى. ەحوبانىڭ جۇنىسكە، ٸلياسقا، اجارعا جانە لۇتقا قالاي قاراعانىن قاراستىرۋ بارىسىندا باۋىرلاستارمەن قارىم-قاتىناسىمىزدا وعان قالاي ەلىكتەي الاتىنىمىزدى تالقىلايىق.
مۇقيات تىڭداڭىز
4. جۇنىسكە قاتىستى نەگە بۇرىس كوزقاراستا بولۋىمىز مۇمكىن؟
4 جۇنىستىڭ جاعدايىن تولىق بىلمەگەندىكتەن، ٴبىز ونى سەنىم ارتۋعا تۇرمايتىن، ادالدىق تانىتپاعان ادام دەپ ويلاۋىمىز مۇمكىن. ول نينەۆياعا ۇكىم حابارىن ايتۋعا قاتىستى ەحوبادان ناقتى نۇسقاۋ الدى. الايدا مويىنسۇنۋدىڭ ورنىنا، ول «ەحوبادان الىسىراق كەتۋ ٷشىن» كەمەمەن مۇلدەم باسقا باعىتقا جول تارتتى (ٴجۇنىس 1:1—3). ٴسىز جۇنىسكە تاپسىرماسىن ورىنداۋعا تاعى ٴبىر مۇمكىندىك بەرەر مە ەدىڭىز؟ بالكىم، بەرمەيتىن شىعارسىز. دەسە دە ەحوبا ٴجۇنىستى تاعى ٴبىر مۇمكىندىك بەرۋگە لايىق دەپ تاپتى (ٴجۇنىس 3:1، 2).
5. ٴجۇنىس 2:1، 2، 9 دا جازىلعان سوزدەردەن ٴجۇنىس جايلى نە بىلۋگە بولادى؟
5 جۇنىستىڭ قانداي ادام ەكەنىن ونىڭ ايتقان دۇعاسىنان بىلۋگە بولادى (ٴجۇنىس 2:1، 2، 9 وقىڭىز). ونىڭ ەحوباعا كوپ رەت دۇعا ەتكەنى ٴسوزسىز. سول دۇعالارىنىڭ بىرىنەن ونىڭ جاقسى ادام بولعانىن بىلەمىز. تاپسىرماسىنان قاشىپ كەتسە دە، ايتقان دۇعاسىنان ونىڭ كىشىپەيىل، ريزاشىل ٵرى ەحوباعا مويىنسۇنۋعا بەكىنگەن ادام ەكەنى كورىنەدى. سوندىقتان دا ەحوبا جۇنىستىڭ قاتەلىكتەرىنە قادالىپ قالماي، دۇعاسىن تىڭداپ، ٵرى قاراي دا پايعامبارى رەتىندە قولدانا بەردى!
جاعدايدى تولىق بىلگەنىمىز جاناشىر بولا تۇسۋگە كومەكتەسەدى (6-ابزاستى قاراڭىز) *
6. نەگە مۇقيات تىڭداۋ كۇش سالۋعا تۇرادى؟
6 وزگەلەردى مۇقيات تىڭداۋ ٷشىن كىشىپەيىل ٵرى شىدامدى بولۋىمىز كەرەك. بۇل كۇش سالۋعا تۇرارلىق. وعان، كەم دەگەندە، ٷش سەبەپ بار. بىرىنشىدەن، ادام جايلى بىردەن تون پىشپەيمىز. ەكىنشىدەن، باۋىرلاسىمىزدىڭ سەزىمدەرى مەن ارەكەتىنىڭ سەبەبىن تۇسىنەمىز، بۇل بىزگە وعان جاناشىرلىقپەن قاراۋعا كومەكتەسەدى. ۇشىنشىدەن، ادام ىشىندەگىسىن اقتارسا، ول ٴتىپتى ٶز-ٶزىن ٴتۇسىنۋى مۇمكىن. كەيدە ادام ىشىندەگىسىن سىرتقا ايتىپ شىعارمايىنشا، ٶز سەزىمدەرىن ٶزى تۇسىنبەي جاتادى (ناق. س. 20:5). ازيادا تۇراتىن ٴبىر اقساقال بىلاي دەيدى: «بىردە مەن ٴمان-جايدى تولىعىمەن بىلمەي جاتىپ سويلەدىم. ٴبىر ايەل باۋىرلاسقا تۇسىنىكتەمەلەرىنىڭ ساپاسىن جاقسارتۋى كەرەكتىگىن ايتتىم. كەيىن ونىڭ وقۋعا قينالاتىنىن، تۇسىنىكتەمە بەرۋگە وتە كوپ كۇش سالاتىنىن ٴبىلدىم». ٵربىر اقساقالدىڭ كەڭەس بەرمەي جاتىپ، «ٴمان-جايدى تىڭداپ» العانى وتە ماڭىزدى! (ناق. س. 18:13).
7. ەحوبانىڭ ٸلياسقا قالاي قاراعانىنان نە ۇيرەنەمىز؟
7 كەيبىر باۋىرلاستارىمىز شىققان ورتاسىنا، مادەنيەتى مەن بولمىسىنا بايلانىستى سەزىمدەرى جايلى ايتۋعا قينالۋى مۇمكىن. سوندايدا ولار بىزگە سەزىمدەرىن اشىق ايتا الۋى ٷشىن نە ىستەسەك بولادى؟ ەحوبانىڭ ەزابەلدەن قاشقان ٸلياسقا قالاي كومەكتەسكەنىن ەسىڭىزگە ٴتۇسىرىڭىزشى. ٸلياسقا ىشىندەگىسىن كوكتەگى اكەسىنە تولىعىمەن ايتىپ بەرۋ ٷشىن ٴبىراز كۇن قاجەت بولدى. ەحوبا ونى مۇقيات تىڭدادى. سوسىن ونى جىگەرلەندىرىپ، وتە ماڭىزدى ٸس تاپسىردى (پات. 1-ج. 19:1—18). باۋىرلاستار وزدەرىن ەمىن-ەركىن سەزىنىپ، بىزبەن سويلەسە الۋلارى ٷشىن ٴبىراز ۋاقىت كەتۋى مۇمكىن. ولار وزدەرىن ەركىن سەزىنگەندە عانا جان دۇنيەلەرىندە نە بار ەكەنىن بىلە الامىز. ەحوبا سياقتى شىدامدى بولساق، باۋىرلاستاردىڭ سەنىمىنە يە بولامىز. ال ولار سەزىمدەرىمەن بولىسۋگە دايىن بولعاندا، ٴبىز مۇقيات تىڭداۋىمىز كەرەك.
باۋىرلاستاردى جاقىنىراق ٴبىلىڭىز
8. مۇسانىڭ 1-جازباسى 16:7—13 تارماقتارعا ساي، ەحوبا اجارعا قالاي كومەكتەستى؟
8 سارايدىڭ كۇڭى اجار ىبىرامعا ايەل بولعاننان كەيىن اقىماقتىقپەن ارەكەت ەتە باستايدى. ول جۇكتى بولعان سوڭ، بالالارى بولماعان سارايعا مەنسىنبەي قارايتىندى شىعارادى. جاعدايدىڭ ۋشىققانى سونشالىق — ول سارايدىڭ قىسىمىنا شىداماي، قاشىپ كەتەدى (مۇس. 1-ج. 16:4—6). كەمەلسىز بولعاندىقتان ٴبىز «وركوكىرەك اجاردىڭ وزىنە دە سول كەرەك» دەپ ويلاۋىمىز مۇمكىن. ٴبىراق ەحوبا بۇلاي ويلامادى. ەحوبا وعان پەرىشتەسىن جىبەردى. پەرىشتە ونى تاۋىپ الىپ، كوزقاراسىن وزگەرتۋگە كومەكتەستى جانە قۇدايدىڭ ونى جارىلقايتىنىن ايتتى. اجار ەحوبانىڭ ٶزىن باقىلاپ جۇرگەنىن، جاعدايى وعان تولىقتاي ٴمالىم ەكەنىن ٴتۇسىندى. سودان تولقىپ كەتكەنى سونشا، ول: «سەن ٴبارىن كورەتىن قۇدايسىڭ»،— دەدى (مۇسانىڭ 1-جازباسى 16:7—13 وقىڭىز).
9. اجارعا قاتىستى ەحوبا نەنى ەسكەردى؟
9 ەحوبا اجار جايلى نەنى ٴبىلدى؟ ول اجاردىڭ شىققان ورتاسى مەن نەندەي جايتتاردى باستان كەشىرىپ جاتقانىن ٴبىلدى (ناق. س. 15:3). اجار ەۆرەي وتباسىندا تۇرىپ جاتقان مىسىرلىق قىز بولاتىن. جىراقتا ٴجۇرىپ ول ٶزىن كەيدە بوتەن سەزىنىپ، جالعىزسىراعان شىعار. ٷي ٸشى مەن تۋعان جەرىن ساعىنعان بولار. ونىڭ ۇستىنە، ول ىبىرامنىڭ جالعىز ايەلى ەمەس ەدى. سول كەزدەرى كەيبىر ادال ەر كىسىلەر بىرنەشە ايەل الاتىن بولعان. الايدا ەحوبانىڭ و باستاعى نيەتى بۇل ەمەس ەدى (مات. 19:4—6). سوندىقتان دا بۇنداي وتباسىلارىندا قىزعانىش پەن تۇسىنىسپەۋشىلىكتەردىڭ ورىن العانى تاڭعالدىرمايدى. ەحوبا اجاردىڭ سارايعا قۇرمەت كورسەتپەگەنىن قۇپتاماسا دا، ونىڭ شىققان ورتاسى مەن جاعدايىن ەسكەرگەن.
باۋىرلاستاردى جاقسىراق ٴبىلىڭىز (10—12 ابزاستاردى قاراڭىز) *
10. باۋىرلاستارىمىزدى قالاي جاقسىراق بىلە الامىز؟
10 ٴبىر-ٴبىرىمىزدى تۇسىنۋگە تىرىسساق، ەحوباعا ەلىكتەيمىز. باۋىرلاستارىڭىزدى جاقسىراق ٴبىلىڭىز. ولارمەن قاۋىم كەزدەسۋلەرىنىڭ الدىندا نە ودان كەيىن سويلەسىڭىز. ولارمەن قىزمەتكە شىعىڭىز، مۇمكىن بولسا، قوناققا شاقىرىڭىز. سوندا، بالكىم، سۋىقتاۋ بولىپ كورىنگەن باۋىرلاستىڭ شىن مانىندە ۇيالشاق ەكەنىن، دۇنيەقۇمار دەپ ويلاعان باۋىرلاستىڭ قوناقجاي ەكەنىن، قاۋىمعا ٴجيى كەشىگىپ كەلەتىن وتباسىنىڭ قارسىلىقتارعا كەزىگىپ جۇرگەنىن بىلەتىن شىعارسىز (ٵيۇپ 6:29). ارينە، ٴبىز «وزگەنىڭ ىسىنە ارالاسىپ» كەتپەۋىمىز كەرەك (ٴتىم. 1-ح. 5:13). الايدا باۋىرلاستارىمىزدى جانە ولاردىڭ قانداي جاعدايلارعا كەزىككەنىن بىلگەنىمىز ولاردى جاقسىراق تۇسىنۋگە كومەكتەسەدى.
11. نەگە اقساقالداردىڭ قاۋىمداعى قويلاردى جاقسى بىلگەندەرى ماڭىزدى؟
11 اسىرەسە اقساقالدار قاۋىمدارىنداعى باۋىرلاستاردى جاقسى بىلۋلەرى كەرەك. اۋداندىق باقىلاۋشى بولىپ قىزمەت ەتكەن ارتۋر ەسىمدى باۋىرلاستىڭ وقيعاسىن قاراستىرايىق. ول تاعى ٴبىر اقساقالمەن ۇيالشاق ٵرى تۇيىق بولىپ كورىنگەن ٴبىر ايەل باۋىرلاسقا بارادى. «ول تۇرمىسقا شىققانىنان كەيىن بىرنەشە جىلدان سوڭ كۇيەۋى قايتىس بولىپتى،— دەيدى ارتۋر.— قيىندىقتارعا قاراماي، ول ەكى قىزىن رۋحاني مىقتى ەتىپ وسىرگەن. ال ەندى، كوز جانارىنان ايىرىلا باستاپتى، ٵرى جانكۇيزەلىسىنەن قينالىپ ٴجۇر ەكەن. سوندا دا ونىڭ ەحوباعا دەگەن سۇيىسپەنشىلىگى مەن سەنىمى مىقتى. ٴبىز سول باۋىرلاستان ۇيرەنەرىمىز كوپ ەكەنىن بايقادىق» (ٴفىلىپ. 2:3). بۇل اۋداندىق باقىلاۋشى ەحوباعا ەلىكتەدى. ەحوبا ٶز قويلارىن، ولاردىڭ قانداي ازاپ شەگىپ جاتقانىن بىلەدى (مۇس. 2-ج. 3:7). اقساقالدار قاۋىمداعى قويلاردى جاقسى بىلسە، ولارعا قاجەتتى كومەك ۇسىنا الادى.
12. يەپ يي باۋىرلاس قاۋىمىنداعى ايەل باۋىرلاستى جاقسىراق تانىعانىنىڭ قانداي پايداسىن كوردى؟
12 قيتىعىڭىزعا تيەتىن باۋىرلاستى جاقىننان تانىساڭىز، وعان كوبىرەك جاناشىرلىقپەن قاراي الۋىڭىز مۇمكىن. ٴبىر مىسالدى قاراستىرايىق. ازيادا تۇراتىن يەپ يي باۋىرلاس بىلاي دەيدى: «قاۋىمداعى ٴبىر ايەل باۋىرلاس ايقايلاپ سويلەيتىن. ماعان ول ادەپتىلىكتەن جۇرداي بولىپ كورىنەتىن. ٴبىراق ونىمەن قىزمەتكە شىققان كەزدە، بۇرىن اتا-اناسىنا كومەكتەسۋ ٷشىن بازاردا بالىق ساتقانىن ٴبىلدىم. وعان تۇتىنۋشىلاردىڭ نازارىن اۋلاۋ ٷشىن قاتتى سويلەۋگە تۋرا كەلگەن ەكەن. سوندا مەن باۋىرلاستاردى جاقسى ٴتۇسىنۋ ٷشىن ولاردىڭ قانداي جاعدايلاردى باستان كەشكەنىن ٴبىلۋىم كەرەك ەكەنىن ۇقتىم». باۋىرلاستاردى جاقسىراق ٴبىلۋ كۇش سالۋدى تالاپ ەتەدى. ايتسە دە كيەلى كىتاپتىڭ كەڭەسىنە قۇلاق اسىپ، جۇرەگىڭىزدى ايقارا اشاتىن بولساڭىز، «ٵرتۇرلى ادامداردى» جاقسى كورەتىن ەحوباعا ەلىكتەيسىز (ٴتىم. 1-ح. 2:3، 4؛ قور. 2-ح. 6:11—13).
جاناشىرلىق تانىتىڭىز
13. مۇسانىڭ 1-جازباسى 19:15، 16 دا جازىلعانداي، لۇت كەتپەي ٴجۇرىپ العاندا، پەرىشتەلەر نە ىستەدى جانە نەگە؟
13 لۇت ٶمىرىنىڭ وتە ٴبىر ماڭىزدى شاعىندا ەحوبانىڭ نۇسقاۋلارىنا قۇلاق اسۋعا اسىقپادى. ەكى پەرىشتە كەلىپ، وعان وتباسىن سودومنان الىپ شىعۋدى ايتتى. نەلىكتەن؟ ولار: «ٴبىز بۇل جەردى جويماقپىز»،— دەدى (مۇس. 1-ج. 19:12، 13). كەلەسى كۇنى تاڭەرتەڭ لۇت وتباسىمەن ٵلى دە ۇيىنەن كەتپەگەن ەدى. سوندىقتان پەرىشتەلەر لۇتتى تاعى دا ەسكەرتتى. سوندا دا ول «كەتپەي ٴجۇرىپ الادى». ٴبىز لۇت ەحوبانىڭ ايتقاندارىن مۇلدەم ەلەمەدى دە، مويىنسۇنبادى دا دەپ ويلاۋىمىز مۇمكىن. الايدا ەحوبا وعان كومەكتەسۋدى دوعارمادى. «ەحوبانىڭ وعان جانى اشىعاندىقتان»، پەرىشتەلەر ولاردى قولدارىنان جەتەلەپ، قالانىڭ سىرتىنا شىعاردى (مۇسانىڭ 1-جازباسى 19:15، 16 وقىڭىز).
14. ەحوبا نە سەبەپتى لۇتقا جاناشىرلىق تانىتقان بولۋى مۇمكىن؟
14 ەحوبانىڭ لۇتقا جاناشىرلىق تانىتۋىنا بىرنەشە سەبەپ بولعان شىعار. ول قالا سىرتىنداعى ادامداردان قورىققاندىقتان ۇيىنەن تەز شىعىپ كەتپەگەن بولۋى مۇمكىن. وزگە دە قاۋىپتى جايتتار بار ەدى. سودومنىڭ ماڭىندا قاراماي شىعاتىن شۇڭقىرلار كوپ بولاتىن. لۇت سول شۇڭقىرلارعا ەكى پاتشانىڭ قۇلاپ تۇسكەنىن بىلگەن شىعار (مۇس. 1-ج. 14:8—12). وتاعاسى بولعاندىقتان ول وتباسىن ۋايىمداعان دا بولار. بۇعان قوسا، لۇت داۋلەتتى كىسى بولدى جانە سودومدا ونىڭ كەرەمەت ٷيى بار ەدى (مۇس. 1-ج. 13:5، 6). مۇنداي جايتتاردىڭ ەشبىرى لۇتتىڭ ەحوباعا بىردەن مويىنسۇنباعانىن اقتامايدى، ارينە. دەسە دە ەحوبا لۇتتىڭ قاتەلىكتەرىنە قادالىپ قالماي، ونى «ٵدىل كىسى» دەپ سانادى (پەت. 2-ح. 2:7، 8).
ادامدى تىڭداساق، وعان قالاي جاناشىرلىق تانىتۋعا بولاتىنىن تۇسىنەمىز (15، 16-ابزاستى قاراڭىز) *
15. ادامنىڭ ٸس-ارەكەتىنە قاراپ تۇجىرىم جاساۋدىڭ ورنىنا، نە ىستەگەنىمىز ٴجون؟
15 بىرەۋدىڭ ارەكەتىنە قاراپ، تۇجىرىم جاساۋدىڭ ورنىنا، ونىڭ نە سەزىنەتىنىن تۇسىنۋگە بارىنشا تىرىسىڭىز. ەۋروپادا تۇراتىن ۆەرونيكا باۋىرلاس تا ٴدال وسىلاي ەتۋگە تىرىسقان. «ٴبىر باۋىرلاستىڭ ۇنەمى كوڭىل-كۇيى بولمايتىن»،— دەيدى ول. «ول وزگەلەردەن وقشاۋلانىپ جۇرەتىن. كەيدە وعان جاقىنداۋعا قورقاتىنمىن. ٴبىراق ونىڭ ورنىندا بولسام، دوسقا مۇقتاج بولار ەدىم دەپ ويلادىم. سودان ونىڭ حال-جاعدايىن سۇراپ-بىلۋگە بەكىندىم. سوندا ول ىشكى سەزىمدەرىمەن بولىسە باستادى! قازىر مەن ونى الدەقايدا جاقسى تۇسىنەمىن»،— دەيدى ۆەرونيكا.
16. نەگە ٴبىز جاناشىرلىق تانىتۋعا كومەك سۇراپ دۇعا ەتۋىمىز كەرەك؟
16 تەك ەحوبا عانا ٴبىزدى تولىقتاي تۇسىنەدى (ناق. س. 15:11). سوندىقتان وزگەلەرگە ەحوبا سياقتى قاراۋعا جانە ولارعا قالاي جاناشىرلىق تانىتۋعا بولاتىنىن تۇسىنۋگە كومەكتەسۋىن سۇراپ دۇعا ەتىڭىز. انجەلا ەسىمدى باۋىرلاسقا دۇعا ەتكەنى جاناشىر بولا تۇسۋگە كومەكتەسكەن. وعان قاۋىمىنداعى ٴبىر ايەل باۋىرلاسپەن ٴتىل تابىسۋ قيىن بولعان ەكەن. ول بىلاي دەيدى: «مەن سول باۋىرلاستى ەش ويلانباستان سىناپ-مىنەپ، ودان اۋلاق جۇرەتىنمىن. ٴبىراق كەيىن مەن ەحوبادان سول باۋىرلاسقا جاناشىرلىق تانىتۋعا كومەكتەسۋىن سۇراپ، دۇعا ەتتىم». ەحوبا ونىڭ دۇعاسىنا جاۋاپ بەردى مە؟ «ٴبىز بىرگە قىزمەتكە شىعىپ، ساعاتتاپ سويلەستىك. مەن ونى جاناشىرلىقپەن تىڭدادىم. قازىر ونى كوبىرەك جاقسى كورەمىن، وعان كومەكتەسكىم كەلەدى»،— دەپ قوستى انجەلا.
17. نە ىستەۋگە بەكىنگەنىمىز ابزال؟
17 ٴبىز «مىنا باۋىرلاس جاناشىرلىق تانىتۋىما لايىق، ال مىناۋ لايىق ەمەس» دەپ تاڭداي المايمىز. ولاردىڭ بارلىعى ٴجۇنىس، ٸلياس، اجار جانە لۇت كەزىككەن قيىندىقتارعا كەزىگەدى. كوپ جاعدايدا ولار ساۋ باستارىنا ساقينا تىلەپ العان. شىندىعىنا كەلسەك، كەيدە ٴبارىمىز دە سولاي ەتىپ جاتامىز. سوندىقتان ەحوبادان ٴبىر-بىرىمىزگە تۇسىنۋشىلىك تانىتۋعا كومەكتەسۋىن سۇراعانىمىز ورىندى (پەت. 1-ح. 3:8). ەحوبانىڭ ٴتىلىن الساق، دۇنيەجۇزىلىك كەرەمەت ٵرى سان قيلى وتباسىمىزدىڭ اۋىزبىرشىلىگىنە ٶز ۇلەسىمىزدى قوسامىز. ەندەشە، ٶزارا اراقاتىناسىمىزدا باۋىرلاستاردى تىڭداۋعا، جاقىننان بىلۋگە جانە جاناشىرلىق تانىتۋعا بەكىنەيىك.
87-ٵن كەلىپ، سەرگىپ قالىڭدار!
^ 5-ابزاس كەمەلسىز بولعاندىقتان ٴبىز ادامدار مەن ولاردىڭ نيەتى جايلى بىردەن تۇجىرىم جاساۋعا بەيىمبىز. الايدا ەحوبا ادامنىڭ «جۇرەگىنە قارايدى» (سام. 1-ج. 16:7). بۇل ماقالادا ەحوبانىڭ جۇنىسكە، ٸلياسقا، اجارعا جانە لۇتقا مەيىرىممەن كومەكتەسكەنىن قاراستىرامىز. بۇل بىزگە باۋىرلاستارعا ەحوبا سياقتى قاراۋعا كومەكتەسەدى.
^ 52-ابزاس سۋرەتتەر سيپاتتاماسى: قاۋىمعا جاستاۋ باۋىرلاستىڭ كەشىگىپ كەلگەنى جاسى ۇلكەن ەر باۋىرلاستىڭ قيتىعىنا ٴتيدى. الايدا كەيىنىرەك ونىڭ كولىك اپاتىنا ۇشىراعاندىقتان كەشىككەنىن بىلەدى.
^ 54-ابزاس سۋرەتتەر سيپاتتاماسى: توپ باقىلاۋشىسى ٴبىر ايەل باۋىرلاستى سۋىق قاباق تانىتىپ وتىر دەپ ويلايدى. كەيىن ونىڭ ۇيالعانىن، جاقسى تانىمايتىن ادامداردىڭ اراسىندا ٶزىن ىڭعايسىز سەزىنگەنىن تۇسىنەدى.
^ 56-ابزاس سۋرەتتەر سيپاتتاماسى: ٴبىر ايەل باۋىرلاس پاتشالىق سارايىندا باسقا ايەل باۋىرلاستى كورىپ، ونى تۇيىق ٵرى وزگەلەرمەن شارۋاسى جوق ادام دەپ ويلايدى. كەيىن جاقسى تاني كەلە، ونىڭ ٶزى ويلاعانداي ەمەس ەكەنىن تۇسىنەدى.
