1. Usili musinke azi tu tantere Bibeli kuhamena Jehova?

OSE kapi atu yi hafere apa vantu ava tu pangura kuliza nosipapa setu ndi kuliza nomu sa fana sipara setu ndi omu rwa fana rutu rwetu. Yosili ayo kutuhafesa pokudiva asi Jehova kapi a tu pangura kuliza nomu ava tu mono vantu. Pasihonena, Jehova kwa tanterere Samwere asi gumwe govana vaIsayi yige nga kara hompa gwaIsraeli. Apa Samwere ga tere vana vaIsayi, age kapi ga mwene eyi ga tere Jehova. Apa ga mwene munwaIsayi gombeli Eliyaba, age kwa tente asi: “Nsene a panga ogu ana sikama apa kosipara saHOMPA ahuru yige googu ga horowora.” Eliyaba kwa monekere ngwendi yige nga kara hompa, “Nye HOMPA ta tantere Samwere asi: ‘Wa ha tara sihanga nomusika gomure, yeeyi kapisi yige ogo na horowora.’” Yisinke natu lirongera ko? Jehova kwa uyungire hena asi: “Muntu kumona eyi aga mono meho, nye HOMPA kumona momutjima.”—1 Sam. 16:1, 6, 7.

2. Kuliza naJohanesa 7:24, morwasinke natu dilira kupangura muntu kuliza nemoneko lyendi ? Yi fanekesa.

² Mokumona asi natuvenye kapi twa sikilira mo, ose pamwe kupangura wopeke kuliza nemoneko lyawo. (Resa Johanesa 7:24.) Nye apa atu tara vantu nomeho getu, ose kapi atu diva yoyinzi kuvahamena. Pasihonena, ndokotora ogu ga kara noudivi wounene kapi a diva eyi ana kuvera muntu pokumutara tupu nomeho. Nye nsene ana hara kudiva uvera wendi wanare nomu a lizuvhu, ntudi ga hepa kupurakena nawa kweyi ana kumutantera muveli. Ndokotora ogo kuvhura a tume hena muveli kefano li ka konakone monda zorutu rwendi. Nsene a dira kupurakena nawa komuveli, age kuvhura a mu pe nomutji depuko. Mokulifana, nose kapi ngatu kwata nawa egano ukaro wovanavazinyetu nsene tu tara tupu kemoneko lyawo. Twa hepa kuhetekera ko kukwata egano muntu gomonda. Yimo, ose kapi ta tu vhuru kudiva eyi ya kara momutjima  gomuntu, yipo nye ose kapi ngatu vhura kukwata nawa egano ukaro womuntu ngwendi Jehova. Nampili ngoso, twa hepa kukondja yipo tu honene Jehova. Ngapi natu yi rugana?

3. Yisinke natu ka lirongera ko koyihorokwa yomoBibeli eyi yina kara mosirongwa esi?

³ Ngapi omu Jehova a tekura vakareli vendi? Age kuvapurakena. Age kukwata egano ukaro wawo. Ntani age kuvafira nkenda. Ngomu natu ka lironga omu Jehova ga yi rugene oyo kwaJona, Eliya, Hagara ntani naRoto, konekeni omu natu honena Jehova monkedi omu natu tekura vanavazinyetu.

4. Yisinke ayi tu ninkisa tu gazare asi Jona nampo kwa kere muntu gomudona?

⁴ Kuliza nomutaro gwetu, kuvhura nampo tu tare Jona asi age kapi ga kere muntu gokuhuguvara ndi gomulimburukwi. Jehova kwa mu tanterere a ka divise mbudi zompanguro koNinivhe. Mevango lyokulimburukwa mpangera ozo, Jona kwa rondere sikepa esi sa zire kosirongo sa peke yipo “a duke HOMPA.” (Jona 1:1-3) Ngano nyove, ngano wa pere hena Jona mpito yipo a sikise mo situmbukira esi ga mu pere Jehova ndi? Nampo ngano kapi wa yi rugene. Nye Jehova kwa pere hena Jona mpito.—Jona 3:1, 2.

5. Yisinke ono lirongere ko kononkango da kara mwaJona 2:1, 2, 9, kuhamena Jona?

⁵ Apa Jona ga kanderere, age kwa yi likidire nawa-nawa asi age muntu musinke ga kere. (Resa Jona 2:1, 2, 9.) Jona nga kanderere kwaJehova yikando yoyinzi. Nye nonkango edi ga ruganesere mekanderero apa ga kere mezimo lyomfi, kulikida asi age kwa kere muntu gomuwa nampili ngomu ga dukire situmbukira esi va mu pere. Ado hena kulikida asi age kwa kere muntu gokulinunupika, gorupandu ntani ogu ga tokomenene kulimburukwa Jehova. Eyi yiyo nampo ya ninkisire Jehova a dire kudemenena komapuko gendi nye a limburure ekanderero lyendi nokutwikira kumuruganesa ngomuporofete.

6. Morwasinke ya karera nomulyo tu purakene nawa?

⁶ Nsene tuna hara kupurakena nawa wopeke, twa hepa kulinunupika nokulididimika. Tu tareni nokonda ntatu deyi natu yi ruganena. Zokuhova, Nsene tu purakena nawa wopeke ose kapi ngatu kara nomagano gepuko kuvahamena. Zauvali, ose ngatu kwata egano omu vana kulizuvha vanavazinyetu ntani neyi ava ruganene yininke monkedi zapeke, ano eyi ngayi tu vatera tu va likide nkenda. Zautatu, nsene tu purakena ngomu munazinyetu ana kupwagesa malizuvho gendi, ayo ngayi mu vatera a dimburure  yuma yongandi. Poyiruwo yimwe kapi atu kwata egano malizuvho getu, dogoro konyima zokugapwagesa. (Yis. 20:5) Mukuronambunga gumwe gomoAsia kwa tanta asi: “Sikando simwe, ame kwa hovere kuuyunga yininke na hana kupurakena tanko komauzera nagenye. Ame kwa tanterere munazinyetu gomukadi asi ga hepa kuwapukurura nkedi zendi zokugava malimbururo komapongo. Konyima, ame kwa ya dimbwilire asi munazinyetu ogo ga kara noudigu wokuresa ntani age kukondja yipo a gave elimbururo.” Ayo ya kara nomulyo kovakuronambunga “mokudiva mauzera” komeho zokugava mapukururo!—Yis. 18:13.

7. Yisinke natu lirongera ko kwaJehova monkedi omu ga tekwire Eliya?

⁷ Vanavazinyetu vamwe kuvadigopera kutantera wopeke omu vana kulizuvha morwa monkedi omu vava rera ndi mpo zawo ndi nampo yininke eyi ya va horokera meparu. Ngapi omu natu va vatera yipo va manguruke kututantera omu vana kulizuvha? Diworoka omu Jehova ga vaterere Eliya apa ga tjwayukire Jesebeli. Apo kwa pitire po mazuva gomanzi komeho Eliya a tantere Jehova kuhamena omu ga lizuvhire. Jehova ga mu purakenene nawa. Ntani age kwa korangedere Eliya ntani nokumupa a rugane sirugana somulyo. (1 Vah. 19:1-18) Poyiruwo yimwe, ayo kuvhura yi guse siruwo komeho vanavazinyetu va tu tantere omu vana kulizuvha. Nsene tu likida elididimiko ngwendi Jehova, awo ngava tu huguvara. Ano nsene vana hara kututantera omu vana kulizuvha, twa hepa kuva purakena nawa.

8. Kuliza naGenesis 16:7-13, ngapi omu Jehova ga vaterere Hagara?

⁸ Mupika gwaSarayi gedina Hagara kwa rugene ugova apa ga mu kwere Abiramu. Apa ga kere nomarutu gavali, age kwa tamekere kusandagura Sarayi ogu ga dilire kukara novana. Eyi kwa ninkisire Sarayi a mu tjide mo membo konyima. (Gen. 16:4-6) Kuliza nomutaro gosintu, kuvhura tu gazare asi Hagara kwa kere muntu gomudona ogu va hepere kutengeka. Nye Jehova kapi ga tere Hagara monkedi zangoso. Age kwa tumine muengeli gwendi kwaHagara. Apa muengeli ogo ga ka gwene Hagara, age kwa mu vaterere a rundurure nkareso zendi ntani kwa mu tungikire. Hagara ga yi dimbwilire asi Jehova ga mu mwene ntani ga divire ukaro wendi. Eyi kwa mu ninkisire a tante asi: “Ove Karunga ogu o mono!”—Resa Genesis 16:7-13.

9. Morwasinke Jehova ga tekwilire Hagara monkedi zongwa?

⁹ Yininke musinke ga divire Jehova kuhamena Hagara? Age ga divire eparu lyaHagara ntani nomaudigu aga ga ligwanekerere nago. (Yis. 15:3) Hagara kwa kere Muegipite ogu ga tungire membo lyoMuhebeli. Eyi nampo kwa mu ninkisire a lizuvhe ngwendi mugeni poyiruwo yimwe ntani age nampo nga diworoka epata lyawo nosirongo sawo. Ntani Abiramu kapisi yige gelike ga kwere. Posiruwo sanare, vagara vamwe wovalimburukwi kwa kwere masupareko. Nye Jehova kapisi yimo ga yi harerere ngoso apa ga sitire vantu wokuhova. (Mat. 19:4-6) Masupareko kwa retesere po mfudu ntani nkoko momapata. Jehova ga yi divire asi eyi ga rugene Hagara kwaSarayi kwa kere epuko. Nampili ngoso, age Jehova ga kwete egano ukaro waHagara nomu ga lizuvhire ano eyi kwa mu ninkisire a mu likide nkenda.

10. Yisinke natu rugana yipo tu dive nawa vanavazinyetu?

¹⁰ Ose kuvhura kuhonena Jehova, nsene tu hetekera ko kukwata egano ukaro wovanavazinyetu. Diva nawa vanavazinyetu. Zogera kumwe nawo komeho litameke epongo ntani konyima zepongo. Rugana kumwe nawo mokuzuvhisa ntani va zigida kembo lyoge mu ka lye kumwe. Nsene o yi rugana,  ove kuvhura o ya dimburure asi munazinyetu gomukadi ogu a moneka ngwendi kapi ga hara vantu, nampo kwa kara tupu nonomuga. Ntani kuvhura o ya dimburure asi munazinyetu gomugara ogu ga kara noyimaliwa yoyinzi kapi ga hara emona, nye age kwa hara kutambura vagenda. Ntani epata eli ali hulilire nkenye apa komapongo kuna kulididimikira marwaneso. (Joba 6:29) Kapi tuna hara kukara ngwendi vantu ava ava litura “mononkango da hana si dawo.” (1 Tim. 5:13) Nye ayo ya wapa kudiva vanavazinyetu neyi ya va pita, nsene tu yi rugana ayo ngayi tu vatera tu va kwate egano.

11. Morwasinke ya karera nomulyo kovakuronambunga va dive nawa vanavazinyetu?

¹¹ Vakuronambunga va hepa kudiva nawa vanavazinyetu. Koneka sihonena samunazinyetu gomugara gedina Artur, ogu ga kere mutareli gonombunga. Age kwa zire kumwe nomukuronambunga gumwe va ka dingure munazinyetu gomukadi ogu ga kara nonomuga. Artur kwa tanta asi: “Age kwa tu tanterere asi age kwa fisire mugara gwendi konyima tupu zapa va li kwere. Nampili ngomu ga ligwanekerere noudigu owo, age kwa vatera vana vendi wovakadona vavali yipo va hare Jehova nokumukarera. Ngesi age kapi a mono nawa, ntani kuvera uvera wokuguva-guva. Nye nampili ngoso, age kwa hara Jehova unene ntani ga kara nepuro lyokupama. Ose twa ya dimbwilire asi ose kapi twa divire nawa munazinyetu ogu gosihonena sosiwa.” (Fil. 2:3) Mutareli gonombunga ogu, kwa honenene Jehova. Jehova ga diva vakareli vendi wovalimburukwi ntani nomaudigu aga vana kuligwanekera nago. (Ex. 3:7) Nsene vakuronambunga va diva nawa vanavazinyetu, awo ngava diva omu ngava va vatera.

12. Ngapi omu munazinyetu Yip Yee ga gwanenene mo uwa apa ga ya divire nawa munazinyetu gomukadi gomombungakriste zawo?

¹² Nsene o hetekera ko kudiva nawa munazinyetu ogu ga kara nampo nonkareso ezi o dili kuhafera, ayo ngayi kutumangeda o mu fire nkenda. Koneka sihonena esi sina kukwama ko. Yip Yee ogu ga tunga moAsia kwa tanta asi: “Munazinyetu gomukadi gomombungakriste zetu, nga uyunga kuziguruka. Ame kwa gazarere asi age kwato nondunge. Nye apa na rugene nendi mokuzuvhisa, na ya dimbwilire asi age nga vatere vakurona vendi pokurandesa nomfi positanda. Yipo nye, age ga hepere kuzigira unene yipo a zigide varandi.” Yip Yee kwa tanta hena asi: “Ame kwa ya dimbwilire asi mokuninka asi ni kwate egano ukaro wovanavazinyetu, ntudi na hepa kuvadiva nawa.” Yosili, nsene tuna hara kudiva vanavazinyetu, twa hepa kurugana ko yuma. Ano nsene o kwama epukururo lyomoBibeli mokulikida  eharo vanavazinyetu, ove ngo honena Jehova ogu ga hara “vantu navenye.”—1 Tim. 2:3, 4; 2 Kol. 6:11-13.

13. Ngomu va yi tumbura mwaGenesis 19:15, 16, yisinke va rugene vaengeli apa Roto ga likatakatere ntani morwasinke?

¹³ Sikando simwe, Roto kapi ga limburukwire usimbu mavyukiso gaJehova. Vaengeli vavali ava va mu dingwire kwa mu tanterere asi a tunde mo moSodoma kumwe nepata lyendi. Vaengeli owo kwa tente asi: “Evega eli tatu li zonagura po.” (Gen. 19:12, 13) Nye Roto nepata lyendi kwa kere simpe membo lyawo ezuva lyokukwama ko. Ano vaengeli kwa rondwere hena Roto. Nye age kwa ‘likatakatere.’ Nampo kuvhura tu gazare asi Roto kapi ga kere nosinka kweyi ga mu tanterere Jehova ntani kapi ga kere mulimburukwi. Nye Jehova simpe ga twikilire ku mu vatera. Age kwa mu fililire nkenda, makura vaengeli tava mu kwata kokuwoko namukadendi novana vendi wovakadi vavali nokuvapwagesa mo mositata.—Resa Genesis 19:15, 16.

14. Yisinke nampo ya ninkisire Jehova a likide nkenda kwaRoto?

¹⁴ Pwa kara nokonda dononzi edi nampo da ninkisire Jehova a likide nkenda kwaRoto. Roto nampo kwa likatakatere kupwaga mo mositata morwa kwa tjilire vantu ava va kere ponze zositata. Pwa kere hena yiponga yimwe. Nampo Roto ga zuvhire hena kuhamena vahompa vavali ava va gwililire momuramba omu mwa kere manganganga. (Gen. 14:8-12) Ntani mokumona asi age kwa kere nturagumbo ntani ga kere novana, age ga kere nosinka kuhamena epata lyendi. Roto kwa kere ngawo, yipo nye age nampo ga kere nembo lyewa moSodoma. (Gen. 13:5, 6) Nampili ngoso, eyi ngano kapi ya ninkisire Roto a dire kulimburukwa Jehova. Nye Jehova kapi ga demenene komapuko gendi, nye age kwa mu tere asi age “muntu gomuhungami.”—2 Pet. 2:7, 8.

15. Yisinke twa hepa kurugana, mevango lyokupangura munazinyetu?

¹⁵ Mevango lyokupangura munazinyetu, hetekera ko kukwata egano omu ana kulizuvha. Munazinyetu gomukadi Veronica gomoEuropa nage yiyo a rugana. Age kwa  tanta asi: “Munazinyetu gumwe gomukadi kwa monekere ngwendi muntu gokuhandauka. Age nga kara gelike mevango lyokukara novakwawo. Poyiruwo yimwe, ame kwa kere nowoma wokuuyunga nage. Nye yipo na gazarere asi: ‘Ngano nyame nina kara moukaro wendi, ngano nani hepa muntu gumwe a kare kaume gwange.’ Yipo na tokwere kumupura omu ana kulizuvha. Makura yipo ga tanterere nge omu ga lizuvhire. Ngesi ame nina diva yoyinzi kumuhamena.”

16. Morwasinke natu kanderera kwaJehova a tu vatere tu tunge po sikara sonkenda?

¹⁶ Jehova yige gelike tupu gokuvhura kutukwata nawa egano. (Yis. 15:11) Yipo nye, kanderera kwendi a kuvatere o tare vantu ngwendi moomu ava tara age ntani yipo o dive omu no likida nkenda. Kukanderera kwa vaterere munazinyetu gomukadi gedina Anzhela a kare nonkenda. Mombungakriste zawo mwa kere munazinyetu gomukadi ogu nga dili kulizuvha novakwawo. Anzhela kwa tanta asi: “Ayo ngano ya karerere nge ureru kupangura munazinyetu ogo ntani nokuligora ko kwendi. Nye ame kwa kandererere kwaJehova a vatere nge ni kwate egano munazinyetu ogo.” Jehova ga limbwilire ekanderero lyaAnzhela ndi? Age kwa tanta hena asi: “Ose kwa rugene kumwe moyirugana yokuzuvhisa ntani konyima, ose kwa zogerere kumwe novili dongandi. Ame kwa mu purakenene nawa. Ame ngesi kwa mu hara unene ntani nina hara kutwikira kumuvatera.”

17. Yisinke tuna tokomene kurugana?

¹⁷ Kapi tatu vhuru kuhorowora asi munazinyetu musinke natu vhura kulikida nkenda. Vantu vamwe kwa fana ngwendi Jona, Eliya, Hagara naRoto. Awo nampo kuna kuligwanekera nomaudigu aga va liretera vene. Yosili, natuvenye nampo kwaligwanekera nomaudigu aga twa li retera nyamwetu. Eyi yiyo nye Jehova a tu tanterere tu lize mutjima gumwe tupu. (1 Pet. 3:8) Apa atu limburukwa Jehova, ayo kutuninkisa tu kare mouumwe kumwe novapuli vakwetu uzuni mudima. Yipo nye, tu tokomeneni kupurakena nokulironga ntani nokulikida nkenda kovanavazinyetu.