1. Liꞈ hpu hkʼaw Yaˬhoˉvaˬ htaꞈ caˉ daꞈ ve awˬ tehˬ ve ngaˬ hui htaꞈ hkʼaˬ hkʼe maˍ laˇ ve le?

 Nawˬ chaw hpu chaw naˆ maˇ heˆ leh mehˆ hpfuhˇ hkʼaˬ hkʼe hpehꞈ ve, shu dawˇ cheˆ laˇ ve htaꞈ dawˇ cawˇ˗aw laˇ? Maˇ dawˇ cawˇ taˬ. Yaˬhoˉvaˬ chaw yaˇ dawˇ ve hkʼe, ngaˬ hui htaꞈ maˇ dawˇ cheˆ ve shiˍ htaˇ ha lehˬ jaˇ! Tawˇ pa haˉ te kʼo, Saˍmo˗eˍlaˆ Yeˍsheˆ ve yaˇ htaꞈ nyi htaˇ, yawˇ Yaˬhoˉvaˬ nyi ve hkʼe maˇ nyi. Yaˬhoˉvaˬ Saˍmo˗eˍlaˆ htaꞈ kʼoˆ piˇ ve, Yeˍsheˆ ve yaˇ paˍ teˇ gʼaˇ Iˉsaˍreˍlaˆ ve jawˇ mawˇ gʼa te tuˬ yoˬ. Yaꞈ hkʼaˇ, hkʼaˬ ve teˇ gʼaˇ le? Saˍmo˗eˍlaˆ yaˇ paˍ uiˍ Eˇlaˍbaˆ htaꞈ gʼa mawˬ ve yoˬ. Yawˇ kʼoˆ ve, “chaw chi hpaˇ lehˬ, [Yaˬhoˉvaˬ] leuˆ yuˬ taˍ ve chaw hpehꞈ ve yoˬ.” Nyi˗a kʼo, Eˇlaˍbaˆ jawˇ mawˇ te keunˍ ve yoˬ. “Gʼuiˬ sha yawˇ htaꞈ kʼoˆ piˇ ve, awˬ to mvuh leh awˬ hkiˇ awˬ naˬ daꞈ ve htaꞈ nawˬ taˇ nyi. Ngaˬ yawˇ htaꞈ leuˆ yuˬ taˍ ve maˇ heˆ.” Ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ kʼoˆ ve, “chaw yaˇ lehˬ, awˬ htaꞈ hpawˇ ve awˬ hkiˇ awˬ naˬ htaꞈ ceh nyi ve yoˬ. Yaꞈ hkʼaˇ, [Yaˬhoˉvaˬ] lehˬ, nyi ma htaꞈ nyi ve yoˬ.”—1 Saˍmo˗eˍlaˆ 16:1, 6, 7.

2. Yoˇhanˬ liꞈ 7:24 hkʼaw kʼoˆ taˍ ve hkʼe, aˬ htoꞈ ma te ngaˬ hui shu htaꞈ awˬ htaꞈ hpawˇ ceh nyi leh maˇ dawˇ cheˆ cawˇ ve le? Kʼoˆ maˍ laˇ sheˍ.

² Ngaˬ hui maˇ biˇ ve chaw hpehꞈ leh shu htaꞈ awˬ htaꞈ hpawˇ ceh nyi leh dawˇ cheˆ gaˇ puiˉ ve yoˬ. (Yoˇhanˬ 7:24 gʼaw sheˍ.) Yaꞈ hkʼaˇ, ngaˬ hui awˬ htaꞈ hpawˇ ceh nyi ve kʼo, hkʼa dehꞈ maˇ shiˍ gʼa. Tawˇ pa haˉ te kʼo, Saˍ laꞈ gʼonˍ cheuˬ jaˇ ve htawˇ chaw naˬ htaꞈ awˬ htaꞈ hpawˇ ceh nyi ve kʼo, hkʼaˬ hkʼe naˬ ve maˇ shiˍ gʼa. Chaw naˬ hkʼaˬ hkʼe naˬ ve, chi teˇ hkui hkʼaˬ hkʼe kʼai ve, leh hkʼaˬ hkʼe te naˬ ve, saˍ laꞈ gʼonˍ hkʼa dehꞈ gʼa na nyi ve yoˬ. Chaw naˬ awˬ hkʼaw hpawˇ hkʼaˬ hkʼe hpehꞈ ve shiˍ tuˬ teˇ pawˆ pawˆ kʼo, daˆ dawˆ nyi ve yoˬ. (X˗ray) Saˍ laꞈ gʼonˍ awˬ hkʼaˇ chi ve teˇ hpaˍ maˇ te ve kʼo, a naˍ tehˆ maˇ gʼa. Chi ve hkʼa shuˍ shuˍ ngaˬ hui awˬ viˉ awˬ nyi htaꞈ awˬ htaꞈ hpawˇ ceh nyi ve kʼo, maˇ shiˍ gʼa. Yawˇ hkʼaˬ hkʼe ve chaw hpehꞈ  ve ngaˬ hui hkʼa dehꞈ gʼa chaˬ nyi cawˇ ve yoˬ. Yaˬhoˉvaˬ hkʼe taw ngaˬ hui shu ve nyi ma htaꞈ maˇ shiˍ gʼa. Yaꞈ hkʼaˇ, Gʼuiˬ sha htaꞈ henˇ yuˬ tuˬ ngaˬ hui gʼa coˇ caˇ ve yoˬ. Chi ve ngaˬ hui hkʼaˬ hkʼe te gʼa tuˬ le?

3. Awˬ lawn chi ve ngaˬ hui henˇ htaˇ, Liꞈ hpu hkʼaw ve awˬ lawn Yaˬhoˉvaˬ htaꞈ henˇ yuˬ gʼa tuˬ hkʼaˬ hkʼe maˍ laˇ ve le?

³ Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe te piˇ ve le? Gʼuiˬ sha lehˬ yawˇ hui ve hkawˇ na piˇ ve yoˬ. Yawˇ hui hpehꞈ laˬ jaw ve leh hpehꞈ chehˇ ve htaꞈ Gʼuiˬ sha dawˇ nyi leh ha kʼaˉ piˇ ve yoˬ. Yaˬhoˉvaˬ Yoˇnaˆ, Eˇliˇyaꞈ, Haˍgaˍraˆ, leh Lawˇtaˍ, htaꞈ ga piˇ ve awˬ lawn ngaˬ hui henˇ htaˇ, awˬ viˉ awˬ nyi htaꞈ ngaˬ hui ga piˇ htaˇ, Yaˬhoˉvaˬ htaꞈ hkʼaˬ hkʼe henˇ yuˬ gʼa ve teˇ geh nyi sheˍ.

4. Aˬ htoꞈ ma te ngaˬ hui Yoˇnaˆ htaꞈ maˇ daꞈ ve hpawˇ dawˇ ve le?

⁴ Yoˇnaˆ htaꞈ caˉ daꞈ ve hkʼa peu˗eˬ ngaˬ hui maˇ shiˍ. Yawˇ maˇ yonˍ gʼa ve chaw hpehꞈ leh ka tiꞈ maˇ yeˬ ve tehꞈ ngaˬ hui dawˇ ve yoˬ. Yaˬhoˉvaˬ Niˇnaˍveˍ venˇ lonˉ htaꞈ suhˉ jehˬ piˇ tuˬ ve awˬ lawn Yoˇnaˆ htaꞈ ca kʼoˆ piˇ tcuh ve yoˬ. Yaꞈ hkʼaˇ, yawˇ Yaˬhoˉvaˬ hkawˇ na yuˬ cawˇ ve htawˇ, haw loꞈ kʼoˍ ciˇ leh “teˇ hpawˇ lo hpaw˗e ve yoˬ.” (Yoˇnaˆ 1:1-3) Nawˬ hpehꞈ ve kʼo, Yoˇnaˆ htaꞈ awˬ yanˇ kʼawꞈ piˇ˗aw laˇ? Maˇ piˇ taˬ hehˉ. Yaꞈ hkʼaˇ, Yaˬhoˉvaˬ yawˇ htaꞈ kanˉ chi ve kʼawꞈ te tcuh sheˍ.—Yoˇnaˆ 3:1, 2.

5. Yoˇnaˆ liꞈ 2:1, 2, 9 hkʼaw kʼoˆ taˍ ve hkʼe, Yoˇnaˆ ve bon lawˬ hkawˇ ngaˬ hui htaꞈ hkʼaˬ hkʼe maˍ laˇ gʼa ve le?

⁵ Yoˇnaˆ hkʼaˬ hkʼe ve chaw hpehꞈ ve yawˇ bon lawˬ ve htaꞈ ngaˬ hui shiˍ ve yoˬ. (Yoˇnaˆ 2:1, 2, 9 gʼaw sheˍ.) Yoˇnaˆ bon laiˉ pawˆ lawˬ ve htawˇ, yawˇ awˬ vuiˬ htaꞈ ceh hpaw˗e ve maˇ heˆ tehꞈ bon lawˬ hkawˇ chi ngaˬ hui na gʼa ve yoˬ. Yoˇnaˆ nyi ma nuˇ nehˬ ve, awˬ bon htaꞈ shiˍ ve, leh Yaˬhoˉvaˬ hkawˇ hkʼa dehꞈ na ve, yawˇ ve bon lawˬ hkawˇ hkʼaw hpeuꞈ maw laˇ ve yoˬ. Yaˬhoˉvaˬ Yoˇnaˆ ve yaꞈ kuiˬ htaꞈ maˇ nyi ve, yawˇ ve bon lawˬ hkawˇ htaꞈ hkʼawꞈ piˇ ve, yawˇ htaꞈ caˉ leh tcuh kaˍ paˍ te tcuh ve ngaˬ hui anˇ tuˬ maˇ loˍ!

6. Aˬ htoꞈ ma te shu hkawˇ hkʼa dehꞈ na ve awˬ hpfuhˇ hkʼawꞈ jaˇ ve le?

⁶ Ngaˬ hui shu ve hkawˇ hkʼa dehꞈ na tuˬ, nyi ma nuˇ nehˬ leh gʼa yeunˇ hkanˍ ve yoˬ. Hkʼa dehꞈ na ve awˬ hpfuhˇ hkʼawꞈ jaˇ ve 3 hkʼaˇ cawˬ ve yoˬ. Awˉ lawˉ teˇ hkʼaˇ lehˬ, ngaˬ hui awˬ viˉ awˬ nyi htaꞈ laꞈ haˆ maˇ dawˇ cheˆ piˇ leh na gʼa ve kʼo, maˇ dawˇ yaꞈ tuˬ ga laˇ ve yoˬ. Nyiˇ hkʼaˇ lehˬ, ngaˬ hui awˬ viˉ awˬ nyi te ve dawˇ ve htaꞈ na gʼa ve kʼo, ha kʼaˉ puiˉ ve chaw hpehꞈ tuˬ ga laˇ ve yoˬ. Shehˆ hkʼaˇ lehˬ, awˬ viˉ awˬ nyi a shu yawˇ awˬ to htaꞈ na gʼa tuˬ ngaˬ hui ga piˇ gʼa ve yoˬ. Teˇ pawˆ pawˆ kʼo, a shu yawˇ awˬ  to hkʼaˬ hkʼe dawˇ ve maˇ na gʼa ve pa taw, kʼoˆ maˍ laˇ htaˇ hehꞈ na gʼa ve yoˬ. (Tawˇ naˉ ve 20:5) Aˍshaˆ miˬ guiˬ lo nyi haꞈ shaˉ paˍ teˇ gʼaˇ kʼoˆ ve, “ngaˬ maˇ na sheˍ htaˇ awˉ lawˉ kʼoˆ ve pa taw, teˇ pawˆ kʼoˆ yaꞈ jaw ve yoˬ. Awˬ viˉ awˬ nyi yaˇ miˇ teˇ gʼaˇ hpawnˬ daꞈ kuiˬ hkʼaw hkʼawꞈ ve a ciˉ gu cawˇ ve tehꞈ ngaˬ kʼoˆ piˇ ve yoˬ. Yawˇ liꞈ gʼaw ve leh hkʼawꞈ tuˬ teˇ pawˆ le le gʼa coˇ caˇ jaˇ ve tehꞈ ngaˬ shiˍ la ve yoˬ.” Nyi haꞈ shaˉ paˍ teˇ gʼaˇ le le shu htaꞈ maˇ beˆ maˍ piˇ sheˍ htaˇ, “hkʼa dehꞈ na sheˍ” htaˇ hehꞈ beˆ maˍ piˇ cawˇ ve a yeˇ uiˍ jaˇ tehꞈ ngaˬ hui shiˍ ve yoˬ!—Tawˇ naˉ ve 18:13.

7. Yaˬhoˉvaˬ Eˇliˇyaꞈ htaꞈ te piˇ ve nawˬ htaꞈ aˬ htoꞈ ma maˍ laˇ ve le?

⁷ Hpehꞈ laˬ jaw ve, chaw liˇ vaˇ liˇ, maˇ heˆ leh te hkʼaˇ dawˇ hkʼaˇ htaꞈ pa taw, awˬ viˉ awˬ nyi teˇ hpaˍ hpaˍ awˬ pon kʼo, a shu yawˇ ve dawˇ hkʼaˇ kʼoˆ tuˬ sha ve maˇ heˆ. Yawˇ ngaˬ hui geh tawˇ yaw laˇ tuˬ hkʼaˬ hkʼe ga piˇ gʼa tuˬ le? Eˇliˇyaꞈ Yeˍsaˍbeˍlaˆ htaꞈ hpaw˗e htaˇ, Yaˬhoˉvaˬ hkʼaˬ hkʼe te ve htaꞈ dawˇ nyi sheˍ. Eˇliˇyaꞈ yawˇ ve dawˇ hkʼaˇ kʼoˆ tawˆ la tuˬ awˬ yanˇ laiˉ nyi gʼa yehˇ ve yoˬ. Yaˬhoˉvaˬ Eˇliˇyaꞈ ve hkawˇ hkʼa dehꞈ na piˇ ve pa taw, yawˇ Eˇliˇyaꞈ htaꞈ awˬ gʼaˇ piˇ leh a yeˇ uiˍ ve awˬ vuiˬ piˇ ve yoˬ. (1 Jawˇmawˇ 19:1-18) Awˬ viˉ awˬ nyi teˇ hpaˍ hpaˍ awˬ pon kʼo, yawˇ ve dawˇ hkʼaˇ ngaˬ hui htaꞈ kʼoˆ maˍ laˇ tuˬ awˬ yanˇ gʼa yehˇ maw ve yoˬ. Yaꞈ hkʼaˇ, chi ve teˇ hkʼaˇ ceh tiˉ yawˇ hkʼaˬ hkʼe dawˇ ve ngaˬ hui na gʼa tuˬ yoˬ. Chi htaꞈ pa taw, ngaˬ hui Yaˬhoˉvaˬ htaꞈ henˇ yuˬ leh yeunˇ hkanˍ ve kʼo, awˬ viˉ awˬ nyi kaꞈ ngaˬ hui htaꞈ yonˍ gʼa tuˬ yoˬ. Yawˇ hkʼaˬ hkʼe dawˇ ve kʼoˆ maˍ laˇ htaˇ, ngaˬ hui hkʼa dehꞈ na cawˇ ve yoˬ.

8. Awˬ hkuiˉ puiˍ liꞈ 16:7-13 hkʼaw kʼoˆ taˍ ve hkʼe, Yaˬhoˉvaˬ Haˍgaˍraˆ htaꞈ hkʼaˬ hkʼe ga piˇ ve le?

⁸ Saˍrehˇ ve awˬ ceˬ ma Haˍgaˍraˆ Aˍbranˍ ve awˬ miˇ ma hpehꞈ leh yaˇ hu hkʼawꞈ nawˉ Saˍrehˇ htaꞈ maˇ shawˍ maˇ caˆ te piˇ ve yoˬ. Chi hkʼe hpehꞈ ve pa taw Haˍgaˍraˆ Saˍrehˇ geh maˇ chehˇ˗o. (Awˬ hkuiˉ puiˍ 16:4-6) Ngaˬ hui maˇ biˇ ve chaw hpehꞈ ve pa taw, Haˍgaˍraˆ maˇ daꞈ leh ciˍ yanˍ keunˍ ve tehꞈ dawˇ la ve yoˬ. Yaꞈ hkʼaˇ, Yaˬhoˉvaˬ chi hkʼe maˇ dawˇ. Gʼuiˬ sha mvuhˇ naw ma tcuh yaˇ yawˇ geh kʼai tcuh ve, yawˇ ve dawˇ hkʼaˇ pa tcuh ve, leh awˬ bon naꞈ piˇ ve yoˬ. Yaˬhoˉvaˬ yawˇ htaꞈ nyi chehˇ leh yawˇ hkʼaˬ hkʼe gʼa hpuˇ ve htaꞈ shiˍ ve tehꞈ yawˇ dawˇ ve yoˬ. Yawˇ ha lehˬ jaˇ leh kʼoˆ ve, “mawˬ puiˉ ve Gʼuiˬ sha” lehˬ ngaˬ htaꞈ kaꞈ mawˬ ve yoˬ.—Awˬ hkuiˉ puiˍ 16:7-13 gʼaw sheˍ.

9. Gʼuiˬ sha Haˍgaˍraˆ htaꞈ te piˇ htaˇ yawˇ aˬ htoꞈ ma htaꞈ dawˇ nyi ve le?

⁹ Haˍgaˍraˆ htaꞈ Yaˬhoˉvaˬ hkʼaˬ hkʼe dawˇ ve le? Yawˇ aˬ htoꞈ ma gʼa hpuˇ leh aˬ htoꞈ ma htaꞈ gʼa yeunˇ hkanˍ ve Gʼuiˬ sha shiˍ ve yoˬ. (Tawˇ naˉ ve 15:3) Haˍgaˍraˆ lehˬ Eˇjiˇtuꞈ chaw hpehꞈ leh Heˍbrehˇ chaw ve yehˬ hkʼaw chehˇ ve yoˬ. Yawˇ awˬ nu ve chaw hpehꞈ ve tehꞈ dawˇ˗aw laˇ? Yawˇ ve yehˬ kʼa hkʼaw ve chaw maˇ heˆ leh yawˇ chehˇ kuiˬ htaꞈ dawˇ nawˇ˗aw laˇ? Chi hkʼoˆ kaꞈ yawˇ Aˍbranˍ ve awˬ miˇ ma teˇ gʼaˇ tiˉ hpehꞈ ve maˇ heˆ. Awˬ yanˇ teˇ yanˇ htaˇ, Gʼuiˬ sha ve kanˉ te ve ka tiꞈ yeˬ ve chaw awˬ miˇ ma laiˉ gʼaˇ cawˬ ve yoˬ. Yaꞈ hkʼaˇ, chi awˉ lawˉ htaˇ Yaˬhoˉvaˬ dawˇ law taˍ ve hkʼe maˇ heˆ. (Maꞈhtehˍ 19:4-6) Chi htaꞈ pa taw, yehˬ kʼa hkʼaw hkawehˉ ve maˇ heˆ leh nyi bawˬ daꞈ ve chi anˇ tuˬ maˇ loˍ. Haˍgaˍraˆ Saˍrehˇ htaꞈ maˇ yawˆ yan piˇ ve, cawˇ ve tehꞈ Yaˬhoˉvaˬ maˇ kʼoˆ ve htawˇ, Haˍgaˍraˆ hpehꞈ laˬ jaw ve leh hpehꞈ chehˇ ve htaꞈ Yaˬhoˉvaˬ na gʼa ve tehꞈ ngaˬ hui yonˍ ve yoˬ.

10. Ngaˬ hui awˬ viˉ awˬ nyi htaꞈ hkʼaˬ hkʼe te hkʼa dehꞈ shiˍ daꞈ gʼa tuˬ le?

¹⁰ Ngaˬ hui Yaˬhoˉvaˬ htaꞈ henˇ yuˬ leh awˬ viˉ awˬ nyi htaꞈ hkʼa dehꞈ na gʼa piˇ cawˇ ve yoˬ. Ngaˬ hui awˬ viˉ awˬ nyi htaꞈ hkʼa dehꞈ shiˍ daꞈ tuˬ, hpawnˬ daꞈ ve maˇ tanˬ sheˍ htaˇ leh hpehˇ htaˇ  tawˇ yaw daꞈ cawˇ ve yoˬ. Teˇ geh hto toˇ˗e ve, leh te gʼa ve kʼo awˍ teˇ geh caˇ tuˬ jehˬ piˇ ve yoˬ. Nawˬ chi hkʼe te ve kʼo, awˬ viˉ awˬ nyi yaˇ miˇ shu geh awˬ chawˇ hkʼa dehꞈ maˇ te ve, awˬ tehˬ kʼo yaꞈ taw puiˉ jaˇ ve tehꞈ nawˬ shiˍ ve yoˬ. Awˬ viˉ awˬ nyi hawˉ hkʼaˆ paw sha ve chaw awˬ tehˬ kʼo, yawˇ hpu shi mawˇ jeˬ htaꞈ gʼaꞈ ca ve maˇ heˆ. Pehˬ piˇ gaˇ puiˉ ve yoˬ. Yehˬ kʼa teˇ yehˬ kʼa hpawnˬ daꞈ kuiˬ lo laiˉ pawˆ laˬ naiˇ ve, awˬ tehˬ kʼo tawˍ piˇ ve htaꞈ yeunˇ hkanˍ chehˇ ve yoˬ. (Yawˇbaˆ 6:29) Awˬ tehˬ yoˬ, “maˇ caˉ daꞈ ve shu te kuiˬ htaꞈ ca shoꞈ shaꞈ piˇ ve chaw” ngaˬ hui maˇ gʼa hpehꞈ cawˇ. (1 Tiˆmoˉseˍ 5:13) Awˬ viˉ awˬ nyi htaꞈ hkʼa dehꞈ shiˍ tuˬ, yawˇ hui ve a shaꞈ teꞈ hkʼaˇ leh yawˇ hui ve awˬ lawn htaꞈ na gʼa piˇ ve kʼo, daꞈ ve yoˬ.

11. Nyi haꞈ shaˉ paˍ yawˬ htaꞈ hkʼa dehꞈ shiˍ tuˬ aˬ htoꞈ ma te a yeˇ uiˍ jaˇ ve le?

¹¹ Nyi haꞈ shaˉ paˍ yawˇ haꞈ shaˉ ve awˬ viˉ awˬ nyi htaꞈ hkʼa dehꞈ shiˍ daꞈ tuˬ gʼa te ve yoˬ. Toˇ nyi shehˍ hpaˇ Aˬdonˬ ve awˬ lawn htaꞈ teˇ geh dawˇ nyi sheˍ. Toˇ nyi shehˍ hpaˇ leh nyi haꞈ shaˉ paˍ awˬ viˉ awˬ nyi yaˇ miˇ geh ca guiˇ˗e leh yawˇ yaꞈ tawˍ puiˉ leh shu geh maˇ meuˆ daꞈ ve htaꞈ yawˇ huiˉ maˬ shiˍ ve yoˬ. Aˬdonˬ kʼoˆ ve, “yawˇ heuˆ daꞈ peuˬ hkʼawꞈ nawˉ maˇ maw awˬ hpawˇ suh˗e ve ngaˬ hui shiˍ la ve yoˬ. Yawˇ ve a shaꞈ teꞈ hkʼaˇ tuꞈ hkanˍ jaˇ ve htawˇ, yawˇ ve yaˇ miˇ nyiˇ gʼaˇ uiˍ la leh co ha hpawˇ kaꞈ uiˍ la mvuh la ve yoˬ. Chi teˇ hkui yawˇ mehˆ hkʼa dehꞈ maˇ mawˬ leh dawˇ maˇ ve a naˍ kaꞈ hpehꞈ ve yoˬ. Yaꞈ hkʼaˇ, yawˇ Yaˬhoˉvaˬ htaꞈ haꞈ leh yawˇ ve yonˍ hkʼaˇ kaꞈ yonˍ yeˬ chehˇ sheˍ. Yawˇ ve awˬ lawn ngaˬ hui htaꞈ laiˉ ceuˬ maˍ laˇ ve yoˬ.” (Hpiˇliˇpiˆ 2:3) Toˇ nyi shehˍ hpaˇ chi ve teˇ gʼaˇ Yaˬhoˉvaˬ htaꞈ henˇ yuˬ ve yoˬ. Yaˬhoˉvaˬ yawˇ ve yawˬ hkʼaˬ hkʼe taw naˬ ve htaꞈ yawˇ hkʼa dehꞈ shiˍ ve yoˬ. (Tawˆ kʼai ve 3:7) Nyi haꞈ shaˉ paˍ yawˬ htaꞈ hkʼa dehꞈ shiˍ ve kʼo, nyi haꞈ shaˉ piˇ gʼa ve yoˬ.

12. Awˬ viˉ awˬ nyi Yeˇyeˬ Hkriꞈ yaˇ awˬ moˍ hkʼaw ve chaw htaꞈ shiˍ daꞈ tuˬ te htaˇ awˬ bon hkʼaˬ hkʼe gʼa ve le?

¹² Nawˬ maˇ dawˇ cawˇ ve awˬ viˉ awˬ nyi hpehꞈ laˬ jaw ve htaꞈ nawˬ shiˍ htaˇ, nawˬ yawˇ hui htaꞈ ha kʼaˉ tuˬ yoˬ. Aˍshaˆ miˬ guiˬ lo ve awˬ viˉ awˬ nyi Yeˇyeˬ ve awˬ lawn htaꞈ teˇ geh nyi sheˍ. Yawˇ kʼoˆ ve, “Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ teˇ gʼaˇ tawˇ yaw hehnˇ jaˇ. Yawˇ maˇ yawˆ yan puiˉ tehꞈ ngaˬ dawˇ ve yoˬ. Yawˇ ve awˬ pa awˬ e tcuh hkʼaw lo ngaˇ hawˇ htaˇ shu vuiˬ la tuˬ gʼaˇ hteꞈ gʼa kuˬ hawˇ ve htaꞈ yawˇ kaꞈ ga piˇ jaw ve pa taw, yawˇ ve awˬ lawn teˇ geh hto toˇ˗e htaˇ ngaˬ shiˍ la ve yoˬ.” Yeˇyeˬ kʼawꞈ kʼoˆ ve, “ngaˬ awˬ viˉ awˬ nyi htaꞈ na gʼa tuˬ yawˇ htaꞈ hkʼa dehꞈ gʼa shiˍ daꞈ ve yoˬ.” Awˬ viˉ awˬ nyi htaꞈ hkʼa dehꞈ shiˍ daꞈ tuˬ gʼa te ve yoˬ. Yaꞈ hkʼaˇ, Liꞈ hpu hkʼaw beˆ maˍ laˇ ve htaꞈ nawˬ gʼaꞈ te ve kʼo, Yaˬhoˉvaˬ “chaw hkʼa  peu˗eˬ” htaꞈ haꞈ ve nawˬ kaꞈ henˇ yuˬ chehˇ ve yoˬ.—1 Tiˆmoˉseˍ 2:3, 4; 2 Kawˇrenˍhtuˆ 6:11-13.

13. Awˬ hkuiˉ puiˍ liꞈ 19:15, 16 hkʼaw kʼoˆ taˍ ve hkʼe, Lawˇtaˍ haˆ haˆ maˇ te htaˇ mvuhˇ naw ma tcuh yaˇ aˬ htoꞈ ma te piˇ ve le?

¹³ Kawˆ tuˬ uiˍ jaˇ ve awˬ yanˇ htaˇ, Lawˇtaˍ Yaˬhoˉvaˬ hkawˇ na yuˬ tuˬ haˆ haˆ maˇ te. Oˇ ve teˇ yanˇ mvuhˇ naw ma tcuh yaˇ nyiˇ gʼaˇ Lawˇtaˍ geh laˬ leh yawˇ ve yehˬ kʼa Sawˉdonˍ venˇ lo shiˍ tawˆ˗e tuˬ kʼoˆ piˇ ve yoˬ. Aˬ htoꞈ ma pa taw le? Mvuhˇ naw ma tcuh yaˇ kʼoˆ ve, “venˇ chi htaꞈ te luˬ piˇ tuˬ” awˬ yanˇ gaˬ˗oˬ. (Awˬ hkuiˉ puiˍ 19:12, 13) Lawˇtaˍ lehˬ yawˇ ve yehˬ hkʼaw chehˇ sheˍ. Mvuhˇ naw ma tcuh yaˇ shaˍ tiꞈ kʼawꞈ piˇ ve htawˇ, “yawˇ haˆ haˆ maˇ te.” Lawˇtaˍ a yeˇ maˇ te leh Yaˬhoˉvaˬ hkawˇ maˇ na ve tehꞈ ngaˬ hui dawˇ ve yoˬ. Yaꞈ hkʼaˇ, Gʼuiˬ sha yawˇ htaꞈ dawˇ law chehˇ sheˍ. “[Yaˬhoˉvaˬ] yawˇ hui htaꞈ ha kʼaˉ ve pa taw” mvuhˇ naw ma tcuh yaˇ oˇ ve nyiˇ gʼaˇ yawˇ hui ve laꞈ sheh htaꞈ gʼawˬ veu leh venˇ baˬ lo hkʼa gaˬ sheh tawˆ la piˇ ve yoˬ.—Awˬ hkuiˉ puiˍ 19:15, 16 gʼaw sheˍ.

14. Aˬ htoꞈ ma te Yaˬhoˉvaˬ Lawˇtaˍ htaꞈ ha kʼaˉ ve le?

¹⁴ Lawˇtaˍ htaꞈ Yaˬhoˉvaˬ ha kʼaˉ ve laiˉ ceuˬ cawˬ ve yoˬ. Yawˇ venˇ baˬ lo ve chaw htaꞈ kawˆ ve pa taw yehˬ hkʼaw tawˆ˗e tuˬ, htawˇ dawˇ nawˬ dawˇ cawˬ ve yoˬ. Miˬ tawˬ kuiˬ chi awˬ hkʼaw lo, awˬ tcuhˇ tawˆ ve awˬ hkʼoꞈ hkʼa biˇ cawˬ leh jawˇ mawˇ nyiˇ gʼaˇ je loꞈ˗e ve Lawˇtaˍ gʼa kaˇ jaw ve pa taw kawˆ ve yoˬ. (Awˬ hkuiˉ puiˍ 14:8-12) Lawˇtaˍ awˬ hpawˇ leh awˬ pa hpehꞈ ve yoˬ. Hkʼe te leh, yawˇ yehˬ kʼa htaꞈ dawˇ haˍ jaˇ. Chi hkʼoˆ kaꞈ, Lawˇ taˍ paw sha jaˇ. Sawˉdonˍ venˇ lo yawˇ cawˬ ve mawˇ leh yehˬ htaꞈ dawˇ haˍ ve yoˬ. (Awˬ hkuiˉ puiˍ 13:5, 6) Lawˇtaˍ Yaˬhoˉvaˬ hkawˇ laꞈ haˆ maˇ na yuˬ tuˬ awˬ ceuˬ chi teˇ hpaˍ htaꞈ maˇ dawˇ nyi cawˇ. Yaꞈ hkʼaˇ, Lawˇtaˍ te yaꞈ ve htaꞈ Yaˬhoˉvaˬ maˇ nyi leh yawˇ “hteˇ ve cawˇ ve” chaw hpehꞈ ve tehꞈ Yaˬhoˉvaˬ shawˍ ve yoˬ. —2 Peˍtruˆ 2:7, 8.

15. Awˬ viˉ awˬ nyi te ve htaꞈ ngaˬ hui dawˇ cheˆ piˇ ve aꞈ kehˉ aˬ htoꞈ ma te cawˇ ve le?

¹⁵ Shu te ve htaꞈ ngaˬ hui dawˇ cheˆ piˇ ve aꞈ kehˉ yawˇ hkʼaˬ hkʼe dawˇ ve htaꞈ ngaˬ hui gʼa na gʼa piˇ ve yoˬ. Uˉyawˉpaˆ lo chehˇ ve awˬ viˉ awˬ nyi Ve˗lo˗ni˗kaˬ chi hkʼe te ve yoˬ. Yawˇ kʼoˆ ve,  “awˬ viˉ awˬ nyi yaˇ miˇ teˇ gʼaˇ nyi ma maˇ daꞈ leh shu geh maˇ meuˆ daꞈ gaˇ. Teˇ pawˆ pawˆ yawˇ geh tawˇ ca yaw daꞈ tuˬ ngaˬ kaꞈ kawˆ ve yoˬ. Yaꞈ hkʼaˇ, ‘ngaˬ nawˬ hpehꞈ ve kʼo awˬ chawˇ teˇ gʼaˇ cawˬ gaˇ ve’ tehꞈ dawˇ ve yoˬ. Nawˬ hkʼaˬ hkʼe kʼai le tehꞈ ngaˬ yawˇ htaꞈ na piˇ tuˬ dawˇ cheˆ ve yoˬ. Peuˬ leh yawˇ ngaˬ htaꞈ tawˇ yaw laˇ ve yoˬ. Chi teˇ hkui yawˇ hkʼaˬ hkʼe dawˇ ve ngaˬ hkʼa dehꞈ na gʼa˗o.”

16. Ngaˬ hui ha kʼaˉ puiˉ ve chaw hpehꞈ tuˬ, aˬ htoꞈ ma te Yaˬhoˉvaˬ geh bon lawˬ cawˇ ve le?

¹⁶ Yaˬhoˉvaˬ teˇ gʼaˇ ceh tiˉ ngaˬ hui htaꞈ hkʼa dehꞈ na gʼa ve yoˬ. (Tawˇ naˉ ve 15:11) Chi htaꞈ pa taw Yaˬhoˉvaˬ shu htaꞈ nyi ve hkʼe ngaˬ hui kaꞈ nyi tuˬ, leh shu htaꞈ ha kʼaˉ ve awˬ hkʼaˇ shiˍ tuˬ ga laˇ tuˬ bon lawˬ sheˍ. Awˬ viˉ awˬ nyi yaˇ miˇ Aˬseˍlaˆ ha kʼaˉ puiˉ ve chaw hpehꞈ tuˬ, bon lawˬ ve chi yawˇ htaꞈ ga piˇ ve yoˬ. Yawˇ chehˇ ve Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ teˇ gʼaˇ yawˇ teˇ gʼaˇ geh kaꞈ haw daꞈ maˇ gʼa. Yawˇ kʼoˆ ve, “nawˬ htaꞈ deˇ leh maˇ caˉ daꞈ tuˬ sha jaˇ. Ngaˬ yawˇ htaꞈ ha kʼaˉ piˇ tuˬ Yaˬhoˉvaˬ geh bon lawˬ ve yoˬ.” Yaˬhoˉvaˬ Aˬseˍlaˆ bon lawˬ ve htaꞈ hkʼawꞈ piˇ˗aw laˇ? Yawˇ kʼawꞈ kʼoˆ ve, “ngaˬ hui teˇ geh hto toˇ˗e ve leh tawˇ laiˉ naˍ riˍ yaw daꞈ ve yoˬ. Yawˇ kʼoˆ ve htaꞈ hkʼa dehꞈ na taˍ piˇ ve yoˬ. Chi teˇ hkui ngaˬ yawˇ htaꞈ haꞈ leh ga piˇ tuˬ dawˇ teh taˍ ve yoˬ.”

17. Ngaˬ hui aˬ htoꞈ ma te tuˬ dawˇ teh taˍ ve le?

¹⁷ Ngaˬ hui aˬ htoꞈ ma te awˬ viˉ awˬ nyi teˇ hpaˍ htaꞈ ceh haꞈ ve maˇ te cawˇ ve le? Awˬ viˉ awˬ nyi teˇ gʼaˇ le le kaꞈ Yoˇnaˆ, Eˇliˇyaꞈ, Haˍgaˍraˆ, Lawˇtaˍ hkʼa shuˍ shoꞈ shaꞈ ve gʼa hpuˇ ve yoˬ. Awˬ viˉ awˬ nyi teˇ hpaˍ hpaˍ a shu yawˇ awˬ to htaꞈ shoꞈ shaꞈ tuˬ te ve yoˬ. Awˬ tehˬ kʼo, ngaˬ hui teˇ gʼaˇ le le kaꞈ chi hkʼe te jaw ve yoˬ. Chi htaꞈ pa taw, teˇ gʼaˇ leh teˇ gʼaˇ ha kʼaˉ daꞈ tuˬ Yaˬhoˉvaˬ te tcuh gaˇ ve yoˬ. (1 Peˍtruˆ 3:8) Ngaˬ hui Yaˬhoˉvaˬ ve hkawˇ na yuˬ ve kʼo, miˬ guiˬ chi hkʼoˆ Hkriꞈ yaˇ awˬ moˍ hkʼaw cawˇ daꞈ hui daꞈ tuˬ te chehˇ ve yoˬ. Chi htaꞈ pa taw teˇ gʼaˇ leh teˇ gʼaˇ hkawˇ na daꞈ ve, shiˍ daꞈ ve, leh hkʼa dehꞈ ha kʼaˉ daꞈ˗oꞈ.