1. ¿Ken techita Jehová?

AMIKAJ kipaktia ma kiteneuakan kox ixchipajki, ken tlachixtok uan kox uejkapantik. Ik non, kuali timomachiliaj ijkuak tikmatij toTajtsin Dios amo techteneua san ika tlen kita. Ma tikitakan tleka ijkon tikijtouaj. Samuel amo okinmitak ikoneuan Jesé ken Jehová okinmitaya. ToTajtsin Dios okilui Samuel se ikone Jesé kinnauatiskia israelitas. Pero ¿akin kipejpenaskia? Ijkuak Samuel okitak Eliab tlen okatka itlayekankone Jesé, okijto toTajtsin Dios ye kipejpenaskia. Porque Eliab omotaya kuali tlanauatiskia. “Pero Jehová okilui Samuel: ‘Amo xikita ken mota nion ken uejkapantik porque amo onikseli’”. ¿Tlen techmachtia tlen Jehová okilui Samuel? Jehová noijki okilui: “Tlaltikpaktlakatl kita san tlen kitaj ixtololouan pero Jehová kita tlen onka itech inyolo” (1 Sam. 16:1, 6, 7).

2. Ijkon ken kijtoua Juan 7:24, xikijto tleka amo san ma tikitakan tlen kichiuaj tokniuan noso ken kipiaj inyelis.

² Titlajtlakolejkej, ik non, ualeua tikinteneuaj tokniuan ijkuak itlaj kichiuaj noso ken kipiaj inyelis (xiktlajtolti Juan 7:24). Pero amo uelis tikijtoskej tikinmixmatij tokniuan  tla san tikitaj tlen kichiuaj noso ken kipiaj inyelis. Ma tikitakan tleka ijkon tikijtouaj. Akin tlapajtia maski sapanoua ixtlamatki amo uelis kuali kimatis tlen kipanoua akin mokokoua tla san kitas. Ik non, moneki iuan motlapouis uan kitlajtlanis tlen kimachilia. Xamo kiluis ma kikixti se radiografía uan ijkon kimatis kanin kikokoua. Tla akin tlapajtia amo ijkon kichiuas, amo uelis kipajtis akin mokokoua. Tejuan noijki amo uelis tikinmixmatiskej tokniuan tla san tikitaj tlen kichiuaj noso ken kipiaj inyelis. Moneki timochijchikauaskej tikinmixmatiskej tokniuan. San Jehová kimati tlen onka itech toyolo, ik non, tejuan amo keman kuali tikinmajsikamatiskej tokniuan. Pero uelis timochijchikauaskej tikchiuaskej ken Jehová. Ma tikitakan ken tikchiuaskej.

3. ¿Ken techpaleuis tlen timomachtiskej?

³ Jehová kinkaki itekipanojkauan, kimati tlen okinpanok, tlen kinpanoua uan kinmiknomati. Ma tikitakan ken okiteititi okitlasojtlaya Jonás, Elías, Agar uan Lot. Non techpaleuis ma tikintlasojtlakan tokniuan.

4. ¿Tleka tejuan ayakmo tikiluiskiaj Jonás ma kichiua tlen okinauati toTajtsin Dios?

⁴ Amo tikmatij nochi tlen okichi Jonás, ik non, xamo tikijtoskej amo okineltokaya toTajtsin Dios noso amo otetlakamatiaya. Jehová okinauati ma kinmiluiti akinmej ochantiayaj Nínive kinmixpoloskia. Pero Jonás amo okitlakamatki uan otlejkok itech se barco tlen oksekan oyaya (Jon. 1:1-3). Tejuan xamo ayakmo tikiluiskiaj ma kichiua tlen okinauati toTajtsin Dios. Pero Jehová amo ijkon okichi (Jon. 3:1, 2).

5. Ijkon ken kijtoua Jonás 2:1, 2, 9, ¿ken okipiaya iyelis Jonás?

⁵ Techpaleuia ma tikmatikan ken okipiaya iyelis ijkuak omotlatlaujti ijtik se michin (xiktlajtolti Jonás 2:1, 2, 9). Techititia okipiaya kuali iyelis uan amo san omomojti. Tlen okijto okiteititi okatka yolyamanki, omotlasojkamatiaya uan okinekiaya kitlakamatis toTajtsin Dios. Ik non, Jehová okitak tlen okipiaya itech iyolo uan okinankili ijkuak okitlatlaujti uan okikauili ok ma yeto iprofeta.

6. ¿Tleka moneki kuali ma tikinkakikan tokniuan?

⁶ Tla tiknekij kuali tikinkakiskej tokniuan, moneki tiyetoskej tiyolyamankej uan amo san niman ma timosotlauakan. Ma tikitakan eyi tlamantli tleka miak ipati ma timochijchikauakan ma tikinkakikan tokniuan. Achto tlamantli, amo san tikitaskej tlen amo kuali kichiuaj noso ken kipiaj inyelis. Ome tlamantli, tikmatiskej ken momachiliaj uan tleka kichiuaj seki tlamantli. Non techpaleuis ma tikinmajsikamatikan. Eyi tlamantli, tikinpaleuiskej tokniuan ma kitakan ken kipiaj inyelis.  Ualeua timoyolseuiaj ijkuak ikaj tikiluiaj ken timomachiliaj (Prov. 20:5). Se tlayekanki tlen kajki Asia, okijto: “Se tonal itlaj amo kuali onikchi porque amo achto onikkak se tokni. Onikilui se tokni omonekiaya okachi kuali tlanankilis ijkuak timonechikouaj. Pero satepan onikmatki amo ueli kitlajtoltia se amatl, ik non, amo okachi kuali otlanankiliaya”. Nin kiteititia tlayekankej moneki achto kinkakiskej tokniuan ijkuak itlaj kinmiluiskej (Prov. 18:13).

7. ¿Tlen techmachtia Jehová ijkuak Elías amo san niman iuan omotlapoui?

⁷ Sekimej tokniuan itlaj okinpanok, tlatlamantli okinmiskaltijkej uan tlatlamantli inyelis. Ik non, amo mixeuiaj kijtoskej ken momachiliaj. ¿Ken uelis tikinpaleuiskej uan ijkon tikmatiskej tlen kimachiliaj? Ma tikitakan tlen okichi Jehová ijkuak Elías okicholili Jezabel. Elías amo san niman okilui Jehová tlen okipanouaya. Pero Jehová kuali okikak, okiyolchika uan okinauati itlaj miak ipati ma kichiua (1 Rey. 19:1-18). Xamo tokniuan amo san niman techiluiskej nochi tlen kinpanoua. Pero ma tikchiuakan ken Jehová uan amo ma timosotlauakan. Ijkon touan motlapouiskej uan techiluiskej tlen kinpanoua. Kuali ma tikinkakikan ijkuak touan motlapouiaj.

8. Ijkon ken kijtoua Génesis 16:7-13, ¿Jehová ken okipaleui Agar?

⁸ Axkan ma tikitakan tlen okichi Agar. Nin siuatl okatka itlakeual Sarái uan okatka isiua Abrán. Pero opejki kitlauelita Sarái porque ye amo okinpiaya ikoneuan. Sarái okajuak uan oyajki (Gén. 16:4-6). Tejuan titlajtlakolejkej, ik non, xamo tikijtoskiaj Agar san omoueyinekiaya uan okinamikiaya ijkon ma kichiuilikan. Pero Jehová okitak tlen okipiaya itech iyolo. Okiualtitlanki se ángel ma kipaleuiki ma kipatla ken omokuayejyekouaya uan ijkon kiteochiuaskia. Agar okimatki Jehová okitak nochi tlen okichi uan tlen okipanotoka. Ik non, okilui Jehová: “Te tiDios nochi tikita” (xiktlajtolti Génesis 16:7-13).

9. ¿Tlen okitak Jehová itech iyolo Agar?

⁹ ¿Tlen okitak Jehová itech iyolo Agar? Okimatiaya nochi tlen okipanouaya uan kanin ochantiaya (Prov. 15:3). Ochantiaya Egipto pero satepan oyajki iuan israelitas. Xamo omomachiliaya ompa amo ikalijtik. Xamo okinmilnamikiaya ifamiliares uan ichan. Noijki inamik okipiaya okse isiua. Yiuejkika sekimej itekipanojkauan Jehová okinpiayaj oksekimej insiuauan. Pero Jehová amo ijkon okinekiaya ma kichiuakan (Mat. 19:4-6). Ik non, xamo Agar ochauatiaya uan okualaniaya. Jehová  amo okijto kuali tlen Agar okichiuili Sarái. Pero okajsikamatki tlen okimachiliaya uan tlen okipanouaya.

10. ¿Tlen techpaleuis okachi ma tikinmixmatikan tokniuan?

¹⁰ Uelis tikinmajsikamatiskej tokniuan ijkon ken Jehová kichiua. Kuali ma tikinmixmatikan. Ma timotlapouikan inmiuan ijkuak timonechikouaj, inmiuan ma titetlapouikan uan uelis tikinmiluiskej ma tlakuatij tokalijtik. Xamo ijkuak tikinmixmatiskej tikitaskej amo okachi tlajtouaj porque pinauaj. Xamo se tokni tikitaj kipia tomin pero ye kinmaka oksekimej tlen kipia uan amo kixneki kipias miak tlamantli. Xamo sekimej tokniuan amo kualkan ajsij kanin timonechikouaj porque kipiaj ouijkayotl (Job 6:29). Pero amo ma timokajkalakikan kanin amo toteki (1 Tim. 5:13). Moneki ma tikinmixmatikan tokniuan uan ma tikmatikan tlen kinpanotok.

11. ¿Tleka moneki tlayekankej kuali ma kinmixmatikan tokniuan?

¹¹ Tlayekankej moneki kuali ma kinmixmatikan tokniuan. Ma tikitakan tlen okichi se tlayekanki itech circuito tlen itoka Artur. Ye uan okse tokni okitlajpalotoj se tokni tlen amo okachi otlajtouaya. Artur okijto: “Tokni otechilui inamik oixpoliuik ijkuak ayamo okipiaya miak xiuitl omonamiktijkej. Otlajyoui pero okinmachti ome ikoneuan ma kitlasojtlakan Jehová. Noijki otechilui ayakmo kuali otlachiaya uan omoyolkokouaya. Pero kitlasojtla Jehová uan tlaneltoka. Otikitakej tejuan noijki uelis tikchiuaskej miak tlamantli ken ye kichiua” (Filip. 2:3). Tlayekanki itech circuito omochijchikauaya kichiuas ken Jehová porque ye kuali kinmixmati itekipanojkauan uan tlen kinpanoua (Éx. 3:7). Tlayekankej uelis kinpaleuiskej tokniuan tla kuali kinmixmatij.

12. ¿Ken okipaleui Yip Yee kuali okixmatki se tokni?

¹² Tla tikixmatij se tokni uan amo techpaktia tlen kichiua, ma timochijchikauakan ma tikajsikamatikan tleka ijkon kichiua. Ijkon okipanok se tokni itoka Yip Yee uan chanti Asia. Ye okijto: “Se tokni sapanoua chikauak otlajtouaya. Ne onikijtouaya amo otetlakaitaya. Pero se tonal iuan onitetlapoui uan onechilui okinemakaya michin iuan itatajuan ompa tiankisko. Omonekiaya chikauak tlajtos uan ijkon  ma kitlakouikan”. Noijki okijto: “Moneki kuali nikinmixmatis tokniuan uan ijkon nikinmajsikamatis”. Ualeua oui ijkon tikchiuaskej. Pero ma tikchiuakan ken Jehová uan kuali ma tikinmixmatikan tokniuan porque ye nochtin kintlasojtla (1 Tim. 2:3, 4; 2 Cor. 6:11-13).

13. Ijkon ken kijtoua Génesis 19:15, 16, ¿tlen okichijkej ángeles ijkuak Lot uan ifamilia amo totoka okisayaj uan tleka?

¹³ Lot amo san niman okitlakamatki toTajtsin Dios ijkuak omonekiaya. Ome ángeles okiluitoj ye uan ifamilia ma kisakan Sodoma porque toTajtsin Dios kipojpoloskia non altepetl (Gén. 19:12, 13). Pero mostlatika ok okatkaj inkalijtik. Ik non, ángeles oksepa okinmiluijkej tlen panoskia pero Lot uan ifamilia amo totoka okisayaj. Xamo timokuayejyekoskiaj tleka amo okitekipachouaya tlen panoskia noso tleka amo otetlakamatiaya. Pero Jehová amo omosotla. Ye okiknomatki Lot uan ifamilia, ik non, ángeles okimatilankej uan ijkon okinkixtijkej itech non altepetl (xiktlajtolti Génesis 19:15, 16).

14. ¿Tleka Jehová okiknomatki Lot?

¹⁴ ¿Tleka Jehová okiknomatki Lot? Xamo Jehová okitak miak tlamantli tlen okipiaya itech iyolo. Xamo Lot amo okinekiaya kisas porque okinmauiliaya akinmej ompa ochantiayaj. Noijki xamo okimatki ome tekiuajkej ouetsitoj ijtik alquitrán (Gén. 14:8-12). Xamo okitekipachouaya tlen kipanoskia isiua uan ichpokauan. Noijki okipiaya tomin, ik non, okipiaya ueyi ikalijtik (Gén. 13:5, 6). Pero non amo kijtosneki kuali tlen okichi ijkuak amo totoka okitlakamatki toTajtsin Dios. Pero Jehová okiknomatki uan okijto “yekmilaka tlakatl” (2 Ped. 2:7, 8).

15. ¿Tleka amo ma tikinteneuakan oksekimej uan tlen moneki ma tikchiuakan?

¹⁵ Ma tikajsikamatikan tlen kimachiliaj oksekimej uan amo san ma tikitakan tlen amo kuali kichiuaj. Se tokni itoka  Verónica tlen chanti Europa, okijto: “Se tokni omotaya san nochipa okualantoka uan amikaj iuan omouikaya. Ualeua onimomojtiaya niknotsas. Pero onimokuayejyeko tla ne ijkon nechpanoskia, nechpaktiskia nikpias se noyolikni tlen iuan nimotlapouis. Ik non, oniktlajtlani ken okatka uan opejki nechtlapouia ken omomachiliaya. Axkan nikajsikamati tleka amikaj iuan motlapouia”.

16. ¿Tleka moneki ma tikiluikan Jehová ma techpaleui ma tikinmajsikamatikan tokniuan?

¹⁶ San Jehová kuali techajsikamati (1 Juan 3:20). Ik non, ma tikiluikan ma techpaleui ma tikinmitakan tokniuan ken ye kinmita uan ma tikinmiknomatikan. Se tokni itoka Anzhela okitlatlaujti Jehová ma kipaleui ma teajsikamati porque se tokni okikualankaitaya uan amo okimatiaya tlen kichiuas. Anzhela okijto: “Tla ne niknekiskia amo oui nikteneuaskia uan ayakmo niknotsaskia. Pero onikilui Jehová ma nechpaleui ma nikajsikamati tlen kimachilia tokni”. Jehová okipaleui uan okijto: “Se tonal san sekan otitetlapouitoj uan uejkika otimotlapouijkej. Onikiknomatki ijkuak onikkak uan axkan okachi niktlasojtla uan nikneki nikpaleuis”.

17. ¿Tlen moneki ma tikchiuakan?

¹⁷ Amo uelis tikinpejpenaskej katli tokniuan tikinmiknomatiskej. Xamo sekimej tokniuan okimotemolijkej ouijkayotl ken Jonás, Elías, Agar uan Lot. Pero ma tikilnamiktokan ualeua tinochtin tikmotemoliaj ouijkayotl. Ik non, Jehová techiluia ma timoajsikamatikan (1 Ped. 3:8). Timouikaskej iuan nochtin tokniuan tla tikchiuaskej tlen Jehová techiluia. Ik non, ma tikinmajsikamatikan uan ma tikinmiknomatikan.