1. Beibele e re botša taba efe ya go thabiša ka Jehofa?

NA O ka thaba ge batho ba ka go ahlola ka go no lebelela mmala wa gago, gore o bjang sefahlegong le gore o na le mmele o mo kaaka’ng? Aowa. Re a thaba go tseba gore Jehofa yena ga a re ahlole ka gore re bogega bjang! Ka mohlala, ge Samuele a be a lebeletše barwa ba Jese, ga se a ka a bona seo Jehofa a bego a se bona go bona. Jehofa o be a boditše Samuele gore a tlotše yo mongwe wa barwa ba Jese gore e be kgoši ya Isiraele. Eupša o be a se a mmotša gore a tlotše ofe. Ge Samuele a bona morwa yo mogolo wa Jese e lego Eliaba, o ile a re: “Ruri yo ke motlotšwa wa Jehofa.” Eliaba o be a bogega bjalo ka kgoši. Beibele e re: “Eupša Jehofa a re go Samuele: ‘O se ke wa lebelela ponagalo ya gagwe le leemo la gagwe ka ge nna ke mo ganne.’” Re ithuta’ng tabeng ye? Re ithuta gore: “Motho o bona ponagalo ya ka ntle; eupša Jehofa yena o bona dipelo.”—1 Sam. 16:1, 6, 7.

2. Re naganne ka Johane 7:24, ke ka baka la’ng re sa swanela go ahlola batho go ya ka seo re se bonago? Nea mohlala.

² Ka ge ka moka re na le sebe, re fela re kitimela go ahlola ba bangwe go ya ka seo re se bonago. (Bala Johane 7:24.) Go bolela nnete, re ka se tsebe motho ka go no mo lebelela feela. Ka mohlala, le ngaka ya go phala dingaka ka moka mo lefaseng e ka se tsebe dilo ka moka ka molwetši ka go no mo lebelela feela. Ngaka yeo e swanetše go theetša molwetši gabotse gore e tsebe gore o kile a swarwa ke bolwetši bofe, o ikwa bjang gona bjale le gore ke dilo dife tšeo a di kwago mmeleng go bontšha gore o na le bolwetši. Ngaka yeo e ka ba ya dira le X-ray gore e hlahlobe molwetši yoo. Ge ngaka e ka se dire dilo tšeo, e ka fa molwetši dihlare tšeo e sego tšona. Ka mo go swanago, le rena re ka se tsebe bana babo rena le dikgaetšedi ka go no ba lebelela feela. Re  swanetše go leka ka gohle go kwešiša gore ke batho ba mohuta mang. Re ka se tsoge re kgonne go kwešiša bana babo rena ka mo go feletšego go swana le Jehofa, ka gore yena o kgona go bona seo se lego ka pelong. Eupša seo ga se bolele gore re ka palelwa ke go mo ekiša. Re ka mo ekiša bjang?

3. Sehlogong se re tlo ithuta’ng?

³ Jehofa o swara bahlanka ba gagwe bjang? O a ba theetša. O kwešiša maemo a bona le dilo tšeo di kilego tša ba diragalela bophelong. E bile o ba kwela bohloko. Sehlogong se, re tlo ithuta kamoo Jehofa a ilego a dirišana le Jona, Eliya, Hagara le Lota, le gore rena re ka mo ekiša bjang ge re dirišana le bana babo rena le dikgaetšedi.

4. Ke ka baka la’ng re ka kitimela go ahlola Jona?

⁴ Ka ge re sa tsebe ditaba ka moka mabapi le Jona, re ka kitimela go mo ahlola gore o be a sa tshepege e bile a sa botege. Jehofa o ile a mo roma gore a yo botša Baninife gore o tlo ba fediša. Eupša go e na le gore Jona a ye Ninife, o ile a namela sekepe sa go ya Tarashishi, “a tšhaba pele ga Jehofa.” (Jona 1:1-3) Na wena o be o ka nea Jona sebaka se sengwe gore a ye mo Jehofa a bego a mo romile gona? Mohlomongwe o be o ka se mo nee sebaka seo. Eupša Jehofa yena o ile a mo nea sebaka se sengwe gape gore a ye Ninife.—Jona 3:1, 2.

5. O ithuta’ng thapelong ya Jona yeo e lego go Jona 2:1, 2, 9?

⁵ Re kgona go bona gore Jona e be e le motho wa mohuta mang thapelong yeo a ilego a e rapela. (Bala Jona 2:1, 2, 9.) Re a tseba gore Jona o be a rapela Jehofa gantši. Eupša thapelo ya ge a be a le ka mpeng ya hlapi, e re thuša gore re se ke ra no nagana ka yena e le motho yo a kilego a gana ge Jehofa a mo roma. Thapelo ya Jona e re bontšha gore o be a ikokobeditše, a leboga e bile a ikemišeditše go kwa Jehofa. Se se re thuša go kwešiša gore ke ka baka la eng Jehofa a se a ka a lebelela diphošo tša Jona kudu, eupša a ile a araba thapelo ya gagwe le go tšwela pele a mo diriša e le moporofeta wa gagwe!

6. Ke ka baka la’ng go le bohlokwa gore ka moka ga rena re ithute go theetša ba bangwe gabotse?

⁶ E le gore re kgone go theetša ba bangwe gabotse, re swanetše go ba le boikokobetšo e bile re se ke ra fela pelo. Seo se tlo re hola bjang? Mabaka ke a: Sa pele, re ka se ke ra kitimela go ahlola ba bangwe. Sa bobedi, re tlo kgona go kwešiša maikwelo a bana babo rena le gore ke ka baka la eng ba dira dilo ka tsela e itšego gomme seo se tla re thuša gore re ba kwele bohloko. Sa boraro, re ka thuša motho yoo gore a lemoge dilo tše itšego ka yena tšeo a bego a sa di  tsebe. Ka dinako tše dingwe, re ka no se kwešiše gore ke ka baka la eng re ikwa ka tsela e itšego go fihlela re bolela le motho yo mongwe. (Die. 20:5) Mogolo yo mongwe wa kua Asia o ile a re: “Ke ile ka kitimela go ahlola kgaetšedi yo mongwe. Ke ile ka mmotša gore a lokišetše dikarabo gabotse eupša nengneng ke ile ka kwa gore ga a kgone go bala gabotse le gore o leka ka thata go araba dibokeng.” Go bohlokwa gore bagolo ba kwe ditaba ka botlalo pele ba ka nea motho keletšo!—Die. 18:13.

7. O ithuta’ng tseleng yeo Jehofa a ilego a dirišana le Eliya?

⁷ Ke ka baka la’ng Bakriste ba bangwe ba sa lokologe go bolela ka maikwelo a bona? Mohlomongwe ke ka baka la dilo tšeo di kilego tša ba diragalela bophelong, setšo sa gabo bona goba tsela yeo ba lego ka yona. Re ka dira’ng gore ba lokologe go re botša maikwelo a bona? Re ka ithuta tseleng yeo Jehofa a ilego a dirišana le Eliya ge a be a tšhabela Isebele. Eliya o ile a tšea matšatši pele a ka botša Jehofa gore o ikwa bjang. Jehofa o ile a mo theetša gabotse. Ka morago ga gore a mo theetše, o ile a mo kgothatša a ba a mo nea mošomo. (1 Dikg. 19:1-18) Go ka tšea nako gore bana babo rena ba lokologe go re botša gore ba ikwa bjang. Ka morago ga gore ba re botše gore ba ikwa bjang, ke gona moo re tlago go kwešiša maikwelo a bona. Ge re ka ekiša Jehofa, ra se felele bana babo rena pelo, ba tlo kgona go lokologa go re botša gore ba ikwa bjang. Ge ba šetše ba lokologile gore botša maikwelo a bona, re swanetše go ba theetša gabotse.

8. Go ya ka Genesi 16:7-13, Jehofa o ile a thuša Hagara bjang?

⁸ Ka morago ga gore Hagara, yoo e bego e le mohlanka wa Sarai, e be mosadi wa Aborama, dilo di ile tša fetoga. Hagara o ile a ima gomme a thoma go nyatša Sarai, ka ge a be a se na bana. Dilo di ile tša mpefala le go feta moo Sarai a ilego a raka Hagara. (Gen. 16:4-6) Ka ge re na le sebe, re ka no nagana gore Hagara e be e le motho yo mobe le gore Sarai o dirile gabotse a no mo raka. Eupša Jehofa yena o be a sa nagane bjalo ka Hagara. O ile a romela morongwa wa gagwe go Hagara. Morongwa yo o ile a botša Hagara gore a yo ikokobeletša Sarai ke moka a mo šegofatša. Hagara o ile a bona gore Jehofa o be a dutše a mo lebeletše e bile a tseba le maemo a gagwe. O ile a thaba kudu moo a ilego a re Jehofa ke “Modimo yo a bonago.”—Bala Genesi 16:7-13.

9. Jehofa o ile a nagana ka eng ge a be a dirišana le Hagara?

⁹ Jehofa o ile a bona eng go Hagara? Jehofa o be a tseba dilo ka moka tšeo di ilego tša diragalela Hagara. (Die. 15:3) Hagara e be e le Moegipita, eupša a dula le Baheberu. Na o be a fela a ikwa eka o lahlilwe? Na o be a gopola batho ba gabo le naga ya gabo? Le gona, gopola gore e be e le mosadi wa bobedi wa Aborama. Nakong e itšego, Modimo o ile a dumelela batho go nyala basadi ba bantši. Eupša woo e be e se morero wa gagwe wa mathomong. (Mat. 19:4-6) Ga go makatše ge manyalo a segadikane a be a tletše ka ditshele le mona. Re a tseba gore Jehofa o be a sa kgahlwe ke taba ya gore Hagara o nyatša Sarai, eupša re ka kgodišega gore Jehofa o ile a nagana ka maemo a Hagara ge a be a dirišana le yena.

10. Re ka dira’ng gore re tsebe bana babo rena le dikgaetšedi gabotse?

¹⁰ Re ka ekiša Jehofa ka go dira sohle seo re ka se kgonago gore re kwešiše bana babo rena le dikgaetšedi. Leka gore o tsebe bana beno le dikgaetšedi gabotse. Iphe nako ya go bolela le bona pele ga diboka le ka morago ga tšona, sepela le bona tšhemong goba ge e ba go kgonega ba laletše lapeng la gago. Ge o ka dira bjalo, o tla kgona go tseba bana beno le dikgaetšedi. Ka mohlala, o tla kgona go bona gore kgaetšedi  yola o bego o nagana gore ga a rate batho, o no ba a na le dihlong. Ngwanešo yola wa go huma yo o bego o nagana gore o kitimiša tšhelete, o rata go nea. Kgaetšedi yola wa go ba le bana, yo a dulago a latelwa dibokeng, o a tlaišwa ka gae. (Mat. 7:1) Ke nnete gore Beibele e re re se ke ra “[tsenatsena] ditabeng tša batho ba bangwe.” (1 Tim. 5:13) Eupša go bohlokwa gore re tsebe bana babo rena le dikgaetšedi, gore ba kile ba diragalelwa ke eng mo bophelong, ka gore seo se tla re thuša gore re ba kwešiše.

11. Ke ka baka la’ng go le bohlokwa gore bagolo ba tsebe ditho tša phuthego gabotse?

¹¹ Go bohlokwa kudu gore bagolo ba tsebe ditho tša phuthego gabotse. Nagana ka mohlala wa ngwanabo rena Artur, yo e bego e le molebeledi wa tikologo. Ngwanabo rena Artur le mogolo yo mongwe ba ile ba etela kgaetšedi yo mongwe yoo a bego a bonagala a na le dihlong. Ngwanabo rena Artur o ile a re: “Kgaetšedi yoo o ile a re botša gore monna wa gagwe o ile a hlokofala mengwaga e sego kae ka morago ga gore ba nyalane. Eupša go sa šetšwe mathata ao, o ile a kgona go ruta barwedi ba gagwe ba babedi gore ba rate Jehofa le go mo hlankela. Gona bjale o be a thoma go foufala gomme seo se be se dira gore a gateletšege monaganong. Le ge a be a na le mathata ao, o ile a no rata Jehofa le go feta le go tšwela pele a na le tumelo e tiilego. Re ile ra bona gore re ka ithuta dilo tše dintši mohlaleng wa kgaetšedi yo.” (Bafil. 2:3) Ngwanabo rena Artur o be a ekiša Jehofa. Jehofa o tseba batho ba gagwe, le bohloko bjoo ba bo kwago ka baka la mathata ao ba nago le ona. (Ek. 3:7) Bagolo bao ba tsebago ditho tša phuthego gabotse ba ka kgona go di thuša.

12. Kgaetšedi Yip Yee o ile a holega bjang ka morago ga go tseba kgaetšedi yo mongwe gabotse?

¹² Ka dinako tše dingwe, Mokriste yo mongwe a ka ba a go tena, eupša ka morago ga go tseba dilo tšeo di kilego tša mo diragalela bophelong, o ka thoma go mo kwela bohloko. Ka mohlala, kgaetšedi Yip Yee, yo a dulago Asia o ile a re: “Kgaetšedi yo mongwe ka phuthegong o be a rata go bolelela godimo, ke be ke ipotša gore ga a na mekgwa. Ka letšatši le lengwe ge ke be ke šoma le yena tšhemong, o ile a mpotša gore o be a thuša batswadi ba gagwe go rekiša dihlapi mmarakeng. O be a swanelwa ke go goeletša gore a bitše bareki.” Kgaetšedi Yip Yee o ile a re: “Ke ithutile gore ke swanetše go tseba bana bešo gabotse e le gore ke kgone go ba kwešiša.” Go nyakega maiteko a magolo gore o kgone go tseba Bakristegotee le wena gabotse. Ge o ekwa keletšo ya Beibele ya gore o bontšhe ba bangwe lerato, o tla be o ekiša Jehofa yo a ratago “mehuta yohle ya batho.”—1 Tim. 2:3, 4; 2 Bakor. 6:11-13.

13. Go ya ka Genesi 19:15, 16, barongwa ba ile ba dira’ng ge Lota a be a dikadika go tšhaba, gona ka baka la’ng?

¹³ Jehofa o ile a nea Lota taelo e itšego, eupša Lota o ile a dikadika go mo theetša. Barongwa ba babedi ba ile ba ya go Lota ba mmotša gore a tšhabe Sodoma le lapa la gagwe. Ke ka baka la’ng Lota a be a swanetše go tšhaba? Barongwa bao ba ile ba mmotša gore: “Re tlo senya lefelo le.” (Gen. 19:12, 13) Sa go makatša ke gore mesong ya go latela, Lota le lapa la gagwe ba be ba sa le motseng woo. Barongwa bao ba ile ba mmotša gore a tšhabe, eupša Lota o ile a no “dikadika.” Re ka no ahlola Lota ka gore o be a sa kwe, eupša Jehofa ga se a ka a ngala Lota. “Ka baka la lešoko la Jehofa,” barongwa ba ile ba swara Lota, mosadi wa gagwe le barwedi ba gagwe ka diatla ba ba ntšha motseng woo.—Bala Genesi 19:15, 16.

14. Ke ka baka la’ng Jehofa a ka ba a ile a kwela Lota bohloko?

¹⁴ Go na le mabaka a mantši ao a ka bago a ile a dira gore Jehofa a kwele Lota bohloko. Go ka direga gore Lota o be a dikadika ka gobane a be a tšhaba batho bao ba bego ba dula ka ntle ga motse. Go ka ba go bile le mabaka a mangwe ao a ilego a dira gore Lota a dikadike go tšhaba. Go ka direga gore Lota o ile a kwa ka dikgoši tše pedi tšeo di kilego tša wela ka meleteng yeo e nago le sekontiri moeding wa kgauswi le moo Sodoma. (Gen. 14:8-12) Ka ge Lota a be a na le mosadi le bana, o be a sa nyake selo ka bona. Se sengwe ke gore Lota o be a humile, ka gona go ka direga gore o be a na le ntlo e botse kudu moo Sodoma. (Gen. 13:5, 6) Go bolela nnete, mabaka a ka moka a be a sa swanela go dira gore Lota a dikadike go kwa Jehofa. Eupša Jehofa ga se a ka a lebelela diphošo tša Lota kudu, o ile a mo lebelela e le “moloki.”—2 Pet. 2:7, 8.

15. Go e na le gore re ahlole batho ba bangwe re swanetše go dira’ng?

¹⁵ O se ke wa ahlola ba bangwe, eupša leka ka gohle go tseba gore ba ikwa bjang. Kgaetšedi Veronica wa kua Yuropa o ile a leka go dira seo. O re: “Kgaetšedi yo mongwe o be a se na botho e bile a sa rate batho. O be a rata go itulela a nnoši. Ka dinako tše dingwe ke be ke tšhaba le go yo mmolediša. Eupša ke ile ka ipotša gore ‘ge nkabe ke le maemong a gagwe, ke be ke tlo hloka mogwera.’ Ka letšatši le lengwe ke ile ka beta  pelo ka mmotšiša gore o ikwa bjang. O ile a thoma go ntšhetša sa mafahleng, gona bjale ke a mo kwešiša.”

16. Ke ka baka la’ng re swanetše go rapela Jehofa gore a re thuše go kwela ba bangwe bohloko?

¹⁶ Jehofa ke yena feela a re kwešišago ka mo go feletšego. (Die. 15:11) Mo kgopele gore a go thuše go bona seo a se bonago go ba bangwe le gore o ba kwele bohloko. Go rapela go ile gwa thuša kgaetšedi Anzhela gore a kwele ba bangwe bohloko. Ka phuthegong ya gabo go be go na le kgaetšedi yo mongwe yo e bego e le tlhobaboroko. Anzhela o re: “Go ka ba go bile bonolo gore ke kitimele go ahlola kgaetšedi yoo le go mo hlapa diatla. Eupša ke ile ka kgopela Jehofa gore a nthuše go kwešiša kgaetšedi yo.” Na Jehofa o ile a araba thapelo ya Anzhela? Anzhela o re: “Ke ile ka sepela le kgaetšedi yoo tšhemong, ge re se na go tšhaiša, re ile ra tšea nako e telele re bolela. Ke ile ka mo theetša ka go mo kwela bohloko. Gona bjale ke mo rata kudu, e bile ke ikemišeditše go dula ke mo thuša.”

17. Re swanetše go leka ka gohle go dira’ng?

¹⁷ Ga se ra swanela go kgetha gore ke bomang bao re tlago go ba bontšha kwelobohloko ka phuthegong. Ka baka la’ng? Ka gobane ka moka ga bona ba na le mathata bjalo ka ge Jona, Eliya, Hagara le Lota le bona ba be ba na le mathata. Mabakeng a mantši, bahlanka ba ba kgale ba Jehofa ba bile le mathata ka gobane ba ile ba ipakela ona. Go bolela nnete, ka moka ga rena re ka ba re ile ra ipakela mathata nengneng bophelong. Ka gona, re a kwešiša ge Jehofa a re re kwelane bohloko. (1 Pet. 3:8) Ge re ka kwa Jehofa, re tlo dula re ratana le go dira gore ka phuthegong go dule go na le botee. Ka gona, ge re dutše re dirišana le bana babo rena, a re direng sohle seo re ka se kgonago gore re ba theetše, re ba tsebe gabotse le go ba kwela bohloko.