1. Библи Йегови туххӕй ци зӕгъуй ӕма нин е ӕхцӕуӕн цӕмӕн ӕй?

ЕСКЕ дин дӕ бакастмӕ гӕсгӕ ку тӕрхон кодтайдӕ, уӕд дин ӕхцӕуӕн адтайдӕ? Ӕвӕдзи, нӕ. Хуарз ӕма нин Йеговӕ нӕ бакастмӕ гӕсгӕ нӕ тӕрхон кӕнуй! Зӕгъӕн, Самуил Йессеййи фурттӕмӕ ку кастӕй, уӕд Йеговӕ ци уидта, уой нӕ уидта. Йеговӕ ин уотӕ загъта, Йессеййи фурттӕй, дан, сӕ еу уодзӕй Израили паддзах. Фал кӕци? Самуил хестӕр фурт Елиави ку фӕууидта, уӕд загъта: «Ӕнӕмӕнгӕй, айӕ ӕй Йегови исӕрст лӕггадгӕнӕг». Елиав кондгин лӕг ке адтӕй, уомӕ гӕсгӕ Самуилмӕ уотӕ фӕккастӕй, ӕма Йеговӕ уой равзурста. Фал ин Йеговӕ ба загъта: «Ӕ уинд ӕма ин ӕ асӕмӕ ма кӕсӕ, уой нӕ равзурстон». Е нин цӕбӕл дзорӕг ӕй? Йеговӕ ма ин загъта: «Адӕймаг кӕсуй, цӕстӕ ци уинуй, уомӕ, Йеговӕ ба кӕсуй зӕрдӕмӕ» (1 Сам. 16:1, 6, 7).

2. Иоанни 7:24 куд финст ӕй, уомӕ гӕсгӕ адӕнӕн сӕ бакастмӕ гӕсгӕ тӕрхон кӕнун раст цӕмӕннӕ ’й? Ӕрхӕссӕ цӕветтон.

² Ӕнӕнхӕст ке ан, уой туххӕй арӕх адӕнӕн сӕ бакастмӕ гӕсгӕ фӕттӕрхон кӕнӕн. (Бакӕсӕ Иоанни 7:24.) Фал цӕстӕ ци уинуй, е нецӕбӕл ма дзорӕг ӕй. Зӕгъӕн, фӕлтӕрдгун дохтирӕн дӕр ма айдагъ бакаст фагӕ нӕй, цӕмӕй ӕй балӕдӕра, адӕймаг ци кӕнуй, уой. Гъӕуама имӕ лӕмбунӕг байгъоса ӕма ’й базона, раздӕр цӕмӕй садӕй ӕма ’й нур ци тухсун кӕнуй. Ка ’й зонуй ма ин рентген дӕр искӕнун кӕндзӕй. Уотӕ ку нӕ бакӕна, уӕд ин, гӕнӕн ес, ӕма ӕ нез раст ма исбӕрӕг кӕна. Уотӕ мах дӕр хурӕтӕ ӕма ӕнсувӕрти нӕ лӕдӕрдзиан, ӕрмӕстдӕр син сӕ бакастмӕ ку кӕсӕн, уӕд. Гъӕуама арфдӕр кӕсун зонӕн. Адӕймаги зӕрди ци ес, уой Йеговӕ куд уинуй, уотӕ мах нӕ фӕууиндзиан, фал ӕй уӕддӕр нӕ бон ӕй фӕнзун. Цума куд?

3. Аци статьяй Библийӕй ци хабӕрттӕмӕ ӕркӕсдзиан, етӕ нин куд банхус кӕндзӕнцӕ Йегови фӕнзун?

³ Цума Йеговӕ ӕ лӕггадгӕнгутӕн куд ӕй? Байгъосуй сӕмӕ,  ӕ гъудий фӕддаруй, раздӕр ци бавзурстонцӕ ӕма нур ци уавӕри ’нцӕ, уой, удта син фӕттӕрегъӕд кӕнуй. Гъӕйдӕ ӕркӕсӕн, Йеговӕ Ионӕн, Илийайӕн, Агарӕн ӕма Лотӕн куд банхус кодта, ӕма расагъӕс кӕнӕн, нӕ бон ӕй фӕнзун куд ӕй, уобӕл.

4. Адӕймаг Ионӕмӕ лӕгъуз цӕстӕй цӕмӕн ракастайдӕ?

⁴ Иони туххӕй алци ку нӕ зудтайанӕ, уӕд ӕй, ӕвӕдзи, банимадтайанӕ, зӕрдӕ дарӕн кӕбӕл нӕййес кенӕ сауӕнгӕ Хуцаубӕл еузӕрдон ка нӕй, уӕхӕн адӕймагбӕл. Йеговӕ ин комкоммӕ загъта, ци кӕнун ӕй гъудӕй, уой. Гъӕуама Ниневий цӕргутӕн Хуцауи тӕрхон фегъосун кодтайдӕ. Фал Ионӕ ба, ӕндӕрӕрдӕмӕ ка цудӕй, уӕхӕн науӕбӕл рабадтӕй ӕма «Йеговӕй ралигъдӕй» (Ионӕ 1:1–3). Ду ма Йегови бунати Ионӕн ести баихӕс кодтайсӕ? Ӕвӕдзи, нӕбал. Фал имӕ Йеговӕ ба ӕндӕр цӕстӕй кастӕй (Ионӕ 3:1, 2).

5. Иони 2:1, 2, 9 финст кувдӕй Иони туххӕй ци ӕнгъезуй базонун?

⁵ Ионӕ ӕцӕгӕй цӕхуӕн адӕймаг адтӕй, е ӕ кувдӕй хуарз зиннуй. (Бакӕсӕ Ионӕ 2:1, 2, 9.) Еци кувди фӕрци (уӕхӕн кувдтитӕ ба ин, ӕвӕдзи, еу ӕма дууӕ н’ адтӕнцӕ) ӕнгъезуй фӕууинун, Ионӕ, ӕ ихӕслӕвӕрдӕй ка фӕттарстӕй ӕма ка фӕллигъдӕй, айдагъ уӕхӕн адӕймаг ке н’ адтӕй. Ӕ кувдӕй бӕрӕг ӕй, сӕрниллӕг ӕма боззӕрдӕ ке адтӕй, удта ’й Йеговӕмӕ игъосун ке фӕндадтӕй. Мадта дессаг нӕй, Йеговӕ ин еци рӕдуди фӕсте дӕр ӕ кувд ке фегъуста ӕма ’й идарддӕр дӕр ӕ пахампарбӕл ке нимадта.

6. Иннетӕмӕ лӕмбунӕг байгъосун ӕхсидзгӕ цӕмӕн ӕй?

⁶ Цӕмӕй иннетӕмӕ лӕмбунӕг игъосӕн, уой туххӕй гъӕуама сӕрниллӕг ӕма фӕразон уӕн. Адӕймагмӕ байгъосун хъӕбӕр ӕхсидзгӕ ӕй тӕккӕ минкъийдӕр ӕртӕ гъуддагей туххӕй. Фиццаг: тӕрхон кӕнунмӕ ин нӕбал тагъд кӕндзиан. Дуккаг: цӕбӕл тухсуй, уой фӕууиндзиан ӕма ’й хуӕздӕр лӕдӕрдзиан. Ӕма ӕртиккаг: адӕймагӕн банхус кӕндзиан, цӕмӕй ӕхуӕдӕг ӕхе хуӕздӕр балӕдӕра. Еуӕй-еухатт ӕй нӕхуӕдтӕ дӕр нӕ фӕллӕдӕрӕн, ци кӕнӕн, уой, цалинмӕ нӕ сагъӕстӕ ескӕмӕн нӕ радзорӕн, уӕдмӕ (Ӕмб. 20:5). Азий ка цӕруй, еу уӕхӕн хестӕр нӕлгоймаг радзурдта: «Еухатт еу хуӕрӕн, зунд амонун райдӕдтон, игъосгӕ имӕ нӕ бакодтон, уотемӕй. Загътон ин, ӕ дзуӕппитӕ ’й фӕххуӕздӕр кӕнун ке гъӕуй. Фӕстӕдӕр ба ’й базудтон, кӕсгӕ тухӕй ке кодта ӕма цӕмӕй ӕхе ӕмбурдмӕ бацӕттӕ кодтайдӕ, уой туххӕй ӕй дуйне рӕстӕг ӕма хъауритӕ  ке багъӕуидӕ». Мадта унаффӕ раттуни размӕ бал хестӕр нӕлгоймӕгтӕ гъӕуама адӕймагмӕ лӕмбунӕг байгъосонцӕ (Ӕмб. 18:13).

7. Йеговӕ Илийайӕн куд банхус кодта, уомӕй цӕбӕл ахур кӕнӕн?

⁷ Еуӕй-еу хуӕртӕ ӕма ӕнсувӕртӕн зин фӕууй, сӕ зӕрди медӕг ци ес, уой иннетӕн дзорун, куд сӕ исгъомбӕл кодтонцӕ, цӕхуӕн ӕгъдӕутти исирӕзтӕнцӕ, кӕддӕр сӕбӕл цидӕр хабар ке ӕрцудӕй кенӕ ба дзорагӕ ке нӕ ’нцӕ, уой туххӕй. Ӕргъуди кӕнӕн, Йеговӕ Илийайӕн куд банхус кодта, Йезавелӕй ӕхе ку римахста, уӕд. Илийа ӕ сагъӕстӕ ӕма ӕ тухститӕ Йеговӕн дзӕвгарӕ рӕстӕг нӕ дзурдта. Фал ин сӕ ку радзурдта, уӕд имӕ Йеговӕ хъӕбӕр лӕмбунӕг байгъуста, ба ’й федар кодта ӕма ин ӕхсидзгӕ куст баихӕс кодта (1 Пад. 19:1–18). Цӕмӕй нин адӕймаг, ӕ зӕрди ци ес, уой раргом кӕна, уой туххӕй рӕстӕг гъӕуй, фал ӕй ӕцӕгӕй балӕдӕрун ӕрмӕстдӕр гъе уӕд нӕ бон исуодзӕй. Йегови ку фӕнзӕн ӕма фӕразон ку уӕн, уӕд ӕй уиндзӕнцӕ, сӕ бон нӕбӕл ӕууӕндун ке ӕй, уой. Ӕма цӕбӕл тухсунцӕ, уой радзорунмӕ цӕттӕ ку уонцӕ, уӕдта нӕ гъӕудзӕй лӕмбунӕг байгъосун.

8. Райдайӕни 16:7–13 куд финст ӕй, уомӕ гӕсгӕ Йеговӕ Агарӕн куд банхус кодта?

⁸ Сари лӕггадгӕнӕг силгоймаг Агар Аврами уосӕ ку иссӕй, уӕд ӕхе хъӕбӕр фудконд райдӕдта дарун. Ку бауӕззау ӕй, уӕд е ’хсийнӕмӕ ӕнӕнвӕрсон каст кӕнун райдӕдта, сувӕллӕнттӕ ин ке н’ адтӕй, уой туххӕй. Еу афони имӕ Сарӕ гъе уотӕ исмӕстгун ӕй, ӕма ’й ӕфхуӕрун райдӕдта ӕма си уой туххӕй Агар фӕллигъдӕй (Райд. 16:4–6). Ӕнӕнхӕст ке ан, уомӕ гӕсгӕ, ӕвӕдзи, расагъӕс кодтайанӕ, Агар ӕхемӕ ӕгӕр ниццӕй ӕма ’й гъе уотӕ гъудӕй, зӕгъгӕ. Фал Йеговӕ Агармӕ ӕндӕр цӕстӕй кастӕй ӕма имӕ изӕди рарвиста. Изӕд ӕй ку иссирдта, уӕд ин ӕ зундахаст раййевунмӕ банхус кодта ӕма ин райарфӕ кодта. Агар ӕй балӕдӕрдтӕй, Йеговӕ ’й ке уинуй ӕма ин ӕ уавӕр хуарз ке лӕдӕруй, уой. Уотӕ дӕр ма загъта: «Ду дӕ алциуинӕг Хуцау... мӕн ка уинуй, е». (Бакӕсӕ Райдайӕн 16:7–13.)

9. Йеговӕ Агармӕ цӕхуӕн цӕстӕй кастӕй ӕма цӕмӕн?

⁹ Цума Йеговӕ Агармӕ ци цӕстӕй кастӕй? Йеговӕ зудта, Агар раздӕр ци цард кодта ӕма цитӕ бавзурста, уой (Ӕмб. 15:3). Агар ӕхуӕдӕг египеттаг адтӕй, фал дзиуиттаг бийнонти цардӕй ӕма хатгай, ӕвӕдзи, расагъӕс кӕнидӕ, ами неке гъӕун, зӕгъгӕ. Удта ӕ райгурӕн бӕстӕбӕл ӕма ӕ бийнонтӕбӕл дӕр ӕрхун куд нӕ кодтайдӕ. Удта Аврамӕн дӕр ӕ еунӕг уосӕ н’ адтӕй. Уӕди рӕстӕги Хуцауи еузӕрдон лӕггадгӕнгутӕн дӕр цалдӕргай уоститӕ уидӕ. Фал еци ӕгъдау Хуцау не ’ргъуди кодта (Матф. 19:4–6). Мадта дессаг нӕй, уой туххӕй бийнонти медӕг хилтӕ ӕма змӕнститӕ ке рауаидӕ. Йеговӕ ’й уидта, Агар раст ке н’ адтӕй, уой, фал ин уӕддӕр ӕ уавӕр лӕдӕрдтӕй ӕма ин банхус кодта.

10. Нӕ бон куд ӕй нӕ хуӕртӕ ӕма ӕнсувӕрти хуӕздӕр базонун?

¹⁰ Йеговӕ адӕни хуарз лӕдӕруй, ӕма ’й нӕ бон ӕй фӕнзун. Уой туххӕй ба архайӕ хуӕртӕ ӕма ӕнсувӕрти хуӕздӕр базонунбӕл. Сӕ хӕццӕ дзубанди кӕнӕ ӕмбурди размӕ дӕр ӕма ӕмбурди фӕсте дӕр. Сӕ хӕццӕ игъосун кӕнунмӕ цо, гӕнӕн ку уа, уӕдта сӕ уӕхемӕ рабадунмӕ ӕма ести ракомидзаг кӕнунмӕ дӕр ӕрбахонӕ. Гъе уӕд хуӕртӕ ӕма ӕнсувӕртӕмӕ ӕндӕр цӕстӕй ракӕсдзӕнӕ. Зӕгъӕн, ӕнӕнвӕрсон дӕмӕ ка фӕккастӕй, еци хуӕрӕ ӕфсӕрмигӕнагӕ разиндзӕй. Берӕ ’хца ка косуй, еци ӕнсувӕр ба дӕмӕ ӕхцауарзагӕ нӕбал кӕсдзӕй, фал рӕдау. Ӕ сувӕллӕнтти хӕццӕ ӕмбурдтӕмӕ ка ӕрбацӕуй  ӕма арӕх ка байрӕги кӕнуй, еци мадӕн ба ӕ бийнонтӕ ӕ нихмӕ ке цӕунцӕ, уой базондзӕнӕ (Иов 6:29). Е уобӕл дзорӕг нӕй, ӕма гъӕуама нӕхе кедӕр гъуддӕгти тъунсӕн (1 Тим. 5:13). Фал нӕ хуӕртӕ ӕма ӕнсувӕрти хуӕздӕр ку базонӕн, уӕд син сӕ уавӕр дӕр хуӕздӕр лӕдӕрдзиан.

11. Хестӕр нӕлгоймӕгтӕ хуӕртӕ ӕма ӕнсувӕрти дзӕбӕх цӕмӕн гъӕуама зононцӕ?

¹¹ Хестӕр нӕлгоймӕгтӕн уӕлдай ӕхсидзгӕдӕр ӕй, сӕ бӕрагӕ ка ӕй, еци хуӕртӕ ӕма ӕнсувӕрти дзӕбӕх зонун. Ӕркӕсӕн, районон цӕстӕдарӕгӕй ка лӕггадӕ кодта, уӕхӕн ӕнсувӕр Артури хабармӕ. Еухатт ӕндӕр хестӕр нӕлгоймаги хӕццӕ еу хуӕри рабӕрӕг кӕнунмӕ фӕццудӕнцӕ. Еци хуӕрӕ ба хъӕбӕр ӕфсӕрмигӕнагӕ адтӕй. Артур зӕгъуй: «Мах базудтан, ӕ сӕрихецау, сӕ киндзӕхсӕвӕрбӕл цалдӕр анзи ку рацудӕй, уӕд ке рамардӕй. Кӕд берӕ зиндзийнӕдтӕ бавзурста, уӕддӕр ӕ дууӕ кизги исгъомбӕл кодта ӕма син Йегови надбӕл ислӕуунмӕ банхус кодта. Уой фӕсте ба хъӕрӕу кӕнун райдӕдта ӕма имӕ депресси фӕззиндтӕй. Фал уотемӕй дӕр Йегови минкъийдӕр уарзун нӕ райдӕдта ӕма ибӕл абони дӕр гъе уотӕ федарӕй ӕууӕндуй. Мах ӕй фӕууидтан, еци хуӕрӕ нин фӕнзуйнаг ке ӕй» (Фил. 2:3). Еци районон цӕстӕдарӕг Йегови фӕнзта. Йеговӕ зонуй ӕ еузӕрдон лӕггадгӕнгути ӕма син сӕ рист лӕдӕруй (Рац. 3:7). Хестӕр нӕлгоймӕгтӕ дӕр се ’мбурди хуӕртӕ ӕма ӕнсувӕрти дзӕбӕх ку зононцӕ, уӕд син хуӕздӕр банхус кӕндзӕнцӕ.

12. Хуӕрӕ Ип Е е ’мбурдӕй еу хуӕри хуӕздӕр ке базудта, е ин ци пайда ӕрхаста?

¹² Кӕд хуӕртӕ ӕма ӕнсувӕртӕй ескӕмӕ мӕстгун фӕккӕнис, уӕд байархайӕ, цӕмӕй ӕй хуӕздӕр базонай, ӕма ’й уӕд хуӕздӕр лӕдӕрдзӕнӕ. Азий ка цӕруй, еу уӕхӕн хуӕрӕ Ип Е радзурдта: «Не ’мбурди еу хуӕрӕ хъӕбӕр гъӕрӕй фӕдздзоридӕ, ӕма мӕмӕ уотӕ кастӕй, цума ӕхе дарун ӕппундӕр нӕ зонуй. Фал, еухатт ба ӕ хӕццӕ игъосун кӕнунмӕ фӕццудтӕн ӕма ’й базудтон, ӕ ниййергутӕн базари кӕсалгӕ уӕйӕ кӕнунмӕ ке ӕнхус кодта. Уоми ба ’й гъӕр кӕнун гъудӕй, цӕмӕй сӕмӕ ӕлхӕнгутӕ цудайуонцӕ. Гъе уой фӕсте еу гъуддаг балӕдӕрдтӕн: цӕмӕй хуӕртӕ ӕма ӕнсувӕрти лӕдӕрон, уой туххӕй сӕ гъӕуама хуӕздӕр базонон». Дзурд дӕр ибӕл нӕййес, хуӕртӕ ӕма ӕнсувӕрти хуӕздӕр базонунбӕл архайун ке гъӕуй. Фал Библий унаффӕ, «уӕ зӕрдитӕ уӕрӕх райгон кӕнтӕ», зӕгъгӕ, ку нӕ иронх кӕнӕн, уӕд фӕнздзиан Йегови. Йеговӕ ба уарзуй «аллихузи адӕни» (1 Тим. 2:3, 4; 2 Кор. 6:11–13).

13. Райдайӕни 19:15, 16 куд финст ӕй, уомӕ гӕсгӕ Лот ку нӕ тагъд кодта, уӕд изӕдтӕ ци бакодтонцӕ ӕма цӕмӕн?

¹³ Еухатт Лот уӕхӕн уавӕри адтӕй ӕма ’й ӕнӕ ракӕнӕ-бакӕнӕй гъудӕй, Йеговӕ куд загъта, уотӕ бакӕнун. Дууӕ изӕди имӕ ӕрбацудӕнцӕ ӕма ин загътонцӕ, цӕмӕй ӕ бийнонти Содомӕй рахудтайдӕ. Цӕмӕн? Изӕдтӕ ин балӕдӕрун кодтонцӕ: «Аци бунат гъӕуама фесафӕн» (Райд. 19:12, 13). Фал ма иннӕ сӕумӕ дӕр Лот ӕма ӕ бийнонтӕ хӕдзари адтӕнцӕ. Изӕдтӕ бабӕй ӕй тагъд кӕнун райдӕдтонцӕ. Фал Лот уӕддӕр нӕ хӕлӕф кодта. Аци хабарбӕл сагъӕс кӕнгӕй, ӕвӕдзи, зӕгъдзӕнӕ, Лот Йегови амундтӕ нецӕмӕ ӕрдардта, зӕгъгӕ, ӕма ма ’й ӕгоммӕгӕс адӕймагбӕл дӕр банимайдзӕнӕ. Фал ӕй Йеговӕ нӕ ниууагъта. «Йеговӕ Лотӕн фӕттӕрегъӕд кодта» ӕма ин изӕдтӕ ӕ къохтӕбӕл ниххуӕстӕнцӕ ӕма ’й ӕ бийнонти хӕццӕ горӕтӕй рахудтонцӕ. (Бакӕсӕ Райдайӕн 19:15, 16.)

14. Йеговӕ Лотӕн цӕмӕн фӕттӕрегъӕд кодтайдӕ?

¹⁴ Йеговӕ Лотӕн цалдӕр гъуддагей туххӕй фӕттӕрегъӕд кодтайдӕ. Ка ’й зонуй, Лот горӕти алливарс ка цардӕй, еци адӕнӕй тарстӕй, ӕма уой туххӕй хӕдзарӕй рацӕунмӕ нӕ тагъд кодта. Ӕндӕр хабӕрттӕ дӕр ма си адтӕй. Лот ӕй зудта, хӕстӕгдӕр дӕлфӕзи песей къӕгъдтитӕ ке адтӕй, ӕма си кӕддӕр дууӕ паддзахи ке ниххаудтӕнцӕ (Райд. 14:8–12). Бийнонти хестӕр ке адтӕй, уомӕ гӕсгӕ ӕ бийнонтӕбӕл дӕр куд нӕ тухстайдӕ. Уомӕй уӕлдай ма Лот гъӕздуг лӕг адтӕй ӕма, ӕвӕдзи, Содоми дзӕбӕх хӕдзари цардӕй (Райд. 13:5, 6). Аци гъуддӕгтӕй еу дӕр Лотӕн рӕуонӕ н’ адтӕй, цӕмӕй Йеговӕмӕ еци фӕдбӕл ма байгъустайдӕ. Фал кӕд Лот фӕррӕдудӕй, уӕддӕр ӕй Йеговӕ рӕстгӕнӕгбӕл нимадта (2 Пет. 2:7, 8).

15. Адӕймагӕн тӕрхон кӕнуни бӕсти нӕ куд гъӕуй архайун?

¹⁵ Тӕрхон кӕнуни размӕ бал гъӕуама адӕймаги лӕдӕргӕ бакӕнай. Европӕй еу хуӕрӕ Вероникӕ дӕр уотӕ архайдта. Е зӕгъуй: «Ӕмбурди еу хуӕрӕ алкӕддӕр цидӕр мургъуз фӕууидӕ, удта хӕстӕг некӕмӕ цудӕй. Еуӕй-еухатт имӕ бацӕунмӕ дӕр тӕрсгӕ фӕккӕнинӕ. Фал еухатт расагъӕс кодтон:  „Ӕз уой бунати ку адтайнӕ, уӕд мӕ, ӕвӕдзи, ӕмбал гъудайдӕ“. Гъема имӕ бацудтӕн ӕма ’й бафарстон, куд ӕй, уобӕл. Ӕма мин е дӕр ӕ хабӕрттӕ ракодта. Нур ӕй дзӕвгарӕ хуӕздӕр лӕдӕрун».

16. Цӕмӕй тӕрегъӕдгӕнагӕ уӕн, уой туххӕй ковун цӕмӕн гъӕуй?

¹⁶ Кӕронмӕ нӕ ӕрмӕстдӕр Йеговӕ лӕдӕруй (Ӕмб. 15:11). Мадта си ӕнхус корӕ, цӕмӕй дӕ бон уа иннетӕмӕ уой цӕстӕй кӕсун ӕма син дӕ бон банхус кӕнун куд ӕй, уой лӕдӕрун. Хуӕрӕ Анжелӕ Йеговӕмӕ ке кувта, уой фӕрци иннети хуӕздӕр лӕдӕрун райдӕдта. Е ’мбурди еу хуӕри хӕццӕ хъӕбӕр зин дзорӕн иссӕй. Анжелӕ зӕгъуй: «Ӕнцондӕр адтӕй, еци хуӕри фудгин кӕнун ӕма ибӕл мӕ къох ракъуӕрун. Фал Йеговӕмӕ ракувтон, цӕмӕй мин еци хуӕри балӕдӕрунмӕ банхус кодтайдӕ». Цума ин Йеговӕ ӕ кувдбӕл дзуапп равардта? Анжелӕ зӕгъуй: «Игъосун кӕнунмӕ еумӕ рандӕ ан, уой фӕсте ба цалдӕр сахатти фӕдздзубандитӕ кодтан. Хъӕбӕр лӕмбунӕг имӕ игъустон. Нур ӕй никки фулдӕр уарзун ӕма мӕ хъӕбӕр фӕндуй ин ӕнхус кӕнун».

17. Нӕ федар фӕндӕ ци ӕй?

¹⁷ Гъӕуама уотӕ ма сагъӕс кӕнӕн, ӕма кӕцидӕр хуӕртӕ ӕма ӕнсувӕртӕн гъӕуй тӕрегъӕд кӕнун, кӕцидӕртӕн ба – нӕ. Алкедӕр си ӕхе зиндзийнӕдтӕбӕл ӕмбӕлуй Иони, Илийай, Агари ӕма Лоти хузӕн. Хатгай ба цидӕр зин уавӕри сӕхе фудӕй дӕр бахаунцӕ. Фал мах дӕр нӕхе фудӕй берӕ цидӕртӕ бавзарӕн. Йеговӕ дӕр нӕ уой туххӕй разӕнгард кӕнуй, цӕмӕй тӕрегъӕдгӕнагӕ уӕн (1 Пет. 3:8). Ӕгас зӕнхӕбӕл дӕр нин хъӕбӕр устур бийнонтӕ ес аллихузи адӕнӕй. Ӕма Йеговӕмӕ ку игъосӕн, уӕд еци бийнонти еудзийнадӕ федардӕр кӕндзиан. Мадта гъӕуама алкӕддӕр цӕттӕ уӕн лӕмбунӕг байгъосунмӕ, адӕймаги хуӕздӕр базонунмӕ ӕма тӕрегъӕд кӕнунмӕ.