1. Ndaga itshi yawaha Biblia idi muzuela mukunda nu Yehowa?

WAJIYA gusuanguluga egi athu azuele ndaga jiabola mukunda nu gilema giaye, nga phala yaye, nga muila waye ba? Ndo sha. Yana gutusuanguluisa diago ha gujiya egi, Yehowa ganago gutusophesa ha gutadila ndaga jinyi athu ana gumona! Ha gufezegesa, tangua profete Samuele gamonele ana a Yese, gamonele ndo ndaga yakhalele mumona Yehowa. Yehowa wawambelele Samuele egi mun’a Yese mumoshi udi naye gubua fumu gu Isalele. Uvi mona mutshi giwa? Tangua Samuele gamonele Eliyabe somi wa Yese, wazuelele egi ‘Giamatshidia, muthu Yehowa gatombi muene yowu udi mumagana haha gu phala yenji.’ Eliyabe wakhalele mumonega gu meso gifua fumu. “Uvi Yehowa wawambelele Samuele egi: ‘Utadigo phala nga guleha gua gitala gienji, ngamutunyi.’” Longo ditshi tuajiya guzula? Yehowa wazuelele luko egi: ‘Muthu wana gutala phala, uvi ame ngana gutala mutshima.’—1 Sam. 16:1, 6, 7.

2. Ha gutadila Yone 7:24, mukunda natshi tushigo naye gusophesa muthu phamba mu luholo tudi mu mumona gu meso? Fezegesa.

² Luholo tushigo athu atagana, mukut’etu agasue tuakhala nu khadilo dia gusophesa athu ako mukunda nu ndaga ana gukalagala. (Tanga Yone 7:24.) Uvi tuajiyilego gujiya ndaga jiavula jiatadila muthu gila tuamutala phamba gu meso. Ha gufezegesa, munganga nga udi genji watema gutshi, gajiyilego gujiya misongo yagasue ya mukhashi gula wamutala phamba gu meso. Udi naye gumutegelela muabonga ha gujiya misongo adi naye, misongo gakatele gale mualeha, nu ndaga jidi mumonesa egi muthu muene udi mukata. Munganga wajiya gukalegela radio nga échographie ha gujiya misongo idi mu muila wa muthu. Gula ndo, gajiyilego gusaga mukhashi mu luholo luawaha. Luholo lumoshi nu esue, gula  tudi mutala aphangi phamba gu meso, tuajiyilego gukotelesa ndaga jidi guasagesa. Tudi naye gukamba gujiya gula aphangi ene akhala athu a luholo lutshi. Tuanago gujiya ndaga jidi mu mitshima ya aphangi, hene yakhala lamba ha guakotelesa muabonga gifua Yehowa. Uvi tuajiya gukalagala ngolo ha gulandula gifezegeselo gia Yehowa. Mu luholo lutshi?

3. Luholo lutshi mene jia Biblia jidi mu longo edi jiajiya gutukuatesa ha gulandula gifezegeselo gia Yehowa?

³ Luholo lutshi Yehowa gana gukalegela akombeledi enji ndaga? Wana guategelela muabonga. Wana gutadila ndaga jia mu lujingu luawo. Nu wana gudihaga ha fundo diawo. Tangua tudi mutadila luholo Yehowa gakalegele ndaga gudi Yona, Eliya, Agar, nu Lota, tukambenu gujiya luholo lua gulandula gifezegeselo gienji tangua tudi mukalegela aphangi ndaga.

4. Mukunda natshi tuajiya gutangiza ndaga jiabola mukunda nu Yona?

⁴ Luholo tushigo mujiya ndaga jiavula jiatadila Yona, tuajiya gutangiza egi gakhalelego muthu wa gushila mutshima, nu gakhalelego wa gujinginyina. Yehowa wamutumile ha guya mulongesa enya gu Ninive lukuma lua guasophesa. Uvi ha fundo dia gutumagela Yehowa, Yona wanginyine mu masuwa ha guya gu khanda iko, ‘hagula gamuenewago gudi Yehowa.’ (Yona 1:1-3) Nga aye, wajiya gumutuma luko ha gutagenesa ginemo gienji ba? Ndo sha. Uvi, gudi nu ndaga yatumine Yehowa ha gumukalegela luko.—Yona 3:1, 2.

5. Longo ditshi wazula gudi Yona ha gutadila mbimbi jienji jidi mu Yona 2:1, 2, 9?

⁵ Mu gisambu giakalegele muene, Yona wamonesele diago gula wakhalele muthu wa luholo lutshi. (Tanga Yona 2:1, 2, 9.) Yona wakalegele isambu yavula, uvi gisambu giakalegele muene mu vumo dia ishui giana gutukuatesa ha gumumona gifua muthu wabonga, uvi ishigo phamba gifua muthu walengele. Mbimbi jienji jiamonesele diago egi wakhalele muthu wa gudibulumuisa, wakhalele nu khadilo dia guhana mersi, nu wazudile desizio dia gutumagela Yehowa. Tuajiyilego gudihula luholo Yehowa gatotesele gubola gua Yona, gategelele gisambu gienji nu galanduile (galundugile) gumukalegela gifua profete wenji!

6. Mukunda natshi gutegelela muabonga gudi nu ndando?

⁶ Ha gutegelela muabonga athu ako, tudi naye gukhala nu khadilo dia gudibulumuisa nu guhuiminyina. Mukunda natshi gumonesa khadilo edi gudi nu ndando? Thomo, mbatushigo mutangijila athu ako ndaga jiabola muphushi. Ya mbadi, mbatukamba gujiya luholo aphangi adi mudivua nu ndaga adi mukalagala, ngenyi mbayitukuatesa ha guazumba muavula. Ya thathu,  mbatukuatesa aphangi ha gukotelesa ndaga jidi mu mitshima yawo. Matangua ako, muthu gajiyilego gukotelesa luholo gadi gudivua, uvi wajiya gudikotelesa gula wata lumene lua ndaga idi gumusagesa. (Ish. 20:5) Mukulu mumoshi gu Asie udi muzuela egi: “Matangua ako, ngakhalele mudiangela guzuela uvi ngakhalelego gutegelela. Ngawambelele phangi mumoshi wa mukhetu egi udi naye gulondega luko muabonga mvutu gana guhana mu gudibungisa gua mu hungu. Gungima, ngajile mukotelesa egi gakhalelego mutanga muabonga, uvi wakhalele mutshita ngolo ha guhana mvutu.” Ndaga ya ndando idi egi, mukulu wagasue udi naye ‘gutegelela’ gutuama dia guhana muthu malongo!—Ish. 18:13.

7. Longo ditshi tuazula mu luholo Yehowa gakuatesele Eliya?

⁷ Yakhala lamba gudi aphangi ako ha guta lumene lua ndaga idi guasagesa mukunda nu ndaga atagenele najio, mukunda nu kutime ya gumbo diawo nga musonyi. Luholo lutshi tuajiya guakuatesa ha gutuwambela luholo adi gudivua? Tangiza luholo Yehowa gakuatesele profete Eliya tangua gakhalele mulenga Yezabele. Masugu avula abalegele gutuama egi Eliya awambele Sh’enji wa mu dilu ndaga jiakhalele gumusagesa. Yehowa wamutegelele muabonga. Gungima wahanele Eliya gikhesa nu mudimo wawaha wa gukalagala. (1 Maf. 19:1-18) Matangua ajiya gubalega avula gutuama egi aphangi avue ngolo jia gutuwambela ndaga idi guasagesa. Hene, tuajiya gukotelesa muabonga luholo adi gudivua phamba gula atutela lumene. Gula tudi nu guhuiminyina gifua Yehowa, aphangi mbaatuhagela mutshima nu mbaatutela mene jiawo. Hene, tangua adi gututela lumene, tudi naye guategelela muabonga.

8. Ha gutadila Gisendeselo 16:7-13, luholo lutshi Yehowa gakuatesele Agar?

⁸ Agar wakhalele muenya mudimo wa Sarai. Uvi tangua gahanewe ha gubua mukaji’a Abalama, wasendesele gutshita ndaga nu lulendo. Tangua Agar gamitshile, wasendesele gusegulula Sarai, handaga Sarai gakhalelego muvuala ana. Ndaga jiabolele muavula, hene Sarai gakayele Agar. (Gis. 16:4-6) Luholo tushigo athu atagana, tuajiya gutangiza egi Agar wakhalele muenya nguma nu yakhalele mutoga egi ahanewe ndola. Uvi Yehowa gakhalelego gumumona ngenyi. Hene gatumine muanjelo wenji gudi muene. Tangua muanjelo gamumonele, wamukuatesele ha gulondega khadilo dienji nu wamushimbigile. Mu tangua diene, Agar wajiyile egi Yehowa wakhalele gumumona nu wakhalele gujiya milonga yenji yagasue. Hene Agar gumutamegele egi ‘Nzambi wana gumona, . . . udi gungumona.’—Tanga Gisendeselo 16:7-13.

9. Mukunda natshi Nzambi gakuatesele Agar nu gisemo?

⁹ Ndaga itshi Yehowa gamonele gudi Agar? Wakhalele mujiya muabonga ndaga jia lujingu luenji nu milonga yakhalele gumusagesa. (Ish. 15:3) Agar wakhalele muenya gu Égypte, uvi wakhalele mujinga monzo ya muenya Hebelu. Tangua diko wakhalele gudivua gifua ngenji ba? Wakhalele muvua uhote wa enya fami yenji ba? Agar gakhalelego hakhenji mu ulo nu Abalama. Mu tangua dinyi, mala avula a gujinginyina akhalele nu akhetu avula. Uvi matangi a Yehowa akhalelego ngenyi mu gisendeselo. (Mat. 19:4-6) Hene, tuajiyilego gudihula gula tudi mumona ndaga jia ginjiongo nu fuwa mu fami. Yehowa wakhadile gujiya gamba ndaga yakadigile Agar mukunda nu Sarai yakhadile yabola, uvi wakotelesele muabonga luholo Agar gakhadile gudivua nu wamukuatesele nu gisemo.

10. Luholo lutshi tuajiya gujiya aphangi etu a mala nu a akhetu kiawaha?

¹⁰ Tudi naye gukotelesa ndaga idi musagesa aphangi gifua muana tshita Yehowa. Kamba gujiya aphangi aye a mala nu a akhetu muabonga. Kamba guta nawo maga gutuama nu gungima dia gudibungisa, nda nawo mu mudimo wa gulongesa,  gula luholo ludi guene, atamege gumbo diaye ha gudia nawo. Gula watshita ngenyi, mbawukotelesa egi, phangi yonu wana gumona gifua gashigo nu gisemo, mu guzuela guabonga wakhala muenya musonyi; phangi yonu aye wana tangiza egi wana kamba gukhala nu ndaga jiavula jia gujingila, wakhala wahana, nga ndo fami yinyi aye wana tangiza egi yana guza mu tangua diabola mu gudibungisa, ana gutagana nu umbalagaji. (Yobo 6:29) Idi yadiago egi, tushigo naye gudinginyisa mu ‘ndaga jishigo gututadila.’ (1 Tim. 5:13) Uvi, gujiya ndaga jidi musagesa aphangi etu a mala nu a akhetu gudi nu ndando, handaga mbagutukuatesa ha guakotelesa muabonga.

11. Mukunda natshi idi nu ndando egi akulu ajiye imeme muabonga?

¹¹ Akulu adi naye gujiya ndaga jia lujingu lua aphangi a mala nu a akhetu a mu hungu. Tuzule gifezegeselo gia phangi Artur yonu wakhalele mutadi muwendji. Wayile nu mukulu muko ha gutala phangi mumoshi wa mukhetu yonu wakhalele mumonega sonyi-sonyi. Artur udi muzuela egi: “Tuayile gumutala, hene tuajiyile egi, mulumi’enji wafile tangua diazonda gungima dia gudizula n’enji mu ulo. Ngatshima yakhala lamba, uvi muene wana gutshita yagasue ha gulongesa an’enji mbadi a akhetu ha guzumba Yehowa. Henyaha udi mulua nu ukhashi wa meso, nu wana gukata misongo ya matangi (dépression). Ngatshima idi ngenyi, muene wana zumba Yehowa nu udi wa gujinginyina gudi muene. Gifezegeselo gienji giatukuatesele diago muavula.” (Fili. 2:3) Mutadi muwendji owu walanduile gifezegeselo gia Yehowa. Yehowa wana gujiya imeme yenji nu malamba idi mumona. (Guz. 3:7) Akulu anyi ana gujiya imeme muabonga ana khala hehi ha guyikuatesa.

12. Gubonga gutshi phangi Yip Yee gahetele tangua akambele gujiya muabonga phangi mumoshi wa mukhetu wa mu hungu diawo?

¹² Gula wajiya ndaga jia lujingu lua aphangi Aklisto anyi anago gugusuanguluisa, mbawukhala hehi ha gudihaga ha fundo diawo. Tufezegese. Phangi mumoshi ya gu Asie mu jina dia Yip Yee udi muzuela egi: “Phangi mumoshi wa mukhetu wa mu hungu dietu wakhalele muzuela mangololo. Ngakhalele mutangiza egi gakhalelego nu makalegelo abonga a gunemesa athu ako. Uvi tangua tuayile nenji mu mudimo wa gulongesa, ngakotelesele egi wakhalele mutshita ngenyi ha gukuatesa mvuaji jienji ha guadigila jishui gu zando (gu kisalo). Wakhalele muzuela mangololo ha gutamega ba client.” Yip Yee udi muzuela luko egi: “Ngakotelesele egi, ha gujiya aphangi muabonga, ngudi naye gujiya ndaga jia lujingu luawo.” Yana toga gutshita ngolo jiavula ha gujiya aphangi  muabonga. Biblia yana zuela egi, kangulenu mitshima yenu. Hene, gula wayitumagela, idi mumonesa egi udi mulandula gifezegeselo gia Yehowa, handaga muene ‘wana tshigina athu agasue.’—1 Tim. 2:3, 4; 2 Kol. 6:11-13.

13. Ha gutadila Gisendeselo 19:15, 16, itshi anjelo akalegele tangua Lota akhalele mushiphidila? Mukunda natshi?

¹³ Mu tangua dimoshi ngenyi, yakhalelego yaleba gudi Lota ha gutumagele mbimbi jia Yehowa. Anjelo mbadi ajile gumbo dia Lota nu amuwambelele ha guzoga nu fami yenji mu dimbo dia Sodoma. Mukunda natshi? Azuelele egi: “Tudi mushiya dimbo dienu.” (Gis. 19:12, 13) Lusugu lua landuile, Lota nu fami yenji akhalele gawo luko monzo yawo. Anjelo awunguluishile luko Lota. Uvi “muene washiphidile.” Esue tuajiya gutangiza egi Lota wakhalele muto wakola, gakhalelego mutshigina gutumagela Yehowa. Uvi Yehowa gamubembelego. ‘Handaga Yehowa wamuvidile khenda,’ anjelo akuatele Lota nu fami yenji yagasue gu mago nu a azolele hanze ya dimbo.—Tanga Gisendeselo 19:15, 16.

14. Mukunda natshi Yehowa gavuidile Lota khenda?

¹⁴ Gudi nu ndaga jiavula jiatumine Yehowa ha guvuila Lota khenda. Yajiya gukhala egi Lota wakhalele muvua woma ha guzoga mu dimbo mukunda nu athu anyi akhalele hanze ya dimbo. Guakhalele nu ingonza iko. Lota wakhalele mujiya lumene lua mafumu mbadi anyi abuile mu mawina a goudron mu baba. (Gis. 14:8-12) Luholo gakhalele tata, Lota wakhalele muvua woma mukunda nu fami yenji. Luko, Lota wakhalele nu umonyi wavula, yajiya gukhala egi wakhalele nu inzo yawaha gu Sodoma. (Gis. 13:5, 6) Idi yadiago egi, gushigo nga ndaga imoshi mukatshi dia ndaga eji yakhalele naye gutuma Lota ha gutuna gutumagela Yehowa muphushi. Yehowa gatalelego gubola gua Lota, uvi wamumonele gifua “muthu wabonga.”—2 Phet. 2:7, 8.

15. Ha fundo dia gutangiza ndaga jiabola mukunda nu athu, itshi tudi naye gutshita?

¹⁵ Ha fundo dia gutangiza ndaga jiabola mukunda nu athu ako, tshita yagasue ha gukotelesa luholo adi gudivua. Phangi mumoshi gu Europe mu jina dia Veronica, watshitshile ngenyi. Udi muzuela egi: “Phangi mumoshi wa mukhetu wakhalele nu gikenene tangua diagasue. Wakhalele  gudikhadila muene hakhenji. Matangua ako, ngakhalele muvua woma ha gumuzuelesa. Uvi gungima ngatangijile egi, ‘Nga ame ha fundo dienji, ngudi naye gukhala nu funu ya mafuta.’ Ngazuelele egi ngudi gumuhula ndaga idi gumusagesa. Hene, wanguwambelele ndaga jiagasue jiakhalele gumusagesa! Henyaha, ngudi mujiya ndaga jienji jiavula diago.”

16. Mukunda natshi tudi naye gutoga ukuateshi gudi Yehowa ha gukudisa khadilo dia khenda?

¹⁶ Gushigo nu muthu muko wajiya gutukotelesa muabonga gifua Yehowa. (Ish. 15:11) Hene, mutoge ukuateshi ha gumona athu ako luholo luana guamona muene, nu ha gujiya luholo lua gudihaga ha fundo diawo. Gisambu giakuatesele phangi Anzhela ha gudihaga ha fundo dia athu ako. Akhalelego gudivua muabonga nu phangi mumoshi wa mukhetu wa mu hungu diawo. Anzhela udi muzuela egi: “Yakhalele gungutuma ha guzuela ndaga jiabola mukunda nu phangi muene, ‘nga ha gumutuna’. Uvi ngatogele Yehowa ukuateshi hagula ngukotelese mulonga wa phangi muene muabonga.” Yehowa wavuile gisambu gia phangi Anzhela ba? Anzhela udi muzuela luko egi: “Tuayile nenji mu mudimo wa gulongesa, nu tuatele nenji maga avula. Ngamutegelele muabonga sha. Henyaha, ngana gumuzumba muavula nu ngana khala hehi ha gumukuatesa.”

17. Desizio ditshi tuazula?

¹⁷ Ushigo naye gutomba aphangi a mala nu a akhetu anyi wajiya gumonesela khadilo dia khenda. Mukut’awo agasue ana gutagana nu milonga gifua yatagenele naye Yona, Eliya, Agar, nu Lota. Milonga yene yana guasegesa muavula matangua ako. Idi yadiago egi esue nji tuana gutagana nu milonga yavula yana gutusagesa. Hene Yehowa wana gututoga egi tudihage ha fundo dia athu ako. (1 Phet. 3:8) Gutumagela Yehowa guana gutukuatesa ha gujinga muabonga nu aphangi etu a ha mavu agasue. Hene, tuzule desizio dia gutegelela, dia gujiya aphangi etu a mala nu a akhetu muabonga, nu gudihaga ha fundo diawo.