1. Bible storyim wanem samting abaotem Jehovah wea iumi hapi for savve lo hem?

WASWE, iu laekem pipol for judgem iu bikos lo kala skin blo iu, sheip lo feis blo iu, or size lo body blo iu? Luk olsem, iu bae no laekem. Iumi hapi for savve dat Jehovah no judgem iumi followim hao pipol luk lo iumi! Olsem example, taem Samuel lukluk lo olketa son blo Jesse, hem no lukim wanem Jehovah lukim. Jehovah talem Samuel dat wanfala lo olketa son blo Jesse bae kamap king lo Israel. Bat which wan lo olketa? Taem Samuel lukim firstborn son blo Jesse, Eliab, hem sei olsem, ‘Ating man hia wea standap front lo Jehovah nao, bae Jehovah chusim.’ Eliab barava luk fit for king. Bat Jehovah sei lo Samuel “Yu no tingabaotem hem, nomata hemi tolfala man an hemi luknaes. Mi no laekem hem.” Wat nao leson? Jehovah sei: “Man hemi lukluk long [aotsaed] nomoa, bat mi [Jehovah] mi lukluk insaet long haat blong hem.”—Fas Samuel 16:1, 6, 7.

2. Olsem John 7:24 storyim, why nao iumi shud no judgem samwan followim wanem iumi lukim nomoa? Storyim example.

² From iumi no perfect, hem isi for iumi kwiktaem for judgem olketa narawan followim wanem iumi lukim. (Readim John 7:24.) Bat iumi savve lanem lelebet samting nomoa abaotem samwan from wanem iumi lukim witim eye blo iumi. Olsem example, nomata wanfala experience doctor wea garem big savve, bae hard for savve gud lo sik blo wanfala man sapos hem lukluk nomoa lo hem. For savve abaotem medical history blo datfala sikman, hu nao hem, or feeling blo hem, doctor mas lisin gud lo hem. Doctor maet sendem hem tu for X-ray for lukim insaed lo body blo hem. Sapos doctor no duim  datwan, hem maet givim rong treatment. Lo sem wei tu, iumi hard for savve gud lo olketa brata and sista blo iumi sapos iumi depend nomoa lo wanem iumi lukim. Iumi mas traem best for barava minim gud hu nao olketa. Hem tru, iumi no savve readim heart blo pipol, so hem hard for iumi savve lo olketa olsem hao Jehovah savve lo olketa. Nomata olsem, iumi savve traem best for followim example blo Jehovah. Lo wanem wei?

3. Hao nao olketa story lo Bible wea stap lo disfala study bae helpem iumi for followim example blo Jehovah?

³ Hao nao Jehovah deal witim olketa wea worshipim hem? Hem lisin lo olketa. Hem minim situation and background blo olketa. And hem tingim olketa. Taem iumi storyim hao Jehovah duim datwan lo Jonah, Elijah, Hagar, and Lot, iumi bae lukim hao iumi savve followim example blo Jehovah taem iumi deal witim olketa brata and sista blo iumi.

4. Why nao iumi maet garem negative tingting abaotem Jonah?

⁴ From iumi no savve lo evri samting abaotem Jonah, maet iumi tingse hem man wea hard for samwan depend lo hem, and hem no faithful tu. Jonah kasem klia komand from Jehovah for go talemaot judgment message lo Nineveh. Bat winim wei for obey, Jonah go insaed wanfala ship wea go lo opposite direction, hem “ranawe from [Jehovah].” (Jona 1:1-3) Sapos iu nao Jehovah, waswe, bae iu still givim nara chance lo Jonah for duim datfala assignment? Maet nomoa. Bat, Jehovah luksavve Jonah fit for kasem nara chance moa.—Jona 3:1, 2.

5. Wat nao iu lanem abaotem Jonah from toktok blo hem lo Jona 2:1, 2, 9?

⁵ Toktok wea Jonah talem lo prea blo hem showimaot wanem kaen man nao hem. (Readim Jona 2:1, 2, 9.) Datfala prea, wea luk olsem hem wanfala lo staka prea blo Jonah, hem helpem iumi for luksavve dat Jonah hem no wanfala man wea ranawe from assignment blo hem nomoa. Toktok wea Jonah talem showimaot hem hambol, tinghae, and disaed strong for obeyim Jehovah. Dastawe, Jehovah no lukluk nomoa lo wanem Jonah duim bat hem ansarem prea blo hem, and hem gohed for iusim hem olsem wanfala profet!

6. Why nao hem important for iumi lisin gud?

⁶ For lisin gud lo olketa narawan, iumi need for hambol and patient. Thrifala reason stap why datwan hem important. First reason, iumi bae no kwiktaem for garem negative  tingting abaotem pipol. Mek-tu, iumi bae minim feeling blo brata blo iumi and why hem duim samting, and datwan bae helpem iumi for duim samting wea showimaot iumi tingim hem. And mek-thri, taem iumi letem brata blo iumi for storyim feeling blo hem, datwan maet helpem hemseleva for luksavve lo wei blo hem. Samfala taem iumiseleva bat no minim gud feeling blo iumi go kasem taem iumi story abaotem lo narawan. (Provebs 20:5) Wanfala elder lo Asia sei olsem: “Mi tingim hao wantaem mi kwiktaem talem samting bifor mi herem full story. Mi talem wanfala sista dat hem need for kamap gud lo hao hem givim koment lo meeting. Bihaen nao mi just faendaot dat sista hia hem no savve read gud, and hem barava traem best mekem hem savve givim koment.” Dastawe, hem barava important for wanfala elder herem full story bifor hem givim kaonsel!—Provebs 18:13.

7. Wanem nao iu lanem from wei wea Jehovah deal witim Elijah?

⁷ Samfala lo olketa brata and sista blo iumi faendem hem hard for storyim feeling blo olketa bikos lo background blo olketa, culture, or wei blo olketa seleva. Wanem nao iumi savve duim for mekem hem isi for olketa storyim feeling blo olketa? Tingim hao Jehovah deal witim Elijah taem hem ranawe from Jezebel. Hem tekem staka day bifor Elijah storyim evri feeling blo hem lo Dadi blo hem lo heven. Jehovah barava lisin gud. Then hem encouragem Elijah and givim hem important waka for duim. (Fas Kings 19:1-18) Maet hem tek taem for olketa brata and sista feel free for story lo iumi, bat taem olketa duim datwan bae iumi just minim feeling blo olketa. Taem iumi patient olsem Jehovah, bae gogo olketa trustim iumi. Then, taem olketa laek for talem feeling blo olketa, iumi shud lisin gud lo olketa.

8. Olsem Jenesis 16:7-13 storyim, hao nao Jehovah helpem Hagar?

⁸ Bihaen slave gele blo Sarai, Hagar, hem kamap waef blo Abram hem duim wanfala karangge samting. From Hagar babule hem start for no respectim Sarai wea no garem pikinini. Datfala situation kamap moa worse, so Sarai raosem Hagar. (Jenesis 16:4-6) From iumi no perfect iumi maet tingse Hagar faendem ansa blo hem bikos hem praod. Bat Jehovah no ting olsem abaotem Hagar. Hem sendem angel go lo Hagar. Taem angel lukim Hagar, hem helpem hem for changem wei blo hem and hem blessim hem. Hagar luksavve dat Jehovah lukim hem and hem savve lo evri samting wea happen lo hem. Datwan muvim hem for sei dat God hem gohed for lukluk kam lo hem.—Readim Jenesis 16:7-13.

9. Wanem nao God luksavve lo hem taem hem deal witim Hagar?

⁹ Wanem nao Jehovah lukim lo Hagar? Jehovah savve gud lo laef blo Hagar and evri samting wea hem bin go thru lo hem. (Provebs 15:3) Hagar hem blo Egypt and hem stap witim olketa Hebrew. Waswe, samfala taem hem feel olsem wanfala stranger? Waswe, hem missim famili and hom blo hem? And tu, Hagar hem mek-tu waef blo Abram. Lo bifor, samfala faithful man garem winim wanfala waef. Bat datwan hem no plan blo God lo firstaem. (Matt. 19:4-6) Dastawe, diskaen arrangement savve kosim wei for jealous and wei for heit insaed famili. Jehovah no acceptim wei wea Hagar no showimaot respect lo Sarai, nomata olsem, iumi sure hem minim background and situation blo Hagar.

10. Wanem nao iumi savve duim for savve gud lo olketa brata and sista?

¹⁰ Iumi savve followim example blo Jehovah taem iumi trae for minim olketa narawan.  Iumi need for savve gud lo olketa brata and sista. Story witim olketa bifor and bihaen lo meeting, waka witim olketa lo ministry, and sapos fitim, invaetem olketa for kam kaikai lo haos. Taem iu duim olsem, maet iu bae luksavve hao sista wea iu tingse hem no kaen, really hem sista wea shame tumas, maet iu tingse wanfala brata lovem tumas selen, bat really hem man wea kaen tumas, or maet wanfala famili wea evritaem kam leit lo meeting, olketa kasem hard taem from famili againstim olketa. (Job 6:29) Hem tru, iumi shud no “poke nose long bisnis bilong narawan.” (1 Tim. 5:13) Bat, hem gud for savve abaotem olketa brata and sista and samting wea olketa feisim lo laef bikos datwan bae helpem iumi for minim wei blo olketa.

11. Why nao hem important for olketa elder savve gud lo olketa sheepsheep?

¹¹ Olketa elder nao main wan wea need for savve lo background blo olketa brata and sista wea olketa lukaftarem. Tingim example blo wanfala brata wea nem blo hem Artur, wea serve olsem circuit overseer. Hem and nara elder go visitim wanfala sista wea luk olsem hem savve fraet for story. Artur sei: “Mifala faendaot dat hasband blo hem dae no longtaem bihaen tufala marit. Nomata hem feisim olketa challenge, hem teachim tufala gele blo hem for lovem Jehovah. Bat eye blo hem start for nogud and hem garem sik depression. Nomata olsem, hem lovem Jehovah and garem strongfala faith. Mifala luksavve hao mifala savve lanem staka samting from gud example blo disfala sista.” (Phil. 2:3) Disfala circuit overseer hem followim example blo Jehovah. Jehovah savve lo olketa sheepsheep blo hem and hao olketa safa. (Eksodas 3:7) Olketa elder wea savve gud lo olketa sheepsheep bae savve hao for helpem olketa.

12. Hao nao Yip Yee kasem gud samting from hem traem best for savve lo wanfala sista lo kongregeson?

¹² Taem iu savve gud lo background blo wanfala brata or sista wea iu no laekem wei blo hem, maet datwan helpem iu for tingim hem. Tingim example blo Yip Yee wea stap lo Asia. Hem sei: “Wanfala sista lo kongregeson blo mi savve story big tumas. Mi feel olsem hem no garem gudfala wei. Bat taem mi waka witim hem lo ministry, mi faendaot dat bifor hem savve helpem parents blo hem for salem fish lo market. And hem mas shout big mekem olketa kastoma savve kam.” Yip Yee sei tu: “Mi luksavve for minim olketa brata and sista blo mi, mi need for savve lo background blo olketa.” Iumi need for traem best mekem iumi  savve gud lo olketa brata. Taem iumi followim kaonsel lo Bible for lovem pipol, iu followim example blo Jehovah wea lovem “evri difren kaen man.”—1 Tim. 2:3, 4; 2 Cor. 6:11-13.

13. Olsem Jenesis 19:15, 16 storyim, wanem nao olketa angel duim taem Lot gohed for delay, and why nao olsem?

¹³ Lo wanfala taem wea barava important for Lot obeyim instruction blo Jehovah, hem slow for duim datwan. Tufala angel visitim Lot and talem hem for mas tekem famili blo hem go aot from Sodom. Why nao olsem? Bikos tufala sei olketa bae distroem datfala ples. (Jenesis 19:12, 13) Lo next morning, Lot and famili blo hem still stap yet lo haos. So olketa angel hia warnim Lot moa. Bat Lot gohed for delay. Iumi maet judgem Lot and sei hem no warim nomoa warning, and hem disobey tu. Bat, Jehovah no givap lo hem. Bikos Jehovah tingim hem, tufala angel hia holem hand blo olketa and leadim olketa go aot from datfala taon.—Readim Jenesis 19:15, 16.

14. Why nao maet Jehovah tingim Lot?

¹⁴ Samfala reason stap why Jehovah tingim Lot. Maet Lot fraetem olketa pipol wea stap aotsaed lo datfala city, dastawe hem no kwiktaem for lusim datfala ples. Samfala nara danger tu stap. Lot maet savve abaotem tufala king wea foldaon insaed olketa hol wea fulap lo tar wea stap lo wanfala valley wea stap klosap. (Jenesis 14:8-12) From Lot hem wanfala hasband and dadi, masbi hem wari tumas abaotem famili blo hem. And tu, Lot garem selen, so maet hem garem wanfala naes haos lo Sodom. (Jenesis 13:5, 6) Bat, olketa samting hia hem no gudfala reason for Lot no stretawe obeyim Jehovah. Nomata olsem, Jehovah no luk nomoa lo olketa mistek blo Lot bat hem ting lo hem olsem wanfala “raeteous man.”—2 Pet. 2:7, 8.

15. Winim wei for judgem samting wea narawan duim, wanem nao iumi shud duim?

¹⁵ Winim wei for judgem samting wea narawan duim, hem gud for traem best for minim feeling blo datfala man. Veronica, wanfala sista lo Europe, hem trae for duim datwan. Hem  sei: “Wanfala sista evritaem nomoa hem no luk hapi, and hem no laek fren witim eniwan. Samfala taem mi savve fraet for go story witim hem. Bat mi ting ‘Sapos mi nao hem, bae mi needim wanfala fren.’ Mi disaed for askem hem abaotem hao hem feel. And hem start for talemaot wanem nao stap lo heart blo hem! Distaem, mi minim staka samting moa abaotem hem.”

16. Why nao iumi shud prea for Jehovah helpem iumi for mekem grow wei for tingim narawan?

¹⁶ Jehovah nomoa man wea barava minim iumi. (Provebs 15:11) So askem hem for helpem iu for ting lo olketa narawan olsem hao hem ting lo olketa, and for helpem iu luksavve hao for iu showimaot iu tingim olketa. Prea nao helpem Anzhela for tingim olketa narawan. Hem faendem hem no isi for deal witim wanfala sista lo kongregeson blo hem. Anzhela sei: “Hem bae isi tumas for mi tok againstim datfala sista and for les lo hem. Bat mi askem Jehovah for helpem mi minim datfala sista.” Waswe, Jehovah ansarem prea blo hem? Anzhela sei: “Mitufala go preach tugeta and bihaen mitufala story for longfala taem. Mi lisin gud and mi showimaot mi tingim hem. Distaem mi barava lovem hem, and mi disaed strong for helpem hem.”

17. Wanem nao iumi disaed strong for duim?

¹⁷ Hem no fitim for chusim nomoa samfala brata or sista wea iumi tingse olketa fit for kasem help blo iumi. Evriwan lo olketa feisim olketa problem olsem Jonah, Elijah, Hagar, and Lot. Samfala taem problem wea olketa kasem hem kamap bikos olketa seleva nao kosim. Bat really, iumi evriwan duim samting wea savve kosim problem for iumiseleva samfala taem. So hem fitim nomoa for Jehovah askem iumi for minim feeling blo olketa narawan. (1 Pet. 3:8) Taem iumi obeyim Jehovah, iumi strongim wei for wan mind insaed disfala spesol famili blo iumi evriwea lo world. So taem iumi deal witim each other, iumi barava laek for lisin, savve gud lo olketa narawan, and showimaot iumi tingim narawan.