1. ¿Jehová Diosca gentecunashnachu shujcunataca tratan?

TUCUICUNALLATAMI ñavitalla ricushpa tratachunga na munapanchi. Gentecuna shina tratajpipash, Jehová Diosca na shina tratanllu. Chaimi cushilla sintiripanchi. Caipi pensaripashun, Jesé runagupa churicunata profeta Samuel ricushpaca na Jehová Dios ricushcashnaca ricurcachu. Jehová Diosca Jesepa churicunamandaca shujca Israelmanda rey tucuna cashcatami villarca. Shinapash Jesepa punda churi Eliabta ricushpaca Samuelca cashnami nirca: “Mandaj Diosca, cai runatapachami jatun mandaj cachun agllashca canga” nishpa. Samuelca Eliabta ricushpaca paimi shuj ali rey tucunga yashpami pensarirca. Shinapash profeta Samuel “shina yajujpimi Mandaj Diosca, Samuelta cashna nirca: ‘Ama pai juyailla runa cajtalla, shinallata jatun runa cajtalla ricuichu. Paitaca, ñucami yangapi churani’” nishpa. ¿Imatata yachajupanchi? Gentecuna ‘paipa ñavipi ricurishcatalla ricujpipash’ Jehová Diosca gentecunapa ‘shungutami ricun’ (1 Sam. 16:1, 6, 7).

2. Juan 7:24​pi nishca shinaca ¿imamandata shujcunamandaca na yangata imatapash ninalla capanchi? Shuj ejemplomanda parlapai.

² Juchayucuna caimandami pitapash na rijsishpata shujcunamandaca imatapash ninchilla (Juan 7:24, liingui). Chaimi pitapash ricui na ricuica na rijsita ushapanchi. Por ejemplo, shuj doctorca ashtaca experienciata charishpa, ashtacata estudiashca cashpapash shuj pacienteta ricushpallaca paciente imata charijtaca na yachai ushangachu. Chaipaca imata nanachishcata, imashina sintirijushcatapashmi ali tapuchishpa uyana can. Imashinapacha cashcata yachangapaca shuj radiografiata rurachunbashmi cachaita ushan. Doctor caita na rurashpaca paciente imata charishcataca na ali yachangachu. Shina cuendami ñucanchi huauquipanicunata yangata ricushpallaca paicuna imashinapacha cashcataca na yachai ushapanchi. Chaimandami paicunata ali rijsingapaj esforzarina capanchi. Ñucanchica Jehová Dios shina gentecunapa shungutaca na ricui ushapanchichu. Chaimi paicuna imashina sintirishcataca na yachai ushapanchi. Shinapash  Jehová Dios imashina tratashcashnami ñucanchipash tratangapaj esforzarina capanchi. Chaipaca ¿imatata rurana capanchi?

3. Cai temapica ¿imatata yachajupashun?

³ Jehová Diosca paipa sirvijcunataca siempremi uyan. Paicuna ima pasashcata, cunanbi imashina causajushcatapashmi yaipi charin. Chaimandami llaquishpa tratan. Cai temapica Jehová Dios imashina Jonás runaguta, Eliasta, Agar huarmita, Lottapash juyaihuan tratashcatami yachajupashun. Shinallata Jehovapa ejemplota catishpa ñucanchipash ñucanchi huauquipanicunata ali tratana cashcatami yachajugripanchi.

4. Jonasmandaca ¿imatata pensanchiman?

⁴ Jonás runaguhuan ima pasashcata na cabalta yachaimandami huaquinbica Jonaspica na confiaita usharinllu, paica na cazunata yachanllu yashpami pensaita ushanchiman. Jehová Diosca Nínive llactapi causajcunaman chai llactata tucuchina cashcata villachunmi Jonastaca cacharca. Shinapash Jehová Diosta cazunapa randica shuj barcota japishpami ‘caruman rirca’ (Jon. 1:1-3). Ñucanchi ñavi ricuipica Jonaspica ñana confianchimanllu carca. Shinapash Jehová Diosca cutinmi Jonasmanga shuj oportunidadta curca (Jon. 3:1, 2).

5. Jonás 2:1, 2, 9​pica ¿imatata Jonasmandaca yachajupanchi?

⁵ Jatun pescadopa vijsa ucupi cashpa, Jehovata imashina mañashcata ricushpami Jonás imashinapacha cashcataca ali yachai ushapanchi (Jonás 2:1, 2, 9, liingui). Jonasca tauca viajecunatami Jehovataca mañarca. Paipa mañaicunata ricushpami Jonás imashina cashcata yachai ushapanchi. Jehovapa mandashcata na pactachingapaj munashpapash Jonasca Jehovata mañashpaca humilde, agradecido, tucui shunguhuan Jehovata sirvingapaj munashcatami ricui ushapanchi. Chaimi Jehová Diosca paipa mañaicunata uyashpa profeta shina sirvishpa catichun saquirca.

6. ¿Imamandata shujcunata ali uyanaca minishtirishcapacha can?

⁶ Shujcunata ali uyangapaca humildecuna, na ñapash culirajllacunami cana capanchi. ¿Imamandata shujcunata ali uyanaca minishtirishcapacha can? Primero, shujcunata ali uyashpami pimandapash na pandacunata yuyashun. Segundo, ñucanchi huauquipanicunata ali uyashpami, paicuna imashina sintirijushcata, paicuna imamanda huaquin cosascunata rurajtapash intindipashun. Shinami paicunataca llaquishpa tratai ushapashun. Tercero, paicunata uyashpami paicunallata imata rurajushcata cuenta japichun ayudai ushapanchi. Huaquinbica imashinapacha sintirijushcata pimanbash parlashpami imashina  cashcata cuenta japi ushapanchi (Prov. 20:5). Asia llactamanda shuj anciano huauquica ninmi: “Shuj viajeca na uyaimandami yangata imatapash nishcata cuenta japircani. Shuj panigutaca tandanajuipi comentariocunata cungapaca tapuicunata alimi uyana cangui nircanimi. Jipamanmi, chai paniguca na liita ushashcata, comentangapapash ninanda esforzarijta yachaj chayarcani” nishpa. Chaimandami huauqui ancianocunaca ‘narapash uyashpata’ pitapash na yangata consejanalla can (Prov. 18:13).

7. Jehová Dios profeta Eliasta imashina tratashcamandaca ¿imatata yachajupanchi?

⁷ Huaquin huauquipanicunaca paicuna imashina causashcamanda, imashina viñashcamandami paicuna imashina sintirishcataca na fácil parlanlla. Paicunataca ¿imashinata ayudai ushapanchi? Chaipaca profeta Eliasta Jehová Dios imashina tratashcata ricupashunchi. Eliasca reina Jezabelmandami pacajushpa rijurca. Ashtaca punllacuna jipami pai imashina sintirijushcataca Jehová Diosman villarca. Elías parlajujpica Jehová Diosca ali alimi uyarca. Uyashca jipami, animashpa cunanga imata rurana cashcata villarca (1 Rey. 19:1-18). Huaquin huauquipanicunapashmi paicuna imashina sintirishcataca na parlanlla. Shinapash Jehová Dioshnallata ñucanchipash pacienciata charishpami ñucanchi huauquipanicuna imashina sintirijushcataca yachai ushapanchi. Tiempohuanmi paicuna imashina sintirishcataca paicunallata parlanga. Paicuna parlajujpica ali alimi uyana capanchi.

8. Génesis 16:7-13​pi nishca shinaca ¿imashinata Jehová Diosca Agar huarmitaca ayudarca?

⁸ Sarái huarmiguca Agar shuti sirvij huarmitami charirca. Agar huarmica Abranba huarmi tucushpami Saraitaca na respetohuan tratarca. Agar vijsayu quedashpaca, Saraitaca huahuacunata na chari ushashcamandami nalicachishpa ricui callarirca. Chaimandami Sarái culirashpaca Agartaca ninanda llaquichi callarirca. Chaimi Agarca pacajushpa rirca (Gén. 16:4-6). Juchayucuna cashcamandaca Agar jariyashca caimanda, paipa culpamandallatami shina tratai tucurca nishpa pensai ushanchiman. Shinapash Jehová Diosca na shina pensarcachu. Chaimandami shuj angelta cachashpa Agarta ayudarca. Cai angelca Agar huarmigu cambiai ushachunmi ayudarca. Shinallata paita Jehová Dios bendiciashcatapashmi villarca. Chaimi Agarca paita ricujushcata, paipa causaipi imashinapacha cashcata Jehová Dios rijsishcata cuenta japirca. Chaimi: “Canga, ricujuj Taita Diosmi cangui” nirca (Génesis 16:7-13, liingui).

9. Agar huarmigupa causaipica ¿imacunatallata Jehová Diosca ricurca?

⁹ Agar huarmigu pundacuna imashina sufrishcataca Jehová Diosca alimi yacharca (Prov. 15:3). Paica Egiptomandami carca. Shinapash hebreocunapa familiapurapimi causajurca. Paica shuj llactamanda caimandami solalla sintirin carca. Paipa familiatapash, paipa llactatapashmi ninanda llaquin carca. Shinallata na paillachu Abranba huarmi carca. Chai tiempocunapica huaquin Jehovata sirvijcunaca na shuj huarmitallachu charirca. Jehová Dios gentecunata rurajushpaca, jaricuna tauca huarmicunata charichunga na rurarcachu (Mat. 19:4-6). Chai tiempocunapi shina causanajushcamandami Agar causajushca familiapica contrarishpa causanajushcanga. Agar Saraita na respetohuan tratashcata ricushpapash, Jehová Diosca na Agartaca shinallata tratarcachu. Chaipa randica Agar sufrijushcata ricushpami Jehová Diosca llaquishpa juyaihuan tratarca.

10. Ñucanchi huauquipanicunata ali rijsingapaca ¿imatata rurana capanchi?

¹⁰ Ñucanchi huauquipanicunata intindingapaca Jehová Diospa ejemplotami catina capanchi. Ñucanchi huauquipanicunata ali rijsingapaj esforzaripashunchi. Ñucanchi huauquipanicunahuanga tandanajui nara callarijpillata, tandanajui jipapash paicunahuan parlangapaj esforzaripashunchi. Villachinamanbash paicunahuan llujshipashunchi. Usharijpicarin huasimanbashmi invitanalla capanchi. Shinami, pihuanbash na llevarijlla  shuj paniguca gentecunahuan parlanata manllaj cashcata cuenta japipashun. Shinallata shuj charij charij huauquica na mitsa cajta, na culquipilla yuyajtami cuenta japipashun. O shuj paniguca paipa huahuacunandi huasipi jarcaicuna tiashcamanda tandanajuicunaman jipayashcalla chayamujtapashmi cuenta japipashun (Mat. 7:1). Ñucanchicunaca na shujcunapa causaipi ‘satirinachu’ capanchi (1 Tim. 5:13). Shinapash ñucanchi huauquipanicunata rijsina, paicuna imamanda shina cashcata intindinaca alimi can.

11. ¿Imamandata ancianocunaca huauquipanicunataca ali rijsina can?

¹¹ Anciano huauquicunami ashtahuanbachaca huauquipanicunataca rijsina can. Cunanga Artur shuti superintendente de circuitopa ejemplota ricupashunchi. Huauqui Artur, shuj anciano huauquipash shuj panigutami visitangapaj rirca. Chai paniguca gentecunahuan parlanata manllanshnami ricurirca. Huauqui Arturca ninmi: “Cai paniguca pai cazarashca huaquin huatacuna jipalla paipa cusagu huañushcatami parlarca. Llaquicunahuan cashpapash chai paniguca paipa ishcai ushicuna Jehová Diosta sirvichunmi yachachirca. Shinapash cunanbica ñana ali ricui ushajushcata, depresión ungüita charishcatapashmi villarca”. Huauqui Arturca ninbashmi: “Chai tucui llaquicunata charishpapash chai paniguca Jehová Diosta sirvishpami catin. Chaimi paimandaca ashtacata yachajuparcanchi” (Filip. 2:3). Jehová Diosca paipa sirvijcunataca ali alimi rijsin. Ima llaquicunatalla aguantanajushcatapashmi ali yachan. Jehovapa ejemplota catishpami cai superintendente huauquica shuj huauquipanicunata ashtahuan ali rijsingapaj esforzarin (Éx. 3:7). Shinaca tucui huauquipanicunata ali rijsishpaca anciano huauquicunaca ashtahuanmi ayudaita ushanga.

12. Shuj paniguta ali rijsinaca ¿imashinata Asia llactamanda panigutaca ayudarca?

¹² Shuj huauqui o shuj pani talvez yangamanda imatapash nishpa culirachijpica, paita ali rijsinami imamanda shina cajta ali intindichun ayudanga. Asia llactamanda shuj panigutami shina pasarca. Paica ninmi: “Ñuca congregacionbica shuj ñañaguca siempremi shinllita parlan carca. Shina parlajta uyashpaca chai ñañaguca yapa shinlli shinllita parlan nishpa pensan carcani. Shuj punllaca chai ñañaguhuanmi villachinaman llujshircani. Chaipimi chai ñañaguca paipa taitacunata pescadota mercadopi jatungapaj ayudan cashcata villahuarca. Chaimi imamanda shinllita parlan cashcata intindircani. Paica mercadopi gentecuna uyachunmi shina parlan cashcarca”. Paniguca ninbashmi: “Shuj turiñañagucunata intindingapaca paicunata ashtahuan rijsina cashcatami yachajurcani” nishpa. Ñucanchi huauquipanicunata rijsinaca huaquinbica dificilmi can. Shinapash Bibliapi nishca shinami ñucanchicunaca ñucanchi huauquipanicunata juyangapaj esforzarina capanchi. Shina rurashpami Jehová Dios  shina tucui laya gentecunata juyashcata ricuchipashun (1 Tim. 2:3, 4; 2 Cor. 6:11-13).

13. Génesis 19:15, 16​pi nishca shinaca ¿imashinata angelcunaca Lotta ayudarca?

¹³ Shuj viajeca Lotpa causai peligropi cajpipashmi, paica Jehová Diostaca na ucha cazurca. Lottaca ishcai angelcuna visitashpami, Jehová Dios Sodoma llactata llaquichigrijushcata villarca. Chaimi Lottapash, paipa familiatapash Sodomamanda uchalla llujshichun mandarca (Gén. 19:12, 13). Shinapash cayandi punllaca Lotpash paipa familiapash paicunapa huasipirami carca. ‘Lot na ucha llujshijpimi’ chai angelcunaca cutin chaimanda llujshichi nirca. Chaita yachashpami talvez pensaita ushanchiman, Lotca na Jehová Diosta cazungapaj munarcachu nishpa. Shinapash Jehová Diosca Lotta ‘llaquimandami’ paita, paipa familiatapash maquimanda japishpa Sodoma llactamanda llujchichun angelcunata cacharca (Génesis 19:15, 16, liingui).

14. Jehová Diosca ¿imashinata Lottaca tratarca?

¹⁴ Jehová Diosca ¿imamandata Lottaca juyaihuan tratarca? Sodoma muyundi llactapi nali gentecuna tiashcamandami Lotca paipa huasita saquingapaca na munashcanga. Shinapash na chai peligrolla tiarcachu. Sodoma ladolla pugru pambacunapica pozo utujucunami tiarca. Chai utujucunapi ishcai reycuna urmashcatami Lotca yachashcanga. Chaimi paipash chai utujucunapi urmanata manllanayachishcanga (Gén. 14:8-12). Lotca paipa huarmigumanda, paipa ishcai ushicunamandapashmi preocuparishcanga. Shinallata charij charij, ali huasitapashmi charishcanga (Gén. 13:5, 6). Chaimandami Lotca Jehová Diostaca na uchalla cazushcanga. Shinapash Jehová Diosca Lotpa pandarishcacunataca na ricurcachu. Chaipa randica Lottaca ‘alita rurajmi’ cangui nirca (2 Ped. 2:7, 8).

15. Pitapash nalicachishpa ricujunapa randica ¿imatata rurana capanchi?

¹⁵ Pitapash nalicachishpa ricujunapa randica, paita ali rijsingapami esforzarina capanchi. Verónica shuti paniguca chaita rurangapami esforzarirca. Paica ninmi: “Shuj ñañaguca imagumandapash culirashcallami yalin carca. Chaimi pihuanbash na llevarin carca. Huaquinbica paihuan parlanatapashmi manllanayan carca. Shinapash paita ricushpaca, ñucapash paishna cashpaca  shuj amigata charishpami ali caiman yan carcani. Chaimi chai ñañagu imashina sintirishcata yachangapaj munaimandami paihuan parlangapaj esforzarircani. Chaipica tucuitami chai ñañaguca parlahuarca. Cunansi paitaca ashtahuanmi intindini”.

16. Shujcunata intindingapaca ¿imamandata Jehovata mañanaca minishtirishcapacha can?

¹⁶ Jehová Diosllami ñucanchitaca alipacha intindin (Prov. 15:11). Chaimi ñucanchipash shujcunata Jehová Dioshna ricungapaj, juyaihuan tratangapapash ayudahuai nishpa mañanalla capanchi. Jehovata mañanami Anzhela shuti panigutaca shujcunata juyaihuan tratachun ayudarca. Paipa congregacionmanda shuj paniguhuanmi Anzhela paniguca na ali llevarita ushajurca. Paica ninmi: “Chai ñañaguta nalicachishpa parlaimanllami carcani. Shinapash Jehovatami chai ñañaguta intindingapaj ayudahuai nishpa mañarcani”. Anzhela paniguca ninbashmi: “Shuj punllami chai ñañaguhuan villachingapaj llujshircani. Villachishca jipaca huaquin horascunatami paihuan parlashpa quedarcani. Paitaca ali alimi uyarcani. Paita uyashca jipaca paita ayudangapami munarcani” nishpa.

17. ¿Imata rurangapata esforzarina capanchi?

¹⁷ Shuj huauquita o shuj panita juyaihuan tratanataca na agllanachu capanchi. Tucuicunallatami Jonás, Elías, Agar, Lot shina llaquicunata charipanchi. Huaquingunaca paicunallatami chai llaquicunapica satirishca. Shinapash ciertota parlashpaca tucuicunallatami imapash problemacunapi satirishcanchi. Jehová chaicunata ricushpami caishuj chaishuj juyaihuan tratarichun mandan (1 Ped. 3:8). Jehovapa mandashcata cazushpami diferente cashpapash tucui huauquipanicunahuan shujlla shina tandanajushca caita ushapashun. Chaimi tucui ñucanchi huauquipanicunataca Jehová Dios tratashcashnallata tratangapaj esforzarina capanchi.