1. So vakerela i Biblija bašo Jehova, hem soske adava utešinela amen?

DALI bi mangea o manuša te sudinen tuke sprema adava savi boja isi tut ki koža, sar izgledinea ili kobor kile isi tut? Verojatno na. Kobor tano utešno so džanaja kaj o Jehova na kerela peske mislenje baši amende sprema adava so dikhjola pe samo jakhencar! Na primer, keda dikhlja e Jeseeskere čhaven, o Samoil na dikhlja adava so dikhlja o Jehova. O Jehova vakergja akale prorokoske kaj jekh taro e Jeseeskere čhave ka ovel cari ko Izrael. Ama, kova čhavo? Keda dikhlja e najbare čhave, e Elijave, o Samoil vakergja: „Sigurno anglo Jehova tergjola leskoro pomazaniko!“ O Elijav čače izgledinela sine sar cari. Ama, o Jehova vakergja e Samoileske: „Ma dikh adava sar izgledinela, ni adava soj tano učo, soske me otfrlingjum le“. So sikljovaja taro akava? O Jehova vakergja: „O manuš dikhela adava so dikhjola pe jakhencar, a o Jehova dikhela adava so isi ko vilo“ (1. Sam. 16:1, 6, 7).

2. Sprema Jovan 7:24, soske na valjani te sudina e javeren sprema adava sar izgledinena? Vaker primer.

² Adaleske so siem nesovršena but puti sigate keraja amenge mislenje bašo javera sprema adava sar izgledinena. (Čitin Jovan 7:24.) Ama, našti te doznajna but baši nekaste samo taro adava so dikhaja. Na primer, čak jekh but šukar hem iskusno doktori nane te džanel sa bašo jekh pacienti samo ako dikhela le. Mora šukar te šunel le te šaj te džanel save simptomija isi le, sar osetinela pe ili save problemija sastipaja sine le angleder. O doktori šaj ka mangel te kerel hem rendgen-snimka te šaj te dikhel o andrune organija. Ako na kerela adala bukja, tegani šaj te del le pogrešno dijagnoza.  Slično, amen da našti te haljova celosno amare phralen hem phenjen samo ako dikhaja len avrijaldan. Mora te trudina amen te dikha adava so na dikhjola odma — save tane andraldan. Džangjola pe, amen našti te čitina e manušengere vile, hem adaleske našti nikogaš doborom šukar te haljova e javeren sar o Jehova. Sepak, šaj te da amendar sa te šaj te dža palo leskoro primer. Sar?

3. Sar šaj o bibliska izveštaija te pomožinen amenge te postapina sar o Jehova?

³ Sar postapinela o Jehova ple slugencar? Ov šunela len. Osven adava, lela ko predvid lengere okolnostija hem o bukja kola so doživingje angleder. Isto agjaar, sikavela lenge sočuvstvo. Te dikha sar kergja o Jehova akava e Jonaja, e Ilijaja, e Agaraja hem e Lotea. Palo adava ka dikha sar šaj amen da te postapina agjaar amare phralencar hem phenjencar.

4. Soske šaj te ovel amen lošno mislenje bašo Jona?

⁴ Adaleske so na džanaja sa o bukja, šaj te mislina amenge kaj o Jona sine manuš koleste so našti te verujnel pe, pa čak kaj nane verno. Ov dobingja zadača lično taro Jehova te vakerel osuda baši Ninevija. Ama, namesto te šunel le, o Jona uklilo ko brodi so džala sine ki javer strana te šaj te našel „dur taro Jehova“ (Jona 1:1-3). Dali tu bi dea sine e Jonaske panda jekh šansa te popravinel pli greška? Verojatno na. Ama, o Jehova mislingja kaj akava proroko zaslužinela dujto šansa (Jona 3:1, 2).

5. So sikljovaja taro e Jonaskere lafija soj pišime ko Jona 2:1, 2, 9?

⁵ E Jonaskiri molitva, džikote sine ko e mačheskoro vogi, sikavela amenge savo manuš sine ov. (Čitin Jona 2:1, 2, 9.) Akaja molitva e Jonaskiri — kova so sigurno često molinela pe sine — pomožinela amenge te na dikha ki leste samo sar manuš so našlja tari pli zadača. Leskere lafija sikavena amenge kaj sine ponizno, blagodarno hem odlučno te ovel poslušno e Jehovaske. Na čudinela amen adava so o Jehova na koncentriringja pe ki leskiri greška! Namesto adava, ov šungja leskiri molitva hem ponadari da koristingja le sar proroko.

6. Soske tano važno šukar te šuna e javeren?

⁶ Te šaj te šuna šukar e javeren, valjani te ova ponizna hem strpliva. Isi amen najhari trin pričine soske tano šukar te kera adava. Prvo, nane te sigjara te kera amenge negativno mislenje bašo javera. Dujto, ka haljova sar osetinela pe amaro phral ili phen hem soske kerela nešto, a adava ka pomožinel  amenge te ova posočuvstvitelna. Hem trito, ka mukha te vakerel sar osetinela pe, soske agjaar šaj ka haljol nesave bukja baši peste. Ponekogaš korkori amen na haljovaja amare čuvstvija sa džikote na vakeraja len ko glaso (Izr. 20:5). Jekh starešina tari Azija vakerela: „Jekh puti slučingja pe mange te vakerav nešto jekhe phenjake bizo angleder te šunav la. Vakergjum lake kaj valjani te trudinel pe te del pošuže komentarija. Pokasno haliljum kaj na džanela šukar te čitinel hem kaj ni hari nane lake lokho te komentirinel“. Akava sikavela kobor tano važno sekova starešina prvo te šunel te šaj te džanel o faktija, a palo adava te del sovet (Izr. 18:13).

7. So sikljovaja taro način sar o Jehova postapingja e Ilijaja?

⁷ Nesave phralenge hem phenjenge nane lokho te keren lafi bašo ple čuvstvija, adaleske so šaj doživingje nešto angleder ili asavko tano lengoro mentaliteti ili karakter. So šaj te kera te šaj te vakeren amenge sar čače osetinena pe? Razmislin sar postapingja o Jehova e Ilijaja keda našlja tari Jezavela. Nakhle but dive angleder o Ilija te vakerel ple nebesno Dadeske so mučinela le. O Jehova šukar šungja le, a palo adava ohrabringja le hem dengja le jekh važno zadača (1. Car. 19:1-18). Šaj amare phralenge hem phenjenge ka valjanel vreme te šaj te ovel len doverba ki amende hem te vakeren amenge sar čače osetinena pe. Ama, ako siem strpliva sar o Jehova, ka šaj te ovel len doverba ki amende. Ko krajo, keda ka oven spremna te keren amencar lafi bašo ple čuvstvija, valjani šukar te šuna len.

8. Sprema 1. Mojseeva 16:7-13, sar pomožingja o Jehova e Agarake?

⁸ I Agara, e Sarajakiri sluginka, počmingja te postapinel nerazumno otkeda uli e Avrameskiri romni. Keda ačhili khamni počmingja te dikhel sar potele pestar e Saraja, kola so na sine la čhave. I situacija uli doborom lošno so čak i Agara našlja, adaleske so i Saraja počmingja te ponižinel la (1. Moj. 16:4-6). Sar nesovršena manuša šaj but sigate te mislina kaj i Agara sine jekh zlobno džuvli koja so dobingja adava so zaslužingja. Ama, o Jehova na dikhlja ki late agjaar. Ov bičhalgja lake angeli. Keda arakhlja la, o angeli pomožingja lake te meninel plo stavi hem dengja la bereketi. I Agara halili kaj o Jehova celo vreme dikhela la sine hem kaj tano svesno so slučinela pe lake. Oj vakergja leske: „Tu sian Devel so dikhela... okova so dikhela man“. (Čitin 1. Mojseeva 16:7-13.)

9. So lelja ko predvid o Jehova baši Agara?

⁹ So dikhlja o Jehova ki Agara? Ov sine svesno bašo adava kotar avela hem džanela sine sa so nakhlja (Izr. 15:3). I Agara sine Egipkjanka koja so živinela sine ko evrejsko kher. Dali nekogaš sine la čuvstvija kaj na mangena la? Dali falinela lake sine lakiri familija hem lakiri phuv? Osven adava, na sine samo oj e Avrameskiri romni. Ko purano vreme, nesave taro verna sluge e Devleskere sine len poviše romnja. Ama, ko početok e Jehovaskiri namera bašo brako na sine asavki (Mat. 19:4-6). Adaleske, ni najhari na čudinela amen so ko asavke familie but puti sine ljubomora hem bari holi. Iako o Jehova na opravdingja adava so i Agara na poštujnela sine e Saraja, šaj te ova sigurna kaj lelja ko predvid lakoro poteklo hem lakere okolnostija.

10. Sar šaj te zapoznajna pošukar amare phralen hem phenjen?

¹⁰ Šaj te ova sar o Jehova agjaar so ka trudina amen te haljova amare phralen hem phenjen. Adaleske, zapoznajn len pošukar. Ker lencar lafi angleder hem palo sostanok, džan zaedno ki služba hem ako šaj, vikin len ko gosto. Agjaar šaj ka doznajne baši lende nešto  so na džanea. Na primer, šaj mislinea tuke kaj nesavi phen na mangela te družinel pe, a oj tani samo ladžutni. Šaj mislinea kaj nesavo phral tano materijalisti, ama ustvari, ov tano but darežlivo. Ili palem, ka doznajne kaj nesavi phen čhavencar, koja so često kasninela ko sostanok, isi la protivenje (Rim. 14:4). Normalno, na valjani te mešina amen „ko e javerengere bukja“ (1. Tim. 5:13). Sepak, šukar tano te džana nešto bašo amare phralja hem phenja ili bašo adava so doživingje ko životo. Adava šaj te pomožinel amenge te haljova len pošukar.

11. Soske tano važno o starešine šukar te pendžaren ple phralen hem phenjen?

¹¹ Posebno o starešine valjani te džanen nešto poviše bašo phralja hem phenja kolenge so grižinena pe. Razmislin bašo primer e phraleskoro Artur, kova so služingja sar pokrainsko nadgledniko. Zaedno javere starešinaja posetingje jekhe phenja kolake so mislingje kaj tani ladžutni. O Artur vakerela: „Oj vakergja amenge kaj nekobor berša otkeda khuvgja ko brako lakoro rom mulo. Iako sine la pharo životo, sikavgja ple duje čhaen te mangen e Jehova hem verno te služinen leske. Isto agjaar, vakergja amenge kaj isi la problemija jakhencar hem kaj isi la depresija. Iako nakhela taro sa adava, sine jasno kaj isi la baro mangipe hem silno vera ko Jehova. Halilem kaj but šaj te sikljova taro lakoro šukar primer“ (Fil. 2:3). Akava pokrainsko nadgledniko gelo palo e Jehovaskoro primer, kova so pendžarela ple slugen hem džanela lengere dukha (2. Moj. 3:7). O starešine kola so šukar pendžarena ple phralen hem phenjen tane ki pošukar položba te pomožinen lenge.

12. Sar pomožingja jekhe phenjake tari Azija adava so pošukar zapoznajngja jekhe phenja taro sobranie?

¹² Keda zapoznajnea pošukar nesave phrale ili phenja so šaj nervirinela tut, verojatno poviše ka haljove le. Te dikha jekh primer. Jekh phen koja so živinela ki Azija vakerela: „Ko mlo sobranie isi jekh phen so kerela but glasno lafi. Mislingjum kaj oj nane kulturno. Ama, keda sium sine laja ki služba, doznajngjum kaj angleder bikinela sine mačhe ko pazari zaedno ple roditelencar. Mora sine te ovel glasno te šaj te privlečinel e mušterien. Haliljum kaj mora pošukar te zapoznajnav mle phralen hem phenjen te šaj te haljovav len“. Točno tano kaj valjani te trudina amen te šaj pošukar te zapoznajna amare phralen hem phenjen. Sepak, keda šunaja o sovet tari Biblija te širina amare vile, džaja palo e Jehovaskoro primer, kova so mangela sa e manušen (1. Tim. 2:3, 4; 2. Kor. 6:11-13).

13. Sprema 1. Mojseeva 19:15, 16, so kergje o angelija keda dikhle kaj o Lot zadržinela pe, hem soske?

¹³ Ko jekh važno momenti taro plo životo, o Lot na šungja odma e Jehovaskere jasna upatstvija. Duj angelija ale ki leste hem vakergje leske te ikalel ple familija avrijal taro Sodom. Soske? Ola vakergje leske: „Ka uniština akava than“ (1. Moj. 19:12, 13). O javer dive, o Lot ple familijaja panda sine khere. Adaleske o angelija palem predupredingje le, ama ov ponadari da zadržinela pe sine. Šaj te mislina amenge kaj o Lot na halilo seriozno adava so vakergja leske o Jehova, pa čak kaj na sine poslušno. Ama, o Devel na otkažingja pe lestar. I Biblija vakerela: „E Jehova sine le sočuvstvo baši leste“. Adaleske o angelija astargje le taro vas hem iklile tari diz. (Čitin 1. Mojseeva 19:15, 16.)

14. Soske o Jehova šaj sikavgja sočuvstvo e Loteske?

¹⁴ E Jehova šaj sine le poviše pričine soske te sikavel sočuvstvo e Loteske. O Lot šaj na mangela sine te džal peske kheral adaleske so darala sine taro manuša soj tane avrijal tari diz. Sine javera da bukja so šaj daravena le. O Lot verojatno šungja kaj ki jekh dolina so sine paše, duj carija pele ko hor dupke kola so sine pherde katranea (1. Moj. 14:8-12). Sar rom hem dad, o Lot sigurno sine sekirimo ple familijake. Osven adava, ov sine barvalo manuš, hem verojatno sine le šužo kher ko Sodom (1. Moj. 13:5, 6). Džangjola pe, nijekh taro akala bukja na sine izgovor te na šunel odma e Devle. Sar i te ovel, o Jehova na koncentriringja pe ki e Loteskiri greška, nego dikhela le sine sar pravedno manuš (2. Pet. 2:7, 8).

15. Namesto te sudina e javeren, so valjani te kera?

¹⁵ Namesto te sudine ili te kritikujne e javerengere postapke, trudin tut te haljove sar osetinena pe. Jekh phen so vikinela pe Veronika kergja baš akava. Oj vakerela: „Jekh phen nikogaš na sine raspoložimi hem na družinela pe sine nikasaja. Ponekogaš darava sine te džav ki late. Ama, mislingjum mange: ’Te ovav sine ko lakoro than, sigurno ka valjanel mange amal‘. Adaleske odlučingjum te pučav sar osetinela pe. Hari po hari počmingja  te ovel poslobodno mancar hem te vakerel mange sar osetinela pe. Akana haljovava la but pošukar“.

16. Soske valjani te molina e Jehova te pomožinel amenge te ova sočuvstvitelna?

¹⁶ Samo o Jehova šaj celosno te haljovel amen (Izr. 15:11). Adaleske, molin le te pomožinel tuke te dikhe e javeren sar so dikhela len ov, hem te džane sar te sikave lenge sočuvstvo. I molitva pomožingja jekhe phenjake so vikinela pe Anžela te ovel posočuvstvitelno sprema jekh phen taro lakoro sobranie kolaja so na nakhela sine šukar. I Anžela vakerela: „Najlokho ka ovel sine te počminav te kritikujnav la hem te izbeginav la. Ama, molingjum e Jehova te pomožinel mange te haljovav la“. Dali o Jehova odgovoringja lake ki molitva? Oj vakerela: „Siem sine ki služba a palo adava saatencar kergjem lafi. Trudingjum man sočuvstvitelno te šunav la. Akana mangava la but poviše hem odlučno sium te pomožinav lake“.

17. Ko so valjani te ova odlučna?

¹⁷ Našti te birina kola phralja hem phenja zaslužinena te haljova len, a kola na. Šaj nesave lendar — slično sar o Jona, o Ilija, i Agara hem o Lot — korkori kergje peske o problemija. Ama, realno sarinen sine amen problemija kola so kergjem len amenge korkori. Adaleske, razumno tano soske o Jehova adžikerela amendar te sikava sočuvstvo e javerenge (1. Pet. 3:8). Keda šunaja e Jehova, keraja te ovel pozoralo o jekhipe ki amari posebno megjunarodno familija. Adaleske te ova odlučna te šuna šukar amare phralen hem phenjen, te zapoznajna len pošukar hem te sikava lenge sočuvstvo.