1. Καβά πράγμας σο λοκχιαρέλα αμαρό γκι σικλιάσα ι Ιεχωβάσκε κατά Γραφή;

ΚΑ ΜΠΕΪΝΤΙΝΕΝΑΣ άμα ο γιαβερά κα ντικχένας τουμαρό χρώμας, τουμαρό μούι ή καζόμ τθουλέ ή σανέ ισινέν για τι κρίνεν-τουμέν; Μάλλον νάα. Καζόμ λοκχιόλα αμαρό γκι σο τζανάσα ότι ο Ιεχωβά να κρίνελα-αμέν οντουλέσταρ σο ντικχένα ο γιακχά ι τζενένγκε! Για παράδειγμας, κάνα ο Σαμουήλ ντικχλάς ι Ιεσσαίσκε τσσαβέν, να ντικχλάς οντουβά σο ντικχέλας ο Ιεχωβά. Ο Ιεχωβά βακερντάς λέσκε ότι εκ τσσαβό ι Ιεσσαίσκο κα αβέλας βασιλιάς κο Ισραήλ. Αλλά κον σαριλένταρ; Κάνα ο Σαμουήλ ντικχλάς ι πιο μπαρέ τσσαβές, σο βακερένας λέσκε Ελιάβ, βακερντάς: «Σίγουρα ανταλές τραμπιντάς ο Ιεχωβά». Ο Ελιάβ ντικχίντιβελας σαρ βασιλιάς. «Αλλά ο Ιεχωβά βακερντάς κο Σαμουήλ: “Μα ντικχ σαρ ισί αβριάλ ντα καζόμ βουτσσό ισί, σόσκε με να τραμπιντόμ-λες”». Σο σικλιάσα; Ο Ιεχωβά βακερντάς: «Ο τζενό ντικχέλα οντουβά σο ντικχίντιβελα, αλλά ο Ιεχωβά ντικχέλα αντρέ κο γκι».​—1 Σαμ. 16:1, 6, 7.

2. Σόσκε δεν πρέπει τι κρίνας εκχέ τζενές οντουλέσταρ σο ντικχίντιβελα αβριάλ σαρ βακερέλα ο εδάφιος Ιωάννης 7:​24; Βακερέν εκ παράδειγμας.

² Σαρ ατελείς τζενέ, σαρέ σιγκιαράσα τι κρίνας ι γιαβερέν οντουλέσταρ σο ντικχίντιβελα αβριάλ. (Διαβάνεν Ιωάννης 7:​24) Αλλά ναστί αγαβάσα μπουτ πράγματα εκχέ τζενέσκε οντουλέσταρ σο ντικχένα αμαρέ γιακχά. Για παράδειγμας, εκ γιατρός, ατζέ-ντα άμα ισί μπουτ λατσσό πι μπουτιάτε, ναστί σικλιόλα μπουτ πράγματα εκχέ τζενέσκε άμα κα ντικχέλ-λες σάντε. Πρέπει τι ασουνέλ-λες προσεκτικά για τι αγαβέλ σο τθερέλας, σαρ νιωθίνελα αντρέ πέστε ή σο νασφαλιπέ τθερέλα. Μπορεί ατζέ-ντα τι μανγκέλ λέσταρ τι κερέλ εκ ακτινογραφία για τι ντικχέλ σο αβέλα-πες αντρέ λέσκε σωμάστε. Άμα να κα κερέλ-λες ανταβά, μπορεί τι ντελ-λες λάθος φάρμακος. Αντικάς αμέν-ντα, ναστί αγαβάσα ντιπ ι  πφραλέν ντα ι πφενίν σάντε άμα ντικχάσα σαρ ισί αβριάλ. Πρέπει τι ντικχάς παλάλ οντουλέσταρ σο ντικχίντιβελα, τι ντικχάς σο τζενέ ισί μπαγιά αντρέ πουμέντε. Οκιά μπάνταρ, αφού ναστί ντικχάσα σο τθερένα πουμαρέ γκίστε, ναστί κα αγαβάς ποτές αζόμ λατσσές ι πφραλέν σαρ ο Ιεχωβά. Όμως, μπορίνασα τι κεράς ο πιο λατσσό για τι μοιάζας πιο μπουτ λέστε. Σαρ;

3. Σαρ κα βοηθίνεν-αμέν ο ιστορίες ι Γραφιάκε σο κα ντικχάς ανταλέ μαθημάστε τι μοιάζας κο Ιεχωβά;

³ Σο κερέλα ο Ιεχωβά πι υπηρετόνγκε; Ασουνέλα-λεν. Αγαβέλα οντουλά σο νακχλέ ντα σαρ ισί λένγκι ζωή ακανά. Ντα πφαμπόλα λένγκε. Καζόμ κα σικλιάς σαρ κερντάς-λεν σαρέ ανταλά κο Ιωνάς, κο Ηλίας, κι Άγαρ ντα κο Λωτ, ντικχέν σο πρέπει τι κεράς για τι μοιάζας λέστε οντουλέντζαρ σο κεράσα αμαρέ πφραλένγκε ντα πφενίνγκε.

4. Σόσκε μπορεί τι τθεράς μπέτι άποψη ι Ιωνάσκε;

⁴ Αμέν, σο να τζανάσα-λεν σαρέ ι Ιωνάσκε, μπορεί τι βακεράς ότι ισινέ εκ τζενό σο ναστί ντέσα λέσκε μπέσα ή ατζέ-ντα εκ τζενό σο να ισινέ πιστός. Βοβ λιντάς ξεκάθαρη εντολή κατά Ιεχωβά τι βακερέλ ότι η Νινευή κα καταστραφίντιβελ. Αντίς όμως τι ντελ καν, τσσουντάς-πες εκχέ καραβίστε ντα γκιλό οκιά μπάνταρ για τι νασέλ «ντουρ κατά Ιεχωβά». (Ιωνάς 1:​1-3) Τουμέν, κα ντένας κο Ιωνάς ατζέκ εκ ευκαιρία τι κερέλ οντουβά σο βακέρντιλοας λέσκε; Μάλλον νάα. Όμως, ο Ιεχωβά κερντάς-λες ανταβά.​—Ιωνάς 3:1, 2.

5. Σο σικλιόνα ι Ιωνάσκε λέσκε λαφίνταρ σο ισί κο εδάφια Ιωνάς 2:1, 2, 9;

⁵ Ο Ιωνάς σικαντάς σο τζενό ισινέ πι προσευχιάσαρ. (Διαβάνεν Ιωνάς 2:1, 2, 9) Οντιά προσευχή​—σίγουρα εκ κατά μπουτ σο κερντάς—​βοηθίνελα-αμέν τι αγαβάς μπουτ πιο λατσσές ι Ιωνάς αντίς τι ντικχάς-λες σάντε σαρ εκ τζενό σο μουκχλάς πο διορισμός. Λέσκε λάφια σικαβένα ότι ισινέ ταπεινός, σικαβέλας εκτίμηση ντα μανγκέλας μπουτ τι ντελ καν ι Ιεχωβάς. Νανέ παράξενος σο ο Ιεχωβά να ατσσιλό σάντε οντουλέντε σο κερντάς, απαντιντάς λέσκε προσευχιάτε ντα συνεχιντάς τι χρησιμοποιήνελ-λες σαρ προφήτης!

6. Σόσκε αξίνελα τι ασουνάς προσεκτικά;

⁶ Για τι ασουνάς προσεκτικά ι γιαβερέν, πρέπει τι αβάς ταπεινοί ντα τι κεράς υπομονή. Ντικχέν σάντε τριν πράγματα σο σικαβένα σόσκε ισί λατσσό τι κεράς-λες ανταβά. Πρώτον, να κα πακιάς λάθος πράγματα ι τζενένγκε. Δεύτερον, κα αγαβάς σαρ νιωθίνελα εκ πφραλ ντα σόσκε κερέλα κάποια πράγματα ντα αντικάς κα πφαμπάς λέσκε πιο μπουτ. Ντα τρίτον, μπορεί τι βοηθίνας-λες  τι σικλιόλ κάτι πι νεαυτόσκε. Ισί φαρ σο ούτε αμέν να αγαβάσα μπαγιά σο τθεράσα αμαρέ γκίστε μέχρι τι κεράς λάφι ανταλέσκε γιαβερέντζαρ. (Παρ. 20:5) Εκ πρεσβύτερος κι Ασία βακερέλα: «Εκ φαρ κερντόμ ο λάθος τι κεράβ λάφι πριν τι ασουνάβ. Βακερντόμ εκχέ πφενιάκε ότι πρέπει τι ντελ πιο λατσσέ απαντήσεις κι συνάθροιση. Σοράν, σικλιλόμ ότι να τζανέλας τι διαβάνελ λατσσές ντα ότι κερέλας μπαρί προσπάθεια για τι ντελ απαντήσεις». Καζόμ σημαντικός ισί ι κάθε πρεσβυτερόσκε τι «ασουνέλ σαρ ισί μπαγιά ο πράγματα» πριν τι ντελ συμβουλή!​—Παρ. 18:13.

7. Σο σικλιόνα οντουλένταρ σο κερντάς ο Ιεχωβά κο Ηλίας;

⁷ Μερικά πφραλά ντα πφενιά δυσκολίντιβενα τι κερέν λάφι οντουλένγκε σο νιωθίνενα ιτιρί οντουλένταρ σο νακχλέ, ή κατά χαρακτήρας σο τθερένα. Σαρ κα βοηθίνας-λεν τι πουτρέν αμένγκε πουμαρό γκι; Ντεν-τουμέν γκοντί σο κερντάς ο Ιεχωβά κο Ηλίας κάνα νασλό τι γκεραβέλ-πες κατά Ιεζάβελ. Νακχλέ μπουτ ντιβεσά για τι πουτρέλ ο Ηλίας ντιπ πο γκι πι ουράνιε Νταντέστε. Ο Ιεχωβά ασουντάς προσεκτικά. Σοράν, ντινάς ι Ηλιάς ζορ ντα εκ σημαντική μπουτί. (1 Βασ. 19:​1-18) Μπορεί αμαρέ πφραλά ντα πφενιά τι χρειαζίντιβεν χρόνος μέχρι τι νιωθίνεν άνετα τι κερέν αμέντζαρ λάφι, αλλά σάντε αζομάν κα αγαβάς σο τθερένα μπαγιά πουμαρέ γκίστε. Άμα κεράσα υπομονή σαρ ο Ιεχωβά, καζόμ κα νακχέλ ο καιρός κα ντεν αμένγκε μπέσα. Ντα κάνα κα αβέν έτοιμοι τι βακερέν αμένγκε σαρ νιωθίνενα, πρέπει τι ασουνάς-λεν προσεκτικά.

8. Σαρ ντινάς ο Ιεχωβά βοήθεια κι Άγαρ σαρ βακερένα ο εδάφια Γένεση 16:​7-13;

⁸ Η Άγαρ, η υπηρέτρια σο τθερέλας η Σαραΐ ντιντιλί σαρ ρομνί κο Άβραμ. Σοράν όμως κερντάς εκ μπαρό λάθος. Κάνα ατσσιλί κχαμνί, αρχισάλι τι πρασάλ πι κυριά, σο να τθερέλας πιρέ τσσαβέν. Ο πρόβλημας μπαριλό αζόμ μπουτ σο η Σαραΐ παλντιντάς-λα. (Γέν. 16:​4-6) Σαρ ατελείς τζενέ, αμέν μπορεί τι βακεράς ότι η Άγαρ ισινέ εκ μπουτ γκεραλί τζουβέλ σο αξίνελας οντουβά σο αβιλό λάκε. Αλλά ο Ιεχωβά ντικχλάς πιο μπουτ πράγματα κι Άγαρ. Μπουτσσαντάς λάκε εκχέ αγγελός. Κάνα αρακχλάς-λα ο άγγελος, βοηθιντάς-λα τι αλλάνελ ντα ευλογιντάς-λα. Η Άγαρ αγαντάς ότι ο Ιεχωβά τθερέλας πο γιακχά οπρά-λάτε ντα τζανέλας τα πάντα λάκε. Νικίστιλο λάταρ τι βακερέλ ι Ιεχωβάσκε: “Ισινάν Ντεβέλ σο ντικχέλα-λεν σαρέ, . . . οντουβά σο ντικχέλα-μαν”.​—Διαβάνεν Γένεση 16:​7-13.

9. Σόσκε σικαντάς λατσσιπέ ο Ντεβέλ κι Άγαρ;

⁹ Σο ντικχλάς ο Ιεχωβά κι Άγαρ; Τζανέλας μπουτ λατσσές οντουλά σο νακχλάας ανγκλέ πι ζωγιάτε ντα σο νταϊντιντάας. (Παρ. 15:3) Η Άγαρ ισινέ Αιγύπτια ντα τζουβντιόλας εκχέ εβραϊκέ κχερέστε. Μήπως μπάζιμα αγαβέλας ότι να μανγκένας-λα; Μήπως σικλιντίνελας πι φαμιλιάκε ντα πι τθεμέσκε; Να τθερέλας σάντε λα ρομνί ο Άβραμ. Οντουλά μπρεσά, μερικά πιστά μουρσά να τθερένας σάντε εκχέ ρομνιά. Αλλά ανταβά να ισινέ ο σκοπός σο τθερέλας ο Ιεχωβά ι τζενένγκε. (Ματθ. 19:​4-6) Να κερέλα αμένγκε ιτς εντύπωση σο ανταβά ανέλας ζήλια ντα χολί κο τζουβλιά. Ο Ιεχωβά τζανέλας ότι ισινέ λάθος σο η Άγαρ να σικαντάς σεβασμός κι Σαραΐ. Αλλά αγαβέλας-ντα σαρ νιωθίνελας ντα σο νακχλάς πι ζωγιάτε οτθάρ σικαντάς λάκε λατσσιπέ.

10. Σαρ κα σικλιάς πιο λατσσές αμαρέ πφραλέν ντα πφενίν;

¹⁰ Κα μοιάζας κο Ιεχωβά άμα κεράσα ο πιο λατσσό για τι αγαβάς ο εκ ι γιαβερές. Σικλιόν πιο λατσσές τουμαρέ πφραλέν ντα πφενίν. Κερέν λέντζαρ λάφι πριν ντα σοράν κατά συναθροίσεις, νικιόν λέντζαρ κο έργος  ντα, άμα αβέλα-πες, καλίνεν-λεν χαμάσκε. Άμα κα κερέν-λες ανταβά, μπορεί τι σικλιόν ότι εκ πφεν σο ντικχίντιβελα σουταλί κι πραγματικότητα ισί λατζανί, εκ πφραλ σο αμντίνενας ότι μανγκέλας μπουτ ο λοβέ ισί φιλόξενος ντα εκ πφεν σο μπουτ φαρ αργίνελα τι αβέλ κι συνάθροιση πι τσσαβέντζαρ τζάνα λάσαρ κόντρα ο γιαβερά. (Ιώβ 6:​29) Σίγουρα δεν πρέπει τι “ανακατούντιβας κι γιαβερένγκε μπουτιά”. (1 Τιμ. 5:​13) Αλλά ισί λατσσό τι τζανάς κάποια πράγματα αμαρέ πφραλένγκε ντα πφενίνγκε ντα ι πραγματένγκε σο νακχλέ πουμαρέ ζωγιάτε. Ανταβά κα βοηθίνελ-αμέν τι αγαβάς-λεν πιο λατσσές.

11. Σόσκε ισί σημαντικός ο πρεσβύτεροι τι τζανέν λατσσές ι μπρακέν;

¹¹ Ειδικά ο πρεσβύτεροι, σο τθερένα ι ευθύνη τι αρακχαβέν ι πφραλέν ντα ι πφενίν, πρέπει τι τζανέν σο νακχλέ. Ντικχέν ο παράδειγμας εκχέ πφραλέσκο σο βακερένα λέσκε Αρτούρ, ντα ισινέ επίσκοπος περιοχής. Βοβ ντα εκ γιαβέρ πρεσβύτερος γκιλέ εκχέ πφενιάτε σο ντικχίντιβελας λατζανί. Ο Αρτούρ βακερέλα: «Σικλιλάμ ότι λάκο ρομ μουλόας χάνικ μπρεσά σοράν πουμαρέ μπιαβέσταρ. Παρόλο σο νακχλάς μπουτ δυσκολίες, ανταγιά πφεν, μπαριαρντάς ντουέ τσσαΐν σο υπηρετίνενα πιστά ι Ιεχωβάς. Ακανά όμως κορόλιβελας ντα τθερέλας κατάθλιψη. Αλλά να τσσιναντάς τι μανγκέλ ι Ιεχωβάς ντα τι τθερέλ μπαρί πίστη λέστε. Αγαντάμ ότι τθεράας μπουτ πράγματα τι σικλιάς κατά λατσσό παράδειγμας οντουλέ πφενιάκο». (Φιλιπ. 2:3) Ο επίσκοπος περιοχής κερντάς οντουβά σο κερέλα ο Ιεχωβά. Ο Ιεχωβά τζανέλα πι μπρακέν ντα καζόμ ντουκχάνα. (Έξοδ. 3:7) Ο πρεσβύτεροι σο τζανένα λατσσές ι μπρακέν αγαβένα πιο εύκολα σαρ τι βοηθίνεν-λεν.

12. Σαρ βοηθίντιλι η Γιπ-Γι κάνα σικλιλί πιο λατσσές εκχέ πφενιά πι κχανγκιριάταρ;

¹² Κάνα κα σικλιόν σαρ ισινέ ανγκλέ η ζωή εκχέ πφραλέσκι σο πφανγκέλα τουμαρέ νεύρα, μάλλον κα αρχίνεν τι πφαμπόν λέσκε. Ντικχέν εκ παράδειγμας. «Εκ πφεν μι κχανγκιριάταρ κερέλας λάφι μπουτ ζουρανές», βακερέλα η Γιπ-Γι κατά Ασία. «Αμντίναβας ότι να τζανέλας τι κερέλ λάφι σουκάρ. Αλλά κάνα νικίστιλομ λάσαρ έργος, σικλιλόμ ότι μπικινέλας ματσσέ πι νταντέσαρ ντα πι νταγιάσαρ κι αγορά. Οτθέ έπρεπε τι κερέλ λάφι ζουρανές για τι ταρτίνελ πελατεία». Η Γιπ-Γι βακερέλα: «Σικλιλόμ ότι για τι αγαβάβ μι πφραλέν ντα μι πφενίν, πρέπει τι σικλιάβ πιο μπουτ πράγματα λένγκε». Χρειαζίντιβελα μπαρί προσπάθεια για τι σικλιόν πιο λατσσές τουμαρέ  πφραλέν. Αλλά κάνα κερένα ο συμβουλές ι Γραφιάκε ντα πουτρένα τουμαρό γκι, μοιάζενα κο Ιεχωβά, σο μανγκέλα “σαρέ ι τζενέν”.​—1 Τιμ. 2:3, 4· 2 Κορ. 6:​11-13.

13. Σο κερντέ ο άγγελοι κάνα ο Λωτ αργίνελας σαρ βακερένα ο εδάφια Γένεση 19:​15, 16, ντα σόσκε;

¹³ Σε εκ μπουτ σημαντική στιγμή πι ζωγιάκι, ο Λωτ να ντινάς καν αμέσως κο οδηγίες κι Ιεχωβάσκε. Ντούι άγγελοι γκιλέ λέσκε ντα βακερντέ τι νικαβέλ πι φαμιλί αβρί κατά Σόδομα. Σόσκε; Σαρ βακερντέ: “Κα κεράς καταστροφή ανταβά τθαν”. (Γέν. 19:​12, 13) Ο γιαβέρ ντιβές, ο Λωτ ντα λέσκι φαμιλί ισινέ ατζέ κο κχερ. Οτθάρ, ο άγγελοι βακερντέ λέσκε ατζέκ εκ φαρ τι νασέλ. Αλλά βοβ «αργίνελας». Μπορεί τι κρίνας τον Λωτ ντα τι βακεράς ότι να ντινάς σημασία κι Ιεχωβάσκε λάφια ντα ότι να ντινάς καν. Όμως, ο Ιεχωβά να μπισταρντάς-λες. «Επειδή ο Ιεχωβά τζιτζισάλο λέσκε», ο άγγελοι ασταρντέ κατά βας λες ντα λέσκι φαμιλί ντα νικαντέ-λεν αβρί κατά πόλη.​—Διαβάνεν Γένεση 19:​15, 16.

14. Σόσκε μπορεί τι τζιτζισάλο ο Ιεχωβά για τον Λωτ;

¹⁴ Ο Ιεχωβά μπορεί τι τζιτζισάλο ντα τι πφαμπιλό για τον Λωτ μπουτέ πραγματένγκε. Ο Λωτ μπορεί τι σακιντίνελας τι μουκχέλ πο κχερ σόσκε νταρέλας κατά τζενέ σο τζουβντιόνας αβρί κατά πόλη. Αλλά να ισινέ σάντε ανταβά ο κίνδυνος. Ο Λωτ μάλλον τζανέλας ότι εκχέ τθανέστε οτθέ πασέ ισινέ μπουτ γούρνες σο τθερένας πίσσα ντα ότι ντούι βασιλιάδες πελέας οτθέ. (Γέν. 14:8-12) Σαρ ρομ ντα ντατ, πρέπει τι ανησυχίνελας πι φαμιλιάκε. Επίσης, ισινέ χουλάι, οπότε μπορεί τι τθερέλας εκ μπουτ σουκάρ κχερ κο Σόδομα. (Γέν. 13:5, 6) Σίγουρα, καέκ ανταλέ πραγματένταρ νανέ δικαιολογία σο να ντινάς καν αμέσως ι Ιεχωβάς. Όμως, ο Ιεχωβά να ντικχλάς σάντε ο λάθος σο κερντάς ο Λωτ ντα λέσκε γιακχίντε ισινέ «δίκαιος τζενό».​—2 Πέτρ. 2:7, 8.

15. Αντίς τι κρίνας οντουλά σο κερέλα εκ τζενό, σο πρέπει τι κεράς;

¹⁵ Αντίς τι κρίνεν οντουλά σο κερέλα εκ τζενό, κερέν ο πιο λατσσό σο μπορίνενα για τι αγαβέν σαρ νιωθίνελα. Η Βερόνικα, εκ πφεν κι Ευρώπη, προσπαθιντάς τι κερέλ-λες  ανταβά. Βόι βακερέλα: «Εκ πφεν ντικχίντιβελας πάντα στεναχωριμέ. Μπουτ φαρ μπεσέλας κορκορί. Μπάζιμα, νταράβας τι κεράβ λάσαρ λάφι. Αλλά σκεφτιντόμ: “Άμα ισινόμας με λάκε θεσιάτε, κα μανγκάβας εκχέ αμαλινά”. Οτθάρ, αποφασιντόμ τι πουτσάβ-λα σαρ νιωθίνελα. Ντα βόι αρχισάλι τι πουτρέλ μάνγκε πο γκι! Ακανά αγαβάβα-λα πιο μπουτ».

16. Σόσκε πρέπει τι προσευχίντιβας για τι πφαμπάς ι γιαβερένγκε;

¹⁶ Σάντε ο Ιεχωβά αγαβέλα-αμέν ντιπ. (Παρ. 15:​11) Οτθάρ, τι μανγκέν λέσταρ τι βοηθίνελ-τουμέν τι ντικχέν κο γιαβερά οντουβά σο ντικχέλα βοβ ντα τι αγαβέν σαρ τι πφαμπόν ι γιαβερένγκε. Η προσευχή βοηθιντάς εκχέ πφενιά σο βακερένα λάκε Ανζέλα τι πφαμπόλ πιο μπουτ ι γιαβερένγκε. Εκ πφεν λάκε κχανγκιριάταρ να τζάλας-λεν λατσσές ι γιαβερέντζαρ. Η Ανζέλα βακερέλα: «Ο πιο εύκολος κα αβέλας τι περάβ κι παγίδα ντα τι αρχίναβ τι κρίναβ ι πφενιά ή μα τι κεράβ παρέα λάσαρ. Αλλά μολιντόμ ι Ιεχωβάς τι βοηθίνελ-μαν τι πφαμπάβ λάκε». Απαντιντάς ο Ιεχωβά λάκε προσευχιάτε; Βόι βακερέλα: «Νικίστιλαμ γιεκ κο έργος ντα σοράν κεράας λάφι για μπουτ σαάτια. Ασουντόμ-λα επειδή πφαμπάβας λάκε. Ακανά μανγκάβα-λα πιο μπουτ ντα ισινόμ αποφασισμέ τι βοηθίναβ-λα».

17. Σο πρέπει τι αβάς αποφασισμέ τι κεράς;

¹⁷ Ναστί τραμπίνασα καλέ πφραλένγκε ντα πφενίνγκε αξίνελα τι πφαμπάς. Σαρέ νακχένα προβλήματα, σαρ ο Ιωνάς, ο Ηλίας, η Άγαρ ντα ο Λωτ. Μερικά προβλήματα αντέ-λεν βον πουμαρέ νεαυτόσκε. Σαρέ κερντάμ-λες ανταβά κάποια στιγμή. Οτθάρ, ο Ιεχωβά μανγκέλα αμένταρ τι αγαβάς ο εκ ι γιαβερές. (1 Πέτρ. 3:8) Κάνα ντάσα καν ι Ιεχωβάς, βοηθίνασα τι αβέλ ενότητα αντρέ αμαρέ φαμιλιάτε σο ισί σαρό κο ντουνιάς. Οντουλέσκε, τι αβάς αποφασισμέ τι ασουνάς αμαρέ πφραλέν, τι σικλιάς-λεν ντα τι πφαμπάς λένγκε.