1. Which thing Bible tell us about Jehovah wey we dey happy to know?

YOU go like make people judge you because of the color of your skin, the way your face be, or the size of your body? You fit no like-am. We dey happy to know say Jehovah no de judge us with the things wey our eye fit see! For example, when Samuel look the sons wey Jesse get, e no see wetin Jehovah see. Jehovah don tell Samuel say, one of the sons wey Jesse get go be king for Israel. But, e no talk who the person be. So, when Samuel see Eliab wey be the first son of Jesse, e talk say: “I dey sure say na the person wey God don anoint be this one.” When person see Eliab, e be like king already. Bible talk say: “But Jehovah tell Samuel say: ‘No look how e be for body and as e tall, because I don reject this person.’” Wetin this one teach us? Jehovah still talk say: “Man de see only wetin eye fit see. But Jehovah de see wetin dey inside the heart.”​—1 Sam. 16:1, 6, 7.

2. As e dey for John 7:24, why e no good make we judge person because of wetin our eye fit see? Give example.

² Because we no dey perfect, we de quick judge people because of the things wey our eye fit see. (Read John 7:24.) But na only small thing we fit know about another person from the things wey we fit see with our eyes. For example, when person no well, doctor no go fit know everything wey de do the person if e only look the person. The doctor need to listen well if e want know how the sickness de do the person, how the person de feel before, how e de feel now and the signs wey e de get. The doctor fit even do X-ray so that e go see how the body be inside. If e no do like that, e fit give the person wrong medicine. Na so e still be with us, we no go fit know our brothers and sisters well if we just look them for  face. We need to try make we no see only their face, make we try understand who they really be. We know say we no get the power to know wetin dey for another person heart. So because of this one, we no go fit ever understand other people the same way wey Jehovah go understand them. But, we fit try our best de do like Jehovah. How we fit do this one?

3. Wetin we fit learn from Jehovah for the way e treat Jonah, Elijah, Hagar, and Lot?

³ How Jehovah de treat e servants? E de listen to them. E understand how they be and why they be like that. And e de show say e de feel for them. As we go discuss how Jehovah treat Jonah, Elijah, Hagar, and Lot, make we see how we go fit copy Jehovah for the way we de treat our brothers and sisters.

4. Which reason we get to judge Jonah as bad person?

⁴ Because we no know everything about Jonah, we fit talk say Jonah na person wey people no fit trust, and say e no even de obey. Jehovah tell Jonah say make e go preach judgment message for Nineveh. But instead wey Jonah go obey Jehovah, e enter ship wey de go another place “so that Jehovah no go see-am.” (Jonah 1:1-3) If na you, you for give Jonah another chance to do the work? Your answer fit be no. But Jehovah still see reasons why e go allow Jonah to do the work.​—Jonah 3:1, 2.

5. Wetin you learn from Jonah from the things wey e talk for Jonah 2:1, 2, 9?

⁵ Jonah show the kind person wey e be when e pray to Jehovah. (Read Jonah 2:1, 2, 9.) That prayer—one of the plenty prayer wey Jonah pray—help us to see the kind person wey Jonah really be. Jonah no be just person wey run comot when God send-am message. The things wey Jonah talk for e prayer show say e like the things wey Jehovah don do for e life. E dey humble, and e dey ready to obey Jehovah. That na why Jehovah no look the bad thing wey e do. Jehovah answer e prayer, and continue to use Jonah as prophet!

6. Why e dey important to listen well to other people?

⁶ To fit listen well to other people, we need to dey humble and patient. Three reasons dey why this one dey important. Number one, we no go de judge people quick-quick for wetin we no really know. Number two, we go know how our brothers and sisters de feel and why they do some things. And this one go help us to show them more love. Number three, we fit even help the  person to know some things about e self. Sometimes, we fit really no understand how we de feel until we talk-am make person hear-am. (Prov. 20:5) One elder for Asia talk say: “I remember one mistake wey I do, I no listen first before I talk. I tell one sister say, e need to prepare more so that e go de give better comment for meeting. Later, I come know say e de hard the sister to read. And the sister de really try e best to make comment for meeting.” So, e dey important say, all elders must “hear the whole story” about any matter before they give correction!​—Prov. 18:13.

7. Wetin you learn from the way Jehovah treat Elijah?

⁷ E dey hard for some of our brothers and sisters to talk about how them de feel because of who they be, their culture and the way they train them. How we fit help them so that e go dey easy for them to fit talk how them de feel? Remember how Jehovah treat Elijah when e de run for Jezebel. Many days pass before Elijah fit tell Jehovah how e de feel. Jehovah really listen well. E encourage Elijah and give-am important work to do. (1 Ki. 19:1-18) E fit take some time for our brothers and sisters to dey free with us and talk with us. But na only when that one happen we go fit really understand how them de feel. If we dey patient like Jehovah, we go make-am easy for our brothers and sisters to dey free with us. And when they don dey free with us and dey ready to tell us how them de feel, make we really listen well.

8. As e dey for Genesis 16:7-13, how Jehovah help Hagar?

⁸ Hagar na the house girl of Sarai. But after Hagar become wife to Abram e begin do anyhow. Then after Hagar get belle e no come de respect Sarai again because Sarai never get pikin. The condition bad sotey, Sarai pursue Hagar comot. (Gen. 16:4-6) Because we no dey perfect, we fit think say Hagar dey wicked, and say the way Sarai treat Hagar dey good. But Jehovah no think like that. E send e angel to Hagar. When the angel meet Hagar, e help Hagar to change the way e de think and e bless-am. So Hagar come know say Jehovah de watch all the things wey e de do since, and Jehovah know e condition. And this one move Hagar to call Jehovah “God wey de see, . . . the person wey de see me.”​—Read Genesis 16:7-13.

9. Wetin Jehovah think about, for the way e treat Hagar?

⁹ Wetin Jehovah know about Hagar? Jehovah know everything about Hagar, e know the things wey Hagar don suffer before. (Prov. 15:3) Hagar come from Egypt and e de stay with Hebrew people. Sometimes, e fit de feel say e be stranger. E fit de miss e people and e country. Hagar no be the only wife wey Abram get. That time even men wey hold God tight marry more than one wife. But no be the thing wey God want be that for marriage. (Matt. 19:4-6) So e dey clear say this kind situation fit cause jealousy and hatred. Even though say Jehovah no support Hagar for the bad way e treat Sarai, we dey sure say e understand everything about the condition of Hagar.

10. Wetin we go do to know our brothers and sisters more?

¹⁰ When we try to understand our brothers and sisters, we de copy Jehovah. Try your best to know more about your brothers and sisters. Talk with them before meeting start and after meeting don finish. Work  with them for preaching. And if e dey possible, invite them come chop for your house. If you do this one, e fit surprise you to know say, that sister wey you think say e de do somehow before, na shame be e problem. That brother wey you think say e like money too much because na big man, de help people. Or that sister wey de come late to meeting many times with e children, de face serious problem. (Job 6:29) The truth be say, we no go be “busy-body for other people matter.” (1 Tim. 5:13) But e good make we know something about our brothers and sisters, and the things wey they don face for life. This one go help us understand them more.

11. Why e dey important make elders really know the brothers and sisters wey them de care for?

¹¹ Elders especially need to really know the brothers and sisters wey them de care for. See the example of one brother wey e name na Artur. E de serve as circuit overseer before. This brother with another elder visit one sister wey they think say e de shame. Brother Artur talk say: “We come know say the sister husband die small time after they marry.” E still talk say: “Even with the hard condition wey the sister dey, e train e two girls to love and serve Jehovah. But now, e no de see well again, and e get one sickness wey de make-am feel sad. Even with that one, the love and faith wey e get for Jehovah still dey strong. We come know say we get plenty things wey we need to learn from the good example of this sister.” (Phil. 2:3) This circuit overseer really try to do like Jehovah. Jehovah know e servants and the things wey them de suffer. (Ex. 3:7) When elders know the brothers and sisters wey them de care for well, they go really know how to help them.

12. Wetin Sister Yip Yee gain as e try to know more about one sister for e congregation?

¹² When you try to know the brother or sister wey you no like the way e de do things, that one go fit make you want feel for the person more. See this example. Sister Yip Yee for Asia talk say: “One sister for my congregation de talk loud too much. I think say the sister no sabi behave well. But when we work together for preaching, I come see say e de help e papa and mama sell fish for market before. And e need to talk loud to call customers.” Yip Yee still talk say: “I don learn say if I want really understand my brothers and sisters, I need to try and know more about them.” If we want know our brothers and sisters more, we  need to work hard. But when you follow the advice from Bible to love everybody, you de copy Jehovah, because e love “all kind of people.”​—1 Tim. 2:3, 4; 2 Cor. 6:11-13.

13. As e dey for Genesis 19:15, 16, wetin the angels do when Lot continue to delay, and why?

¹³ One time wey Lot really need to obey the thing wey God talk quick-quick, e come de delay. Two angels visit Lot and tell Lot say make e carry e family comot from Sodom. Why they talk like that? They talk say: “We go destroy this place.” (Gen. 19:12, 13) The next morning, Lot and e family still dey for house. So the angels warn Lot again. But, Lot “continue to delay.” We fit judge Lot as person wey no care about the thing wey God say make e do, or say e no want obey. But Jehovah no tire for Lot. “Because Jehovah get pity for Lot,” the angels grab the hand of Lot and e family and carry them comot for the city.​—Read Genesis 19:15, 16.

14. Why Jehovah fit don feel pity for Lot?

¹⁴ Jehovah fit don feel pity for Lot for many reason. E fit be say Lot de delay to comot from e house because e de fear the people wey dey outside the city. Other dangers dey too. E fit be say Lot know about the two kings wey fall inside pits wey something like coal-tar dey inside, for one valley around there. (Gen. 14:8-12) Lot get wife and children and e go don worry about e family. Another thing be say, Lot na rich man. So e fit be say e get fine house for Sodom. (Gen. 13:5, 6) The truth be say, even with all this reasons, no one reach why Lot no go obey the thing wey God talk quick-quick. But Jehovah no put mind for the mistake wey Lot do. Instead, e see Lot as “righteous man.”​—2 Pet. 2:7, 8.

15. Instead of us to judge person for the things wey e do, wetin we suppose to do?

¹⁵ Instead of you to judge another person for wetin e do, try your best to understand how e de feel. One sister for Europe wey e name na Veronica try to do like that. E talk say: “E get one sister wey I think say e de always  feel bad. The sister de always separate e self from people. Sometimes, I de fear to even talk to the sister. But I come think-am say, ‘If na me dey this kind condition, I go like-am if person come near and show me say e care.’ So I make up my mind and ask the sister how e de feel. And the sister start to tell me everything for e heart! Now I understand plenty things about the sister.”

16. Why we need to beg Jehovah to help us so that we go de feel for people?

¹⁶ The only person wey really understand us well na Jehovah. (Prov. 15:11) So beg Jehovah make e help you to see other people the way e de see them. And help you understand how to show them say you de feel for them. Na prayer help one sister wey e name na Anzhela make e de feel for people more. Anzhela de get problem with one sister for e congregation. So e talk say: “E for just dey easy to judge the sister and ‘stop to do anything’ with the sister. But I beg Jehovah make e help me so that I go understand the sister.” Jehovah answer Anzhela prayer? Anzhela talk say: “We go out for preaching together, and after, we talk for many hours. As I de listen to the sister, I de try de feel the way e de feel. Now, I get more love for the sister, and I dey ready to help.”

17. Wetin we go make up our mind to do?

¹⁷ We no go fit select which brothers and sisters we go feel for and the one wey we no go feel for. All of them de face problem just like Jonah, Elijah, Hagar, and Lot. Sometimes, e fit be say na them cause their problem by theirself. The truth be say, all of us don do that kind thing before. E good say Jehovah encourage all of us make we de show say we get feeling for each other. (1 Pet. 3:8) Even though say we come from different-different place from this world, we dey as one family. When we obey Jehovah, we go dey as one more-more. So, make we make up our mind and show say we get interest for our brothers and sisters, and feel for them for the way we de treat them.