1. მუ გურიშემაკინალ ჭეშმარიტებას ბგებულენთ ბიბლიაშე იეჰოვაშ გურშენ?

ქიმგეწონებდესო, ხალხიქ თქვან კანიშ ფერიშ, წონაშ, მიკაქუნალიშ ვარდა გარეგნობაშ მიხედვით შეგაფასესკო? ალბათ, ვარ. მართალო გურიშემაკინალ რე თიშ რჩქინა, ნამდა იეჰოვა თიშ მიხედვით ვა მაფასენა, მუდგას კოჩიშ თოლ ორწყე! მაგალთო, მუჟამსით სამუელ იესეშ ქომოლსქუალეფს უჯინედ, თინა ვა უძირ, მუდგას იეჰოვა ორწყედ. იეჰოვას ნარაგად აფუდ სამუელშა, ნამდა იესეშ ართ-ართ ქომოლსქუა ისრაელიშ მეფეთ გინირთუდ. მარა ნამ იჸუაფუდ მეფე? მუჟამსით სამუელქ იესეშ უნჩაშ ქომოლსქუა, ელიაბ ქოძირ, თიქ თქუ: „ნამდვილო თენა რე იეჰოვაშ ცხებულ“. ელიაბის თიცალ მეჯინა უღუდ, ნამდა სამუელიშ აზრით თინა იჸუაფუდ მეფე. «მარა იეჰოვაქ სამუელს უწუ: „ნუმ უჯინექ თიშ გარეგნობას დო სიმაღლეს, მუშენდა ვარია ფთქვი თიშე“». მუს ბგურაფლენთ თავრეშე? იეჰოვაქ უწუ სამუელს: „კოჩ თის ორწყე, მუდგას თოლ ორწყე, მარა იეჰოვა გურს ორწყე“ (1 სამ. 16:1, 6, 7).

2. მუჭოთ იოანეშ 7:24-ის ჭარჷ, მუშენ ოკო ვეშვაფასათ შხვეფ მეჯინათ? ქიმიჸონით მაგალითი.

² ჩქი არასრულყოფილეფ ვორეთ, ათეშენ ჩვევათ მიღნა, შხვეფ მეჯინათ შევაფასათ (წეკითხით იოანე 7:24). მარა თოლით ნაძირეფშე ბრელ მუთუნ ვაგმაგებენა პიროვნებაშ გურშენ. მაგალთო, ჯგირ დო გამოცდილ ექიმს ხოლო ხვალე ართ მეჯინათ ვა გაგებე პაციენტიშ მდგომარეობა. თიქ ყურადღებათ ოკო ქუმურჩქილუას პაციენტის, ნამდა ქიგეგას ჯამრთელობაშ მუ პრობლემეფ უღუდ ულირს, მუნერ ემოციურ მდგომარეობას რე, ვარდა მუ სიმპტომეფ უღჷ. თეს გეძინელ, შილებე შინაგან ორგანოეფიშ მდგომარეობაშ გაგებელო, პაციენტის რენტგენიშ გინოღალა დუნიშნას. ექიმ თე ირფელს ვა გაკეთენს-და, შილებე პაციენტის არასწორ დიაგნოზ ქიგუშქვას. თეშნერო, და დო ჯიმალეფს მეჯინელო  შევაფასენთ-და, ვაგმაგებენა მუნერეფ რენა თინეფ სინამდვილეს. ჩქი ოკო ვეცადათ, ქინვანჭათ თინეფიშ შინაგან პიროვნებას. მუშო ოკო რაგად, გურეფიშ ძირაფა ვეშემლებნა; ათეშენ, თიცალო დღას ვაგმაგებენა შხვეფშა, მუჭოთ იეჰოვა უგენს თინეფს. მარა შემლებნა ირფელ გუვაკეთათ, ნამდა მივაჸუნათ იეჰოვაშ მაგალითის. მუჭო შემლებნა თეშ კეთება?

3. მუჭო მიმეხვარებნა თე სტატიას გარჩიებულ ბიბლიურ მაგალითეფ, მივაჸუნათ იეჰოვაშ მაგალითის?

³ მუჭო ოქცუ იეჰოვა მუშ თაყვანიშმცემელეფს? თინა ურჩქილე თინეფს, ითვალისწინენს თინეფიშ მდგომარეობას დო თი ირფელს, მუდგაქ იმოქმედ თინეფშა დო გურშა მეუღ თინეფიშ გაჭირება. თე სტატიას გუვარჩიენთ, მუჭო აკეთ თე ირფელ იეჰოვაქ იონაშ, ელიაშ, აგარიშ დო ლოტიშ შემთხვევას დო ჩქი მუჭო შემლებნა მივაჸუნათ იეჰოვაშ მაგალითის და დო ჯიმალეფწკუმა ურთიერთობაშ დროს.

4. მუშენ შილებე უარყოფითო შევაფასათ იონა?

⁴ ჩქინ არასრულყოფილ გონებათ, შილებე იონა შევაფასათ, მუჭოთ ვენდებენ ფერ დო დაუმორჩილებელ პიროვნებათ. იეჰოვაქ თის მეჩჷ პირდაპირ მითითება — გაცხადკო მუშ განაჩენ ნინევეს. მარა თიქ ვა დემორჩილ იეჰოვას დო თი გემშა გეშართჷ, ნამუთ გვალო შხვადო, „იეჰოვაშე შორს“ მიშჷ (იონ. 1:1—3). ქიმეჩანდითო იონას ხოლო ართ შანსის, ნამდა შეასრულკო თე დავალება? ალბათ ვარ. მარა იეჰოვაქ ქოძირ მიზეზეფ, მუდგაშ გურშენ იონა ხოლო ართ შანსის იმსახურენდჷ (იონ. 2:1, 2, 9).

5. მუს ბგურაფლენთ იონაშ გურშენ თიშ ლოცვაშე, ნამუთ იონაშ 2:1, 2, 9-ს ჭარჷ?

⁵ იონაშ ლოცვაშე გემკორჩქინდჷ, სინამდვილეს მუნერ პიროვნება რდუ თინა (წეკითხით იონა 2:1, 2, 9). მუშო ოკო რაგად, იონა ბრელშა დურაგადუანდჷ იეჰოვას ლოცვათ. ჩხომიშ ქვარას რაგადებულ იონაშ ართ-ართ ლოცვაშე იძირე, ნამდა თინა ბრელით მეტ რდუ, ვინემ უბრალოთ პიროვნება, ნამდგაქ დუდ არიდ დავალებაშ შესრულებას. თიშ სიტყვეფშე ვორწყეთ, ნამდა თინა რდუ თანდაბალ, გიმირჩქინანდჷ მარდულობას დო გინოჭყვიდილ აფუდ დემორჩილკო იეჰოვას. ათეშენ გასაკვირ ვა რე, ნამდა იეჰოვაქ იონაშ შეცდომაშა ვა გამახვილ ყურადღება, უპასუხ თიშ ლოცვას დო ქიმეჩ საშვალება, გაგრძელკო წინასწარმეტყველო მსახურება!

6. მუშენ ღირჷ, ნამდა ყურადღებათ ქურჩქილათ შხვეფს?

⁶ შხვეფს ყურადღებათ ქურჩქილათინ, თანდაბლობა დო მოთვინება მოსაჭირნა. თეშ კეთება არძაშ უკლაშ სუმ მიზეზიშ გურშენ ღირჷ. პირველ, ნაკლებ რე შანს, ნამდა ხეთეშე არასწორ დასკვნა გეგშებღათ. მაჟია, შემალებენა ქიგებგათ, მუს გინაფლენს თანაქრისტიან დო მუ მოტივეფ უღჷ, მუჟამსით მუდგარენს ორთჷ; თენა მიმეხვარებნა უმოსო გაუგათ თინეფს.  მასმა, მუჟამსით თანაქრისტიანს ვარზენთ რაგადიშ საშვალებას, თეშნერო შილებე მივეხვარათ, უჯგუშო ქინანჭას მუშ პიროვნებას. მინშა ბოლოშა ვარჩქილენა ჩქინ გრძნობეფ, სოიშახ თინეფშე ჩიებას ვედიბჭყანთ (იგავ. 20:5). ართ უხუცეს, ნამუთ აზიას ცხოვრენს, იჩიებ: „ფშუ, ნამდა ართშა მორჩქილაფაშახ ქოფთქვი მუდგარენ. ართ დას ვუწი, ნამდა უჯგუშ კომენტარეფ ოკო აკეთკო კრებას. მარა უკულ ქიგებგჷ, ნამდა კითხირ უჭირს დო ბრელ ხანდა უხვადუ კომენტარეფიშ ოკეთებელო“. თავრეშე იძირე, მუსხით მნიშვნელოვან რე, ნამდა თითოულ უხუცესიქ რჩევაშ მეჩამაშახ, ქუმურჩქილუას პიროვნებას (იგავ. 18:13).

7. მუს ბგურაფლენთ თევრეშე, მუჭო მექცუ იეჰოვაქ ელიას?

⁷ ჩქინ ნამთინე თანაქრისტიანს უჭირს შხვეფწკუმა მუნეფიშ გრძნობეფიშ გურშენ ჩიება. თეშ კეთებას შილებე ოცილდან, ულირს მოხვალამირ ამბე, კულტურა ვარდა ხასიათ. მუჭო შემლებნა მივეხვარათ თინეფს, უმოს ადვილო იჩუან მუნეფიშ გრძნობეფშე? ქიგიფშინათ, მუჭო მექცუ იეჰოვაქ ელიას. მუჟამსით ელია მინტებუდ იზებელშე, თიქ ხეთეშე ვა უწუ იეჰოვას მუდგას გინაფლენდჷ. ელიას დროქ დესაჭირ, ნამდა გურ გეგნუფაჩკო მუშ ზეციერ მუმას. იეჰოვაქ ელიას ყურადღებათ ქუმურჩქილუ, გურშა ელუკინ დო მნიშვნელოვან საქმე ქუდავალ (1 მეფ. 19:1—18). ჩქინ და დო ჯიმალეფს ხოლო შილებე დროქ დესაჭირან, ნამდა თავისფალო ქუდომრაგადუან, მარა მუჟამსით თეს გაკეთენა, ქიგებგენთ, სინამდვილეს მუს გინაფლენა თინეფ. იეჰოვაცალო მოთვინებას გეგმიფრჩქინანთ-და, თანაქრისტიანეფ მუნეფიშ გრძნობეფშე თავისფალო ქიმეჩიებნა. თიშ უკულ მუთ, მზათ იჸუაფნა გურ გეგნომფაჩან, ყურადღებათ ოკო ქურჩქილათ თინეფს.

8. მუჭოთ დაბადებაშ 16:7—13-ს ჭარჷ, მუჭო მეხვარ იეჰოვაქ აგარს?

⁸ სარაიშ მოინალე აგარ, უგუნურო იქციებუდ თიშ უკულ, მუთ აბრამიშ ოსურო გინირთჷ. მუჟამსით აგარქ დეორსულ, სარაის, ნამდგას ბაღანეფ ვა ჸუნდჷ, დამცირება ქუდუჭყჷ. საქმექ თიშახ ქიმერთჷ, ნამდა სარაიქ აძულ აგარ, ჸუდეშე ინტუკო (დაბ. 16:4—6). ჩქინ არასრულყოფილ გონებათ, შილებე იფიფქრათ, ნამდა აგარ უბადო ოსურ რდუ, ნამდგაქ თინა მიღჷ, მუდგას იმსახურენდჷ. მარა იეჰოვა თაშ ვაფასენდჷ აგარს. თიქ ანგელოზ ქიმუშქვჷ თის. მუჟამსით ანგელოზიქ ქოძირ აგარ, ქიმეხვარ თის, დითირკო დამოკიდებულება დო უწუ, ნამდა იეჰოვა გამრავლენდჷ თიშ გამნარყის. აგარქ ქიმეხვად, ნამდა იეჰოვა ორწყედ თის დო ირფელ უჩქუდ თიშ მდგომარეობაშ გურშენ. თე ირფელქ თეშ იმოქმედ აგარშა, ნამდა იეჰოვა თეცალ სიტყვეფით მიშინუ: „ღორონთ, ნამუთ ირფელს ორწყე, . . . მით მა მორწყე“ (წეკითხით დაბადება 16:7—13).

9. მუ გეთვალისწინ იეჰოვაქ აგარიშ შემთხვევას?

⁹ მუ ძირჷ იეჰოვაქ აგარიშ გურს? თის უჩქუდ მუ აფუდ მიკულირ აგარს დო მუსხი მუდგარენ გინიღ (იგავ. 15:3). აგარ რდუ ეგვიპტელ, ნამუთ ებრაელიშ ჸუდეს ცხოვრენდჷ. ალბათ, მინშა შხვაშთურო გინაფლენდჷ დუდის დო ონატრუდ მუშ ოჯახ დო ქიანა. აბრაამს ხვალე თინა ვა ჸუნდჷ ოსურო. თიმ დროს ნამთინე ღორონთიშ ართგურ ქომოლკოჩის ართშე მეტ ოსურ ჸუნდჷ. მარა დუდშე იეჰოვას თენა ვა აფუდ განზრახულ (მათ. 19:4—6). ათეშენ ვა რე გასაკვირ, ნამდა თეცალ სიტუაციას, ხშირას სერიოზულ პრობლემეფ მაჸუნუდ, მუნერით რე მენჯარიშობა დო უკმაყოფილება ოსურეფ შქას. რახანს იეჰოვაქ ვა დასაჯ აგარ სარაიშ დამცირებაშ გურშენ, შემლებნა დარწმუნებულ ვორდათ, ნამდა თიქ გეთვალისწინ აგარიშ გრძნობეფ დო მდგომარეობა.

10. მუჭო შემლებნა უჯგუშო გეფჩინებაფუათ და დო ჯიმალეფ?

¹⁰ ჩქი შემლებნა მივაჸუნათ იეჰოვაშ მაგალითის დო ვეცადათ ქუგუგათ თანაქრისტიანეფს. უჯგუშო გეჩინებაფეთ და დო ჯიმალეფ. ქუდურაგადეთ თინეფს კრებაშ შეხვალამაშ დოჭყაფაშახ დო თებაშ უკულ, ქიმსახურით  თინეფწკუმა ართო დო შეიოლებერ ქორენ-და, სადილშა ქუდაპატიჟით. თეს გაკეთენთ-და, შილებე ქიგეგათ, ნამდა და, ნამუთ ართ მეჯინათ მეგობრულო ვეძირედ, სინამდვილეს მორდებუან რე დო ჯიმა, ნამუთ მატერიალისტო მიგორჩქუდეს, სინამდვილეს ხეგოფაჩილ რე; ვარდა ოჯახ, ნამუთ შეხვალამეფშა აგვიანენს, წინააღმდეგობეფს შეხვადუ (იობ. 6:29). მუშო ოკო რაგად, ჩქი „შხვაშ საქმეშა“ ოკო ვემშაფრთათ (1 ტიმ. 5:13). მარა ჯგირ რე, უჯგუშო გეფჩინებაფუათ ჩქინ და დო ჯიმალეფ დო ქიგებგათ მუნერ წარსულ უღდეს. თენა მიმეხვარებნა ქუგუგათ თინეფს.

11. მუშენ რე მნიშვნელოვან, უხუცესეფ ჯგირო იჩინენდან შხურს?

¹¹ განსაკუთრებით უხუცესეფქ ოკო გეჩინებაფუან ჯგირო მუნეფიშ შხურ, ნამდგაშეთ ზრუნვა ოვალნა. გუვარჩუათ ართ ჯიმაშ, არტურიშ მაგალით, ნამუთ რაიონულ ზედამხედველო მსახურენდჷ. თიქ ართ უხუცესწკუმა ართო ქიმიაკითხუ დას, ნამუთ ართ მეჯინათ მორდებუანო იძირედ. არტურ იჩიებ: „თიწკუმა რაგადიშ დროს ქიგებგით, ნამდა დაქორწინებაშე მუსხირენ ხანიშ უკულ ქომონჯიქ დუღურ. სირთულეეფიშ უმკუჯინუო თიქ ჟირ ოსურსქუა მორდჷ, მით იეჰოვას ართგურო ომსახურნა. თეს გეძინელ, თე დას მხედველობა ეუფრაშებუდ დო ათეშენ დეპრესიას რდუ. თე ირფელიშ უმკუჯინუო, თის ვემუდინუაფ იეჰოვაშ ჸოროფა დო მტკიცე რწმენა. ქიმეფხვადით, ნამდა თე დაშ ჯგირ მაგალითშე ბრელ მუდგარენიშ გურაფა შემლებდეს“ (ფილ. 2:3). თე რაიონულ ზედამხედველ მეჸუნდჷ იეჰოვაშ მაგალითის. იეჰოვა იჩინენს მუშ შხურს დო უჩქჷ, მუშმადიდა ჭუას გინაფლენა (გამ. 3:7). მუჟამსით უხუცესეფ ჯგირო იჩინენა შხურს, შეულებნა უჯგუშო მეხვარან თის.

12. მუ ჯგირ შედეგ მოუღჷ ართ დას, თანაქრისტიანიშ უჯგუშო გაჩინებაფაქ?

¹² მუჟამსით უჯგუშო იჩინებაფუანთ თი თანაქრისტიანს, ნამუშ საქციელ გაღიზიანენა, შეგალებენა ქუგუგათ თის. გუვარჩუათ ართ მაგალით. და, ნამუთ აზიას ცხოვრენს, იჩიებ: „ართ და, ნამუთ ჩქინ კრებას რე, მანგარ ხონარმაღალო რაგადანდჷ. ფიფქრენდჷ, ნამდა თინა ჭიჭე უკულტურო რდუ. მარა, მუჟამსით თიწკუმა ართო მიდაფრთჷ მსახურებაშა, ქიგებგჷ, ნამდა თინა მუშ მშობლეფს ოხვარუდ მაღაზიას ჩხომიშ გიმოჩამას. ხალხიშ ყურადღება მიქცუკონ, თიქ ხონარმაღალო ოკო რაგადუკო“. თე და აგრძელენს: „ქიმეფხვად, ნამდა და დო ჯიმალეფიშ მდგომარეობაშა გემშაფრთიკონ, უჯგუშო ოკო გეფჩინებაფეკო თინეფ“. მონდომა რე საჭირო, ნამდა თანაქრისტიანეფ უჯგუშო გეფჩინებაფუათ. მარა, მუჟამსით იფთვალისწინენთ ბიბლიურ რჩევას — ფართას გუვონჯათ გურიშკარ, თეშნერო მეპჸუნთ იეჰოვაშ მაგალითის, მიდგას უჸორს არძანერ ადამიან (1 ტიმ. 2:3, 4; 2 კორ. 6:11—13).

13. მუჭოთ დაბადებაშ 19:15, 16-ის ჭარჷ, მუ აკეთეს ანგელოზეფქ, მუჟამსით ლოტ ულას ვა ჩქარენდჷ დო მუშენ?

¹³ ლოტის ცხოვრებაშ მნიშვნელოვან მომენტის, გაუჭირდჷ იეჰოვაშ მითითებეფიშ მეჸუნაქ. ლოტშა ჟირ ანგელოზიქ ქიმერთჷ დო უწუ, ნამდა მუშ ოჯახწკუმა ართო სოდომშე მიდართკო. მუშენ რდუ თენა საჭირო? ანგელოზეფქ ლოტის უწის, ნამდა ოკო განადგურესკო თე ქალაქ (დაბ. 19:12, 13). მაჟია ოჭმარეს, ლოტ დო მუშ ოჯახ დიო ხოლო ჸუდეს რდეს. ათეშენ, ანგელოზეფქ კინ გაფრთხილეს ლოტ. მარა თინა „ულას ვა ჩქარენდჷ“. შილებე იფიფქრათ, ნამდა ლოტის შურო ვაინტერესუდ მუ უწუ იეჰოვაქ დო ვა დემორჩილ თის. მარა, იეჰოვა იშენით ოცადუდ თიშ გინოსქილადას. ანგელოზეფქ ლოტ დო მუშ ოჯახის ხე ქიმეთხეს დო „იეჰოვაშ ჭყოლოფაშ გურშენ . . . ქალაქშე გეგშეჸონეს“ (წეკითხით დაბადება 19:15, 16).

14. მუშენ შილებე იეჰოვაქ მიშართკო ლოტიშ მდგომარეობაშა?

¹⁴ შილებე იეჰოვაქ მუსხირენ მიზეზიშ გურშენ მიშართჷ ლოტიშ მდგომარეობაშა. შილებე თის თიშენ ვაკოდ ჸუდეშე ულა, ნამდა ოშქურუდ თი ხალხშა, მით ქალაქიშ გალე ცხოვრენდეს. თეს გეძინელ, შხვა საფრთხე ხოლო არსებენდჷ. სოდომიშ გოხოლუას ბრელ ფისიან ორმო რდუ დო მუჭოთ იძირენ, ლოტის უჩქუდ, ნამდა თეიშახ ჟირ მეფექ ინანთხჷ თე ორმოეფს (დაბ. 14:8—12). მუჭოთ ქომონჯ დო მუმა, ლოტ ალბათ ნერვიანენდჷ მუშ ოჯახშენ. თეს გეძინელ, თინა ქონებიერ კოჩ რდუ დო ალბათ, ჯგირ ჸუდე უღუდ სოდომს (დაბ. 13:5, 6). მუშო ოკო რაგად, ჟიშე გიმოკოროცხილ ნამთინ მიზეზ ვამართლენდჷ თის, ნამდა ლოტიქ ხეთეშე ვედემორჩილ იეჰოვას. მარა, იეჰოვაქ ყურადღება ვა გამახვილ თიშ შეცდომაშენ დო მიშინუ, მუჭოთ „მართალ კოჩ“ (2 პეტ. 2:7, 8).

15. მუ ოკო ვაკეთათ თიშ მანგიორო, ნამდა შხვაშ საქციელიშ გურშენ არასწორ დასკვნა გიშებღათ?

¹⁵ თიშ მანგიორო, ნამდა შხვაშ საქციელიშ გურშენ არასწორ დასკვნა გიშეღათ, ირნერო ქეცადით, ნამდა გემშართათ თიშ მდგომარეობაშა. ვერონიკაქ, ნამუთ ევროპას ცხოვრენს, ეცად თაშ მოქციებას. თინა იჩიებ: „თეშ იძირედ, ნამდა ართ და ირო გლახა ხასიათის რდუ.  თინა დუდის არიდანდჷ შხვეფწკუმა ურთიერთობას. მინშა მოშქურუდ თიწკუმა დორაგადაფაშა. მარა ართშა იფიფქრჷ, ნამდა თიშ მდგომარეობას ქუვორდიკონ მეგობარიშ ელარნა დემესაჭირებუდ. ათეშენ გეგნობჭყვიდ, ქომკითხირუდკო მუს გინაფლენდჷ. თიქ გურ გეგნომფაჩ! ასე ბრელ მუდგარენ მიჩქ თე დაშ მდგომარეობაშ გურშენ“.

16. მუშენ ოკო ფთხუათ იეჰოვას, ნამდა ქიმმეხვარან, გურშა მიბღათ შხვეფიშ გაჭირება?

¹⁶ ხვალე იეჰოვას შეულებ ბოლოშა გამგან (იგავ. 15:11). ათეშენ, ქოთხით თის, ნამდა ქიმგეხვარან, შხვეფიშ მდგომარეობას იეჰოვაშ თოლით ქუჯინათ დო ქიგეგათ, მუჭო შეილებნა გურშა მიღათ თინეფიშ გაჭირება. ართ დას, ანჟელას, ლოცვაქ მეხვარ უჯგუშო გაკეთკო თენა. თის მუშ კრებელ დაშა ვემიახუჯუ. ანჟელა იჩიებ: „ჩქიმო ადვილ იჸუაფუდ გუვაკრიტიკკო თე და დო დუდ ავარიდკო თიწკუმა ურთიერთობას. მარა უკულ იეჰოვას ქოფთხი მოხვარა, ნამდა ქუგუგკო თე დას“. ქუპასუხუო იეჰოვაქ ანჟელაშ ლოცვას? თინა იჩიებ: „ჩქი ართო მიდაფრთით მსახურებაშა დო უკულ მუსხირენ საათის იფჩით. მა შურდოგურით ქუმურჩქილე თის. ასე უმოსო მიჸორს თე და დო გინოჭყვიდილ მაფჷ, ქელუდირთე თის“.

17. მუ ოკო მაფდან გინოჭყვიდილ?

¹⁷ ჩქი ვეგშმაგორენა, ნამ თანაქრისტიან იმსახურენს ჩქინდე გაგებას დო ნამ ვარ. არძა შეხვადუ თიცალ პრობლემეფს, მუნერით უღდეს იონას, ელიას, აგარს დო ლოტის. ბრელ შემთხვევას, ნამთინე თანაქრისტიან კინ მუშ მიზეზით შეხვადუ პრობლემეფს. სინამდვილეს, მინშა ჩქინ ხოლო თაშ ვორეთ. ათეშენ გონივრულ რე, იეჰოვას ქოფთხუათ, ნამდა ქიმმეხვარან, გაუგათ ართმაჟიას (1 პეტ. 3:8). მუჟამსით, ვომორჩილუთ იეჰოვას, ჩქინ საერთაშორისო ოჯახიშ ართობას დო სიმტკიცეს ვუნწყუნთ ხეს. თაშ ნამდა, გინოჭყვიდილ მაფდან, ქურჩქილათ, უჯგუშო გეფჩინებაფუათ დო გურშა მიბღათ ართიანიშ გაჭირება.