1. Ino raha mankahery koran̈iny Baiboly momba Jehovah?

ASA tianao izikoa baka amy kolerany ain̈inao itsaranolo anao, na baka amy formany soranao na havintesan̈anao? Hay be fa tsy tianao. Ten̈a mankahery mahay fa Jehovah tsy mitsara atsika eraka fahitanolo atsika! Mankamarin̈y zen̈y iziô, taminizy nifidy olo hatao panjakany Israely. Araiky tamy zanakany Jese olo hifidiny, ho izy tamy Samoela. Asa mba azovy tamindro izy nifidiny io? Niaraka Samoela nahita i Eliaba, talan̈olony Jese, ho izy: ‘Ah! Io tsarabe araiky nifidiny Jehovah zen̈y!’ Efa mira panjaka Eliaba, fotony izy ronjany, fatatra. Samoela tsy nahita raha hitany Jehovah. Zen̈y nahavy Jehovah nivolan̈a taminany: “Aza mizaha sora ndreky fitsanganan̈anany anao, fa tsy izy nifidiko.” ’ Ino raha ianarantsika baka amy zen̈y? ‘Olo’, ho Jehovah, ‘mizaha raha hitany masony fo, fa zaho ndraiky mizaha raha an̈atiny fô.’—1 Sam. 16:1, 6, 7.

2. Ino raha tsy hataontsika koran̈iny Jaona 7:24, baka io nan̈ino? Hazavà aminy ohatra.

² Tsy lavorary aby atsika ke malaky amintsika mitsara olo baka amy raha hitantsika. (Vakia Jaona 7:24.) Kanefa hely fo raha haintsika momba olo araiky, lera atsika mizaha izy. Ohatra iziô misy dokotera araiky mahay mare. Asa ho hainy raha momba olo araiky tahany izikoa izy mifantoko amy raha hitany ambelan̈a fo? Ehe! Tsy maintsy tandrin̈esany tsarabe antsendriky olo io misy ahaizany ino aby soritraretin̈y aminany ao, karakory fihetsehamponany vokatrany aretin̈y io, baka io ino aretin̈y efa nahazo izy taloha. Mety hirahiny han̈ano analizy na skanera lastio olo io misy ahitan̈a raha an̈atiny ain̈inany. Mety tsy hifan̈araka aminy aretin̈inolo io edy fitahan̈a hataony dokotera io, izy koa tsy man̈ano zen̈y. Karaha zen̈y  koa atsika. Tsy mety ho haintsika tsarabe iro piaramanompo amintsika aby io izikoa raha hitantsika baka ambelan̈a fo ifantohantsika. Marin̈y fa atsika tsy ôtry Jehovah, fotony izy mahay ino marin̈y raha an̈aty fonolo araiky. Mora aminany mahay karakory marin̈y olo io. Ndray zen̈y, tokony hifen̈y angovo jiaby atsika hangala tahaka izy. Akory han̈anovan̈a zen̈y?

3. Akory hangalantsika tahaka Jehovah, izikoa zahan̈a fomba nifandraisany taminolo nanompo izy taloha tan̈y?

³ Karakory ma ataony Jehovah aminolo manompo izy? Tandrin̈esany iro. Farandraha misy kontiny aminany eky raha niain̈andro taloha ndreky avahizo. Mitepô iro koa izy. Hidinihintsika ato fomba nan̈anovany zen̈y taminiry Jona, Elia, Hagara, ndreky Lota. Hizahavantsika koa akory mety hangalantsika tahaka izy, lera atsika mifandray amy piaramanompo.

4. Nan̈ino ma atsika mety ho diso hevitry momba Jona?

⁴ Atsika tsy mahay raha jiaby, ke atsika koa fa mandiniky Jona, atsika mety halaky hitsara izy sady hieritreritry fa izy olo tsy mety atokisan̈a sady mierin̈y olo. Nirahiny Jehovah han̈ambara didipitsaran̈anany taminolo ta Ninive tan̈y baka izy, fa izy tsy nan̈ano. ‘Nilifasany foeky Jehovah!’ (Jona 1:1-3) Niondran̈a sambo izy, nandeha tamy tany nifanohitry amy tany nan̈irahany Jehovah izy. Izikoa anao nataony zen̈y, asa mbala han̈iraka izy fo anao? Mety tsy anao koa hitavandra izy! Fa Jehovah mbala natoky Jona fo.—Jona 3:1, 2.

5. Olo karakory ma Jona koa zahan̈a Jona 2:1, 2, 9?

⁵ Jona matetiky nivavaka, ke tamy vavaka nataony nahitan̈a oe olo karakory marin̈y izy. (Vakia Jona 2:1, 2, 9.) Hita baka amizio ao fa Jona tsy nilefa andraikitry. Kaiky izio olo nanetry ten̈a ndreky nahay nankasitraka sady tapakevitry han̈araka volan̈any Jehovah. Amy lerany Jehovah tsy nifantoko taminy hadisovan̈anany, fa namaly vavaka nataony. Mbala nan̈eky izy ho paminan̈y fo Jehovah!

6. Nan̈ino atsika ten̈a mila mahay mitandren̈y tsarabe?

⁶ Mila manetry ten̈a ndreky maharidraha atsika izikoa tihahavita hitandren̈y olo hafa tsarabe. Nan̈ino ma iro mila tandrin̈esantsika tsarabe? Voanalohany, amy zen̈y atsika tsy ho diso hevitry momba olo hafa. Faharoe, ho haintsika fihetsehampondro ndreky antony mahavy iro man̈ano raha, ke tsy ho sarotro amintsika hahinakinaka iro. Fahatelo, izikoa atsika man̈ano zen̈y, ndray iro tompiny fo mba hahay raha maro momba iro. Misy lera baka tsy hainten̈a foeky karakory fihetsehamponten̈a, izikoa tsy raha efa  tafikoran̈iny. (Ohab. 20:5) Misy antipan̈ahy an Asie zay nivolan̈a: “Diso mare zaho tandraraiky zay, fotony zaho tsy nitandren̈y tsara fa direkty nivolan̈a. Nisy ranabavy zay baka nivolan̈ako fa izy tokony hankatsara valinteninany. Tafara tatỳ vo haiko fa kaiky izio tsy mahay mamaky teny tsara, ke efa nifen̈y mare izy vo nahavita namaly teny.” Hita baka amy zen̈y fa mila hainy antipan̈ahy tsiaraikiaraiky ino marin̈y ny raha misy, alohanizy han̈amia torohevitry olo.—Ohab. 18:13.

7. Ino raha ianarantika baka tamy raha nataony Jehovah taminy Elia?

⁷ Sarotro amy piaramanompo sasany mikoran̈a raha an̈aty fondro, baka amy raha niain̈andro na kolontsain̈indro na efa karaha zen̈y foeky toetrindro. Ino basy raha mety ataontsika baka ho mora amindro hikoran̈a zen̈y amintsika? Tsarova raha nataony Jehovah taminy Elia. Taminy Elia nilefa Jezebela, tsy direkty nikoran̈iny tamy Jehovah raha navoa izy. Efa maromaro andra tafara tatỳ, izy vo nikoran̈a raha jiaby tan̈aty fonany tamy Babany andan̈itry an̈y io. Akory nataony Jehovah? Nitandrin̈esany tsarabe izy. Nankahireziny koa izy sady nirahiny han̈ano asa ten̈a maventy. (1 Mpanj. 19:1-18) Mety ho elaela koa iro rahalahy ndreky ranabavintsika aby io vo hazoto hikoran̈a raha an̈aty fondro amintsika. Fa iro koa fa von̈ono han̈ano zen̈y, atsika mila maharidraha ke hitandren̈y tsarabe raha koran̈indro. Hatoky atsika iro izikoa atsika man̈ano zen̈y.

8. Mifan̈araka amy Genesisy 16:7-13, karakory nataony Jehovah nan̈ampy Hagara?

⁸ Hagara panompovaviny Saray koa fa nanjary vadiheliny Abrama, izy nan̈ano raha tsy mety. Tsy nasiany fotiny foeky Saray izy koa fa navesatra, fotony Saray tsy niteraka. Nisaziany Saray izy ke vaky filifasan̈a. (Gen. 16:4-6) Atsika tsy lavorary, ke mety hieritreritry atsika fa Hagara io olo tsy manjary ke fanaoko izy fo raha navoa izy zen̈y. Fa karakory fahitany Jehovah i Hagara? Nan̈iraka anjely izy han̈ampy Hagara han̈itsy fomba fisain̈ananany. Namiany anjely io jôro tsara koa izy. Tio nahaizany Hagara fa nandiniky izy Jehovah sady nahay raha jiaby navoa izy. Tafiditry lalin̈y tan̈aty fony Hagara raha zen̈y, ke izy nivolan̈a fa Jehovah io “Zan̈ahary mahita.” Hitany Jehovah marin̈y izy!—Vakia Genesisy 16:7-13.

9. Nan̈ino Jehovah tsara fan̈ahy taminy Hagara?

⁹ Ino raha hitany Jehovah taminy Hagara? Hainy tsarabe raha niain̈any Hagara ndreky raha jiaby efa niaretany. (Ohab. 15:3) Ezipsianin̈y izy kanefa nipetraka tantran̈ony Hebreo. Ndraikindraiky donko izy mba nahatsiaro tsy tian̈a. Mety ngoma ry havany ndreky tany faviany koa izy. Tsy izy zaraiky fo koa vadiny Abrama. Nanan̈a vady maro lelahy sasany nanompo Zan̈ahary, taloha. Kanefa tsy zen̈y aby programony Jehovah tamy voanalohany tan̈y. (Mat. 19:4-6) Amy lerany fampirafesan̈a io mahavy olo ho be fô olo ndreky tsy hifankatia. Hainy Jehovah fa tsy nety raha nataony Hagara tamy Saray in̈y, kanefa tsara fan̈ahy taminany fo izy fotony hainy tsarabe fihetsehampony Hagara ndreky raha nandalovany.

10. Akory mety hahaizantsika tsarabe iro piaramanompo amintsika aby io?

¹⁰ Mangala tahaka Jehovah atsika izikoa mifen̈y hahay fihetsehampony piaramanompo ndreky antony mahavy iro man̈ano raha. Ataova raha ahaizanao iro tsarabe. Koràn̈a iro, alohany fivorian̈a ndreky lera ravan̈a. Miaraha manompo amindro. Izikoa mety, ainvite hihinan̈a aminaro an̈y iro. Tsy ampoizinao foeky fa maro raha ho hainao momba iro. Ndraikindraiky anao mieritreritry ranabavy araiky miavon̈o be, kanefa ny marin̈y aminany,  izy raha bihen̈amaso fo. Anao mieritreritry rahalahy araiky tia vola ndreky tia fanan̈ana be, kanefa izy farandraha tsy matity eky! Ary akory fo ranabavy araiky tsiary tsy tara, miaraka amy zanany aby in̈y? Kaiky iro io miaritry fan̈injehan̈a angovo jiaby antran̈ondro an̈y! (Joba 6:29) Marin̈y ndraiky atsika tsy tokony ‘hiditry aminy aferanolo.’ (1 Tim. 5:13) Kanefa, tsara haintsika fo iro rahalahy ndreky ranabavintsika aby io ndreky raha niain̈andro, amy zen̈y ho haintsika ino raha mahavy toetrindro karaha io.

11. Nan̈ino ma mila hainy antipan̈ahy tsarabe ondrikondriky karakaraindro?

¹¹ Antipan̈ahy ten̈a mila mahay tsarabe iro rahalahy ndreky ranabavy karakaraindro aby io. Zen̈y zioty raha nataony Arthur, piandraikitry faritry, ndreky antipan̈ahy araiky. Niaraka nitsidiky ranabavy araiky zay iro. Karaha ty ho Arthur: “Zahay koa fa nikoran̈a taminany, nanjary hainay fa taon̈o vitsivitsy tafarany mariazindro, naty vadiny. Tsy nora raha navoa izy fa vitany fo nitarimy tsarabe zanany aroe vavy, ke nanjary panompony Jehovah tsy mivadiky iro roe io. Nanjary tsy nahita tsarabe ranabavy io tafara tatỳ, ke nalemy trôko mare izy. Fa izy mbala tia Jehovah mare sady ten̈a matoky izy. Tsy nampoizinay foeky fa ten̈a maro raha nianaranay baka taminany.” (Fil. 2:3) Piandraikitry faritry io nangala tahaka Jehovah. Hainy Jehovah tsarabe ondrikondrikinany aby io sady hainy koa jaly mavoa iro. (Eks. 3:7) Ho vitandro antipan̈ahy aby io tsarabe han̈ampy ondrikondriky aby io izikoa iro man̈ano zen̈y.

12. Nan̈ano akory ma ranabavy araiky koa fa nifen̈y hahay ranabavy araiky fiangonan̈a araiky taminany?

¹² Akory izikoa misy piaramanompo araiky tsy azoazonao? Hitepô izy fo anao izikoa hainao tsarabe raha momba izy. Zen̈y iziô raha nataony ranabavy araiky an Asie an̈y. Ho izy: “Misy rahavavy araiky zay tamy fiangonan̈anay tia mivolan̈a mare be. ‘Mba tsy mahalala fomba eky izy ty e’, ho zaho. Zahay roeny rahavavy io koa fa niaraka nanompo, nikoran̈iny taminaka fa izy taloha nitahitahy iry olobeny nivarotro laoko ta bazary, ke tsy maintsy nivolan̈a angovo jiaby iro mikaiky klian.” Karaha ty koa ho izy: “Tontohitry zaho fa mila haiko tsarabe raha niain̈andro piaramanompo aby io, fotony amy zen̈y haiko nan̈ino iro man̈ano raha sasany.” Tsy voatery ho mora man̈ano zen̈y, kanefa mangala tahaka Jehovah atsika izikoa mifen̈y mare hampalalaka fontsika, fotony izy tia “karazan̈olo jiaby.”—1 Tim. 2:3, 4; 2 Kor. 6:11-13.

13. Izikoa Genesisy 19:15, 16 zahan̈a, ino raha nataondro anjely aby io, Lota koa fa nirekireky? Nan̈ino?

¹³ Namezany Jehovah toromariky iankin̈any fahin̈ana i Lota, kanefa izy tsy direkty nan̈araka raha zen̈y. Nisy anjely aroe navy taminany tao nivolan̈a fa mila indesiny miala ta Sodoma vadiny ndreky zanany, fotony anjely aby io ‘handeha handravan̈a tanàna io.’ (Gen. 19:12, 13) Kanefa kiakanizin̈y, mbala tantran̈ondro tao fo iry Lota. Nampitandremindro anjely aby io ndraiky Lota, kanefa ‘mbala nirekireky fo izy.’ Koa zen̈y zahan̈a, atsika mety hivolan̈a fa Lota io olo tsy taitaitrindraha na olo mierin̈y olo. Nifen̈y fo ndraiky Jehovah nan̈avotro izy. Nan̈iraka anjely aby io Jehovah nitana tan̈anandro ndreky nitariky iro niala tanàna io, fotony izy ‘nahinakinaka’ iro.—Vakia Genesisy 19:15, 16.

14. Ino aby antony mety nahavy Jehovah nitepô Lota?

¹⁴ Mety nisy antony maromaro nahavy Jehovah nitepô Lota. Evandraha navozoany Lota donko iro olo aby tambelan̈a tanàna tao, ke zen̈y nahavy izy tsy direkty niala tantran̈onany. Nisy raha hafa koa. Nisy vavasaha nisy lavaka maro feno godoron koa baka tamy tany nimboandro io, kanefa efa nisy panjaka aroe ren̈iny latsaka tamizio tao ke naty. (Gen. 14:8-12) Mety navozo izy, tsao ho voa raha vadiny ndreky ry zanany. Pan̈arivo mare koa izy, ke mety nanan̈a tran̈o tsara be ta Sodoma tao. (Gen. 13:5, 6) Ndray tio raha aby zen̈y, Lota tokony direkty nan̈araka volan̈any Jehovah. Fa Jehovah tsy nifantoko taminy hadisovan̈anany. Taminany, Lota io “olo marin̈y.”—2 Pet. 2:7, 8.

15. Ino raha tsy tokony hataontsika ndreky tokony hataontsika?

¹⁵ Atsika tokony hifen̈y hahay antony mahavy olo araiky han̈ano raha, fa tsy direkty hitsaratsara izy. Nifen̈y nan̈ano zen̈y Veronica, ranabavy araiky an Eropy an̈y. Ho izy: “Nisy rahavavy araiky zay karaha nontsomontson̈o fo, tsy hainao ino antony. Nitonkantokan̈a fo koa izy, ke ndraikindraiky navozo oe zaho han̈aton̈o izy. Ho zaho tamy jeriko tan̈y: ‘Izikoa zaho tamy plasinany, misaora tiako zaho koa misy naman̈a!’ Tapakevitry  zaho baka tio nandeha nan̈ontany izy karakory naniny. Nikoran̈iny taminaka aby raha jiaby tan̈aty fonany! Nahaimaro fo raha haiko momba izy.”

16. Nan̈ino atsika tokony hivavaka ke hiangavy Jehovah han̈ampy atsika hahay hitepô olo?

¹⁶ Jehovah zaraiky fo ny ten̈a mahay atsika tsarabe. (Ohab. 15:11) Iangavia izy han̈ampy anao hitovy fomba fisain̈ana aminany koa fa mizaha olo. Iraha ambarany anao karakory atao mahay mahinakinaka olo zen̈y. Vavaka raha nan̈ampy Anzhela hahay hitepô olo. Nanjary sarotro taminany mare nifandray tamy ranabavy araiky tamy fiangonan̈andro tao. Ho izy: “Mora man̈amia tsin̈y anten̈a, izikoa fa misy raha karaha zen̈y! Efa tseky tsy nijireko foeky izy. Fa zaho baka tio nivavaka tamy Jehovah, nangataka izy han̈ampy zaho hahay hitepô rahavavy io.” Nivaliany Jehovah ma vavakanany zen̈y? Ho izy: “Niaraka nanompo zahay roeny rahavavy io; zahay avio nikoran̈a ela be. Nahaitiako fo izy iziô, ke tapakevitry zaho han̈ampy izy.”

17. Ino ma raha tokony hifen̈antsika?

¹⁷ Atsika tsy afaka mifidy azovy rahalahy ndreky ranabavy vain̈y han̈aboahantsika hinakinaka. Iro io samby miatriky problemo aby, ôtry ataoniry Jona, Elia, Hagara, ndreky Lota in̈y. Sasany aminolo koran̈iny iô io niatriky raha sarotro, fa baka tamy raha nataondro tompiny. Aza adin̈a fa atsika jiaby io misy lerany mba mety tafan̈ano karaha zen̈y koa. Zen̈y mahavy Jehovah man̈iraka atsika “hahinakinaka” piaramanompo amintsika. (1 Pet. 3:8) Samby isany olo an̈isany fianakaviambeny pirahalahy erantany io, fa hiray sain̈y fo atsika an̈isanizio izikoa samby mifen̈y mare hahay hitepô naman̈a. Aleva tahaka Jehovah ke mifen̈a mare hitepô piaramanompo!