1. Salikaka ci Loso ato widang ningra, tano maanan pakayraan micekiw to Fangcalay Cudad hani? Hano ngaˈayay koniya pakayraan?

ˈAYAW no 100 miheca, salikaka ci Loso ato romaroma salikaka misatapangay micekiw to Fangcalay Cudad. Pakayni ci Yihofaan, ci Yisan, pakayraan no mapatayay ato sapatefoc, sakafanaˈaw cangra samaanay ko sowal no Fangcalay Cudad. O pakayraan nangra kantangay: Ira ko mihadakay to salicay, dotoc misongilaˈ micekiw to milingatay toniya salicay a sinael, salikor tiliden ko sapitolas a sowal. Itini sapadama ni Yihofa, oniya soˈliˈlinay ko harateng a tamdaw adihayay ko makilimay a kimad no Fangcalay Cudad. Tahanini, o kalimlaan koniya soˈlinay a kimad sanay ko harateng ita.

2. Latekay hano pasangar kita matatodong ko kacipinang to sapairasol hani?

² Kawra, kahenayay mahapinang noniya micekiway to Fangcalay Cudad, cipinang to sapairasol no Fangcalay Cudad ikakaay ko pasangar to kacipinang to taˈeneran a kimad. Misamanay hani? Cecay lalangian i, misatapangto malaˈosi ko sapairasol anca malaˈosi a maemin, ikor ngaˈ matatodongay ko kacipinang to tatodong no sapairasol. Roma lalangian i, saka tatodongaw no kacipinang to sapairasol, haharatengen ko fafekang ato laenoay a sinael. Ano o cecay aca ko sinanoten a malawa ko roma a pakayraan, wa mararaw ko sapitolas a sowal. Ano nengneng no hatini, o kacipinang ita to Yoil i salakat cowa ka rocek. Oniya lalakaw wa misongilaˈ mitadtad toniya sapairasol, wa milengoho hano sasalofen ko pitadtad toniya sapairasol.

3-4. Isalakat likakawa no Kawas samaanay ko pitadtad to sapairasol i Yoil 2:7-9 hani?

³ ˈOsien ko Yoil 2:7-9. Paˈayaway ci Yoil, iraay ko taˈangayay  ˈopo a ririˈ micomoday i Israil, matiya o raˈit no layon ko wadis nanira a macidem, awaay ko maˈosaway a komaen! (Yoil 1:4, 6) Adihayay mihecaan, sowal no likakawa no Kawas o masowalay i sapairasol a ririˈ o finawlan ni Yihofa, o mitosilay a demak nangra malecaday o ririˈ micomod caay kafilo a miˈeteng, i Yoil 1:6 a ‘kitakit’ oyaan makayhiday no ˈaˈideman no pidoyongan ko mitoroˈan, pakayni i mitenakan a lihaf taˈangayay ko pisetiˈ cangraanan. *

⁴ Ano o Yoil 2:7-9 aca ko haratengen ita, matatodongay koniya pitadtad i fafekang. Kawra ano songilaˈen mitadtad ko fafekang laeno a sinael, wa mahapinang to sasalofen ko pitadtad isalakat. Nengnengen ita ko sepat ihkalay a lalangian.

5-6. (1) Pakayni i Yoil 2:20, pitadtad isalakat o saka 1 sasalofen a lalangian o maanan hani? (2) Pakayni i Yoil 2:25, saka 2 sasalofen a lalangian o maanan hani?

⁵ Salakat, nengnengen ko saka 1 lalangian. Sowal ni Yihofa: ‘Laplapen Ako paliyas tamowanan ko kaˈamisay a sofitay [ririˈ].’ (Yoil 2:20) Ano mitaypiyaway ko ririˈ toya midoedoay to limoˈot ni Yis mitosil a Misawacayay Tamdaw ni Yihofa, hano laplapen ni Yihofa cangra hani? (Icikil 33:7-9; Matay 28:19, 20) Mahapinangay, ora lalaplapen ni Yihofa a ‘ririˈ’ cowa ko finawlan Ningra, oyaan misafelitay to finawlan Ningra a tamdaw.

⁶ Dotoc, nengnengen ko saka 2 lalangian. Itini Yoil 2:25, sanay ci Yihofa: ‘Na miocoran Ako ko sofitay Ako tayra tamowanan, oya masaferengay a ririˈ, awaay ko sapikpik a ririˈ, komaenay to maamaan a ririˈ ato maˈanofay a ririˈ. Kawra oya makaenay nara a dafong, papatodongen Ako kamo.’ Toniya sinael, sowal ni Yihofa o ‘papatodongen’ ko mipalakan no ririˈ, ano oya fanekfekay milasil to ngaˈayay lihaf a tamdaw ko mitoroˈan to ririˈ, ora milasilan nangra a lihaf hano paira to sakapalak hani? Soˈlinay i, o milasilan nangra a lihaf o papadama to tamdaw pasasiyor, milidong to ˈorip no tamdaw, paira to makapahay a minaroˈan.—Icikil 33:8, 19.

7. Masowalay no Yoil 2:28, 29 ‘ikor noniya demak’, wa maharateng no tamdaw ko maanan salicay?

⁷ ˈOsien ko Yoil 2:28, 29. O saka 3 lalangian milingatay to kadadoedo no mifekaday a demak. Sinanoten, sowal ni Yihofa: ‘Ikor noniya demak, wa teraken Ako ko fangcalay saocor i tireng no masakenaay tamdaw.’ ‘Ikor noniya demak,’ tatodong i, malaheci ko ˈinorong no ririˈ. Ano o milasilay to Hongti Kitakit a mitosilay ko ririˈ, hano itini ikor no malaheci nangra ko mitosilay demak, itiya a miterak ci Yihofa to fangcalay saocor i tireng nangra hani? Soˈlinay i, edengan mitadiˈec to sadama no fangcalay saocor ngaˈ, ngaˈay cangra itini pisafelit ato pikeceng no mirikecay a kamayan tanektek cangra a mitosil.

8. Masowalay no Paˈarawan 9:1-11 a ririˈ, o cima ko mitaypiyawan hani? (Nengnengen ko papotalay a coka.)

⁸ ˈOsien ko Paˈarawan 9:1-11. Nengnengen ita ko saka 4 a lalangian. Miharateng kita i salakat to milingatay to mitosilay a tayal ko masowalay ni Yoil a ririˈ, pakayniay i malecaday a sapairasol i Paˈarawan. O sapairasol i Paˈarawan masowalay ko taˈangayay ˈopo a ririˈ iraay ko ‘laway no tamdaw,’ ‘hato cipohongay ko fongoh,’ wa pasemsem cara toya ‘awaay ko salinaˈ no Kawas i katotong no laway a tamdaw’  lima folad (koˈedaw no ˈorip no ririˈ). (Paˈarawan 9:4, 5, 7) O masowalay no Paˈarawan a ririˈ oya tatayra i kakarayan a Krisciyang ko mitoroˈan, timoloay cangra milasil to sasawkit no Kawas toniya ciraraway a hekal, adadaan nanay ko hekal a tamdaw.

9. Itiniay Yoil a ririˈ ato Paˈarawan a ririˈ iraay ko maanan a mahapinangay kasasiromaan hani?

⁹ O sapairasol no Yoil ato Paˈarawan iraay ko kalecadan, kawra iraay ko mahapinangay a kasasiromaan. Tinakoen, o masowalay no Yoil a ririˈ mipalakay to pinaloma, kawra masowalay no Paˈarawan a ririˈ ‘cowa ka ngaˈay mipalak to lengos, pinaloma ato kilang.’ (Yoil 1:4, 6,7; Paˈarawan 9:4) Masowalay i Yoil a ririˈ mikitiniay i kaˈamis a ira, kawra itiniay paˈarawan a ririˈ mikitiniay ‘awaay ko paraˈ a ofang’ macakat. (Yoil 2:20; Paˈarawan 9:2, 3) Itiniay Yoil a ririˈ milaplapan no Kawas, itiniay i Paˈarawan a ririˈ cowa ka laplap, milahciay to ˈinorong nanira, hanaca cowa pasowal ko Fangcalay Cudad to cowa pihayda ci Yihofa caniraan. (Nengnengen ko sapatongal lalakaw ‘ pakayniay tosa ririˈ a sapairasol-kasasiromaan’)

10. (1) Itini Yoil ato Paˈarawan malecaday ko mitaypiyawan no ririˈ han? (2) Itini Fangcalay Cudad, o malecaday a demak latekay mitaypiyaway to cowa ka lecad a tatodong, patinakoen mitadtad.

¹⁰ O sapairasol no Yoil ato Paˈarawan ano iraay ko mahapinangay a kasasiroma,  mihaenay oniya tosa sapairasol cowa ka laliting. O masowalay noniya tosa cudad mitaypiyawan no ririˈ cowa kalecad. Itini Fangcalay Cudad, o malecaday a demak latekay mitaypiyaway to cowa ka lecad a tatodong. Tinakoen, sowal i Paˈarawan 5:5 ci Yis o ‘layong no finacadan no Yuta,’ kawra sowal i 1 Pitiro 5:8 ci Satan o ‘miletohay a layong.’ Pakayni misadakan i fafekang a 4 lalangian, iraay ko tatodong ita a misalof to pitadtad to sapairasol no Yoil. Hatiraay, o maanan ko tatodong noniya sapairasol hani?

11. Itini Yoil 1:6 ato 2:1, 8, 11 o manan a demak padama kitanan mihapinang, mitaypiyawan no ririˈ o cecay a sofitay?

¹¹ Misongilaˈ kita a miasip to sapairasol no Yoil, wa mahapinang o misowalan itini o pilood no ˈada. (Yoil 1:6; 2:1, 8, 11) Sowal ni Yihofa wa mikerid Cingra to ‘taˈangayay sofitay’ (sofitay no Papilon) mitefoc to cowa ka madimadi a Israil tamdaw. (Yoil 2:25) Panganganan ni Yihofa ko sofitay no Papilon to ‘kaˈamisay a sofitay,’ samanen mikitiniay cangra i kaˈamis no Israil a mifekad to lalood. (Yoil 2:20) O sofitay nangra malecaday to masieroday ko rayaray a ririˈ, sowal ni Yoil ‘timoloay canira talaˈayaw, micomod i niyaroˈ, macakat i lowil, mikodapol i lomaˈ, malecad o mitakaway pakayra sasingalan a micomod.’ (Yoil 2:8, 9) Haratengen iso koniya pakayraan hena? Miedefay ko sofitay no Papilon, sapiyapiyat sanay ko fonos, awaay ko pilimekan no cowa ka madimadi a Israil tamdaw!.

12. Pakayniay i ririˈ a sapairasol no Yoil samanay a malaˈosi hani?

¹² Itini ˈayaw no kongyin 607 miheca, milooday ko sofitay no Papilon to Yirusalim, oya pakayniay i ririˈ a sapairasol no Yoil malaˈosiayto. Sowal no Fangcalay Cudad: ‘Mikeridan no Kawas ko hongti no Papilon a tamdaw milood cangraanan, itini fangcalay sefi tano fonos a mipatay to kapah nangra. Ano pakalongayto, limocedan, anca matoˈasay, malonayay, caay ka siniˈada cangra. Patorodan no Kawas ko kihcod i kamay nangra. Mitodohan ko fangcalay sefi no Kawas, mitastas to lowil, tano namal mitodoh to polong a niyaroˈ, mipalak to kalimlaan a dafong.’ (2 Rayray 36:17, 19) Maharek ko sofitay no Papilon palaˈafo to kihcod i, sanay ko sowal no pakaˈaraway tamdaw: ‘O awaay ko tamdaw a kohkoh konini, hanaca pafelianto i kamay no Papilon a tamdaw.’—Yirimiya 32:43.

13. O maanan ko tatodong no Yirimiya 16:16, 18 hani?

¹³ Ikor no mitilid ci Yoil to sapairasol 200 miheca, pakaynian ni Yihofa ci Yirimiyaan paˈayaw to roma milingatay a demak. Sowal ni Yihofa wa misongilaˈ ko sofitay no Papilon a mikilim to tatiihay ko demak a Israil tamdaw, miemin a mirepet cangraanan. Sanay ko sinael: ‘milasilay ci Yihofa: Wa tahidangen Ako ko mifotingay, malecad cangra o misalilay to foting, misalil to Israil tamdaw. Wa mitahidangho Kako to miˈadopay, malecad cangra o miˈadopay, mikitini lotolotokan ato kasadihidihi no ˈongcoy a miˈadop to Israil tamdaw. Tatooren Ako ko raraw nangra, mitefoc cangraanan.’ (Yirimiya 16:16, 18) Sakoniya sowal, oya cowa ka pasasiyor a Israil tamdaw ano itinito lotok anca i riyar a milimek, cowa ko papakaliyas to pirepet no sofitay no Paplilon!

14. O Yoil 2:28, 29 hacowaay a malaˈosi hani?

¹⁴ Cowa ko paˈayaw aca ni Yoil to sakalaˈafo, paˈayawayho to cecay ngaˈayay lihaf, o mamiliyaw a mapalowad ko sera no Israil, wa miliyaw a kadofah ko kaˈorip no finawlan. (Yoil 2:23-26) Cowa ko itini aca no dafongan a marenec ko tamdaw, mikiˈokayho ci Yihofa: ‘O tateraken ako ko fangcalay saocor Ako i tireng no sikawdan Ako.’ (Yoil 2:28, 29) Kawra, o fangcalay saocor no kawas cowa ka tangsol a materak i pipatikol no Israil i nalacolan, oniya demak itiniay saka 33 miheca kocinsic a mifekad. Hano mafanaˈ kita tonini hani?

15. Pakayni Dmak 2:16, 17, misaka dademak ci Pitiro to Yoil 2:28 i, mifalican ko maanan a sowal? O maanan ko tatodong nonini?

¹⁵ O tarokos ci Pitiro itini sakayat no Kawas, misaka dademakay to Yoil 2:28, 29 a mitadtad to mifekaday a demak i Kocinsic. Toya papacem 9 ko toki, miterakan no Kawas ko fangcalay saocor, oya milifokay to fangcalay saocor a tamdaw misatapangay ‘milasil to kasapaan a demak no Kawas.’ (Dmak 2:11) Itini sakayat no Kawas, misaka dademak ci Pitiro to sapairasol no Yoil i mifalicay to sowal. Mahapinangay iso o maanan ko mifalican ningra a sowal han? (ˈOsien ko Dmak 2:16, 17.) Cowa ka somowal ci Pitiro to ‘ikor noniya demak,’ sowal sa ‘itini salikoray romiˈad,’ wa itiya ko Kawas miterak to fangcalay saocor i ‘tireng no masakenaay tamdaw.’ O misowalan ningra a ‘salikoray romiˈad’ itiniay saka 70 miheca ˈayaw no malaˈafo ko Yirusalim a tatokian, mihaenay o sapairasol ni Yoil halafinto a matilid ngaˈ malaˈosiay.

16. Itini sapadama no fangcalay saocor, saka 1 hahekalan mitosilay a demak iraay ko maanan a minaroˈan hani? Samaanay anini hani?

¹⁶ Ikor no materak ko fangcalay saocor i  saka 1 hahekalan, padadotocay macowat ko mitosilay a demak. Maedeng saka 61 miheca, patikamian ni Pawlo ko Kolosay kasakopang, sanay ‘mapatenakayto ko ngaˈayay lihaf i paro no kakarayan, mafanaˈayto ko masangaˈay a pinaˈorip.’ (Kolosay 1:23) Tatodong ni Pawlo i, mapatenakayto ko ngaˈayay lihaf i ngaˈayay kahiceraan no tamdaw a pala. Anini, itini sapadama no fangcalay saocor, tahiraayto i ‘lihoc no pala’ a mapatenak ko ngaˈayay lihaf!—Dmak 13:47. Nengnengen ko sapatongal lalakaw ‘ O Tataktaken Ako ko Fangcalay Saocor Ako i Tireng no Masakenaay Tamdaw.’

17. O pitadtad ita to Yoil 2:7-9 iraay ko maanan masalofay hani?

¹⁷ O pitadtad to Yoil 2:7-9 iraay ko maanan masalofay hani? Anini, matatodongayto ko kacipinang ita toniya sapairasol. Kantangen ko sowal, oniya sinael cowa pilingat to mitosilay a demak, o pilood no sofitay no Papilon i ˈayaw no kongyin saka 607 miheca to Yirusalim ko mitoroˈan a demak.

18. Soˈlin mafalicay ko pitadtad to sapairasol, kawra o maanan ko cowa ka falic hani?

¹⁸ Soˈlin mafalicay ko pitadtad to sapairasol, kawra o maanan ko cowa ka falic hani? O finawlan ni Yihofa padadotocay tano masakenaay pakayraan mitenak to ngaˈayay lihaf itini paro no kakarayan. (Matay 24:14) O sakeceng no mirikecay cowa papakaconged kitaanan a mitosil. Itini sadama ni Yihofa, wa matongal ko fanekfek no mita, timolo a milasil to ngaˈayay lihaf no Hongti Kitakit! Mansa, wa padadotoc kita tano misapoeneray a waywayan, micangacang ci Yihofaan padama kitaanan cipinang to sapairsol no Fangcalay Cudad, pakasoˈlin Cingranan aitini matatodongay a toki, padama kitaanan cipinang to ‘kihcod a soˈlinay kimad!’—Yohani 16:13.