1. Sonaha Sanina Russell pakon hasomanni mangindahi hasintongan ni Bibel, janah mase dear cara sisonai?

LOBIH humbani saratus tahun na salpu, Sanina C. T. Russell pakon piga-piga hasomanni mamparlajari hasintongan ni Bibel. Sidea sihol mambotoh aha do sasintongni na iajarhon Bibel pasal Naibata Jahowa, Jesus Kristus, sonaha do halak na matei, pakon tobusan. Sanggah na marlajar ai, dong na mambahen sungkun-sungkun anjaha na leganni mamareksa ayat-ayat na markaitan hubani topik ai. Dobkonsi ai, isuratkon sidea ma hasintongan na dapot sidea. Marhitei pangurupion ni Jahowa, bahat do hasintongan ni Bibel na iarusi sidea, na marguna hubanta ronsi sonari.

2. Sipata, aha do na boi mambahen lepak hita mangarusi sada panjahaion ni Bibel?

² Tapi, ibotoh sidea ma urahan do mangarusi ajaran dasar ni Bibel marimbangkon aha na ihatahon Bibel pasal ari simagira, na isobut panjahaion. Mase sonai? Alasan na parlobei halani sada panjahaion boi tangkas iarusi sanggah masa atap pe dobkonsi masa ai. Alasan na leganni, ase tangkas iarusi hita sada panjahaion maningon ipareksa hita do ganup ayat bani buku ai na markaitan hubani panjahaion ai. Anggo lang, on ma na mambahen lepak hita mangarusi panjahaion ai. Ra, ai do na tarjadi sanggah hita marusaha mangarusi sada panjahaion bani buku Joel. Jadi ulas hita ma use panjahaion ai ase boi ibotoh hita artini na sasintongni.

3-4. Sadokah on, aha do na iarusi hita humbani Joel 2:7-9?

³ Basa Joel 2:7-9. Nabi Joel mangkatahon dong bahat balang  na laho manripaskon tanoh Israel. Marhitei ipon ampa sait na songon singa, iboiskon sidea ma ganup suan-suanon na dong ijai! (Joel 1:4, 6) Sadokah martahun-tahun iagan hita do panjahaion ai manggambarhon Saksi-Saksi Jahowa na ringgas marbarita, usih songon balang na lang boi ipasoh. Janah iagan hita do parambilanonta boi mambahen sunsah “tanoh”, atap ganup halak na irajai pambobai ni ugama. *

⁴ Anggo pitah Joel 2:7-9 dassa na ibasa hita, pangahapta sintong do ai. Hape anggo anget ipareksa hita ayat na markaitan hubani panjahaion ai, gabe ibotoh hita ma lang sonai artini. Eta ulas hita ma ompat alasanni.

5-6. Aha ma na isungkun hita sanggah mambasa (a) Joel 2:20? (b) Joel 2:25?

⁵ Alasan na parlobei, pardiateihon ma Jahowa marjanji laho ‘padaohon-Ni’ do balang ai. (Joel 2:20) Porini balang ai manggambarhon Saksi-Saksi Jahowa na mandalankon titah ni Jesus laho marbarita anjaha mangurupi halak gabe susianni, mase ma Jahowa marjanji laho padaohkon sidea? (Hes. 33:7-9; Mat. 28:19, 20) Tangkas ma, sedo juakjuak-Ni na laho ipadaoh Ia, tapi halak na kejam hubani juakjuak-Ni do.

⁶ Alasan na paduahon, paruhurhon ma na isurat bani Joel 2:25. Jahowa mangkatahon, “Pasuangon-Ku ma bani nasiam partahunan na ginagat ni balang, tamponok pakon hirik, tentarang-Ku na buei in, na Hupabingkat dompak nasiam.” Pardiateihon da, Jahowa marjanji ‘pasuangon-Ni’ do, atap gantihonon-Ni do harugian na ibahen balang ai. Porini balang ai manggambarhon juakjuak-Ni na marbarita, on artini barita ni sidea boi mambahen hasedaon. Ai masuk akal do ai? Hape sasintongni, parohkon pasu-pasu do barita ai halani boi mangojur parjahat mambahen hamubahon na parohkon hagoluhan!​—Hes. 33:8, 19.

7. Sanggah mambasa Joel 3:1, 2, sonaha hita iurupi laho mangarusi hata “bani ari ai”?

⁷ Basa Joel 3:1, 2. Alasan na patoluhon markaitan hubani aha na masa dobkonsi ai. Jahowa mangkatahon, “Bani ari ai [atap, “Dobkonsi ai”, Terjemahan Dunia Baru] useihonon-Ku ma tonduy-Hu.” On patuduhkon iuseihon Jahowa do tonduy-Ni bani ari dobkonsi balang ai salosei mandalankon tugasni. Tapi, porini balang ai manggambarhon juakjuak-Ni na marbarita, mase ma iuseihon Jahowa tonduy-Ni dobkonsi sidea salosei marbarita? Hape sadokah marpuluh tahun, bahat do halak na manlanglangi janah manlarang horja parambilanon ni sidea. Anggo lang iurupi tonduy na pansing tontu lang boi sidea totap marbarita.

8. Ise ma balang na ipatugah bani Pangungkabon 9:1-11? (Tonggor ma gambar sampul.)

⁸ Basa Pangungkabon 9:1-11. Sonari ulas hita ma alasan na paompathon. Hinan, iagan hita do serangan balang na ipatugah bani Joel manggambarhon horja parambilanonta halani dong panjahaion na sarupa bani buku Pangungkabon. Ijai ihatahon mangkaluar ma balang janah rupani songon jolma. Bani uluni dong “sortali [atap, mahkota] na songon omas”. (Pangk. 9:7) Iarsik-arsik sidea ma munsuh ni Naibata atap ‘jolma na so adong sap humbani Naibata i pardompakanni’. Sadokah lima bulan ma ihorjahon sidea ai. Nasa in do homa umur ni balang. (Pangk. 9:4, 5) Humbani panjahaion ai, dapot uhurta ma anggo balang ai manggambarhon  juakjuak ni Naibata na iminaki. Barani do sidea mambaritahon panguhuman ni Naibata bani dunia on. Hasilni, gabe sunsah ma pangahap ni buei halak na mangihutkon dunia on.

9. Aha ma parlegananni panjahaion na dong bani buku Joel pakon bani buku Pangungkabon?

⁹ Hassi pe dong piga-piga na sarupa bani haduasi panjahaion ai, tapi dong do homa parlegananni. Bani buku Joel ihatahon igagat balang ai do suan-suanon. (Joel 1:4, 6, 7) Hape bani buku Pangungkabon, ‘iparentahkon do ase ulang ikahua balang ai poyon-poyon na i tanoh in’. (Pangk. 9:4) Balang na ididah si Joel roh hun Utara. (Joel 2:20) Tapi balang na ididah apostel Johannes roh hun ruang partoruh. (Pangk. 9:2, 3) Usiron ni Jahowa do balang na ididah si Joel. Hape bani buku Pangungkabon lang dong ihatahon anggo balang ai iusir. Tapi ipaturut do sidea pasaloseihon tugasni. Lang dong ipatugah bani Bibel anggo Jahowa lang marosuh bani sidea.​—Tonggor ma kotak “ Panjahaion pasal Balang—​Sarupa Tapi Legan.”

10. Aha ma contoh bani Bibel na patuduhkon ra do legan artini sada gambaran bani sada buku pakon buku na legan?

¹⁰ Hunjai gabe iarusi hita ma, hapeni haduasi panjahaion ai lang markaitan. Jadi, ai legan do balang na ipatugah bani buku Joel pakon na ipatugah bani buku Pangungkabon? Eak. Bani Bibel sipata boi do legan artini sada  gambaran sanggah ai iulas bani buku na legan. Umpamani, bani Pangungkabon 5:5, isobut do Jesus “singa na humbani marga Juda”. Hape bani 1 Petrus 5:8, igambarhon do Sibolis songon “singa na maraum”. Jadi, dob iulas hita ompat alasan nongkan ai, gabe ibotoh hita ma porlu do hape ipindahi hita hatorangan na legan ase boi iarusi hita aha do artini panjahaion na dong bani buku Joel ai.

11. Sonaha do Joel 1:6 pakon 2:1, 8, 11 mangurupi hita laho mangarusi ise do na igambarhon balang ai?

¹¹ Anggo itorih hita ayat-ayat na legan bani buku Joel, gabe ibotoh hita ma pasal serangan do na iulas si Joel ai. (Joel 1:6; 2:1, 8, 11) Jahowa mangkatahon anggo Ia mamakei ‘tentara-Ni’ (tentara ni Babel) laho manguhum halak Israel na lang setia. (Joel 2:25) Sosok do sidea isobut “hun utara” halani hun utara do halak Babel mamorangi halak Israel. (Joel 2:20) Sidea ipausih songon balang halani taratur do sidea marodor. Si Joel mangkatahon, “Marsitohu dalanni bei do [tentara ai] . . . Marhujai-hujon do sidea ibagas huta, marlintuni i atas tembok; ipanangkihi sidea rumah-rumah, masuk hun jandela songon panangko.” (Joel 2:8, 9) Boi do ibayangkon nasiam ai? Ija pe dong tentara ai, lang dong ianan laho marbuni, anjaha lang dong halak na boi paluahkon diri humbani sidea.

12. Sonaha panjahaion ni si Joel pasal balang ai ipasaud?

¹² Songon balang, iserang Babel (atap, halak Kasdim) ma Jerusalem tahun 607 SM. Nini Bibel, “Tangkog raja ni halak Kaldea mandorab sidea, mamunuh anak garama ni sidea marhitei podang . . . , anjaha seng maralang-alang ia mangidah anak boru pakon garama, na matua barang na ubanon; haganup do sidea ipadas hubagas tanganni. Itutung sidea do Rumah ni Naibata, anjaha iparreong tembok ni Jerusalem; isurbuy do ganup rumah-rumah na banggal na ijai ai bani apuy, anjaha iparseda ganup parugasni na maharga.” (2 Kron. 36:17, 19) Dob iparseda huta ai, on ma na ihatahon halak, “Halimisan do in, na so marisi jolma barang pinahan; domma ondos in bani tangan ni halak Kasdim.”​—Jer. 32:43.

13. Aha do na ibotoh hita humbani Jeremia 16:16, 18?

¹³ Hira-hira 200 tahun dobkonsi panjahaion ni si Joel, ipakei Jahowa do si Jeremia laho padaskon panjahaion na legan tarsingat serangan ai. Si Jeremia mangkatahon asok-asok do tentara Babel mangindahi halak Israel na lang setia. Dob ai, itangkap ma sidea ganupan. Nini Jahowa, ‘Suruhon-Ku ma buei panjala. Jadi jaloonni ma sidea; dob ai suruhon-Ku ma buei parburu, jadi buruonni ma sidea humbani sagala dolog-dolog, humbani sagala buntu-buntu ampa ronggang-ronggang ni dolog batu. Sihol balaskonon-Ku do hajahaton ampa dousa ni sidea.’ Sidea na lang ra mubah ai, lang boi marbuni, age pe i laut atap pe i harangan. Lang boi sidea maluah humbani panguhuman ni Jahowa.​—Jer. 16:16, 18.

14. Attigan do Joel 3:1, 2 ipasaud?

¹⁴ Sobali barita panguhuman, ipatugah si Joel do homa barita na madear. Gabe subur ma use tanoh Israel. (Joel 2:23-26) Anjaha bani ari simagira, marlobih-lobih ma sipanganon partonduyon. Jahowa mangkatahon, “Useihonon-Ku ma tonduy-Hu bani sagala daging: manjahai ma anak pakon boru nasiam, . . . Dihut do bani jabolon dalahi pakon jabolon naboru useihonon-Ku tonduy bani ari ai.” (Joel 3:1, 2) Sanggah halak Israel mulak hun Babel hu huta ni sidea, lang mintor iuseihon  Naibata tonduy na pansing. Marratus tahun dobkonsi ai, ipasaud Naibata ma ai bani ari Pentakosta 33 M. Hunja ibotoh hita ai?

15. Domu bani Lahoan 2:16, 17, hata na ija do na iubah si Petrus hun Joel 3:1, anjaha aha do artini ai?

¹⁵ Marhitei pangurupion ni Jahowa, ikaitkon apostel Petrus do panjahaion na dong bani Joel 3:1, 2 pakon ari Pentakosta. Hira-hira jam siah sogod ni ari, iuseihon Naibata ma tonduy-Ni anjaha halak na mandapot ai mulai mansahapkon “habanggalon ni Naibata”. (Lah. 2:11) Sanggah si Petrus manungguli panjahaion ni si Joel, dong do otik leganni ai. (Basa Lahoan 2:16, 17.) Ai ibotoh nasiam do ai? Bani hata parlobeini, sedo hata “dobkonsi ai” na ipakei si Petrus. Tapi ihatahon ia do “bani ari parpudi” iuseihon Naibata ma tonduy-Ni “bani sagala daging”. Ari parpudi na imaksud si Petrus ijon ai ma paima Jeruslem ampa rumah panumbahan iparseda. On patuduhkon dokah tumang do ase saud panjahaion ni si Joel ai.

16. Aha do pangaruhni tonduy na pansing hubani horja parambilanon bani abad na parlobei, ampa sonari on?

¹⁶ Dobkonsi iuseihon Naibata tonduy na pansing hubani halak Kristen bani abad na parlobei, ipungkah sidea ma marbarita anjaha ujungni das ma ai hu sab dunia on. Sanggah apostel Paulus manurat hubani kuria Kolosse hira-hira tahun 61 M, boi ma ihatahon anggo barita na madear domma ibaritahon bani “haganup na tinompa, na i toruh ni langit”. (Kol. 1:23) Ijia, “haganup na tinompa” artini haganup jolma bani ianan na boi irohi si Paulus ampa halak Kristen na legan. Lambin buei do halak mambogei barita na madear marhitei pangurupion tonduy ni Jahowa. Sonari, domma ibaritahon ai “ronsi ujung ni tanoh on”!​—Lah. 13:47; tonggor ma kotak “ Useihonon-Ku ma Tonduy-Hu.”

17. Sonari, aha ma na iarusi hita humbani panjahaion ni si Joel pasal balang?

¹⁷ Aha do na marubah? Sonari, domma sintong iarusi hita panjahaion bani Joel 2:7-9. Tangkas ma ayat-ayat ai lang mangartihon parambilanonta na ringgas. Tapi panjahaion ai mangartihon tentara Babel na mamorangi Jerusalem bani tahun 607 SM.

18. Aha do na lang marubah humbani juakjuak ni Naibata?

¹⁸ Aha do na lang marubah? Totap do marbarita Saksi-Saksi Jahowa atap ija pe. Janah marmasam cara do na ipakei sidea. (Mat. 24:14) Hassi pe dong pamarentah na manlarang parambilanonta, totap do hita marbarita. Marhitei pangurupion ni Jahowa, lambin ringgas do hita sonari. Lambin barani do hita padaskon ambilan na madear pasal Harajaon ni Naibata! Anjaha totap do hita martoruh ni uhur mangindo pangurupion ni Jahowa laho mangarusi panjahaion ni Bibel. Porsaya do hita anggo jumpah panorangni, iurupi Jahowa do hita mangarusi “sagala hasintongan”!​—Joh. 16:13.