1. Uga cara erlajar si ilakoken turang seninata Russell ras teman-temanna? Janah ngkai maka e erguna?

LEBIH seratus tahun si lewat, pulung me turang seninata C. T. Russell ras piga-piga temanna. Ipelajari kalak e atena kai situhuna si iajarken Pustaka kerna Dibata Jahwe, Jesus Kristus, keadan kalak mate, bage pe kerna tebusen. Sederhana cara si ilakoken kalak e. Lit sekalak si erban penungkunen, jenari ras-ras kalak e mereksa tiap ayat si lit hubungenna ras topik si sangana ibahas. Kenca si e, icatat kalak e kesimpulen si idatna. Alu penampat Jahwe, iangkai dilaki-dilaki si tutus enda me melala kebenaren si penting arah Pustaka, janah kerina kebenaren e penting kel siakap seh asa gundari.

2. Mon-mon, kai si erbanca maka salah pengangkanta kerna erti sada nubuat bas Pustaka?

² Tapi, dungna isadari kalak e maka seran ngangkai nubuat si lit bas Pustaka asangken ngangkai ajaren dasar Pustaka. Engkai? Salah sada alasenna eme perban biasana, sada nubuat Pustaka nggo banci tuhu-tuhu iangkai sanga nubuat e paksana terjadi ntah pe nggo terjadi. Tapi lit ka alasen si deban. Gelah banci siangkai erti sada nubuat, arus siukuri kerina si lit hubungenna ras nubuat e. Adi sada bagin saja ngenca siperdiateken janah bagin si deban lang, banci salah dungna pengangkanta kerna ertina. Banci saja enda me si terjadi sanga siusahaken ngangkai sada nubuat bas buku Joel. Gundari mari sipereksa nubuat e mulihi janah sibahas ngkai maka perlu sisesuaiken pengangkanta.

3-4. Seh asa gundari, uga pengangkanta kerna nubuat si lit bas Joel 2:7-9?

 ³ Baca Joel 2:7-9. Inubuatken Joel maka melala kel kari reh labang ngancurken negeri Israel. Keri ipan labang e kerina sinuan-sinuan, perban ipen ras rahang labang e bali bagi singa. (Joel 1:4, 6) Ertahun-tahun dekahna, siakap labang-labang si la terpengadi e maksudna umat Jahwe si terus erberita. Janah siakap ka dahin erberita e tempa-tempa ngancurken ‘negeri’ si ikataken bas Joel 1:6. Maksudna, dahin erberita ncidahken maka parah kel keadan rohani kalak si ngikutken agama palsu. *

⁴ Adi Joel 2:7-9 saja ngenca sibaca, nggo benar siakap penjelasen erti nubuat e. Tapi adi siukuri manjar-anjar kerina bagin nubuat e, siteh me maka perlu sisesuaiken pengangkanta. Mari sibahas empat alasenna.

5-6. Penungkunen kai nge si lit sanga sibaca (a) Joel 2:20? (b) Joel 2:25?

⁵ Si pertama, perdiateken janji Jahwe kerna pasuken labang e: “Kupelawes bala labang si rehna i Utara nari.” (Joel 2:20) Adi pasuken labang e nggambarken Saksi-Saksi Jahwe si matuhi perentah Jesus guna erberita ras erban murid, ngkai maka ijanjiken Jahwe ipelawesNa kari kalak e? (Esek. 33:7-9; Mat. 28:19, 20) Jelas me, si ipelawes Jahwe labo umatNa si setia, tapi kai pe ntah ise pe si kejam man umatNa.

⁶ Alasen si peduaken, cuba ukuri kai si itulis bas Joel 2:25. Nina Jahwe bas ayat e, “Kuulihken man bandu kai si enggo bene, i bas tahun-tahun tupung labang mangani gandumndu. Aku kap si nuruh bala labang e ngelawan kam.” Perdiateken janji Jahwe guna ‘ngulihken kai si nggo bene’ iban pasuken labang e. Adi pasuken labang e maksudna umat Jahwe si erberita, e ertina berita si ipeseh kalak e erban bene. Tapi situhuna, berita e jadi pasu-pasu kel. Berita e banci erban tersuruh ukur kalak si jahat ertobat janah nelamatken kegeluhen!​—Esek. 33:8, 19.

7. Bas Joel 2:28, 29, kai si banci siangkai arah kata-kata “kenca si e”?

⁷ Baca Joel 2:28, 29. Alasen si peteluken lit hubungenna ras uruten kejadin si lit bas nubuat e. Perdiateken kai nina Jahwe, “Kenca si e Kubereken me kesahKu.” Arah kata-kata “kenca si e,” siteh maka ibereken Jahwe kesah si badia kenca idungi pasuken labang e tugas si arus ilakokenna. Adi pasuken labang e nggambarken kalak si mberitaken Kerajan Dibata, ngkai maka ibereken Jahwe kesah si badia man kalak e kenca dung kalak e ngelakoken tugasna? Puluhen tahun dekahna, iadapi umat Dibata melala tentangen ras pelarangen nandangi pendahin kalak e. Adi la kin isampati kesah si badia, pasti la ngasup kalak e terus erberita.

8. Ise nge maksudna labang bas Ketangkasen 9:1-11? (Nen gambar bas sampul majalah enda.)

⁸ Baca Ketangkasen 9:1-11. Mari sinen alasen si peempatken. Mbarenda sikataken maka serangen labang si itulis Joel nggambarken pendahin erberita, perban nubuat si seri pe lit ka bas buku Ketangkasen. Bas nubuat e ikataken lit sada kelompok labang si ayona bali bagi ayo dilaki, janah “i datas takalna tempa lit bagi mahkota emas.” (Ket. 9:7) Isiksana “manusia [musuh-musuh Dibata] si la lit meterai i bas perdempakenna” janah e ilakokenna lima bulan dekahna, bage me kira-kira dekahna labang biasana  nggeluh. (Ket. 9:4, 5) Emaka, nubuat e pasti nggambarken umat Jahwe si ipilih ku surga. La kalak e mbiar mberitaken maka iukum Dibata pagi doni si jahat enda. Si e erban kalak si erpihak ku doni enda tersiksa.

9. Kai saja si la seri antara labang-labang si idah Joel ras si idah Johanes?

⁹ Memang, lit piga-piga perserina nubuat si lit bas buku Ketangkasen ras si lit bas buku Joel. Tapi, lit ka piga-piga si la seri janah e penting. Bas nubuat Joel ikataken maka keri ipan pasuken labang e kerina sinuan-sinuan. (Joel 1:4, 6, 7) Tapi, man labang-labang bas pengenehenen Johanes ipebetehken ‘gelah ula icedakenna sinuan si apai pe si lit i doni.’ (Ket. 9:4) Pasuken labang si idah Joel rehna arah utara nari. (Joel 2:20) Tapi labang-labang si idah Johanes, ndarat arah lubang si seh kel bagesna. (Ket. 9:2, 3) Pasuken labang si idah Joel ipelawes Jahwe, tapi pasuken labang si lit bas buku Ketangkasen la ipelawes malahen ipediat ndungi dahinna. La lit ikataken bas Pustaka maka la meriah ukur Jahwe ngidah kalak e.​—Nen kotak “ Dua Nubuat kerna Labang—Seri tapi Lit Bedana.”

10. Bereken contoh ayat-ayat si mbuktiken maka sada gambaren banci beda ertina.

¹⁰ Kenca siteh kai saja perbedan penting si lit bas duana nubuat e, banci siban kesimpulen maka duana nubuat e la lit hubungenna.  Emaka, la nge seri labang si lit bas buku Joel ras labang bas buku Ketangkasen? Lang. Bas Pustaka, mon-mon sada gambaren banci beda ertina tergantung uga gambaren e igunaken. Contohna, bas Ketangkasen 5:5, Jesus igelari “Singa i bas suku Juda nari,” tapi bas 1 Petrus 5:8, Iblis ikataken “singa si erngaung.” Kenca siukuri empat alasen si nggo sibahas ndai, jelas me perlu sidarami penjelasen si lebih masuk akal kerna nubuat Joel. Emaka mari sibahas mulihi nubuat e.

11. Kai si ikataken Joel 1:6 ras 2:1, 8, 11 si nampati kita ngangkai ise labang-labang e?

¹¹ Adi sinen ayat-ayat si deban bas nubuat Joel e, banci siangkai maka si sangana icakapken Joel eme kerna serangen militer. (Joel 1:6; 2:1, 8, 11) Ikataken Jahwe maka igunakenNa pagi “bala labang” (pasuken Babilon) guna ngukum kalak Israel si la patuh. (Joel 2:25) Pasuken e cocok igelari “bala labang si rehna i Utara nari” perban kalak Babilon reh nyerang Israel arah utara. (Joel 2:20) Pasuken e ipeseri ras labang-labang si teratur janah rapi. Nina Joel, “La [pasuken e] si jemba-jemban, . . . Radu ras ia kerina nerang kuta e, kiam ia arah babo tembok. Inangkihina rumah, jenari bengket ia arah jendela desken pinangko.” (Joel 2:8, 9) Banci nge bayangkenndu uga keadanna? I japa pe lit prajurit. La lit ingan cebuni. La lit si banci selamat arah pasuken Babilon!

12. Kai buktina nubuat Joel kerna pasuken labang nggo terjadi?

¹² Bali bagi labang ndai, iserang kalak Babilon kuta Jerusalem bas tahun 607 sope Masehi. Nina Pustaka, “Raja Babil munuhi kalak Juda si nguda denga . . . Man ise pe la icidahkenna perkuah atena, nguda ntah metua, dilaki ntah diberu, sakit ntah mejuah-juah. Iendesken Dibata ia kerina man raja Babil. Tembok kuta Jerusalem iruntuhkenna, kuta e icilukna atan pe Rumah Pertoton, istana-istana ras barangna si meherga si tading denga i je.” (2 Kro. 36:17, 19) Sanga nggo dung iserang kalak Babilon negeri e, bagenda ngenca banci ning kalak, ‘Negeri enda bali ras gurun pasir si la iingani manusia ntah pe rubia-rubia, janah nggo ibereken man kalak Babilon.’​—Jer. 32:43.

13. Jelasken kai erti Jeremia 16:16, 18.

¹³ Kira-kira 200 tahun kenca ipeseh Joel nubuatna e, igunaken Jahwe ka Jeremia gelah inubuatkenna keterangen si deban kerna serangen e. Ikataken Jeremia maka megermet kel pasuken e ndarami kalak Israel si jahat perbahanenna, janah itangkapina kerina kalak e. “Nina [Jahwe], ‘Kusuruh me reh nterem penjala nurung nangkapi bangsa enda. Kenca bage Kusuruh nterem perburu gelah iburuina kalak enda ku datas deleng-deleng, ku uruk-uruk dingen ku kelang-kelang batu mbelin. . . . Kubahan maka igalarina dua kali lipat dosa-dosana ras kejahatenna.’” I japa pe kalak Israel si la ertobat cebuni, la soal bas laut ntah pe kerangen, la banci kalak e selamat arah ukumen Jahwe.​—Jer. 16:16, 18.

14. Ndigan kata-kata bas Joel 2:28, 29 terjadi?

¹⁴ Lit ka berita si mehuli bas nubuat Joel. Mulihi ka pagi subur negeri Israel. (Joel 2:23-26) Janah, bas masa-masa si reh, seh ka kel pagi buena pangan rohani. Nina Jahwe, “Kubereken me kesahKu man kerina kalak; anak-anakndu si dilaki ras si diberu ernubuat . . . Kukuseken KesahKu subuk man suruh-suruhen si dilaki ntah si diberu.” (Joel 2:28, 29) La mis ibereken Dibata kesah si badia  man kalak Israel sanga kalak e mulih arah Babilon ku kuta kemulihenna. Tapi kenca ratusen tahun nge maka iberekenNa, eme sanga Pentakosta tahun 33 Masehi. Ja nari banci siteh?

15. Menurut Perbahanen Rasul-Rasul 2:16, 17, bagin si apai arah Joel 2:28 si iubah Petrus? Janah enda mbuktiken kai?

¹⁵ Alu penampat kesah si badia, ihubungken Rasul Petrus nubuat bas Joel 2:28, 29 ras kai si terjadi sanga wari Pentakosta. Kira-kira jam siwah erpagi-pagi, ibereken Dibata me kesah si badia. Kalak si ngalokenca mulai ngerana i bas melala bahasa “kerna perbahanen Dibata si luar biasa.” (Perb. 2:11) Ikutip Petrus nubuat bas buku Joel tapi iubahna sitik kata-katana. (Baca Perbahanen Rasul-Rasul 2:16, 17.) Perdiatekenndu nge kata-kata si apai si iubah Petrus? Bas bagin pertama kata-kata si ikutipna, la igunakenna kata-kata “kenca si e.” Ikataken Petrus maka “i bas wari-wari pendungi,” kesah si badia ibereken man “erbage jelma.” Wari-wari pendungi si imaksud Petrus eme wari-wari ope Jerusalem ras rumah pertoton ikernepken bas tahun 70 Masehi. Enda mbuktiken nubuat Joel e ndekah maka terjadi.

16. Kai pengaruh kesah si badia nandangi dahin erberita bas abad pertama? Janah kai pengaruhna seh ku jamanta?

¹⁶ Kenca ibereken Dibata kesah si badia man kalak Kristen bas abad pertama, mulai me reh majuna dahin erberita. Sanga itulis Rasul Paulus surat man kalak Kolose, kira-kira tahun 61 Masehi, banci ikatakenna maka berita si meriah nggo iberitaken “ku kerina ciptan si lit i teruh langit.” (Kol. 1:23) Bas jaman Paulus, “kerina ciptan” maksudna eme kerina kalak bas daerah-daerah si banci idahi Paulus bage pe kalak Kristen si debanna.  Perban isampati kesah si badia Jahwe, reh belangna ka dahin erberita si ilakoken bas jamanta, eme seh “ku belang-belang doni”!​—Perb. 13:47; nen kotak ‘ Kubereken me Kesah si Badia.’

17. Kai si berubah arah pengangkanta kerna pasuken labang si lit bas nubuat Joel?

¹⁷ Gundari pengangkanta kerna nubuat bas Joel 2:7-9 nggo reh tepatna. Enggo siteh maka maksud ayat-ayat e labo pendahin erberita si sangana silakoken alu semangat, tapi e sada nubuat kerna pasuken Babilon si nerang Jerusalem tahun 607 sope Masehi.

18. Kai si la berubah kerna umat Jahwe?

¹⁸ Kai si la berubah? Pengangkanta kerna nubuat bas Joel 2:7-9 memang nggo berubah. Tapi, semangatta bas erberita la pernah berubah. Umat Jahwe terus erberita i japa pe, janah melala cara si igunakenna. (Mat. 24:14) Aminna pe lit pemerentah si ngelarang pendahinta, la pernah kita ngadi erberita. Janah perban isampati Jahwe kita, reh buena si banci silakoken asangken si nggo-nggona. Pang kita mberitaken berita si meriah kerna Kerajan Dibata! Alu meteruk ukur, terus sipindo penampat Jahwe gelah banci siangkai nubuat Pustaka. Tek kita maka i bas waktu si tepat, pasti isampati Dibata Jahwe kita “ngangkai kerina kebenaren”!​—Joh. 16:13.